Category تازہ ترین

ملک میں کورونا سے مزید 150 افراد انتقال کر گئے جبکہ 5480 نئے کیسز بھی رپورٹ ہوئے ہیں۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 57013 ٹیسٹ کیے گئے جس میں سے 5480 افراد میں کورونا وائرس کی تصدیق ہوئی جبکہ وائرس سے 150 افراد انتقال کر گئے۔

سرکاری پورٹل کے مطابق ملک میں کورونا کے مثبت کیسز کی شرح 9.61 فیصد رہی۔

سرکاری اعداد و شمار کے مطابق ملک میں کورونا سے ہلاکتوں کی تعداد 17680 ہو گئی ہے اور مجموعی کیسز 8 لاکھ 15711 تک جاپہنچے ہیں جب کہ فعال کیسز کی تعداد 89838 ہے۔

اس کے علاوہ 24 گھنٹوں کے دوران ملک بھر میں 3699 مریض کورونا سے صحتیاب بھی ہوئے جس کے بعد مجموعی طور پر صحتیاب ہونے والوں کی تعداد 7 لاکھ 8193 ہو گئی ہے۔

صوبوں کی صورتحال
سرکاری پورٹل کے مطابق سندھ میں کورونا کے مریضوں کی مجموعی تعداد 281385 ہوگئی ہے جب کہ 4629 افراد اب تک انتقال کرچکے ہیں۔

پنجاب میں کورونا کے کل مریضوں کی تعداد 298818 ہے اور 8327 افراد وائرس میں مبتلا ہوکر جان سے جا چکے ہیں جب کہ بلوچستان میں مریضوں کی کل تعداد 22118 اور ہلاکتیں 233 ہو چکی ہیں۔

خیبرپختونخوا میں کورونا کے مریضوں کی تعداد 116523 اور 3238 ہلاکتیں ہو چکی ہیں جبکہ آزاد کشمیر میں 16931 افراد وائرس میں مبتلا ہوچکے ہیں اور 470 افراد انتقال کر گئے۔

اس کے علاوہ گلگت بلتستان میں اب تک کورونا کے مریضوں کی تعداد 5296 اور 106 افراد انتقال کرچکے ہیں۔

پورٹل کے مطابق وفاقی دارالحکومت اسلام آباد میں کورونا کے مریضوں کی مجموعی تعداد 74640 ہے اور اب تک 677 مریض انتقال کر چکے ہیں۔

سپریم جوڈیشل کونسل (ایس جے سی) نے حال ہی میں مقدمہ جیتنے والے سپریم کورٹ کے جج جسٹس قاضی فائز عیسیٰ کے خلاف مزید کارروائی نہ کرنے کا فیصلہ کیا ہے۔

رپورٹ کے مطابق سپریم کورٹ آف پاکستان نے صدارتی ریفرنس پر حکم کے خلاف جسٹس قاضی فائز عیسیٰ کی نظرثانی درخواستیں منظور کر لی تھی۔

باخبر ذرائع نے بتایا کہ چیف جسٹس آف پاکستان گلزار احمد کی سربراہی میں ایس جے سی نے 10 رکنی سپریم کورٹ بینچ کے 26 اپریل کے فیصلے کی روشنی میں جسٹس قاضی فائز عیسیٰ کے خلاف مزید کارروائی نہ کرنے کا فیصلہ کیا ہے۔

جسٹس قاضی فائر عیسیٰ نے صدارتی ریفرنس پر سپریم کورٹ کے 19 جون 2020 کے فیصلے کے خلاف نظرثانی درخواست دائر کی تھی۔

عدالت نے اپنے حکم میں جسٹس قاضی فائز عیسیٰ کی اہلیہ کے آف شور اثاثوں کا معاملہ وفاقی ریونیو بورڈ (ایف بی آر) کو بھیجنے کا فیصلہ سنایا تھا۔

