Category تازہ ترین

کوروناوبا کے باعث آج 201 افراد جاں بحق ہوگئے جس کے بعد مجموعی اموات کی تعداد 17 ہزار 530 ہوگئی۔

نیشنل کمانڈ اینڈ آپریشن سینٹر کی جانب سے جاری کردہ اعداد و شمار کے مطابق گزشتہ 24 گھنٹوں کے دوران 49 ہزار 101 کورونا ٹیسٹ کئے گئے، جس کے بعد مجموعی کووڈ 19 ٹیسٹس کی تعداد 11,682,01 ہوگئی ہے۔

کورونا کے مصدقہ مریضوں کی تعداد
گزشتہ 24 گھنٹوں کے دوران ملک بھر میں مزید 5 ہزار 292 مثبت کیسز رپورٹ ہوئے ہیں۔ اس طرح پاکستان میں کورونا کے مصدقہ مریضوں کی تعداد 810,231 ہوگئی ہے۔

سرکاری اعداد و شمار کے مطابق اب تک سندھ میں 2 لاکھ80 ہزار 356 ، پنجاب میں 2 لاکھ 96 ہزار 144، خیبر پختونخوا میں ایک لاکھ 15 ہزار 596، اسلام آباد میں 74 ہزار 131، بلوچستان میں 21 ہزار 945 ، آزاد کشمیر میں 16 ہزار 779 اور گلگت بلتستان میں 5 ہزار 280 افراد میں کورونا وائرس کی تشخیص ہوئی ہے۔

کورونا کے فعال مریضوں کی تعداد

سرکاری اعداد و شمار کے مطابق اس وقت ملک بھر میں کورونا کے فعال مریضوں کی تعداد88 ہزار 207 ہے۔ جب کہ 5 ہزار سے زائد مریضوں کی حالت تشویشناک ہے۔

کورونا سے جاں بحق ہونیوالے افراد کی تعداد

گزشتہ 24 گھنٹوں کے دوران ملک بھر میں کورونا سے مزید 201 افراد جاں بحق ہوگئے ہیں جس کے بعد اب اس وبا سے جاں بحق ہونے والے افراد کی تعداد مجموعی طور پر 17 ہزار 530 ہوگئی ہے۔

صحت یاب مریضوں کی تعداد

این سی او سی کے مطابق کورونا سے ایک دن میں 4 ہزار 678 مریض صحت یاب ہوئے جس کے بعد صحت یاب ہونے والے مریضوں کی تعداد 704,494 ہوگئی ہے۔

کورونا وائرس اوراحتیاطی تدابیر

کورونا وائرس کے خلاف یہ احتیاطی تدابیراختیارکرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازے کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلاکربیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پرکوئی اثرنہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اورہرایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

قطر نےجنوبی ایشیا میں کورونا وائرس کی خطرناک لہر کے پیش نظر پاکستان ،بھارت اور بنگلادیش سمیت 6 ممالک پر سفری پابندیاں عائد کردیں۔
قطر کی جانب سے نیپال ،فلپائن اور سری لنکا پر بھی سفری پابندیاں عائد کی گئی ہیں۔ نئی پابندیوں کے پیش نظر قطر جانے والے مسافروں کی ہوٹلوں میں قرنطینہ کی بکنگ منسوخ کردی گئی ہے۔ قطر ایئر لائن نے بھی پابندی کا شکار ممالک کیلئے تمام پروازیں منسوخ کر دیں۔

عدالت نے مسلم لیگ (ن) کے رہنما اور رکن قومی اسمبلی جاوید لطیف کو 5 روز کے جسمانی ریمانڈ پر پولیس کے حوالے کردیا۔

لاہور کی مقامی عدالت میں جاوید لطیف کے خلاف کیس کی سماعت ہوئی جس سلسلے میں پولیس انہیں سخت سکیورٹی میں ماڈل ٹاؤن کچہری لائی۔

رکن قومی اسمبلی میاں جاوید لطیف کو مجسٹریٹ صابر ڈارکی عدالت میں پیش کیاگیا جہاں سرکاری وکیل اور جاوید لطیف کے وکلا نے دلائل دیے۔

پولیس نے جاوید لطیف کے جسمانی ریمانڈ کی استدعا کی جس پر عدالت نے دلائل سننے کے بعد فیصلہ محفوظ کیا جو تقریباً 2 گھنٹے بعد سنایا گیا۔

عدالت نے پولیس کی استدعا منظور کرتے ہوئے جاوید لطیف کو 5 روز کے جسمانی ریمانڈ پر پولیس کی تحویل میں دے دیا۔

