Category لاھور نامہ

فیصل موورز کی تمام بسوں کے موٹروے ایم ٹو پر سفر کرنے پر مکمل پابندی عائد کر دی گئی ہے۔

ذرائع کے مطابق موٹروے پولیس نے 10 روز میں مسلسل2 حادثات کے پیش نظر کارروائی کرتے ہوئے فیصل موورز کی تمام بسوں کے ایم ٹو پر سفر کرنے پر تاحکم ثانی پابندی عائد کر دی، گزشتہ روز فیصل موورز کی مسافروں سے بھری بس ایم ٹو پر ڈرائیور کی غفلت کے باعث ٹریلر سے جا ٹکرائی جس کے باعث دو قیمتی جانیں ضائع ہو گئیں جبکہ 6 افراد شدید زخمی ہوئے۔

ذرائع کاکہنا ہےکہ فیصل موورزکی بس کو گزشتہ ماہ 25 تاریخ کو بھی حادثے کا سامنا کرنا پڑا تھا جس پر موٹروے کی جانب سے حادثے کے بعد کمپنی کو وارننگ جاری کی گئی لیکن مالکان نے اس پر کوئی توجہ نہیں دی۔

موٹروے پولیس کا کہنا ہے کہ فیصل موورز کے ڈرائیورز لاپرواہی سے ڈرائیونگ کرتے ہیں، فیصل موورز کو پہلے بھی کئی بار آگاہ کیا گیا لیکن کوئی عمل درآمد نہیں کیا گیا۔

یاد رہے کہ ایم ٹو لاہور کو اسلام آباد اور راولپنڈی سے جوڑتی ہے جس کی لمبائی 375 کلومیٹر ہے اور یہ اہم ترین شاہراہ سمجھی جاتی ہے ۔

ایل ڈی اے نے شیرانوالہ فلائی اوور میگا پراجیکٹ کی اراضی ایکوائر کرنے کی کوشش تیز کردی، نولکھا تھانے کا پارکنگ ایریا، باؤنڈری وال اور گارڈ رومز کی اڑھائی کنال اراضی کے حصول کیلئے سی سی پی او کو مراسلہ لکھ دیا۔

تفصیلات کےمطابق لاہور ڈویلپمنٹ اتھارٹی نے شیرانوالہ فلائی اوور میگا پراجیکٹ کے اراضی ایکوائر کرنے کیلئے مراسلہ لاہور پولیس کو بھجوا دیا ہے، نولکھا تھانے کا پارکنگ ایریا، باؤنڈری وال اور گارڈ رومز کی اڑھائی کنال اراضی کے حصول کیلئے سی سی پی او کو مراسلہ لکھا گیا ہے،، چیف انجینئر ایل ڈی اے نے سی سی پی او لاہور کو تحریری طور پر درخواست کردی ہے، مراسلہ کے مطابق نولکھا تھانہ کی اڑھائی کنال اراضی فلائی اوور کی الائنمنٹ میں آرہی ہے، الائنمنٹ میں گارڈ رومز، باؤنڈری وال اور پارکنگ شیڈ کو گرانا لازم ہے، فلائی اوور کی زمین کیلئے پرائس اسسمنٹ ہوچکی جبکہ سیکشن چار کا نفاذ کردیا گیا ہے، مراسلہ میں مزید لکھا گیا ہے کہ فلائی اوور کی تعمیر کے لئے اراضی فوری ایکوائر کرنا لازم ہے۔

ایجوکیشن اتھارٹی نے سکولوں کے نئے اوقات کار کا نوٹیفکیشن منسوخ کردیا۔ نوٹیفکیشن میں ڈبل شفٹ سکولز اور جمعہ کے اوقات کار کو شامل نہیں کیا گیا تھا۔

تفصیلات کے مطابق ایجوکیشن اتھارٹی نے سکولوں کے نئے اوقات کار کا نوٹیفکیشن منسوخ کردیا ہے۔سی ای او ایجوکیشن پرویز اختر کا کہنا ہے کہ سات جون سے سکول پچاس فیصد پالیسی کے تحت چھ روز کیلئے کھلیں گے۔ ڈسٹرکٹ ایجوکیشن اتھارٹی لاہور نے سکولوں کے نئے اوقات کار جاری کردیئے ہیں۔نوٹیفکیشن میں ڈبل شفٹ سکولز اور جمعہ کے اوقات کار کو شامل نہیں کیا گیا تھا۔

