Category لاھور نامہ

شہر میں بھارتی ویریئنٹ کا پھیلاو روکنے کیلئے ضلعی انتظامیہ متحرک ۔کورونا ایس او پیز کی خلاف ورزی پر پیکجز مال کا پلے ایریا سیل کردیا گیا

رپورٹ کے مطابق ڈپٹی کمشنر لاہور مدثر ریاض ملک کی ہدایت پر اسسٹنٹ کمشنرز نے بازاروں میں کورونا ایس اوپیز کے عمل درآمد کا جائزہ لینے کیلئے سرپرائز وزٹس شروع کردیئے۔اسسٹنٹ کمشنر ماڈل ٹاؤن ابراہیم ارباب ن ایک ایسے ہی سرپرائز وزٹ کے دوران پیکجز مال پہنچے جہاں انہوں نےکورونا ایس اوپیز کی خلاف ورزی پر پلے ایریا سیل کردیا ۔

اسسٹنٹ کمشنر ماڈل ٹاؤن ابراہیم ارباب نے کہا کہ کسی بھی ادارے میں ایس او پیز کی خلاف ورزی کی اجازت نہیں دی جائے گی انہوں نے کہا کہ کاروباری برادری کو ایس اوپیز پر عمل درآمد کرنا ہوگا۔ ڈپٹی کمشنر مدثر ریاض ملک نے تاجر برادری کو خبردار کردیا کہ ضلعی انتظامیہ کا عزم ہے کہ شہر کو کورونا سے پاک کیا جائے۔ کاروباری حضرات تعاون کریں۔

ملک مبشرکھوکھر قتل کیس، تحقیقات کا دائرہ کار جیل تک بڑھانے کا فیصلہ، ملزم کے ساتھیوں کا پتہ چلانے کے لئے سی آئی اے ٹیم نے اہم اقدامات اٹھانے شروع کردئیے ۔

رپورٹ کے مطابق سی آئی اے ٹیم نے ملزم ناظم کے انکشافا ت کی روشنی میں تحقیقات کا دائرہ کار وسیع کردیا ہے ۔ سی آئی اے حکام کا کہنا ہے کہ ملزم نے 8 سال جیل بھی کاٹی تفتیش کی جائے گی کہ وہ جیل میں کس کے ساتھ رہا اور اس کی دوستی کس کس سے تھی۔ مرکزی ملزم کےجیل ساتھیوں کا پروفائل بھی چیک کیا جائے گا۔ اسی طرح یہ بھی دیکھا جائے گا کہ ملزم ناظم نےرہائی کےبعدکن افراد سےملاقات کی؟ ان سے کیا مشاورت کی گئی ان افراد نے ملزم کو کیسے مدد دی۔ یہ سب تفصیلات اکٹھی کی جائیں گی۔یادرہے ابھی تک پولیس نے مرکزی ملزم ناظم اور اس کے ایک ساتھی عمر حیات کو گرفتار کررکھا ہے ۔ ملزم ناظم نے وزیراعلی پنجاب کی موجودگی میں صوبائی وزیر اسد کھوکھر کے بھائی کو شادی کے پنڈال میں قتل کردیا تھا۔

لائن بناؤ، بڈ جمع کراؤ ، اورینج لائن ٹرین کا اسٹیشن ٹھیکے پر لے جاؤ ، اورینج ٹرین کے تمام اسٹیشن آؤٹ سورس کیے جائیں گے، اسٹیشنز کو آؤٹ سورس کرکے حکومت زرائع آمدن حاصل کرے گی۔

اورینج ٹرین کے اسٹیشن ٹھیکے پر لینے ہو جائیں تیار، پنجاب حکومت نے اورینج ٹرین کے اسٹیشن ٹھیکے پر دینے کے لیے باقاعدہ بڈ مانگ لی، ماس ٹرانزٹ اتھارٹی نے کمپنیوں سے بڈ لینے کے لیے ٹینڈر جاری کردیا۔ اورینج ٹرین کے تمام اسٹیشن آؤٹ سورس کیے جائیں گے۔

اسٹیشنز کو آؤٹ سورس کرکے حکومت زرائع آمدن حاصل کرے گی ، اورینج ٹرین کے اسٹیشنوں پر ٹک شاپ،اے ٹی ایم مشینیں لگائی جائیں گی۔بڑے بڑے برینڈ اپنی تشہیر کیلئے اسٹیشز کا استعمال کرسکیں گے۔

یاد رہے کہ اورینج کے اسٹیشنز کو آؤٹ سورس کرنے کے لیے وزیر اعلی پنجاب منظوری بھی دے چکے ہیں، قانون پچیدگیاں دور کرنے کے بعد اب ماس ٹرانزٹ اتھارٹی نے کمپنیوں سے بڈ طلب کی ہے ۔