سپریم کورٹ کے حالیہ اکثریتی فیصلے میں جسٹس قاضی فائز عیسیٰ کی اہلیہ اور ان کے بچوں کی جائیدادوں سے متعلق ایف بی آر سمیت تمام فورمز کی قانونی کارروائی کالعدم قرار دیتے ہوئے کہا گیا تھا کہ ایف بی آر کی مرتب کردہ رپورٹ سپریم جوڈیشل کونسل سمیت کسی عدالتی فورم پر چیلنج نہیں ہوسکتی۔

جسٹس عمر عطا بندیال کی سربراہی میں 10 ‏رکنی فل بینچ نے جسٹس قاضی فائز عیسٰی نظرثانی کیس پر سماعت کی تھی۔

جسٹس عمر عطا بندیال نے کونسل کے پہلے سیشن میں شرکت نہیں کی تھی اور پہلے ہی عدم شرکت سے متعلق آگاہ کردیا تھا۔

تاہم جسٹس عمر عطا بندیال دوسرے سیشن میں موجود تھے جس میں صدر ڈاکٹر عارف علوی کی جانب سے سندھ ہائی کورٹ کے جج کے کے آغا کے خلاف ایک مختلف ریفرنس دائر کیا گیا، اسی دوران جسٹس قاضی فائز عیسیٰ کے خلاف ریفرنس دائر کیا گیا تھا۔

جسٹس کے کے آغا پر الزامات عائد ہیں کہ اگرچہ انہوں نے 2018 میں اپنی غیر ملکی جائیداد ظاہر کی لیکن وہ ان کی قیمت بتانے میں ناکام رہے اور انہوں نے ٹیکس سال 2015 سے قبل پاکستان میں اپنی غیر منقولہ جائیدادوں کو چھپا لیا، اس حقیقت کے باوجود کہ ان کی سالانہ آمدنی 10 لاکھ سے زائد تھی۔

اس سے قبل ایس جے سی، جس کا اجلاس 14 اپریل کو ہونا تھا، نے اپنا اجلاس 28 اپریل تک ملتوی کردیا تھا تاکہ فیصلہ کیا جاسکے کہ تین جائیدادوں پر ایف بی آر کی تحقیقات کی بنیاد پر جسٹس قاضی فائز عیسیٰ کے خلاف آگے چلنا چاہیے یا نہیں۔

ایس جے سی کی جانب سے ایف بی آر کی اس رپورٹ کا معاملہ اٹھایا گیا جس میں تحقیقاتی ادارے نے سرینا عیسیٰ پر 14 ستمبر 2020 کو ٹیکس جرمانہ عائد کیا تھا۔

سرینا عیسیٰ اور ان کے بچوں کے نام بیرون ملک جائیداد تھی جسے ظاہر نہیں کیا گیا تھا۔

تاہم، ایس جے سی نے سپریم کورٹ کے اس مختصر حکم کے بعد مزید کارروائی نہ کرنے کا فیصلہ کیا جس میں اس کے بعد کی تمام کارروائی، اقدامات، آرڈرز معلومات، 19 جون 2020 کو جاری ہونے والی ہدایات، فیصلے اور اس کی تفصیلی وجوہات کالعدم قرار دے دی گئی تھی۔

اس آرڈر میں یہ بھی واضح کردیا گیا تھا کہ ایس جے سی سمیت کوئی بھی فورم کسی بھی رپورٹ پر غور و فکر نہیں کرے گا۔

تازہ ترین حکم کے نتیجے میں 19 جون کے مختصر آرڈر میں 4 سے 11 کے پیراگراف اور اس کے بعد 23 اکتوبر 2020 کے تفصیلی فیصلے کو واپس لیا گیا۔

3 نئی تقرریوں کے بعد وفاقی کابینہ میں ارکان کی تعداد 50 ہوگئی۔

تحریک انصاب کے رہنما فرخ حبیب وزیر مملکت اطلاعات و نشریات مقرر کردیئے گئے ہیں اور کابینہ ڈویژن نے فرخ حبیب کی بطور وزیر مملکت تعیناتی کا نوٹیفکیشن جاری کردیا ہے، فرخ حبیب کو اطلاعات و نشریات کا قلمدان سونپا گیا ہے۔

