Category تازہ ترین

اسلام آباد:تحریک انصاف کے سینئر رہنما اسد عمر نے کہا ہے کہ جو 200 سے ڈالر نیچے لانے کا دعویٰ کر کے آئے تھے انہوں نے ڈالر 240 سے اوپر پہنچا دیا۔عوامی رابطے کی ویب سائٹ ٹوئٹر پر اپنے ایک بیان میں اسد عمر کا کہنا تھا کہ جھوٹی انا سے اربوں ڈالر کی ترسیلات زر اور برآمدات کا نقصان، ہزاروں کاروبار تباہ، لاکھوں افراد بیروزگار کر دیئے،اس تباہی کی ذمہ داری کون اٹھائے گا؟

اسلام آباد :سینیٹ اجلاس میں نکتہ اعتراض پرسینیٹرآصف کرمانی نے کہا کہ وزراء کی پوری لائن خالی ہے، ہم آسکتے ہیں یہاں وزراء کیوں نہیں آئے، جس پرچئیر مین سینٹ کی وزراء کو اجلاس میں بلانے کی ہدایت کی بعد ازاں سینیٹر آصف کرمانی اپنی ہی حکومت پر برس پڑتے ہوئے کہا کہ وزراء کو پابند بنایا جائے کہ وقت پر آیا کریں اور روز آیا کریں ہم جب اپوزیشن میں تھے تو اعتراض کرتے تھے ایک ہی پارلیمانی وزیر سارے جواب دیتا ہے آج بھی صورتحال مختلف نہیں آج بھی ایک وزیر مملکت سارے سوالات کے جوابات دیتے ہیں اور وزراء کی لائن خالی نظر آتی ہے انہوں نے کہا کہ اگر وزراء نہیں آسکتے تو اس ایوان کو تالا لگا دیں مانتا ہوں اسلام آباد میں ٹھنڈ ہے لیکن ممبرز بھی تو پہنچ جاتے ہیں۔

اسلام آباد:سینیٹ اجلاس میں وقفہ سوالات پر جوابات دیتے ہوئے وزیر مملکت برائے خارجہ حنا ربانی کھر کہا کہ جو آج ہم فیصلہ کریں گے کل اس کا بوجھ بھی اٹھانا پڑے گا، ہم چاہتے ہیں کہ پاکستان میں لوگ شہید ہونا بند ہوں، بھارت کے ساتھ ایل او سی معاہدہ بھی امن کی ایک کوشش ہے، اس وقت بیک ڈور ڈپلومیسی نہیں ہو رہی، جو بھی ہو رہا ہے سب کے سامنے ہو رہا ہے، انہوں نے کہا کہ پاکستان گزشتہ 4 سال سے سیاسی محاز آرائی کا خمیازہ بھگت رہا ہے، حنا ربانی کھرپاکستان میں اقلیتیوں کو مکمل مذہبی تحفظ حاصل ہے،بھارت میں اقلیتیوں کے ساتھ بہت برا سلوک کوریا ہیانہوں نے کہا کہ مودی سے متعلق بی بی سی کی ڈاکومینٹری ثبوت ہے،بھارت کے منفی روئیے کے باوجود پاکستان امن کی راہ پر چلتا رہے گا،ایل او سی پر پاکستان بھارت کے مابین کشیدگی میں کمی آئی ہے،ہم خطے میں خون نہیں بہانا چاہتے،انہوں نے کہا کہ ہماری پالیسی بہت واضح ہے کہ ہم خطے میں امن اور استحکام چاہتے ہیں،ہم سرحدوں پر کشیدگی کے حق میں ہرگز نہیں،ہم نہیں چاہتے کہ سرحدوں پر کشیدگی سے دونوں سائیڈ پر لاشیں گریں،ہمیں سیاست کی بجائے ریاستی پالیسی کو اپنانا ہو گی۔

ممبئی: (ویب ڈیسک) متنازع بیانات کیلئے مشہور بھارتی اداکارہ کنگنا رناوت کا ٹوئٹر اکاؤنٹ 21 ماہ بعد بحال کر دیا گیا۔