ٹرانسفارمرز میں شارٹ سرکٹ کے باعث آگ بھڑکنے کے واقعات معمول بن گئے، گلشن راوی میں آتشزدگی نے شہری کے گھر کو اپنی لپیٹ میں لے لیا۔

تفصیلات کے مطابق لاہور الیکٹرک سپلائی کمپنی کی نااہلی سے آگ لگنے کے باعث لاکھوں کا سامان جل کر خاکستر ہو گیا جبکہ مکینوں نے بھاگ کر جانیں بچائیں، ٹرانسفارمر میں اس سے قبل بھی آگ لگنے پر شکایات کے باوجود نوٹس نہیں لیا گیا۔

گلشن راوی توحید پارک کے علاقے میں ٹرانسفارمر میں شارٹ سرکٹ کے باعث لگنے والی آگ نے دیکھتے ہی دیکھتے اشعر محمود نامی شخص کے گھر کوبھی اپنی لپیٹ میں لے لیا۔ آتشزدگی کے باعث گھر میں رہنے والے افراد نے بھاگ کر اپنی جانیں تو بچالیں تاہم لاکھوں روپے کا قیمتی سامان جل کر راکھ ہوگیا۔

ریسکیو 1122 نے موقع پر پہنچ کر آگ پر قابو پایا۔مکان مالک کے مطابق لیسکو کی نااہلی کے باعث نقصان ہوا،ٹرانسفارمر میں اس سے قبل بھی آگ لگ چکی تھی، لیسکو انتظامیہ نے شکایات کے باوجودتبدیل نہیں کیا،متاثرہ خاندان نے وزیراعلٰی سے نوٹس لینے کا مطالبہ کیا ہے۔

لوکل گورنمنٹ میں مافیاز کا گٹھ جوڑ ٹوٹ گیا، سیکرٹری بلدیات نورالامین مینگل نے تمام ٹھیکیداروں کو برابری کے حقوق دیکر ان لسٹمنٹ کی شرط ختم کردی، نئے کنٹریکٹرز کا راستہ روک کر چند بااثر ٹھیکیداروں نے اپنی اجارہ داری قائم کررکھی تھی۔

محکمہ بلدیات میں یکے بعد دیگر اہم فیصلے کیے جارہے ہیں، کنٹریکٹرز کو ریلیف دیتے ہوئے ٹھیکوں کیلئے بڈ میں حصہ لینے کے لئے ان لسٹمنٹ کی شرط ختم کردی گئی ہے۔ سیکرٹری بلدیات نورالامین مینگل کے احکامات کےمطابق پی ای سی سے رجسٹرڈ اور مطلوبہ تجربہ کی حامل فرموں کو ٹھیکوں میں بڈ ڈالنے کی اجازت دے دی گئی ہے۔

ذرائع کے مطابق اس سے قبل لوکل گورنمنٹ کا مافیا بھاری رقوم کا تقاضا کرتا تھا، سالانہ تجدید اور ٹینڈرز لینے کے لئے بھی رشوت وصول کی جاتی تھی،سیکرٹری بلدیات کے حکم پر باقاعدہ نوٹیفکیشن جاری کردیا گیا ہے۔

نورالامین مینگل کا کہنا ہے کہ اہل رجسٹرڈ فرموں کے آنے سے ترقیاتی سکیموں کے ٹھیکوں کے حصول کیلئے مقابلہ بڑھے گا، اچھے کنٹریکٹرز سامنے آئیں گے۔

لاہور پولیس سوشل میڈیا پر اسلحہ کی نمائش کرنےوالوں کےخلاف متحرک، ٹک ٹاکر علی حمزہ اور حماد صغیر کو گرفتار کرلیا گیا۔

تفصیلات کے مطابق ڈیفنس اے پولیس نے ٹک ٹاکر علی حمزہ اور حماد صغیر کو گرفتار کرلیا، ایس ڈی پی او ڈیفنس کا کہنا ہے کہ ملزموں نےناجائز اسلحہ کے ساتھ تصاویر بنا کرسوشل میڈیاپراپ لوڈ کی تھی، ملزم سوشل میڈیا پر پولیس اور انتظامیہ کو چیلنج اور گالیاں بھی دیتے رہے، ایس ڈی پی او ڈیفنس کا مزید کہنا تھا کہ ملزمان کے سے ناجائز اسلحہ اور گولیاں بھی قبضے میں لے لی گئیں جبکہ ملزمان کی تصاویر وائرل ہونے پر فوری گرفتار کیا گیا، ایس ڈی پی او ڈیفنس غلام دستگیر کاکہنا تھاکہ ملزمان کے خلاف مقدمات درج کر کے مزید تحقیقات کا آغاز کر دیا گیا ہے۔

