Category تازہ ترین

لاہور: لاہور موٹروے پر سکھیکی کے قریب ڈرائیور کو کار چلاتے ہوئے نیند آ گئی، جس کے نتیجے میں پیش آنے والے والے حادثے میں تین افراد جاں بحق ہو گئے۔ترجمان موٹر وے پولیس کے مطابق لاہور کی طرف جانے والی کار کا ڈرائیور دوران ڈرائیونگ سو گیا، جس کی وجہ سے کار ایک ٹرک سے پیچھے کی جانب جا ٹکرائی، جس کے نتیجے میں تین افراد جاں بحق ہو گئے۔اطلاع ملنے پر سیکٹر کمانڈر موٹروے پولیس فیصل اکرم موقع پر پہنچے اور ریسکیو کارروائی کی نگرانی کی۔ جاں بحق ہونے والے تینوں افراد کا تعلق لاہور کا تھا، جن کی لاشوں کو موٹر وے پولیس نے مقامی اسپتال منتقل کروا دیا اور بعد ازاں موٹر وے پر ٹریفک کو بحال کروایا۔جاں بحق ہونے والوں میں علی جان، ابوذر اور رضوان شامل ہیں۔ موٹر وے پولیس کا کہنا ہے کہ دوران ڈرائیونگ سو جانے سے متعلق کئی بار آگاہی مہم بھی چلائی جاتی ہے۔

کراچی: انسانی اسمگلنگ کے مقدمے میں مطلوب ملزم کو امارات فرار ہونے کی کوشش کرتے ہوئے گرفتار کرلیا گیا۔وفاقی تحقیقاتی ادارے (ایف آئی اے) امیگریشن نے کراچی ائرپورٹ پر کارروائی کرتے ہوئے ایف آئی اے پشاور کو مقدمے میں مطلوب انسانی اسمگلر کو متحدہ عرب امارات فرار ہوتے ہوئے گرفتار کرلیا۔ملزم نقاش خان مختلف افراد کو غیر قانونی طور پر بیرون ملک بھجوانے کے مقدمے میں مطلوب تھا جب کہ اس کا نام بلیک لسٹ میں ہونے کی وجہ سے پرواز سے آف لوڈ کرکے حراست میں لیا گیا۔ذرائع کے مطابق ملزم کو ایف آئی اے پشاور کی ٹیم کے حوالے کیا جائے گا ۔

لاہور: یونان کشتی حادثے میں جاں بحق ہونے والے مزید 4 پاکستانیوں کی میتیں لاہور ایئر پورٹ پہنچا دی گئیں۔اوورسیز پاکستانیز فاؤنڈیشن کے نمائندوں نے میتیں وصول کر کے ورثاء کے حوالے کر دیں۔میتیوں کو ایمبولینسز کے ذریعے آبائی علاقوں کے لیے روانہ کر دیا گیا ہے۔ارسلان اور ابوبکر کی میتیں نوشہرہ ورکاں جبکہ عدنان کی میت گجرات اور علی اعجاز کی میت منڈی بہاؤ الدین روانہ کی گئی ہے۔ ایف آئی اے ذرائع کے مطابق 22 جولائی کو یونان سے 6 مزید میتیں پاکستان لائی جائیں گی۔واضح رہے کہ گزشتہ روز بھی 3 میتیں لاہور ایئر پورٹ لائی گئی تھیں

لاہور: لاہور کے ڈی آئی جی شارق جمال کی میت اسپتال لے کر آنے والی خاتون اور ایک مرد کو حراست لے لیا گیا
اس حوالے سے پولیس کا کہنا ہے کہ حراست میں لیے جانے والے افراد سے پوچھ گچھ جاری ہے۔پولیس نے بتایا کہ فلیٹ سے کھانے پینے کی چند اشیاء اور برتنوں کو معائنے کے لیے قبضے میں لے لیا ہے۔ واضح رہے کہ لاہور کے ڈی آئی جی شارق جمال ڈی ایچ اے میں واقع گھر میں مردہ پائے گئے تھے۔ذرائع کا بتانا ہے کہ واقعے کے وقت شارق جمال گھر میں اکیلے تھے۔

