Category پاکستان

پنجاب حکومت نے شوگر فیکٹریوں کو چلانے سے متعلق ایک ترمیمی قانون سے علیحدگی ظاہر کردی جسے ہنگامی بنیادوں پر دو ہفتے قبل صوبائی اسمبلی میں پیش کیا گیا تھا اور الزام لگایا گیا کہ اسمبلی سیکریٹریٹ میں کسی کو اس کے مندرجات کو قانون سازوں کے سامنے پیش کرنے سے قبل تبدیل کردیا گیا۔

رپورٹ کے مطابق وزیر زراعت سید حسین جہانیاں گردیزی نے بتایا کہ حکومت نے جو مسودہ قانون نافذ کرنے کے لیے پیش کیا تھا یہ وہ نہیں تھا۔

انہوں نے کہا کہ مسودے کو اسمبلی سیکریٹریٹ میں تبدیل کیا گیا جسے ہاؤس اسٹینڈنگ کمیٹی نے جانچ پڑتال کے بعد منظور کیا تھا۔

وزیر زراعت نے اس امر پر افسوس کا اظہار کرتے ہوئے کہا کہ گنے کے کاشتکاروں کے مفادات کے تحفظ کے برعکس کچھ مفادات کی خاطر خفیہ اور غیر قانونی طور پر مسودہ کو تبدیل کیا گیا۔

پریس کانفرنس کے دوران وزیر زراعت نے کہا کہ اس معاملے کی مکمل چھان بین کی جائے گی کیونکہ اس کی وجہ سے کاشت کاروں میں بے چینی پیدا ہوگئی ہے۔

انہوں نے کہا کہ اس غلطی کو ختم کرنے کے لیے پیر کے روز اسمبلی کے اجلاس میں ایک نیا قانون پیش کیا جائے گا۔

4 مئی کو منظور ہونے والے شوگر فیکٹریاں کنٹرول (ترمیمی) ایکٹ میں 30 نومبر کو گنے کی کرشنگ سیزن شروع کرنے کی آخری تاریخ مقرر کی گئی ہے جس کے تحت ملرز کو اگست 30 جون تک کاشتکاروں کو واجبات ادا کرنے کی اجازت اور واجبات کی عدم ادائیگی اور تاخیر پر سزا یا جرمانہ ہوگا۔

یہ ایکٹ گزشتہ اکتوبر میں جاری اس آرڈیننس کے برخلاف تھا جس میں حکومت کو کرشنگ سیزن کے آغاز کی تاریخ طے کرنے کا اختیار دیا گیا تھا۔

ملرز کو گنے کی خریداری سے 15 دن کے اندر کاشتکاروں کو واجبات ادا کرنے کا پابند کیا گیا تھا۔

پاکستان اتحاد کے صدر خالد کھوکھر نے کہا کہ ہم اس نئے قانون کو قبول کریں گے جیسا کہ وزیر زراعت نے وعدہ کیا تھا صرف اس صورت میں جب اس میں آرڈیننس میں متعارف کروائے گئے کسانوں کے لیے تمام حفاظتی انتظامات موجود ہوں۔

قانونی تنازع پر بروقت مداخلت پر وزیر اعظم عمران خان کا شکریہ ادا کرتے ہوئے خالد کھوکھر نے کہا کہ مسودہ قانون میں تبدیلی ایک سنگین جرم ہے اور ’شوگر مافیا کے اثر و رسوخ‘ کے تحت بل کو خفیہ اور غیر قانونی طور پر تبدیل کرنے کے ذمہ داروں کے خلاف ریفرنس بھیجنے کی ضمانت دی گئی۔

انہوں نے مسئلے پر سمجھوتہ نہ کرنے کا وعدہ کرتے ہوئے کہا کہ اس میں کسانوں کے 100 ارب روپے شامل ہیں۔

ایک ذرائع نے ڈان کو بتایا کہ تحقیقاتی ادارے کی ابتدائی انکوائری میں انکشاف کیا گیا کہ بل کا متنازع مسودہ گلبرگ میں بااثر سیاسی شخص کے گھر کے اندر تیار کیا گیا۔

انہوں نے بتایا کہ اس بااثر سیاسی شخص پہلے ہی ایک سے زائد شوگر ملز میں شراکت دار ہے۔

ذرائع نے بتایا کہ ابتدائی تحقیقات کے نتائج متعلقہ حکام یا عہدیداروں کے ساتھ شیئر کیے جا چکے ہیں تاہم مزید تحقیقات جاری ہے۔

اسمبلی سیکریٹریٹ امور کے ذمہ دار پی اے سیکریٹری محمد خان بھٹی سے مذکوہ معاملے پر تبصرے کے لیے کوشش کی لیکن انہوں نے ٹیکسٹ پیغامات کا کوئی جواب نہیں دیا۔

وزیراعظم عمران خان نے پاکستان کے شہریوں اور مختلف حلقوں کی جانب سے فلسطینیوں کے ساتھ اظہار یک جہتی کرتے ہوئے ریلیاں منعقد کرنے پر قوم کو خراج تحسین پیش کیا۔

وزیراعظم عمران خان کا یوم یکجہتی فلسطین پر قوم کے نام ویڈیو پیغام میں کہا کہ مجھے آج بڑی خوشی ہے میری قوم اورمیرے پاکستانی جس طرح آج فلسطینیوں کی حمایت میں نکلے۔

انہوں نے کہا کہ جس طرح انہوں نے ان پر ظلم ہورہا اس کی نشان دہی کی، اس پر میں سب کو خراج تحسین پیش کرتا ہوں۔

