Category تازہ ترین

راولپنڈی: پاکستان اور بھارت بریگیڈ کمانڈرز کی سطح کی فلیگ میٹنگ راولا کوٹ پونچھ کراسنگ پوائنٹ پر ہوئی۔

پاک فوج کے شعبہ تعلقات عامہ (آئی ایس پی آر) کے مطابق پاکستان اور بھارت کے مابین بریگیڈ کمانڈرز کی سطح کی فلیگ میٹنگ ہوئی، میٹنگ راولا کوٹ پْونچھ کراسنگ پوائنٹ پرہوئی، جس مقصد ڈی جی ایم اوز کے مابین ایل ا و سی پر تعین شدہ اتفاق رائے کے نکات پر عملدرآمد کے لائحہ عمل کاجائزہ لینا تھا۔

پاک بھارت تعلقات ہر دور میں اتار چڑھاؤ کا شکار رہے ہیں، لیکن بھارت کی جانب سے سرحدی علاقوں میں ہمیشہ چھیڑچھاڑ کی گئی اور بلااشتعال فائرنگ کے واقعات ہونے کے بعد دونوں ملکوں کے مابین نہ صرف تعلقات خراب ہوئے بلکہ مذاکرات بھی ڈیڈ لاک کا شکار ہوگئے۔
دونوں جانب سے حلقے ان واقعات کی مذمت اور بہتر تعلقات کے خواہاں رہے، خاص طور پر پاکستان کی جانب سے ہمیشہ ان واقعات کی مذمت کے ساتھ تعلقات کی بحالی اور مذاکرات کی میز پر آنے کی دعوت دی جاتی رہی ہے۔

اسلام آباد: وزارت توانائی نے آئل مارکیٹنگ کمپنیوں کے فرانزک آڈٹ کا فیصلہ کرلیا۔

وفاقی کابینہ کی ہدایت پر وزارت توانائی نے آئل مارکیٹنگ کمپنیوں کے فرانزک آڈٹ کا فیصلہ کیا ہے، آڈٹ جون 2020 میں پٹرولیم بحران میں ملوث کمپنیوں کا پتہ لگائے گا۔

اس حوالے سے پٹرولیم ڈویژن نے آڈیٹر جنرل آف پاکستان کو خط لکھ دیا ہے، جس میں کابینہ کی 16 مارچ کی ہدایات کا حوالہ دے کر آڈٹ کی ہدایت دی گئی ہے۔ ٹی او آرز میں آڈیٹر جنرل کو کمپنیوں کی تمام تفصیلات کا جائزہ لینے کی ہدایت کرتے ہوئے کہا گیا ہے کہ کن کن کمپنیوں نے ذخیرہ اندوزی کی، اور کس نے کتنا پیسہ بنایا پتہ لگایا جائے۔

لاہور:موٹروے گینگ ریپ کیس میں انسداد دہشت گردی کی عدالت سے سزائے موت پانے والے دونوں ملزمان عابد ملہی اور شفقت بگا نے لاہور ہائی کورٹ میں فیصلے کے خلاف اپیل دائر کردی۔

لاہور ہائی کورٹ میں دائر اپیل میں ملزمان کی جانب سے مؤقف اپنایا گیا ہے کہ استغاثہ نے اپنا کیس ٹرائل کورٹ میں ثابت نہیں کیا، شواہد اور تفتیش میں تضاد موجود ہے۔

اپیل کنندگان کا کہنا ہے کہ مقدمے میں انسداد دہشت گردی کی دفعہ 5 دن کی تاخیراوراغوا برائے تاوان کی دفعہ 29 دن بعد شامل کی گئی۔

انہوں نے کہا کہ ملزمان کو جلد سزا دینے کے لیے اغوا برائے تاوان کی دفعہ مقدمے میں شامل کی گئی، حالانکہ اغوا برائے تاوان کے الزام کو دوران ٹرائل ثابت نہیں کیا گیا۔

درخواست میں کہا گیا ہے کہ ڈی این اے رپورٹ آنے سے قبل ہی عابد ملہی کو ملزم نامزد کر دیا گیا، پولیس نے ثبوت کے بغیر ہی انہیں ملزم قرار دیا جبکہ ان کے ڈی این اے کے نمونے مقررہ ایس او پیز کے مطابق حاصل نہیں کیے گئے۔

