Category تازہ ترین

کورونا وائرس کے باعث سندھ بھر میں درگاہیں اور مزارات بند کرنے کا نوٹی فکیشن جاری کردیا گیا۔

وزیر اوقاف سندھ سہیل انور سیال کی صدارت میں محکمہ اوقاف کا اجلاس ہوا جس میں درگاہیں اور مزارات بند کرنے کا فیصلہ کیا گیا۔

چیف ایڈمنسٹریٹر اوقاف سندھ کی جانب سے جاری نوٹیفکیشن کے مطابق تمام مزارات،درگاہیں کل 28 مارچ سے 6 اپریل تک بند رہیں گی۔

خیال رہے کہ 4 روز قبل ہی محکمہ اوقاف سندھ نے صوبے میں تمام مزارات کو دوبارہ کھولنے کا نوٹیفکیشن جاری کیا تھا تاہم کورونا کیسز میں اضافے کے پیش نظر دوبارہ درگاہیں اور مزارات بند کرنے کا نوٹی فکیشن جاری کردیا گیا۔

ملک میں کورونا سے مزید 67 افراد انتقال کرگئے اور 4460سے زائد کیسز بھی رپورٹ ہوئے ہیں جو 9 ماہ بعد ایک روز میں رپورٹ ہونے والے سب سے زیادہ کیسز ہیں۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 44279 ٹیسٹ کیے گئے جن میں سے 4468 افراد میں کورونا وائرس کی تصدیق ہوئی جب کہ وائرس سے 67 ہلاکتیں ہوئیں۔

پاکستان میں گزشتہ 24 گھنٹوں کے دوران رپورٹ ہونے والے کیسز گزشتہ سال کورونا کی پہلی لہر میں 22 جون کے بعد سامنے آنے والے سب سے زیادہ کیسز ہیں۔

گزشتہ سال 22جون کو کورونا کی پہلی لہر کے دوران ایک دن میں کورونا کے 4471کیسز رپورٹ ہوئے تھے جب کہ گزشتہ 24 گھنٹوں میں 4468 کیسز سامنے آئے جو 9 ماہ کے بعد ایک روز میں سامنے آنے والے سب سے زیادہ کیسز ہیں۔

سرکاری پورٹل کے مطابق ملک گزشتہ 24 گھنٹوں کے دوران کورونا کے مثبت کیسز کی شرح 10 فیصد رہی۔

سرکاری پورٹل کے مطابق ملک میں کورونا سے ہلاکتوں کی تعداد 14158 ہوگئی اور مجموعی کیسز 6 لاکھ 49824 تک جاپہنچے ہیں جب کہ فعال کیسز کی تعداد 42384 ہے۔

اس کے علاوہ 24 گھنٹوں کے دوران ملک بھر میں 2137 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 593282 ہوگئی ہے۔

سرکاری پورٹل کے مطابق سندھ میں کورونا کے مریضوں کی مجموعی تعداد 264355 ہوگئی ہے جب کہ 4487 افراد اب تک انتقال کرچکے ہیں۔

پنجاب میں کورونا کے کل مریضوں کی تعداد 210095 ہے اور 6190 افراد وائرس میں مبتلا ہوکر جان سے جاچکے ہیں جب کہ بلوچستان میں مریضوں کی کل تعداد 19453 اور ہلاکتیں 205 ہوچکی ہیں۔

خیبرپختونخوا میں کورونا کے مریضوں کی تعداد 83630 اور 2274 ہلاکتیں ہوچکی ہیں جب کہ آزاد کشمیر میں 12245 افراد وائرس میں مبتلا ہوچکے ہیں اور 342 افراد انتقال کرگئے۔

اس کے علاوہ گلگت بلتستان میں اب تک کورونا کے مریضوں کی تعداد 4990 اور 103 افراد انتقال کرچکے ہیں۔

پورٹل کے مطابق وفاقی دارالحکومت اسلام آباد میں کورونا کے مریضوں کی مجموعی تعداد 55056 ہے اور اب تک 557 مریض انتقال کرچکے ہیں۔

