Category لاھور نامہ

کورونا کی بھارتی قسم ڈیلٹا کے لاہور میں کیسز کی طبی ماہرین نے تصدیق کر دی .شہر میں کورونا وائرس کی قسم ڈیلٹا کے مریض رپورٹ ہورہے ہیں.

پروفیسر تنویر السلام کا کہنا ہے کہ کورونا کی قسم ڈیلٹا تیزی سے پھیلنے کی خاصیت رکھتی ہے. کورونا کی ڈیلٹا قسم میں سر درد اور پیٹ کی خرابی ابتدائی علامات میں سامنے آرہی ہیں. کورونا کی ڈیلٹا قسم سے گھر میں ایک فرد بھی متاثر ہوا تو سب کو لپیٹ میں لے سکتا ہے. طبی ماہر پروفیسر تنویر السلام کا کہنا ہے کہ چینی ویکسین کس حد تک کورونا کی ڈیلٹا قسم کے خلاف موثر ہے کچھ کہنا قبل از وقت ہوگا۔

پروفیسر تنویر السلام نے تنبیہ کی کہ کورونا کی انڈین قسم ڈیلٹا سے محفوظ رہنے کیلئے پہلے سے زیادہ احتیاط برتنا ہوگی. کورونا کی قسم ڈیلٹا کے سیریس مریض ابھی تک بہت کم ہیں. کورونا کی بروقت تشخیص اور علاج سے بیماری کی شدت سے بچا جاسکتا ہے. کورونا وائرس کی ڈیلٹا قسم سے بچنے کیلئے لاک ڈاون کا نفاذ کرنا پڑ سکتا ہے. ڈیلٹا قسم سے کورونا کیسز دوبارہ بڑھ رہے ہیں، جن افراد کو کورونا کی علامات ہوں وہ لازمی ماسک استعمال کریں .

انسداد ڈینگی مہم کی سرویلنس کیلئے ایڈیشنل ڈپٹی کمشنرز اور اسسٹنٹ کمشنرز کو زون کی سطح پر ڈیوٹیاں سونپ دی گئیں، ڈی سی لاہور مدثر ریاض ملک نے باقاعدہ طور پر نوٹیفکیشن جاری کر دیا۔

ایڈیشنل ڈپٹی کمشنر ریونیو لاہور عبدالرؤف مہر کو داتا گنج بخش زون، ایڈیشنل ڈپٹی کمشنر جنرل لاہور شاہد عباس کاٹھیا کو واہگہ زون کی سرویلنس کی ذمہ داری سونپ دی گئی، ایڈیشنل ڈپٹی کمشنر ایف اینڈ پی انعم زید کو گلبرگ، ایڈیشنل ڈپٹی کمشنر ہیڈکوارٹر لاہور محمد موسیٰ کو کینٹ زون کی سرویلنس کی ذمہ داری سونپی گئی ہے۔

نوٹیفکیشن کے مطابق اسسٹنٹ کمشنر شالیمار منصور قاضی کو شالیمار، اسسٹنٹ کمشنر سٹی سردارفیضان کو راوی زون، اسسٹنٹ کمشنر رائیونڈ عدنان رشید کو علامہ اقبال زون کی سرویلنس کی ذمہ داری دی گئی ہے جبکہ اسسٹنٹ کمشنر ماڈل ٹاؤن ارباب ابراہیم کو نشتر زون، اسسٹنٹ کمشنر کینٹ ذیشان نصراللہ رانجھا کو عزیز بھٹی زون کی سرویلنس، اسسٹنٹ کمشنر ایچ آرمحمد اویس کو سمن آباد زون کی سرویلنس و مانیٹرنگ کی ذمہ داری سونپی گئی ۔

ڈی سی لاہور نے تمام افسران کو انسداد ڈینگی مہم پر مامور ٹیموں کے کام کو چیک کرنے اور سرویلنس کی کوالٹی کو مزید بہتر بنانے کی ہدایت کردی، تمام افسران کو زون کی سطح پر آگاہی مہم کو مانیٹر کرنے کی ہدایت کی گئی ہے۔

سوشل میڈیا کے بڑھتے استعمال نے پوری دنیا کے لوگوں کو ایک دوسرے کے قریب کر دیا ہے۔ کوئی بھی شخص ایک ملک سے کسی بھی دوسرے ملک میں رہنے والے لوگوں سے بات چیت اور دوستی کر سکتا ہے۔ اکثر دیکھا گیا ہے کہ یہ دوستی بہت جلد رشتے میں بدل جاتی ہے،تاہم کبھی کبھی ان رشتوں کا انجام دھوکہ دہی کی صورت میں بھی سامنے آتا ہے۔