لاہور ہائی کورٹ سے استدعا کی گئی ہے کہ ملزمان عابد ملہی اور شفقت بگا کو سنائی گئی موت اور قید کی سزا غیر قانونی قرار دے کر کالعدم کی جائے۔

قبل ازیں لاہور کی انسداد دہشت گردی عدالت نے 20 مارچ کو موٹروے زیادتی کیس کے دونوں ملزمان کو سزائے موت سنا دی تھی۔

انسداد دہشت گردی عدالت کے جج ارشد حسین بھٹہ نے کیمپ جیل لاہور میں موٹروے زیادتی کیس کا فیصلہ سنایا تھا، عدالت نے عابد ملہی اور شفقت علی کو اغوا کے الزام میں عمر قید، ڈکیتی کا الزام ثابت ہونے پر 14 سال قید اور 50، 50 ہزار روپے جرمانے کی سزا بھی سنائی۔

عدالت نے ملزمان کی منقولہ و غیر منقولہ جائیدادیں بحق سرکار ضبط کرنے کا بھی حکم دے دیا تھا۔

ملزمان عابد ملہی اور شفقت علی کو فیصلہ سننے کے لیے عدالت میں پیش کیا گیا تھا اور اس وقت پراسکیوشن کی ٹیم بھی کمرہ عدالت میں موجود تھی۔

انسداد دہشت گردی عدالت نے موٹروے گینگ ریپ کیس کا ٹرائل مکمل ہونے پر 18 مارچ کو فیصلہ محفوظ کر لیا تھا۔

ملزمان کے ٹرائل کے دوران 40 گواہان کے بیانات قلم بند کیے گئے اور تین رکنی خصوصی پروسکیوشن ٹیم نے جیل میں گواہوں کے بیانات ریکارڈ کیے۔

ٹرائل کے دوران متاثرہ خاتون نے بھی جیل میں قائم عدالت میں پیش ہو کر اپنا بیان قلم بند کرایا اور ملزمان کی شناخت بھی کی۔

انسداد دہشت گردی عدالت کے سامنے ملزمان کے حتمی بیانات بھی ریکارڈ کیے گئے اور ان کی جرح بھی مکمل کی گئی۔

لاہور: نیب لاہور نے مسلم لیگ ن کی نائب صدر مریم نواز کی پیشی ملتوی کردی۔

ترجمان نیب لاہور کے مطابق کل 26 مارچ کو مریم نواز کی پیشی ملتوی کردی گئی ہے۔ جاری کردہ اعلامیے میں کہا گیا ہے کہ پیشی کورونا کی تیسری لہر کی وجہ سے ملتوی کی گئی ہے۔ پیشی ملتوی کرنے کا فیصلہ نیب میں اعلی سطحی اجلاس میں کیا گیا۔

اعلامیے میں کہا گیا ہے کہ این سی او سی کی جانب سے ہر نوعیت کے ہجوم کو اکٹھا کرنے پر پابندی ہے۔مریم نواز کی گزشتہ پیشی پر نیب عمارت پر دانستہ پتھرائو کیا گیا تھا۔ مریم نواز کی پیشی این سی او سی کی گائیڈ لائنز اور مفاد عامہ کے پیش نظر ملتوی کی جارہی ہے۔

نیب نے انہیں 26 مارچ کو جاتی امرا میں 1500 کنال اراضی کی ان کے نام مبینہ غیرقانونی منتقلی کی تحقیقات میں طلب کیا تھا۔قبل ازیں مریم نواز لاہور ہائیکورٹ سے حفاظتی ضمانت حاصل کرچکی تھیں جب کہ نیب کی جانب سے پیشی کے موقعے پر مریم نواز کے کارکنان کو ساتھ لانے کے خلاف درخواست بھی لاہور ہائیکورٹ نے نمٹا دی تھی۔

اسلام آباد: سپریم کورٹ نے بلدیاتی ایکٹ کے سیکشن 3 کو آئین سے متصادم قرار دے کر پنجاب کے بلدیاتی اداروں کو بحال کر دیا۔

