Category لاھور نامہ

8ماہ بعد بھی اورنج لائن ٹرین کے فیڈر روٹس نہیں بنائے جا سکے، مسافروں کا ٹارگٹ پورا کرنے کے لیے 26 فیڈر روٹس بنائے جانے تھے

تفصیلات کےمطابق محکمہ ٹرانسپورٹ کی ناقص پالیسیاں یا نا اہلی،اورنج لائن ٹرین کو آپریشنل ہوئے8ماہ گزر گئے مگر فیڈر روٹس کی پلاننگ نہیں کی جا سکی،اورنج لائن ٹرین کیلئے 26 فیڈر روٹس بنائےجانے تھے،فیڈر روٹس نہ بننے سے اورنج لائن ٹرین میں سفر کرنے والے مسافروں کا ٹارگٹ پورا نہیں کیا جا سکا،ذرائع کے مطابق بسوں کی شارٹیج کے پیش نظر محکمہ ٹرانسپورٹ کو سپیڈو بسوں کے روٹس کو ری ڈیزائن کرکے اورنج لائن ٹرین کے لیے بطور فیڈر روٹس استعمال کرنے کی ہدایات کی گئیں۔

8 ماہ کا عرصہ گزرنے کے بعد بھی نئے فیڈر روٹس نہیں بنائے گئےاور نہ ہی سپیڈو روٹس کو ری ڈیزائن کیا جا سکا،فیڈر روٹس نہ بننے سے اورنج لائن ٹرین کا ریونیو ٹارگٹ بھی بری طرح متاثر ہو رہا ہے ،اورنج لائن ٹرین پر روازنہ دو لاکھ مسافروں کے سفر کرنے کا ٹارگٹ رکھا گیا تھا،اورنج لائن ٹرین پر روزانہ 50 سے 70 ہزار مسافر سفر کر رہے ہیں۔

لاہورمیں پولیس نے کم سن بچے کے اندھے قتل کاسراغ لگالیا،8 سالہ مبین کو 10 سالہ زید اور8 سالہ علی شیرنےقتل کیا،ننھے ملزموں نے مبین کو معمولی تلخ کلامی پراینٹیں مارمارکرقتل کیا اورپھر لاش کھیتوں میں دبادی۔

تفصیلات کے مطابق ایس ایچ اونشتر کالونی عبد الواحد نےٹیم کے ہمراہ کارروائی کی،8سالہ مبین کے اندھے قتل کی واردات میں ملوث2ملزم کو گرفتار کیاگیا،مقتول مبین کے اغوا،قتل کامقدمہ16اپریل کوتھانہ کاہنہ میں درج کیا گیا تھا،گرفتارملزموں میں8سالہ علی شیراور10سالہ زید شامل ہیں،ملزموں نےدوران تفتیش قتل کی ہولناک واردات کا ا عتراف کرلیا۔

ایس ڈی پی اوکاہنہ شعیب میمن کاکہناتھا کہ ملزموں نےمبین کومعمولی تلخ کلامی پرانیٹیں مارکرقتل کیا،قتل کےبعدمقتول کی لاش کوکھیتوں میں دبادیاتھا۔

یکم جولائی سے موٹر سائیکلوں کے ٹوکن ٹیکس میں اضافہ،الیکٹرک گاڑیوں کی رجسٹریشن فیس میں 50فیصدجبکہ ٹوکن ٹیکس میں 75فیصد کمی،پراپرٹی ٹیکس دواقساط میں جمع کروانے کی قانونی اجازت،مالی سال کےپہلے کوارٹر میں 5فیصدرعائت سمیت دیگر وصولیوں کےحوالے سے سسٹم اپ گریڈ کردیا گیا۔