دوسری جانب عثمان ڈار کو بھی دوبارہ وزیراعظم کا معاون خصوصی برائے یوتھ افیئرز مقرر کردیا گیا ہے، جب کہ ڈاکٹر وقار مسعود وزیر اعظم کے معاون خصوصی خزانہ و ریونیو مقرر کئے گئے ہیں، وقار مسعود اس سے قبل وزیر اعظم کے معاون خصوصی ریونیو تھے۔

کابینہ ڈویژن نے عثمان ڈار اور وقار مسعود کے بطور معاون خصوصی تقرری کے نوٹیفکیشن جاری کردیے ہیں، جس کے بعد وفاقی کابینہ ارکان کی تعداد 50 ہو گئی ہے۔ وفاقی کابینہ میں 27 وزراء، 4 وزرائے مملکت، 15 معاونین خصوصی اور 4 مشیران شامل ہیں۔

شہر قائد میں امن و امان کی صورتحال میں بہتری دیکھنے میں آئی ہے اور عالمی جرائم کی درجہ بندی میں اس کی 13 پوائنٹس بہتری دیکھی گئی ہے۔

اپریل 2021 میں نمبیو ڈاٹ کام (numbeo.com)، جو شہریوں کی جانب سے جمع کرائے گئے ڈیٹا کی بنیاد پر درجہ بندی کرتا ہے، کی جانب سے شائع ہونے والے بین الاقوامی کرائم انڈیکس کے مطابق میٹروپولس شہر کی درجہ بندی 116 پوائنٹس پر آگئی ہے جو گزشتہ سال 103 پوائنٹس پر تھی۔

ویب سائٹ کی ‘جرائم انڈیکس’ کی تعریف کے مطابق یہ کسی بھی شہر یا ملک میں جرم کی مجموعی سطح کی جانچ ہے۔

رپورٹ میں کہا گیا کہ ‘ہم 20 سے کم جرائم کی سطح کو بہت کم، 20 سے 40 کے درمیان کو کم، 40 سے 60 کے درمیان کو درمیانی، 60 سے 80 کے درمیان کو زیادہ اور پھر 80 سے زائد کی سطح کو بہت زیادہ سمجھتے ہیں۔’

اس وقت شہر قائد جرائم کے حوالے سے 53.69 کی ‘درمیانی’ سطح پر ہے جو شہر میں امن و امان کی صورتحال میں بہتری کو ظاہر کرتا ہے۔

واضح رہے کہ 2014 میں کراچی کا کا درجہ 6 تھا اور یہاں جرائم کی سطح ‘انتہائی زیادہ’ تھی۔

لاطینی امریکی ملک وینزویلا کا دارالحکومت کراکس جرائم کے اعتبار سے بدترین شہر ہے جہاں جرائم کی سطح 84.65 کے ساتھ ‘بہت زیادہ’ ہے، جبکہ قطر کا شہر دوحہ دنیا کا محفوظ ترین شہر جہاں جرائم کی سطح صفر ہے۔

وزیر قانون فروغ نسیم اور وزیر اعظم کے مشیر برائے داخلہ و احتساب مرزا شہزاد اکبر نے وفاقی تحقیقاتی ادارے (ایف آئی اے) کے سابق ڈائریکٹر جنرل بشیر میمن کی جانب سے لگائے گئے الزامات کی تردید کردی۔

واضح رہے کہ نجی چینل جیو نیوز کے پروگرام ‘آج شاہ زیب خانزادہ کے ساتھ’ میں بات کرتے ہوئے بشیر میمن نے الزام لگایا تھا کہ ان پر جسٹس قاضی فائز عیسیٰ کے خلاف مقدمہ دائر کرنے کے لیےوزیر اعظم عمران خان، فروغ نسیم اور شہزاد اکبر نے دباؤ ڈالا تھا۔

تاہم بشیر میمن کے الزامات کو متعلقہ افراد نے فوری طور پر مسترد کردیا ہے۔

وزیر قانون نے سماجی روابط کی ویب سائٹ ٹوئٹر پر بشیر میمن کے لگائے گئے ‘بے بنیاد الزامات’ کی تردید کی۔

انہوں نے کہا کہ میں نے بشیر میمن سے جسٹس قاضی فائزعیسیٰ کے بارے میں کسی بھی معاملے پر کبھی بات نہیں کی۔

