Category لاھور نامہ

ایل ڈی اے کا ٹاؤن شپ میں سرکاری اراضی پر غیر قانونی تعمیرات کیخلاف گرینڈ آپریشن، 196 دکانیں مسمار کردیں، پولیس نے مزاحمت کرنے پر متعدد دکانداروں کو حراست میں لے لیا۔

تفصیلات کے مطابق ایل ڈی اے نے ٹاؤن شپ مین مارکیٹ میں غیر قانونی تعمیرات کیخلاف آپریشن کرتے ہوئے 196 دکانیں مسمار کردیں، لوگوں نے مارکیٹ میں پختہ تعمیرات کے ساتھ ساتھ عارضی دکانیں بھی بنا رکھی تھیں، رات گئے شروع ہونے والے آپریشن میں ایس ایس پی آپریشنز سید ندیم عباس سمیت 3 ڈویژنز کے ایس پیز نے بھاری نفری کیساتھ شرکت کی۔

پولیس نے ٹاؤن شپ مارکیٹ کی طرف جانے والے راستوں کو بیرئیر لگا کر بند کردیا تھا، اس موقع پر مزاحمت کرنے والے دکانداروں کو حراست میں لے لیا گیا، بھاری مشینری سے ہونے والا آپریشن دیکھ کر دکانداروں نے اپنی مدد آپ کے تحت اپنا لاکھوں کا سامان باہر نکالا۔

اس موقع پر میڈیا سے گفتگو کرتے ہوئے متاثرہ دکاندار پھٹ پڑے، دکانداروں نے کہا حکومت نے آج ہمارے بچوں کا روزگار ہم سے چھین لیا، ایل ڈی اے اور پولیس کی غنڈہ گردی نے 2 ہزار سے زائد افراد کے منہ سے نوالہ چھین لیا۔

دکانداروں نے مزید کہا کہ وہ یہ جگہ خریدنے کے لیے بھی تیار تھے، تاہم حکومت سمیت کسی انتظامی نمائندہ نے ایک نہ سنی اور اب سڑکوں پر آگئے ہیں۔

گورنمنٹ سائنس کالج وحدت روڈ میں ہنگامہ آرائی، ہاسٹل میں طلبا پر تشدد،2 کی حالت تشویش ناک۔

تفصیلات کے مطابق اسلامی جمیعت طلبہ کی جانب سے گورنمنٹ سائنس کالج وحدت روڈ میں ہنگامہ آرائی کی گئی , طلبا تنظیم کے کارکنوں نے کالج ہاسٹل میں طلبا پر تشدد کیا ،ہنگامہ آرائی میں3 طلبا زخمی ہوئے جنہیں ہسپتال منتقل کردیا گیا۔سائنس کالج وحدت روڈکےشعبہ کیمسٹری کا طالبعلم محمد دلاور کی حالت تشویشناک جبکہ طلباء تنظیم کے تشدد سے ایک طالب علم کا مثانہ پھٹ گیا ہے۔

طلبا تنظیم کے کارکنوں نے سائنس کالج کےطالبعلم دلاورکو تشدد کا نشانہ بنانے کےبعد ہاسٹل کی چھت سے نیچے گرا دیا، سائنس کالج کے ہاسٹل میں طلبا تنظیم کے کارکن اسلحہ لے کر پھرتے رہے ،انتظامیہ کی جانب سے سائنس کالج میں ہونیوالےپرچوں کو منسوخ کر کےکالج 2روز کیلئے بند کر دیا گیا اورسائنس کالج وحدت روڈ کے ہاسٹل کوبھی خالی کرا لیا گیا۔ زخمی طلبا کا کہنا ہے کہ پرنسپل ڈاکٹر تحسین رزاق کی بد انتظامی کےباعث اسلامی جمیعت طلبہ کے کارکنوں نے تشدد کا نشانہ بنایا۔

اورنج ٹرین سے کمائی حاصل کرنے کے لیے اسٹیشنوں کو ٹھیکے پر دینے کی تیاریاں مکمل۔۔۔ پنجاب حکومت نے اورنج ٹرین کے اسٹیشنز کو آؤٹ سورس کرنے نجی کمپنیوں سے رابطے تیز کردئیے۔

