Category لاھور نامہ

کورونا ایس اوپیز پر عمل درآمد کیلئے ضلعی انتظامیہ متحرک، اسسٹنٹ کمشنر سیدہ تہنیت بخاری کی تحصیل شالیمار کے علاقے میں کارروائیاں ،کورونا ایس اوپیز کی خلاف ورزی پر 13 شاپس کو 44 ہزار جرمانے اور 3 شاپس سیل کردیں گیئں،سیدہ تہنیت بخاری کہتی ہین کورونا ایس اوپیز کی خلاف ورزی پر زیرو ٹالرینس کی پالیسی ہے۔

تفصیلات کے مطابق ملک بھر میں کورونا کے مزید 73 مریض دم توڑ گئے، این سی او سی گزشتہ روز ملک بھر میں 59 ہزار 136 افراد کے کورونا ٹیسٹ کئے گئے، ملک بھر میں 4 ہزار 786 نئے مثبت کیسز رپورٹ ہوئے، ملک بھر میں کورونا مثبت کیسز کی شرخ 8 اعشاریہ 09 فیصد تک پہنچ چکی۔

کورونا کیسز میں اضافے کے بعد لاک ڈاؤن نافذ، خلاف ورزی پر ریکارڈ بھاری جرمانہ
لاہورمیں ایس او پیز پر درآمد کرانے کے لئےضلعی انتظامیہ متحرک ہے،اسسٹنٹ کمشنر سیدہ تہنیت بخاری نے تحصیل شالیمار کے علاقے میں کورونا ایس اوپیز کی خلاف ورزی پر تاجر برادری کے خلاف کارروائیاں کیں،کورونا ایس او پیزپر عمل درآمد نہ کرنے پر 13 شاپس مالکان کو کورونا ایس اوپیز کی خلاف ورزی پر 44 ہزار کے جرمانے کیے گئے۔

علی کارپٹ ہاوس ،اربن سول شوز،پے لس شاپ،ہارڈویئر شاپ،احمد بلڈنگ میٹیریل، شہزاد الیکٹرونکس،چشتی شوز ،رضا بک ڈپو،خواجہ غریب نواز بورنگ ،راوی الیکٹرانکس شاپ ،رحیم پینٹ سٹور ،مائی ڈالر شاپ ،ماڈرن ٹیلر شاپ کو جرمانہ کیا گیا ۔اسی طرح کورونا ایس اوپیز کی خلاف ورزی پر فیاض آٹو ،اذان آٹو ،سنوکر کلب لال پل کو سیل کردیا گیا۔

اے سی تہنیت بخاری نے کہا کہ کورونا ایس اوپیز پر کوتاہی کو برداشت نہیں کریں گے،ڈی سی مدثر ریاض کی ہدایات پر کاروائیاں جاری رکھیں گے۔

رنگ محل میں جوتوں کی دکان میں آگ لگنے سے بھاری مالیت کا سامان جل گیا تاہم کوئی جانی نقصان نہیں ہوا۔

ریسکیو حکام کے مطابق آتشزدگی کا واقعہ فوارہ چوک کے قریب جوتوں کی دکان میں پیش آیا، جہاں اچانک بھڑکنے والی آگ نے دکان کے بیشتر حصے کو اپنی لپیٹ میں لے لیا۔ اطلاع ملنے پر ریسکیو ٹیمیں موقع پر پہنچ گئیں، ایک گھنٹے کی امدادی کارروائیوں کے دوران آگ پر قابو پا لیا۔

ریسکیو حکام کا کہنا ہے کہ حادثے میں کوئی جانی نقصان نہیں ہوا، تاہم دکان میں موجود سامان جزوی طور پر متاثر ہوا۔

کورونا وائرس کا خوف لوگوں میں ذہن میں اپنے خونی پنجے گاڑے چکا ہے، اس کی وجہ سے کورونا کے مریض خودکشیاں کرنے پر تلے ہوئے ہیں، ایک ایسا ہی واقعہ لاہور کے میوہسپتال میں ہوا جہاں کورونا کا شکار مریض نے اپنے گلے پر چھری پھیر کر زندگی کا خاتمہ کرلیا۔

تفصیلات کے مطابق لاہور کے میو ہسپتال میں کورونا کے مریض نے خودکشی کرلی،میو ہسپتال میں زیر علاج کورونا سے متاثرہ 35 سالہ مریض نے وارڈ میں چھری سے اپنا گلا کاٹ کر خودکشی کی اور وہ خون بہہ جانے کی وجہ سے مر گیا۔