واضح رہےکہ سیشن عدالت سے عبوری ضمانت کے اخراج کے بعد گزشتہ روز جاوید لطیف کوگرفتار کیا گیا تھا۔

چمن: قلعہ عبداللہ بازار میں پولیس موبائل کے قریب دھماکے کے نتیجے میں ایک اہلکار شہید اور 5 زخمی ہو گئے۔

پولیس کے مطابق دھماکا کوئٹہ چمن قومی شاہراہ پر کھڑی موٹرسائیکل میں ہوا، دھماکے سے پولیس موبائل سمیت کئی گاڑیوں کو نقصان پہنچا۔

پولیس حکام کا بتانا ہے کہ دھماکے کے نتیجے میں ایک پولیس اہلکار شہید اور 5 زخمی ہو گئے جبکہ دھماکے کے بعد کوئٹہ چمن شاہراہ پر گاڑیوں کی آمدورفت معطل ہو گئی۔

پاکستان مسلم لیگ (ن) کی نائب صدر مریم نواز نے کہا کہ بھارت سے بات چیت کرنے کا مطلب یہ نہیں ہے کہ آپ کشمیر کا سودا کر کے واپس آجائیں بلکہ اس معاملے میں کیا لیا اور دیا جا رہا ہے وہ عوام کے سامنے آنا چاہیے۔

اسلام آباد میں سابق وزیراعظم شاہد خاقان عباسی اور آزاد کشمیر کے وزیراعظم راجا فاروق حیدر کے ہمراہ میڈیا سے گفتگو کے دوران ایک سوال پر مریم نواز نے کہا کہ بھارت سے بات چیت کرنے کا یہ مطلب نہیں ہے کہ آپ کشمیر کا سودا کرکے واپس آجائیں اور دوسرے ملکوں میں بیٹھ کر ان سے چپ چاپ کیا ڈیل کر رہے ہیں؟

ان کا کہنا تھا کہ کشمیر کے بارے میں کیا بات چیت ہو رہی ہے اور دوستی کے لیے کیا لیا اور دیا جا رہا ہے وہ بات عوام کے سامنے آنی چاہیے۔

اس موقع پر شاہد خاقان عباسی نے کہا کہ کشمیر کا مسئلہ کوئی کھیل نہیں ہے، جو بات آف دی ریکارڈ ہے وہ آف دی ریکارڈ ہے جو بات ریکارڈ پر اس کا جواب مل جائے گا۔

مریم نواز نے میڈیا سے بات کرتے ہوئے کہا کہ پاکستان تحریک انصاف (پی ٹی آئی) کراچی کے حلقہ این اے 249 میں انتخابی مہم کے لیے گئی تو انہیں عوام کے غیض و غضب کا سامنا کرنا پڑا اور وہاں سے الٹے پاؤن بھاگنا پڑا۔

ان کا کہنا تھا کہ عمران خان این آر او کسی اور کو نہیں بلکہ اپنے آپ کو دے رہے ہیں اور جیسے جیسے انتخابات کا وقت قریب آتا جائے گا تو انہیں اپنی تاریخی نالائقی اور نااہلی کا پتا چل جائے گا جو انہوں نے عوام پر مہنگائی اور لاقانونیت کی صورت میں مظاہم ڈھائے ہیں۔

انہوں نے کہا کہ ہر محاذ پر یہ فیل ہوئے ہیں اور اس کا خمیازہ تو انہیں بھگتنا پڑے گا اور اس کا بوجھ ان کے اراکین قومی و صوبائی اسمبلی نہیں اٹھا سکتے، وہ اپنے حلقوں میں جائیں گے اور پتا ہے عوام ان کے گریبان پکڑیں گے اور ان کو پتا ہے کہ پی ٹی آئی کے ٹکٹ پر اگلا الیکشن نہیں لڑ سکتے۔

ایک سوال پر انہوں نے کہا کہ ڈسکہ کے اندر عوام نے پوری قوت اور جرات کے ساتھ ووٹ چوروں کو نہ صرف روکا ہے بلکہ ان کو رنگے ہاتھوں پکڑ کر سز دلوائی اور سیٹ ان سے چھینی ہے۔

مریم نواز کا کہنا تھا کہ مسلم لیگ (ن) اب وہ پرانی جماعت نہیں رہی جو شرافت سے مار کھا لیتی تھی اور شرافت کی سیاست کرتی تھی لیکن اب مسلم لیگ (ن) مقابلہ کرتی ہے اور کرے گی۔

