Category تازہ ترین

پنجاب میں شوگر مافیاکے خلاف تحقیقات کرنے والی جوائنٹ انویسٹی گیشن ٹیم کے سربراہ ڈاکٹر رضوان کو تبدیل کرنے کی اندرونی کہانی سامنے آگئی۔

ذرائع کے مطابق وفاقی وزیر خسرو بختیار کے خاندان کی ٹو اسٹار شوگر مل کے خلاف کارروائی کرنے پر چینی تحقیقاتی ٹیم کے سربراہ کو ہٹایا گیا، ایف آئی اے کی ٹیم خسرو بختیار کو ٹو اسٹار شوگر مل میں 13 کروڑ کے شیئرزرکھنے پر طلب کرنا چاہتی تھی۔

ذرائع کا کہنا ہےکہ ٹیم کے سربراہ ڈاکٹر رضوان نے جہانگیر ترین کی شوگر اسکینڈل میں گرفتاری کی اجازت بھی مانگی تھی اور اپنے مؤقف پر قائم رہنے پر کل ان کو کام سے روک دیا گیا جب کہ ابھی یہ واضح نہیں ہوا کہ ڈاکٹر رضوان کو ایف آئی اے سے بھی فارغ کردیا گیا ہے تاہم ڈاکٹر رضوان کو حکومت کے اگلے حکم کا انتظار ہے۔

ذرائع کے مطابق چینی تحقیقاتی ٹیم رواں ہفتے 5 مزید شوگر مل مالکان کے خلاف ایف آئی آر درج کرنے والی تھی، اس وقت مجموعی طور پر 12 ایف آئی آر درج ہیں جن میں 3 جہانگیر ترین اور ایک ایف آئی آر شہباز شریف خاندان کے خلاف درج ہے۔

ذرائع کا کہنا ہے کہ شوگر مل مالکان اور سٹہ مافیا کے خلاف درج کی گئی ایف آئی آر پراسیکیوشن میں کمزور تھی۔

ذرائع کا کہنا ہےکہ ڈاکٹر رضوان کے بعد اب شوگر اسکینڈل انکوائری سینئر افسر ایڈیشنل ڈی جی ایف آئی اے ابو بکر خدا بخش کو دے دی گئی جو اب تحقیقاتی ٹیم کی سربراہی کریں گے جب کہ اب تحقیقات نئے سرے سے ہوں گی۔

صوبائی وزیرتیمورجھگڑا کے خلاف کورونا ایس اوپیزکی خلاف ورزی پرمقدمہ درج کرلیا گیا۔

پشاورکی ضلعی انتظامیہ نے سوشل میڈیا پرچلنے والی خبرکا نوٹس لیتے ہوئے صوبائی وزیر تیمورجھگڑا کے خلاف کورونا ایس او پیزکی خلاف ورزی پرمقدمہ درج کرلیا گیا۔

صوبائی وزیرتیمورسلیم جھگڑا بڑی تعداد میں افراد کے ساتھ ایک نجی ریسٹورنٹ کے اندرافطاری کررہے تھے۔ اس متعلق ریسٹورنٹ کے منیجرنے کہا کہ صوبائی وزیرکوپابندی کے باعث منع کیا گیا تھا۔

وزیرصحت تیمورسلیم جھگڑا کے خلاف کارروائی کے لیے پولیس نے ایپیڈیمک کنٹرول ایکٹ کے دفعہ 17 کی تحت مقدمہ درج کرلیا ہے۔ یہ قانون کسی بھی وبا کے دوران زیادہ تعداد میں لوگوں کوجمع کرنے کی خلاف ورزی سے متعلق ہے۔

ضلعی انتظامیہ نے موقف اختیارکرتے ہوئے کہا کہ کوئی بھی قانونی سے بالاترنہیں۔ حکومتی ضابطہ اخلاق کی خلاف ورزی پرضلعی انتظامیہ پشاوربلاتفریق کارروائیاں جاری رہیں گی۔