گزشتہ دو سالوں سے سماجی رابطے کی ویب سائٹ ٹوئٹر پر پابندی کا شکار اداکارہ کنگنا رناوت کا ٹوئٹر اکاؤنٹ پھر سے بحال کر دیا گیا ہے، کنگنا رناوت نے ٹوئٹر پر پیغام میں مداحوں کو مخاطب کرتے ہوئے لکھا کہ انہیں ٹوئٹر پر واپس آکر اچھا لگ رہا ہے۔

بھارتی میڈیا کے مطابق کنگنا رناوت کے اکاؤنٹ کو مئی 2021 میں معطل کیا گیا تھا اداکارہ سوشل میڈیا پر کھل کر اپنے خیالات کا اظہار کرتی ہیں انہوں نے 2021 میں ریاست بنگال میں ہونے والے انتخابات کے بعد پرتشدد واقعات کے بارے میں مواد ٹوئٹر پر اپ لوڈ کیا تھا جس کے بعد ان کا اکاؤنٹ معطل کر دیا گیا تھا۔

اس سے قبل بھی کئی مرتبہ ’نفرت آمیز اور بد سلوکی پر مبنی‘ مواد کو شیئر کرنے اور متنازع بیانات کے باعث اداکارہ کا ٹوئٹر اکاؤنٹ معطل کیا جا چکا ہے۔

ممبئی: بھارتی اداکارہ عرفی جاوید نئی مصیبت میں پھنس گئیں کوئی انسان گھر کرائے پر دینے کو تیار نہیں۔

بھارتی اداکارہ عرفی جاوید نےسماجی روابط کی ویب سائٹ ٹوئٹر پر جاری بیان میں عرفی جاوید نے بتایا کہ ممبئی میں میرے لیے کرائے کے اپارٹمنٹ کی تلاش مشکل ہوگئی کیونکہ مسلمان مجھے میرے پہناوے اور ہندو مالکان مجھے مسلمان ہونے کی وجہ سے گھر کرائے پر نہیں دینا چاہتے۔

عرفی نے اپنی ٹوئٹ میں مزید لکھا کہ کچھ مالکان کو سیاسی دھمکیاں ملنے کا مسئلہ ہے، ممبئی میں میرے لیے کرائے کا اپارٹمنٹ تلاش کرنا مشکل ہوگیا۔

  واضح رہے کہ عرفی جاوید کو اس سے قبل بھی ان کے کپڑوں کی وجہ سے ریپ اور قتل کی دھمکیاں مل چکی ہیں جب کہ بھارتی وزیر کی جانب سے عرفی کو گرفتار کرنے کا مطالبہ بھی سامنے آچکا ہے۔

لاہور: لاہور ہائی کورٹ نے رہنما پی ٹی آئی کی بازیابی کی درخواست پر سماعت کرتے ہوئے فواد چودھری کو 6 بجے تک ہر صورت عدالت میں پیش کرنے کا حکم دے دیا۔

پاکستان تحریک انصاف کے رہنماؤں کی جانب سے لاہور ہائی کورٹ میں فواد چودھری کی بازیابی کے لئے درخواست دائر کی گئی، چیف جسٹس لاہور ہائی کورٹ نے درخواست سماعت کے لئے جسٹس طارق سلیم شیخ کو بھجوا دی۔

جسٹس طارق سلیم شیخ نے درخواست سماعت کے لئے مقرر کرتے ہوئے فواد چودھری کو ڈیڑھ بجے پیش کرنے کی ہدایت کی، تاہم فواد چودھری کو عدالت پیش نہ کیا جا سکا۔

فواد چودھری کو مقررہ وقت پر عدالت پیش نہ کرنے پر جسٹس طارق سلیم شیخ نے برہمی کا اظہار کرتے ہوئے انہیں فوری پیش کرنے کا حکم دیا۔

اس پر ایڈووکیٹ جنرل پنجاب نے فواد چودھری سے متعلق لاعلمی کا اظہار کرتے ہوئے عدالت کے سامنے مؤقف اختیار کیا کہ میرے علم میں نہیں کہ فواد چودھری کہاں ہیں۔