تفصیلات کے مطابق حکومت نے بجٹ میں محکمہ ایکسائزکےموٹرٹیکسز اور پراپرٹی ٹیکس کےحوالے سے مختلف ردبدل کیا ہے جس کے لئےسسٹم اپ گریڈ کردیا گیا ہے،موٹر سائیکلوں کے ٹوکن ٹیکس میں اضافہ کرتے ہوئے 70سی سی موٹرسائیکل کاایک ہزار، سوسی سی کاپندرہ سو،ون ٹو فائیو سی سی موٹرسائیکل کا دوہزار،ڈیڑھ سوسےپچیس سو جبکہ اس بڑی موٹرسائیکلوں کی بنیادی قیمت کا 2فیصد وصول کیا جائے گا۔

الیکٹرک گاڑیوں کی رجسٹریشن فیس میں 50فیصداورٹوکن ٹیکس میں 75فیصد کمی کی گئی ہے،کلو واٹ اورہارس پاور کوسی سی میں تبدیل کروانے کے لئے انرجی ڈیپارٹمنٹ کو کیسز بھجوائے جائیں گے،پراپرٹی ٹیکس دواقساط میں جمع کروانےکا قانون بھی منظور کرلیا گیا ہے،مالی سال کےپہلے کوارٹر میں 5فیصدرعایت ہوگی ،جرمانہ اکتوبرکی بجائے جنوری سے عائد کیا جائےگا،ای پے کے ذریعےٹیکس ادا کرنےپر اگلے مالی سال بھی رعایت 5فیصدجاری رہے گی۔

واضح رہے کہ وفاقی وزیر خزانہ شوکت ترین نے قومی اسمبلی میں بجٹ سیشن کے دوران کہا کہ وفاقی حکومت کی جانب سے 800 سی سی تک کی گاڑیوں پر ٹیکس چھوٹ کی تجویز دی گئی تھی مگر اپوزیشن اور بزنس کمیونٹی کی جانب سے دی جانے والی تجاویز پر ہم نے غور کیا اور ہم نے فیصلہ کیا ہے کہ ایک ہزار سی سی تک گاڑیوں پر ٹیکس میں رعایت دی جائے گی۔

وزیر خزانہ نے کہا کہ انٹر نیٹ اور ایس ایم ایس پر کوئی ٹیکس نہیں ہوگا مگر پانچ منٹ سے زیادہ کال پر 75 پیسے ٹیکس لیں گے، عمران خان نے کنسٹرکشن کی صنعت کی ترقی کیلئے اقدامات کیے۔

لاہور: عدالت نے مدرسے میں طالب علم سے بدفعلی کے کیس میں گرفتار مفتی عزیزالرحمٰن کو جوڈیشل ریمانڈ پر جیل بھیج دیا۔

کینٹ کچہری میں جوڈیشل مجسٹریٹ رانا راشد علی نے کیس کی سماعت کی۔

عدالت کے استفسار پر ملزم مفتی عزیز الرحمٰن نے کہا کہ ‘میں صرف اپنا بیان قلم بند کروانا چاہتا ہوں’۔

علاوہ ازیں تھانہ شمالی چھاؤنی پولیس نے عدالت کو بتایا کہ انہوں نے ملزم سے تفتیش مکمل کرلی ہے۔

پولیس نے کہا کہ ملزم سے تفتیش مکمل ہو چکی ہے اور مزید جسمانی ریمانڈ نہیں چاہیے۔

جس پر عدالت نے ملزم کو 14 روزہ جوڈیشل ریمانڈ پر جیل بھیج دیا اور آئندہ سماعت پر پولیس سے مقدمے کے چالان کی رپورٹ طلب کر لی۔

خیال رہے کہ پولیس نے مفتی عزیز الرحمٰن کو منہ پر کپڑا ڈال کر عدالت میں پیش کیا تھا۔

ملزم کی گرفتاری
خیال رہے کہ اپنے شاگرد سے بدفعلی کے ملزم کو پولیس نے 20 جنوری کو میانوالی سے دو بیٹوں سمیت گرفتار کیا تھا اور انہیں لاہور منتقل کردیا گیا ہے۔

سی آئی اے ماڈل ٹاؤن کے ڈی ایس پی حسنین حیدر کی سربراہی میں ٹیم نے میانوالی میں چھاپہ مار کر مفتی عزیز الرحمٰن کو گرفتار کیا تھا۔