ایکسپریس نیوز کے مطابق سپریم کورٹ میں بلدیاتی انتخابات سے متعلق کیس کی سماعت ہوئی، ایڈیشنل ایڈوکیٹ جنرل پنجاب عدالت میں پیش ہوئے، ایڈیشنل ایڈوکیٹ جنرل پنجاب نے عدالت کے سامنے بیان دیا کہ پنجاب حکومت بلدیاتی انتخابات کرانے کے لیے تیار ہے، اور چاہتی ہے اختیارات کو نچلی سطح تک منتقل کیا جائے، معاملہ ابھی مشترکہ مفادات کونسل میں زیر التواء ہے۔

چیف جسٹس نے استفسار کیا کہ کیا باقی صوبوں میں بلدیاتی انتخاب ہورہے ہیں؟۔ اٹارنی جنرل نے جواب دیا کہ باقی صوبوں کا مردم شماری پر اعتراضات ہیں، مشترکہ مفادات کونسل کا اجلاس چوبیس مارچ کو ہونا تھا، وزیراعظم کو کروونا کی وجہ سے اب اجلاس سات اپریل کو ہو گا۔

چیف جسٹس نے ریمارکس دیئے کہ اٹارنی جنرل کا بیان ریکارڈ کر لیتے ہیں صوبے مئی میں بلدیاتی انتحاب کر وا دیں۔ اٹارنی جنرل نے کہا کہ یہ صرف وفاق کا نہیں بلکہ صوبوں کا بھی معاملہ ہے۔ چیف جسٹس نے استفسار کیا کہ پنجاب کی لوکل حکومتوں کو کیوں ختم کیا گیا ؟۔ جسٹس اعجاز الاحسن نے ریمارکس دیئے کہ پنجاب کی بلدیاتی حکومتوں کی ٹرم بھی ابھی ختم ہو گئی ہو گی۔

درخواست گزار کے وکیل نے عدالت کے روبرو بیان دیا کہ پنجاب میں بلدیاتی حکومتوں کی میعاد دسمبر 2021 تک تھی، 2018 انتخابات کے بعد پنجاب اور وفاقی میں نئی جماعت کی حکومت آئی، نئی پنجاب حکومت نے بلدیاتی حکومتیں تحلیل کر کے ایک سال میں الیکشن کرانے کا وقت دیا، ایک سال کی مدت گزرے کے بعد پنجاب حکومت نے نئی ترمیم کی اور پھر آرڈیننس جاری کیا۔

جسٹس مظاہر نقوی نے استفسار کیا کہ باقی صوبوں میں بلدیاتی حکومتوں نے اپنی مدت کو پورا کیا؟۔ چیف جسٹس نے ریمارکس دیئے کہ عدالت کے سامنے پنجاب کا 2019 کا بلدیاتی قانون چیلنج کیا گیا ہے، کیا درخواست گزار چاہتا ہے قانون کے سیکشن تین کو کالعدم کر دیں۔ عدالت نے بلدیاتی ایکٹ کے سیکشن 3 کو آئین سے متصادم قرار دے کر پنجاب کے بلدیاتی اداروں کو بحال کرنے کا حکم دے دیا۔

وزیراعظم عمران خان کورونا ٹیسٹ مثبت آنے کے بعد 5 روز سے قرنطینہ میں ہیں جبکہ سوشل میڈیا پر وفاقی وزیراطلات شبلی فراز کی جانب سے جاری تصویر میں وہ قواعد کےخلاف وزرا کے ساتھ بیٹھے ہوئے ہیں۔

وزیراطلاعات و نشریات شبلی فراز نے ٹوئٹر پر اجلاس کی تصویر جاری کرتے ہوئے لکھا کہ ‘وزیراعظم عمران بنی گالہ میں میڈیا ٹیم کے ساتھ ہیں’۔

تصویر میں وزیراعظم عمران خان کے ہمراہ شبلی فراز کے علاوہ وزیر برائے سمندر پار پاکستانی زلفی بخاری، سینیٹر فیصل جاوید سمیت 6 افراد موجود ہیں۔

سینیٹر فیصل جاوید نے ٹوئٹر پر پی ٹی آئی کے کارکن کو جواب دیتے ہوئے کہا کہ ‘ماشااللہ وزیراعظم ٹھیک ہیں، گھر سے کام کر رہے ہیں اور ایس او پیز کے تحت اجلاس کر رہے ہیں’۔