انہوں نے کہا کہ اگر آزاد کشمیر کے انتخابات میں 2018 اور گلگت بلتستان کے انتخابات کا عمل دہرایا گیا تو مسلم لیگ (ن)، اس کا ووٹر، کارکن اور عوام اس پر بھرپور مزاحمت کریں گے۔

ان کا کہنا تھا کہ اگر کسی نے راجا فاروق حیدر اور مسلم لیگ (ن) کے مینڈیٹ پر ڈاکا ڈالنے کی کوشش تو یہ نگلنا ان کے لیے آسان نہیں ہوگا۔

راجا فاروق حیدر نے کہا کہ آزاد کشمیر کے انتخابات کے دھاندلی مودی اور بھارت کی تائید میں ہوگا، میں صاف بتادوں کہ یہ بھارت کو فائدہ دینے کی بات ہوگی، اور یہ کوشش آزاد کشمیر کے لوگوں کو پاکستان سے بدظن کرنے کی کوشش ہوگی۔

وزیراعظم آزاد کشمیر نے کہا کہ اگر کسی نے اس طرح کی بات کی تو یہ بھارت اور مودی کے حق میں جائے گی کیونکہ کشمیر کے اندر پاکستان کی سرمایہ کاری ہے، پاکستان کے عوام اور پاکستان کی فوج نے جو قربانیاں دی ہیں وہ خاک میں مل جائیں گی۔

مریم نواز نے اے اور او لیول کے امتحانات ملتوی کرنے کا مطالبہ دہراتے ہوئے کہا کہ اول تو حکومت پورے ملک میں کورونا کو روکنے، عوام کی حفاظت کرنے اور ایس او پیز پر عمل کروانے میں ناکام ہوئی ہے۔

ان کا کہنا تھا کہ یہاں تو پاکستان کے بچوں اور مستقبل کا سوال ہے اور جس طرح امتحان ہوا ہے اس میں کوئی ایس او پیز پر عمل نہیں ہوا اس لیے ایک بھی بچے کو کورونا ہوا، اس کی زندگی یا صحت کو خطرہ لاحق ہوا تو والدین سے کہوں گی اس حکومت اور عمران خان کے خلاف ایف آئی آر درج کرائی جائے۔

میڈیا رپورٹس کے حوالے سے سوال پر انہوں نے کہا کہ آپ اس ادارے کے سربراہ ہیں جہاں پر کہیں بھی آپ کو سیاست میں مداخلت نظر نہیں آنی چاہیے، آپ کو اپنا دائرہ کار آئینی حدود تک رکھنا چاہیے اگر اس سے باہر نکلیں گے تو آواز اٹھے گی۔

مریم نواز کا کہنا تھا کہ پتا ہے کس کے بارے میں بات کی گئی ہے کہ اپنے زور سے خود گر گئے ہیں، اگر یہ نواز شریف کی طرف اشارہ ہے تو ان کو گرانے کی آپ نے کوشش کی اور دنیا کا کون سا انتقامی حربہ اور کارروائی ہے، جو آپ نے ان کے اوپر نہیں استعمال کیا۔

ان کا کہنا تھا کہ وہ آج بھی پورے قد، آب وتاب، پوری زور اور قوت کے ساتھ کھڑے ہیں اور ان کے گرانے والوں کا سنبھلنا مشکل ہو رہا ہے۔

انہوں نے معروف صحافی ابصار عالم پر حملے کی مذمت کی اور کہا کہ اگر وہ کسی بھی پالیسی پر تنقید کرتے ہیں تو وہ حق گوئی ہے، انہوں نے غط کو غلط کہا۔

مسلم لیگ (ن) کی نائب صدر نے کہا کہ وہ چیئرمین پیمرا رہے ہیں اور انہیں پتا ہے کہ معاملات کس طرح چلائے جاتے ہیں، اگر وہ اس چیز کو اجاگر اور غلطیوں کی نشان دہی کرتے ہیں تو تنقیدی آواز کو خاموش کرنے کا یہ طریقہ نہیں ہے، کسی بھی جمہوری ملک میں یہ غلط روایت ہے جو ختم ہونی چاہیے۔

جہانگیر ترین گروپ کے اراکین قومی و صوبائی اسمبلی کی وزیراعظم سے ملاقات ہوئی جس میں جہانگیر ترین کے کیسوں سے شہزاد اکبر کو الگ کرنے اور جوڈیشل کمیشن بنانےکا مطالبہ کیا گیا۔

وزيراعظم نے جوڈيشل کمیشن کا مطالبہ مسترد کردیا جبکہ دیگر امور کے لیے وقت مانگ لیا۔

ملاقاتیوں نے دعویٰ کردیا کہ وزیراعظم نے شہزاد اکبر کو ہٹانے سے اتفاق کرلیا ہے اب وہ خود یہ معاملہ دیکھیں گے۔