میانوالی سے مرکزی ملزم کو گرفتار کرنے کے بعد پولیس نے مفتی عزیز الرحمٰن کے ایک بیٹے عتیق الرحمٰن کو کاہنہ کے ایک مدرسے جبکہ دوسرے بیٹے کو لکی مروت سے گرفتار کیا تھا۔

کرائم انوسٹی گیشن ایجنسی نے دعویٰ کیا تھا کہ مفتی عزیزالرحمٰن کے دو بیٹوں کو بھی گرفتار کیا گیا ہے، جو مدرسے میں اپنے شاگردوں سے بدفعلی میں ملوث تھے۔

ان کا کہنا تھا کہ ملزمان الطاف الرحمٰن اور عتیق الرحمٰن متاثرین کو ان کے والد مفتی عزیزالرحمٰن کے خلاف مقدمے کی صورت میں سنگین نتائج کی دھمکیوں میں بھی ملوث ہیں۔

انسپکٹر جنرل پنجاب پولیس انعام غنی نے ایک ٹوئٹر پیغام میں کہا تھا کہ ‘ہم مجرم کو گرفتار کرنے میں کامیاب ہوگئے ہیں’۔

انہوں نے بتایا تھا کہ پولیس اس معاملے کو ایک ٹیسٹ کیس کے طور پر دیکھے گی، ملزم سے تفتیش کرے گی، سائنسی اور پروفیشنل تحقیقات کر کے مقدمہ چلایا جائے گا اور ملزم کو عدالت سے سزا دلوائی جائے گی۔

آئی جی پنجاب کا کہنا تھا کہ ‘ہم چاہتے ہیں ہمارے بچے ان استحصال کرنے والوں سے اور مستقبل کے لیے ہمارا معاشرہ محفوظ رہے’۔

بعد ازاں لاہور کے مدرسے میں طالب علم سے بدفعلی کے کیس میں گرفتار مفتی عزیزالرحمٰن نے تفتیش کے دوران اعتراف جرم کرتے ہوئے شرمندگی کا اظہار کیا تھا۔

ڈپٹی انسپکٹر جنرل آف پولیس (ڈی آئی جی) انوسٹی گیشن شارق جمال خان نے بتایا تھا کہ ملزم نے اعتراف کیا کہ چند روز قبل سوشل میڈیا پر وائرل ہونے والی ویڈیو ان کی ہے اورچھپ کر بنائی گئی ہے۔

مفتی عزیزالرحمٰن نے تفتیشی افسر کو بتایا تھا کہ بیٹوں نے طالب علم کو دھمکایا اور اسے کسی سے بات کرنے سے روکا لیکن اس نے منع کرنے کے باوجود ویڈیو وائرل کردی۔

لاہور: انتظامیہ نے پرائس کنٹرول مجسٹریٹ کاشف بشیر کی غلطی پر اس کے خلاف فوری کارروائی شروع کردی۔

رائیونڈ میں سبزی فروش کے خلاف غلط استغاثہ بھرنے پر ڈپٹی کمشنر لاہور مدثر ریاض ملک نے سخت کارروائی کرتے ہوئے مجسٹریٹ کاشف بشیر سے اختیارات واپس لے لیے۔

ڈی سی لاہور نے کاشف بشیر سے اختیارات واپس لینے کا لیٹر خود دستخط کر کے جاری کیا اور کاشف بشیر سے جواب طلبی بھی کرلی۔ ڈی سی لاہور نے مجسٹریٹ کاشف بشیر کو کسی بھی قسم کی پرائس کنٹرول کی چیکنگ سے فوری طور پر روک دیا گیا۔ کاشف بشیر کو پرائس کنٹرول ایکٹ 1977 کے تحت اختیارات دیے گئے تھے۔