وزیراعظم کی تصویر سوشل میڈیا پر آتے ہی جہاں حکومت کی جانب سے کورونا وائرس کے خلاف اقدامات کا حوالہ دیتے ہوئے ایس او پیز کی خلاف ورزی کی نشان دہی کی گئی وہی وزیراعظم کے اس اقدام پر تنقید بھی کی گئی۔

پاکستان مسلم لیگ (ن) کے سیکریٹری جنرل احسن اقبال نے ٹوئٹر پر کہا کہ ‘کوئی بتا سکتا ہے کہ اب تک قرنطینہ میں ایس او پیز کے یساتھ میل جول کے کون کون سے فضائل، تاویلیں اور برکات ہمارے پی ٹی آئی کے دوست گھڑ چکے ہیں، کپتان کی میٹنگ کرنے کی صفائی میں؟’۔

تجزیہ کار مشرف زیدی نے کہا کہ ‘کووڈ-19 مثبت آنے والے وزیراعظم اجلاس کر رہے ہیں اور اس کی تشہیر کر رہے ہیں، ایک ایسے ملک میں جہاں پہلے ہی ویکسینیشن کی شرح انتہائی کم ہے’۔

ایک صارف ندا کرمانی نے بھی وزیر اطلاعات شبلی فراز کی تصویر پر ردعمل دیتے ہوئے لکھا کہ ‘غیرذمہ داری کی انتہا ہے، اس وقت خدا ہی اس ملک کو بچا رہا’۔

ایک صارف نے تنقید کرتے ہوئے ایک سال قبل کورونا کے حوالے سے مشہور ڈیزائنر کے رویے کا حوالہ دیتے ہوئے لکھا کہ ‘اس واقعے کا ایک سال مکمل ہونے پر اب ہمیں یہ ملا’

یاد رہے کہ 20 مارچ کو وزیر اعظم عمران خان کا کورونا ٹیسٹ مثبت آگیا تھا جس کے بعد انہوں نے خود کو گھر میں قرنطینہ کرلیا ہے، بعدازاں خاتون اول بشریٰ بی بی کا ٹیسٹ بھی مثبت آگیا تھا۔

اسلام آباد: سپریم کورٹ نے این اے 75 ڈسکہ میں دوبارہ ضمنی الیکشن روکنے کا حکم دے دیا۔

سپریم کورٹ میں این اے 75 ڈسکہ میں دوبارہ انتخابات کے کیس کی سماعت ہوئی۔ مسلم لیگ ن کی امیدوار نوشین افتخار کے وکیل سلمان اکرم راجا نے عدالت میں ضلع ڈسکہ کا مکمل نقشہ پیش کر دیا۔ انہوں نے کہا کہ ڈسکہ شہر کے 76 میں سے 34 پولنگ اسٹیشنز سے شکایات آئیں، 20 پریزائیڈنگ افسر بھی غائب ہوئے۔

جسٹس عمر عطا بندیال نے کہا کہ سوال یہ ہے کہ پولنگ کے دن کون اور کیوں یہ مسائل پیدا کرتا رہا؟ کیا ایک امیدوار طاقتور تھا اس لیے دوسرے نے یہ حرکات کروائیں؟، رپورٹ کے مطابق مسلم لیگ ن کے کارکنان پرتشدد واقعات میں ملوث رہے، آپ کو ثابت کرنا ہے کہ 23 پولنگ اسٹیشن کی شکایت پر پورے حلقے میں دوبارہ انتخابات کیوں ضروری ہیں۔

سلمان اکرم راجا نے کہا کہ حلقے کے ایک تہائی پولنگ اسٹیشنز کی شکایات موصول ہوئیں، پریزائڈنگ افسران پولیس کے ساتھ معمول کے مطابق نکلے، لیکن ان افسران کی واپسی غیر معمولی تھی، وہ اکھٹے آئے اور ڈرے ہوئے تھے۔

سپریم کورٹ نے سماعت کے بعد این اے 75 ڈسکہ میں 10 اپریل کو دوبارہ پولنگ روک دی۔ عدالت نے کہا کہ کیس کی مزید سماعت بینچ کی دستیابی سے مشروط ہے، جیسے ہی بینچ دستیاب ہو گا کیس سماعت کیلئے مقرر ہوجائے گا۔ سپریم کورٹ نے کیس کی سماعت غیرمعینہ مدت کیلئے ملتوی کردی۔