جہانگیر ترین کے حامی ارکان اسمبلی نے وزیراعظم کی جانب سے تمام مطالبات تسلیم کیے جانے کا دعویٰ کیا ہے۔

رکن قومی اسمبلی راجا ریاض کا کہنا ہے کہ ملاقات میں وزیراعظم نے یقین دلایا ہے کہ ہر صورت انصاف ہوگا ،کسی کے ساتھ زیادتی نہیں ہونے دیں گے۔

نذیر چوہان کہتے ہیں کہ وزیراعظم نے ان کی تمام باتیں مان لیں،شہزاد اکبر سے متعلق تحفظات پر وزیراعظم نے کہا کہ جہانگیر ترین کیس خود مانیٹر کریں گے۔

اسلام آباد میں جہانگیر ترین کے ہم خیال گروپ نے وزیراعظم سے ملاقات کے بعد میڈیا سے گفتگو کی۔ اس موقع پر رکن صوبائی اسمبلی نذیر چوہان نے کہا کہ وزیراعظم نے تفصیل سے ہماری بات سنی، ہم نے وزیراعظم کے سامنے تحفظات رکھے، وزیراعظم نے یقین دہانی کرائی ہے جہانگیر ترین کے ساتھ ناانصافی نہیں ہوگی، ہم نے مطالبہ کیا شہزاد اکبر کی ٹیم سے کیسز لے کر غیر جانبدار ٹیم بنائیں۔

رکن قومی اسمبلی راجا ریاض نے کہا کہ وزیراعظم سے خوشگوار ماحول میں بات ہوئی، وزیراعظم نے یقین دہانی کرائی ہے انصاف کے تقاضے پورے کیے جائیں گے، شہزاد اکبر سے متعلق تحفظات وزیراعظم کے سامنے رکھے، وزیراعظم نے کہا معاملہ مجھ پرچھوڑ دیں، کسی کے ساتھ زیادتی نہیں ہونے دوں گا، ہم اپنے کپتان پر اعتماد ہے کہ وہ انصاف کریں گے، راجہ ریاض

وزیراعظم سے ملاقات سے قبل ارکان اسمبلی نے جہانگیر ترین سے ملاقات کی تھی۔ وزیراعظم سے ملاقات میں جہانگیر ترین موجود نہیں تھے۔

وفاقی وزیر اطلاعات فواد چوہدری کا کہنا ہے کہ جہانگیر ترین پی ٹی آئی کے اہم رہنما ہیں۔

فواد چوہدری نے کہا کہ وزیراعظم عمران خان نے جہانگیر ترین کے حامی ارکان اسمبلی سے ملاقات میں واضح کردیا کہ ایف آئی اے کو تحقیقات سے نہیں روکا جائے گا،انصاف کے تقاضے پورے کیے جائیں گے۔

فواد چوہدری نے کہا کہ جو پارٹی انصاف اور احتساب کے نام پر وجود میں آئی ہو وہ اپنے اور دوسروں کیلئے انصاف کے دہرے معیار نہیں رکھ سکتی۔

انہوں نے کہا کہ جہانگیر ترین کے متعلق کچھ ایم این ایز نے وزیراعظم کو اپنا مؤقف بتایا، جس طرح دیگر لوگوں نے ٹرائل کا سامنا کیا ہے ویسے ہی پارٹی کے لوگوں کو بھی کرنا ہوگا۔

وزیر اطلاعات نے کہا کہ جہانگیر ترین پارٹی کے لیے مسئلہ نہیں پیدا کریں گے کیونکہ وہ خود پارٹی کا حصہ ہیں، وزیراعظم کا صاف نظریہ ہے کہ جس پر جو الزام لگے گا اس کو ٹرائل سے گزرنا ہوگا، جہانگیر ترین کی اور وزیراعظم کی ابھی کوئی ملاقات شیڈول نہیں۔

فواد چوہدری نے کہا کہ وینٹی لیٹر زسےمتعلق شاید شبلی فراز کو ابھی تک پریزینٹیشن مکمل نہیں ملی، تمام سرٹیفیکیشن کے ذریعے ہی وینٹی لیٹر کا کام چلتا ہے، شبلی فراز کو کمپنیوں سے وینٹی لیٹر سےمتعلق پریزینٹیشن لینی چاہیے، ہمارےپاس وینٹی لیٹرز کی کمی ہوتی تو آج حالات حکومت کے کنٹرول میں نہ ہوتے۔