ان کا کہنا تھا کہ جب سے اسرائیل بنا ہے پاکستان کا ایک مؤقف رہا ہے، وہ مؤقف ہمارے عظیم قائد اعظم محمد علی جناح کا مؤقف تھا کہ فلسطینیوں سے بڑی ناانصافی ہوئی ہے۔

وزیراعظم نے کہا کہ پاکستان ہر فورم پر فسلطینوں کے ساتھ کھڑا رہا ہے۔

انہوں نے کہا کہ 27 ویں شب کو میں مسجد نبوی میں تھا جب مجھے پتہ چلا کہ مسلمانوں کے قبلہ اول مسجد اقصیٰ پر مقدس رات کو لوگ نماز پڑھ رہے تھے تو اسرائیل کی پولیس نے تشدد کیا۔

ان کا کہنا تھا کہ ساتھ ساتھ یہ بھی معلوم ہوا کہ فلسطینی خاندان جو 70 برسوں سے وہاں رہ رہے تھے، کئی خاندانوں کو اسرائیلی آباد کاروں نے ان کے گھروں سے نکال دیا ہے، اس کی وجہ سے ایک نیا انتشار شروع ہوگیا۔

وزیراعظم نے کہا کہ پھر غزہ پر بمباری کی گئی، دنیا کی طاقت ور ترین فوج نے نہتے فلسطینیوں پر بمباری کی جس میں فسلطینی بچے بھی مارے گئے۔

انہوں نے کہا کہ 27 ویں شب کے اگلے اسلامی تعاون تنظیم کے سیکریٹری جنرل سے ملاقات کی اور ان سے کہا کہ او آئی سی کو اس پر اسٹینڈ لینا چاہیے اور اقوام متحدہ میں اس مسئلے کو اٹھانا چاہیے۔

ان کا کہنا تھا کہ جب پاکستان واپس آیا تو شاہ سلمان سے بات کی کہ فلسطینیوں پر جو ظلم ہو رہا ہے اور مسجد اقصیٰ میں جو ہوا اس پر ہمیں اپنی آواز بلند کرنی چاہیے۔

وزیراعظم نے کہا کہ ترک صدر طیب اردوان کا مجھے فون آیا اور انہوں نے بھی یہی بات کی پھر مہاتیر محمد کا پیغام آیا، ان کا بھی یہی خیال تھا، پھر میں نے فلسطین کے صدر محمود عباس سے بات کی اور یقین دلایا کہ ساری مسلم دنیا اور پوری دنیا جو انصاف پر یقین رکھتی ہے وہ سب ان کے ساتھ کھڑی ہے۔

انہوں نے کہا کہ پھر میں شاہ محمود قریشی سے کہا کہ وہ اقوام متحدہ کی جنرل اسمبلی میں جائیں، او آئی سی اور مسلمان اراکین کے ساتھ اس مسئلے کو اٹھائیں اور انہوں نے بڑے بھرپور طریقے سے اس کو اٹھایا جس پر میں ان کو داد دیتا ہوں۔

ان کا کہنا تھا کہ مجھے ایک خوش آئند چیز نظر آرہی ہے کہ دنیا کی رائے عامہ تبدیل ہو رہی ہے، پہلے اسرائیل کی فوج فلسطینیوں پر ظلم کرتی تھی تو مغرب کا میڈیا، سیاست دانوں کو اسرائیل پر کبھی تنقید کرتےہوئے نہیں دیکھا۔

مغرب کی بات کرتے ہوئے انہوں نے کہا کہ بلکہ ایسا لگتا تھا کہ ظلم اسرائیل پر ہورہا ہے لیکن یہ پہلی دفعہ ہے کہ وہاں سے آوازیں اٹھنی شروع ہوئیں، ان کے اخبارات، میڈیا اور سیاست دانوں نے بات کرنا شروع کی۔

عمران خان نے کہا کہ یہ رائے عامہ تبدیل ہونے کی بڑی وجہ سوشل میڈیا ہے، سوشل میڈیا ایک ایسی فورس آئی ہے جس کی وجہ سے کوئی بھی معلومات کو روک نہیں سکتا۔

ان کا کہنا تھا کہ اس سے مجھے نظر آرہا ہے دنیا کی رائے تبدیل ہورہی ہے، آج سے 30 سال پہلے بھی دنیا کی رائے تبدیل ہوئی تھی، جنوبی افریقہ میں ایسی حکومت کئی برسوں سے تھی جو نسل پرست تھی، جو ایشیائی اور افریقیوں کو برابر کے شہری نہیں سمجھتی تھی۔

انہوں نے کہا کہ افریقہ کی اس نسل پرست حکومت کے ساتھ دنیا کی بڑی بڑی طاقتیں کھڑی تھیں لیکن دنیا میں رائے تبدیل ہوئی تو انہی طاقت ور ملکوں نے زور لگا کر جنوبی افریقہ کے اندر حکومت پر دباؤ ڈال کر مجبور کیا کہ وہ افریقیوں اور ایشیائی افراد کو برابر کے حقوق دیں۔

ان کا کہنا تھا کہ میں اسی طرح کی شروعات دیکھ رہا ہوں، دنیا کی رائے تبدیل ہو رہی ہے اوریہ ان بڑے طاقت ور ممالک پر زور ڈالیں گے کہ فلسطینیوں کو بھی ان کے حقوق دیے جائیں۔

