Category تازہ ترین

سینئر صحافی اور پاکستان الیکٹرانک میڈیا ریگولیٹری اتھارٹی (پیمرا) کے سابق چیئرمین ابصار عالم قاتلانہ حملے میں زخمی ہو گئے تاہم ان کی حالت خطرے سے باہر ہے۔

پولیس ذرائع کے مطابق ابصار عالم اسلام آباد میں ایف الیون پارک میں واک کر رہے تھے کہ نامعلوم شخص نے ان پر فائرنگ کر دی۔

معروف صحافی کو ہسپتال منتقل کردیا گیا، ان کے پیٹ میں گولی لگی اور اب ان کی حالت خطرے سے باہر ہے۔

ابصار عالم نے کہا کہ مجھے لگا کہ ایک نامعلوم شخص میری طرف آرہا ہے اور وہ بعد میں مجھ پر فائرنگ کر کے فرار ہو گیا۔

انہوں نے اپنے ویڈیو پیغام میں کہا کہ میں واک کررہا تھا کہ مجھے گولی مار دی گئی جو مجھے پسلیوں میں لگی ہے۔

ان کا کہنا تھا کہ جن لوگوں نے مجھ پر حملہ کروایا ہے میں انہیں پیغام دینا چاہتا ہوں کہ میں حوصلہ نہیں ہاروں گا اور نہ ہی میں ان چیزوں سے ڈرنے والا ہوں۔

ابصار عالم پر حملے کی خبر جنگل میں آگ کی طرح پھیل گئی اور اس وقت یہ سوشل میڈیا پر ٹاپ ٹرینڈ چل رہا ہے۔

بعد ازاں وفاقی وزیر داخلہ شیخ رشید احمد نے سینئر صحافی ابصار عالم پر قاتلانہ حملے کا نوٹس لیتے ہوئے متعلقہ اداروں کو فوری تحقیقات کا حکم دے دیا۔

انہوں نے ٹوئٹر پر اپنے پیغام میں کہا کہ آئی جی اسلام آباد پولیس کو تحقیقات کا حکم دے دیا ہے اور فائرنگ میں ملوث شخص کو جلد از جلد گرفتار کرنے کی ہدایت کی ہے۔

ان کا کہنا تھا کہ ابصار عالم پر فائرنگ کرنے والے قانون سے بچ نہیں سکیں گے اور بہت جلد قانون کی گرفت میں ہوں گے۔

وفاقی وزیر اطلاعات فواد چوہدری نے سماجی رابطوں کی ویب سائٹ ٹوئٹر حملے کی مذمت کرتے ہوئے کہا کہ پولیس کو ابصار عالم پر قاتلانہ حملے کی فوری تحقیقات کا کہہ دیا ہے، جوں ہی تفصیلات سامنے آئیں گی میڈیا کے سامنے رکھیں گے۔

مسلم لیگ (ن) کی نائب صدر مریم نواز نے بھی حملے کی پرزور مذمت کی اور ابصار عالم کی صحتیابی کی دعا کرتے ہوئے کہا کہ مخالف کی آوازوں کو چپ کرانا ایک کینسر ہے جس نے کئی سالوں سے اس ملک کو جکڑا ہوا ہے، ابصار عالم اس وحشیانہ جرم کا تازہ شکار ہیں۔

ماضی میں قاتلانہ حملے کا شکار ہونے والے معروف صحافی حامد میر نے کہا کہ یہ حملہ ناصرف قابل مذمت ہے بلکہ یہ اختلاف رائے رکھنے والوں کے لیے واضح پیغام ہے۔

معروف صحافی کاشف عباسی نے بھی ابصار عالم پر قاتلانہ حملے کی مذمت کی۔

سینئر صحافی طلعت حسین نے کہا کہ ابصار عالم کی حالت خطرے سے باہر ہے مگر زخم گہرا ہے، اس سازش و دہشت گردی کی جتنی مذمت کی جائے کم ہے۔

پاکستان میں کورونا وائرس کی تیسری لہر کے پھیلاؤ میں کوئی کمی آتی دکھائی نہیں دے رہی جبکہ دوسری جانب ویکسی نیشن کا عمل بھی جاری ہے۔

کووِڈ-19 کے اعداد و شمار کے لیے بنائی گئی سرکاری ویب سائٹ کے مطابق گزشتہ 24 گھنٹوں میں پاکستان میں مزید 5 ہزار 445 افراد وائرس سے متاثر ہوئے جبکہ 137 مریض انتقال کر گئے۔

وبا کی تشخیص کے لیے 19 اپریل کو مجموعی طور پر 68 ہزار ٹیسٹس کیے گئے، جن کے نتیجے میں کورونا کیسز مثبت آنے کی شرح 8 فیصد رہی جبکہ فعال کیسز 83 ہزار 298 تک پہنچ چکے ہیں۔

ملک میں مجموعی طور پر اب تک کورونا وائرس سے 7 لاکھ 66 ہزار 882 افراد متاثر ہو چکے ہیں جن میں سے 16 ہزار 453 زندگی کی بازی ہار گئے۔

علاوہ ازیں گزشتہ 24 گھنٹے کے دوران مزید 4 ہزار 586 مریض صحتیاب ہوئے اور مجموعی طور پر اب تک 6 لاکھ 67 ہزار 131 مریض صحتیاب ہوچکے ہیں۔

واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد سے وبا کے پھیلاؤ میں اتار چڑھاؤ جاری ہے اور اب تک بیماری کی 2 لہریں دیکھی جاچکی ہیں جبکہ تیسری لہر کا پھیلاؤ بدستور جاری ہے۔

کیسز میں حالیہ اضافے کے پیشِ نظر کئی علاقوں میں دوبارہ لاک ڈاؤن اور اسمارٹ لاک ڈاؤن لگایا گیا ہے جبکہ کاروباری سرگرمیوں کے اوقات کار بھی محدود کردیے گئے ہیں، اس کے علاوہ متاثرہ علاقوں میں تعلیمی ادارے بھی بند ہیں۔

پاکستان میں 20 اپریل کو چاروں صوبوں اور وفاقی اکائیوں میں کورونا وائرس کیسز اور اموات کی صورتحال درج ذیل ہے:

پنجاب
وبا کی تیسری لہر نے صوبہ پنجاب کو سب سے زیادہ متاثر کیا ہے اور گزشتہ 24 گھنٹوں کے دوران صوبے میں 3 ہزار 228 نئے کیسز رپورٹ ہوئے اور مزید 104 مریض دم توڑ گئے۔

پنجاب میں اب تک 2 لاکھ 73 ہزار 566 کورونا کیسز رپورٹ ہو چکے ہیں جس میں مرنے والوں کی تعداد 7 ہزار 561 تک پہنچ گئی ہے۔

خیبر پختونخوا
حالیہ لہر کے دوران پنجاب کے بعد صوبہ خیبرپختونخوا زیادہ متاثر ہوا ہے اور یہاں گزشتہ روز مزید 809 نئے کیسز سامنے آئے جبکہ 21 مریض دم توڑ گئے۔

خیبر پختونخوا میں اب تک رپورٹ ہونے والے کیسز کی مجموعی تعداد ایک لاکھ 7 ہزار 309 ہے جبکہ 2 ہزار 920 مریض انتقال کر چکے ہیں۔

سندھ
ملک کے دوسرے بڑے صوبے سندھ میں تیسری لہر کے دوران صورتحال نسبتاً بہتر تھی تاہم اب کیسز میں واضح اضافہ دیکھنے میں آرہا ہے اور یہاں گزشتہ 24 گھنٹوں میں 737 کیسز رپورٹ ہوئے جس کے بعد مجموعی کیسز کی تعداد 2 لاکھ 73 ہزار 466 ہو گئی ہے۔

صوبے میں کورونا وائرس سے مزید 3 مریضوں کا انتقال ہوا، مجموعی طور پر یہاں اب تک 4 ہزار 556 افراد لقمہ اجل بن چکے ہیں۔

اسلام آباد
اسلام آباد میں گزشتہ 24 گھنٹوں کے دوران مزید 530 نئے کیسز رپورٹ ہوئے جبکہ مزید 3 مریض اس وبا کے باعث زندگی کی بازی ہار گئے۔

وفاقی دارالحکومت میں اب تک مجموعی طور پر 70 ہزار 609 افراد وائرس کا شکار ہوچکے ہیں جن میں سے انتقال کر جانے والوں کی تعداد 645 ہے۔

آزاد کشمیر
آزاد کشمیر میں گزشتہ 24 گھنٹوں کے دوران مزید 72 افراد میں وائرس کی تصدیق ہوئی جبکہ 3 مریض دم توڑ گئے۔

آزاد کشمیر میں مجموعی طور پر 15 ہزار 741 افراد وائرس سے متاثر ہوئے جس میں سے 442 انتقال کر گئے۔

بلوچستان
بلوچستان میں کورونا وائرس نے مزید 60 افراد کو متاثر کیا اور 2 مریض انتقال کر گئے۔

یوں صوبے میں اب تک رپورٹ ہونے والے کیسز کی مجموعی تعداد 21 ہزار اور اموات کی تعداد 225 تک پہنچ گئی ہے۔

گلگت بلتستان
گلگت بلتستان میں ملک کے دیگر حصوں کی مناسبت سے بیماری کا پھیلاؤ کافی حد تک کنٹرول میں ہے اور گزشتہ روز 9 کیسز سامنے آئے، یہاں اب تک رپورٹ ہونے والے کیسز کی تعداد 5 ہزار 191 ہے۔

گلگت بلتستان میں 9 مارچ کے بعد کل ایک مریض انتقال کر گیا، یوں اموات کی تعداد 104 ہوگئی ہے۔

علمائے کرام کے وفد نے حکومت کی جانب سے کالعدم قرار دی گئی جماعت تحریک لبیک پاکستان (ٹی ایل پی) کے سربراہ سعد رضوی سے کوٹ لکھپت جیل میں ملاقات کی۔

گزشتہ دنوں سعد رضوی کو پولیس نے حراست میں لیا تھا جس کے بعد انہیں کوٹ لکھپت جیل منتقل کیا گیا تھا۔

صاحبزادہ حامد رضا کی قیادت میں علماء کے وفد نے سعد رضوی سے جیل میں ملاقات کی۔

ذرائع کے مطابق علماء کے وفد نے سعد رضوی سے احتجاج ختم کرنے کی درخواست کی جبکہ علمائے کرام کا کہنا تھاکہ انتشار اور جلاؤ گھیراؤ سے اپنے ہی ملک کا نقصان ہوا لہٰذا ملک میں امن و امان کی فضا کو قائم رکھا جائے۔

