Category لاھور نامہ

لاہور ویسٹ مینجمنٹ کمپنی نے عید پر شہر کو صاف ستھرا رکھنے کیلئے ویسٹ مینجمنٹ پلان تیار کر لیا، ٹیمز عید کے دنوں میں بھی تین شفٹوں میں کام کریں گی۔

ویسٹ مینجمنٹ پلان کے مطابق شہر کی صفائی بشمول مساجد، کمرشل مارکیٹوں اور قبرستانوں میں بھی خصوصی صفائی آپریشن کیا جائے گا، آپریشن ٹیمز کو تمام تر ایس او پیز پر عمل درآمد کرنے کے احکامات جاری کر دیئے گئے ہیں، تمام آپریشنل افسر و عملہ اپنی حاضری اور لوکیشن بذریعہ واٹس ایپ متعلقہ افسر کو بھیجیں گے، ٹیکنیکل سٹاف 11 مئی سے پہلے ورکشاپ میں موجود گاڑیوں کی رپیئرنگ مکمل کریں گے۔

سی ای او کا کہنا ہے کہ عیدالفطر پر ویسٹ مینجمنٹ پلان کے نفاذ کی ازخود مانیٹرنگ اور سرپرائز وزٹ کروں گا۔

دوسری جانب محکمہ بلدیات نے صفائی کے نظام کو بہتر کرنے کیلئے لاہور سمیت صوبہ بھر کی 136 تحصیل میں دس ہزار سے زائد سینٹری ورکرز بھرتی کرنے کا فیصلہ کرلیا، اس ضمن میں سیکرٹری بلدیات نورالامین مینگل نے نوٹیفکیشن جاری کر دیا۔

نوٹیفکیشن کے مطابق 70 ہزار سے زائد آبادی والی تحصیل میں 100، 40 ہزار سے زائد میں 80 اور 40 ہزار سے کم آبادی والی تحصیل میں 60 بھرتیاں ہوںگی، لوکل گورنمنٹ ایکٹ کے تحت ٹاؤن کمیٹیوں کو تحصیل کونسل کے ساتھ ضم کیے جانے سے آبادی کے تناسب میں اضافہ ہوا جس سے سینٹری ورکرز پر کام کا بوجھ بڑھ گیا۔

ڈپٹی کمشنرز بحیثیت ڈیزیز مینجمنٹ اتھارٹی صفائی اور ڈس انفیکشن کے کام کی نگرانی کریں گے، متعلقہ تحصیل کونسلز اضافی سینٹری ورکرز کے تمام اخراجات خود اٹھائیں گی، سینٹری ورکرز کی تعداد بڑھانے سے نکاسی آب اور سالڈ ویسٹ مینجمنٹ میں بھی بہتری آئے گی۔

محکمہ جنگلی حیات کا گھروں میں شیر اور ٹائیگرز پالنے والوں کے خلاف کارروائی کا فیصلہ کر لیا۔

پنجاب وائلڈ لائف نے گھروں میں خطرناک جنگلی جانور رکھنے کے واقعات کا نوٹس لیتے ہوئے عید کے بعد ایسے افراد کے خلاف کارروائی کا فیصلہ کر لیا، پنجاب وائلڈلائف ایکٹ کے مطابق کوئی بھی شہری قانونی تقاضے پورے کرنے کے بعد شیر اور ٹائیگر رکھ سکتا ہے، پنجاب میں اس وقت تقریبا 240 رجسٹرڈ بریڈنگ فارم ہیں جن میں کئی ایسے بریڈنگ سنٹرز ہیں جہاں اور شیر اور ٹائیگرکی بریڈنگ کرائی جاتی ہے اور پھران کے بچے فروخت کردیئے جاتے ہیں۔ عام پالتو جانوروں اورپرندوں کے ساتھ ساتھ اب خطرناک جنگلی جانور یعنی شیر اور ٹائیگر کو گھروں میں پالنے کا رحجان فروغ پارہا ہے۔