نئی دلی:بھارت کے 44فیصداراکین پارلیمنٹ کے خلاف فوجداری مقدمات درج ہیں جبکہ ان میں سے 28فیصد قتل ، اقدام قتل اور خواتین کے خلاف جرائم سمیت سنگین فوجداری مقدمات درج ہیں۔کشمیرمیڈیاسروس کے مطابق یہ انکشاف بھارت میں انتخابی اصلاحات کے گروپ ایسوسی ایشن آف ڈیموکریٹک ریفارمزنے ”بھارت کی 28 ریاستی اسمبلیوں اور 2یونین ٹیریٹریز کے اراکین پارلیمنٹ کا تجزیہ ”کے عنوان سے اپنی رپورٹ میں مجموعی ورپر4ہزار33اراکین پارلیمنٹ میں سے 4ہزارایک ارکان کے مجرمانہ ریکارڈ کا جائزہ لیا ہے۔یہ تجزیہ موجودہ ایم ایل ایزکی طرف سے جمع کرائے گئے حلف ناموں پر مبنی ہے، جو انہوں نے گزشتہ انتخابات سے قبل الیکشن کمیشن میں جمع کرائے تھے۔رپورٹ میں ریاستی اسمبلیوں کے 4ہزار ایک ایم ایل ایز کاحلف ناموں تجزیہ کیا گیا ہے۔44فیصد ایم ایل ایز یعنی ایک ہزار777نے اپنے خلاف مجرمانہ مقدمات کا اندراج کا اعتراف کیا۔رپورٹ کے مطابق28فیصدیاایک ہزار136ایم ایل ایز نے اپنے خلاف “سنگین فوجداری مقدمات” کا اعتراف کیا ہے۔ایسوسی ایشن آف ڈیموکریٹک ریفارمزکی رپورٹ کے مطابق ان سنگین فوجدار مقدمات میں قتل، اقدام قتل ، اغوا، خواتین کے خلاف جرائم جیسے جرائم شامل ہو سکتے ہیں۔جمع کرائے گئے بیان حلفی میں کم سے کم 47 ایم ایل ایز نے اپنے خلاف تعزیرات ہند کی دفعہ 302کے تحت قتل سے متعلق مقدمات کے اندراج کا اعترف کیا۔181ایم ایل ایز نے اپنے خلاف آئی پی سی کی دفعہ 307کے تحت اقدام قتل کے مقدمات کا اعتراف کیا۔رپورٹ کے مطابق 114ایم ایل اے نے خواتین کے خلاف جرائم سے متعلق مقدمات کااعتراف کیا ، جن میں سے 14ایم ایل اے نے تعزیرات ہند کی دفعہ 376کے تحت خواتین کی عصمت دری سے متعلق مقدمات کا اعتراف کیا ہے۔واضح رہے کہ ایسوسی ایشن آف ڈیموکریٹک ریفارمز کی رپورٹ سے ظاہر ہوتا ہے کہ بھارتی سیاست جرائم پیشہ افراد کا گڑھ بن گئی ہے۔ دنیا کی سب سے بڑی نام نہاد جمہوریت کے دعویدار بھارت کی پارلیمنٹ کے 44فیصد سے زائد ارکان پر قتل، اقدام قتل اور ریپ سمیت درجنوں سنگین مقدمات درج ہیں