پولیس کے مطابق غیر ملکی خاتون کو لاری اڈاہ میں بے آسرا دیکھ کر مقامی افراد نے پولیس کو اطلاع دی۔ پولیس موقع پر پہنچی تو خاتون انگریزی اور اردو زبان سے نا بلد تھی۔ پولیس نے اشاروں کی زبان میں بات کرنے کی کوشش کی تو پتہ چلا کہ وہ خاتون ترکش ہے، جس کے بعد پولیس نے خاتون کو ترک قونصلیٹ کے حوالے کر دیا۔

ایس ایچ او جمیل احمد کے مطابق قونصلیٹ نے انہیں بتایا کہ ترک خاتون کو سوشل میڈیا پر شادی کے لیے پاکستان بلایا گیا۔ خاتون سے فیس ٹو فیس ملاقات میں لڑکے نے بڑی عمر کا بہانہ بنا کر شادی سے انکار کر دیا اور اس کو لاری اڈہ چھوڑ کر فرار ہو گیا۔ پولیس حکام کا کہنا تھا کہ خاتون اس کیخلاف کوئی کارروائی نہیں کروانا چاہتی تھی اس لیے قانونی کارروائی نہیں کی جا سکی۔

عمر اکمل نے آٹوگراف لینے کیلیے گھر آنے والے پرستاروں کو حوالات کی سیر کروادی۔

پولیس ذرائع کے مطابق ایک برطانوی شہری سمیت 4 افراد کرکٹر کی رہائش گاہ پر آئے تو تکرار ہوگئی، عمر اکمل نے 15 پر کال کردی جس پر پولیس مداحوں کو گرفتار کرکے تھانے لے گئی، معلوم ہوا ہے کہ ڈیفنس فیز 5 میں مقیم عمر اکمل کے پڑوس کے ایک گھر میں برطانوی شہری مہمان تھا، کرکٹر کی رہائش قریب ہونے کا معلوم ہوا تو اس نے کہا کہ میں عمر اکمل کا پرستار اور آٹو گراف لینا چاہتا ہوں لہذا صبح 9بجے کے قریب عمر اکمل کی رہائش گاہ پر گئے تو تکرار ہوگئی۔

دوسری جانب مخالف پارٹی نے بھی عمر اکمل کے خلاف درخواست جمع کروا دی ہے جس میں کہا گیا ہے کہ عمر اکمل کے پڑوسی ابراہیم کے گھر آئے تھے، آٹو گراف اور سیلفی کیلیے کہا تو انہوں نے گالم گلوچ شروع کردی، عمر اکمل نے اپنے ملازمین کے ساتھ مل کر تشدد کا نشانہ بنایا۔

پنجاب میں انٹر کے امتحانات کا آغاز ہوگیا۔ لاہور میں امیدواروں کیلئے 462 امتحانی مراکز قائم کئے گئے جبکہ سینٹرز کے باہر دفعہ 144 نافذ کی گئی ہے۔

چیرمین لاہور بورڈ کا کہنا ہے کہ امتحانات کے لئے تمام انتظامات مکمل ہیں، بوٹی مافیا اور بیرونی عناصر کے خلاف سخت کارروائی کے لیے دفعہ 144 کا نفاذ کیا گیا، دوران امتحانی اوقات لوڈشیڈنگ نہ کرنے کی لیسکو چیف کو درخواست کی گئی ہے، تمام موبائل انسپکٹرز کو روزانہ کی بنیاد پر رپورٹ جمع کرانے کی ہدایت کی ہے۔

انہوں نے کہا کہ دانش سکولوں کے طلبا و طالبات کے لیے حاصل پور، چشتیاں، رحیم یار خاں، حرنولی پور، ڈی جی خاں، فاضل پور اور لاہور جند میں ایک ایک امتحانی مرکز قائم کیا گیا، ضلع قصور میں لڑکیوں کے لیے 37، لڑکوں کے لئے 32، ضلع شیخوپورہ میں لڑکیوں کے 33 اور لڑکوں کے 25 سنٹرز قائم کئے گئے ہیں۔

ادھر خیبرپختونخوا میں میٹرک اور انٹر کے امتحانات شروع ہوگئے، صوبہ بھر کے تمام 8 بورڈز کے 14 لاکھ 15 ہزار 360 امیدوارامتحانات میں شرکت کریں گے، آج پہلا پرچہ جماعت دہم کا لیا جا رہا ہے۔ کورونا وائرس کے باعث امتحانات کو صرف اختیاری مضامین تک محدود کر دیا گیا ہے۔ میٹرک کے چار اور انٹر کے تین مضامین میں امتحان لیا جا رہا ہے۔