واضح رہے کہ تیمورجھگڑا کا اس واقعے پرتاحال کوئی ردمل سامنے نہیں آیا ہے لیکن انہوں نے دو روزقبل ہی اپنے ٹوئٹراکاؤنٹ سے کورونا ایس او پیز پرلوگوں کوعمل درآمد کرنے کی یہ ویڈیوشئیرکی تھی۔

حکومت نے عید کے موقع پر ملک بھر میں سیاحت پر پابندی عائد کردی۔

وزارت داخلہ نے این سی او سی کے اجلاس میں کیے گئے فیصلے جاری کردیے جس کے تحت 8 مئی سے 16مئی تک سیاحت پر مکمل پابندی عائد کی گئی ہے۔

وزارت داخلہ کےمطابق سیاحت پر پابندی عید الفطر کی چھٹیوں کے دوران بھی رہے گی، سیاحتی مقامات اور اردگرد کے تمام ریسٹورینٹس، پبلک پارکس، ساحلی مقامات اور ہوٹل مکمل بندرہیں گے جب کہ عید کی تعطیلات میں بین الصوبائی اور انٹرسٹی ٹرانسپورٹ بھی بند رہے گی۔

نوٹیفکیشن میں بتایا گیاہےکہ عید کی تعطیلات میں مری،گلیات، سوات اور کالام جانے والی سڑکیں بند رہیں گی، ساحلی علاقوں اور شمالی علاقہ جات جانے والی سڑکیں بھی بند رہیں گی جب کہ گلگت بلتستان کے مقامی افراد کو واپس جانے کی اجازت ہوگی۔

وزارت داخلہ کے مطابق عید کی چھٹیوں کے دوران بجلی کی بلا تعطل فراہمی یقینی بنائی جائےگی جب کہ اعتکاف، شب قدر، جمعۃ الوداع اور عیدکے لیے ایس اوپیزکا بروقت اجرا کیا جائے گا۔

وزیراعظم کے معاون خصوصی برائے صحت ڈاکٹر فیصل سلطان کا کہنا ہے کہ حکومت تحفے اور ڈونیشن میں ملنے والی ویکسین پر انحصار نہیں کررہی بلکہ تین کمپنیوں سے ویکسین خرید رہے ہیں اور 3 کروڑ ویکسین ڈوز خریدنے کا معاہدہ کرلیا ہے۔

این سی او سی میں میڈیا کو بریفنگ دیتے ہوئے ڈاکٹر فیصل سلطان نے کہا کہ ملک میں ویکسی نیشن کا عمل بلا تعطل جاری ہے، ملک بھر میں 1200 ویکسین سینٹر ہیں اور اب تک 20 لاکھ سے زیادہ ویکسین کی ڈوز لگ چکی ہیں۔

انہوں نے کہا کہ ویکسی نیشن کے حوالے سے غلط اطلاعات چلتی رہی ہیں، حکومت تحفے اور ڈونیشن میں ملنے والی ویکسین پر انحصار نہیں کررہی بلکہ تین کمپنیوں سے ویکسین خرید رہے ہیں، دنیا بھر میں ویکسین کی کمی ہے کیونکہ ویکسین کی ڈیمانڈ زیادہ ہے اور سپلائی کم ہے جب کہ کئی ممالک کو ایڈوانس بکنگ کے باوجود ویکسین فراہم نہیں ہوسکی۔

ڈاکٹر فیصل سلطان کا کہنا تھاکہ 17 لاکھ ڈوزز حکومت چین کی طرف سے تحفہ میں آئی ہے، کوویکس کی طرف سے آنے والی ویکسین نہیں ملی،ہم تین ویکسین مینوفیکچررز سے ویکسین خرید رہے ہیں، 30 مارچ سے 30 لاکھ ویکسین ڈوز خرید چکے ہیں اور 3 کروڑ ویکسین ڈوز خریدنے کا معاہدہ کرلیا ہے، ایک معاہدہ کین سائنوکمپنی سے ٹرانسفورم ٹیکنالوجی کا ہے، یہ ٹیکنالوجی پاکستان آئے گی، کین سائنو کمپنی کی ویکسین کی فلنگ پاکستان میں ہوگی۔