فروغ نسیم نے کہا کہ اعظم خان، شہزاد اکبر اور بشیر میمن کبھی بھی ایک ساتھ میرے دفتر نہیں آئے۔

انہوں نے کہا وزیر اعظم عمران، اعظم خان یا شہزاد اکبر نے کبھی مجھ سے یہ نہیں کہا کہ جسٹس قاضی فائز عیسیٰ کے بارے میں بشیر میمن سے کوئی بات چیت کریں۔

دوسری جانب شہزاد اکبر نے جسٹس قاضی فائز عیسیٰ کے بارے میں ایسی کسی بھی میٹنگ سے متعلق دعووں کی تردید کی۔

شہزاد اکبر نے بشیر میمن کی جانب سے لگائے گئے الزامات کو ‘کوڑا کرکٹ’ قرار دیا۔

انہوں نے کہا کہ انہیں قاضی فائز عیسیٰ کے معاملے پر وزیر اعظم سے کوئی ہدایت نہیں ملی نہ میں نے کبھی ملاقات کی۔

شہزاد اکبر نے کہا کہ وزیر قانون اور بشیر میمن سے کوئی ملاقات نہیں ہوئی جیسا کہ ایف آئی اے کے سابق ڈی جی نے دعویٰ کیا ہے۔

ان کا کہنا تھا کہ اسی طرح انہیں کبھی بھی کسی خاص فرد کے خلاف کوئی مقدمہ شروع کرنے کی بات نہیں کی گئی۔

انہوں نے کہا کہ وفاقی کابینہ کی جانب سے ایف آئی اے کو صرف ایک کیس بھیجا گیا جس میں بغاوت کا الزام تھا۔

شہزاد اکبر نے کہا کہ میں نے ذاتی حیثیت میں وکلا کو ہدایت کردی ہے کہ وہ اس کی بہتان کے لیے قانونی کارروائی کرے۔

بعدازاں ان کے وکلا نے سابق ڈی جی ایف آئی اے بشیر میمن کو قانونی نوٹس بھیجوا دیا اور نوٹس میں الزامات پر غیر مشروط معافی مانگنے کا مطالبہ کیا گیا۔

شہزاد اکبر کی جانب سے بشیر میمن کو 50 کروڑ روپے ہرجانے کا نوٹس بھیجا گیا ہے.

وزیراعظم کے معاون خصوصی کے وکلا نے کہا ہے کہ بشیر میمن نے بے بیناد الزامات عائد کیے اور ان بے بنیاد الزامات سے میرے مؤکل کی ساکھ کو نقصان پہنچانے کے کوشش کی گئی۔

دیرینہ مؤقف کی تائید ہے، شہباز شریف
دوسری جانب پاکستان مسلم لیگ (ن) کے صدر اور قائد حزب اختلاف شہباز شریف نے بشیر میمن کے انکشافات پر تحقیقات کا مطالبہ کردیا۔

انہوں نے کہا کہ سابق ڈی جی ایف آئی اے کے ہوشربا انکشافات نے میرے دیرینہ مؤقف کی تصدیق کر دی۔

شہباز شریف نے کہا کہ بہت پہلے کہا تھا کہ نیب نیازی گٹھ جوڑ قائم ہے جو مسلم لیگ (ن) کے خلاف بے بنیاد مقدمات بنانے اور اس کے قائدین کو جیل بھجوانے کے لیے سرگرم عمل ہے۔

انہوں نے کہا کہ نیب نیازی گٹھ جوڑ کی حقیقت اور احتساب کے نام پر جاری ڈھونگ دنیا کے سامنے بے نقاب ہو چکا ہے۔

قائد حزب اختلاف نے کہا کہ بشیر میمن کے عمران نیازی کے بارے میں انکشافات انتہائی شرمناک، تشویشناک ، افسوسناک اور قابل مذمت ہے۔

انہوں نے کہا کہ یہ فسطائیت اور منتقم مزاجی کی انتہا ہے جس کی تحقیقات کرائی جائیں۔