میوہسپتال کی انتظامیہ کے مطابق مریض نے پھل کاٹنے والی چھری کا استعمال کرتے ہوئے اپنا گلا کاٹا، خون زیادہ بہنے کی وجہ سے مریض جانبر نہ ہوسکتا،میوہسپتال کے ایم ایس نے بتایا کہ مریض کی ذہنی حالت ٹھیک نہیں تھی، وہ تین اگست سے ہسپتال میں زیر علاج تھا۔

مریض کی خودکشی کے بعد انتظامیہ نے پولیس کو طلب کیا، جس نے سب سے پہلے لاش کو ضابطے کی کارروائی کیلئے متعلقہ وارڈ منتقل کیا اور کمرے سے شواہد اکٹھے کر کے مزید تحقیقات کا آغاز کردیا۔

کوروناوائرس نے تمام شعبوں کو متاثر کیا ہے ،کورونا کی چوتھی لہر کی شدت میں اضافہ ہو گیا ہے۔

تفصیلات کے مطابق لاہور میں گزشتہ 24گھنٹوں میں کوروناسے4اموات ہوئیں جبکہ کوروناوائرس کے564نئے مریضوں کی تصدیق ہوئی ہے۔ شہر میں کورونا کے مثبت کیسز کی شرح 8.2 فیصد ہوگئی۔

ملکی مجموعی صورتحال کی بات کی جائے تو کورونا وائرس سے ملک بھر میں گزشتہ چوبیس گھنٹوں میں 79 افراد جاں بحق ہوگئے، جس کے بعد اموات کی تعداد 24 ہزار 266 ہوگئی۔ پاکستان میں کورونا کے تصدیق شدہ کیسز کی تعداد 10 لاکھ 89 ہزار 913 ہوگئی۔

ٹولنٹن مارکیٹ میں مردہ مرغیاں منگوانے والا ملزم چھلاوا بن گیا،پولیس کے زیر حراست ملزمان کے اعترافی بیان کے باوجود پولیس ملزم کا سراغ نہ لگا سکی ۔

تفصیلات کے مطابق پولیس کی حراست میں ملزم احمد ، نعمان اور ڈرائیور ہیں،علی نے تفتیش کے دروان بتایا کہ آصف علی نامی ملزم نے فون کر کے ٹولنٹن مارکیٹ میں مردہ مرغیاں لانے کا بولا تھا جبکہ ٹولنٹن مارکیٹ تاجروں کے مطابق آصف علی نام کا تاجر اور سپلائر مارکیٹ میں موجودہی نہیں۔

پولیس کو مردہ مرغیاں منگوانے والے ملزم آصف علی کی تلاش ہے، پولیس اور فوڈ اتھارٹی کی ٹیم نے ٹولنٹن مارکیٹ میں کارروائی کرتے ہوئے مردہ مرغیاں سپلائی کرنے والے تین ملزمان کو حراست میں لیا تھا، تینوں ملزمان نے عدالت سے ضمانت کروائی، ملزمان کے قبضے سے 2600 کلو مردہ مرغیاں برآمد کی گئی تھیں،پولیس کا کہنا تھا کہ ملزم آصف علی کی تلاش جاری ہے ، جلد ملزم کو گرفتار کر لیا جائے گا۔

واضح رہے کہ گزشتہ دنوں موبائل سکواڈ کی شیرا کوٹ پولیس نے کارروائی کرتے مردہ مرغیاں سپلائی کرنے کی کوشش ناکام بناتے ہوئے ملزم کو گرفتار کیاتھا،ایس پی موبائل سکواڈ سید ذیشان حیدر کا کہناتھا کہ وقاص نامی شخص ٹرک میں رکھی بند بوریوں میں مردہ مرغیاں چھپا کر لے جا رہا تھا کہ بابو صابو پولیس ناکے پر تعینات اہلکاروں نے ٹرک کو روک کر چیک کر لیا۔

مردہ مرغیاں برآمد ہونے پر ملزم کو موقع سے حراست میں لے لیا گیا اور ٹرک سے بھاری مقدار میں برآمد شدہ مردہ مرغیاں قبضے میں لے لی گئیں۔

ایس پی موبائل سکواڈ کا کہنا ہے کہ گرفتار ملزم وقاص کا تعلق شیخوپورہ سے ہے جس نے ابتدائی تفتیش کے دوران مردہ مرغیاں فاسٹ فوڈ پوائنٹس اور ہوٹلوں میں سپلائی کرنے کا اعتراف کیا ہے تاہم ملزم کو قانونی کارروائی کے لئے شیرا کوٹ پولیس کے حوالے کر دیا گیا ہے ۔

