Category لاھور نامہ

خراب حال میٹرو بسوں میں سفر کرنے والے شہریوں کی سنی گئی، میٹرو بس کے نئے کنٹریکٹر ویڈا کی پہلی بس لاہور ڈپو پہنچ گئی۔ مزید 48 بسیں اگست کے وسط میں چائنہ سے کراچی پہنچیں گی۔

چائنہ سے بسوں کا پہلا فلیٹ کراچی بندرگاہ کے لئے بائیس جولائی کے بعد روانہ ہوگا، میٹرو بس کے نئے آپریٹر ویڈا کی پہلی بس لاہور پہنچا دی گئی ہے۔ میٹرو بس انتظامیہ نے بس کو ڈپو پر منتقل کردیا گیا۔ میٹرو بسوں کے فلیٹ کو ستمبر سے باقاعدہ آن ٹریک کیا جانا ممکن ہوسکے گا۔ اس وقت میٹرو بسوں کی خستہ حالی کے باعث آئے روز بسیں حادثات کا شکار ہوتی ہیں۔

واضح رہےکلمہ چوک کے قریب میٹرو بس کی خرابی کے باعث بس کو ٹریک پر ہی ایک جانب کھڑا کردیا گیا تھا،بس کی خرابی پر مسافروں کو راہ میں ہی بس سے اتار کر دوسری بس میں منتقل کیا گیا جس کے لئے مسافروں کو خاصا انتظار بھی کرنا پڑا، رواں ماہ میٹرو بس کے خراب ہونے کا یہ تیسرا بڑا واقعہ ہے۔

اس سے قبل گزشتہ ماہ میٹرو بس کے پوری طرح جلنے کا واقعہ بھی پیش آچکا ہے جبکہ متعدد بسوں کی پریشر بریک فیل ہونا معمول بن چکا ہے، میٹرو بسوں کی فلیٹ میں تعداد باسٹھ ہے جس میں دس پہلے ہی خراب ہوچکی ہیں جبکہ سات بسوں کی مزید خراب سے آن ٹریک بسوں کی تعداد پینتالیس سے زائد رہ گئی ہے جن میں متعدد بسوں کے اے سی خراب ہوچکے ہیں ۔

میٹرو بس انتظامیہ خراب بسوں کا ملبہ آپریٹرز پر ڈال رہی ہے لیکن آپریٹر کو بری کارکردگی پر جرمانہ اور سزا نہ دینا پنجاب ماس ٹرانزٹ اتھارٹی کی کارکردگی پر سوالیہ نشان ہے۔

شہر میں کورونا وائرس کے کیسز میں ایک بار پھر سے اضافہ دیکھنے میں آ رہا ہے اورچوبیس گھنٹوں میں لاہور میں161 کیسز رپورٹ ہوئے۔

تفصیلات کے مطابق کورونا وائرس نے دنیا کے ہر شعبے کو شدید متاثر کیا پاکستان میں بھی کورونا کے سبب متعدد قیمتی جانوں کا ضیاع ہوا جبکہ ملکی معیشت بھی متاثر ہوئی گزشتہ دنوں لاہور میں کورونا کی مثبت شرح میں کمی آئی تھی تاہم اب مثبت شرح ایک بار پھر تشویش ناک اضافے کے ساتھ 5.4، ریکارڈ کی گئی جبکہ 1 شخص جان کی بازی ہار گیا۔

لکریم سوسائٹی تاجپورہ میں کرائے دار نے ضعیف بیوہ عورت سے دھوکہ دہی سے لاکھوں روپے ہتھیا لیے۔

تفصیلات کے مطابق نوسرباز کرائے دارتیمور احمد بیوہ مالکن مکان شہناز جاوید کو لاکھوں روپے کا چونا لگا کر فرار ہو گیا۔ بیوہ مالکن مکان شہناز جاوید کے مطابق نوسرباز کرائے دار تیمور احمد نے اسے گاڑی لیکر دینے کے بہانے بینک سے 34لاکھ نکلوائے جس کے بعد تیمور احمد نے گاڑی ہنڈا سوک نمبرایل ای 5892 اے اپنے نام کرائی ،فرار ہوگیا ۔تین ماہ سے گراونڈ فلوز کو تالا لگا کر کرائے دار فرار ہے۔