شہباز شریف نے کہا کہ ملوث کرداروں کے خلاف سخت قانونی کاروائی کی جائے اور دیدہ و دانستہ اپنے ہی ملک کو افراتفری اور انتشار کا شکار کرنے کے مترادف ہے۔

بشیر میمن کے الزامات
وفاقی تحقیقاتی ادارے (ایف آئی اے) کے سابق ڈائریکٹر جنرل بشیر میمن نے الزام لگایا ہے کہ وزیر اعظم ہاؤس میں وزیر اعظم عمران خان کے بعد ان کی مشیر برائے احتساب و داخلہ شہزاد اکبر اور وفاقی وزیر قانون بیرسٹر فروغ نسیم سے ملاقات ہوئی جہاں انہوں نے جسٹس قاضی فائز عیسیٰ کے خلاف مقدمہ بنانے کے لیے دباؤ ڈالا تھا۔

انہوں نے بتایا تھا کہ جب ہم شہزاد اکبر کے کمرے میں پہنچے تو انہوں نے بھی یہ بات کی کہ جسٹس قاضی فائز عیسیٰ کے خلاف کیس بنانا ہے۔

ان کا کہنا تھا کہ اس کے بعد وہاں سے ہم تینوں میں، شہزاد اکبر اور فروغ نسیم کے دفتر پہنچے۔

ایف آئی اے کے سابق ڈی جی نے بتایا تھا کہ فروغ نسیم بھی آمادہ تھے کہ جسٹس قاضی فائز عیسیٰ کے خلاف مقدمات بننے چاہیئں۔

بشیر میمن نے بتایا تھا کہ میں نے جسٹس فائز عیسیٰ کے خلاف مقدمہ دائر کرنے سے انکار کردیا اور کہا کہ بطور ایک ادارہ اپنی ساکھ خراب نہیں کرسکتے۔

ایک سوال کے جواب میں انہوں نے کہا تھا کہ فروغ نسیم، جسٹس قاضی فائز عیسیٰ کے خلاف منی لانڈرنگ کا کیس بنوانا چاہتے تھے۔

سابق ڈی جی ایف آئی اے نے ایک سوال کے جواب میں کہا کہ خاص طور پر مسلم لیگ (ن) کے صدر شہباز شریف اور نائب صدر مریم نواز کے خلاف مقدمات بنانے پر دباؤ ڈالا جاتا تھا۔

مسلم لیگ (ن) کی نائب صدر مریم نواز نے کہا ہےکہ سیاسی انجینئرنگ کے لیے ادارے استعمال کیے جارہے ہیں۔

اسلام آباد میں میڈیا سے گفتگو کے دوران مریم نواز نے سابق ڈی جی ایف آئی اے بشیر میمن کے انکشافات پر بات کرتے ہوئے کہا کہ عمران خان نے وزیراعظم آفس کا غلط استعمال کیا، تاریخ میں کبھی موجودہ وزیراعظم آفس کے اندر اتنے گھناؤنے جرائم کا ارتکاب نہیں ہوا، اداروں کے سربراہوں کو بلا کر کہہ رہے ہیں کہ نواز شریف، مریم نواز کے خلاف یہ مقدمہ کرو، اداروں کے سربراہوں کو کہا جارہا ہے کہ رانا ثنا اللہ کے خلاف مقدمہ کرو۔

انہوں نے کہا کہ سیاسی انجینئرنگ کے لیے ادارے استعمال کیے جارہے ہیں لیکن اتنی سیاسی انجینئرنگ کے باوجود نتیجہ کیا رہا، ہر محاذ پر حکمرانوں کو ناکامی ہوئی، جسٹس شوکت عزیز کی گواہی آن ریکارڈ ہے، اب بشیر میمن کی گواہی آگئی ہے۔