بغداد: عراق نے اسٹاک ہوم میں قرآن مجید کی انتہائی توہین کے واقعے کے خلاف احتجاج میں سویڈن کے سفیر کو ملک بدر کرنے کا حکم دیا ہے۔قبل ازیں سیکڑوں عراقی مظاہرین نے قرآن مجید کی بے حرمتی کے ردعمل میں دارالحکومت بغداد میں سویڈش سفارت خانے میں گھس کر آگ لگا دی تھی۔میڈیارپورٹس کے مطابق عراقی حکومت نے ایک بیان میں کہا کہ سویڈن میں سفارت خانے کے ناظم الامور کو بھی واپس بلایا جا رہا ہے۔عراق کی سرکاری خبررساں ایجنسی نے خبر دی کہ عراق نے اپنی سرزمین پر سویڈن کی کمپنی ایرکسن کے کام کرنے کا اجازت نامہ معطل کر دیا۔سویڈن کے وزیر خارجہ ٹوبیاس بلسٹروم نے کہا کہ بغداد میں حملے کے بعد سفارت خانے کا عملہ محفوظ ہے لیکن عراقی حکام ویانا کنونشن کے مطابق سفارت خانے کی حفاظت کی اپنی ذمے داری نبھانے میں ناکام رہے ہیں۔بلسٹروم نے کہا کہ سفارت خانے پر دھاوامکمل طور پر ناقابل قبول ہے اور حکومت ان حملوں کی سختی سے مذمت کرتی ہے۔انہوں نے مزید کہا:حکومت اپنی مایوسی کا اظہار کرنے کے لیے اعلی سطح پر عراقی نمائندوں کے ساتھ رابطے میں ہے۔عراقی وزیر اعظم محمد شیاع السودانی کے دفتر سے جاری ہونے والے ایک بیان کے مطابق عراقی حکومت نے سویڈش سفارت خانے کو نذر آتش کرنے کی شدید مذمت کی ہے اور اسے سلامتی کی خلاف ورزی قرار دیا ہے۔ بیان میں سفارتی مشنوں کے تحفظ کا عہد کیا گیا ہے۔لیکن اس میں واضح کیا گیا ہے کہ بغداد نے سویڈش حکومت کو خبردارکیا تھا کہ سویڈن کی سرزمین پر قرآن پاک کو نذر آتش کرنے کے واقعے کے اعادہ کے بعد سفارتی تعلقات منقطع کردیے جائیں گے۔سویڈن سے عراق کے ناظم الامورکو واپس بلانے کا فیصلہ اس وقت کیاگیا جب اسٹاک ہوم میں قرآن مجید کی توہین کے لیے احتجاج شروع ہوا تھا لیکن اس سے پہلے ہی احتجاجی سفاک شخص قرآن مجید کا نسخہ نذرآتش کیے بغیر واپس چلا گیا تھا۔سویڈش دارالحکومت میں عراقی سفارت خانے کے باہر تارکِ وطن شخص سینتیس سالہ سلوان مومیکا نے دوسری مرتبہ قرآن مجید کی توہین کی ہے لیکن اس مرتبہ اس نے الہامی کتاب کے اوراق نذر آتش نہیں کیے مگراس کے نسخے کی انتہائی بے توقیری کرتے ہوئے اس کو نیچے گرایا اور پاں سے ٹھوکر ماری ہے۔اسی عراقی تارکِ وطن نے گذشتہ ماہ عیدالاضحی کی نماز کے موقع پر اسٹاک ہوم کی مرکزی مسجد کے باہر اسی طرح کا مظاہرہ کیا تھا اور قرآن مجید کے نسخے کی پہلے بے توقیری کی اور پھر اس کو پولیس کے سامنے نذرآتش کردیا تھا۔اس دریدہ دہن شخص نے نیا مظاہرہ بغداد میں سویڈن کے سفارت خانے پرمظاہرین کے دھاوے کے بعد کیا ہے۔عراقی مظاہرین نے سویڈش پولیس کی جانب سلوان مومیکا کو قرآن مجید کی بے حرمتی کی دوبارہ اجازت دینے کے خلاف سفارت خانہ پر دھاوا بولا تھا اور احتجاج کیا تھا۔عراق کے بااثر عالم مقتدی الصدرکے حامی ذرائع ابلاغ سے وابستہ ایک مقبول ٹیلی گرام گروپ کی پوسٹس کے مطابق ہونے والے مظاہرے کی اپیل سویڈن میں قرآن کو نذرآتش کرنے کے منصوبے کے خلاف احتجاج کے طور پرکی گئی تھی۔

اسلام آباد:نیشنل الیکٹر ک پاور ریگولیٹری اتھارٹی (نیپر)ا نے رواں مالی سال میں بجلی کی پیداور اور لاسز کا تخمینہ جاری کر دیا ۔ذرائع کے مطابق رواں مالی سال میں مجموعی طور 164 ارب 39 کروڑ 40 یونٹ بجلی پیدا ہونے کا تخمینہ لگایا گیا ہے ،پیدا شدہ بجلی 39 ارب 53 کروڑ 40 لاکھ یونٹ لائن لاسز اور چوری کے نظر ہونے کا خدشہ ہے۔نیپرا نے رواں مالی سال کے لیے بجلی کا پیداور ٹیرف 22 روپے 66 پیسے فی یونٹ مقرر کیا ہیلائن لاسز اور چوری سے 895 ارب 84 کروڑ روپے کے نقصان کا خدشہ ہے۔ ذرائع کا کہنا ہے کہ بجلی چوری اور لائن لاسز کی وصولی صارفین سے کی جائے گی، صارفین سرچارجز اور ایڈجسمنٹ کی مد میں لاسز اور چوری کا بوجھ برداشت کرینگے۔

