Category لاھور نامہ

لاہور میں ڈی ایچ اے جی بلاک گھر میں آتشزدگی کے باعث جانی نقصان اور لاکھوں کا قیمتی سامان جل کرراکھ ہوگیا، آتشزدگی کے اس واقعہ میں جاں بحق ہونے والے شخص کی شناخت ساٹھ سالہ گوہر نام سے ہوئی۔ تاحال اس بارے کوئی اطلاعات سامنے نہیں آئیں۔

واضح رہے کہ گزشتہ سال لاہور میں آتشزدگی کا ایک بڑا سانحہ پیش آیا، لاہور کے علاقہ حفیظ سنٹر میں پوری الیکٹرونکس کی مارکیٹ جل کر راکھ ہوگئی تھی،دکانداروں کی آنکھوں کے سامنے ان کی جمع پونچی اور قیمتی سامان خاکستر ہوگیا، آگ کے واقعے کی تحقیقات کے لئے حکومت پنجاب کی جانب سے تشکیل دی گئی 14 رکنی کمیٹی کی سفارشات پر اسے سیل کیا گیا تھا۔

رائیونڈ روڈ پر چینی باشندوں سے ڈکیتی کا معاملہ، چینی باشندے کا ڈرائیور شہباز شریف واردات میں ملوث نکلا۔

تفصیلات کے مطابق ڈاکوؤں نے شہباز شریف نے ساتھ مل کر واردات کی منصوبہ بندی کی تھی۔ چینی باشندوں سے واردات کرنے والے تین ڈاکو سابق ریکارڈ یافتہ ہیں۔ ملزم وسیم، شہزاد اور حسنین اسی فیکٹری کے ملازم تھے جہاں چینی باشندے کام کرتے تھے۔ ملزموں نے چند ماہ قبل فیکٹری سے کام چھوڑ دیا تھا۔ پولیس ذرائع کا کہنا ہے کہ منصوبہ بندی کے مطابق ڈرائیور نے پاجیاں چوک میں خود ہی گاڑی کھڑی کر دی۔

ملزمان چوری کی موٹر سائیکل پر جعلی نمبر پلیٹ لگا کر وارداتیں کرتے تھے۔ تینوں ملزم رائیونڈ کے علاقے جلال پورہ میں مقیم تھے، ڈاکوؤں کے زیر استعمال موٹر سائیکل گرین ٹاؤن کے علاقے سے چوری ہوئی تھی۔ ملزموں کے خلاف رائیونڈ، سندر اور مانگا منڈی میں مختلف وارداتوں کے مقدمات درج ہیں جبکہ ڈرائیور شہباز شریف،حسنین اور شہزاد پولیس کے زیر حراست ہیں۔

لاہور: لاہور کے رہائشی شہروز کاشف کا دنیا کی بلند ترین چوٹی ماؤنٹ ایورسٹ سر کرنے کے بعد وطن واپسی پر شاندار استقبال کیا گیا۔

لاہور میں شہروز کاشف نے میڈیا سے گفتگو کرتے ہوئے کہا کہ 8 سال پہلے پہاڑ سر کرنے کا بولا تھا، اس وقت کسی نے حوصلہ افزائی نہیں کی بلکہ سب کا کہنا تھا کہ بچہ ہے لیکن والد نے سپنے سچ کرنے کے لیے ہمت بندھائی اور ہر لحاظ سے سپورٹ کیا۔

شہروز کاشف کا کہنا تھا کہ نیپال جانے سے پہلے کسی نے اسپانسر کیا اور نہ ہی حکومتی سرپرستی ملی، یہ کامیابی انتھک محنت، بلند ارادے اور اپنے والد کی مدد سے ممکن ہوئی، کوہ پیمائی میں ملک کانام روشن کردیا ہے اب اس کے بعد یہ حکومت پر منحصر ہے کہ وہ کس قدر سرپرستی کرتی ہے۔
کم عمر ترین کوہ پیما نے کہا کہ 50 دن پر محیط یہ سفر بہت مشکل تھا، پہاڑ پر اوپر جیسے جیسے اوپر جاتا، اتنا ہی زیادہ تکالیف اور مشکلات کا سامنا کرنا پڑا، پہاڑ سر کرنے کے بعد سے لے کر اب تک جو پاکستانیوں کی طرف سے پیار اور عزت ملی ہے، اس سے تمام تکالیف بھول گیا ہوں اور مزید چوٹیوں پر پرچم لہرانے کا حوصلہ ملا ہے۔

باہمت اور نوجوانوں کے لیے عزم و جرت کی مثال بننے والے شہروز کاشف کے مطابق دنیا کی کوئی بھی طاقت آپ کے حوصلے کو شکست نہیں دے سکتی، شہروز نے اب اس سے بھی اونچا پہاڑ سر کرنے کا ہدف قرار دیا۔