لاہور: مریم نواز کا سپریم کورٹ کیجانب سے این اے 75 ڈسکہ میں دوبارہ ضمنی الیکشن روکنے کے حکم پر ردعمل سامنے آگیا۔

پاکستان مسلم لیگ ن کی نائب صدر مریم نواز نے ٹویٹ کرتے ہوئے کہا کہ ڈسکہ الیکشن ملتوی ہونے پر خوشیاں منانے والے جانتے ہیں کہ الیکشن تو ہونا ہے اور عوام نے ووٹ تو ڈالنا ہے۔

مریم نواز نے حکومت کو آڑے ہاتھوں لیتے ہوئے کہا کہ کیوں ڈرتے ہو عوام سے، ووٹ سے اور یوم حساب سے؟ اس لیے کہ عوام تم سے بیزار ہے اور ووٹ کی پرچی تمہاری جعلی حکومت کے لیے موت کا پروانہ ہے!۔

مریم نواز نے حکومت پر تنقید کرتے ہوئے کہا کہ کبھی اس لیے عدالت جاتے ہو کہ عوام کو ووٹ سے روکو اور کبھی اس لیے کہ مریم کے ساتھ عوام کو آنے سے روکو، تین سال عوام کا استحصال کرنے والے عوام میں جانے سے بھاگ گئے۔

مریم نواز نے مزید کہا کہ یہ ادارے عوام کے ہیں، عوام کے غیض و غضب سے تمہیں ادارے نہیں بچا سکتے، سلیکٹڈ الیکشن سے بھاگے گا نہیں تو اور کون بھاگے گا؟۔

گلگت: نلتر پائین میں مسافرگاڑی پرفائرنگ سے 5 افراد جاں بحق ہوگئے۔

ایس ایس پی گلگت مرزا حسن نے بتایا کہ واقعہ میں 8 افراد زخمی بھی ہوئے ہیں۔ لاشوں اور زخمیوں کو گلگت سٹی اسپتال منتقل کردیا گیا جہاں انہیں طبی امداد فراہم کی جارہی ہے۔

مسافر گاڑی گلگت سے نلتر بالا جارہی تھی جب نامعلوم افراد نے اس پر گولیاں برسادیں۔ واقعے کی اطلاع ملتے ہی نومل تھانہ پولیس جائے واردات پر پہنچ گئی اور ملزمان کی گرفتاری کی کوششیں شروع کردیں۔
گورنر گلگت بلتستان راجہ جلال حسین مقپون نے واقعے کی مذمت کرتے ہوئے سیکرٹری داخلہ اور کمشنر گلگت سے رپورٹ طلب کرلی۔ گورنر گلگت بلتستان نے کہا کہ اس افسوسناک واقعے میں ملوث ذمہ داروں کو کیفر کردار تک پہنچایا جائے گا، واقعے کی تحقیقات کے لئے متعلقہ اداروں کو احکامات جاری کردیے ہیں۔

راجا جلال حسین مقپون نے جاں بحق افراد کے لواحقین سے اظہار تعزیت کرتے ہوئے کہا کہ افسوسناک واقعے میں زخمی ہونے والے افراد کو علاج معالجے کی بہترین سہولیات فراہم کی جائیں گی۔

اسلام آباد: ہائی کورٹ نے چیئرمین سینیٹ الیکشن کے خلاف درخواست ناقابل سماعت قرار دے کر خارج کر دی۔

چیف جسٹس اطہر من اللہ نے چیئرمین سینٹ الیکشن کے خلاف درخواست ناقابل سماعت قرار دینے کا 12صفحات پر مشتمل تحریری فیصلہ بھی جاری کر دیا جس میں کہا گیا ہے کہ درخواست قابل سماعت ہے اور نہ ہی نوٹس جاری کرنے کے لیے آرٹیکل 199 کے تحت اختیار کو استعمال کیا جاسکتا ہے۔عدالت توقع کرتی یے کہ منتخب نمائندگان پارلیمان کے وقار اور خودمختاری کو برقرار رکھیں گے۔