وزارت تعلیم نے ملک بھر میں کورونا وائرس کے پھیلاؤ کے پیش نظر کیمبرج سسٹم سمیت تمام امتحانات 15 جون تک ملتوی کرنے کا اعلان کردیا ہے۔

وزیر اعظم کے معاون خصوصی برائے ڈاکٹر فیصل سلطان کے ہمراہ پریس کانفرنس کرتے ہوئے وفاقی وزیر تعلیم شفقت محمود نے کہا کہ 18 اپریل کو ہم نے این سی او سی کے آخری اجلاس میں فیصلہ کیا تھا کہ امتحانات کا سلسلہ جاری رکھا جائے گا لیکن اس کے بعد سے 27 اپریل تک بیماری میں بہت تیزی سے اضافہ ہوا ہے۔

ان کا کہنا تھا کہ ہم شاید ایک ایسی صورتحال کی جانب بڑھ رہے ہیں جہاں ہمیں زیادہ انفیکشن کے حامل علاقوں کا لاک ڈاؤن کرنا پڑے لہٰذا اسد عمر کی زیر صدارت ہونے والے این سی او سی اجلاس میں یہ متفقہ فیصلہ کیا گیا کہ 15 جون تک کوئی امتحان نہیں ہوں گے۔

شفقت محمود نے کہا کہ آج سے لے کر 15 جون تک کوئی امتحان نہیں ہو گا اور نویں سے 12ویں جماعت کے جن امتحانات کو مئی کے آخر میں شروع ہونا تھا ، انہیں مزید ملتوی کردیا گیا ہے اور 15 جون تک کوئی امتحان نہیں ہو گا۔

انہوں نے کہا کہ ہم حالات کا جائزہ لیتے رہیں گے اور مئی کے وسط یا تیسرے ہفتے میں بیماری کا جائزہ لے کر فیصلہ کیا جائے گا کہ ان امتحانات کو اور آگے لے کر جانا ہے یا ان کا آغاز کرنا ہے۔

ان کا کہنا تھا کہ اگر 15 جون کے بعد امتحانات ہوتے ہیں تو یہ جولائی سے اگست تک طوالت اختیار کر سکتے ہیں۔

انہوں نے کہا کہ او لیول کے امتحان بھی کینسل کر دیے گئے ہیں جو اب اکتوبر نومبر کی سائیکل میں ہوں گے اور اسی طرح اے ایس کے امتحان بھی اب اکتوبر نومبر میں ہوں گے ۔

وفاقی وزیر تعلیم نے کہا کہ جو بچے پاکستان کی جامعات میں جانا چاہتے ہیں ان کے لیے ہم اس بات کو یقینی بنائیں گے کہ جنوری تک ایڈمیشن ہوتے رہیں تاکہ بچوں کو ایڈمیشن اور یونیورسٹی جانے میں کوئی مسئلہ نہ ہو۔

انہوں نے کہا کہ یہ سب کرنے کے باوجود بچوں کا ایک ایسا طبقہ رہ جاتا ہے جو مختلف مجبوریوں کی وجہ سے اگر ابھی امتحان نہیں دیتے تو پھر ان کا سال ضائع ہو جائے گا تو اس پر بہت غوروفکر کے بعد فیصلہ کیا گیا کہ اے-ٹو کے وہ چند بچے جن کی کوئی مجبوری ہے اور وہ ستمبر سے آگے امتحان نہیں دے سکتے، تو ان کی سہولت کے لیے متفقہ طور پر فیصلہ کیا گیا کہ ان کو جو ڈیٹ شیٹ جاری ہوئی ہے اسی کے مطابق امتحان دینے کی سہولت فراہم کی جائے تاکہ ان کا سال ضائع نہ ہو۔

ان کا کہنا تھا کہ پیر کے بعد کسی بھی جگہ پر 50 سے زائد لوگ نہیں ہوں گے، اس کے لیے ہم نے درخواست کی ہے کہ اسکول کو وینیو بنایا جائے یا موجودہ وینیو میں تعداد کم کر کے 50 تک لائی جائے۔

شفقت محمود کا کہنا تھا کہ جہاں بھی امتحان ہوں گے وہاں 50 سے زائد بچے نہیں ہوں گے اور اس کے باہر قانون نافذ کرنے والے ادارے تعینات کیے جائیں گے تاکہ مجمع اکٹھا نہ ہو۔

انہوں نے کہا کہ یہ مشکل وقت ہے اور مشکل وقت میں کوئی بھی فیصلہ آسان نہیں ہوتا اس لیے یقیناً بہت سارے والدین کو تسلی ہو گی کہ بچے کووڈ-19 کے ان دنوں میں امتحانات کے لیے نہیں جائیں گے جبکہ جن بچوں کی مجبوری ہے، ہم نے ان کے مستقبل کی خاطر بھی بندوبست کیا ہے۔