دھوکہ دہی کی شکار رہونے والی ضعیف خاتون شہناز جاوید نے تھانہ سرور روڈ میں 2ماہ قبل درخواست دی تھی تاہم پولیس کارروائی سے گریزاں ہے، خاتون نے اعلی افسران سے مطالبہ کیا ہے کہ کرائے دارتیمور احمد ساری عمر کی جمع پونجی لے گیا ، انصاف دلایا جائے۔

نواب ٹاؤن میں25سالہ لڑکی نےسی ایس ایس کےامتحان میں مسلسل ناکامی پردلبرداشتہ ہوکر زندگی کا خاتمہ کر لیا ،پولیس نے پنکھے سے جھو لٹکتی ندا کی لاش اورخودکشی سے پہلے لکھی گئی تحریر قبضےمیں لے لی۔

تفصیلات کے مطابق نشیمن اقبال فیز ون میں واقع دو کمروں کے اپارٹمنٹ سے ندا اکبر خان کی پنکھے سے لٹکتی ہوئی لاش ملی تھی ،لڑکی کی دوست کی طرف سے اطلاع ملنے پر پولیس موقع پر پہنچی۔پولیس کا کہنا ہے کہ ندا اکبر سی ایس ایس کے امتحان میں دو بار ناکام ہوئی ، مایوس ہو کر ندا نے زندگی کا خاتمہ کرلیا ،

لاش کے قریب سے ملنے والی تحریر میں ندا نے اپنی ناکامی کا اعتراف کیا ۔پولیس کے مطابق ندا اکبر کا تعلق ملتان سے ہے ، چند روز قبل اپنی والدہ کے ہمراہ لاہور آئی،پولیس اور فرانزک ٹیمیں نے جائے وقوعہ سے شواہد اکھٹےکرلیے۔پولیس کا کہنا ہے ورثا کی طرف سے درخواست موصول ہونے پر کارروائی کی جائے گی۔

حادثہ یا گھریلو ناچاکیاں شوہر نے مبینہ طور پر بیوی کو زندہ جلا دیا، جس کے خلاف پولیس نے کارروائی شروع کر دی۔

لاہور کے علاقے کاہنہ میں افسوسنا ک واقعہ پیش آیا جہاں نشے کے عادی شوہر نے بیوی کو زندہ جلادیا۔ 5 بچوں کی ماں نائلہ کو شوہر زبیر نے زندہ جلا کر لاش کو گھر میں چھپا دیا۔ پولیس نے موقع پر پہنچ کر کارروائی شروع کردی جبکہ ملزم فرار ہوگیا۔ پولیس کے مطابق مقتولہ نائلہ کا شوہر زبیر نشے کا عادی تھا، گزشتہ رات نائلہ کے بچے نانی کی طرف گئے تھے۔ لواحقین نے الزام عائد کیا ہے کہ ہماری بیٹی کو شوہر کے ساتھ سسرالیوں نے بھی جلایا۔

دوسری جانب لرزہ خیز وارداتوں میں قتل ہونے والی خواتین کے ملزم آزاد گھوم رہے ہیں جبکہ مقتولین کے ورثاءحصول انصاف کے لئے دربدرکی ٹھوکریں کھانے پر مجبور ہیں۔ تازہ رپورٹ کے مطابق چھ دنوں میں سات خواتین کو قتل کردیا گیا،ملزمان تاحال کوئی گرفتار نہ کیا جا سکا۔ لاہورمیں 11 جولائی کو ڈیفنس میں ماڈل نایاب قتل ہوئی، 12 جولائی کو شادباغ میں نسیم بی بی کا قتل ہوا۔ 14 جولائی کو شیراکوٹ میں رانی بی بی کو موت کے گھاٹ اتارا گیا، 15 جولائی کو تین خواتین کی ہلاکت ہوئی، نہر سے نامعلوم خاتون کی تشدد زدہ لاش ملی اور مناواں میں چچا نے فائرنگ کرکے بھتیجی کی جان لے لی۔

وزیراعظم کے معاون خصوصی برائے صحت ڈاکٹر فیصل سلطان نے ملک میں کورونا کے بڑھتے ہوئے کیسز کے پیش نظر عیدالاضحیٰ پر پابندیوں کا عندیہ دیدیا۔