واضح رہے کہ ایس پی ماڈل ٹاؤن دوست محمد کی ہدایت پر ایس ایچ او شادمان کی کارروائی کرتے ہوئے سوشل میڈیا پر اسلحہ کی ویڈیو بناکر وائرل کرنے والا ملزم عمان گرفتار کرلیا گیا تھا۔ملزم نے ٹک ٹاک پر ویڈیو میں اسلحہ کی نمائش کی تھی۔ایس ایچ او شادمان راؤ اویس نے ملزمان کے قبضہ سے اسلحہ برآمد کرکے مقدمہ درج کرلیا۔ ایس پی ماڈل ٹاؤن دوست محمدکا کہنا ہے کہ سوشل میڈیا پر اسلحہ کی نمائش اور ہوائی فائرنگ کرنے والوں کے خلاف زیرو ٹالرنس پالیسی پر عمل پیرا ہیں۔

فیملی سول عدالت میں شوہر کی طرف سے بار بار طلاق دینے اور شام کو معافی مانگنے سے تنگ سنت نگر کی خاتون پروین نے خلع کا دعوے دائر کر دیا۔

تفصیلات کے مطابق لاہور کی فیملی سول عدالت میں شادی شدہ جوڑے کا کیس آیا ہے، جہاں شوہر سے تنگ سنت نگر کی خاتون پروین نے بیان دیا کہ شوہرصبح طلاق دے کر شام کو پاؤں پڑ جاتا ہے،عدالت میں قانونی نکتہ اٹھایا گیا کہ اگر کوئی شخص بیوی کو طلاق دے اور بعد میں معافی مانگ لے کیا ایسی صورت میں عورت کو طلاق ہو تی ہے یا نہیں؟عدالت نے وکلا کو یکم ستمبر کو بحث کےلیے طلب کرلیا۔

فیملی گارڈین عدالت سول کورٹ میں سنت نگر کی پروین نے خلع کا جودعوے کا دعوے دائر کیا ہے ا س میں موقف اختیار کیا گیا ہےکہ اس کے شوہر نے وطیرہ بنارکھا ہے کہ معمولی بات پر اس کو طلاق دے کر گھر سے چلا جاتا ہے شام کو واپس آ کر معافی مانگ لیتا ہے یہ معمول کئی ماہ سے جاری ہے آئے روز طلاق طلاق کا لفظ سن کر تنگ آ چکی ہوں ضمیر اس کی اجازت نہیں دیتا کہ ایسے شوہر کے ساتھ رہوں لہذا خلع کی بنیاد پر اس شخص سےچھٹکارا دیا جائے۔

کورونا وائرس کی چوتھی لہر میں آئے روز اضافہ ہورہا ہے جس کے ضمن میں طلبہ اور اساتذہ کے لئے کورونا ویکسی نیشن کو لازمی قرار دیا گیا، اس حوالے سے صوبائی وزیرتعلیم ڈاکٹر مراد راس نے تمام سرکاری و نجی اسکولوں کے عملے کو ویکسی نیشن کے لیے ڈیڈ لائن دے دی۔

تفصیلات کے مطابق مراد راس نےویڈیو بیان میں کہا ہے کہ 22 اگست تک تمام سرکاری اور نجی سکولز کے اساتذہ اور دیگر عملے کے لیے ویکسی نیشن کرانا لازمی ہے،سکولوں میں ویکسی نیشن کرانے کے لیے نوٹی فکیشن پہلے ہی جاری کیا جاچکا ہے، ویکسی نیشن نہ ہونے کی صورت میں متعلقہ سکول کو سیل کردیا جائے گا۔ اپنے پیغام میں مراد راس کا مزید کہناتھا کہ 22 اگست کے بعد کسی بھی فرد کو ویکسی نیشن سرٹیفکیٹ کے بغیر سکول میں داخلے کی اجازت نہیں ہوگی۔

واضح رہے کہ ڈسٹرکٹ ایجوکیشن اتھارٹی لاہور کے چیف ایگزیکٹو آفیسر پرویز اختر نے خصوصی ٹیمیں تشکیل دے دی ہے، پرائیویٹ سکولوں میں اساتذہ کی کورونا ویکسی نیشن کی مانیٹرنگ کرنے کے لئےڈسٹرکٹ ایجوکیشن آفیسرز کی نگرانی میں ٹیمیں تشکیل دے دی ہیں،افسران کی ٹیمیں پرائیویٹ سکولوں میں اساتذہ کی ویکسی نیشن کی انسپکشن کریں گی۔