قبل ازیں ایجوکیشن اتھارٹی کی جانب سے سکولوں کے نئے اوقات کار کا شیڈول جاری کیا گیا تھا، جس کے مطابق لڑکیوں کا سکول صبح سوا سات بجے لگے گااور چھٹی سوا گیارہ بجے ہوگی۔ لڑکوں کا سکول ساڑھے سات بجے لگے گا اور چھٹی ساڑھے گیارہ بجے ہوگی۔ سکولوں میں نہم دہم کلاس کو آدھا گھنٹہ تاخیر سے چھٹی دی جائے گی۔ طلباء پچاس فیصد حاضری کے تحت چھ روز سکول آئیں گے، طلباء کو دو روز لگاتار آنے کی اجازت نہیں ہوگی، ایس او پیز کی خلاف ورزی پر متعلقہ سکولز کیخلاف کارروائی کی جائے گی۔

دوسری جانب وفاقی وزیرتعلیم شفقت محمودنے ٹویٹر پیغام میں اعلان کرتے ہوئے کہنا تھا کہ پیر کے روز سے تمام یونیورسٹیاں کھل جائیں گی۔ بین الصوبائی وزرائے تعلیم کے اجلاس ہوا جس میں وفاقی وزیر شفقت محمود نے میٹرک اور انٹر میڈیٹ طلبہ کو خوشخبری سنا دی۔ نویں اور دسویں کے لئےصرف اختیاری مضامین اورریاضی کا امتحان ہوگا۔انٹرمیڈیٹ کےبھی صرف اختیاری مضامین کا امتحان لیا جائے گا جبکہ پریکٹیکل اور باقی مضامین کے پرچے نہیں ہوں گے۔

بین الصوبائی وزرائے تعلیم کے اجلاس میں امتحانات کے شیڈول میں بھی تبدیلی کردی گئی جس کے مطابق 10 جولائی کےبعد12ویں اورپھر10ویں جماعت کےامتحان ہوں گے۔او لیول کے طلبہ26 جولائی سے10اگست کے درمیان امتحان دیں گے۔اس کے علاوہ سوموار سے تمام یونیورسٹیز کھولنے کا بھی اعلان کردیا گیا ہے۔

لاہور کے علاقے یکی گیٹ سےدکانوں سے کپڑا چوری کرنے والا خواتین کا گینگ گرفتار کیا گیا ہے . یکی گیٹ پولیس نے کاروائی کے دوران خواتین پر مشتمل تین رکنی گروہ گرفتار کر لیا ۔

ملزم خواتین ملکر بازار سے چوری کرتی اور موقع ملنے پر فرار ہو جاتی, ملزمان سابقہ ریکارڈیافتہ ہیں دوران تفتیش ملزمان کا مزید وارداتوں کا انکشاف کیا ہے۔گرفتار ملزمان میں سمیرا,مافیا اور ثمینہ نامی خاتون شامل ہے۔ ایس ایچ او یکی گیٹ حسین زبیر کے مطابق ملزم خواتین کے خلاف مقدمات درج کر کےتفتیش شروع کر دی ہے۔

فیروز پور روڈ کماہاں کے قریب ٹریفک حادثہ، حادثے میں ماں سمیت تین بیٹے جاں بحق ہوگئے۔

فیروز پور روڈ کماہاں کے قریب انتہائی افسوس ناک ٹریفک حادثہ پیش آیا جس میں ایک ہی خاندان کے 4 افراد تیز رفتار بس کی زد میں آگئے۔ مضان نامی شہری 3 بیٹوں، بیٹی اور بیوی کے ہمراہ موٹرسائیکل پر جا رہا تھا کہ پیچھے سے تیز رفتاری سے آنے والی بس نے کچل ڈالا۔ ڈی ایس پی عارف بٹ کا کہنا ہے کہ ڈرائیور موقع سے فرار ہو گیا.