وزیراعظم نے کہا کہ ان شااللہ ایک دن آئے جب فلسطین کے لوگوں کو اپنا ملک ملے گا، منصفانہ تقسیم ہوگی، وہ بھی برابر کے شہری رہ سکیں گے، جو فلسطینی اسرائیل میں رہتے ہیں، وہ ایک برابر کے شہری بن کر رہ سکیں گے۔

ان کا کہنا تھا کہ اور ہم دعا کرتے ہیں کہ وہ دن جلدی آئے۔

وفاقی حکومت نے بجلی 1 روپے 72 پیسے فی یونٹ مہنگی کرنے کا فیصلہ کیا ہے۔

وفاقی کابینہ نے بجلی 1 روپے 72 پیسے فی یونٹ مہنگی کرنے کی منظوری دے دی، وفاقی کابینہ نے سرکولیشن کے ذریعے سمری کی منظوری دی، بجلی 3 مختلف سہہ ماہی ایڈجسٹمنٹس کی مد میں مہنگی کرنے کی منظوری دی گئی۔

وفاقی کابینہ نے مالی سال 2020 کی چوتھی سہہ ماہی کی مد میں بجلی 82 پیسے فی یونٹ مہنگی کرنے کی منظوری دی، مالی سال کی پہلی، دوسری سہہ ماہی ایڈجسٹمنٹس کی مد میں بجلی 90 پیسے فی یونٹ مہنگی کرنے کی منظوری دی گئی۔ بجلی کی قیمتوں میں اضافے کا اطلاق اکتوبر 2021 سے کیا جائے گا۔

بلوچستان کے ضلع چمن کے علاقے مرغی بازار میں ہونے والے دھماکے کے نتیجے میں 6 افراد جاں بحق اور 14 زخمی ہوگئے۔

حکومتِ بلوچستان کے ترجمان لیاقت شاہوانی نے سماجی روابط کی ویب سائٹ ٹوئٹر پر ایک جاری بیان میں بتایا کہ مرغی بازار چمن میں جمعیت علمائے اسلام نظریاتی کی جانب سے یومِ یکجہتی فلسطین کے سلسلے میں ریلی نکالی جارہی تھی جس کے قریب دھماکا ہوا۔

انہوں نے بتایا کہ دھماکے میں زخمی ہونے والے 10 افراد کو ڈسٹرک ہیڈ کوارٹر ہسپتال چمن اور کچھ کو علاج معالجے کے لیے کوئٹہ منتقل کردیا گیا ہے۔

لیاقت شاہوانی کا کہنا تھا کہ دھماکے کے بعد علاقے کو سیل کردیا گیا ہے اور جمیعت علمائے اسلام کے رہنما عبدالقادر لونی و قاری مہراللہ بالکل محفوظ ہیں۔

ساتھ ہی انہوں نے بتایا کہ زخمیوں کے علاج معالجے کے لیے ہسپتالوں میں ایمرجنسی نافذ کردی گئی ہے۔

اپنے بیان میں ترجمان بلوچستان حکومت نے دھماکے کی شدید الفاظ میں مذمت کی اور واقعے میں جاں بحق ہونے والے افراد کے لیے دعائے مغفرت اور زخمیوں کی جلد صحتیابی کی دعا کی۔

دھماکے کے فوری بعد قانون نافذ کرنے والے اور امدادی اداروں کے کارکنان جائے وقوع پر پہنچ گئے اور زخمیوں اور لاشوں کو ہسپتال منتقل کیا۔

وزیراعلیٰ بلوچستان کی مذمت
دوسری جانب وزیراعلیٰ بلوچستان جام کمال خان نے بھی چمن میں ہونے والے بم دھماکے کی شدید الفاظ میں مذمت کرتے ہوئے دھماکے میں قیمتی انسانی جانوں کے ضیاع پر افسوس کا اظہار کیا۔

ایک بیان میں ان کا کہنا تھا کہ دہشت گرد عناصر کسی رعایت کے مستحق نہیں ہیں، دہشت گردوں کو ان کے مذموم مقاصد میں کامیاب نہیں ہونے دیا جائے گا۔

وزیراعلیٰ بلوچستان کا کہنا تھا کہ کسی کو بھی صوبے کا امن و امان خراب کرنے کی اجازت نہیں دی جائے گی، ایسی تخریب کار کارروائیوں سے ہمارے حوصلے پست نہیں ہوں گے۔

جام کمال خان نے زخمیوں کو علاج معالجے کی بہترین طبی سہولیات کی فراہمی کی ہدایت کی اور شہدا کے لواحقین کے ساتھ اظہارِ ہمدردی اور اظہارِ تعزیت کیا۔

چمن بلوچستان کا حساس علاقہ تصور کیا جاتا ہے کیونکہ اس کی سرحدیں افغانستان کے صوبے قندھار سے ملتی ہیں۔

قبل ازیں 23 مارچ کو بلوچستان کے شہر چمن میں لیویز جیل کے سامنے پولیس گاڑی پر دھماکے کے نتیجے میں بچے سمیت 3 افراد جاں بحق اور 13 زخمی ہوئے تھے۔

پولیس کے مطابق تاج روڈ پر لیویز جیل کے سامنے دھماکے میں پولیس ایس ایچ او کی گاڑی کو نشانہ بنایا گیا تھا۔

گزشتہ سال اگست میں چمن کے مال روڈ پر دھماکے کے نتیجے میں 5 افراد جاں بحق اور 14 زخمی ہو گئے تھے۔