تفصیلات کےمطابق اورنج ٹرین سے کمائی حاصل کرنے کیلئے پنجاب حکومت نے سپریم کورٹ کے احکامات پر انڈور اسٹیشنز آؤٹ سورس کرنے نجی کمپنیوں سے رابطے تیز کردئیے۔ میٹرو اسٹیشنز میں بل بورڈ اورٹک شاپ سمیت شاپنگ سنٹر بنائے جائیں گے ۔محکمہ ٹرانسپورٹ کے حکام کے مطابق اورنج ٹرین اسٹیشن پرائیویٹ کمپنی کے حوالے کرکے ریونیو حاصل کریں گے جبکہ اورنج ٹرین کے اسٹیشنز کے باہر بڑے بل بورڈ نہیں لگائے جائیں گے ۔محکمہ ٹرانسپورٹ کے حکام کے مطابق سپریم کورٹ کے احکامات کو مد نظر رکھ کر اورنج ٹرین کے اسٹیشنز کو ٹھیکے پر دیا جائے گا ۔

رینویو کے حصول کے لیے اسٹیشنز کے انڈور کوریڈور کا ہی استعمال کیا جائے گا جس کے لیے تیاریاں مکمل کرلی گئیں ہیں اور نجی کمپنیوں سے رابطے جاری ہیں جس میں کسی ایک کمپنی کو ٹھیکہ دے کر اورنج ٹرین سے سالانہ 20 کروڑ روپے سے زائد کی آمدن حاصل کرنے کا تخمینہ لگایا گیا ہے ۔

شہر کے مختلف پارکس کی اپ گریڈیشن اور سہولیات کی فراہمی کے لیے ٹینڈرز کھول دیے گئے، پی ایچ اے نے جم، سکیٹنگ کورٹ، کیٹینز، بگی سروس وگولف کارٹ کی ٹینڈرنگ کا عمل شروع کر دیا گیا۔

تفصیلات کے مطابق شہرکے پارکس کی اپ گریڈیشن اور سہولیات کی فراہمی کیلئے ٹینڈرز کھول دئیے گئے ہیں۔ جم، سکیٹنگ کورٹ، کیٹینز ، بگی سروس کی ٹینڈرنگ کا عمل آج شروع کرد یا گیا ہے، خواہشمند افراد آج متعلقہ ٹھیکوں کےحصول کیلئےبڈز جمع کروائیں گے۔ گلشن اقبال پارک، جم کیلئےریزرو پرائس اڑھائی لاکھ، بڈ سکیورٹی50 ہزار رکھی گئی ہے۔

گلشن اقبال پارک میں سکیٹنگ کورٹ کیلئےسالانہ ریزروپرائس 5 لاکھ، سکیٹنگ کورٹ کیلئے بڈ سکیورٹی 2 لاکھ روپے، آئیڈیل پارک ٹاؤن شپ میں کینٹین کیلئےریزروپرائس سالانہ 15 لاکھ مقرر جبکہ آئیڈیل پارک ٹاؤن شپ میں کینٹین کیلئے بڈ سکیورٹی5 لاکھ رکھی گئی ہے۔ گریٹر اقبال پارک میں بگی سروس کیلئےسالانہ ریزرو پرائس50 لاکھ اور پارک میں بگی سروس کیلئے بڈسکیورٹی 10لاکھ روپے، بوٹینیکل گارڈن جلومیں گالف کارٹس کیلئےسالانہ ریزروپرائس7 لاکھ 50 ہزار روپے مقرر کی گئی ہے۔

اسی طرح بوٹینیکل گارڈن جلومیں گالف کارٹس کیلئے بڈ سکیورٹی 3 لاکھ جبکہ جیلانی پارک گالف کارٹس کیلئےریزر وپرائس سالانہ24 لاکھ اور بڈ سکیورٹی5 لاکھ رکھی گئی ہے۔

شہر میں بجلی وگیس بحران کے خدشات پیدا ہو گئے۔اینگرو ٹرمینل کےمرمتی کام سے600 ملین ایل این جی سسٹم سےنکل جائیگی۔

ذرائع کے مطابق ٹرمینل کی بندش سےپاورہاؤسز کوگیس دینانا ممکن ہو جائےگا،ایل این جی کی کمی کی وجہ سے پنجاب کے پاور ہاؤسز بند ہو جائیں گے جس کے باعث بجلی ،گیس کی غیر اعلانیہ لوڈشیڈنگ شروع ہو جائیگی۔ ایس این جی پی ایل اس وقت 700 ملین ایل این جی پاورہاؤسز کودےرہی ہے۔

پاور ہاؤسز کی بندش اورپن بجلی کی کم پیداواربحران کاباعث بنیں گے ،28 اور 29 جون کو ملک بھر میں گیس وبجلی کا بحران شروع ہوسکتا ہے جس کے سبب صارفین کو10 روز کےلئےبجلی و گیس کی لوڈشیڈنگ کا سامنا رہےگا۔ واضح رہے کہ اس وقت سوئی ناردرن کمپنی کےسسٹم میں 1 ہزار ملین گیس شامل کی جارہی ہے۔