جاں بحق ہونے والوں میں والدہ صباء، ایان، احمد اور الماس شامل ہیں۔ باپ اور بیٹی کو زخمی حالت میں جنرل ہسپتال منتقل کر دیا گیا ہے۔ شہری رمضان محلہ شریف پارک کاہنہ کا رہائشی ہے جبکہ پولیس نے لاشیں تحویل میں لیکر کارروائی شروع کر دی ہے۔

زندہ دلان لاہور کی ضلعی انتظامیہ نے جہان فانی سے کوچ کر جانے والوں کو بھی کورونا ویکسین لگا دی۔ ضلعی انتظامیہ نے تشہیری مہم کے دوران مرحوم قاضی واجد کو ویکسین لگوا دی، کمشنر لاہور نے نوٹس لیتے ہوئے فلیکس اتروادئیے جبکہ ڈی سی لاہور نے انسانی غلطی قرار دیتے ہوئے مرحوم کے لواحقین سے معذرت کرلی۔

ضلعی انتظامیہ کی جانب سے شہر بھر میں معروف شخصیات کی تصاویر کو کورونا ویکسین لگوانے کی ترغیب کیلئے استعمال کیا جارہا ہے، لاہور کی ضلعی انتظامیہ نے جہان فانی سے کوچ کر جانے والوں کو بھی کورونا ویکسین لگا دی ہے۔ ضلعی انتظامیہ نے سات روز قبل مرحوم واجد ضیاء کے 30 پورٹریٹ گلبرگ مین بلیوارڈ پر لگائے۔

اداکار قاضی واجد 2018میں انتقال کرگئے تھے لیکن تشہیری آگاہی فلیکس میں مرحوم کی تصویر آویزاں کردی گئی۔ معاملہ کی نشاندگی پر کمشنر لاہور کیپٹن ریٹائرڈ عثمان نے نوٹس لیتے ہوئے فوری فلیکس اتروادئیے جبکہ ڈی سی مدثر ریاض نے مذکورہ معاملہ کو انسانی غلطی قرار دیتے ہوئے کہا کہ تشہیری آگاہی مہم میں قاضی واجد کو ویکسین لگوانے کی تحریر وینڈر سے غلطی سے لکھی گئی، ڈی سی نے مرحوم کے لواحقین سے بھی معذرت کرلی۔

لاہور سے کراچی تک ٹرین کاسفر غیرمحفوظ اورخطرناک قرار،ڈویژنل سپرنٹنڈنٹ سکھر نےسکھر ڈویژن ریلوے ٹریک کو خطرناک قرار دے دیا۔

تفصیلات کےمطابق ڈویژنل سپرنٹنڈنٹ سکھر کی جانب سےسی ای او ریلوے کوارسال کیے گئے مراسلے میں انکشاف کیا گیا ہے کہ لاہور سے کراچی تک ٹرین کاسفر غیرمحفوظ اورخطرناک ہے،ڈویژنل سپرنٹنڈنٹ سکھر نےسکھر ڈویژن ریلوے ٹریک کو بھی خطرناک قراردیا ہے۔ ڈی ایس سکھر طارق لطیف کیجانب سے بجھوائے گئے مراسلے میں بتایاگیاکہ سکھر ڈویژن میں بچھی مین لائن کا 456 کلو میٹر لمبا ٹریک حالت خراب ہے جبکہ 532کلو میٹر برانچ لائن کا ٹریک کی بھی حالت بری ہے ناخوشگوار واقعہ سے بچنے اور محفوظ ٹرین آپریشن کے لیے جامع پلان بنایا جائے، ٹرین حادثات کی روک تھام اور ریلوے ساکھ کو بچانے کے لیے ٹریک کی بحالی ضروری ہے،لاہور سے کراچی جانے والے ٹرینوں میں سے اکثر حادثات سکھر ڈویژن میں ہی رپورٹ کیے گئے۔

واٹر میٹرنگ پروجیکٹ میں اہم پیشرفت،لاہورشہر میں ساڑھے سات لاکھ واٹر میٹر لگانے کا منصوبہ،منصوبے کے ٹینڈر ڈا کیومنٹ خریدنے والی 6 کمپنیز میں سے ایک نے بڈ جمع کروا دی۔

تفصیلات کےمطابق لاہورشہر میں ساڑھے سات لاکھ واٹر میٹر لگانے کا منصوبے پراہم پیشرفت ہوئی ہے،منصوبے کے ٹینڈر ڈا کیومنٹ خریدنے والی 6 کمپنیز میں سے ایک نے بڈ جمع کروا دی جبکہ ییلو ریورانجینئرنگ ،جیانگ ژو ثنگ لانگ انوائرمینٹل کمپنی ،آئی ایم ایس سنٹر ، ٹی ایم اے ،نذیر چودھری کیمیکل اورہی ژینگ نےڈاکیومنٹ حاصل کیے جبکہ 3 کمپنیز کے اشتراک نےبڈ جمع کرادی،وین لنگ واٹرمیٹر ،جیانگ ژو ، چائینہ انرجی اور الیکٹرک پاور اشتراک میں شامل،پبلک پرائیویٹ پارٹنرشپ کےتحت پروجیکٹ اگلےمرحلےمیں داخل ہوگیا، واٹر میٹرنگ پروجیکٹ کے تحت لاہور میں تقریبا ساڑھے 7 لاکھ گھریلو واٹر میٹرز نصب کیے جائیں گے،ایم ڈی واسا سید زاہد عزیز کاکہنا تھا کہ واٹر میٹرنگ پروجیکٹ کی تکمیل سے پانی کی بچت اور بلوں میں کمی واقع ہوگی۔

