Category تازہ ترین

جیکب آباد: دوداپور تھانے کی حدود میں جلبانی اور کٹوہر برادری کے درمیان تصادم ہوا اور فائرنگ کے نتیجے میں 8 افراد قتل ہوگئے۔

پولیس کے مطابق نواحی گاؤں پنھو بھٹی میں جلبانی برادری کے مسلح افراد نے دیرینہ دشمنی کی بنا پر فائرنگ کی، جس کے نتیجے میں دو بچوں اور ایک خاتون سمیت 6 افراد جاں بحق جبکہ تین رخمی ہوگئے ہیں۔

کٹوہر برادری کے افراد نے قمبر شہداد کوٹ ضلع میں بدلہ لینے کے لیے فائرنگ کرکے جلبانی برادری کے دو مزید افراد قتل کردیئے۔ پولیس نے موقع پر پہنچ کر لاشیں تحویل میں لیکر تعلقہ ہسپتال منتقل کردیں۔

بلوچستان میں بین الصوبائی پبلک ٹرانسپورٹ پرپابندی عائد کردی گئی۔

پنجاب، سندھ اور خیبرپختون خوا کے بعد بلوچستان میں بھی بین الصوبائی پبلک ٹرانسپورٹ پر پابندی عائد کردی گئی ہے، اس حوالے سے محکمہ داخلہ بلوچستان نے بیان جاری کردیا ہے۔

صوبائی محکمہ داخلہ نے اپنے جاری کردہ بیان میں کہا ہے کہ بلوچستان میں آج سے بین الصوبائی پبلک ٹرانسپورٹ پر پابندی عائد ہے، ہفتے میں دو دن ہفتہ اور اتوار کو دیگرصوبوں کیلئے پبلک ٹرانسپورٹ نہیں چلے گی، تاہم ادویات اور گڈز ٹرانسپورٹ اور ایمرجنسی سروسز اس پابندی سے مستثنی ہیں۔

محکمہ داخلہ نے بتایا ہے کہ بین الصوبائی پبلک ٹرانسپورٹ پر پابندی 25 اپریل تک عائد رہے گی، اور پبلک ٹرانسپورٹ پر پابندی کورونا کے پھیلاوٴ کی روک تھام کیلئے عائد کی گئی ہے۔

راولپنڈی: آئی ایس پی آر کے مطابق پاک فوج کے 37 بریگیڈیئرز کو میجر جنرل کے عہدے پر ترقی دیدی گئی۔

پاک فوج کے شعبہ تعلقات عامہ (آئی ایس پی آر) کے مطابق جی ایچ کیو میں بریگیڈیئر سے میجر جنرل پروموشن بورڈ کا اجلاس ہوا جس کی صدارت چیف آف آرمی اسٹاف جنرل قمر جاوید باجوہ نے کی۔ اجلاس میں مجموعی طور پر 37 بریگیڈیئرز کی میجر جنرل کے عہدے پر ترقی کی منظوری دی گئی جس میں سے 12 میجر جنرل کے عہدے پر ترقی پانے والے ڈاکٹرز ہیں۔

آئی ایس پی آر کے مطابق جن 37 بریگیڈیئرز کو میجر جنرل کے عہدے پر ترقی دی گئی ان میں بریگیڈیئر شہریار پرویز بٹ، بریگیڈیئر عمر مقبول، بریگیڈیئر محمد عاصم خان، بریگیڈیئر غلام محمد، بریگیڈیئر محمد ندیم اشرف، عامر اشفاق کیانی، محمد امتنان بابر،عمر احمد شاہ، محمد شاہد صدیق، محمد فرخان یوسف،منیر الدین، سلمان معین، محمد نعیم اختر، محمد شہاب اسلم، ندیم یوسف، فرخ شہزاد راؤ اور خرم نثار سمیت دیگر شامل ہیں۔

اسلام آباد: دفتر خارجہ کے ترجمان زاہد حفیظ چوہدری نے کہا ہے کہ پاکستان پڑوسی ملک بھارت کے ساتھ اچھے تعلقات اور بامعنی مذاکرات کا خواہاں ہے لیکن مسئلہ کشمیر پر پاکستان کا مؤقف تبدیل نہیں ہوا۔