ڈیزل اور مرغیوں کی خریداری میں انویسٹمنٹ کا لالچ دے کر شہریوں کے 10 ارب روپے لوٹنے کا فراڈ، نیب لاہور نے لاثانی چکس اینڈ چکن نامی کمپنی کے مالکان کا ریکارڈ ایل ڈی اے اور محکمہ کوآپریٹو سے طلب کرلیا۔

شہریوں کے 10 ارب روپے لوٹنے کا فراڈ، ڈیزل اور مرغیوں کی خریداری میں انویسٹمنٹ کا لالچ دے کر فراڈ کیا گیا۔ لاثانی چکس اینڈ چکن نامی کمپنی کے مالکان کا ریکارڈ طلب کرلیا گیا۔ نیب لاہور نے ایل ڈی اے اور محکمہ کوآپریٹو سے ریکارڈ طلب کرلیا ہے۔ نیب نے انیس الرحمان، آصف علی، عتیق الرحمان، عبد الرحمان، نفیس الرحمان، محمد سفیان، سریا بی بی، سید فیض الحسن شاہ اور محمد شکیل کے اثاثہ جات کا ریکارڈ طلب کیا ہے۔

فراڈ میں ملوث ملزموں کے پاس موجود کمرشل اور رہائشی پراپرٹی سمیت دیگرپلاٹوں کا ریکارڈ بھی طلب کیا گیا ہے۔ ذرائع کا کہنا ہے کہ لاثانی کمپنی نےملک بھرکے کسانوں کو مر غی اور ڈیزل کی خریداری کا لالچ دیا۔ خریداری کے بعد انویسٹرزکورقم کی ادائیگی کے معاہدہ کے چیک دیئے گئے۔ مبینہ10 ارب سےزائد کی رقوم ہڑپ کرنے کے بعد کمپنی کی انتظامیہ روپوش ہوگئی۔

یوٹیلیٹی سٹورز کارپوریشن کا ماہ جون کے لیے 20ہزار میٹرک ٹن چینی خریدنے کا فیصلہ، خریداری کے لیے 1ارب 70کروڑ روپے مختص کردیئے گئے، وزیراعظم ریلیف پیکج کے تحت یوٹیلٹی سٹورز پر چینی 68روپے فی کلو میں فروخت کی جائے گی۔

ذرائع کے مطابق یوٹیلیٹی سٹورز کارپوریشن حکام نے ماہ جون کے لیے 20ہزار میٹرک ٹن چینی خریدنے کا فیصلہ کیا ہے۔ چینی ملک بھر کی شوگر ملوں سے 88 روپے فی کلو کے حساب سے خریدی جائےگی اور وزیراعظم ریلیف پیکج کے تحت شہریوں کو 68 روپے فی کلو میں فروخت کی جائے گی۔ چینی کی خریداری کے لیے 1ارب 70کروڑ روپے مختص کیے گئے ہیں۔یوٹیلٹی سٹورز کارپوریشن نے مالی سال 2020-21 میں مجموعی طور پر 22 ارب روپے کی چینی خریدی۔

دوسری جانب سستے سہولت بازاروں میں چینی کی خریداری کیلئے آنیوالے شہری مایوسی کا شکار ہیں جبکہ چینی کب پہنچے گی اور کس ریٹ پر فروخت ہوگی انتظامیہ بتانے سے بھی قاصر ہے۔ شہریوں کا کہناتھاکہ گرمیوں میں مشروبات کیلئے چینی کا استعمال معمول سے زیادہ ہوتاہے، لیکن سرکاری ادارے جانے کیوں نہیں سمجھ رہے۔

محکمانہ روابط کے فقدان کے باعث سستے بازاروں میں چینی کے سٹالز نہ لگ سکے۔ دو روز بعد آٹے کے ٹرک سستے سہولت بازاروں میں پہنچا دیئے گئے۔ سستے سہولت بازاروں میں آٹا دس کلو 430 روپے میں فروخت ہونے لگا، شہر کے 31سستے سہولت بازار فعال ہوگئے، شہری سستے سہولت بازاروں میں چینی کی آمد کے منتظرہیں۔

انتظامیہ کا دعوی ہے کہ سہولت بازار میں سبزیاں اور پھل مارکیٹ کے مقابلے میں 10 روپے فی کلو کم پر میسر ہوں گے، تاہم چینی کب پہنچے گی کچھ علم نہیں۔سستے سہولت بازاروں میں تیسرے روز بھی چینی کی سپلائی نہ ہونے سے سرکاری اداروں کی غفلت و نااہلی عیاں ہوگئی۔ چینی بنیادی ضرورت ہے جو تاحال شہریوں کی پہنچ سے باہر ہے۔