پشاور : دیر بالا میں خوفناک ٹریفک حادثے میں 2 افراد جاں بحق جبکہ 4 زخمی ہو گئے۔ دیر بالا میں دوران سفر کار ڈرائیور نے تیز رفتاری کے سبب کنٹرول کھو دیا جس کے سبب کار گہری کھائی میں جا گری، حادثے میں 2 افراد موقع پر جاں بحق ہو گئے جبکہ 4 افراد شدید زخمی ہیں۔ امدادی ٹیموں نے زخمیوں کو قریبی ہسپتال منتقل کر دیا

گھوٹکی : اوباڑو کے قریب ایم فائیو موٹروے کے مقام پر مزدہ اور ٹرالر میں تصادم کے نتیجے میں دو نوجوان جاں بحق ہوگئے۔پولیس کے مطابق تصادم کے نتیجے میں مزدہ پر سوار دو سگے بھائی شدید زخمی ہوکر بیہوش گئے تھے۔زخمی نوجوانوں کو تحصیل ہسپتال گھوٹکی منتقل کیا گیا مگر دوران علاج دونوں زخمی نوجوان دم توڑ گئے۔

اسلام آباد: وزیراعظم شہباز شریف نے سویڈن میں قرآن پاک کی بے حرمتی کے واقعے کی شدید مذمت کرتے ہوئے کہا ہے کہ مذہبی جذبات بھڑکانے جیسے رویے دنیا کے امن کیلئے مہلک ہیں،پورے عالم اسلام اور مسیحی دنیا کو مل کر اس سازش کو روکنا ہوگا،، ان واقعات کا تسلسل اور ترتیب سیاسی اور شیطانی ایجنڈے کا حصہ ہے۔ اپنے ایک بیان میں وزیراعظم نے کہا کہ او آئی سی کے پلیٹ فارم سے اس شیطانیت کے تدارک کی مشترکہ حکمت عملی بنائیں گے، او آئی سی کو امت مسلمہ کے احساسات کی ترجمانی اور اس شیطانیت کو رکوانے میں تاریخی کردار ادا کرنا ہے، توریت، انجیل اور قرآن کریم کی بے حرمتی کی اجازت دینے کے فیصلے کو تبدیل کرنے کی مہم چلائیں گے۔ وزیراعظم نے کہا کہ مقدس کتابوں، ہستیوں اور شعائرکی بے حرمتی اظہار کی نہیں دنیا کو مستقل آزار دینے کی آزادی ہے، ان واقعات کا تسلسل اور ترتیب ثبوت ہے کہ یہ اظہارکا نہیں بلکہ سیاسی اور شیطانی ایجنڈے کا حصہ ہے۔ وزیراعظم شہباز شریف کا کہنا تھا کہ پورے عالم اسلام اور مسیحی دنیا کو مل کر اس سازش کو روکنا ہوگا، شیطان کے پیروکار اْس کتاب کی بے حرمتی کررہے ہیں جس نے انسانوں کو عزت دی، حقوق اور رہنمائی دی، توریت اور انجیل کی بے حرمتی کی اجازت دینے کے فیصلے سے بے حرمتی کرنے والوں کی حوصلہ افزائی ہوئی۔شہباز شریف نے مزید کہا کہ یہ نفرت کا فروغ ہے جس کی عالمی قانون اجازت نہیں دیتا، مذہبی جذبات بھڑکانے، اشتعال انگیزی ،دہشتگردی اور تشدد پراکسانیکے یہ رویے دنیا کے امن کے لیے مہلک ہیں، یہ رویے قانونی اور اخلاقی دونوں لحاظ سے ہی شدید قابل نفرت اور قابل مذمت ہیں