محکمہ جنگلی حیات کا کہنا ہےکہ زیادہ تر شہری شیر اور ٹائیگرکا بچہ خریدتے ہیں 6 ماہ تک کی عمر میں شیر اور ٹائیگرکا بچہ خطرناک نہیں ہوتا تاہم اس کے بعد اسے کھلا چھوڑنا خطرے سے خالی نہیں ہوتا، اس دوران شیر اور ٹائیگر کے بچے کے ساتھ تصاویر اور ویڈیوز بناکر سوشل میڈیا پر شیئر کی جاتی ہیں جس سے عالمی سطح پر جانوروں کے تحفظ کیلئے کام کرنیوالی این جی اوز کی طرف سے احتجاج سامنے آیا ہے۔

محکمہ جنگلی حیات کے مطابق کسی بھی شہری کو خطرناک جنگلی جانور خاص طور پرشیر اور ٹائیگر رکھنے کا لائسنس دینے سے پہلے یہ دیکھا جاتا ہے کہ اس کے پاس قانون میں منظورشدہ سائزکے مطابق پنجرہ اور کھلا ماحول میسر ہے، اس کے علاوہ شیر اور ٹائیگرکا بچہ کہاں سے خریدا گیا، اگر خریداری کا سورس غیرقانونی ہو تو شیر اور ٹائیگر کو ضبط کرلیا جاتا ہے۔ اسی طرح بریڈنگ سینٹرز کو پابند کیا گیا ہے کہ وہ اپنے جانوروں اور پرندوں کا سٹاک اپ ڈیٹ رکھیں گے اور محکمے کو بھی اس سے آگاہ کریں۔

لاہور میں قتل کی گئی لڑکی مائرہ کے والد نے الزام عائد کیا ہے کہ ان کی بیٹی کو لندن سے بلوا کر قتل کیا گیا۔

ایک نجی ٹی وی سے گفتگو کرتے ہوئے مائرہ کے والد ذوالفقار علی کا کہنا تھا کہ مائرہ کو دھوکے سے لندن سے بلوا کر لاہور میں قتل کیا گیا۔

ذوالفقار علی کا کہنا تھا کہ مائرہ نے ایل ایل ایم کیا تھا اور وہ پاکستان کے لیےکچھ کرنا چاہتی تھی۔

والد مائرہ کا کہنا تھا کہ ریاست مدینہ سے پیار کرنے والے وزیراعظم عمران خان ہمیں انصاف دلائیں۔

خیال رہے کہ چند روز قبل لاہور میں برطانیہ سے آئی لڑکی ماہرہ کی لاش ایک گھر سے برآمد ہوئی تھی اور مائرہ کے قتل کے الزام میں دو افراد کو نامزد کیا گیا تھا، دونوں نامزد ملزمان نے عدالت سے ضمانتیں کروا رکھی ہیں۔

لاہور کو لاک لگ گیا، 9 دنوں کیلئے شٹر ڈاؤن، چاند رات نہیں ہوگی، عید کی چھٹیوں کا آغاز ہوگیا، این سی او کی ہدایات کے مطابق لاہور سمیت پنجاب بھر میں لاک ڈاؤن لگ گیا۔

کورونا کی تیسری لہر کے باعث حکومت نے 8 سے 16 مئی تک عید کی چھٹیوں کا اعلان کیا، جمعہ کے روز شام کے 6 بجتے ہی کاروبار اور بڑی مارکیٹوں کو بند کرادیا گیا۔ اس بار چاند رات پر بھی کاروبار نہیں ہوگا، لاہوریوں نے موقع سے بھرپور فائدہ اٹھاتے ہوئے لاک ڈاؤن سے قبل ملنے والے دن کو ہی چاند رات میں بدل دیا۔ کپڑے، جوتے، مہندی، جیولری جس نے جو خریدنا تھا خرید لیا، تمام مارکیٹس، تجارتی کاروباری مراکز اوردکانیں بند کر دی گئیں ہیں۔ گراسری سٹورز، کلینک، لیبارٹریز اور میڈیکل سٹور، ویکسی نیشن سینٹرز، پھل و فروٹ کی دکانیں، چکن، گو شت کی دکا نیں، بیکریز، پیٹرول پمپس، فوڈ ٹیک اووے اینڈ ای کامرس کھلے رہیں گے۔