ترجمان دفتر خارجہ زاہد حفیظ چوہدری نے ہفتہ وار بریفنگ دیتے ہوئے کہا کہ بھارت کی جانب سے قیدیوں کی رہائی میں ہمیشہ تاخیر کی جاتی ہے اور پاکستان کا مؤقف ہے کہ انسانی ہمدردی کی بنیاد پر رہائی جلد از جلد ہونی چاہیے۔

ان کا کہنا تھا کہ بھارت سے تنازعات کا حل بات چیت کے ذریعے ضروری ہے، ہم سمجھتے ہیں عالمی برادری دونوں ممالک کے مابین موجود تنازع کو مدنظر رکھتے ہوئے بات چیت کرے اور اس سلسلے میں امریکا سمیت کسی بھی ملک کی ثالثی کو سراہتے ہیں۔

انہوں نے کہا کہ پاکستان چاہتا ہے کہ بھارت کے ساتھ بات چیت سے معاملات حل ہوں، ہم بھارت سے اچھے تعلقات کے خواہاں ہیں اور مذاکرات سے بھاگ نہیں رہے، پاکستان نے بھارت کے ساتھ مذاکرات سے کبھی انکار نہیں کیا۔

زاہد حفیظ چوہدری نے مزید کہا کہ مسئلہ کشمیر پر پاکستان کا مؤقف تبدیل نہیں ہوا اور ہم بھارت سے کشمیر سمیت تمام مسائل بات چیت سے حل کرنا چاہتے ہیں۔

انہوں نے کہا کہ ممالک کے درمیان جنگوں کے دوران بھی بات چیت ہوتی ہے، بات چیت سے ہی مسائل کا حل نکالا جا سکتا ہے اور ہم بھارت سے بات چیت کرنے کے لیے تیار ہیں لیکن بات چیت بامعنی اور بنیادی تنازعات پر ہونی چاہیے۔

ایک اور سوال کے جواب میں انہوں نے کہا کہ پاکستان دیکھ رہا ہے کہ آیا بھارت سے بات چیت ہونی چاہیے یا نہیں، امن اور مسائل کے حل کے لیے بات چیت ضروری ہے اور وزیراعظم عمران خان کہہ چکے ہیں کہ اگر بھارت ایک قدم بڑھائے تو پاکستان 2 قدم بڑھائے گا۔

ترجمان دفتر خارجہ نے مزید کہا کہ موزوں حالات کے لیے بھارت کو 5 اگست 2019 کے اقدامات واپس لینا ہوں گے اور بھارت سے جب بھی بات ہو گی تو اس میں بنیادی نقطہ مقبوضہ جموں کشمیر ہی ہو گا کیونکہ مسئلہ کشمیر کے حل کے بغیر خطے میں امن ممکن نہیں ہے۔

انہوں نے کہا کہ پاکستان اور بھارت میں ہائی کمشنرز کی تعیناتیوں کے حوالے سے کوئی پیش رفت نہیں ہوئی اور ہائی کمشنرز کی واپسی فی الحال خارج از امکان ہے۔

انہوں نے بھارتی وزیر اعظم نریندر مودی کے دورہ پاکستان کے حوالے سے جاری قیاس آرائیوں کو بھی مسترد کرتے ہوئے کہا کہ اس کے بارے میں اطلاعات مکمل معلومات پر مبنی نہیں ہیں۔

ان کا کہنا تھا کہ 2017 سے سارک کانفرنس نہیں ہو سکی، پاکستان دوسال سے سارک کانفرس کے لیے کوشاں ہے لیکن موجودہ صورتحال میں اس کا انعقاد ممکن نظر نہیں آتا۔

انہوں نے کہا کہ امریکا میں پاکستانی سفیر اسد مجید بہتر کام کر رہے ہیں لہٰذا انہیں بدلنے کے حوالے سے کوئی اطلاعات نہیں ہیں۔

ایک سوال پر ترجمان کا کہنا تھا کہ اسپیکر قومی اسمبلی کے دورہ افغانستان میں افغان اسپیکر کے ساتھ معاملات طے شدہ تھے، ہمیں یہی بتایا گیا کہ کابل ائیرپورٹ سیکیورٹی وجوہات پر بند تھا اور سیکیورٹی خدشات کے باعث پاکستانی پارلیمانی وفد کا طیارہ لینڈ نہ کر سکا۔

زاہد حفیظ چوہدری نے مزید کہا کہ متحدہ عرب امارات کی جانب سے پاکستانی ویزوں پر پابندی کے حوالے سے ان سے رابطے میں ہیں اور امید ہے کہ جلد یہ معاملہ مثبت انداز میں حل ہو جائے گا۔