پرویز اختر کا کہنا ہےکہ پرائیویٹ سکولوں میں تعینات اساتذہ کے کورونا ویکسی نیشن کے سرٹیفکیٹ چیک کیے جائیں گے اور جن سکولوں کے اساتذہ نے تاحال کورونا ویکسین نہیں لگوائی ان کے خلاف کارروائی عمل میں لائی جائے گی، انھوں نے بتایا کہ سکولوں میں اساتذہ کی کورونا ویکسی نیشن سے متعلق رپورٹ ایجوکیشن اتھارٹی کو جمع کرانے کے پاپند ہوں گے۔

شہر میں ایک اوربڑےفلائی اوورکی تعمیرکامنصوبہ تیار کر لیا گیا ,ایل ڈی اے کی جانب سےبھیکے وال موڑپر3رویہ فلائی اوور کی تعمیرکا ابتدائی پلان تیارکرلیا گیا۔

تفصیلات کے مطابق شہر میں ٹریفک کے مسائل حل کرنے کیلئے ترقیاتی منصوبوں پر کام جاری ہے، ایل ڈی اے کی جانب سے بھیکے وال موڑپربھی3 رویہ فلائی اوورکی تعمیر کاابتدائی پلان بنایا گیا ہے جس کا تخمینہ لاگت ایک ارب90 کروڑروپے لگایا گیا ہے،ایل ڈی اے کے ابتدائی پلان کے مطابق شیخ زید ہسپتال سےعلامہ اقبال ٹاؤن میں بلیوارڈکیلئےبھیکے وال موڑپرفلائی اوور تعمیر کیا جائےگا جبکہ فلائی اوورکی تعمیرکیساتھ علامہ اقبال ٹاؤن مین بلیوارڈپرنئےیوٹرن بھی بنائے جائیں گے ، فلائی اوور کی تعمیر سےروزانہ2 لاکھ سے زائد گاڑیاں گزریں گی،شیخ زید ہسپتال کے قریب بھی نئےیوٹرن بنائےجائیں گے

دوسری جانب ایل ڈی اے کی جانب سے کا اللہ ہوگول چکر ،شوق چوک تا شوکت خانم فلائی اوور خیابان فردوسی کی ری ماڈلنگ کےپراجیکٹ پر فوری کام شروع کردیا گیا ہے ، لاہور ڈویلپمنٹ اتھارٹی کے پلان کے مطابق اللہ ہوگولچکر کو ختم کرکے خیابان فردوسی کا دورویہ ٹریک تھرو کردیا جائےگا ۔ اللہ ہوگول چکر سے قبل اور بعد میں دو پروٹیکٹڈ یوٹرن بنائے جائیں گے ۔ منصوبےکے مطابق محمود چوک ، جگاور چوک ، شادیوال چوک کی ری ماڈلنگ ہوگی جبکہ سگنلز بھی لگائے جائیں گے ۔ ایل ڈی اے نے منصوبے کا کنٹریکٹ 9 کروڑ60 لاکھ میں فائنل کردیا ہے ۔ایل ڈی اے کی جا نب سے منصوبے کا کنٹریکٹ میسرز کانسپٹ انجنئیرنگ کودیا گیا ہے۔ ایل ڈی اے انجنئیرنگ ونگ کے مطابق منصوبہ 60روز میں مکمل کیا جائےگا ۔ ڈی جی ایل ڈی اے احمد عزیز تارڑ کا کہنا ہے کہ منصوبے سے لاکھوں شہری روزانہ مستفید ہوں گے ۔ ڈی جی ایل ڈی اے کا کہنا ہے کہ منصوبہ خیابان فردوسی کی ٹریفک کی روانی کو بہتر بنانےگا، ایل ڈی اے شہریوں کو آسانی فراہم کرنے کے لئے ہر ممکن منصوبہ کررہا ہے

سوات کے علاقے مدین میں نامعلوم موٹرسائیکل سواروں نے سیاحوں کو لوٹ لیا۔

پولیس کے مطابق سوات کے پر فضا مقام مدین کے علاقے قندیل میں موٹر سائیکل سواروں نے سیاحوں کی وین کو روک کر اسلحہ کے زور پر انہیں لوٹا۔ پولیس کا کہنا ہے کہ ڈاکو سیاحوں سے 9 عدد موبائل فون جبکہ خواتین سیاحوں سے 4 عدد سونے کی انگوٹھیاں لوٹ کر فرار ہو گئے۔ پولیس کے مطابق سیاحوں کا تعلق لاہور سے بتایا جارہا ہے جوکہ کالام کی طرف سفر کر رہے تھے۔

مقامی پولیس کا مزید کہنا ہےکہ سیاحوں سے لوٹ مار کا مقدمہ نامعلوم ملزموں کیخلاف درج کرلیا گیا ہے جبکہ تین مشکوک افراد کو بھی حراست میں لے کر تفتیش کی جارہی ہے۔ڈاکوؤں نے سیاحوں کو شناختی کارڈ چیک کرانے کے بہانے روک لیا تھا۔