یو ٹیلیٹی سورسز بشمول بجلی، گیس،انٹرنیٹ، موبائل فون نیٹ ورکس، ٹیلی کام، کال سینٹرز اور میڈیا کو استثنیٰ حا صل ہے، عوام کی سہولت کیلئے سٹیٹ بینک نے پیر اور منگل کو بینک کھولنے کا اعلان کیا ہے، بین الاضلاعی ٹرانسپورٹ کو ہفتہ اور اتوار کا ریلیف دیا گیا ہے۔ پیر سے وہ بھی بند ہوں گی، ماسوائے پرائیویٹ گاڑیوں، رکشہ اور ٹیکسی کے جن میں نصف سواریوں کی اجازت ہوگی۔

سواریوں کے حجم کو کنٹرول کرنے کیلئے 10 مئی تک اضافی ٹرینیں چلائی گئی ہیں۔ عید پر سیرو سیاحت پر مکمل پابندی ہے، عید کے دنوں میں بلاتعطل بجلی کی فرا ہمی کو یقینی بنایا جائے گا، انتظامی افسرخود فیلڈ میں موجود رہتے ہوئے ایس او پیز پر عملدرآمد کو یقینی بنائیں گے۔

شہر بھر میں قصابوں کے من مانے ریٹ، مٹن کا سرکاری ریٹ 900 روپے مارکیٹ میں 1500 روپے فی کلو تک فروخت ہونے لگا۔بیف کا سرکاری ریٹ 450 روپے، مارکیٹ میں 750 روپے فی کلو تک فروخت ہونے لگا، سرکاری نرخ نامہ صرف ریٹ لسٹوں کی حد تک رہ گیا۔

تفصیلات کے مطابق بیف اور مٹن بھی لاہوریوں کی پہنچ سے باہر ہونے لگا۔شہر بھر میں قصابوں کے من مانے ریٹ، شہر میں سرکاری ریٹ کے برعکس مختلف ریٹس نافذ ہو گئے جبکہ سرکاری نرخ نامہ صرف ریٹ لسٹوں کی حد تک رہ گیا۔مٹن کا سرکاری ریٹ 900 روپے مارکیٹ میں 1500 روپے فی کلو تک فروخت ہونے لگا جبکہ بیف کا سرکاری ریٹ 450 روپے، مارکیٹ میں 750 روپے فی کلو تک فروخت ہونے لگا ہے۔

شہری حکومتی پالیسیوں پر پھٹ پڑے ان کا کہنا تھا کہ شہر میں جو چیز بھی لینے جاو من مانے ریٹ لیے جاتے ہیں، عوام کدھر جائے۔ضلعی انتظامیہ کی توجہ بس چینی پر ہی ہے اور وہ بھی میسر نہیں۔چھوٹا بڑا گوشت سرکاری نرخ ناموں پت نہیں مل رہا۔قصان صافی گوشت کے من مانے ریٹ مانگتے ہیں۔

دوسری جانب مرغی کے گوشت کی قیمت نے چوتھی سینچری مکمل کرلی ہے۔ مرغی کاگوشت3 روپے اضافے سے400 روپے کلو ہوگیا۔ صافی مرغی کا گوشت430 روپے کلو میں مل رہا ہے جبکہ زندہ مرغی کا تھوک ریٹ268،پرچون ریٹ276 روپےکلوہوگیا۔ فارمی انڈے 136 روپےدرجن سرکاری نرخ نامہ برقرار ہیں۔

پنجاب حکومت کا بین الاضلاع پبلک ٹرانسپورٹ کو 10مئی شام 6بجے تک اجازت دینے کا فیصلہ، 10مئی شام6بجے سے15مئی صبح 6بجے تک پبلک ٹرانسپورٹ پر پابندی ہوگی۔