ایڈووکیٹ جنرل پنجاب کے جواب پر برہمی کا اظہار کرتے ہوئے جسٹس طارق سلیم شیخ نے ریمارکس دیے کہ میں نے اسسٹنٹ ایڈووکیٹ جنرل کی موجودگی میں پیش کرنے کا حکم دیا ہے۔

فاضل جج نے کہا کہ مجھے اپنے حکم پر عملدرآمد کروانا آتا ہے، فواد چودھری کو فوری عدالت پیش کرنے کا حکم دیتے ہوئے عدالت نے کیس کی سماعت 3 بجے تک ملتوی کر دی۔

دوبارہ سماعت شروع ہوئی تو جسٹس طارق سلیم شیخ نے ایڈیشنل ایڈووکیٹ جنرل پنجاب کی بات کاٹنے ہوئے کہا کہ آپ کو بعد میں سنوں گا، پہلے آرڈر پر عملدر آمد کریں۔

جسٹس طارق سلیم شیخ نے ایڈیشنل ایڈووکیٹ جنرل پنجاب سے سوال کیا کہ آئی جی کو بلوایا؟ جس پر انہوں نے کہا کہ آئی جی رحیم یار خان سے لاہور سفر کر رہے ہیں۔

لاہور ہائیکورٹ نے آئی جی پنجاب اور آئی جی اسلام آباد کوشام 6 بجے عدالت طلب کر لیا۔

لاہور: پاکستان تحریک انصاف (پی ٹی آئی) کے وائس چیئرمین اور سابق وزیر خارجہ شاہ محمود قریشی نے کہا ہے کہ فواد چودھری کی گرفتاری جمہوریت اور قانون کی بالادستی پر طمانچہ ہے۔

انہوں نے کہا کہ کیا قصور ہے فواد چودھری کا، کس جرم کے تحت اٹھایا گیا اسے، خدارا پاکستان کے ساتھ کھلواڑ بند کیا جائے، ورنہ حالات کسی کے قابو میں نہیں رہیں گے

خیال رہے رہنما پاکستان تحریک انصاف اور سابق وفاقی وزیر فواد چودھری کو پولیس نے لاہور میں ان کے گھر سے گرفتار کیا تھا۔

لاہور: چیئرمین پاکستان تحریک انصاف اور سابق وزیراعظم عمران خان نے فواد چودھری کی اہلیہ ہبہ چودھری کے ساتھ ٹیلی فونک رابطہ کیا ہے۔

سابق وزیراعظم عمران خان نے فواد چودھری کی نہایت لغو بنیادوں پر گرفتاری کی شدید الفاظ میں مذمت کی اور فواد چودھری کے اہلِ خانہ سے مکمل یکجہتی کا اظہار کیا ہے۔

خیال رہے رہنما پاکستان تحریک انصاف اور سابق وفاقی وزیر فواد چودھری کو پولیس نے بدھ کے روز لاہور میں صبح کے وقت ان کے گھر سے گرفتار کیا تھا۔

فواد چودھری کے خلاف منگل کی رات سیکرٹری الیکشن کمیشن کی درخواست پر تھانہ کوہسار میں مقدمہ درج کیا گیا تھا۔

لاہور: رات دیر گئے گرفتار ہونے والے پاکستان تحریک انصاف کے رہنما فواد چودھری کے خلاف مقدمے کی تفصیلات سامنے آ گئیں۔

پی ٹی آئی رہنما فواد چودھری کو اسلام آباد پولیس نے لاہور سے رات دیر گئے ٹھوکر نیاز بیگ کے قریب سے ان کی رہائش گاہ سے گرفتار کیا تھا اور اب اطلاعات ہیں کہ اسلام آباد پولیس فواد چودھری کو موٹر وے کے ذریعے لیکر اسلام آباد روانہ ہو گئی ہے۔