ذرائع نے بتایا کہ ‎علماء نے سعد رضوی کو ویڈیو پیغام جاری کرنے کا کہا جس میں مظاہرین سے احتجاج ختم کرنے کی درخواست کی جائے۔

علمائے کرام نے سعد رضوی سے اپیل کی کہ ‎لاہور کا دھرنا ختم کیا جائے۔

ذرائع بتاتے ہیں کہ سعدرضوی اور علماء کے وفد کے درمیان 5 گھنٹے سے مذاکرات جاری ہیں جبکہ مذاکراتی ٹیم نے افطاری بھی سعد رضوی کے ساتھ جیل میں کی۔

ذرائع کے مطابق علماء نے سعد رضوی کو معاملات افہام تفہیم سے حل کرنے پر قائل کرنے کی کوشش کی ۔

وفد میں صاحبزادہ حامد رضا، ثروت اعجازقادری، میاں جلیل شرقپوری، صاحبزادہ ابوالخیرزبیر اوردیگر شامل ہیں۔

وزیراعظم عمران خان نے کہا کہ فرانس کے سفیر کو واپس بھیجنے سے نقصان فرانس کا نہیں پاکستان کا ہو گا اور اگر ہم فرانس کے سفیر کو واپس بھیجنے کا مطلب یورپ سے تعلقات منقطع کرنا ہے۔

انہوں نے قوم سے براہ راست خطاب کرتے ہوئے کہا کہ یہ جو پچھلے ہفتے حالات ہوئے اس کی وجہ سے میں نے فیصلہ کیا کہ میں آپ کے سامنے آؤں اور خطاب کروں۔

ان کا کہنا تھا کہ ہمارا ملک دنیا واحد ملک ہے جو اسلام کے نام پر بنا اور اس کا نعرہ تھا ‘پاکستان کا مطلب کیا، لاالہ الااللہ، ہماے لوگ دین پر عمل کریں یا نہ کریں لیکن نبی اکرم ﷺ ہمارے لوگوں کے دلوں میں بستے ہیں، اس لیے ان کی شان میں دنیا میں کہیں بھی گستاخی ہوتی ہے، تو ہمیں تکلیف پہنچتی ہے۔

انہوں نے کہا کہ میں دنیا پھرا ہوں اور اس عمل سے صرف ہمیں ہی تکلیف نہیں پہنچتی بلکہ دنیا بھی جہاں کہیں بھی مسلمان بستا ہے تو اسے تکلیف ہوتی ہے۔

عمران خان نے کہا کہ پچھلے ہفتے جو افسوناک حالات ہوئے، ایک جماعت نے ایسے پیش کیا کہ جیسے انہیں اپنے نبیﷺ سے دیگر پاکستانیوں سے زیادہ پیار ہے۔

ان کا کہنا تھا کہ تحریک لبیک پاکستان کے لوگ جس مقصد کے تحت لوگوں کو گھروں سے نکال رہے ہیں، میں یقین دلاتا ہوں کہ وہی میرا اور میری حکومت کا مقصد ہے، ہم بھی ان کی طرح یہی چاہتے ہیں کہ دنیا میں کہیں بھی ہمارے نبی کی شان میں گستاخی نہ ہو، صرف ہمارا طریقہ کار مختلف ہے۔

انہوں نے کہا کہ تحریک لبیک پاکستان یہ کہہ رہی ہے کہ فرانس میں جو ہوا تو اس پر فرانس کے سفیر کو واپس بھیجا جائے، ان سے تمام رابطے ختم کر دیے جائیں، ہماری حکومت کا طریقہ کار مختلف ہے لیکن مقصد ایک ہی ہے، وہ بھی یہ چاہتے ہیں کہ کسی ملک میں کسی کی جرات نہ ہو کہ ان کی بے حرمتی کرے، ہمارا بھی وہی مقصد ہے۔

وزیر اعظم نے کہا کہ سن 1990 کے قریب سلمان رشدی نے ایک کتاب لکھی، اس کتاب میں اس نے ہمارے نبی اکرم ﷺ کی شان میں گستاخی کی، پاکستان میں عوام سڑکوں پر نکلی، یہاں امریکی سفارتخانے پر حملہ کیا اور لوگوں کی شہادتیں بھی ہوئیں، اس کے بعد آپ دیکھیں مغرب کے کسی نہ کسی ملک میں ان کی شان میں گستاخی کرتا ہے تو مسلمانوں کو تکلیف ہوتی ہے جس پر کبھی کبھار باہر ممالک میں ردعمل بھی آتا ہے، یہاں ہمارے ملک میں بھی مظاہرے ہوتے ہیں۔

ان کا کہنا تھا کہ کیا اس طرز عمل سے کوئی فرق پڑا، یہی سوچ ٹی ایل پی کررہی ہے، وہ کہہ رہے ہیں کہ اگر ہم ایکشن نہ لیں تو وہ سڑکوں پر آ جائیں گے۔

انہوں نے کہا کہ میرا سوال یہ ہے کہ کیا فرانس کے سفیر کو واپس بھیجنا اور ان سے تمام تعلقات ختم کردینے سے یہ سب رک جائے گا، کیا کوئی گارنٹی ہے کہ اس کے بعد کوئی گستاخی نہیں کرے گا۔