سول سیکرٹریٹ میں کوروناوباء کی صورتحال کا جائزہ لینے کیلئے اعلیٰ سطحی اجلاس کا انعقاد کیاگیا۔ صوبائی وزیر قانون راجہ بشارت، وزیر صحت ڈاکٹریاسمین راشد،چیف سیکرٹری پنجاب اور اعلیٰ سول وعسکری حکام نے اجلاس میں شرکت کی۔صوبائی وزیر قانون راجہ بشارت نے کہا کہ کورونا وباء کی صورتحال کا روزانہ کی بنیاد پر جائزہ لیا جاتا ہے،کورونا سے بچاؤ کا واحد حل احتیاط ہے، لوگ احتیاطی تدابیر پر عمل کر کے ذمہ دار شہری ہونے کا ثبوت دیں۔

صوبائی وزیر صحت ڈاکٹر یاسمین راشد کا کہنا تھاپنجاب کے کسی بھی ویکسینیشن سنٹرپرویکسین کی کوئی کمی نہیں ،روزانہ کی بنیاد پرایک لاکھ سے زائد افرادکی ویکسینیشن کی جارہی ہے،ویکسینیشن کرنے کی صلاحیت میں بتدریج اضافہ کیا جائے گا۔

چیف سیکرٹری پنجاب نے کہا کہ حکومت کیلئے لوگوں کی صحت اور زندگیوں کا تحفظ سب سے اہم ہے،لاک ڈاؤن کے نفاذ کا فیصلہ مفاد عامہ میں کیا گیا،لاک ڈاؤن کی خلاف ورزی کسی صورت برداشت نہیں کی جائے گی۔

ڈیفنس میں لندن سے آئی لڑکی کا قتل، کیس سی آئی اے کینٹ کے سپرد کر دیا گیا ، مقتول مائرہ اور ملزم کی قابل اعتراض تصاویر بھی سامنے آ گئیں.

تفصیلات کے مطابق ڈی آئی جی انوسٹی گیشن نے مائرہ قتل کیس کی تفتیش ڈیفنس بی پولیس سٹیشن سے سی آئی اے کینٹ کے حوالے کر دی ہیں اور ڈی ایس پی کینٹ رانا زاہد کو ملزمان گرفتار کرنے کی ہدایت کی ہے،ادھر مقتولہ مائرہ اور ملزم ظاہر جدون کی غیر اخلاقی تصاویر بھی سامنے آگئی ہیں،پولیس کے مطابق نشے کی عادی مائرہ اور ظاہر جدون دوست تھے، اختلافات کے بعدمائرہ نے ظاہر جدون پر دیگر ساتھیوں سے مبینہ طور پر برہنہ کرکے تشدد کروایاتھا،اور تشدد کے بعد مائرہ نے ظاہر جدون کی برہنہ تصاویر فیس بک پر اپ لوڈ کی تھیں،تصاویر میں ظاہر جدون کو معافی مانگتے دیکھا جاسکتا ہے۔

پولیس کے مطابق ظاہر جدون راولپنڈی میں ایک قتل کیس میں بھی مطلوب ہے، ملزمان سعد بٹ اور ظاہر جدون کی گرفتاری کے لئے چھاپے مارے جا رہے ہیں،پولیس کو شبہ ہے ظاہر جدون نے اپنی بے عزتی کا بدلہ لینے کے لیے ماہرہ کو قتل کیا۔

واضح رہے کہ مقتولہ مائرہ ذوالفقار نے قتل سے دو ہفتے قبل سعد امیر کے خلاف درخواست دی تھی ، درخواست 20 اپریل کو تھانہ ڈیفنس بی میں مائرہ ذوالفقار کی جانب سے جمع کروائی گئی،درخواست میں مائرہ نے سعد امیر نامی شخص پر الزام عائد کیا کہ اس نے مائرہ کو اپنی گاڑی میں بٹھانے کے بعد گلبرگ کے علاقہ میں گن پوائنٹ پر زیادتی کی کوشش کی۔