راولپنڈی: پاکستان نے بیلسٹک میزائل شاہین ون اے کا کامیاب تجربہ کیا۔

پاک فوج کے شعبہ تعلقات عامہ (آئی ایس پی آر) کے مطابق پاکستان نے بیلسٹک میزائل شاہین ون اے کا کامیاب تجربہ کرلیا، ڈائریکٹر جنرل اسٹریٹجک پلانز ڈویژن لیفٹیننٹ جنرل ندیم ذکی منج اور چیئرمین نیسکام ڈاکٹر رضا ثمر نے میزائل تجربے کا مشاہدہ کیا، جب کہ میزائل تجربے کے موقع پر کمانڈر آرمی اسٹریٹجک فورسز کمانڈ لیفٹیننٹ جنرل محمد علی اور اسٹریٹجک اداروں کے سائنس دان اور انجینئرز بھی موجود تھے ۔

آئی ایس پی آر کا کہنا ہے کہ شاہین ون اے میزائل 900 کلو میٹر تک ہدف کو نشانہ بنانے کی صلاحیت کاحامل ہے، اور ٹیسٹ کا مقصد جدید ترین نیویگیشن سسٹم سمیت ہتھیاروں کے نظام کے مختلف ڈیزائن اور تکنیکی پیرامیٹرز کی جانچ تھی۔ کامیاب تجربے پرصدرمملکت عارف علوی، وزیر اعظم عمران خان اور سروسز چیف جنرل قمرجاوید باجوہ نے سائنسدانوں اور انجینئرز کو مبارکباد دی ہے۔

ملک میں پیدا ہونے والے پیٹرولیم بحران پر وزیراعظم عمران خان نے معاون خصوصی برائے پیٹرولیم ڈویژن ندیم بابر کو عہدے سے استعفیٰ دینے کی ہدایت کر دی۔

اسلام آباد میں پریس کانفرنس کرتے ہوئے اسد عمر کا کہنا تھا دیکھنا ہے کیا پیٹرولیم مصنوعات کی ذخیرہ اندوزی کی گئی اور کس نے کی؟

ان کا کہنا تھا وزیراعظم نے معاون خصوصی برائے پیٹرولیم ڈویژن ندیم بابر کو عہدے سے استعفیٰ دینے کی ہدایت دیتے ہوئے وزارت پیٹرولیم کو تمام انتظامی فیصلے کر کے رپورٹ کرنے کا کہا ہے۔

انہوں نے مزید کہا کہ قانون سازی کے اندر ابہام پیدا ہوا کہ اوگرا اور پیٹرولیم ڈویژن کی کیا ذمہ داری ہے، پیٹرولیم ڈویژن اوگرا پر ذمہ داری ڈالتا تھا، ہمیں اس ابہام کو ختم کرنا ہے۔

اسد عمر کا کہنا تھا ملک میں معیشت کو نقصان پہنچانے والوں کے لیے بہت ہی کم سزائیں ہیں، یہ کمزوریاں ہوئیں، ثبوت کے ساتھ کورٹ کے اندرکیسز کیے جا سکیں گے۔

وفاقی وزیر کا کہنا تھا جو مافیا عوام کا پیسہ نکال رہا ہے وزیراعظم ان کو بالکل نہیں جانے دیں گے، وزیراعظم کی طرف سے مافیا کو پیغام ہے کہ ان کا وقت ختم ہوگیا ہے۔

وزیر تعلیم شفقت محمود کا اس موقع پر کہنا تھا کہ پیٹرولیم بحران کے معاملے پر سیکرٹری پیٹرولیم کو بھی عہدہ چھوڑنےکی ہدایت کی گئی ہے۔

شفقت محمود کا کہنا تھا کہ ندیم بابر اور سیکرٹری پٹرولیم انکوائری پر اثر انداز نہ ہوں اس لیے دونوں کو عہدہ چھوڑنےکا کہا گیا ہے۔

اسلام آباد: پیپلزپارٹی کے سینیئر رہنما یوسف رضا گیلانی سینیٹ میں اپوزیشن لیڈر مقرر ہوگئے۔

پیپلزپارٹی کے سینیئر رہنما یوسف رضا گیلانی نے سینیٹ میں اپوزیشن لیڈرکی درخواست جمع کرائی۔ شیری رحمان، روبینہ خالد سمیت دیگر رہنما بھی یوسف رضا گیلانی کے ہمراہ تھے۔