لیگی رہنما کا کہنا تھا کہ وزیراعظم کے آفس میں سپریم کورٹ کے موجودہ جج کے خلاف سازش کی گئی، جسٹس قاضی فائز عیسیٰ انشااللہ چیف جسٹس بنیں گے، جسٹس قاضی کے خلاف سازش کی گئی، ان کی اہلیہ کٹہرے میں کھڑی تھیں، مسلم لیگ (ن) اس معاملے کو نہیں جانے دے گی، عدلیہ سے درخواست ہے کہ اس معاملے کو خود دیکھیں،جسٹس قاضی فائز پر جھوٹا ریفرنس بنانے پر جوڈیشل کمیشن بنایا جائے، جسٹس شوکت عزیز صدیقی کو بھی سنا جائے۔

انہوں نے مزید کہا کہ لوگوں کو سمجھ آگئی ہے کہ سسلین مافیاز کیا ہوتے ہیں، کہا جاتا ہے ابھی تم گرفتار کرلو، مقدمہ کیا بنانا ہے وہ بعد میں دیکھیں گے، 2014 میں دھرنے شروع ہوئے تب سے جانتے ہیں کیا سازش ہورہی ہے، آج جو کچھ ہورہا ہے وہ بھی اسی سازش کی کڑی ہے۔

مریم نواز کا کہنا تھا کہ نوازشریف اپنی بیٹی کو لائے اور مرتی ہوئی بیوی کو چھوڑ کر آئے، نوازشریف نے جرات اور بہادری کا مظاہرہ کیا، سوچیں جب آپ کی حکومت ختم ہوگی تب کیا ہوگا، پاکستان کا ہرشہری جان گیا ہے عمران خان کس قسم کی ذہنیت کا آدمی ہے۔

ایک سوال کے جواب میں انہوں نے کہا کہ پیپلزپارٹی اگر استعفوں میں شامل ہوجاتی تو اب تک یہ حکومت جاچکی ہوتی۔

امریکی وزیر دفاع لائیڈ آسٹن نے پاک فوج کے سپہ سالار جنرل قمر جاوید باجوہ سے ٹیلی فونک رابطہ کرکے اہم علاقائی اور عالمی معاملات پر تبادلہ خیال کیا ہے۔

امریکی محکمہ دفاع کے مطابق لائیڈ آسٹن نے آرمی چیف جنرل قمر جاوید باجوہ کیساتھ ٹیلیفونک گفتگو کے دوران خطے کی سلامتی واستحکام پر بات چیت کی۔

وزیر دفاع لائیڈ آسٹن نے افغان امن عمل میں پاکستان کے کردار کو سراہا۔ دونوں رہنماؤں کے درمیان افغانستان سے امریکی افواج کے انخلا پر بھی تبادلہ خیال ہوا۔

امریکی وزیر دفاع لائیڈ آسٹن نے پاک امریکا تعلقات کی اہمیت کا اعادہ کیا جبکہ دونوں رہنماؤں نے مشترکہ اہداف کے حصول کے لیے مل کر کام کرنے پر اتفاق کیا۔

وزیر اعظم عمران خان کا کہنا ہے کہ بلوچستان کے لیے ترقیاتی منصوبوں کا آغاز کیا ہے۔

کوئٹہ میں تقریب سے خطاب کرتے ہوئے وزیر اعظم نے کہا کہ ‘ہم نے بلوچستان کے لیے ترقیاتی منصوبوں کا آغاز کیا ہے، ڈھائی سالوں میں 3 ہزار 300 کلومیٹر سڑکوں کے منصوبے بنائے اور ان پر کام شروع کیا’۔

انہوں نے کہا کہ ‘اللہ اس کو عزت اور کامیابی دیتا ہے جو اللہ کی مخلوق کے لیے کچھ کرتا ہے، گنگارام نے لاہور میں ہسپتال بنایا، ساری دنیا ان کی تعریف کرتی ہے، دنیا ان کو یاد کرتی ہے جو انسانیت کے لیے کچھ کرتے ہیں’۔

عمران خان نے کہا کہ ‘2013 میں جب خیبر پختونخوا میں ہماری حکومت آئی تو وہاں امن و امان کا برا حال تھا، تین چار سال مخالفین کہتے رہے کہاں ہے نیا پختونخوا اور نیا پاکستان، ایک سیاست دان دوست نے مشورہ دیا کہ آپ پنجاب پر توجہ دیں کیونکہ خیبر پختونخوا میں آپ کی دوبارہ حکومت نہیں آئے گی لیکن 2018 کے الیکشن میں ہمیں وہاں دو تہائی اکثریت ملی’۔