انہوں نے مزید کہا کہ آکسیجن سپلائی پر این سی او سی کی کمیٹی نظر رکھے ہوئی ہے، آکسیجن کے موجودہ پلانٹ پر نظر رکھی ہوئی ہے اور پاکستان اسٹیل ملز کے آکسیجن پلانٹ کو بھی دیکھ رہے ہیں جب کہ مختلف ممالک سے آکسیجن کی امپورٹ کو ممکن بنایا جاسکتا ہے۔

معاون خصوصی نے مزید کہا کہ 50 سال سے زائد عمر کے لوگوں کی ویکسین چل رہی ہے، ویکسی نیشن سینٹر جمعہ کو بند اور اتوار کو کھلتے ہیں، آج سے 40 سال عمر کے زائد لوگوں کیلئے رجسٹریشن شروع کردی ہے۔

سپریم کورٹ نے ایف آئی اے کے 53 ملازمین کو فوری فارغ کرنے کا حکم دیتے ہوئے ڈی جی ایف آئی اے سے رپورٹ طلب کرلی۔

چیف جسٹس کی سربراہی میں سپریم کورٹ کے تین رکنی بینچ نے ایف آئی اے میں غیر قانونی بھرتیوں اور عدالتی حکم پر عملدرآمد نہ کرنے پر توہین عدالت کیس کی سماعت کی۔

ایف آئی اے کی رپورٹ پر جسٹس اعجاز الاحسن نے کہا سپریم کورٹ نے 2001 میں تمام ملازمین کی بھرتی کیلئے تین ہدایات دیں۔ چیف جسٹس پاکستان نے کہا عدالتی حکم کے مطابق تعیناتیاں پبلک سروس کمیشن کے ذریعے کی جانی تھیں لیکن ایف آئی اے نے عدالتی احکامات پر عمل ہی نہیں کیا، ایف آئی اے رپورٹ نے تو سارا کچا چٹھا کھول کر رکھ دیا ہے۔

ایف آئی اے کے وکیل نے عدالت کو بتایا کہ 60 میں سے چار ملازمین فوت ہوچکے ہیں اور تین نے ٹیسٹ پاس بھی کیا ہے ۔ چیف جسٹس پاکستان نے کہا ہائیکورٹ کا فیصلہ سپریم کورٹ کے فیصلے پر اثر انداز نہیں ہوسکتا، سپریم کورٹ کے فیصلے کے بعد ملازمین دوسری عدالتوں میں چلے گئے، آج ہی ان ملازمین کو فارغ کریں۔

عدالت نے کیس نمٹاتے ہوئے حکم دیا کہ جن ملازمین نے ایف پی ایس سی ٹیسٹ پاس نہیں کیا ان کو فوری طور پر نوکریوں سے فارغ کیا جائے اور ڈی جی ایف آئی اے پندرہ روزمیں عملدرآمد رپورٹ سپریم کورٹ میں جمع کروائیں۔

نجاب حکومت نے بڑا فیصلہ کرتے ہوئے ورکرز کی کم از کم ماہانہ اجرت میں 2 ہزارروپے کا اضافہ کردیا۔

پنجاب مینیمم ویجز بورڈ نے اس ضمن میں نوٹیفکیشن جاری کردیا جس کے تحت کارکنوں کی ماہانہ کم از کم اجرت 17500سے بڑھا کر 19500کر دی گئی اور کم از کم روزانہ اجرت 750 روپے مقرر کی گئی ہے۔ اس اضافے کا اطلاق رواں سال یکم جولائی سے ہوگا۔