وزیر تعلیم نے کہا کہ امتحانات بچوں کے لیے بہت ضروری ہوتے ہیں کیونکہ پڑھائی اور محنت کا آخری نتیجہ امتحان ہوتا ہے اور تمام وزرا نے فیصلہ کیا کہ امتحان کے بغیر کوئی چارہ نہیں ہے۔

اس سے قبل وزیر اعظم کے معاون خصوصی برائے صحت ڈاکٹر فیصل سلطان نے کہا کہ اے او لیول کے 85 ہزار بچوں کو مختلف دنوں میں امتحانات دینے تھے، اس میں سے اب یہ 21 ہزار رہ جائیں گے۔

انہوں نے کہا کہ پچھلے چند ہفتوں تشویشناک حالت کا شکار مریضوں کی تعداد میں اضافہ ہوا ہے بلکہ آج ان کی تعداد 5 ہزار سے تجاوز کر گئی جن میں سے اکثر وینٹی لیٹر پر ہیں اور یہ وبا کے آغاز سے اب تک اس طرح کے مریضوں کی سب سے بڑی تعداد ہے۔

انہوں نے کہا کہ اس وبا کی یہ تیسری لہر شدت سے موجود ہے اور اس کے نتیجے میں پابندیوں پر موثر طریقے سے عملدرآمد کے سلسلے میں بہت سارے اقدامات کیے گئے ہیں بلکہ گزشتہ روز مردان میں لاک ڈاؤن کردیا گیا تھا کیونکہ وہاں مثبت کیس کی شرح بہت زیادہ تھی۔

ان کا کہنا تھا کہ بیماری کی شدت ناصرف زیادہ ہے بلکہ پچھلے کچھ عرصے میں اس میں اضافہ ہوا ہے اور اس کا نظام صحت پر دباؤ زیادہ ہے لہٰذا اس پس منظر میں کچھ فیصلے کیے گئے ہیں.

ریاست مخالف تقریر کے کیس میں مسلم لیگ (ن) کے رہنما و رکن قومی اسمبلی جاوید لطیف کو عبوری ضمانت خارج ہونے پر گرفتار کر لیا گیا۔

لاہور کی سیشن کورٹ میں ریاست مخالف بیان دینے کے مقدمے میں ایڈیشنل سیشن جج واجد منہاس نے جاوید لطیف کی درخواست ضمانت پر سماعت کی۔

دوران سماعت جاوید لطیف کے وکیل فرہاد علی شاہ نے دلائل دیے کہ جاوید لطیف کے خلاف جھوٹی اور بے بنیاد ایف آئی آر درج کی گئی، جاوید لطیف کا تعلق مسلم لیگ (ن) اور اپوزیشن جماعت سے ہے، پولیس نے بدنیتی کی بنیاد پر مقدمہ درج کیا ہے۔

انہوں نے کہا کہ سوشل میڈیا پر پورا کلپ سنے بغیر جاوید لطیف پر مقدمہ بنایا گیا، سوشل میڈیا پر تو علما کے خلاف بھی فتوے آرہے ہوتے ہیں، جاوید لطیف بھاگے نہیں انہوں نے اس عدالت کے سامنے سرنڈر کیا۔

وکیل نے کہا کہ مریم نواز کو قتل کرنے کے لیے ایک سازش تیار کی گئی، مریم نواز کے تناظر میں جاوید لطیف نے یہ بات کی، یہ تفتیش کا کیس ہے اینکر کے ساتھ جاوید لطیف کا آمنا سامنا کرانا ہے، سی آئی اے لاہور اس کیس کو دیکھ رہی ہے یہاں کسی دہشت گرد کی ضمانت کی درخواست نہیں لگی جبکہ پولیس کے پاس تو ان معاملات پر ایف آئی ار درج کرانے کا اختیار ہی نہیں ہے۔

انہوں نے کہا کہ جاوید لطیف نے مریم نواز پر حملے کی صورت میں کارروائی کا کہا تو یہ کوئی غلط بات تو نہیں، تفتیش میں کھل کے بدنیتی کا مظاہرہ کیا گیا ہے، تفتیشی افسر نے تو گناہ گار قرار دے دیا، جائیں پھر جاوید لطیف کو یہ پھانسی لگا دیں، کیس میں نہ ٹرائل کیا گیا نہ ضمانت دی گئی، پولیس نے تو اپنے طور پر فیصلہ سنا دیا ہے لیکن یہاں پولیس کی خواہش کے مطابق نہیں قانون کے مطابق فیصلہ ہوگا۔