ان کا کہنا تھا کہ ‘ہمیں خیبر پختونخوا میں دو تہائی اکثریت اس لیے ملی کیونکہ وہاں غربت میں کمی آئی، یو این ڈی پی نے خود اپنی رپورٹ میں کہا کہ خیبر پختونخوا میں غربت میں کمی آئی، رپورٹ کے مطابق صوبے میں سب سے تیزی سے غربت کم ہوئی اور انسانوں پر سب سے زیادہ سرمایہ کاری یہاں ہوئی’۔

وزیر اعظم نے کہا کہ ‘ماضی میں بلوچستان پر وہ توجہ نہیں دی گئی جو اسے ملنی چاہیے تھی اس لیے یہ پیچھے چلا گیا، لیکن ہم ماضی میں نظر انداز کیے گئے علاقے پر کام کر رہے ہیں’۔

ان کا کہنا تھا کہ ‘پاکستان اس وقت ترقی کرے گا جب نچلا طبقہ اوپر آئے گا، چین نے بھی غریب طبقے کو اوپر اٹھا کر ترقی کی’۔

انہوں نے کہا کہ ‘مدینہ کی ریاست میں ترقی کا ماڈل یہ تھا کہ انہوں نے محلات نہیں بنائے، ہمارے حکمرانوں نے لندن کے امیر ترین علاقوں میں جائیدادیں لیں، لندن کے ان علاقوں میں جائیدادیں لیں جہاں برطانوی وزیر اعظم بھی نہیں لے سکتا’۔

بعد ازاں وزیر اعظم نے ‘کامیاب نوجوان’ پروگرام کے تحت نوجوانوں میں چیک تقسیم کرنے کی تقریب سے بھی خطاب کیا۔

اس موقع پر انہوں نے ماہی گیروں کو آسان شرائط پر قرضے دینے کا اعلان کیا۔

انہوں نے عثمان ڈار کو نوجوانوں کے لیے 10 ارب روپے مختص کرنے پر خراج تحسین پیش کیا۔

قومی ادارہ صحت کے حکام نے کہا ہے کہ آئندہ ماہ سے پاکستان میں کورونا ویکسین تیار کرنے کاآغاز ہوجائے گا۔

اس بارے میں نیشنل انسٹیٹیوٹ آف ہیلتھ کے حکام کا کہنا ہے کہ کورونا ویکسین کی تیاری کے لیے چینی ماہرین کی ٹیم بھی اسلام آباد میں موجود ہے اورکین سائنو ویکسین کا خام مال بھی مئی کے آغاز میں پاکستان پہنچ جائے گا۔

حکام کا کہنا ہے کہ چینی ماہرین کی معاونت سے این آئی ایچ میں کورونا ویکسین کی تیاری کے انتظامات مکمل کرلیے گئے ہیں۔ پاکستان میں تیار ہونے والی کین سائینوسنگل ڈوزکورونا ویکسین مئی کے آخر تک استعمال کے لیے دستیاب ہوگی۔

پاکستان اس کورونا ویکسین کو چینی کمپنی کے تعاون سےتیارکرےگا، جس کے لیے خام مال چینی کمپنی فراہم کرےگی۔ جب کہ کین سائنو بائیو کے ماہرین کی جانب سے قومی ادارہ برائے صحت کے ماہرین کوویکسین بنانے کی تربیت دینے کا عمل بھی جاری ہے۔

دریں اثنا ذرائع کا کہنا ہے کہ پاکستان کی جانب سے خریدی گئیں سائنو فارم کورونا ویکیسن کی مزید 10 لاکھ خوراکیں کل پاکستان پہنچ جائیں گی۔

پاکستان اٹامک انرجی کمیشن (پی اے ای سی) نے ملک کا پہلا انتہائی نگہداشت یونٹ (آئی سی یو) وینٹی لیٹر تیار کرلیا ہے جس کے بعد ڈرگ ریگیولیٹری اتھارٹی آف پاکستان (ڈریپ) نے اس کے استعمال کی منظوری دے دی۔