پنجاب میں کم از کم اجرت کا تعین کرنے والے بورڈ نے نوٹیفکیشن کے حوالے سے فریقوں کو ایک ماہ میں اپنی تجاویز اور اعتراضات سے آگاہ کرنے کا کہا ہے۔
صوبائی وزیر لیبر پنجاب عنصر مجید خان نے اس بارے میں کہا کہ کم از کم اجرت میں اضافہ تحریک انصاف کی مزدور دوست پالیسیوں کا عکاس ہے، وزیر اعظم عمران خان کا ویژن کمزور اور پیسے ہوئے طبقہ کی زندگیوں میں آسانیاں پیدا کرنا ہے، موجودہ حکومت وزیر اعلیٰ پنجاب کی قیادت میں مزدوروں کی خوشحالی کیلئے عملی اقدامات کر رہی ہے، محکمہ لیبر پنجاب صوبہ کے مزدوروں اورانکے اہل خانہ کو صحت ،تعلیم اور رہائشی سہولیات فراہم کر رہا ہے، آئی ٹی ریفارمز سے محکمانہ امور میں شفافیت کو یقینی بناتے ہوئے ڈپارٹمنٹ کی استعداد کار میں اضافہ کیا گیا ہے۔

عنصر مجید خان کا کہنا تھا کہ مزدروں کو علاج کی سہولیات فراہم کرنے کیلئے سرگودھا، تونسہ اور فیصل آباد میں سوشل سکیورٹی اسپتال قائم کئے جا رہے ہیں، رجسٹرڈ ورکرز کو صحت کی سہولیات فراہم کرنے کیلئے کمپیوٹرآئزڈ سوشل سکیورٹی کارڈز جاری کئے گئے ہیں، مزدوروں کے ذمہ 40 روپے ماہانہ کنٹری بیوشن ختم کرکے انہیں سالانہ 4.5 ارب کا ریلیف دیا، سوشل سکیورٹی جرمانے کی مد میں صنعتکاروں کو 5.5 ارب کا ریلیف دیا گیا ہے، پنجاب وکرز ویلفیئر کے 65 سکولوں میں مزدروں کے 55 ہزار بچوں کو معیاری تعلیم فراہم کی جا رہی ہے۔

ملک میں کورونا وائرس کی تیسری لہر جہاں تیزی سے پھیلتی جارہی ہے وہیں حکومت نے اس کی روک تھام کے لیے مختلف پابندیاں متعارف کرانے کے ساتھ ساتھ ایس او پیز پر عملدرآمد کروانے کے لیے پاک فوج کو بھی تعینات کردیا ہے۔

کووِڈ-19 کے اعداد و شمار کے لیے بنی سرکاری ویب سائٹ کے مطابق گزشتہ 24 گھنٹوں میں پاکستان میں مزید 4 ہزار 487 افراد کے ٹیسٹ کا نتیجہ مثبت آیا 142 مریض انتقال کر گئے۔

وائرس کی تشخیص کے لیے گزشتہ روز مجموعی طور پر 43 ہزار 981 ٹیسٹس کیے گئے جس میں نتائج مثبت آنے کی شرح 9.6 فیصد رہی جبکہ فعال کیسز 89 ہزار 219 تک پہنچ چکے ہیں۔

ملک میں مجموعی طور پر اب تک کورونا وائرس نے 8 لاکھ 4 ہزار 939 افراد کو متاثر کیا ہے جن میں سے 17 ہزار 329 زندگی کی بازی ہار چکے ہیں۔

اس کے علاوہ گزشتہ 24 گھنٹوں کے دوران مزید 5 ہزار 770 مریض صحتیاب ہوئے اور مجموعی طور پر اب تک 6 لاکھ 99 ہزار 816 مریض صحتیاب ہوچکے ہیں۔

واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد سے وبا کے پھیلاؤ میں اتار چڑھاؤ جاری ہے اور اب تک بیماری کی 2 لہریں دیکھی جاچکی ہیں جبکہ تیسری لہر کا پھیلاؤ بدستور جاری ہے۔

کیسز میں حالیہ اضافے کے پیشِ نظر تعلیمی اداروں کی بندش، کاروبار کے اوقات مختصر، دفاتر میں کم حاضری سمیت متعدد اقدامات کیے گئے ہیں اور صورتحال بہتر نہ ہونے پر لاک ڈاؤن کا عندیہ بھی دیا گیا ہے۔