یوسف گیلانی نے 30 ممبرز کے دستخط کے ساتھ درخواست جمع کروائی جن میں پیپلزپارٹی کے 21 ، اے این پی کے 2، جماعت اسلامی کا ایک، فاٹا کے 2، دلاور خان کے آزاد گروپ کے 4 ممبران شامل تھے۔
یوسف رضا گیلانی کو سینیٹ میں قائد حزب اختلاف مقرر کردیا گیا۔ سینیٹ سیکریٹریٹ نے ان کے عہدے کا نوٹی فیکیشن جاری کردیا۔

واضح رہے کہ سینیٹ میں اپوزیشن لیڈرکی تعیناتی کے معاملے پر پی ڈی ایم جماعتوں میں اختلافات برقرار ہیں جب کہ کچھ روزقبل مریم نوازنے مولانا فضل الرحمن کے ہمراہ پریس کانفرنس کرتے ہوئےکہا تھا کہ اصولی فیصلہ ہوچکا کہ سینیٹ میں اپوزیشن لیڈر (ن) لیگ کا ہوگا۔

لاہور: پاکستان مسلم لیگ ن نے ایوان بالا میں پیپلزپارٹی کے یوسف گیلانی کو اپوزیشن لیڈر بنانے کو پی ڈی ایم کے اغراض و مقاصد سے انحراف قرار دے دیا۔

احسن اقبال نے کہا کہ سب جانتے ہیں کہ کن کے کہنے پر بلوچستان عوامی پارٹی (باپ) کے سینیٹرز ووٹ دیتے ہیں۔

مریم نواز کی جانب سے جاتی امرا میں پی ڈی ایم رہنماؤں کو ناشتے کی دعوت دی گئی جس میں قمر زمان کائرہ، مولانا عبدالغفور حیدری سمیت اپوزیشن کی دیگر قیادت شریک ہوئی۔
ناشتے کے بعد قمر زمان کائرہ میڈیا سے گفتگو کئے بغیر روانہ ہوئے جبکہ میزبان مسلم لیگ ن کے رہنماؤں نے اتحادی اپوزیشن جماعتوں پیپلزپارٹی اور اے این پی کیخلاف شکایات کے انبار لگاتے ہوئے کہا کہ باپ پارٹی کے سینیٹرز کی حمایت حاصل کر کے پیپلزپارٹی نے اتحاد کو نقصان پہنچایا۔

احسن اقبال نے پیپلز پارٹی پر طنز کے نشتر بھی چلائے اور کہا پیپلزپارٹی نواز شریف کو اپنی مجبوری بیان کرتی تو اپوزیشن لیڈر کا عہدہ انہیں دے دیتے۔

پاکستان مسلم لیگ ن کے مرکزی جنرل سیکرٹری احسن اقبال اور صوبائی صدر رانا ثناء اللہ نے جاتی امرا کے باہر میڈیا سے گفتگو کرتے ہوئے کہا کہ ہمیں اچھا اور مناسب نہیں لگا کہ اس چیئرمین سینیٹ جس کیخلاف عدالت سے رجوع کر رکھا ہے، اسی کے پاس اپوزیشن لیڈر کے عہدے کے لیے درخواست لے کر جائیں۔

انہوں نے پی پی پی پر تنقید کرتے ہوئے کہا کہ دوسری جماعتوں کے سینیٹرز کو ساتھ ملا کر اکثریت حاصل کرنا پی ڈی ایم کے مقاصد سے انحراف ہے، اگر پیپلزپارٹی کے لیے اپوزیشن لیڈر کا عہدہ اتنا ہی ناگزیر تھا تو ہم سے بات کرتے، ہم انہیں یہ عہدہ دے دیتے لیکن پیپلزپارٹی کے اس اقدام سے اپوزیشن کے اتحاد کو دھچکہ پہنچا ہے، ہمیں افسوس ہے کہ اے این پی نے بھی گیلانی صاحب کے لئے ووٹ دیا جس کو ہم پی ڈی ایم کی سطح پر اٹھائیں گے۔