وزیراعظم کے معاون خصوصی ڈاکٹر فیصل سلطان نے نجی ٹی وی کے مارننگ شو میں گفتگو کرتے ہوئے کہا کہ اعدادوشمار بتارہے ہیں کہ ملک میں کورونا کی چوتھی لہر آرہی ہے، جب بھی کوئی نیا ویرینٹ آتا ہے تو آسانی سے پھیلتا ہے، موجودہ بھارتی ویرینٹ 50 سے 60 فیصد تیزی سے پھیل رہا ہے۔

ایک سوال کے جواب میں ڈاکٹر فیصل سلطان کا کہنا تھا کہ این سی او سی روزانہ کی بنیاد پر فیصلے کرتی ہے اور موجودہ حالات بتا رہے کہ عیدالاضحیٰ بہت محدود پیمانے پر ہو گی، ہماری توجہ بین الصوبائی ٹرانسپورٹ بند کرنے کے بجائے متاثرہ علاقوں پر ہے، متاثرہ علاقوں میں زیادہ پابندیاں لگائی جائیں گی، عید الاضحیٰ پر پبلک ٹرانسپورٹ بند ہوگی، سیاحت کے مقام پر ویکسینیشن والے افراد کو داخلے کی اجازت ہوگی۔

کورونا ویکسین کے سوال پر بات کرتے ہوئے کہا کہ کوئی بھی ویکسین 100 فیصد موثر نہیں ہوتی لیکن بہت ضروری ہے کہ تمام لوگوں کو کورونا ویکسین کی کم از کم ایک خوراک لگائی جائے، موجودہ ویکسین تمام ویرینٹس پر اثرانداز ہوتی ہے۔

سندھ حکومت کی جانب سے کورونا پابندیوں کی تائید کرتے ہوئے معاون خصوصی کا کہنا تھا کہ سندھ حکومت کا فیصلہ بہتر ہے، میں ان فیصلوں سے متفق ہوں کیونکہ کراچی میں کورونا کے مثبت کیسز کی شرح 19 فیصد تک پہنچ چکی ہے۔

علاوہ ازیں ڈاکٹر فیصل سلطان نے اپنے ٹوئٹ میں کہا کہ کراچی میں کورونا کے مثبت کیسز کی شرح 19، پشاور میں 9.4، اسلام آباد میں 6.2 جبکہ لاہور میں 3.8 فیصد ہے، عوام نے ویکسین بھی لگوا رکھی ہے تب تب بھی ماسک پہنیں۔

ڈی سی مدثر ریاض کی غیرقانونی طور پر مویشی منڈیاں قائم کرنے والوں کے خلاف کریک ڈاؤن کی ہدایت، کہتے ہیں نجی پراپرٹی یا بازار میں غیر قانونی منڈی لگانے کی ہرگز اجازت نہیں ہے۔

ڈی سی لاہور کا کہنا ہےضلعی انتظامیہ کی جانب سے صرف مقرر کردہ جگہوں پر جانوروں کی خریدوفروخت کی اجازت ہے۔ کسی نجی پراپرٹی یا بازار میں غیر قانونی منڈی لگانے والوں کے خلاف قانونی کارروائی کی جائے گی۔ ڈی سی نے ہدایت کی ہے کہ عوام الناس ضلعی انتظامیہ کی جانب سے مقرر کردہ منڈیوں میں جانوروں کی خریدوفروخت کریں-ضلعی انتظامیہ لاہور کی جانب سے 12 مقامات پر مویشی منڈیاں قائم کی گئی ہیں۔

ڈی سی کا مزید کہنا ہے کورونا ایس او پیز پر عملدرآمد کرتے ہوئے منڈیوں میں جانور خریدیں۔ انہوں نے تمام اسسٹنٹ کمشنرز کو غیر قانونی طور پر قائم مویشی منڈیوں کے خلاف سخت سے سخت کارروائیاں کرنے کی ہدایات جاری کردی ہیں۔