گزشتہ روز لاہور کی رائیونڈ پولیس نے ’سستی‘ سبزی فروخت کرنے پر دکان دار کو گرفتار کر کے اس کے خلاف ایف آئی آر بھی کاٹ دی ہے۔ سبزی سستی فروخت کرنے پر درج ہونے والی ایف آئی آر کے متن کے مطابق سبزی فروش وقاص محمد رائیونڈ روڈ پر سرکاری ریٹ لسٹ سے کم قیمت پر سبزی فروخت کر رہا تھا ۔ جس پر پرائس کنٹرول مجسٹریٹ چوہدری کاشف بشیر کی مدعیت میں اس کے خلاف مقدمہ درج کرلیا گیا۔

ملک میں کورونا وائرس کے باعث ہوٹلز اور ریستوران کے اندر بیٹھ کر کھانا کھانے پرعائد پابندی یکم جولائی سے ختم کردی جائے گی۔

تفصیلات کے مطابق نیشنل کمانڈ اینڈ آپریشن سینٹر ( این سی او سی) نے یکم جولائی سے ہوٹلز اور ریستوران میں ان ڈور بیٹھ کر کھانے سے پابندی اٹھائی ہے۔ اس سے قبل این سی او سی نے ریستوران کے باہر بیٹھ کر کھانے کی پابندی بھی ختم کی تھی جبکہ پارکس، سوئمنگ پولز اور واٹر پارکس پر عائد پابندی بھی اٹھا لی گئی تھی۔ اسی طرح آؤٹ ڈور شادیوں میں بھی 150 مہمانوں کی شرکت کی اجازت دے دی گئی تھی۔

رپورٹ کے مطابق آل کراچی ریستوران ایسوسی ایشن کے ایک وفد نے اسلام آباد میں ڈائرکٹر جنرل این سی او سی میجر جنرل آصف محمود گورایہ سے ملاقات میں ریستوران پر عائد پابندی ختم کرنے کی درخواست کی تھی جس پر ڈائرکٹر جنرل این سی او سی میجر جنرل آصف محمود گورایہ نے وفد کو یقین دلایا کہ پابندی یکم جولائی سے اٹھا لی جائے گی۔

سیکرٹری بلدیات نور الامین مینگل کی سربراہی میں منڈیوں کی ریکارڈ توڑ نیلامی, پنجاب کے 9 ڈویژن کی 104 مویشی منڈیوں کے ٹھیکے 4 ارب 5 کروڑ 82 لاکھ 35 ہزار میں نیلام .

تفصیلات کےمطابق نورالامین مینگل کے فیصلے نے بلدیات جیسے ٹھپ محکمے میں جان ڈال دی ہے ۔ پنجاب کے 9 ڈویژن کی 104 مویشی منڈیوں کے ٹھیکے 4 ارب 5 کروڑ 82 لاکھ 35 ہزار میں نیلام کردی گئیں ۔ سب سے زیادہ آمدن لاہور ڈویژن کی ایک ارب 6 کروڑ روپےہوئی ۔ گزشتہ سال لاہور ڈویژن کی منڈیوں کا ریونیو صرف 34 کروڑ تھا ۔ ملتان ڈویژن 80 کروڑ, فیصل آباد کی منڈیاں 44 کروڑ میں نیلام ہوئیں ۔ گزشتہ سال ملتان ڈویژن کی آمدن 37 کروڑ جبکہ فیصل آباد ڈویژن کی آمدن 9 کروڑ رہی ۔ نئے مالی سال کے لئے ڈی جی خان کی منڈیاں 37 کروڑ ، گوجرانوالہ ڈویژن کی منڈیاں 22 کروڑ میں نیلام ہوئیں ۔ گزشتہ سال ڈی جی خان کی منڈیوں کی آمدن 7 کروڑ جبکہ گوجرانوالہ کی 15 کروڑ تھی ۔