احسن اقبال کا کہنا تھا کہ پی ڈی ایم ہومیوپیتھک نہیں بلکہ بہت مہلک ہے، پی ڈی ایم کے اغراض و مقاصد سے بے وفائی کرنے والا بہت زیادہ نقصان میں رہے گا اور بہت بڑی قیمت چکانی پڑے گی، پی پی کے اس فیصلے سے ‏پی ڈی ایم کے مقاصد، جدوجہد اور اتحاد کو دھچکا لگا، ‏اے این پی نے بھی پی ڈی ایم کے فیصلے کے خلاف یکطرفہ فیصلہ کیا ہے، ‏مخصوص سینیٹرز جن کی تائید سے مطلوبہ نمبرلیا گیا، سب جانتے ہیں وہ کس کے کہنے پر ووٹ دیتے ہیں، ‏اگر پی پی پی کے لوگ نواز شریف کو مجبوری بیان کرتے تو نوازشریف خوشی سے اپوزیشن لیڈر کا عہدہ دے دیتے۔

بیجنگ: چین کے صدر شی جن پنگ نے اپنے خط میں وزیراعظم عمران خان کی کورونا سے جلد صحت یابی کی دعا اور نیک تمناؤں کا اظہار کیا ہے۔

پاکستان میں چین کے سفیر نونگ رونگ نے کہا ہے کہ صدر شی جن پنگ نے پاکستان کے وزیراعظم عمران خان کو خط کر ان کی خیریت دریافت کی اور نیک تمناؤں کا اظہار کیا ہے۔

سماجی رابطے کی ویب سائٹ ٹوئٹر پر اپنی ٹوئٹ میں چینی سفیر نونگ رونگ نے لکھا کہ صدر شی جن پنگ نے وزیراعظم عمران خان کو لکھے گئے خط میں کورونا سے جلد صحت یابی کی دعا کرتے ہوئے نیک تمناؤں کا اظہار کیا ہے۔

نونگ رونگ کے مطابق صدر شی جن پنگ نے اپنے خط میں پاکستان کے ساتھ مل کر کورونا وبا کے خلاف جنگ کے عزم کا اظہار کرتے ہوئے اس حوالے سے دو طرفہ تعلقات میں استحکام اور مضبوطی کی ضرورت پر زور دیا ہے۔

چین اور پاکستان نے کورونا وبا کے خلاف جنگ میں دوطرفہ تعاون کا عزم کیا تھا اور چین کے کورونا ویکسین کا ٹرائل پاکستان میں بھی ہوا تھا جب کہ چین نے کورونا ویکسین کی ایک کھیپ تحفتاً پاکستان بھیجی تھی۔

واضح رہے کہ وزیراعظم عمران خان کا 20 جنوری کو کورونا ٹیسٹ مثبت آیا تھا اور وہ اپنے گھر بنی گالہ میں قرنطینہ میں ہیں تاہم اس دوران میڈیا نمائندوں سے ایس او پیز کے تحت میٹنگ بھی کی ہے۔

لاہور: کوٹ لکھپت جیل میں میاں شہبازشریف کو کورونا بچاؤ ویکسین لگا دی گئی.۔ ایم ایس جناح اسپتال سمیت دیگر ڈاکٹرز کوٹ لکھپت جیل پہنچے اورویکسین لگائی۔

شہباز شریف کو پہلی کورونا ویکسین لگائی گئی ہے جب کہ دوسری ویکسین 2 سے 3 ہفتے کے دوران لگائی جائے گی۔

دریں اثناقومی اسمبلی میں قائد حزب اختلاف اور مسلم لیگ (ن) کے زیر حراست صدر شہباز شریف نے منی لانڈرنگ کیس میں ضمانت کے لیے لاہور ہائیکورٹ سے رجوع کرلیا۔

شہباز شریف نے ایڈووکیٹ امجد پرویز کے توسط سے عدالت میں درخواست کی جس میں قومی احتساب بیورو (نیب) کو فریق بنایا گیا ہے۔

درخواست میں شہباز شریف نے کہا کہ میں نے 1972 میں بطور تاجر کاروبار کا آغاز کیا اور ایگری کلچر، شوگر اور ٹیکسٹائل انڈسٹری میں جدید ٹیکنالوجی کو متعارف کرایا۔

انہوں نے کہا کہ 19800 میں لوہا پگھلانے والی ایسوسی ایشن پاکستان اسٹیل میلٹرز ایسوسی ایشن کا صدر بنا اور 1984 میں لاہور چیمبر کا سینئر نائب صدر منتخب ہوا۔

شہباز شریف نے کہا کہ سماج کی بھلائی کے لیے انہوں نے 1988 میں سیاست میں قدم رکھا جس کے بعد 3 بار وزیراعلیٰ منتخب ہوا اور اب قومی اسمبلی میں اپوزیشن لیڈر ہوں.