وکیل فرہاد علی شاہ کا کہنا تھا کہ جاوید لطیف کے کیس میں ایک سیکشن کے علاوہ باقی تمام قابل ضمانت سیکشن ہیں۔

انہوں نے عدالت سے استدعا کی کہ جاوید لطیف تفتیش میں شامل ہوں گے ان کی ضمانت منظور کی جائے، پولیس کا کنڈکٹ انتہائی شرمناک ہے، انسداد دہشت گردی عدالت میں بھی مسلم لیگ (ن) کے رہنماؤں کی ضمانت سے قبل ڈراما رچایا گیا، عدالت میں اس وقت بھی سی آئی اے کے لوگ کھڑے ہیں۔

اس موقع پر جج نے کمرہ عدالت میں سول کپڑوں میں موجود لوگوں کی شناخت پوچھی۔

ایک افسر نے بتایا کہ میں ڈی ایس پی سی آئی اے ہوں باقی انسپکٹر ہیں۔

اس پر جج نے سوال کیا کہ آپ کو تو عدالت نے بلایا ہی نہیں آپ کیوں آئے ہیں۔

ڈی ایس پی سی آئی اے نے بتایا کہ تفتیش کے سلسلے میں عدالت میں آئے ہیں۔

جاوید لطیف کے وکیل کے دلائل مکمل ہونے کے بعد پراسیکیوٹر نے دلائل دیتے ہوئے جاوید لطیف کی ضمانت خارج کرنے کی استدعا کی۔

سرکاری وکیل نے کہا کہ جاوید لطیف کا متنازع بیان اپنے لیڈر کی محبت میں حدود کو تجاوز کرنے کے مترادف ہے، جاوید لطیف کے بیان کی سی ڈی کو فرانزک کے لیے بھجوا دیا گیا ہے، پروسیکیوشن کا کیس قانون کے تمام تقاضوں کے مطابق ہے، اس مرحلے پر جاوید لطیف کی ضمانت نہیں بنتی۔

انہوں نے کہا کہ جاوید لطیف کے کیس میں جو سیکشن لگائے گئے ہیں وہ قابل ضمانت نہیں ہیں، جاوید لطیف نے مقدمے کے اخراج کے لیے ہائی کورٹ سے رجوع کیا وہاں کیا ہوا سب کو پتا ہے، جاوید لطیف کی ضمانت خارج کی جائے تاکہ اس کیس میں تفتیش کو مکمل کیا جا سکے۔

وکیل مدعی نے دلائل میں کہا کہ ایک شخص کی محبت میں ریاست کو دھمکی دی گئی، میرا فرض ہے کہ متنازع بیان پر میں قانونی چارہ جوئی کر سکوں، ‘پاکستان نہ کھپے’ کہنے سے بڑا کوئی جرم نہیں ہے۔

ان کا کہنا تھا کہ چیف جسٹس لاہور ہائی کورٹ نے کیس میں کہا کہ پاکستان کے خلاف بات کرنی ہے تو بنگلہ دیش چلے جائیں جبکہ مدعی بالکل نہیں شرمائے گا کہ ان کا تعلق پاکستان تحریک انصاف (پی ٹی آئی) سے ہے۔

عدالت نے فریقین کے دلائل مکمل ہونے کے بعد جاوید لطیف کی درخواست ضمانت پر فیصلہ سناتے ہوئے ان کی عبوری ضمانت خارج کردی۔ضمانت منسوخ ہونے کے بعد جاوید لطیف کو سی آئی اے نے گرفتار کر لیا۔

کیس کا پس منظر
خیال رہے کہ رہنما مسلم لیگ (ن) جاوید لطیف نے ایک ٹی وی پروگرام میں مریم نواز کو مبینہ دھمکی کے بارے میں سوال کے جواب میں کہا تھا کہ ‘اگر خدانخواستہ مریم نواز شریف کو کچھ ہوا تو ہم پاکستان کھپے کا نعرہ نہیں لگائیں گے’۔

اس بیان پر دو روز قبل جاوید لطیف کے خلاف ریاست کے خلاف بغاوت پر اکسانے اور غداری سمیت سائبر کرائم ایکٹ کے تحت مقدمہ درج کرلیا گیا تھا۔

یاد رہے کہ جاوید لطیف نے اپنے خلاف دائر اس مقدمے کو لاہور ہائیکورٹ میں چیلنج کیا تھا لیکن درخواست پر سماعت کے دوران عدالت کے سخت ریمارکس کے بعد انہوں نے اپنی درخواست واپس لے لی تھی۔