ایف آئی اے سائبر کرائم ونگ نے کارروائی کرتے ہوئے فیصل آباد سے آن لائن جعلی پیر گرفتار کر لئے، جعلی پیر فیس بک، واٹس ایپ اور یو ٹیوب کے ذریعے آن لائن استخارے کے نام پر شہریوں سے بڑا فراڈ کررہے تھے۔

ایف آئی اے کے مطابق جعلی پیروں کے دس رکنی گینگ نے اوور سیز پاکستانی خاتون سے 78 لاکھ روپے کا فراڈ کیا، خاتون کے رشتہ دار کی جانب سے ایف آئی اے کو درخواست دی گئی تھی ۔ ایف آئی اے نے مدینہ ٹاؤن کے علاقہ میں جعلی پیروں کے دفتر پر چھاپہ مارا اور گینگ کے سات افراد کو حراست میں لے لیا، جعلی پیر ،عامل باوا، کالے جادو کا علم،بلیک میجیک، عامل باوا بنگالی، روحانی استخارہ، ہر پریشانی کا حل، فخر عملیات اور استخارہ سنٹر کے نام سے یوٹیوب چینل اور فیس بک پیج چلارہے تھے۔گینگ کا سرغنہ ناصر حسین نامی شخص تھا جس نے سوساں روڈ پر حکیم خانہ کے نام سے دوکان بنا رکھی تھی، ایف آئی اے نے گینگ میں شامل ناصر حسین، باسط، احسن، محسن، عمر فاروق اور ندیم کو گرفتار کرلیا ہے، ملزمان جوڈیشل ریمانڈ پر جیل میں ہیں، سائبر کرائم ونگ نے ملزم سے 71 لاکھ روپے کی ریکوری بھی کرلی جبکہ تین ملزمان کے گرفتاری کے لئے چھاپے مارے جارہے ہیں۔

مہنگائی کی چکی میں پسی ہوئی عوام کے لیے ایک اور بری خبر ہے کہ پنجاب حکومت نے ٹریفک چالان میں مزید اضافے کی منظوری دیدی ہے۔ اب اگر کوئی شہری قانون کی خلاف ورزی کرے گا تو اسے ڈبل جرمانہ ہوگا

موٹر سائیکل سوار کے لیے قانون شکنی پر چالان میں 300 سے 400 روپے تک اضافہ ہوگا۔ موٹر سائیکل بغیر ہیلمٹ چلانے پر چالان 200 روپے کی بجائے 600 روپے تک ہوگا۔ اوورسپیڈ، نوپارکںنگ، رونگ وے اور رات کو بغیر لائٹس کے موٹر سائیکل چلانے پر جرمانہ 200 سے 400 روپے کرنے کی منظوری دیدی گئی ہے۔

پنجاب کابینہ نے کم عمر موٹر سائیکل چلانے والوں پر بھی چالان 500 روپے کرنے کی منظوری دیدی ہے۔ اس کے علاوہ رکشہ چلانے والوں کے جرمانوں میں 250 سے 500 روپے تک اضافہ ہوگا۔

کار سواروں پر چالان سیٹ بیلٹ، موبائل کے استعمال پر جرمانہ 500 سے 750 تک کرنے کی منظوری دی گئی ہے۔

پریشر ہارن اور غلط سمت گاڑی چلانے پر جرمانہ بڑھا کر 1000 روپے کرنے، ڈرائیونگ لائسنس نہ ہونے پر موٹر سائیکل سوار اور رکشہ پر 600 اور گاڑی والے پر 750 کرنے کی منظوری دی گئی ہے۔

جعلی نمبر پلیٹ والی موٹر سائیکل پر 1000 اور گاڑی پر 2000 روپے تک جرمانہ ہوگا جبکہ مسافر گاڑیوں پر ٹریفک چالان 1000 روپے سے 2000 روپے تک مقرر کرنے کی منظوری دی گئی ہے۔