درخواست گزار کی جانب سے شور مچانے پر ملزم سنگین نتائج کی دھمکیاں دیتا ہوا موقع سے فرار ہو گیا،درخواست میں مائرہ نے اپنی جان کو لاحق خطرات کے حوالے سے پولیس کو آگاہ کیا تھا۔

درخواست کے متن میں مزید کہا گیا کہ مائرہ نے قتل سے 2 ہفتے قبل پولیس سے اپنی جان کا تحفظ مانگا تھا ،تھانہ ڈیفنس بی میں جمع شدہ درخواست میں مائرہ نے اپنی جان کو لاحق خطرے کا ذکر کیا تھا،واقعہ کے بعد سعد امیر مجھے مسلسل جان سے مارنے کی دھمکیاں دے رہا ہے،ذرائع کے مطابق ڈیفنس بی پولیس نے 27 اپریل کو فریقین کو طلب کیا اور واقعہ کے حوالے سے پوچھ گچھ کی۔

کورونا لہر سے اوقات کار محدود ہونے کی وجہ سے متوسط اور مضافاتی علاقوں میں واقع بیوٹی پارلرز کا کام شدید متاثر ہوا ہے جبکہ عید سے قبل خواتین کے بناؤ سنگھار کے خواب بھی لاک ڈاؤ ن کی نظر ہوگئے۔

تفصیلات کے مطابق خواتین کی عید کی تیاریوں کو لاک ڈاؤن کی نظر لگ گئی، بیوٹی پارلرز پر کام نہ ہونے کےوجہ سے بیوٹی پارلرز کی رونقیں ماند پڑگئیں۔ عید سے قبل چاند رات تک خواتین بناؤ سنگھار کے لیے زیادہ تر تھریڈنگ، فیشل، ہیئر کٹنگ اور مختلف سروسز حاصل کرتیں تھیں حالیہ لاک ڈاؤن کی وجہ سے خواتین کی نقل وحرکت محدود ہوئی تو بیوٹی پارلرز سے منسلک کاروبار بھی متاثر ہوا ہے۔

لاک ڈاؤن سے پریشان بیوٹی پارلر مالکان کا کہنا ہےحکومت مشروط ضابطہ جاری کر کے چاند رات تک کاروبار کھولا رکھنے کی اجازت دے، تاکہ ان کے گھروں کے چولہے ٹھنڈے نہ پڑ جائیں۔ کورونا وائرس نے لوگوں کو گھروں تک محدود رہنے پر مجبور کردیا ہے جس کی وجہ سے بیوٹی اسٹورز اور بیوٹی پارلرز بھی سنسان پڑے ہیں۔

دوسری جانب پنجاب حکومت نے کورونا وائرس کا پھیلاؤ روکنے کیلئے لاہور سمیت صوبے بھر میں 8 مئی سے16 مئی تک مکمل لاک ڈاؤن کااعلان کردیا ہے، لاک ڈاؤن کے دوران میڈیکل سٹورز کھولنے کی اجازت ہوگی تاہم ہر قسم کا کاروبار زندگی بند ہوگا۔

کورونا وبا کی تیزی سے پھیلتی تیسری لہر کے پیش نظریو ای ٹی لاہور کا انٹری ٹیسٹ ملتوی کرنےکااعلان،یو ای ٹی کاانٹری ٹیسٹ 24تا27 مئی ہوناتھا.

تفصیلات کےمطابق کورونا وبا کی تیزی سے پھیلتی تیسری لہر کے پیش نظریو ای ٹی لاہور کا انٹری ٹیسٹ ملتوی کرنےکااعلان،یاد رہے یو ای ٹی کاانٹری ٹیسٹ 24تا27 مئی ہونا تھا۔ پنجاب کے تمام سرکاری انجینئرنگ اور انجینئرنگ ٹیکنالوجی اداروں میں داخلےکےلئےانٹری ٹیسٹ لازمی ہے۔انٹری ٹیسٹ کے لئےرجسٹریشن کااندراج نئی تاریخوں کے اعلان تک کھلا رہے گا،اب طلبہ نئی تاریخوں کےاعلان تک اپنی رجٹریشن کرا سکیں گے ۔ یونیورسٹی انتظامہ کا کہنا ہے انٹری ٹیسٹ ملتوی ضرور ہوا ہے مگر رجسٹریشن کاعمل جاری رہے،ایچ بی ایل کی منتخب برانچیں مزید اطلاع تک انٹری ٹیسٹ ٹوکن فروخت کرنا جاری رکھیں گی اور آن لائن / کنیکٹ چالان کی سہولت کےذریعے ٹوکن نمبر حاصل کرنے کی سہولت بھی فعال رہے گی۔