عمران خان نے کہا کہ میں مغرب کو جانتا ہوں اور میں آپ کا گارنٹی دیتا ہوں کہ اگر پاکستان یہ کرے گا تو اس کے بعد کسی اور یورپیئن ملک میں آزادی اظہار رائے کے نام پر یہی ہو گا۔

ان کا کہنا تھا کہ جب دیگر ممالک کو پتہ چلا گا کہ ہم نے ایسا کیا ہے تو بھی آزادی اظہار کے نام پر یہی کریں گے تو کیا ہم پھر اس کے سفیر کو بھی واپس بھیجیں گے۔

وزیر اعظم نے کہا کہ 50 مسلمان ملک ہیں، کہیں بھی اس طرح مظاہرے نہیں ہوئے، کوئی بھی اس طرح نہیں کہہ رہا اور وہ بھی یہ نہیں کہہ رہے کہ سفیر کو واپس بھیجو۔

انہوں نے کہا کہ سفیر واپس بھیجنے سے فرانس کو کوئی فرق نہیں پڑے گا لیکن پاکستان کو اس سے بہت فرق پڑے گا کیونکہ ہماری معیشت بہت مشکل سے اٹھ رہی ہے، بہت عرصے کے بعد پاکستان میں انڈسٹری اوپر جا رہی ہے، لوگوں کو نوکریاں مل رہی ہیں اور ملک کی دولت میں اضافہ ہو رہا ہے، ہمارا روپیہ مضبوط ہوتا جا رہا ہے لیکن اگر ہم فرانس کے سفیر کو واپس بھیج کر تعلقات توڑیں گے تو اس کا مطلب ہے کہ ہم یورپی یونین سے تعلقات توڑیں گے۔

ان کا کہنا تھا کہ ہماری آدھی ٹیسٹائل کی ایکسپورٹس یورپی یونین میں جاتی ہیں تو تعلقات ختم کرتے ہیں تو آدھی ٹیسٹائل ایکسپورٹ ختم ہو جائیں گی، اس کا مطلب بے روزگاری ہو گی اور فیکٹریاں بند ہو جائیں گی اور ہمارے روپے پر بھی دباؤ پڑے گا، روپیہ گرے گا، مہنگائی بڑھے، غربت بڑھے گی، تو نقصان ہمیں ہو گا، فرانس کو کوئی نقصان نہیں ہو گا۔

وزیر داخلہ شیخ رشید نے قومی اسمبلی میں پالیسی بیان دیتے ہوئے کہا کہ ختم نبوت کے معاملے پر ہم کالعدم تحریک لبیک سے پیچھے نہیں ہیں۔

اسپیکر قومی اسمبلی اسد قیصر کی زیر صدارت ہونے والے قومی اسمبلی اجلاس میں اظہار خیال کرتے ہوئے شیخ رشید کا کہنا تھا کہ میری طبیعت ٹھیک نہیں ہے، صبح 3 بجے میٹنگ ختم ہوئی، کچھ دیر بعد دوبارہ میٹنگ شروع ہو گی۔

وفاقی وزیر کا کہنا تھا کہ ختم نبوت ﷺ کے معاملے پر ہم تحریک لبیک سے پیچھے نہیں ہیں، وزیراعظم عمران خان بھی شام کو خطاب کریں گے۔

قبل ازیں اسلام آباد میں ایک تقریب سے خطاب کرتے ہوئے شیخ رشید کا کہنا تھا کہ بعض لوگ اسلام کو بطور ہتھیار استعمال کرنا چاہتے ہیں، لیکن ان شاء اللہ وزیراعظم عمران خان اسلام اور ملک دشمنوں کو شکست دیں گے۔

نیب نے سابق وزیر اعظم نواز شریف کی تمام جائیدادیں نیلام کرنے کا فیصلہ کیا ہے اس حوالے سے احتساب عدالت میں درخواست دائر کی جائے گی۔

نیب نے عدالت کی جانب سے اشتہاری قرار دیئے گئے سابق وزیر اعظم نواز شریف اور ان کے زیر کفالت افراد کے نام ملک میں موجود تمام جائیدادیں نیام کرنے کا فیصلہ کیا ہے۔ اس حوالے سے نیب کی جانب سے احتساب عدالت میں درخواست دائر کی جائے گی۔