محمکہ تعلیم کے مطابق امتحانی ہالوں میں نقل کی روک تھام کے لئے سی سی ٹی وی کیمرے نصب کر دیئے گئے ہیں، صوبے میں 2 ہزار جبکہ پشاور میں تقریباً 960 ہالز میں امتحان لیا جائے گا جبکہ امتحانی عملے کی ڈیوٹی کورونا ویکسینشن سے مشروط کر دی گئی۔ ہالز میں موبائل فون اور دیگر برقی آلات پر مکمل پابندی عائد کر دی گئی۔

کورونا وائرس کی چوتھی لہر کے خطرے کے پیش نظر سیکرٹری پرائمری اینڈ سیکنڈری ہیلتھ کیئر نے الرٹ جاری کر دیا، ڈائریکٹر جنرل ہیلتھ اور چیف ایگزیکٹو آفیسر، ڈسٹرکٹ ہیلتھ اتھارٹیز کو چوتھی لہر سے متعلق اقدامات کےلیے ہدایات جاری، سیکرٹری ہیلتھ سارہ اسلم نے سمارٹ لاک ڈاؤن کا عندیہ دے دیا۔

تفصیلات کے مطابق کورونا وائرس کی چوتھی لہر کے خطرے کے پیش نظر سیکرٹری پرائمری اینڈ سیکنڈری ہیلتھ کیئر سارہ اسلم نے الرٹ جاری کر دیا،ڈی جی ایچ ایس آفس اور سی ای اوز ڈسٹرکٹ ہیلتھ اتھارٹیز کو ہدایات جاری کر دیں جبکہ کیسز بڑھنے کے پیشن نظر سمارٹ لاک ڈاون کا عندیہ دے دیا، سیکرٹری ہیلتھ کیئر سارہ اسلم نے کہاہےکہ اگر ایس او پیز پر عمل نہ کیا گیا توپر ہجوم جگہوں کو دوبارہ بند کیا جا سکتا ہے۔

کورونا کی چوتھی لہر کا سامنا کرنا پڑ سکتا ہے،چوتھی لہر سے بچنے کے لیے شہریوں کو بھی ذمہ داری کا مظاہرہ کرنا ہو گا،کچھ دنوں سے مثبت شرح میں اضافہ دیکھا جا رہا ہےصورتحال بگڑنے سے پہلے ایس او پیز اپنا لیں تمام کاروباری مراکز اپنے متعلقہ ایس او پیز اور خصوصا ماسک کو یقینی بنائیں،سارہ اسلم نے کہاکہ شہری ماسک پہنیں ، ہاتھ دھوئیں،ہینڈسینیٹائزر استعمال کریں۔

کورونا سے بچاؤ صرف بروقت ویکسی نیشن ہےپنجاب کی عوام سے گزارش ہے کہ حفاظتی تدابیر اختیار کرکے خود کو محفوظ بنائیں اور بلاضرورت گھر سے باہر نکلنے سے پرہیز کریں پر ہجوم جگہوں پر نہ جائیں،سماجی فاصلہ برقرار رکھیں اور ماسک کا استعمال لازمی کریں 18سال سے زائد عمر کے تمام شہری کورونا وائرس سے بچاؤ کی ویکسین لازمی لگوائیں،تمام سنٹرز پر ویکسین وافر مقدار میں موجود ہے۔

واضح رہے کہ وزیراعلیٰ پنجاب نے اپنے بیان میں کہا ہے کہ بے احتیاطی اورایس او پیز پر عملدرآمد نہ کرنے سے کیسوں میں اضافے کا خدشہ ہے،خدانخواستہ مثبت کیسز کی شرح میں اضافہ ہوا تو ایک بار پھر سمارٹ لاک ڈاؤن کرنا پڑے گا،پابندیوں سے بچنے کے لئے شہریوں کو احتیاط کا دامن ہاتھ سے نہیں چھوڑنا چاہیے،شہریوں سے اپیل کرتے ہوئے ان کا مزید کہنا تھا کہ وہ ماسک کا استعمال کریں اورسماجی فاصلے برقرار رکھیں۔

شہر لاہور میں ٹریفک حادثات کا سلسلہ تھم نہ سکا ۔ گزشتہ 24 گھنٹوں کےدوران ریسکیو 1122 کومختلف علاقوں میں ہونےوالے237 ٹریفک حادثات رپورٹ ہوئے ۔

ریسکیو1122 کے اعداد و شمار کے مطابق گزشتہ 24 گھنٹوں کے دوران شہر کے مختلف علاقوں میں ہونے والے 237 ٹریفک حادثات پر امدادی ٹیمیں روانہ کی گئیں۔حادثات میں مجموعی طور پر 223 افراد زخمی ہوئے۔91 زخمیوں کو فوری طبی امداد کے لئے مقامی ہسپتالوں میں منتقل کیا گیا جبکہ 132 معمولی زخمیوں کو موقع پر فرسٹ ایڈ فراہم کی گئی۔