اچھرہ کے علاقے میں فیملی سے بد سلوکی کرنے والے تین اہلکار معطل کر دیئے گئے ۔ اہلکاروں نے چیکنگ کے دوران خواتین کے ساتھ بدتمیزی کا مظاہرہ کیا تھا ۔

تفصیلات کے مطابق گذشتہ رات پولیس کی جانب سے ایک گاڑی کو مشکوک جانتے ہوئے روکا گیا جس میں موجود خواتین بھی موجود تھیں ۔ پولیس اہلکاروں نے خواتین کے ساتھ بدتمیزی کی جس کی ویڈیوز بھی منظر عام پر آگئیں جس کے بعد ڈی آئی جی نے ایس پی ماڈل ٹاون کو انکوائری کرنے کے احکامات جاری کیے ۔ انکوائری میں قصور وار ثابت ہونے پر ڈی آئی جی آپریشنز ساجد کیانی کے احکامات پر تینوں اہلکار معطل کر دیا جس میں ٹرینی اے ایس آئی بلال، کانسٹیبل فاروق اور عمران شامل ہیں ۔ ڈی آئی جی آپریشنز کا کہنا تھا کہ کسی کو قانون سے تجاوز کرنے کی اجازت نہیں دی جا سکتی۔

پنجاب حکومت گیارہ “سیر گاہوں” کو ٹھیکے پر دے گی ، محکمہ سیاحت پنجاب لاہور سمیت صوبہ بھر میں 11 سیر گاہوں کو ایک سال کے لیے ٹھیکے پر دے کر 3 کروڑ 40 لاکھ روپے کی آمدن حاصل کرے گی ۔

تحریک انصاف کی حکومت نے سیاحت سے زرائع آمدن حاصل کرنے کے لیے جہان گیسٹ ہاؤسز کو ٹھیکے پر دیا وہیں اب سیر گاہوں اور پارکوں کو ٹھیکے پر دے رہی ہے ۔ محکمہ سیاحت کے حکام کے مطابق لاہور میں جلو پارک ل کو سالانہ 70 لاکھ روپے کے لیے لیز پر دے گا ۔۔جبکہ مری ،کوٹلی ستیاں ،چکوال ،راجن پور ،ڈی جی خان میں سیر گاہوں کو ٹھیکے پر دیا جائے گا ۔

محکمہ سیاحت کے حکام کے مطابق گیارہ ریزورٹس ایک سال کے لیے 3 کروڑ 40 روپے میں ٹھیکے پر دئیے جائیں گے ۔۔اوع سیر گاہوں کو ٹھیکے پر دینے کے لیے محکمے کو خواہش مند افراد کی ضرورت ہے۔

لاہور ہائیکورٹ نے جعلی دودھ فروخت کرنیوالوں کو انسانیت کا دشمن اور ملک پر بدنما دھبہ قرار دیتے ہوئے 5 ملزموں کی ضمانت خارج کردی۔ جسٹس سہیل ناصر نے چار صفحات پر مشتمل تحریری فیصلہ جاری کردیا، عدالتی فیصلہ میں کہا گیا ہے کہ جرم قابل ضمانت ہونے کے باوجود ملزم ضمانت کے حق کا دعوٰی نہیں کر سکتے، مصنوعی دودھ معصوم بچوں کیلئے زہر قاتل ہے، انسانی جسم کو بیماریوں کا گھر بنا دیتا ہے، مصنوعی ہارمونز کینڈا، بھارت، یورپ سمیت کئی ممالک میں ممنوعہ قرار دیئے جا چکے ہیں

لاہور ہائیکورٹ کے جسٹس سہیل ناصر نے جعلی دودھ فروخت کرنیوالوں کو انسانیت دشمن قرار دیتے ہوئے قرار دیا ہے کہ بادی النظر میں ملزموں نے مصنوعی دودھ فروخت کر کے معاشرے کیخلاف جرم کیا، ایسے ملزم انسانیت کے دشمن، ملک کیلئے بدنما دھبہ ہیں۔جسٹس سہیل ناصر نے مصنوعی دودھ فروخت کرنے کے مقدمہ کے 5 ملزموں اللہ یار سمیت دیگر کی درخواست ضمانت خارج کرنے کا چار صفحات پر مشتمل تحریری فیصلہ جاری کیا ۔