پاکستان میں 27 اپریل کو چاروں صوبوں اور وفاقی اکائیوں میں کورونا وائرس کیسز اور اموات کی صورتحال درج ذیل ہے:

پنجاب
کورونا وائرس کی تیسری لہر سے ملک میں سب سے زیادہ متاثرہ صوبہ پنجاب ہے جہاں گزشتہ 24 گھنٹوں کے دوران گزشتہ مہینوں میں سب سے زیادہ 107 اموات رپورٹ کی گئیں جبکہ 2 ہزار 680 مزید نئے کیسز بھی سامنے آئے۔

پنجاب میں اب تک 2 لاکھ 93 ہزار 468 کورونا کیسز رپورٹ ہو چکے ہیں جن میں سے 8 ہزار 97 افراد انتقال کرچکے ہیں۔

خیبر پختونخوا
پنجاب کے بعد صوبہ خیبرپختونخوا وائرس کی حالیہ لہر میں سب سے زیادہ متاثر ہوا ہے اور یہاں گزشتہ روز مزید 584 نئے کیسز سامنے آئے جبکہ 22 مریض دم توڑ گئے۔

خیبر پختونخوا میں اب تک رپورٹ ہونے والے کیسز کی مجموعی تعداد ایک لاکھ 14 ہزار 661 ہے جبکہ 3 ہزار 156 مریض انتقال کر چکے ہیں۔

سندھ
ملک کے دوسرے بڑے صوبے سندھ میں بھی کیسز میں بتدریج اضافہ ہورہا ہے اور یہاں گزشتہ 24 گھنٹوں میں 727 کیسز رپورٹ ہوئے جس کے بعد مجموعی کیسز کی تعداد 2 لاکھ 79 ہزار 272 ہو گئی ہے۔

صوبے میں کورونا وائرس سے مزید 6 مریضوں کا انتقال ہوا، مجموعی طور پر یہاں اب تک 4 ہزار 605 افراد لقمہ اجل بن چکے ہیں۔

اسلام آباد
اسلام آباد میں گزشتہ 24 گھنٹوں کے دوران مزید 354 نئے کیسز رپورٹ ہوئے جبکہ مزید 5 مریض اس وبا کے باعث زندگی کی بازی ہار گئے۔

وفاقی دارالحکومت میں اب تک مجموعی طور پر 73 ہزار 804 افراد وائرس کا شکار ہوچکے ہیں جن میں سے انتقال کر جانے والوں کی تعداد 670 ہے۔

آزاد کشمیر
آزاد کشمیر میں گزشتہ 24 گھنٹوں کے دوران مزید 68 افراد میں وائرس کی تصدیق ہوئی جبکہ 2 مریض دم توڑ گئے۔

یہاں مجموعی طور پر 16 ہزار 659 افراد وائرس سے متاثر ہوئے جس میں سے 464 انتقال کر گئے۔

بلوچستان
بلوچستان میں کورونا وائرس نے مزید 60 افراد کو متاثر کیا اور مزید کوئی موت رپورٹ نہیں ہوئی۔

یوں صوبے میں اب تک رپورٹ ہونے والے کیسز کی مجموعی تعداد 21 ہزار 803 اور اموات کی تعداد 232 پر برقرار ہے۔

گلگت بلتستان
گلگت بلتستان میں ملک کے دیگر حصوں کی نسبت بیماری کا پھیلاؤ کافی حد تک کنٹرول میں ہے اور گزشتہ روز 14 کیسز سامنے آئے، یہاں اب تک رپورٹ ہونے والے کیسز کی تعداد 5 ہزار 272 ہے۔

گلگت بلتستان میں گزشتہ دو روز سے کسی مریض کے جاں بحق ہونے کی اطلاع سامنے نہیں آئی اور یوں یہاں اموات کی تعداد 105 پر برقرار ہے۔

کورونا کی تیسری لہر کی وجہ سے پنجاب میں اس سال بھی رمضان المبارک کے آخری عشرہ میں مساجد میں اجتماعی اعتکاف کے پروگرام منسوخ کردیئے گئے ہیں، سنت رسول ﷺ کی ادائیگی کے لئے چار سے پانچ لوگ اعتکاف بیٹھ سکیں گے۔