یونیورسٹی انتظامہ کا کہنا ہے امیدوار VU مراکز کی تکمیل کی وجہ سے تکلیف سے بچنے کے لئے جلد از جلد اپنا اندراج کروائیں،جن امیدواروں نے پہلے ہی اندراج کرایا ہے وہ ایک بار جب ٹیسٹ کی نئی تاریخوں کا اعلان ہوجائے تو وہ اپنے داخلہ کارڈ دوبارہ پرنٹ کریں کیوں کہ ایڈمٹ کارڈ خود بخود اپ ڈیٹ ہوجائیں گے۔

کمشنر لاہور ڈویژن کیپٹن( ر)محمد عثمان کا کاروباری افراد کی سہولت کیلئے بڑا فیصلہ، لاہور اور پوری ڈویژن میں کورونا ایس اوپیز خلاف ورزی پر سیل تمام مقامات کو ڈی سیل کرنے کے احکامات جاری کردیئے۔

کمشنر لاہور نے کاروبای افراد کو ایک اور موقع دینے کا فیصلہ کرلیا، انہوں نے کہاکہ مکمل لاک ڈاؤن سے پہلے لوگوں کو ریلیف دیا، کل8 مئی سے مکمل لاک ڈاؤن نافذ ہو جائے گا، اب کورونا ایس او پیز خلاف ورزی ہوئی تو سخت سزا ور سیلنگ دونوں ہو گی۔

کمشنر احکامات کے مطابق سیل کیے گئے دکانیں سٹورز، بیکریز، ہوٹل، ریستوران،سیلون ڈی سیل کرنے کے احکامات جاری کئے گئے، کمشنر کے احکامات کا باقاعدہ نوٹیفکیشن جاری کردیا گیا، تمام اضلاع کو کمشنر لاہور ڈویژن کے احکامات پہنچا دیئے گئے۔

کمشنر آفس کے مطابق ڈی سیلنگ کے احکامات شہریوں کے کورونا ایس اوپیز پر عملدرآمد کے بڑھتے رحجان کی حوصلہ افزائی کیلئے کیا۔ علاوہ ازیں کورونا ایس او پیز کی خلاف ورزی پر 224 افراد کو گرفتار کر لیا گیا۔

دوسری جانب کمشنر لاہور ڈویژن کیپٹن( ر) محمد عثمان نے شہرمیں بڑے پیمانے پر شجرکاری کیلئے منظم منصوبہ بندی کیلئے تمام سٹیک ہولڈرز کے ساتھ اجلاس کیا، ڈی جی پی ایچ اے،نیر علی دادا،کامل خان ممتازسمیت شہری تنظیموں،سرکاری محکموں کے افسروں نے شرکت کی۔ کیپٹن (ر)محمدعثمان کا کہنا تھاکہ 51 میواکی جنگل، پرائیویٹ سیکٹر کی معاونت سے بھرپور شجرکاری کی جارہی ہے۔

کمشنر لاہور نے کہا کہ شجرکاری ترجیحات میں شامل ہے۔لاہور کے درختوں کی اپلی کیشن بنائی جائیگی، ہر بشر دو شجر کے سلوگن کے تحت نئے روح کیساتھ شجرکاری مہم شروع کریں گے۔

کمشنر لاہور نے کہا کہ سرکاری اور نجی نرسریوں کی تعداد اور گنجائش کو دوگنا کر رہے ہیں، لاہور میں 51 میواکی جنگل اگائے جارہے ہیں، چھوٹے جنگل بھی لگائے جائیں گے۔