لاہوریئے ہو جائیں محتاط، ٹریفک پولیس پنجاب دو ماہ میں ایک ارب 33 کروڑکے چالانوں کا ٹارگٹ پورا کرنے کے لئے سرگرم، جگہ جگہ ناکے لگ گئے، ہدف پورا ہونے تک چالان نہیں رکیں گے۔

تفصیلات کے مطابق ٹریفک پولیس پنجاب دو ماہ میں ایک ارب 33 کروڑکے چالانوں کا ٹارگٹ پورا کرنے کے لئے سرگرم، جگہ جگہ ناکے لگ گئے،مطلوبہ ہدف پورا ہونے تک چالان نہیں رکیں گے، رواں مالی سال میں حکومت نے ٹریفک پولیس کو 3 ارب پچاس کروڑ روپے کے چالان کرنے کا ہدف دیا تھا۔

ماہ اپریل تک ٹریفک پولیس نے دو ارب سولہ کروڑ چھیاسٹھ لاکھ روپے کے چالان کئے،صرف لاہور پولیس ابتک 78 کروڑ روپے کے چالان کر چکی ہے، بقیہ ٹارگٹ پورا کرنے کے لئے ٹریفک پولیس نے جگہ جگہ ناکے لگا کر آئندہ مالی سال سے پہلے چالان مکمل کرنے کا ٹارگٹ پورا کرنے کی ٹھان لی ہے۔

واضح رہے کہ آئی جی پنجاب نے”8815 ای چالان ایس ایم ایس سسٹم” کا افتتاح کر دیا،”8815” پرگاڑی کاچیسزنمبرمیسج کرنےپرجرمانےبارےمعلومات دستیاب ہوگی،بینک لیزیارجسٹرڈگاڑی استعمال کرنےوالےبھی ای چالان کی معلومات لے سکیں گے،شہری گاڑیوں کےای چالان ایس ایم ایس کےذریعےچیک کرسکتےہیں،آئی جی پنجاب نےسیف سٹیزکےتیارکردہ “ڈالفن سکواڈ ٹریکنگ سسٹم”کاجائزہ لیا۔

شہریوں کو کھٹارہ بسوں کی جگہ اب سفر کے لیے نئی بسیں ملیں گی،حکومت کا لاہوریوں کیلئے200نئی بسیں خریدنے کافیصلہ۔

تفصیلات کےمطابق حکومت کی جانب سے لاہوریوں کے لیے 200 نئی بسوں کی خریداری کا فیصلہ کیا گیا ہےجس کے لیے نئے مالی سال میں ڈیڑھ ارب روپے کا فنڈ بجٹ مختص کرنے کی تجویز پیش کردی گئی ، ٹرانسپورٹ کمپنی یہ نئی بسیں خرید کر لاہوریوں کو سفر کی سہولیات فراہم کرے گی ۔ذرائع کےمطابق محکمہ ٹرانسپورٹ نےتجاویز حکومت کو ارسال کردیں ۔پنجاب حکومت لاہوریوں کو فی سفر کے لیے 90 روپے کی سبسڈی بھی دے گی،یہ بجٹ دو سو بسوں کے سالانہ اخراجات پر بھی استعمال ہوگا جبکہ ایک دن میں ایک بس کے اخراجات اور سبسڈی پر 21 ہزار روپے خرچ کیے جائیں گے۔

پولیس کرائم کنٹرول کرنے کی بجائے اعداد وشمار میں ہیر پھیر کرنے لگی، اپنی سیٹ پکی کرنے کیلئے آئی جی کی نظروں میں دھول جھونکنے لگے، کرائم میٹنگ میں اضلاع کی سب اچھا کی رپورٹ پر آئی جی پنجاب نے حقائق پر مبنیٰ اعدادوشمار پیش کرنے کیلئے ایک ہفتے کا وقت دے دیا۔

ماہانہ کرائم میٹنگ میں آئی جی پنجاب تمام اضلاع کے ڈی پی اوز کی عددی کارکردگی دیکھ کر حیران رہ گئے، کئی ماہ سے منفی نمبرز حاصل کرنے والے اضلاع عددی ہیر پھیرسے مثبت زون میں آگئے، کرائم میٹنگ میں پہلے ضلع کی پریزنٹیشن نے آئی جی پنجاب کو دنگ کردیا، گزشتہ ماہ منفی 25 نمبر حاصل کرنے والا ضلع 35 نمبر لے کر گرین زون کی ٹاپ ٹین پوزیشن میں آگیا۔