نامعلوم شرپسندوں نے سڑک کنارے کھڑی موٹر سائیکل میں دھماکا خیز مواد نصب کیا تھا جو زوردار دھماکے سے پھٹ گیا۔

ملک بھر میں آج یوم یکجہتی فلسطین منایا جا رہا ہے۔ شہر شہر ریلیاں نکالی جا رہی ہیں۔ ریلیوں میں زندگی کے ہر طبقہ فکر سے تعلق رکھنے والے افراد شریک ہیں۔ شرکا نے دنیا سے فلسطین پر اسرائیل کا غاصبانہ قبضہ ختم کرانے کا مطالبہ کیا۔

لاہور میں فلسطینی مسلمانوں سے یکجہتی کے لئے ریلی نکالی گئی جس میں کثیر تعداد میں شہری شریک ہوئے جبکہ وزیراعلیٰ پنجاب کی معاون خصوصی ڈاکٹر فردوس عاشق اعوان نے ریلی سے خطاب میں جہاں اسرائیلی فورسز کے مظالم کی مذمت کی وہیں وزیراعظم کی کوششوں کو سراہا۔

پنجاب اسمبلی میں بھی فلسطینیوں سے اظہار یکجہتی کیا گیا۔ مسلم لیگ ن کے ارکان فلسطینی جھنڈے لے کر ایوان میں پہنچے اور اسرائیل کے خلاف نعرے بازی کی جبکہ حمزہ شہباز نے میڈیا سے بات کرتے ہوئے اسرائیلی مظالم کے خلاف متفقہ لائحہ عمل اپنانے پر زور دیا۔

وفاقی وزیر اطلاعات فواد چوھری نے اپنے ٹویٹ میں کہا کہ ہم سب فلسطین ہیں، سیز فائر ہونا کامیابی ہے، حقوق ملنے تک ہم آپ کے ساتھ ہیں، پاکستان کا ہر فرد وزیراعظم عمران خان کے ساتھ ہے۔

پریس کلب لاہور کے باہر آل پاکستان کلرکس ایسو سی ایشن کی جانب سے فلسطینی بھائیوں سے اظہار یکجہتی کے لئے ریلی نکالی گئی۔ جس کی قیادت صدر ایپکا حاجی محمد ارشاد نے کی۔ شرکا نے اسرائیل کے خلاف شدید نعرے بازی کی۔

فیصل آباد میں ڈاکٹرز اور پیرامیڈیکل سٹاف نے ریلی نکالی۔ ریلی کے شرکاء نے ہاتھوں میں بینرز اور پلے کارڈ اٹھا رکھے تھے جن پر فلسطینیوں کے حق میں نعرے درج تھے۔

سرگودھا اور شیخوپورہ میں نکالی گئی ریلیوں میں شہریوں کی بڑی تعداد شریک ہوئی۔ شرکا نے پلے کارڈز اٹھا رکھے تھے جن پر اسرائیل مخالف نعرے درج تھے۔

فلسطینیوں پر اسرائیلی مظالم کے خلاف بہاولپور میں بھی ریلی نکالی گئی جس میں کثیر تعداد میں شہری شریک ہوئے اور اسرائیلی مظالم کے خلاف نعرے بازی کی۔ وہاڑی اور نوشہرو فیروز میں بھی صیہونی فورسز کے مظالم کے خلاف بھر پور آواز اٹھائی گئی۔ ریلیوں کے شرکا نے دنیا پر اسرائیلی مظالم رکوانے پر زور دیا۔

صوابی اور کرک میں بھی سرائیلی مظالم کے خلاف شہری سڑکوں پر نکل آئے اور شدید نعرے بازی کی۔ اس کے ساتھ ساتھ جہانیاں، لیاقت پور، ساہیوال، نواب شاہ، لاڑکانہ، کندیاں، احمد پور شرقیہ، روجھان، کشمور، ظاہر پیر، قصور، ڈیرہ بگٹی اور مریدکے میں بھی اسرائیلی مظالم کے خلاف ریلیاں نکالی گئیں۔

پاکستان میں کورونا وائرس کے کیسز میں اتار چڑھاؤ جاری ہے اور نیشنل کمانڈ اینڈ آپریشن سینٹر (این سی او سی) نے کل سے 30 سال سے زائد عمر کے افراد کی ویکسینیشن شروع کرنے کا اعلان کردیا ہے۔

سرکاری سطح پر عالمی وبا کے اعداد و شمار مرتب کرنے والی سرکاری ویب سائٹ کے مطابق گزشتہ 24 گھنٹوں میں ملک میں 3 ہزار 70 افراد وائرس سے متاثر ہوئے جبکہ مزید 102 افراد انتقال کر گئے۔

ملک میں 20 مئی کو مجموعی طور پر کووڈ-19 کی تشخیص کے لیے 51 ہزار 528 ٹیسٹ کیے گے جس میں کیسز کے مثبت آنے کی شرح 5.95 فیصد رہی اور فعال کیسز 63 ہزار 229 ہو گئے۔

پاکستان میں اب تک 8 لاکھ 93 ہزار 461 افراد کے وائرس سے متاثر ہونے کی تصدیق ہوچکی ہے جن میں سے 20 ہزار 89 زندگی کی بازی ہار گئے۔

علاوہ ازیں گزشتہ 24 گھنٹوں میں وائرس کا شکار مزید 6 ہزار 21 افراد صحتیاب ہوئے یوں کورونا سے صحتیاب ہونے والے مریضوں کی مجموعی تعداد 8 لاکھ 10 ہزار 143 تک جاپہنچی ہے۔