تحریری فیصلہ کو عدالتی نظیر قرار دیا گیا ہے۔عدالتی فیصلے میں کہا گیا ہے کہ ملزم مصنوعی دودھ بنانے میں مصروف تھے،محض فیکٹری میں ملازمت کا دفاع نہیں لے سکتے،چھاپے کے دوران ملزموں کے پاس سے کوکنگ آئل، خشک دودھ پائوڈر اور دیگر اشیا برآمد ہوئیں۔ مصنوعی دودھ میٹھا زہر، جس میں ڈیٹرجنٹ یا صابن اور یوریا استعمال کیا جاتا ہے،مصنوعی دودھ اگرچہ فوری موت کا سبب نہیں بنتا مگر انسانی جسم کو بیماریوں کا گھر بنا دیتا ہے۔

جسٹس سہیل ناصر نے اپنے فیصلے میں مزید کہا ہے کہ مصنوعی دودھ آنکھوں میں سوجن، جگر اور گردوں میں پچیدگیوں کا سبب بنتا ہے، حاملہ خواتین، دل اور بلڈ پریشر کے مریضوں کیلئے جان لیوا ثابت ہوتا ہے، 20 لاکھ لیٹر مصنوعی دودھ روزانہ شہری علاقوں میں منتقل کئے جانے کی رپورٹس شائع ہو چکی ہیں، ڈیریز پر بھی جانوروں کو مصنوعی ہارمونز لگا کر دودھ نکالے جانے کی رپورٹس شائع ہو چکی ہیں، آکسیٹوسین ہارمون انسانوں میں کینسر اور دیگر بیماریوں کا سبب بننے کی خبریں بھی شائع ہوئیں، فیصلہ میں مزید کہا گیا ہے کہ ملزم ضمانت کے حق کا دعوٰی نہیں کر سکتے، عدالت نے اپنا صوابدیدی اختیار ہر کیس کی نوعیت کے مطابق استعمال کرنا ہوتا ہے، ملزم اللہ یار، عمر حیات، اکبر، اختر حسین اور محمد اعظم نے ضمانت کیلئے رجوع کیا تھا، ملزموں پر عارفوالا میں فیکٹری لگا کر مصنوعی دودھ بنانے کا الزام ہے

ڈی آئی جی ٹریفک ہیڈکوارٹر عمران احمد نے جشن آزادی کے حوالے سے تمام چیف ٹریفک افسران کو ہدایات جاری کر دیں اورچڑیاگھرکےباہرٹریفک کی روانی یقینی بنانے جبکہ ون ویلنگ کرنے والوں کو جیل بھیجنے کی ہدایت جاری کردیں۔

تفصیلات کے مطابق ڈی آئی جی ٹریفک نے پنجاب بھر کے مکینکوں کو خبردار کر دیاہےکہ موٹرسائیکلوں کو آلٹر کرنے والوں کیخلاف مقدمات درج کر کے جیل بھیجا جائے گا۔چودہ اگست کے تقدس کو برقرار رکھتے ہوئے منایا جائےاوروالدین بھی اپنے بچوں کوان حرکتوں سے بازرکھیں۔

انہوں نے کہا کہ مری میں رش کی وجہ گنجائش سے زیادہ گاڑیوں کا ایک دم آ جانا ہے لہذا عوام سے گزارش ہے چھٹیوں میں مری کا رخ نہ کریں۔ڈی آئی جی نے مزہد کہا ریکارڈ یافتہ ون ویلرز کے خلاف بھی کریک ڈاؤن کا آغاز کرنے کی ہدایات جاری کر دیں۔

نواب ٹاؤن کے علاقے میں شہری نے اپنے گھر کو آگ لگا دی جس سے گھر میں موجود دو بیٹیوں کے جہیز کا سامان جل گیا۔

پولیس کے مطابق ناراض بیگم واپس نہ آنے پر شوہر نے گھر کو آگ لگ دی ۔ دوبئی ٹاؤن رائیونڈ روڈ کے رہائشی منیر احمد نے گھر کا آگ لگا کر باہر سے تالہ لگا دیا ۔آتشزدگی سے گھر میں موجود دو بیٹیوں کے جہیز کا سامان جل کر راکھ ہوگیا ۔آتشزدگی سے گھر میں موجود دیگر قیمتی سامان اور اشیا بھی جل گئیں۔

ریسکیو ٹیموں نے موقع پر پہنچ کر آگ پر قابو پا لیا۔پولیس کے مطابق منیر نشے کا عادی ہے جسکی وجہ سے اسکی بیوی بچوں کو لے کر میکے چلی گئی تھی ۔متاثرہ شہری نے بیوی بچوں کو منانے کی کوشش کی مگر ناکام رہا ۔پولیس کا کہنا تھا کے متاثرہ شہری کے بیوی بچے سات روز قبل لڑائی جھگڑے کے بعد میکے گئے تھے ۔