ترجمان دفتر خارجہ نے قابض بھارتی فورسز کی جانب سے مقبوضہ کشمیر میں جاری غیرقانونی کارروائیوں پر تشویش کا اظہار کرتے ہوئے انہیں انسانی حقوق کی مکمل خلاف ورزی قرار دیا۔

انہوں نے کہا کہ بھارت کی جانب سے مقبوضہ کشمیر میں ماورائے عدالت قتل کا سلسلہ گزشتہ ہفتے بھی جاری رہا اور پلوامہ اور شوپیاں میں مزید 10 کشمیریوں کو شہید کردیا گیا۔

وزیراعظم عمران خان نے کہا ہے جب کسی نظام میں برائیاں، بدعنوانی اور رکاوٹیں آجائیں کہ جب تک پیسے نہیں دیں گے کام نہیں ہوگا تو تبدیلی لانے میں وقت لگتا ہے۔

لاہور ڈیولپمنٹ اتھارٹی (ایل ڈی اے) سٹی کے منصوبے نیا پاکستان اپارٹمنٹس کا سنگِ بنیاد رکھنے کی تقریب سے خطاب کرتے ہوئے ان کا کہنا تھا کہ یہ مشکل بھی ہے کیوں کہ پرانا ‘اسٹیس کو’ تبدیلی نہیں آنے دیتا، اگر وہ رکاوٹیں نہیں ڈالے گا تو پیسہ کیسے بنائے گا۔

وزیراعظم نے کہا کہ میں نے اپنی آنکھوں کے سامنے نظام خراب ہوتے ہوئے دیکھا اور یہ نظام بن گیا تھا کہ رشوت دو تو کام ہوگا اور جب اسے تبدیل کرتے ہیں تو اس کے لیے بڑا وژن، عزم و ہمت اور ارادہ چاہیے ہوتا ہے لیکن ہوجاتا ہے۔

انہوں نے کہا کہ اگر پاکستان کو 21ویں صدی کی مشکلات پر قابو پانا ہے تو ہمیں اپنے آپ کو تبدیل کرنا ہے۔

وزیراعظم نے کہا کہ اگر ہم نے کاروبار میں آسانی اور کاروبار کرنے کی لاگت کو کم کرنا ہے تو آٹو میشن لانی پڑے گی جس کے خلاف نظام میں بہت مزاحمت ہے، ہر ادارے میں کوشش کی جاتی ہے کہ آٹو میشن نہ آئے کیوں اس سے رشوت خودبخود ختم ہوجاتی ہے۔

وزیراعظم نے کہا کہ ساری دنیا میں لوگوں کے پاس نقد رقم نہیں ہوتی اس کے لیے بینک فنانس فراہم کرتے ہیں اور لوگ کرایہ دینے کے بجائے بینکوں کو قسطیں فراہم کرکے اپنا گھر خرید سکتے ہیں۔

منصوبے کا سنگ بنیاد رکھنے کی تقریب میں گورنر، وزیراعلیٰ پنجاب بھی موجود تھے—تصویر: دفتر وزیراعظم ٹوئٹر
انہوں نے کہا کہ میں وزیراعلیٰ اور گورنر پنجاب، صوبائی و وفاقی وزرا کو اس منصوبے پر خراج تحسین پیش کرتا ہوں، کیوں کہ آج جہاں ہم پہنچے ہیں اس کے پیچھے کافی کام ہوا ہے۔

ان کا کہنا تھا کہ بینک اس بات کے عادی نہیں کہ لوگوں کو گھر بنانے کے لیے قرضہ دیں کیوں کہ یہاں اس کا تصور ہی نہیں تھا۔

وزیراعظم نے کہا کہ گزشتہ ایک ماہ کے دوران پاکستان کی تاریخ میں سب سے زیادہ سیمنٹ فروخت ہوا ہے، جس کا مطلب یہ ہے کہ تعمیراتی صنعت آگے بڑھنا شروع ہوگئی ہے جس کے ساتھ 30 مزید صنعتیں منسلک ہیں۔

ان کا کہنا تھا کہ بینکنگ کے شعبے میں بھی قیادت چاہیے، بینک کے ہر سربراہ کے پاس وژن نہیں ہوتا وہ یہ دیکھتا ہے کہ مجھے کس طرح منافع کمانا ہے لیکن غیر معمولی بینکرز سمجھتے ہیں کہ معیشت کو جتنا فروغ ملے گا اس سے بینکنگ سمیت سب کا فائدہ ہوگا۔