واضح رہے کہ پاکستان میں کورونا وائرس کے پہلے کیس کی تصدیق 26 فروری 2020 کو ہوئی تھی، جس کے بعد سے وبا کے پھیلاؤ میں اتار چڑھاؤ جاری ہے اور اب تک وائرس کی 3 لہریں دیکھی جاچکی ہیں۔

ملک میں 21 مئی 2021 کو کورونا وائرس کیسز اور اموات کی صورتحال کچھ یوں ہے:

پنجاب
کورونا وبا کی تیسری لہر کے دوران سب سے زیادہ متاثر ہونے والے صوبے پنجاب میں گزشتہ 24 گھنٹوں کے دوران کورونا کے مزید 989 کیسز رپورٹ ہوئے جبکہ 64 مریض انتقال کر گئے۔

پنجاب میں مجموعی طو پر کورونا وائرس سے 3 لاکھ 32 ہزار افراد متاثر جبکہ 9 ہزار 704 انتقال کرچکے ہیں۔

سندھ
صوبہ سندھ میں وبا کا پھیلاؤ بڑھ رہا ہے اور یہاں گزشتہ 24 گھنٹوں میں کورونا وائرس کے ایک ہزار 248 کی تصدیق ہوئی جبکہ مزید 15 مریض دم توڑ گئے۔

مذکورہ اضافے کے بعد سندھ میں کورونا سے متاثرہ افراد کی مجموعی تعداد 3 لاکھ 4 ہزار 571 جبکہ اموات کی مجموعی تعداد 4 ہزار 869 تک جاپہنچی ہے۔

خیبرپختونخوا
کورونا وائرس کی تیسری لہر نے پنجاب کے بعد خیبرپختونخوا کو زیادہ متاثر کیا تھا اور یہاں گزشتہ روز کووڈ-19 کے مزید 528 کیسز اور 20 اموات رپورٹ ہوئیں۔

اب تک خیبر پختونخوا میں مجموعی طور پر ایک لاکھ 28 ہزار 561 افراد وبا سے متاثر جبکہ 3 ہزار 875 لقمہ اجل بن چکے ہیں۔

بلوچستان
گزشتہ 24 گھنٹوں کے دوران ملک کے سب سے وسیع صوبے میں مزید 95 افراد وائرس سے متاثر پائے گئے۔

علاوہ ازیں صوبے میں مزید 3 مریض دم توڑ گئے، نئے کیسز کے اضافے کے بعد بلوچستان میں عالمی وبا سے متاثرہ افراد کی مجموعی تعداد 24 ہزار 318 ہوگئی جبکہ اموات کی تعداد 270 پر برقرار ہے۔

اسلام آباد
کورونا کی تیسری لہر نے وفاقی دارالحکومت اسلام آباد کو بھی متاثر کیا ہے جہاں گزشتہ 24 گھنٹوں میں کورونا وائرس کے مزید 221 کیسز رپورٹ ہوئے اور ایک مریض انتقال کر گیا۔

اسلام آباد میں کورونا متاثرین کی مجموعی تعداد 80 ہزار 10 ہے جبکہ 741 افراد وبا سے انتقال کرچکے ہیں۔

آزاد کشمیر
آزاد کشمیر میں گزشتہ 24 گھنٹوں کے دوران کورونا وائرس کے مزید 78 کیسز کی تصدیق ہوئی اور 2 مریض دم توڑ گئے۔

مذکورہ اضافے کے بعد آزاد کشمیر میں کورونا وائرس مجموعی طور پر 18 ہزار 547 افراد کو متاثر کرچکا ہے جبکہ 523 افراد کی موت کا سبب بھی بنا ہے۔

گلگت بلتستان
کورونا وائرس سے سب سے کم گلگت بلتستان متاثر ہوا ہے اور وہاں گزشتہ 24 گھنٹوں میں 2 کیس سامنے آئے تاہم 30 اپریل کے بعد سے مزید کوئی موت رپورٹ نہیں ہوئی۔

گلگت بلتستان میں کورونا وائرس سے متاثرہ افراد کی مجموعی تعداد 5 ہزار 454 جبکہ اموات کی مجموعی تعداد 107 ہے۔

اسلام آباد: اسد عمر نے کہا ہے کہ 30 سال سے زائد عمر کے افراد کو کل سے ویکسین لگنا شروع ہو جائے گی، رجسٹریشن کرانے والوں کو آج سے میسج آنا شروع ہو جائے گا۔

دوسری جانب کورونا وائرس سے 102 افراد جاں بحق ہوگئے، جس کے بعد اموات کی تعداد 20 ہزار 89 ہوگئی۔ پاکستان میں کورونا کے تصدیق شدہ کیسز کی تعداد 8 لاکھ 93 ہزار 461 ہوگئی۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 3 ہزار 70 نئے کیسز رپورٹ ہوئے، پنجاب میں 3 لاکھ 32 ہزار، سندھ میں 3 لاکھ 4 ہزار 571، خیبر پختونخوا میں ایک لاکھ 28 ہزار 561، بلوچستان میں 24 ہزار 318، گلگت بلتستان میں 5 ہزار 454، اسلام آباد میں 80 ہزار 10 جبکہ آزاد کشمیر میں 18 ہزار 547 کیسز رپورٹ ہوئے۔

ملک بھر میں اب تک ایک کروڑ 26 لاکھ 54 ہزار 997 افراد کے ٹیسٹ کئے گئے، گذشتہ 24 گھنٹوں کے دوران 51 ہزار 528 نئے ٹیسٹ کئے گئے، اب تک 8 لاکھ 10 ہزار 143 مریض صحتیاب ہوچکے ہیں جبکہ 4 ہزار 424 مریضوں کی حالت تشویشناک ہے۔