پشاور زلمی کے حیدر علی اور عُمید آصف کو صحت اور حفاظت کے پروٹوکولز کی خلاف ورزی کا اعتراف کرنے پر ملتان سلطانز کے خلاف پاکستان سپر لیگ (پی ایس ایل) کے فائنل سے قبل معطل کردیا گیا۔

پاکستان کرکٹ بورڈ (پی سی بی) کے مطابق دونوں کھلاڑیوں نے بائیوسیکیور ببل سے باہر جاکر لوگوں سے ملاقات کی اور سماجی فاصلہ برقرار رکھنے میں ناکام ہوئے۔

بیان میں کہا گیا کہ یہ واقعہ بدھ کو پیش آیا اور ان کے خلاف فیصلہ ٹورنامنٹ کے کووڈ 19 مینجمنٹ پینل نے جمعرات کی صبح کیا۔

پی سی بی نے کہا کہ ‘اس واقعے کے بعد یہ دونوں کرکٹرز اپنے اسکواڈ میں شامل کسی دوسرے رکن سے نہیں ملے اور اب دونوں روم آئسولیشن میں جاچکے ہیں’۔

علاوہ ازیں بائیوسیکیور ببل کی خلاف ورزی کرنے پر حیدر علی، قومی کرکٹ ٹیم کے دورہ انگلینڈ اور ویسٹ انڈیز سے بھی باہر ہوگئے ہیں۔

چیف سلیکٹر محمد وسیم نے صہیب مقصود کو حیدر علی کے متبادل کی حیثیت سے اسکواڈ میں شامل کر لیا ہے۔

پی ایس ایل کا چھٹا سیزن صہیب مقصود کے لیے شاندار رہا ہے اور وہ لیگ کے 11 میچز میں 40.33 کی اوسط سے 363 رنز بنا چکے ہیں اور ان کا اسٹرائیک ریٹ 153 کے قریب رہا۔

صہیب مقصود اس سے قبل 26 ایک روزہ اور ٹی ٹوئنٹی انٹرنیشنل میچز میں پاکستان کی نمائندگی کر چکے ہیں، انہوں نے آخری بار جنوری 2016 میں نیوزی لینڈ کے خلاف پاکستان کی نمائندگی کی تھی۔

یادگار میٹرو اسٹیشن کے قریب میٹرو بس میں آگ لگ گئی ،بس میں آگ وائرنگ شارٹ ہونے کے باعث لگی۔

یادگار میٹرو اسٹیشن کے قریب میٹرو بس میں آگ لگنے کے واقعے کی اطلاع ملنے پر ریسکیو 1122 اور میٹرو بس اتھارٹی کا عملہ موقع پر پہنچ گیا ۔ بس میں آگ لگنے کے افسوسناک واقعے کے بعد میٹرو بس سروس تعطل کا شکار رہی۔

ریسکیو اہلکاروں نے آگ پر قابو پالیا تاہم بس جل کر خاکستر ہوگئی۔بس میں کسی کے جاں بحق یا زخمی ہونے کی اطلاع نہیں ملی۔ ابتدائی تحقیقات کے مطابق بس میں آگ وائرنگ شارٹ ہونے کے باعث لگی آگ لگنے کے واقعے سے متعلق مزید تحقیقات جاری ہیں۔

تفصیلات کے مطابق میٹروبس کو شاہدرہ جاتےہوئےآتشزدگی کا واقعہ پیش آیا،صبح کےآغازپر26بسوں کافلیٹ شاہدرہ کیلئےنکلاتھا کہ اچانک بھاٹی سے آزادی چوک کےدرمیان ایک بس میں آگ بھڑک اٹھی ،ڈرائیور بس کو روک کرفوری باہر کی جانب نکل گیا۔

یہ انکشاف بھی ہوا ہے کہ 90فیصدبسوں کےاے سی خراب جبکہ وائرنگ پرانی ہوچکی ہے۔بسوں کو بغیر اے سی ،الیکٹریکل فالٹ کو نظر انداز کرکے چلایا جارہا ہے۔میٹرو بس کےجلنے سے ماس ٹرانزٹ اتھارٹی کو کروڑوں کا نقصان ہوا جبکہ ایک بس جلنے سے حاضر سروس بسوں کی تعداد اکیاون رہ گئی ہے۔