نیب کی تیار کردہ رپورٹ میں کہا گیا ہے کہ ایس ای سی پی کے مطابق نواز شریف کے 4 کمپنیوں میں شیئرز ہیں، محمد بخش ٹیکسٹائل ملز میں نواز شریف کے 4 لاکھ 67 ہزار 950 ، حدیبیہ پیپر ملز میں 3 لاکھ 43 ہزار 425، حدیبیہ انجینئرنگ کمپنی میں 22 ہزار 213 اور اتفاق ٹیکسٹائل ملز میں 48 ہزار 606 شیئرز ہیں۔ نواز شریف کے مختلف نجی بینکس میں 3 غیر ملکی کرنسی سمیت 8 اکاؤنٹس ہیں، ان کے 5 بینک اکاؤنٹس میں 6 لاکھ 12 ہزار روپے موجود ہیں، غیر ملکی کرنسی والے اکاؤنٹس میں 566 یورو، 698 امریکی ڈالرز اور 498 برطانوی پاؤنڈز موجود ہیں۔
رپورٹ میں مزید کہا گیا ہے کہ ایل ڈی اے ، لاہور اور شیخو پورہ کے ایڈیشنل ڈپٹی کمشنرز ، مری کے اسسٹنٹ کمشنر اورگلیات ڈویلپمنٹ اتھارٹی نے بھی نواز شریف اور ان کے زیر کفالت افراد کے نام لاہور، شیخو پورہ ، مری اور ایبٹ آباد میں جائیدادوں کے حوالے سے رپورٹ دی ہیں، جس کے مطابق نواز شریف اور ان کے زیر کفالت افراد کے نام 1752 کنال سے زائد زرعی اراضی ہے۔ لاہور کے موضع مانک میں 936 کنال ،موضع بڈوکسانی میں 299 کنال، شیخو پورہ کے موضع منڈیالی میں 14 کنال اور موضع فیروزوطن میں 88 کنال اراضی ہے۔ اس کے علاوہ مری میں بنگلہ، چھانگلہ گلی ایبٹ آباد میں 15 کنال کا مکان اور اپر مال لاہور پر جائیداد بھی ہے۔

واضح رہے کہ نواز شریف کو احتساب عدالت نے توشہ خانہ ریفرنس میں اشتہاری قرار دے رکھا ہے۔

دوسری جانب نیب نے حمزہ شہباز شریف کی ضمانت کا فیصلہ سپریم کورٹ میں چیلنج کردیا۔

درخواست میں موقف اپنایا گیا ہے کہ لاہور ہائیکورٹ کا 24 فروری کا فیصلہ کالعدم قرار دیتے ہوئے ضمانت منسوخ کی جائے، فیصلے میں لاہور ہائیکورٹ نے حقائق کو نظر انداز کیا۔

نیب نے درخواست میں کہا کہ حمزہ شہباز شریف کا کیس ہارڈشپ کا نہیں بنتا، انہیں ضمانت دینے سے نیب انکوائری میں خلل پڑ رہا ہے، لاہور ہائیکورٹ کا فیصلہ قانون کی نظر میں برقرار نہیں رکھا جا سکتا۔
لاہور ہائیکورٹ نے مبینہ منی لانڈرنگ کیس میں حمزہ شہباز کو ضمانت دی تھی جس کے خلاف اب سپریم کورٹ میں اپیل دائر کی گئی ہے۔

لاہور ہائی کورٹ نے منی لانڈرنگ کیس میں قومی اسمبلی میں قائد حزب اختلاف شہباز شریف کی درخواست ضمانت پر ججز کے فیصلوں میں اختلاف کے بعد نیا تین رکنی فل بینچ تشکیل دے دیا ہے۔

درخواست ضمانت کے فیصلے میں دونوں ججوں کے فیصلوں میں اختلاف کے بعد چیف جسٹس لاہور ہائی کورٹ جسٹس محمد قاسم خان نے 3 رکنی خصوصی فل بینچ تشکیل دے دیا۔

لاہور ہائی کورٹ کے رجسٹرار آفس نے شہباز شریف کی درخواست ضمانت کو سماعت کے لیے مقرر کر دیا جس کے بعد خصوصی فل بینچ 21 اپریل کو شہباز شریف کی درخواست پر ازسرنو سماعت کرے گا۔

بینچ کی سربراہی جسٹس علی باقر نجفی کریں گے جبکہ جسٹس عالیہ نیلم اور جسٹس شہباز رضوی بھی اس کا حصہ ہوں گے۔

اس سے قبل 14 اپریل کو دو رکنی بنچ نے شہباز شریف کی درخواست منظور کرتے ہوئے اس کے خلاف الگ الگ فیصلہ دیا تھا۔

دو رکنی بنچ جسٹس سرفراز ڈوگر اور جسٹس اسجد جاوید گھرال پر مشتمل تھا جس میں جسٹس سردار سرفراز ڈوگر نے شہباز شریف کی ضمانت منظور کی تھی جبکہ جسٹس اسجد جاوید گھرال نے اسے مسترد کر دیا تھا۔

درخواست پر لاہور ہائی کورٹ کے ججز نے الگ الگ فیصلہ سناتے ہوئے ریفری جج کی نامزدگی کے لیے معاملہ چیف جسٹس کو بھیج دیا تھا۔

اپنے حکم میں جسٹس اسجد جاوید گورال نے سینئر جج پر ‘یکطرفہ طور پر’ ضمانت دینے کا تذکرہ کیا تھا۔

انہوں نے ریمارکس دیے کہ میرے لیے یہ بات حیران کن ہے کہ مذکورہ حکم کے ابتدائی پیراگراف میں اس کا تذکرہ کیا گیا ہے کہ درخواست گزار کو متفقہ طور پر ضمانت دینے کا اعلان کیا گیا تھا جو زمینی حقیقت کے منافی ہے۔

جسٹس اسجد جاوید گورال نے اپنے اختلافی نوٹ میں کہا کہ ‘حقیقت میں فریقین کو سننے کے بعد جب میرے برادر ساتھی نے درخواست کی اجازت دینے کے لیے میری رضامندی حاصل کرنے کی کوشش کی تو میں نے عدالت میں انکار کردیا اور چیمبر میں مشاورت کے وقت بھی میں نے فوراً ہی انکار کردیا تھا لیکن حیرت کی بات یہ ہے کہ میرے برادر ساتھی نے یکطرفہ طور پر اپنے فیصلے کا اعلان کیا اور اپنے نائب قاصد کے ذریعے درخواست گزار کی ضمانت منظور کی۔