لاہور بھی 20 نمبرز لے کر کرائم کنٹرول، بروقت کیسز میں چالان مکمل کیے اور چوری وڈکیتی کے کیسز میں ریکوری کر کے مثبت زون کے اضلاع میں شامل ہوگیا۔

آئی جی پنجاب نے اعدادوشمار دیکھ کرتمام اضلاع کو قتل کے کیسز میں مکمل چالان دکھانے والوں کو فرانزک رپورٹس جمع کروانے کے لئے 7 دن کا ٹائم دے دیا، ڈکیتی کے کیسز میں ملزموں کی تعداد کم کر کے رابری میں منتقل کرنے والے کیسز کا ازسر نو جائزہ لے کر رپورٹس جمع کروانے کا حکم دیا۔

ریکوری کے اعداد وشمار کا خود ہی آڈٹ کرکے انویسٹی گیشن برانچ کو پریزنٹیشن جمع کروانے کی ہدایت کی گئی، گزشتہ ایک سال سے ماہانہ کرائم میٹنگ میں اضلاع کی کارکردگی کو کرائٹیریا کے مطابق نمبرز دے کر بہتر یابری کارکردگی میں رکھا جاتا ہے۔

تمام اضلاع میں اب کرائم کنٹرول، تفتیش کا عمل بہتر بنانے کے بجائے فارمولا سمجھ کراعداد وشمار کو جمع نفی کر کے کارکردگی دکھا نا شروع کردی، انویسٹی گیشن برانچ آڈٹ کرکے رپورٹ آئی جی پنجاب کو پیش کرے گی۔

لاہور کے علاقے نواب ٹاؤن میں گھریلو ملازمہ سے دو سگے بھائیوں نے مبینہ زیادتی کی، پولیس نے دونوں ملزموں کو گرفتار کرلیا۔

تفصیلات کے مطابق نواب ٹاؤن کے علاقہ علی رضا آباد میں گھریلو ملازمہ کے ساتھ زیادتی کا افسوسناک واقعہ پیش آیا، زیادتی بی بلاک کے رہائشی 2 بھائیوں راشد اور کاشف نے کی، پولیس نے زیادتی میں ملوث دونوں بھائیوں کو گرفتار کر لیا۔ 12 سالہ رابعہ ملزموں کے گھر پر ملازمہ تھی، متاثرہ لڑکی کا طبی معائنہ کروایا جا رہا ہے۔ پولیس کا کہنا ہے کہ میڈیکل رپورٹ کے مطابق ملزمان کے خلاف کارروائی کی جائے گی۔

شاہ عالم مارکیٹ میں واقع ریڈی میڈ گارمنٹس کے پلازے میں آتشزدگی کا واقعہ, بچوں کے گارمنٹس کے پلازے کو آگ نے اپنی لپیٹ میں لے لیا۔ آتشزدگی کے باعث تاجروں کا لاکھوں روپے کا نقصان ہوگیا۔

دوپہر بارہ بجے شاہ عالم مارکیٹ میں واقع ریڈی میڈ گارمنٹس کے پلازے میں اچانک آگ بھڑک اٹھی اور دیکھتے ہی دیکھتے آگ نے پلازے کو اپنی لپیٹ میں لے لیا۔ آتشزدگی کی اطلاع ملتے ہی ریسکیو ٹیمیں جائے موقع پر پہنچ گئیں اور آگ کو مزید پھیلنے سے روکنے کیلئے امدادی سرگرمیوں کا آغاز کیا۔

دوسرے فلور پر لگنے والی آگ نے ریڈی میڈ گارمنٹس اور دکانوں میں لگے اے سیز اور وائرنگ کو شدید نقصان پہنچایا۔ آگ لگنے کی اطلاع پر صدر ریڈی میڈ گارمنٹس عمر جاوید بھی موقع پر پہنچے اور تاجروں کے ہمراہ ریسکیو اہلکاروں کی معاونت کرتے رہے۔ ریسکیو کی سرتوڑ کوششوں کے بعد آگ پر قابو پالیا گیا۔

آگ لگنے کا دوسرا واقعہ کوٹ لکھپت کچا جیل روڈ پر موٹر سائیکل کےسپیئر پارٹس بنانے والی فیکٹری میں پیش آیا۔ پولیس کے مطابق کوٹ لکھپت کچا جیل روڈ پر موٹر سائیکل کے پارٹس بنانے والی فیکٹری میں بجلی کا شارٹ سرکٹ ہونے کی وجہ سے آگ بھڑک اُٹھی۔آگ کے بڑھنے پر فیکٹری سے ملحقہ عمارتوں کو مکمل طور پر خالی کروالیا گیا۔ ریسکیو ٹیموں نے گھنٹوں کی کوشش کے بعد آگ پر قابو پالیا۔