صدر مسلم لیگ (ن) نے مؤقف اختیار کیا کہ نیب نے آمدن سے زائد اثاثوں کا کیس بنایا ہے، نیب نے اہلخانہ کو بدنیتی سے بے نامی دار قرار دیا ہے۔

ان کا کہنا تھا کہ موجودہ حکومت کے سیاسی اثر و رسوخ کی وجہ سے نیب نے انکوائری شروع کی ہے۔

انہوں نے کہا کہ میں نے بطور وزیراعلیٰ اپنے خاندان کی شوگر ملز کا خیال نہیں رکھا، عوام کی خدمت میں کوئی کسر نہیں چھوڑی، پاکستان کے عوام کو اپنا گھر دینے کے خواب کی تکمیل کے لیے آشیانہ ہاؤسنگ اسکیم کا اجراء کیا۔

شہباز شریف نے کہا کہ نیب ایک متنازع ادارہ بن چکا ہے، سپریم کورٹ بھی اپنی رائے دے چکی ہے۔

انہوں نے بتایا کہ انہیں5 اکتوبر 2018 کو آشیانہ کیس میں گرفتار کیا گیا، آشیانہ کیس میں گرفتاری کے دوران ہی منی لانڈرنگ کی انکوائری شروع کی گئی تھی۔

درخواست میں مؤقف اختیار کیا گیا کہ منی لانڈرنگ کا الزام عمومی نوعیت کا ہے، شہباز شریف کی موجودگی کے بغیر وعدہ معاف گواہوں کے بیانات قلمبند کرنے کی کوئی اہمیت نہیں۔

درخواست گزار کا کہنا تھا کہ 4 وعدہ معاف گواہوں میں سے کسی ایک گواہ نے بھی شہباز شریف کو اپنے بیان میں نامزد نہیں کیا۔

شہباز شریف نے کہا کہ 70 سال کا بوڑھا آدمی ہوں، کمر درد اور دیگر متعدد بیماریوں میں مبتلا ہوں اور 28 ستمبر 2020 سے گرفتار ہوں، ریفرنس میں 110 گواہ ہیں اور ٹرائل ابھی ابتدائی سطح پر ہے۔

شہباز شریف نے کہا کہ احتساب عدالت سپریم کورٹ میں تسلیم کرچکی ہے کہ اس کیس کو مکمل کرنے میں 1 سے 12 ماہ لگیں گے۔

ان کا کہنا تھا کہ آئین کے آرٹیکل 4، 9، 13 اور 14 ہر شہری کے حقوق کی ضمانت دیتے ہیں، منی لانڈرنگ کیس میں حمزہ شہباز سمیت دیگر شریک ملزمان کو بھی ضمانت پر رہا کیا جاچکا ہے۔

درخواست میں انہوں نے استدعا کی کہ ٹرائل باقاعدگی سے جوائن کرتا رہوں گا، عدالت ضمانت پر رہائی کا حکم دے۔

وفاقی وزیر برائے منصوبہ بندی اسد عمر نے اعلان کیا ہے کہ ملک میں 50 سال سے زائد عمر کے افراد کے لیے کووِڈ 19 کی ویکسینیشن کے لیے رجسٹریشن کا آغاز 30 مارچ سے ہوگا۔

مائیکرو بلاگنگ ویب سائٹ ٹوئٹر پر ایک پیغام میں انہوں نے کہا کہ 60 سال سے زائد عمر کے شہریوں کی رجسٹریشن کا سلسلہ پہلے سے ہی جاری ہے۔

ساتھ ہی انہوں نے اس بات پر زور دیا کہ 30 مارچ سے 50 سال سے زائد عمر کے افراد ویکسین لگوانے کے لیے اپنا اندراج ضرور کروائیں۔

خیال رہے کہ پاکستان میں وائرس کی تیسری لہر میں روز بروز شدت آتی جارہی ہے جبکہ بزرگ افراد کی ویکسینیشن کا سلسلہ بھی جاری ہے۔