جسٹس اسجد جاوید گورال نے ریماکس دیے کہ ‘یہ عدالتی تاریخ کی بہت بدقسمت اور نایاب مثال ہے جس میں ڈویژن بینچ کے سربراہ اور سینئر ممبر سے توقع نہیں کی جا سکتی تھی’۔

دوسری جانب جسٹس سردار محمد سرفراز ڈوگر نے اپنے حکم میں کہا کہ ‘ضمانت کی منظوری سے متعلق متفقہ حکم کا اعلان کیا گیا تھا’ لیکن جب درخواست گزار کی رہائی کا مختصر حکم جسٹس اسجد جاوید گورال کے دستخط کے لیے پیش کیا گیا تو انہوں نے اپنا اختلافی نوٹ پیش کردیا۔

جسٹس سردار محمد سرفراز ڈوگر نے ریمارکس دیے کہ ‘درخواست گزار عوامی نمائندہ ہیں اور قومی اسمبلی میں اپوزیشن لیڈر بھی ہیں جنہیں اپنے آئینی اور قانونی فرائض ادا کرنے ہوتے ہیں، وہ ماضی میں مجرم نہیں رہے اور موجودہ کیس میں پری ٹرائل کی سماعت سے گزر رہے ہیں۔

بعدازاں چیف جسٹس نے اس معاملے پر فل تین رکنی فل بینچ تشکیل دینے کا فیصلہ کیا۔

قومی اسمبلی میں قائد حزب اختلاف اور مسلم لیگ(ن) کے صدر شہباز شریف کی گزشتہ برس ستمبر میں لاہور ہائی کورٹ نے آمدن سے زائد اثاثہ جات اور منی لانڈرنگ کیس میں درخواست مسترد کی تھی جس کے بعد قومی احتساب بیورو (نیب) نے انہیں احاطہ عدالت سے ہی گرفتار کرلیا تھا اور وہ 7ماہ سے جیل میں ہیں۔

مذہبی رہنماؤں کی اپیل پر جماعت اسلامی اور جمعیت علمائے اسلام (ف) کی حمایت سے ہونے والی ملک گیر ہڑتال کے دوران ملک کے مختلف شہروں میں کاروباری مراکز جزوی طور پر بند اور ٹریفک معمول سے کم ہے۔

اس کے علاوہ مختلف علاقوں میں تاجر تنظیموں نے احتجاجی ریلیاں بھی نکالیں۔

خیال رہے کہ گزشتہ روز لاہور کے یتیم خانہ چوک پر پولیس اور کالعدم تحریک لبیک پاکستان (ٹی ایل پی) کارکنان کے مابین جھڑپوں کے نتیجے میں 3 افراد جاں بحق اور 15 پولیس اہلکاروں سمیت سیکڑوں زخمی ہوگئے تھے۔

حکومتی عہدیداروں نے نجی چیلننز پر آ کر بیانات دیے تھے کہ گڑ بڑ اس وقت شروع ہوئی جب ٹی ایل پی مظاہرین نے تھانے پر حملہ کر کے ڈی ایس پی اور اہلکاروں کو یرغمال بنایا جبکہ ٹی ایل پی ترجمان شفیق امینی کا کہنا تھا کہ پولیس اور دیگر سیکیورٹی فورسز نے لاہور میں ان کے مرکز پر صبح 8 بجے حملہ کیا جس کے نتیجے میں ‘متعدد کارکنان جاں بحق اور بڑی تعداد میں زخمی ہوگئے’۔

بعدازاں رات گئے تنظیمات اہلسنت کے ایک اجلاس کے بعد مفتی منیب الرحمٰن نے ملک گیر پہیہ جام ہڑتال اور تاجر برادری سے کاروبار بند رکھنے کی اپیل کی تھی۔

چنانچہ آج ملک کے مختلف شہروں کی صورتحال درج ذیل ہے:

کراچی
کراچی میں بھی مذہبی رہنماؤں کی اپیل پر پُر امن جزوی ہڑتال کی گئی اس دوران تمام بڑے کاروباری مراکز بند رہے جبکہ سڑکوں پر ٹریفک معمول سے کم رہا۔

اورنگی ٹاؤن میں گزشتہ رات پیش آنے والے واقعے کے سوا شہر میں مزید کوئی ناخوشگوار واقعہ پیش نہیں آیا۔

اس ضمن میں ایک پولیس عہدیدار نے بتایا کہ مفتی منیب کی کال کے بعد مذہبی جماعت کے کارکنان اور حامیوں نے اورنگی ٹاؤن قذافی چوک کے نزدیک جمع ہو کر سڑک بند کرنے کی کوشش کی تاہم پولیس اور رینجرز نے انہیں منتشر کردیا۔

آل کراچی تاجر اتحاد کے سربراہ عتیق میر نے بتایا کہ کاروبار اور شاپنگ سینٹرز جبری بند کروانے کے روایتی طریقے استعمال نہیں کیے گئے اور دکانداروں نے معاملے سے جذباتی وابستگی کی بنا پر خود اپنے کاروبار بند رکھے۔