کورونا وبا کے پیش نظر ماہ رمضان کے آخری عشرے میں محدود پیمانے پر اعتکاف کیا جائے گا، اجتماعی اعتکاف کی بجائے مقامی مساجد میں چار سے پانچ افراد الگ الگ حجروں میں اعتکاف بیٹھ سکیں گے۔ رمضان المبارک کےآخری عشرے میں ملک بھر کی طرح لاہور میں بھی لاکھوں فرزندان اسلام اعتکاف بیٹھتے ہیں۔اس سال کورونا وائرس کی تیسری لہر وجہ سے اجتماعی اعتکاف کے اجتماعات منسوخ کردیئے گئے ہیں۔حکومت کے مطابق گزشتہ سال کی طرح اس مرتبہ بھی سنت رسول ﷺ کی ادائیگی کیلئے مساجد میں چار سے پانچ لوگ اعتکاف بیٹھیں گے۔

جامعہ اشرفیہ کے مہتم اعلیٰ مولانا فضل الرحیم کاکہنا ہے رمضان المبارک میں اعتکاف بیٹھنا نبی کریم صلی اللہ علیہ وسلم کی سنت ہے لیکن اس وقت جس وبا کا سامنا ہے اس میں انسانی جانوں کو بچانا بھی مقدم ہے، مساجد میں صرف چار سے پانچ لوگ ہی اعتکاف بیٹھیں گے،علما کرام حکومتی ایس او پیز پر عمل درآمد یقینی بنائیں۔

جامعہ نعیمہ لاہورکے مہتمم علامہ ڈاکٹر راغب نعیمی نے واضع کیا کہ کورونا کی وجہ سے گزشتہ سال کی طرح چندافراد مسجد میں اعتکاف بیٹھیں گے، انہوں نے کہا کہ بچے، بزرگ اوربیمار افراد اعتکاف نہ بیٹھیں۔ ڈاکٹر راغب نعیمی نے مزید کہا مساجد میں اعتکاف کے دوران کورونا ایس اوپیز کا خیال رکھا جائے گا۔

محکمہ اوقاف ومذہبی امور پنجاب کے ترجمان آصف اعجاز نے بتایا کورونا کی وجہ سے اس سال بھی اوقاف کے زیرانتطام مساجد خاص طورپرجامع مسجد داتادربار،بادشاہی مسجد اورمسجد وزیرخان میں اجتماعی اعتکاف نہیں ہوگا، منتظمین کو آگاہ کردیا گیاہے۔ انہوں نے بتایا کہ چندافراد کو اعتکاف بیٹھنے کی اجازت ہوگی۔ اسی طرح تحریک منہاج القرآن نے بھی شہراعتکاف منسوخ کردیا ہے۔ اعتکاف ببیٹھنے کے خواہش مند افرادسے کہا گیا ہے کہ وہ اپنے گھروں میں اعتکاف بیٹھیں یااعتکاف کے اخراجات کی رقم سےغریب اور مستحقیین کو راشن خریدکردیں، اس رقم سے کورونا ویکسین بھی لگوائی جاسکتی ہے۔

مسلم لیگ (ن) کے سینیئر نائب صدر اور سابق وزیر اعظم شاہد خاقان عباسی کہتے ہیں کہ پی ڈی ایم میں واپسی کا پیپلز پارٹی کا چانس اس کے اپنے پاس ہے۔

اسلام آباد میں میڈیا سے بات کرتے ہوئے شاہد خاقان عباسی نے کہا کہ پنجاب میں تاریخ کی بدترین حکومت ہے ، پنجاب میں کوئی ایسا افسر نہیں ہے جسے پیسے کے بغیر لگایا گیا ہو،عمران خان کا کہنا ہے کہ ملک ترقی کر رہا ہے، ہمیں بتایا جائے کہ ملک نے کہاں ترقی کی ہے؟ ملکی معیشت تباہ ہو چکی ہے، بے روزگاری بڑھ رہی ہے، معیشت تباہ ہے، چینی آج بھی 115 روپے کی فروخت ہو رہی ہے، حکومتی آمدن وہی کھڑی ہے اور اخراجات بڑھ گئے ہیں، پارلیمان میں عوام کی کوئی بات نہیں ہوتی ، اس ملک پر حکومت کا ہر لمحہ بھاری ہے،آج ہر پاکستانی سوال کر رہا ہے ملک کدھر جا رہا ہے میری زندگی کا کیا ہو گا؟