پاکستان میں کورونا سے ایک دن میں 102 افراد جاں بحق ہوئے جس کے بعد وائرس سے مرنے والوں کی تعداد 20 ہزار 89 ہوگئی۔ پنجاب میں 9 ہزار 704، سندھ میں 4 ہزار 869، خیبر پختونخوا میں 3 ہزار 875، اسلام آباد میں 741، بلوچستان میں 270، گلگت بلتستان میں 107 اور آزاد کشمیر میں 523 مریض جان سے ہاتھ دھو بیٹھے۔

اسلام آباد: بیرون ملک مقیم پاکستانیوں کو ووٹ ڈالنے اور الیکٹرانک ووٹنگ مشینوں (ای وی ایم) متعارف کرانے کی اجازت دینے کے بارے میں محتاط ردعمل کے طور پر چیف الیکشن کمشنر (سی ای سی) سکندر سلطان راجا نے انتخابات میں قابل اعتماد اور آزمائی ہوئی ٹیکنالوجی کے استعمال کی ضرورت پر زور دیا ہے۔

رپورٹ کے مطابق بیرون ملک مقیم پاکستانیوں کو ووٹ کے حق کی فراہمی اور انتخابات میں الیکٹرانک ووٹنگ مشین متعارف کروانے سے متعلق اجلاس کی صدارت کرتے ہوئے انہوں نے کہا کہ الیکشن کمیشن آف پاکستان (ای سی پی) ٹیکنالوجی کے استعمال کے خلاف نہیں ہے لیکن اسے محفوظ ہونا چاہیے۔

انہوں نے کہا کہ انتخابات کی شفافیت، منصفانہ اور غیر جانبداری کو یقینی بنانے کے لیے انتہائی محتاط رہنے کی ضرورت ہے۔

اجلاس میں سیکریٹری، ممبران اور ای سی پی کے سینئر افسران نے شرکت کی۔

اجلاس کے دوران الیکشن کمیشن نے انٹرنیٹ ووٹنگ سے متعلق تھرڈ پارٹی کے آڈٹ رپورٹ کو شیئر کرنے کے لیے وزارت انفارمیشن ٹیکنالوجی کو خط لکھنے کا فیصلہ کیا۔

ای سی پی نے وزارت سائنس اور ٹیکنالوجی کی طرف سے 31 مئی تک ایک ای وی ایم بنانے اور اس کا ڈیمو کمیشن کو دیے جانے کی خواہش کا اظہار کیا۔

واضح رہے کہ ای سی پی نے بیرون ملک مقیم پاکستانیوں کو ووٹ کا حق دینے کے لیے پائلٹ منصوبے شروع کیے تھے اور دسمبر 2018 میں ان کی رپورٹیں وفاقی حکومت کو پیش کی گئیں۔

اس ضمن میں حکومت نے وزارت انفارمیشن ٹیکنالوجی سے آڈٹ کروانے کو کہا اور وزارت نے یہ کام ہسپانوی ادارے منسائٹ کو تفویض کیا۔

آڈٹ رپورٹ پیش کرنے کی آخری تاریخ 31 مئی ہے۔

کمیشن نے یہ رپورٹ طلب کی ہے تاکہ اس پر مزید کام کیا جاسکے۔

ای سی پی سیکریٹری کی سربراہی میں ایک کمیٹی تشکیل دی گئی ہے جس میں متعلقہ تمام عہدیدار شامل ہیں جو اس سلسلے میں اب تک ہونے والے تمام کاموں کو اکٹھا کریں گے اور اپنی سفارشات کے ساتھ کمیشن کے اگلے اجلاس میں بریفنگ دیں گے۔

ای سی پی نے ان رپورٹس کا خیرمقدم کیا ہے جس میں بتایا گیا ہے کہ حکومت نے کابینہ اور پارلیمنٹ میں بیرون ملک مقیم پاکستانیوں اور ای وی ایم کے لیے انٹرنیٹ ووٹنگ سے متعلق کمیشن کی رپورٹس پر بحث کرنے کا فیصلہ کیا ہے۔

کمیشن نے خواہش ظاہر کی کہ بحث کا نتیجہ اس تک پہنچادیا جائے تاکہ اسے استعمال کیا جاسکے۔

خیال رہے کہ پاکستان تحریک انصاف (پی ٹی آئی) 2013 کے عام انتخابات کے بعد سے ہی ان دو معاملات کو اٹھارہی ہے۔

سابق وزیر خزانہ اسحٰق ڈار کی سربراہی میں انتخابی اصلاحات سے متعلق پارلیمانی کمیٹی میں پی ٹی آئی کے ممبران نے متعدد مواقع پر ان معاملات کو اٹھایا اور یہ پی ٹی آئی کے اصرار پر ہی الیکشن ایکٹ 2017 میں دفعہ 94 (1) اور 103 کو شامل کیا گیا۔

صدر مملکت ڈاکٹر عارف علوی بھی اس وقت کمیٹی کے رکن تھے اور ای وی ایم کے استعمال اور بیرون ملک مقیم پاکستانیوں کو ووٹ کے حق کی فراہمی کے لیے ای سی پی کو راضی کرنے میں پیش پیش تھے۔

ای سی پی نے بالآخر 2015 میں چار ممالک میں بیرون ملک مقیم پاکستانیوں کے ووٹ ڈالنے کے لیے مشق کی تھی۔