انہوں نے کہا کہ جب لوگ کہتے ہیں کہ نیا پاکستان، مدینہ کی ریاست کہاں ہے تو میں سب کو بتانا چاہتا ہوں کہ نبی ﷺ کی قائم کردہ مدینہ کی ریاست 2 اصولوں پر بنیاد کرتی تھی، ایک قانون کی بالادستی کہ کوئی قانون سے بالاتر نہیں جس پر دنیا کی سب سے بڑی تہذیب کھڑی ہوئی تھی۔

وزیراعظم نے کہا کہ یاد رکھیں کہ شروع میں ہی مدینہ میں دودھ کی نہریں نہیں بہہ رہی تھیں، مشکل وقت تھا، بھوک تھی، مسلمانوں کو غربت، خطرے کا سامنا تھا لیکن قانون کی بالادستی اور انصاف پر بنیاد رکھی گئی وہ ایک تہذیب کے اوپر آنے کی بنیاد بنی۔

انہوں نے کہا کہ جس تہذیب نے بھی ترقی کی ہے اس میں قانون کی بالادستی دیگر تہذیبوں کے مقابلے میں زیادہ ہوگی جو سب سے زیادہ خوشحال ممالک ہیں وہاں سب سے زیادہ چیز یہ ہے کہ کوئی قانون سے بالاتر نہیں، کوئی طبقہ اشرافیہ نہیں۔

وزیراعظم نے کہا کہ پاکستان میں آج اس کے لیے مکمل جنگ چل رہی ہے اور بڑے بڑے مافیاز کو پہلی مرتبہ قانون کے نیچے لانے کی کوشش ہے، سیاسی مافیاز ہیں جو قانون کی مزاحمت کررہے ہیں اور یہ پاکستان کا اصل میں اہم مرحلہ ہے اور جیسے جیسے ہم قانون کی بالادستی قائم کریں گے معاشرہ آزاد ہوجائے گا۔

وزیراعظم نے کہا کہ ریاست مدینہ کی بنیاد کا دوسرا اصول فلاحی ریاست تھا، مسلمان غریب تھے لیکن ایک ریاست نے ذمہ داری لی تھی اپنے کمزور طبقے کی، انسانیت کا نظام لے کر آئے تھے۔

انہوں نے کہا کہ ہم بھی وہی کوشش کررہے ہیں، اس قوم کے لیے صحت کارڈ ایک بہت بڑی نعمت ہے، صحت کی انشورنس، یونیورسل کوریج خیبر پختونخوا میں ہر گھرانے کے پاس ہے، کسی ہسپتال میں جا کر 10 لاکھ روپے تک کا علاج کرواسکتے ہیں جبکہ ترقی یافتہ ممالک میں بھی یونیورسل ہیلتھ کوریج نہیں ہے۔

انہوں نے کہا کہ یو این ڈی پی کی رپورٹ کے مطابق گزشتہ 6 سال میں ملک میں جس صوبے میں سب سے زیادہ انسانی ترقی ہوئی اور غربت کم ہوئی ہے وہ خیبرپختونخوا ہے۔

ان کا کہنا تھا اسی وجہ سے پاکستان تحریک انصاف کو انتخابات میں ووٹ ملا اور اب تو رپورٹ آگئی ہے 2013 کے بعد حکومتی پالیسیز کی وجہ سے غربت بھی کم ہوئی اور پاکستان میں سب سے زیادہ اس صوبے میں انسانوں پر سرمایہ کاری ہوئی۔

انہوں نے کہا کہ خیبر پختونخوا سب سے پیچھے تھا، دہشت گردی تھی، تباہی تھی، امیر افراد نقل مکانی کررہے تھے لیکن اس صوبے کی صورتحال آج یہ ہے۔

وفاقی تحقیقاتی ادارے (ایف آئی اے) کی درخواست پر جہانگیر ترین، ان کے بیٹے علی ترین اور اہلیہ کے بینک اکاؤنٹس منجمد کردیے گئے۔

ایف آئی اے لاہور کے ذرائع نے بتایا کہ علی ترین کے 21، جہانگیر ترین کے 14 اور ان کی اہلیہ کا ایک بینک اکاونٹ منجمد کیا گیا۔