کورونا کی صورت حال اور حکومتی اقدامات کے حوالے سے شاہد خاقان عباسی نے کہا کہ بھارت کے اپنے اور ہمارے اپنے مسائل ہیں ، کورونا کا حل لاک ڈاؤن نہیں لوگوں کو ویکسین لگانے میں ہے، حکومت آج تک ویکسین نہیں خرید سکی،مانگے تانگے پر گزاراچل رہاہے، بھارت 8 فیصد آبادی کو ویکسین لگا چکا ہم ایک فیصد کو بھی نہیں لگا سکے۔

صحافی نے سوال کیا کہ مریم نواز نے کہا چاہتے ہیں حکومت پانچ سال پورے کرے، کیا (ن) لیگ نے حکومت گرانے والی پالیسی بدل دی؟ جس پر شاہد خاقان عباسی کا کہنا تھا کہ مریم نواز نے کہا اللہ کرے عمران خان پانچ سال پورے کریں تاکہ جو عمران خان کو لائے ہیں انہیں پتہ لگے۔ پی ڈی ایم میں واپسی کا پیپلز پارٹی کا چانس اس کے اپنے پاس ہے۔

ملک میں کورونا سے مزید 70 افراد انتقال کر گئے اور 4825 نئے کیسز بھی رپورٹ ہوئے ہیں۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 50161 ٹیسٹ کیے گئے جس میں سے 4825 افراد میں کورونا وائرس کی تصدیق ہوئی جبکہ وائرس سے 70 افراد انتقال کر گئے۔

سرکاری پورٹل کے مطابق ملک میں کورونا کیسز مثبت آنے کی شرح 9.61 فیصد رہی۔

سرکاری اعداد و شمار کے مطابق ملک میں کورونا سے ہلاکتوں کی تعداد 17187 ہو گئی ہے اور مجموعی کیسز 8 لاکھ 452 تک جاپہنچے ہیں جب کہ فعال کیسز کی تعداد 89219 ہے۔

اس کے علاوہ 24 گھنٹوں کے دوران ملک بھر میں 4234 مریض کورونا سے صحتیاب بھی ہوئے جس کے بعد مجموعی طور پر صحتیاب ہونے والوں کی تعداد 6 لاکھ 94034 ہو گئی ہے۔

صوبوں کی صورتحال
سرکاری پورٹل کے مطابق سندھ میں کورونا کے مریضوں کی مجموعی تعداد 278545 ہوگئی ہے جب کہ 4599 افراد اب تک انتقال کرچکے ہیں۔

پنجاب میں کورونا کے کل مریضوں کی تعداد 290788 ہے اور 7990 افراد وائرس میں مبتلا ہوکر جان سے جا چکے ہیں جب کہ بلوچستان میں مریضوں کی کل تعداد 21743 اور ہلاکتیں 232 ہو چکی ہیں۔

خیبرپختونخوا میں کورونا کے مریضوں کی تعداد 114077 اور 3134 ہلاکتیں ہو چکی ہیں جبکہ آزاد کشمیر میں 16591 افراد وائرس میں مبتلا ہوچکے ہیں اور 462 افراد انتقال کر گئے۔

اس کے علاوہ گلگت بلتستان میں اب تک کورونا کے مریضوں کی تعداد 5258 اور 105 افراد انتقال کرچکے ہیں۔

پورٹل کے مطابق وفاقی دارالحکومت اسلام آباد میں کورونا کے مریضوں کی مجموعی تعداد 73450 ہے اور اب تک 665 مریض انتقال کر چکے ہیں۔