سروسز ہسپتال میں مریض کے لواحقین نے ڈاکٹر کو تشدد کا نشانہ بنا ڈالا.
تفصیلات کے مطابق ہسپتالوں میں ڈاکٹروں اور مریضوں کے لواحقین کے درمیان تلخ کلامی اور جھگڑے کے اکثر واقعات دیکھنے میں آئے ہیں، کہیں ڈاکٹرز کی مبینہ غفلت کی وجہ سے مریض جان کی بازی ہار جاتا ہے تو کہیں لواحقین اپنا غصہ ڈاکٹرز پر نکالتے نظرآرہے ہیں، ایک ایساہی واقعہ سروسز ہسپتال میں پیش آیا جہاں مریض کے لواحقین نے ڈاکٹر پر تشدد کیا،

اطلاعات کے مطابق سروسز ہسپتال کی سرجیکل ایمرجنسی وارڈ میں لے گئے مریض کے لواحقین احمد نامی شخص نے ایم ایل سی نہ بنانے کے معاملے پر ڈیوٹی ڈاکٹر کو سرعام تھپڑ دے مارا، ہسپتال انتظامیہ کا کہناتھا کہ جاوید نامی مریض گولی لگنے کے بعد سروسز ہسپتال آیا تھا جس کو ڈاکٹرز علاج کے بعد ڈسچارج کر رہے تھے جبکہ لواحقین کا ایم ایل سی بنانے پر اصرار اور دھمکیاں دینے پر معاملہ بگڑگیا.

ایل ڈی اے نے 11کمرشل پلاٹ 20کروڑ9لاکھ18ہزار 800روپے میں نیلام کر دیئے.

تفصیلات کےمطابق کمرشل پلاٹوں کا نیلام عام ایل ڈی اے کمیونٹی سنٹرسوک سنٹر نیو گارڈن ٹاؤن میں منعقد ہوا ۔ نیلام عام کی نگرانی ایل ڈی اے کی آکشن کمیٹی کے ارکان ایڈیشنل ڈائریکٹر جنرل ہاؤسنگ ، ڈائریکٹر فنانس‘ڈائریکٹرزاسٹیٹ مینجمنٹ ، ڈائریکٹرز لینڈ ڈویلپمنٹ اور دیگر متعلقہ افسران نے کی-نیلام عام کے دوران بولی میں حصہ لینے کے خواہشمند54حضرات نے زر ضمانت جمع کروائی ۔

جوہرٹاؤن ،مصطفی ٹاؤن،جوبلی ٹاؤن اور تاج پورہ میں واقع کمرشل پلاٹ نیلام کیےگئے۔ پلاٹ نمبر111سی بلاک اےجوہرٹاؤن 32لاکھ16ہزارمیں ۔پلاٹ نمبر 111ڈی بلاک اے جوہر ٹاؤن 34لاکھ55ہزار روپے میں۔پلاٹ نمبر27اے سوک سنٹر جوہرٹاؤن 7کروڑ35لاکھ روپےمیں ، پلاٹ نمبر27ڈی سو ک سنٹر جوہر ٹاؤن 7کروڑ35لاکھ روپے۔ پلاٹ نمبر204ڈی احمد یار بلاک مصطفیٰ ٹاؤن 61لاکھ روپے جبکہ پلاٹ نمبر310ڈی شہبازبلاک مصطفیٰ ٹاؤن 28لاکھ85ہزارروپے میں نیلام ہوا ، پلاٹ نمبر851/2بلاک ایف جوبلی ٹاؤن 71لاکھ98ہزار روپے میں نیلام ہوا، پلاٹ نمبر851/4بلاک ایف جوبلی ٹاؤن 71لاکھ98ہزار روپے، پلاٹ نمبر497کارنر بلاک ای تاج پورہ 81لاکھ66ہزارروپے میں نیلام ہوا، پلاٹ نمبر497اے بلاک ای تاج پورہ 74لاکھ 70ہزارروپے میں نیلام ہوا ، پلاٹ نمبر497بی بلاک ای تاج پورہ 81لاکھ78ہزار روپے میں نیلام کیا گیا ۔

تعلیمی اداروں کو گرمیوں کی تعطیلات کے سلسلے میں 2 جولائی سے یکم اگست تک بند رکھنے کی تجویز پیش کردی گئی۔

سکول ایجوکیشن نے گرمیوں کی تعطیلات کے حوالے سے صوبائی وزیر تعلیم ڈاکٹر مراد راس کو آگاہ کردیا ہے، صوبائی وزیر تعلیم چھٹیوں کے حوالے سے این سی او سی میں اپنی سفارشات پیش کریں گے۔تاہم ذرائع کے مطابق چھٹیوں کا حتمی فیصلہ این سی او سی کے اجلاس میں کیا جائے گا۔