ساہیوال ڈویژن 20 کروڑ ، سرگودھا 35 کروڑ جبکہ راوالپنڈی کی منڈیاں 8 کروڑ میں نیلام ہوئیں ۔ گزشتہ سال بالترتیب آمدن 9 کروڑ ، 8 کروڑ اور صرف 3 کروڑ رہی ۔ منڈیوں کی ریکارڈ توڑ کامیاب نیلامی سے حکومت پنجاب کو گزشتہ سال کی نسبت 2 ارب 50 کروڑ کی اضافی آمدن متوقع ہے ۔ منڈیوں کی اوپن کلیکشن کی بجائے نیلامی کا اہم فیصلہ سیکرٹری بلدیات نورالامین مینگل نے لیا ۔ مشکل فیصلے اور سیکرٹری کی انتھک محنت کی بدولت پنجاب حکومت کو تاریخ ساز کامیابی ملی ہے۔

لاہور کے سرکاری ہسپتالوں کی پارکنگ کمپنیاں ہسپتالوں کی نادہندہ نکلیں , جنرل ہسپتال ایک کروڑ 98 لاکھ 30 ہزار 500 روپے کی نادہندہ

تفصیلات کے مطابق لاہور کے سرکاری ہسپتالوں کی پارکنگ کمپنیاں ہسپتالوں کی نادہندہ نکلیں ،پارکنگ کمپنی مالی سال21-2020 تک واجبات ادا کرنے کی پابند ہیں ، جنرل ہسپتال انتظامیہ کی غفلت سے سرکاری خزانے کو نقصان ہونے لگا

جنرل ہسپتال انتظامیہ کا پارکنگ کمپنی کو پیسے ادا کرنے کا مراسلہ، پارکنگ کمپنی بااثر افراد کی ملی بھگت سے واجب الادا رقم دینے سے انکاری

ہسپتال انتظامیہ کے مطابق 30جون تک کمپنی واجب ادا رقم دینے کی پابند ہے جبکہ ایم ایس کی جانب سے 17 جون کو جاری نوٹیفکیشن بھی کسی کام نہ آیا۔ ہسپتال کی جانب سے دی گئی ڈیڈلائن گزرے ایک ہفتہ ہوگیا تاحال ایک روپیہ بھی جمع نہ ہو سکا، انتظامیہ نے پارکنگ گروپ کے آگے ہاتھ کھڑے کردیئے، پیسے جمع نہ ہونے سے سرکاری خزانے کو کروڑوں روپےکا نقصان ہوا

لاہور چڑیا گھر کا ٹونی شیر موت کی ابدی نیند سوگیا، شیر عرصہ دراز سے بیمار تھا،چڑیا گھر انتظامیہ کی جانب سے طبی سہولیات فراہم کی گئیں مگر بہتری نہ آسکی ۔

شیر فالج کی وجہ سے کافی بیمار تھا،شیر کا پچھلا دھڑ مکمل ناکارہ ہوچکا تھا۔ لاہور چڑیا گھر کی طبی ٹیمیں گزشتہ کئی سالوں سے اس کا علاج معالجہ کر رہی تھیں۔ چڑیا گھر نے محکمہ جنگلی حیات سے شیر کے لئے پرسکون موت کی اجازت بھی مانگی تھی ،گزشتہ 6 ماہ سے شیر کی حالت خراب تھی، ٹونی شیر کو خوراک لینے میں دشواری کا سامنا تھا، خون کی مختلف بیماریوں میں بھی مبتلا تھا۔

کاہنہ کے علاقے میں جواں سالہ لڑکی نے گندم والی گولیاں کھا کر خودکشی کر لی۔ پولیس نےلاش مردہ خانے منتقل کر کے تحقیقات شروع کردی۔

تفصیلات کےمطابق کاہنہ کی رہائشی پندرہ سالہ عائشہ نے نامعلوم وجوہات پر گندم میں رکھنے والی گولیاں کھا لیں ۔ حالت غیر ہونے پر عائشہ کو جنرل ہسپتال منتقل کیا گیا مگر جانبر نہ ہو سکی۔ پولیس نے موقع پر پہنچ کر لاش تحویل میں مردہ خانے منتقل کردی ۔ پولیس کا کہنا تھا مختلف پہلوں سے واقعہ کی تحقیق شروع کردی گئی ہیں ۔