میاں جاوید لطیف کے خلاف مقدمہ لاہور کے شہری جمیل سلیم کی مدعیت میں تھانہ ٹاؤن شپ میں درج کیا گیا تھا جس میں الزام عائد کیا گیا تھا کہ جاوید لطیف نے ملک کی حکومت اور سالمیت کے ساتھ ریاستی اداروں کے خلاف ہرزہ سرائی کی۔

قومی احتساب بیورو (نیب) نے سابق صدر اور پاکستان پیپلز پارٹی (پی پی پی) کے شریک چیئرمین آصف علی زرداری کے خلاف اسلام آباد کی احتساب عدالت میں 8 ارب روپے کی بدعنوانی کا ریفرنس دائر کردیا۔

نیب کے دائر ریفرنس میں آصف زرداری اور مشتاق احمد کو ملزم نامزد کیا گیا ہے۔

نیب کے مطابق مشتاق احمد اور ملک کی ایک نامور نجی سوسائٹی کے درمیان 8 ارب روپے سے زائد کی غیر قانونی ٹرانزیکشن ہوئیں اور اس رقم سے کراچی کے پوش علاقے میں جائیدادیں خریدی گئیں۔

ریفرنس میں بتایا گیا کہ مذکورہ جائیدادیں آصف زرداری کی ملکیت ہیں جبکہ یہ رقم سمٹ بینک کے ذریعے منتقل کی گئی تھی۔

اسلام آباد کی احتساب عدالت میں دائر ریفرنس میں نیب کا مزید کہنا تھا کہ مشتاق احمد کے اکاؤنٹ سے 15 کروڑ روپے کی ادائیگی پر کراچی کے علاقے کلفٹن میں ایک گھر خریدا گیا جو آصف علی زرداری کی ملکیت ہے۔

اس میں مزید کہا گیا کہ آصف علی زرداری کو سوالنامہ بھیجا گیا تھا جس میں وہ مذکورہ گھر اور دیگر سے متعلق سوالات کا جواب نہیں دے سکے۔

نیب کا کہنا تھا کہ ملزم مشتاق احمد 2009 سے 2013 تک ایوان صدر میں سرکاری ملازم رہے ہیں، جنہیں سینیٹر رخسانہ بنگش کے کہنے پر اسٹینو ٹائپسٹ کے طور پر بھرتی کیا گیا تھا۔

ریفرنس میں کہا گیا کہ ملزم مشتاق احمد نے آصف علی زرداری کے ساتھ 104 غیر ملکی دورے کیے ہیں جبکہ ملزم فی الحال فرار ہے۔

علاوہ ازیں ریفرنس میں بتایا گیا کہ مشتاق احمد، ماڈل ایان علی کی گرفتاری کے وقت ائیرپورٹ پر بھی موجود تھا۔

واضح رہے نیب کی جانب سے یہ آصف علی زرداری کے خلاف پہلا ریفرنس نہیں ہے اسے قبل بھی سابق صدر کو متعدد بد عنوانی کے ریفرنسز کا سامنا ہے۔

خیال رہے کہ سابق صدر آصف زرداری، ان کی بہن فریال تالپور اور متعدد دیگر کاروباری افراد کے خلاف سمٹ بینک، سندھ بینک اور یو بی ایل میں 29 ‘بینامی’ اکاؤنٹس کے ذریعے 35 ارب روپے کی جعلی ٹرانزیکشنز سے متعلق 2015 کے کیس کے طور پر تحقیقات کی جارہی ہیں۔

7 ستمبر 2018 کو سپریم کورٹ نے سابق صدر مملکت اور ان کی بہن کی جانب سے مبینہ طور پر جعلی اکاؤنٹس کے ذریعے اربوں روپے کی منی لانڈرنگ کیے جانے کے مقدمے کی تحقیقات کے لیے جوائنٹ انویسٹی گیشن ٹیم (جے آئی ٹی) تشکیل دے دی تھی۔

اس جے آئی ٹی نے سابق صدر آصف علی زرداری، ان کی ہمشیرہ فریال تالپور سے پوچھ گچھ کی تھی جبکہ چیئرمین پی پی پی بلاول بھٹو سے بھی معلومات حاصل کرنے کا فیصلہ کیا تھا۔

بعد ازاں اس کیس کی جے آئی ٹی نے عدالت عظمیٰ کو رپورٹ پیش کی تھی، جس میں 172 افراد کا نام سامنے آیا تھا، جس پر وفاقی حکومت نے ان تمام افراد کے نام ای سی ایل میں شامل کردیے تھے۔