مذکورہ بینک اکاؤنٹس ایف آئی اے لاہور کی درخواست پر منجمد کیے گئے جن میں کروڑوں روپے کی رقم موجود ہے۔

ذرائع کا کہنا تھا کہ 9 سرکاری اور نجی بینکوں نے جہانگیر ترین اور ان کے اہلِ خانہ کے مجموعی طور پر 36 اکاؤنٹس منجمد کیے۔

دوسری جانب مالیاتی فراڈ اور منی لانڈرنگ کے کیسز کے سلسلے میں آج جہانگیر ترین اور ان کے بیٹے علی ترین ریکارڈ کے ہمراہ ایف آئی اے لاہور کے دفتر میں پیش ہوئے۔

ایف آئی اے کی تحقیقاتی ٹیم نے مالیاتی اسکینڈل پر درج کیے جانے والے مقدمات کی تفتیش کے لیے علی ترین اور ان کے والد جہانگیر ترین کو آج طلب کیا تھا۔

جہانگیر اور علی ترین تفتیش کے سلسلے میں تقریباً ڈیڑھ گھنٹے ایف آئی اے لاہور کے دفتر میں رہے اور انہوں نے اپنا بیان ریکارڈ کرا دیا۔

اس دوران تحقیقاتی ٹیم نے ان سے منی لانڈرنگ اور فراڈ ٹرانزیکشن کے حوالے سے سوالات کیے اور ان کے جوابات ریکارڈ کا حصہ بنادیے گئے۔

لاہور: تحریک انصاف کے رہنما اور چینی اسکینڈل میں نامزد ملزم جہانگیرترین نے قومی و صوبائی اسمبلی کے اراکین کو عشایئے کی دعوت دے دی۔

جہانگیر ترین سے ہمدری رکھنے والے اراکین قومی و صوبائی اسمبلی نے ان کا بھرپور طریقے سے ساتھ دینے کے عزم کا اظہار کیا ہے۔

ذرائع کے مطابق جہانگیر ترین کے حامی اراکین نے کہا ہے کہ ان کے ساتھ ہرطرح کی صورتحال میں کھڑے ہونے کے لئے تیار ہیں اور انصاف کے حصول کے لئے آواز بلند کریں گے۔

ذرائع نے بتایا ہے کہ جہانگیرترین کی جانب سے دیئے گئے ناشتے کی دعوت میں بہت کم وقت کے باوجود بھی 3 ارکان قومی اور 15 ارکان صوبائی اسمبلی شریک ہوئے تھے، جب کہ جہانگیر ترین نے آج رات ایک عشائیہ بھی دے رکھا ہے جس میں ارکان کو دعوت دی گئی ہے۔ ذرائع کا کہنا ہے کہ جہانگیرترین کے آج کے عشائیہ میں 30 سے 35 ارکان اسمبلی اور دیگر پارٹی رہنماؤں کی شرکت کا امکان ہے، جن کو وہ اپنے کیس کے حوالے سے حقائق سے آگاہ کریں گے۔

واضح رہے کہ تحریک انصاف کے سینئر رہنما جہانگیر ترین اپنی ہی حکومت میں خود پر لگے چینی کے حوالے سے الزامات پر نالاں ہیں، اور اپنے بیانات میں کہتے آرہے ہیں کہ میں تحریک انصاف سے انصاف مانگ رہا ہوں۔

لاہور ہائی کورٹ نے مسلم لیگ (ن) کے رہنما جاوید لطیف کیخلاف بغاوت پر اکسانے کا مقدمہ خارج کرنے کی درخواست نمٹادی۔

چیف جسٹس لاہور ہائی کورٹ نے ن لیگی ایم این اے جاوید لطیف کی بغاوت پر اکسانے کا مقدمہ خارج کرنے کی درخواست پر سماعت کی۔ لیگی رہنما جاوید لطیف عدالت میں پیش ہوئے۔

جاوید لطیف نے اپنے خلاف مقدمے کو چیلنج کرتے ہوئے موقف اختیار کیا کہ پنجاب پولیس کی جانب سے بے بنیاد الزامات کے تحت مقدمہ درج کیا گیا ہے، حکومت کی جانب سے سیاسی انتقام کا نشانہ بنایا جا رہا ہے، مقدمے میں ماتحت عدالت سے عبوری ضمانت حاصل کررکھی ہے، درخواست گزار ایک سیاسی کارکن ہے، عوامی نمائندگی کے مینڈیٹ کے تحت قانون کی پاسداری پر یقین رکھتا ہے، میرے خلاف درج مقدمے کو کالعدم قرار دینے کا حکم دیا جائے۔