فیصلے میں کہا گیا ہے کہ سیاسی قیادت عدالتوں کو ایسے معاملات میں ملوث کیے بغیر تنازعات کا حل نکالنے کے لیے کوشش کرے۔ آئین میں دیے گئے اختیارات اور استحقاق کا استعمال کرتے ہوئے سیاسی قیادت تنازعات کا حل کرے۔
جاری کردہ فیصلے میں کہا گیا ہے کہ درخواست گزار کے مطابق پی ڈی ایم کے پاس چیئرمین سینٹ کے لیے اکثریت موجود ہے۔اگر اکثریت موجود ہے توپی ڈی ایم نہ صرف چیئرمین سینیٹ کو ہٹا سکتی ہے بلکہ یوسف رضاگیلانی کو چیئرمین سینیٹ بنا بھی سکتی ہے۔

چیف جسٹس اسلام آباد ہائیکورٹ نے فیصلے میں مزید کہا ہے کہ سینیٹ کے سات ارکان کی جانب سے آئینی طریقہ استعمال کرنے پر پارلیمان کی عزت اور خودمختاری میں اضافہ ہوگا۔عدالت مطمئین ہے کہ آئینی طریقہ کار کے استعمال سے واضح ہوجائے گا کہ ان سات سینیٹرز نے آپ کو ووٹ دیا تھا۔ یہ عدالت پارلیمان کے استحقاق سے متعلق آئین کے آرٹیکل 69 کے تحت تحمل کا مظاہرہ کررہی ہے۔

قبل ازیں چیف جسٹس اسلام آباد ہائی کورٹ جسٹس اطہر من اللہ نے چیئرمین سینیٹ الیکشن میں صادق سنجرانی کی کامیابی کے فیصلے کے خلاف یوسف رضا گیلانی کی درخواست پر سماعت کی۔

یوسف رضا گیلانی کے وکیل فاروق ایچ نائیک نے موقف اختیار کیا کہ صدر مملکت نے چیئرمین سینیٹ الیکشن کے لئے جی ڈی اے کے سینیٹر مظفر حسین شاہ کو الیکشن میں پریذائیڈنگ افسر مقرر کیا۔ شیری رحمان، سعید غنی اور میں نے بیان حلفی عدالت میں دیا ہے کہ سیکرٹری سینیٹ نے خانے کے اندر کہیں بھی مہر لگانے کا کہا تھا اور سیکرٹری سینیٹ کے کہنے کے بعد ہم نے اپنے سینیٹرز کو کہیں بھی مہر لگانے کا کہا۔ پریزائیڈنگ آفیسر نے خانے کے اندر نام پر مہر لگانے پر ووٹ مسترد کئے، الیکشن میں صادق سنجرانی کو چیئرمین سینیٹ قرار دیا گیا، اور 7 ووٹوں کو مسترد کر کے یوسف رضا گیلانی کے ہارنے کا اعلان کر دیا۔

فاروق ایچ نائیک نے مزید کہا کہ چیئرمین سینیٹ الیکشن میں الیکشن کمیشن کا کوئی کردار نہیں۔ اگر طریقہ کار میں کوئی بے ضابطگی ہو تو وہ عدالت میں چیلنج نہیں کی جا سکتی۔ رولز میں بیلٹ پیپر یا ووٹ سے متعلق کچھ نہیں، رولز اس حوالے سے خاموش ہیں۔ یوسف رضا گیلانی کو الیکشن کے روز بھی اور آج بھی سینیٹ میں اکثریت حاصل ہے۔

چیف جسٹس نے استفسار کیا کہ پارلیمان کی اندرونی کارروائی کے استحقاق کے آئین آرٹیکل 69 سے کیسے نکلیں گے ؟ پارلیمان کی اندرونی کارروائی عدالت میں چیلنج کی جاسکتی ہے؟، اگر یوسف گیلانی کے پاس اکثریت ہے تو وہ صادق سنجرانی کو ہٹا سکتے ہیں، پارلیمنٹ بڑے مسائل کو حل کرنے کیلئے ہے، کیا اپنا مسئلہ حل نہیں کرسکتے؟ کیا عدالت کو پارلیمانی مسائل میں مداخلت کرنی چاہیے؟۔

اسلام آباد ہائی کورٹ نے دلائل سننے کے بعد یوسف رضا گیلانی کی درخواست ناقابل سماعت قرار دے کر خارج کردی۔