انہوں نے بتایا کہ شہر کی تمام بڑی مارکیٹیں مثلاً جوڑیا بازار، طارق روڈ، بہادرآباد، کلفٹن، زمزمہ وغیرہ بند ہیں۔

راولپنڈی
مرکزی انجمن تاجران راولپنڈی کی جانب سے علما کرام کے ساتھ اظہار یکجہتی کے لیے شٹرڈاؤن ہڑتال کا اعلان کیا گیا اور متعدد بازارا بند رکھے گئے۔

ایک بیان میں مرکزی تنظیم تاجران پنجاب کے صدر شرجیل میر نے کہا کہ راولپنڈی کی تمام مارکیٹس تحفظ ختم نبوت کیلئے بند رہیں گی۔

چنانچہ راولپنڈی کے راجابازار، کلاتھ مارکیٹ، سٹی صدر روڈ، گندم منڈی، غلہ منڈی، جامع مسجد روڈ، مغل سرائے، بیرون مغل سرائے میں مکمل شٹرڈاؤن ہڑتال کی گئی۔

علاوہ ازیں اردو بازار، لیاقت مارکیٹ، لیاقت روڈ، تلواڑاں بازار، سبزی منڈی، کمرشل مارکیٹ، مری روڈ، رابی سینٹر، ملکہ آباد، گلف سینٹر، دوبئی پلازہ میں بھی کاروبار معطل رہا۔

لاہور
گزشتہ روز لاہور کا ایک علاقہ میدان جنگ بنا رہا اور آج یہاں بھی علمائے کرام کی اپیل پر بڑے کاروباری مراکز بند رہے۔

شہر کے بازاروں کی بات کی جائے تو گلبرگ مین مارکیٹ، اوریگا سینٹر، صدیق ٹریڈ سینٹر، مال روڈ، بیدن روڈ، منٹگمری مارکیٹ، میکلوڈ روڈ، انارکلی بازار، اکبری منڈی، اردو بازار، سرکلر روڈ، نیلا گنبد سائیکل مارکیٹ، فیروز پور روڈ پر لٹن روڈ، اچھرہ، فرنیچر مارکیٹس، ماربل مارکیٹس، سینٹری مارکیٹس، شاہ عالم مارکیٹ، چونگی امرسدھو بازار سمیت دیگر مارکیٹس بند ہیں۔

علاوہ ازیں شہر بھر میں جیولرز کی مارکیٹس، شاہدرہ بورڈ کی مارکیٹس، برانڈتھ روڈ، شہر کی واحد میڈیسن مارکیٹ لوہاری گیٹ بھی آج بند ہے۔

تاجر اتحاد، انجمن تاجران کے گروپس نے مشترکہ طور پر ہڑتال کی کال دی تھی جس کی حمایت کا اعلان مرکزی انجمن تاجران پنجاب نے بھی کیا تھا۔

کوئٹہ
ادھر کوئٹہ میں بھی مذہبی رہنماؤں کی جانب سے پہیہ جام اور شٹرڈاؤن ہڑتال کی کال پر شہر کے کاروباری مراکز جزوی طور پر بند ہیں۔

تاجر یونین بلوچستان نے مذہبی جماعتوں کی ہڑتال کی حمایت کی اور انجمن تاجران بلوچستان کی حمایت سے شہر کے کاروباری مراکز جزوی طور پر بند ہیں جبکہ ٹریفک معمول کے مطابق رواں دواں ہے۔

تاہم شہر میں کسی بھی ناخوشگوار واقعے سے نمٹنے کے لیے پولیس کی اضافی نفری تعینات کی گئی ہے۔

پشاور
ملک بھر میں مذہبی رہنماؤں کی جانب سے شٹر ڈاؤن ہڑتال کی کال پر پشاور کے تاجر بھی نکل آئے اور قصہ خوانی کے تاجروں نے مارکیٹ بند کردی۔

تاہم مظاہرین نے تھانہ خان رزق کے سامنے احتجاج بھی کیا اور وفاقی وزیر داخلہ شیخ رشید کو ان کے عہدے سے ہٹانے کا مطالبہ کیا۔

خیبرپختونخوا کے دارالحکومت پشاور کے مختلف علاقوں میں مارکیٹس اور بازار جزوی طور پر بند ہیں۔

خیبر پختونخوا (کے پی) پولیس کے سابق انسپکٹر جنرل ناصردرانی کورونا وائرس سے جاں بحق ہوگئے۔

سابق آئی جی کے پی کےایک ماہ سے میو اسپتال میں زیرعلاج تھے اور گزشتہ ایک ہفتے سے وینٹی لیٹر پر تھے۔

وزیراعلیٰ پنجاب سردار عثمان بزدار اورمعاون خصوصی اطلاعات پنجاب ڈاکٹر فردوس عاشق اعوان نےان کی رحلت پر گہرے دکھ کااظہار کیاہے۔

ایم ایس میو اسپتال لاہورکے مطابق ناصردرانی ایک ماہ سے اسپتال میں زیرِعلاج تھے،ایک ہفتہ پہلےانہیں وینٹی لیٹر پرلےجانا پڑا،آج وہ اپنے خالق حقیقی سے جا ملے۔