چیف جسٹس ہائی کورٹ نے کہا کہ کالے کوٹ والے نے پاکستان بنانے میں کردار ادا کیا تھا، جو شخص ملک کے خلاف بات کرے میں اس کو ریلیف نہیں دوں گا، پہلے اس ملک کے خلاف بات کرنا پھر اس ملک کی عدالتوں سے ریلیف لینے آجانا، ایسے نہیں ہوگا۔

چیف جسٹس قاسم خان نے ریمارکس دیے کہ ہماری حب الوطنی ہے یا حب الشخصی ہے، پاکستان کی اسمبلیوں میں حلف لینے والے اپنے گریبان میں جھانکیں، جاوید لطیف چھوڑ دیں پاکستان ،کسی اور ملک کی شہریت لے لیں، پاکستان کھپے کا نعرہ نہ لگانے والوں کو لوگ چیونٹیوں کی طرح مسل دیں گے۔

جاوید لطیف کے وکیل نے درخواست واپس لے لی تو عدالت نے درخواست واپس لینے کی بنیاد پر نمٹادی۔

وفاقی وزیر داخلہ شیخ رشید احمد کا کہنا ہے کہ وزیر اعظم عمران خان کے لیے اپوزیشن کوئی چیلنج نہیں اور ان کے خلاف کوئی سازش کامیاب نہیں ہوگی۔

کراچی میں میڈیا سے گفتگو کرتے ہوئے شیخ رشید احمد نے کہا کہ ‘جہانگیر ترین کا مسئلہ بہت حساس ہے، انہیں پی ٹی آئی کی حکومت میں انصاف ملے گا اور عدالتیں آزاد ہیں، میں عمران خان کے خلاف کوئی سازش کامیاب ہوتی نہیں دیکھ رہا، وہ نہ صرف اپنے 5 سال پورے کریں گے بلکہ اگلے عام انتخابات میں بھی ڈٹ کر مقابلہ کریں گے’۔

پاکستان پیپلز پارٹی (پی پی پی) اور مسلم لیگ (ن) کے درمیان شدید اختلافات سے متعلق انہوں نے کہا کہ ‘پیپلز پارٹی اس وقت مثبت سوچ رکھنے والی پارٹی ہے، مسلم لیگ (ن) خود اپنے لیے بحران پیدا کر رہی ہے، اس نے عظیم افواج کے خلاف جو زبان استعمال کی اسے اس کی قیمت ادا کرنا پڑے گی، پیپلز پارٹی سمجھدار جماعت ہے اور آصف زرداری تاش چھاتی سے لگا کر کھیل رہے ہیں’۔

انہوں نے کہا کہ ‘پی ڈی ایم ختم ہو چکی ہے، مولانا فضل الرحمٰن سے کہا تھا کہ بچوں کے ہاتھوں میں نہ کھیلیں آپ خراب ہوں گے، ان کی سیاست کو بہت نقصان پہنچا ہے’۔

ان کا کہنا تھا کہ ‘عمران خان کے لیے اپوزیشن کوئی چیلنج نہیں ہے صرف مہنگائی چیلنج ہے، اپوزیشن ٹھس ہوچکی ہے، عمران خان کا مشن ہے کہ وہ مہنگائی کنٹرول کریں گے اور وہ اس معاملے کو خود دیکھ رہے ہیں’۔

انہوں نے کہا کہ جس دن نواز شریف پاکستان آنے کی خواہش ظاہر کریں گے انہیں 24 گھنٹے میں سفری دستاویز جاری کریں گے۔

شیخ رشید نے وفاقی تحقیقاتی ادارے (ایف آئی اے) کے حوالے سے کہا کہ ‘رمضان میں ہم پورا پیکج بنا رہے ہیں، وہ لوگ جو ایف آئی اے میں سالہا سال سے بیٹھے ہوئے ہیں انہیں اگلے 15 روز میں تبدیل کریں گے’۔

انہوں نے کہا کہ ‘ایف آئی اے میں تنخواہوں کی وجہ سے بڑی کشش ہے، ہر افسر یہیں آنا چاہتا ہے، ایف آئی اے میں تبادلے کے لیے جتنا دباؤ مجھ پر ہے شاید کسی وزیر پر نہیں رہا ہوگا’۔