بعدازاں ای سی پی کے عہدیداروں نے کمیٹی کو بتایا کہ سعودی عرب، برطانیہ، امریکا اور متحدہ عرب امارات میں کی جانے والی یہ مشق متعدد تکنیکی اور قانونی وجوہات کی بنا پر پر ناکام رہی۔

پاکستان میں کورونا وائرس کے کیسز میں واضح کمی اور نیشنل کمانڈ اینڈ آپریشن سینٹر (این سی او سی) کی جانب سے پابندیوں میں نرمی کے بعد انفیکشنز میں دوبارہ اضافہ دیکھنے میں آرہا ہے۔

سرکاری سطح پر عالمی وبا کے اعداد و شمار مرتب کرنے والی سرکاری ویب سائٹ کے مطابق گزشتہ 24 گھنٹوں میں ملک میں 4 ہزار 207 افراد وائرس سے متاثر ہوئے جبکہ مزید 131 افراد انتقال کر گئے۔

ملک میں 19 مئی کو مجموعی طور پر کووڈ-19 کی تشخیص کے لیے51 ہزار 130 ٹیسٹ کیے گے جس میں کیسز کے مثبت آنے کی شرح 8.22 فیصد رہی اور فعال کیسز 66 ہزار 282 ہو گئے ہیں۔

پاکستان میں اب تک 8 لاکھ 90 ہزار 391 افراد کے وائرس سے متاثر ہونے کی تصدیق ہوچکی ہے جن میں سے 19 ہزار 987 زندگی کی بازی ہار گئے۔

علاوہ ازیں گزشتہ 24 گھنٹوں میں وائرس کا شکار مزید 4 ہزار 171 افراد صحتیاب ہوئے یوں کورونا سے صحتیاب ہونے والے مریضوں کی مجموعی تعداد 8 لاکھ 4 ہزار 122 تک جاپہنچی ہے۔

واضح رہے کہ پاکستان میں کورونا وائرس کے پہلے کیس کی تصدیق 26 فروری 2020 کو ہوئی تھی، جس کے بعد سے وبا کے پھیلاؤ میں اتار چڑھاؤ جاری ہے اور اب تک وائرس کی 3 لہریں دیکھی جاچکی ہیں۔

ملک میں 20 مئی 2021 کو کورونا وائرس کیسز اور اموات کی صورتحال کچھ یوں ہے:

پنجاب
کورونا وبا کی تیسری لہر کے دوران سب سے زیادہ متاثر ہونے والے صوبے پنجاب میں کیسز میں دوبارہ اضافہ دیکھنے میں آرہا ہے اور گزشتہ 24 گھنٹوں کے دوران یہاں کورونا کے مزید ایک ہزار 189 کیسز رپورٹ ہوئے جبکہ 77 مریض انتقال کر گئے۔

پنجاب میں مجموعی طو پر کورونا وائرس سے 3 لاکھ 31 ہزار 102 افراد متاثر جبکہ 9 ہزار 640 انتقال کرچکے ہیں۔

سندھ
صوبہ سندھ میں وبا کا پھیلاؤ بڑھ رہا ہے اور یہاں کئی ماہ کے بعد گزشتہ 24 گھنٹوں میں کورونا وائرس کے 2 ہزار 76 کیسز کی تصدیق ہوئی جبکہ مزید 19 مریض دم توڑ گئے۔

مذکورہ اضافے کے بعد سندھ میں کورونا سے متاثرہ افراد کی مجموعی تعداد 3 لاکھ30 ہزار 323 جبکہ اموات کی مجموعی تعداد 4 ہزار 854 تک جاپہنچی ہے۔

خیبرپختونخوا
کورونا وائرس کی تیسری لہر نے پنجاب کے بعد خیبرپختونخوا کو زیادہ متاثر کیا تھا اور یہاں گزشتہ روز کووڈ-19 کے مزید 424 کیسز اور 28 اموات رپورٹ ہوئیں۔

اب تک خیبر پختونخوا میں مجموعی طور پر ایک لاکھ 28 ہزار 33 افراد وبا سے متاثر جبکہ 3 ہزار 855 لقمہ اجل بن چکے ہیں۔

بلوچستان
گزشتہ 24 گھنٹوں کے دوران ملک کے سب سے وسیع صوبے میں مزید 159 افراد وائرس سے متاثر پائے گئے جو 7 مئی کے بعد سب سے بڑی تعداد ہے۔

علاوہ ازیں صوبے میں مزید 3 مریض دم توڑ گئے، نئے کیسز کے اضافے کے بعد بلوچستان میں عالمی وبا سے متاثرہ افراد کی مجموعی تعداد 24 ہزار 223 ہوگئی جبکہ اموات کی تعداد 270 پر برقرار ہے۔

اسلام آباد
کورونا کی تیسری لہر نے وفاقی دارالحکومت اسلام آباد کو بھی متاثر کیا ہے جہاں گزشتہ 24 گھنٹوں میں کورونا وائرس کے مزید 234 کیسز اور 5 اموات رپورٹ ہوئیں۔

اسلام آباد میں کورونا متاثرین کی مجموعی تعداد 79 ہزار 789 ہے جبکہ 740 افراد وبا سے انتقال کرچکے ہیں۔

آزاد کشمیر
آزاد کشمیر میں گزشتہ 24 گھنٹوں کے دوران کورونا وائرس کے مزید109 کیسز کی تصدیق ہوئی کو 5 مئی کے بعد یومیہ کیسز کی سب سے بڑی تعداد ہے اور 2 مریض دم توڑ گئے۔