ریسکیو حکام کا کہنا ہے کہ ٹریفک حادثات تیز رفتاری، غفلت برتنے اور ٹریفک قوانین کی خلاف ورزی کے باعث پیش آئے ۔

موتی مسجد بحالی کے بعد سیاحوں کے لئے کھول دی گئی جبکہ بحالی کے منصوبے پر 10 ملین روپے لاگت آئی ہے۔

تفصیلات کےمطابق موتی مسجد بحالی کے بعد سیاحوں کے لئے کھول دی گئی۔ترجمان والڈسٹی اتھارٹی کے مطابق شاہی قلعہ لاہور میں موتی مسجد کی بحالی کا کام مکمل کرلیاگیا۔بحالی کے منصوبے پر 10 ملین روپے لاگت آئی ہے۔بحالی کے کام میں ساخت کی مرمت ، سنگ مرمر کے کام اور مسجد کی صفائی شامل ہے۔مسجد کے گنبد بھی بحال کردیئے گئے ہیں۔بحالی کا کام ایک سال کے عرصے میں مکمل کیاگیاہے۔

واضح رہے شاہی قلعہ میں موجود موتی مسجد کے صحن سے بحالی کے کام کے دوران توشہ خانہ کی دریافت ہوئی ہے، آٹھ فٹ گہرے اور آٹھ فٹ چوڑے توشہ خانے کی دیواروں پر خستہ حالی لوہے کی شیٹس بھی موجود ہیں۔والڈ سٹی کے انجینئر حافظ عمر کا کہنا ہے کہ اس کی بناوٹ اور استعمال ہونے والے میٹریل سے اندازہ لگایا گیا ہے۔سکھ دور میں موتی مسجد کو موتی مندر کے طور پر استعمال کیا جاتا رہا ہے۔ماہرین کا خیال ہے کہ اسی دوران یہ توشہ خانہ تعمیر کیا گیا تھا۔

الیکشن کمیشن نے کنٹونمنٹ انتخابات کا شیڈول جاری کر دیا، ملک بھر کے 42 کنٹونمنٹ بورڈز میں پولنگ 12 ستمبر کو ہو گی۔

الیکشن کمیشن کی جانب سے کہا گیا ہے کہ کاغذات نامزدگی 26 سے 29 جولائی تک جمع کرائے جا سکتے ہیں، کاغذات نامزدگی کی سکروٹنی 31 جولائی سے 3 اگست تک ہوگی، امیدواروں کی انتخابی نشانات کے ہمراہ حتمی فہرست 13 اگست کو جاری ہوگی جبکہ ریٹرننگ افسران 17 ستمبر کو کامیاب امیدواروں کے نتائج جاری کرینگے۔

الیکشن کمیشن نے انتخابات کے شیڈول کے اجرا کے ساتھ ہی کنٹونمنٹس بورڈز میں ترقیاتی کاموں اور تقرر تبادلوں پر پابندی لگا دی۔

شاہ پور کانجراں مویشی منڈی میں عمران خان اور عثمان بزدار مرکز نگاہ، لاڈ پیار سے پلے بیلوں کی قیمت 40 لاکھ روپے مقرر جبکہ صحرائی جہاز اونٹوں نے بھی شہریوں کو اپنا گرویدہ بنا لیا۔

مویشی منڈیوں میں صارفین کی توجہ حاصل کرنے کیلئے جانوروں کے دلچسپ نام رکھے جاتے ہیں۔ شاہ پور کانجراں منڈی میں تحریک انصاف کے شیدائی بیوپاری نے اپنے بیلوں کے نام عمران خان اور عثمان بزدار رکھے ہیں۔ ہیوی ویٹ بیلوں کی قیمت 40 لاکھ روپے مقرر کی گئی ہے۔شاہ پور کانجراں منڈی میں صحرائی جہاز اونٹوں نے بھی انٹری ڈال دی ہے،خوبصورت نقش و نگار والے اونٹوں کی قیمت 2 لاکھ سے 15 لاکھ تک رکھی گئی ہے۔

منڈی کے ترجمان اسد شیخ کا کہنا ہے کہ منڈی میں پانی، بجلی اور چارہ سمیت سکیورٹی کی سہولتیں یقینی بنائی گئی ہیں۔انتظامیہ نے شہریوں سے اپیل کی ہے کہ وہ چھوٹے بچوں اور بزرگوں کو منڈی نہ لائیں اور کورونا ایس او پیز کا خیال رکھیں۔