ایک سوال پر ان کا کہنا تھا کہ ‘پاکستان کی خارجہ پالیسی بہتر ہے، ہم افغانستان میں امن کے لیے تاریخی کردار ادا کر رہے ہیں جبکہ ہمارے امریکا اور چین سے اچھے تعلقات ہیں’۔

اسلام آباد: سپریم کورٹ کے سینئر جج جسٹس قاضی فائز عیسیٰ نے کہا ہے کہ محافظین آئین نے ہی آئین کے تحفظ کی قسم توڑی۔

اسلام آباد ہائی کورٹ بار ایسوسی ایشن کے زیر اہتمام اسلام میں بنیادی حقوق اور آئین کے موضوع پر سیمینار سے خطاب کرتے ہوئے سپریم کورٹ کے جج جسٹس قاضی فائز عیسیٰ نے کہا کہ قائدِاعظم نے کہا کہ پاکستان کا آئین جمہوری ہوگا اور اسلامی قوانین پر مبنی ہوگا، قائد اعظم نے فرمایا کہ اسلام میں سب برابر ہیں اور عدل وانصاف کا بول بالا ہونا چاہیے، آئین ہر شہری عیسائی، ہندو و دیگر مذاہب کو بھی تحفظ دیتا ہے، ہم نے آئین نہیں سیکھا ،ہم نے تو اس کا اردو میں ترجمہ بھی نہیں کیا، بلکہ ہم نے اس کے ساتھ وہی سلوک کیا جو قرآن کریم کے ساتھ کرتے ہیں، لوگوں کی ہوس نے آئین کو ٹھکرایا اور محافظین آئین نے جو قسم اٹھائی وہ انہوں نے توڑی۔

جسٹس قاضی فائز عیسیٰ نے کہا کہ مجھے نہیں لگتا کہ کسی بھی اسکول میں آئین پاکستان پڑھایا جاتا ہے، امریکی اسکولوں میں آئین سکھایا جاتا تھا تاکہ کم عمری سے ہی طلباء کو آئین کا معلوم ہو، آئین پڑھنا بہت ضروری ہے کیونکہ پڑھ کر ہی ہمیں معلوم ہوگا کہ پاکستان کیسے وجود میں آیا، ہمارے پاس اس وقت نصف پاکستان ہے کیونکہ آدھا حصہ ہم سے جدا ہو چکا ہے۔

جسٹس قاضی فائز عیسیٰ کا کہنا تھا کہ اگر ہم آئین شکنی کریں گے تو یہ غداری کے زمرے میں آئے گا، جس کی اگلے جہاں میں بھی سزا ملے گی، اگر آئین کو ہٹا دیں تو وفاق بھی ٹوٹ جاتا ہے اور پاکستانیت بھی ختم ہو جاتی ہے۔ انہوں نے مزید کہا کہ ہمارے آئین کی بنیاد اس بات پر رکھی گئی کہ پورے عالم پر اختیار اللّہ کا ہے، اسلام نے مزدوروں کے تحفظ پر خصوصی زور دیا، اسلام میں ہے کہ مزدور کا پسینہ خشک ہونے سے قبل اس کو اس کا معاوضہ دیا جائے، ماحولیاتی اصول کی جو آج کل باتیں ہوتی ہیں 14 سو سال پہلے ہو چکیں ہیں، ہم ناصرف آئین بلکہ اللہ کی نازل کردہ قرآن کی تعلیمات کی بھی خلاف ورزی کرتے ہیں۔

جسٹس قاضی فائز عیسیٰ نے کہا کہ کسی نے سپریم کورٹ کو لکھا کہ ججز کے اثاثہ جات کی تفصیلات دی جائیں، میں نے اور میری بیوی نے اپنے اثاثہ جات کی تفصیلات دیں جو آج بھی سپریم کورٹ کی ویب سائٹ پر موجود ہے، ایک صاحب آتے ہیں آئین ادھر کر دیتے ہیں دوسرے آتے ہیں آئین دوسری طرف کر دیتے ہیں، ہم یہ کہتے ہیں آپ یہ نہیں کر سکتے یہ آئین سے غداری ہے، ایک صاحب نے کہا آئین کوئی صحیفہ نہیں ہے ، بالکل یہ صحیفہ ہے، کہتے ہیں اسلامی نظام آئے گا، اسلامی نظام آچکا ہے، قائداعظم اور اس کے ساتھ اسلامی نظام لائے تھے۔