پی اے ای سی نے اپنے اعلامیے میں کہا کہ وینٹى لیٹر پی اے ای سی کے سائنس دانوں اور انجینئروں نے ضروری معیارات کو مدنظر رکھتے ہوئے تیار کر لیا ہے۔

بیان میں کہا گیا کہ پی اے ای سی ہسپتال اسلام آباد میں ڈاکٹروں نے بھى اس عمل کے دوران اپنی آرا سے نوازا۔

پی اے ای سی نے کہا کہ ‘تمام اندرونی جائزوں اور ٹیسٹ کے علاوہ یہ آئی-لائیووینٹی لیٹر پاکستان انوویشن اینڈ ٹیکنالوجی سینٹر (پی آئی ٹی سی) اور پاکستان انجینئرنگ کونسل (پی ای سی) کے معیار سے بھی گزارا گیا’۔

بیان میں کہا گیا کہ وینٹیلیٹر کی کلینیکل جانچ جناح ہسپتال لاہور میں، بائیو ٹیکنالوجی اور بائیو میڈیکل انجینئرز سمیت طبی ماہرین نے بھی کی اور نے اس کو کامیاب قرار ديا ہے۔

پی اے ای سی کے ترجمان شاہد ریاض خان کا کہنا تھا کہ ڈریپ نے ایٹمی توانائی کمیشن کے تیار کردہ اس وینٹى لیٹرکی آج با قاعدہ منظوری دے دی ہے اور اس کی روشنی میں آئی لائیو کو تیار کرکے ملک کے ہسپتالوں کو فراہم کیا جائے گا۔

ان کا کہنا تھا کہ یہ لائف سیونگ آلات کی تیاری میں اور ڈیزئننگ میں خود انحصاری کی جانب سے ایک بڑا قدم ہے۔

پی اے ای سی کے چیئرمین محمد نعیم نے سائنس دانوں اور انجینئروں کو مبارک باد پیش کرتے ہوئے کہا کہ ‘ کورونا وائرس کی وبا کے خطرناک دنوں میں ہسپتالوں کی بڑھتی ہوئی طلب کو پورا کرنے کے لیے آئی لائیو وینٹى لیٹر کى بڑے پیمانے پر تیارى شروع کردى جائے گى’۔

خیال رہے کہ گزشتہ روز وزیرسائنس و ٹیکنالوجی سینیٹر شبلی فراز نے کہا کہ ان کی وزارت ڈریپ کے ساتھ وینٹی لیٹرز کی رجسٹریشن میں تیزی لائے گی تاکہ صحت کے نظام اور برآمد کے لیے بروقت دستیابی کو یقینی بنایا جائے۔

نیسکام کی جانب سے تیار کردہ ایک اور وینٹی لیٹر پاک وینٹ-ون کو بھی پی ای سی نے کلیئر قرار دیا ہے اور ڈریپ سے منظوری کا انتظار کیا جا رہا ہے۔

ملک میں وینٹیلیٹروں کی دستیابی اور پیداوار سے متعلق وفاقی وزیر شبلی فراز نے کہا تھا کہ کووڈ-19 سے متعلق کسی بھی ہنگامی صورت حال سے نمٹنے کے لیے ہمارے پاس مناسب آکسیجن اور دیگر ضروری اسٹاک موجود نہیں ہے۔

انہوں نے کہا تھا کہ وزارت سائنس اور ٹیکنالوجی سہولت کار کے طور پر کام کر رہی ہے اور ابھی تک ان کے پاس اپنے وینٹیلیٹر نہیں ہیں تاہم نیشنل ریڈیو و ٹیلی مواصلات کارپوریشن اور نجی فرم ملک میں وینٹیلیٹر تیار کررہی ہیں۔

ان کا کہنا تھا کہ پاکستان کے تیار کردہ وینٹی لیٹرز زیادہ کارآمد نہیں، وینٹیلیٹرز کے 16 کام ہوتے ہیں لیکن مقامی سطح پر بنائے جانے والے وینٹیلیٹرز میں صرف چار فنکشنز پائے جاتے ہیں۔