فواد چودھری کے خلاف درج مقدمے کی تفصیلات بھی سامنے آ گئی ہیں، پی ٹی آئی رہنما کے خلاف مقدمہ گزشتہ رات تھانہ کوہسار میں درج کیا گیا تھا اور فواد چودھری کے خلاف کارروائی سیکرٹری الیکشن کمیشن عمر حمید کی درخواست پر کی گئی۔

ایف آئی آر کے مطابق فواد چودھری نے کہا تھا کہ الیکشن کمیشن کی حیثیت ایک منشی کی ہو گئی ہے، جو لوگ نگران حکومت میں لگ رہے ہیں ان کا سزا ہونے تک پیچھا کریں گے، حکومت میں شامل لوگوں کو ان کے گھروں تک چھوڑ کر آئیں گے۔

فواد چودھری کیخلاف درج مقدمے میں کار سرکار اور دھمکی دینے کی دفعات شامل ہیں، مقدمے میں 153اے ،124اے ،505 اور506 کی دفعات کو بھی شامل کیا گیا ہے۔

فواد چودھری نے الیکشن کمیشن، ان کے ممبران اور ان کے خاندانوں کو بھی خبردار کیا تھا۔

پولیس ذرائع کا بتانا ہے کہ فواد چودھری کو اسلام آباد منتقل کرنے پر جوڈیشل مجسٹریٹ کی عدالت میں پیش کیا جائے گا اور اسلام آباد پولیس فواد چودھری کا جسمانی ریمانڈ حاصل کرنے کی استدعا کرے گی۔
 

چیئرمین تحریک انصاف عمران خان کا کہنا ہے امپورٹڈ حکومت مجھےکبھی گرفتار نہیں کر سکتی۔

لاہور میں چیئرمین کی زمان پارک والی رہائشگاہ پر تحریک انصاف کے کارکنوں کے احتجاج اور عمران خان کی ممکمنہ گرفتاری کے معاملے پر پارٹی سربراہ نے سینئر قیادت سے مشاورت مکمل کر لی ہے۔

ذرائع کے مطابق تحریک انصاف نے عمران خان کی ممکنہ گرفتاری کے حوالے سے مشاورت مکمل کرلی ہے اور اس حوالے سے عمران خان نے تحریک انصاف کی مرکزی قیادت کو ہدایت جاری کر دی ہے۔

ذرائع کا کہنا ہے تحریک انصاف کے کارکن مختلف شفٹوں میں عمران خان کی رہائش گاہ کے باہراحتجاج کریں گے، پارٹی کی سینئر قیادت نے اس حوالے سے تمام ٹاؤن اور ضلعی صدور کو ہدایات جاری کر دی ہیں۔

ذرائع کا بتانا ہے عمران خان کا پارٹی رہنماؤں سے گفتگو کرتے ہوئے کہنا تھا امپورٹڈ حکومت مجھےکبھی گرفتار نہیں کر سکتی، ان کے اپنے کیسز عدالتوں میں ہیں۔

ذرائع کے مطابق عمران خان کا کہنا تھا 22 کروڑ عوام تحریک انصاف کے ساتھ کھڑی ہے، فواد چوہدری تحریک انصاف کے ہر اول دستے کے کارکن ہیں۔

چیئرمین تحریک انصاف عمران خان آج شام 4 بجے اہم پریس کانفرنس بھی کریں گے جس کی اطلاع انہوں نے سوشل میڈیا پر دی۔

سوشل میڈیا پر جاری بیان میں عمران خان نے لکھا کہ فواد چوہدری کی چیف الیکشن کمشنر کی ایما پر اس طرح سے گرفتاری سے کوئی شک باقی نہیں رہتا کہ پاکستان بنانا ری پبلک بن چکا ہے جہاں آئین اور قانون کی کوئی حکمرانی نہیں ہے۔

عمران خان نے مزید لکھا کہ ہمیں اپنے بنیادی حقوق کے لیے کھڑا ہونا پڑے گا تاکہ پاکستان کو اس پوزیشن سے بچایا جا سکے جہاں سے واپسی ممکن نہیں۔