گاڑیوں اور موٹرسائیکلوں کی خریداری میں ایک سال کے دوران پچیس فیصد اضافہ، لاہور میں پچھلے مالی سال کے دوران ساڑھے 58ہزار کاریں، 2 لاکھ 92 ہزار موٹر سائیکلیں رجسٹرڈ کروائی گئیں۔ پرکشش نمبروں کی مد میں 14کروڑ 84 لاکھ روپے لٹا دیئے گئے۔

تفصیلات کے مطابق لاہوریوں نے گزشتہ مالی سال میں ساڑھے 58ہزار کاریں اور لگژری گاڑیاں رجسٹرڈ کروائیں، گزشتہ سال میں کورونا کے باوجود 2لاکھ 92ہزار موٹرسائیکلیں جبکہ 13ہزار بسیں، ٹرک اور ویگنیں رجسٹرڈ کروائی گئیں۔ ایکسائز کو رجسٹریشن اور ٹوکن ٹیکس کی مد میں 7ارب 62کروڑ کی رقم وصول ہوئی، رجسٹریشن کی مد میں 4ارب 84لاکھ جبکہ ٹوکن ٹیکس کی مد میں 3ارب 7کروڑ کی رقم وصول ہوئی۔

پُرکشش نمبروں کی نیلامی کی مد میں شہریوں نے 14کروڑ 84لاکھ روپے لٹا دیئے، گزشتہ مالی سال کے دوران گاڑیوں کی 91آن لائن نیلامیوں میں 9کروڑ 12لاکھ روپے کے پُرکشش نمبر خریدے گئے۔ لاہوریوں نے موٹرسائیکلوں کے پرکشش نمبروں کی 155 نیلامیوں میں 5کروڑ 60لاکھ روپے لٹائے، گزشتہ مالی سال میں 2019۔20 کی نسبت 35فیصد اضافی گاڑیاں وموٹرسائیکلیں رجسٹرڈ ہوئیں۔ پنجاب بھر میں ایکسائز نے ریکارڈ ساڑھے 13ارب روپے موٹرٹیکس اکٹھا کیا۔

جعلی چالان بک کے ذریعے شہریوں کو چونا لگانے والے پانچ ٹریفک وارڈنز معطل کر دئیے گئے، ٹریفک وارڈنز نے اپنی جیبیں بھرنے کیلئے جعلی چالان بکس چھپوا رکھی تھیں۔

رپورٹ کے مطابق ڈی آئی جی ٹریفک عمران محمود نے ٹریفک پولیس لاہور کے ان پانچ وارڈنز کو معطل کر دیا ہے۔ کاہنہ سرکل میں تعینات ٹریفک وارڈنز افتخار، عظیم، نوازش علی، طارق اور منظر عباس کو معطل کیا گیا ہے۔ معطل ہونے والے ٹریفک وارڈنز کے خلاف تھانہ کاہنہ میں مقدمہ درج کیا گیا تھا جبکہ معطل وارڈنز کی تنخواہیں اور الاؤنسز بھی بند کر دئیے گئے ہیں۔ ٹریفک وارڈنز نے اپنی جیبیں بھرنے کیلئے جعلی چالان بک چھپوا رکھی تھیں اور کسی بھی جگہ ناکہ لگا کر موٹر سائیکل سواروں اور پبلک ٹرانسپورٹ کے اندھا دھند جعلی چالان کرکے رقم وصول کرتے تھے.

مناواں کے علاقے میں اکیس سالہ لڑکی کو سگے چچا نے فائرنگ کر کے قتل کردیا۔ ملزم موقع سے فرار جبکہ پولیس نے تحقیقات شروع کردیں۔

تھانہ مناواں کے علاقے اعوان ڈھائے والا میں چچا نے فائرنگ کر کے اکیس سالہ شکریہ بی بی کو قتل کردیا۔ پولیس کے مطابق مقتولہ کی تین سال قبل شادی ہوئی تھی، اپنے میکے آئی ہوئی تھی۔چچا فیصل نے ذاتی رنجش پر فائرنگ کر کے شکریہ بی بی کو قتل کیا۔ پولیس نے لاش تحویل میں لیکر تحقیقات شروع کردی ہیں۔پولیس کا کہنا ہے کہ ورثا کی جانب سے درخواست موصول ہونے پر مزید قانونی کارروائی عمل میں لائی جائے گی۔