ناصردرانی پنجاب پولیس ریفارمزکمیشن کے سربراہ بھی رہے۔ وزیراعلیٰ عثمان بزدار اور معاون خصوصی اطلاعات پنجاب ڈاکٹر فردوس عاشق اعوان کا کہنا ہے کہ ناصر درانی محب وطن پاکستانی اور ایماندار پولیس افسر تھے، ان کی خدمات ہمیشہ یاد رکھی جائیں گی۔

قومی اسمبلی اجلاس کے دوران اپوزیشن کی جانب سے کالعدم ٹی ایل پی معاملے پر شدید تنقید کی گئی جب کہ وزیر مذہبی امور نور الحق قادری نے کہا کہ مذہبی جماعت کے ساتھ مذاکرات کے 2 دور ہوچکے ہیں۔

قومی اسمبلی کے اجلاس کے دوران لاہور واقعے پر وفاقی وزیرداخلہ شیخ رشید نے کہا کہ میری طبیعت ٹھیک نہیں ہے، ختم نبوت ﷺ کے معاملے پر ہم ٹی ایل پی سے پیچھے نہیں ہیں، وزیر مذہبی امور نورالحق قادری تفصیلی بیان دیں گے۔

کیا ریاست مدینہ میں ایسے ہوتا ہے؟
شیخ رشید کے بیان پر پیپلز پارٹی کے راجا پرویز اشرف نے کہا کہ حکومتی نااہلی کی وجہ سے بھائی بھائی کے ساتھ لڑرہاہے،ہم سب غلامان رسول ﷺ ہیں، حکومت نفرتیں پھیلارہی ہے، حکومت کا کام ہے کہ وہ دلوں کو جوڑے لیکن یہاں سیاست کی جارہی ہے، وزرا اپنی ذمہ داری ایک دوسرے پر ڈال رہے ہیں، کیاریاست مدینہ میں ایسےہوتاہے؟، وزیر داخلہ شیخ رشید ایوان کی توہین کرکے چلے گئے ہیں، آپ پتہ کرائیں کہ اس وقت وزیر داخلہ کے گھر کے سامنے کیا ہورہا ہے، حکومت تحریک لبیک سے کیا گیا معاہدہ ایوان میں کیوں نہیں لائی، وزیر اعظم نے قوم سے خطاب کرنا ہے تو قومی اسمبلی میں آکر تقریر کریں۔

حکومت کی پالیسی مذاکرات کی ہے
حکومت کی جانب سے وفاقی وزیر پیر نور الحق قادری نے کہا کہ نبی کریم ﷺ کی محبت میں پوری قوم ایک ہے، گزشتہ دنوں میں جو کچھ ہوا ہمیں بھی اس پر دکھ ہے، ٹی ایل پی کے ساتھ کئے گئے معاہدے کی رو میں ہم معاملے کو پارلیمان میں لانے کے پابند تھے، پچھلے 4 ماہ ہم نے اس معاملے پر بہت کوششیں کیں ، آخری مذاکرات جو ہوئے تھے اس میں معاہدہ پارلیمنٹ میں پیش کرنا تھا، ابھی بات حتمی نہیں ہوئی تھی کہ مارچ کی تیاریاں شروع کردی گئیں ، ویڈیو سامنے آئی اور راستے بند کرنے کی اطلاع ملی تو حکومت نے راستے کھلے رکھنے کے لئے ایکشن لیا۔

نور الحق قادری نے مزید کہا کہ حکومت کی پالیسی مذاکرات کو جاری رکھنے کی ہے، مذہبی جماعت کے ساتھ مذاکرات کے 2 دور ہوچکے ہیں ، تیسرے مذاکرات آج تراویح کے بعد ہوں گے، اسلام کی جتنی وکالت عمران خان نے عالمی سطح پر کی اس سے پہلے کسی نے نہیں کی، عمران خان ہمیشہ ہمیشہ کیلئے توہین رسالت کا راستہ روکیں گے۔

دھرنے دینے والا اقتدار میں آیا تو گولیاں برسا دیں
جے یو آئی (ف) کے مفتی عبدالشکور نے کہا کہ کیا عمران خان اور ان کے حامیوں نے پولیس پر حملہ نہیں کیا تھا، کیا ان پر پی ٹی وی پر حملہ کرتے ہوئے گولیاں چلائی گئی تھیں ، جلاؤ گھیراؤ اور دھرنے دینے والا خود اقتدار میں آیا تو گولیاں برسا دیں، تحریک لبیک کے کارکنوں پر ظلم ہوئے، ہم ان کے ساتھ ہیں، حکومت فیصلہ کرلے وہ فرانس کے ساتھ ہے یا رسول اللہﷺ کی ناموس کے ساتھ ہے، وزیر داخلہ کو اس ایوان کا سامنا کرنا چاہئے۔

خان کے ساتھ ہو یا ایمان کے ساتھ ؟
پی ٹی آئی کے رکن قومی اسمبلی علی محمد خان نے کہا کہ اس ایوان کی تاریخ گواہ ہے کہ اس نے ہمیشہ ختم نبوت پر پہرہ دیا، علی محمد خان کی تقریر کے دوران اپوزیشن نے نعرے لگانے شروع کردیئے، خان کے ساتھ ہو یا ایمان کے ساتھ ہو۔ بعد ازاں اسپیکر اسد قیصر نے قومی اسمبلی کا اجلاس جمعرات کی دوپہر 2 بجے تک ملتوی کردیا۔