حفاظتی ٹیکے لگوانے کے خواہشمند شہری 1166 پر اپنا قومی شناختی کارڈ نمبر میسج کے ذریعے بھیج کر اپنی رجسٹریشن کرواسکتے ہیں، جس کے جواب میں انہیں ویکسینیشن کی تاریخ اور مقام سے آگاہ کردیا جائے گا۔

ملک میں وائرس کی تیسری لہر شدت اختیار کرچکی ہے اور خود وزیراعظم بھی اس کا شکار ہونے کے بعد قرنطینہ میں منتقل ہوگئے۔

واضح رہے کہ یکم فروری کو چین سے کورونا وائرس سے بچاؤ کی ویکسین کی 5 لاکھ خوراکوں پر مشتمل پہلی کھیپ پاکستان پہنچی تھی جس کے بعد 3 فروری سے کورونا کے خلاف صفِ اول میں کام کرنے والے ہیلتھ ورکرز کی ویکسینیشن کا آغاز ہوا تھا۔

ملک میں فرنٹ لائن ہیلتھ ورکرز کے بعد 60 سال اور اس سے زائد عمر کے افراد کو کووڈ 19 ویکسین لگانے کے لیے رجسٹریشن کا آغاز 15 فروری سے ہوا تھا تاہم کچھ تاخیر کے بعد ان کی ویکسینیشن کا عمل 10 مارچ سے شروع ہوا تھا۔

ملک میں ویکسینیشن کی ضرورت پوری کرنے کے لیے حکومت نے چین سے ویکسین کی خوراکیں خریدی ہیں، اسد عمر نے بتایا تھا کہ چین سے 10 لاکھ خوراکیں سائنو فارم اور 6 لاکھ کین سائنو کی خریدی ہیں جو مارچ کا مہینہ ختم ہونے سے قبل مل جائیں گی۔

ان کا کہنا تھا کہ اس کے ساتھ ہی ہمیں کوویکس سے بھی مفت ویکیسن ملے گی جس نے پاکستان کی 20 فیصد آبادی کے لیے ویکسین کی فراہمی کا وعدہ کیا ہے۔

پاکستان کو کوویکس پروگرام کے تحت آکسفورڈ ایسٹرازینیکا ویکیسن کی 28 لاکھ خوراکیں بھی ملیں گی جس کی 60 لاکھ خوراکیں مارچ تک ملنے کا امکان تھا تاہم اب تک نہیں مل سکیں۔

ملک بھر میں کورونا وائرس سے متاثرہ مریضوں کی تعداد 6 لاکھ 45 ہزار 3568 ہو گئی ہے جبکہ مرنے والوں کی تعداد بھی 14 ہزار 91 تک پہنچ گئی اور اب تک مجموعی طور پر 5 لاکھ 91 ہزار 145 مریض صحتیاب ہوچکے ہیں۔

سوات ائیرپورٹ کو 17 سال بعد کھول دیا گیا۔

قومی ائیرلائن پی آئی اے کی پہلی پرواز اسلام آباد سے سوات کے سیدو شریف ائیرپورٹ پہنچی جس میں وزیراعلیٰ کے پی محمود خان، وفاقی وزیر ہوا بازی غلام سرور اور وفاقی وزیر مواصلات مراد سعید سمیت دیگر اعلیٰ حکام سوار تھے۔

پی آئی اے کی پہلی پرواز پی کے 640 اسلام آباد سے سوات پہنچی ہے اور پی آئی اے کے اے ٹی آر طیارے میں 48 افراد سوار تھے۔

انتظامیہ کا کہناہےکہ سوات ائیرپورٹ پر رن وے کی بحالی اور دیگر آپریشنل کام پہلے ہی مکمل کرلیے گئے تھے، اسلام آباد سے ہفتے میں دو مرتبہ سوات کے لیے پرواز چلائی جائے گی جو اسی روز واپس بھی آئے گی، ابتدائی طور پر سوات ائیرپورٹ پر ڈومیسٹک فلائٹس چلائی جائیں گے اور مستقبل میں یہاں بین الاقوامی فلائٹس چلانے کی بھی کوشش کی جائے گی۔

واضح رہےکہ سوات ائیرپورٹ پر فلائٹ آپریشن امن و امان کی خراب صورتحال کے باعث 2004 میں بند کردیا گیا تھا۔