مذکورہ اضافے کے بعد آزاد کشمیر میں کورونا وائرس مجموعی طور پر 18 ہزار 469 افراد کو متاثر کرچکا ہے جبکہ 521 افراد کی موت کا سبب بھی بنا ہے۔

گلگت بلتستان
کورونا وائرس سے سب سے کم گلگت بلتستان متاثر ہوا ہے اور وہاں گزشتہ 24 گھنٹوں میں 13 کیس سامنے آئے اور 30 اپریل کے بعد سے مزید کوئی موت رپورٹ نہیں ہوئی۔

گلگت بلتستان میں کورونا وائرس سے متاثرہ افراد کی مجموعی تعداد 5 ہزار 452 جبکہ اموات کی مجموعی تعداد 107 ہے۔

سوات میں ’خودکشی‘ کا منظر فلمانے کے دوران 19 سالہ لڑکا ٹک ٹاکر حادثاتی طور پر گولی چلنے سے جاں بحق ہوگیا۔

واقعہ تحصیل کبل میں پیش آیا۔

کبل پولیس نے تصدیق کی کہ واقعہ اس وقت پیش آیا جب وہ پستول کے ساتھ ٹک ٹاک ویڈیو بنا رہا تھا اور اس دوران گولی چل گئی۔

ڈی ایس پی کبل حضرت بادشاہ نے بتایا کہ ہماری ابتدائی رپورٹ کے مطابق مابند شاہ ڈھیرائی کا رہائشی حمید اللہ اپنے ٹک ٹاک اکاؤنٹ کے لیے ایک خودکشی کا منظر فلما رہا تھا کہ اس دوران پستول چل گئی۔

اطلاع ملنے پر پولیس موقع پرپہنچ گئی اور ابتدائی معلومات جمع کرکے لاش کو پوسٹ مارٹم کے لیے کبل اسپتال منتقل کردی۔

عینی شاہدین اور جاں بحق لڑکے کے دوستوں نے بتایا کہ حمید اللہ تحصیل قبال کا مشہور ٹک ٹاکر تھا۔

انہوں نے بتایا کہ خودکش ویڈیو بنانے کا ارادہ کیا تھا اور پستول کا بندوبست کیا۔

پولیس کو بتایا گیا کہ پستول میں گولیوں سے بے خبر وہ اپنے دوستوں کے ساتھ قریبی پہاڑ پر گیا جہاں انہوں نے ویڈیو بنانی شروع کی۔

ایک عینی شاہد نے بتایا جب اس نے اپنی کنپٹی پر پستول رکھی تو وہ اتفاقی طور پر چل گئی۔

ان کے دوستوں نے بتایا کہ حمید اللہ نے ویڈیو کے لیے غمزدہ ماحول کی مناسب سے میوزک بھی تیار کیا تھا۔

یہ اپنی نوعیت کا پہلا واقعہ نہیں اس سے قبل بھی متعدد واقعات میں ٹک ٹاکرز اپنے صارفین کی تعداد بڑھانے کے لیے خطرناک ویڈیو بتاتے ہوئے زندگی سے ہاتھ دھو بیٹھے ہیں۔

کم و بیش اسی طرح کا ایک واقعہ دو برس قبل بھارت میں پیش آیا تھا جب ٹک ٹاک پر ویڈیو بنانے کے دوران دوست کی جانب سے چلائی گئی گولی لگنے سے 19 سالہ بھارتی نوجوان ہلاک ہوگیا تھا۔

یہ واقعہ ایسے وقت پر پیش آیا تھا جب بھارت کی وفاقی حکومت نے ایپل اور گوگل کو اس ایپلی کیشن کو انڈیا میں اپنے اسٹور سے ہٹانے کا حکم دیا تھا۔

علاوہ ازیں کچھ ایسی بھی خبریں منظر عام پر آئیں جب شہرت کے نشے میں چور بعض ٹک ٹاکرز نے اپنے دوست ٹک ٹاکرز کو مبینہ طور پر قتل کردیا۔

اس کی حالیہ مثال کراچی میں ہونے والے واقعے کی صورت میں موجود ہے جب کراچی کی مقامی عدالت نے خاتون ٹِک ٹاکر اور دیگر 3 افراد کے مبینہ قتل کے مقدمے میں نامزد خاتون کو جسمانی ریمانڈ پر پولیس کے حوالے کردیا تھا۔

پولیس نے 2 فروری کو گارڈن کے علاقے میں مسکان، عامر، ریحان اور سجاد کے قتل میں سویرا نامی ملزمہ کو حراست میں لے کر ان کے خلاف مقدمہ درج کیا تھا۔

جنوری 2021 میں ایک وقاص انور گجر ایڈووکیٹ نے لاہور ہائی کورٹ میں بیگو، ٹک ٹاک اور لائیکی سمیت تمام سوشل میڈیا ایپلی کیشنز پر پابندی کے لیے درخواست دائر کی تھی اور مؤقف اختیار کیا تھا کہ بیگو، ٹک ٹاک، لائیکی اور دیگر سوشل میڈیا ایپلی کیشنز کے ذریعے نوجوان اپنا وقت ضائع کر رہے ہیں، جبکہ بیگو سمیت تمام سوشل میڈیا ایپلی کیشنز کے ذریعے بیہودگی، عریانیت اور غیر اخلاقی حرکات کو فروغ دیا جارہا ہے۔