Category پاکستان

لاہور: سرکاری ملازمین کی تنخواہوں میں تفاوت دور کرنے کیلئے وزیراعلیٰ پنجاب نے قابل تحسین فیصلہ کرتے ہوئے تنخواہوں میں اضافے کی منظوری دے دی ہے۔

تفصیل کے مطابق وزیراعلیٰ عثمان بزدار کے زیر صدارت سرکاری ملازمین کی تنخواہوں میں فرق دور کرنے کیلئے خصوصی کمیٹی کا اجلاس ہوا جس میں صوبائی وزرا راجہ محمد بشارت، میاں محمد اسلم اقبال، ہاشم جواں بخت، سید حسین جہانیاں گردیزی، پرنسپل سیکرٹری وزیراعلیٰ، ایڈیشنل چیف سیکرٹری، سیکرٹری فنانس اور دیگر حکام نے شرکت کی۔

وزیراعلیٰ عثمان بزدار نے 15 اور 10 فیصد سپیشل الاؤنس کی تجاویز مسترد کرتے ہوئے ہدایات جاری کی ہیں کہ سرکاری ملازمین کو 25 فیصد سپیشل الاؤنس دیا جائے۔

وزیراعلیٰ عثمان بزدار کی ہدایت پر گریڈ 1 سے 19 تک 7 لاکھ 21 ہزار سے زائد صوبائی ملازمین کو سپیشل الاؤنس دیا جائے گا۔ پہلے سے سپیشل ایگزیکٹو الاؤنس لینے والے ملازمین اس سے فائدہ نہیں اٹھا سکیں گے۔ آئندہ ماہ جون میں سپیشل الاؤنس تنخواہوں میں شامل کر دیا جائے گا۔

وزیراعلیٰ کی جانب سے جاری بیان میں کہا گیا ہے کہ سرکاری ملازم ہمارے دست و بازو ہیں، ان کے مسائل کا احساس ہے۔ بجٹ میں بھی صوبائی ملازمین کے لئے خوشخبری ہوگی۔

روہڑی کے قریب دبر تھانے کی حدود میں مسافر کوچ الٹ گئی جس کے نتیجے میں 13 مسافر جاں بحق جبکہ متعدد زخمی ہوگئے۔

ڈپٹی کمشنر سکھر رانا عدیل نے بتایا کہ ملتان سے کراچی آنے والی کوچ کو حادثہ کلر گوٹھ کے مقام پر پیش آیا۔

انہوں نے حادثے میں 13 افراد کی ہلاکتوں کی تصدیق کرتے ہوئے بتایا کہ جاں بحق افراد میں سے 11کی لاشیں روہڑی اور 2 کی لاش پنوعاقل ہسپتال پہنچا دی گئی ہیں۔

رانا عدیل نے بتایا کہ زخمیوں کو روہڑی، پنوعاقل اور سکھر کے ہسپتالوں میں منتقل کردیا گیا ہے۔

دوسری جانب ترجمان موٹروے پولیس ساوتھ زون انسپکٹر محمد خالد بھٹو نے بتایا کہ ابتدائی تفتیش سے معلوم ہوا کہ مسافر کوچ کا ٹائی راڈ ٹوٹنے کی وجہ سے حادثہ پیش آیا۔

ترجمان موٹروے پولیس کا کہنا تھا کہ حادثے میں زخمیوں میں دو کی حالات نازک ہے جبکہ معمولی زخمی ہونے والے تمام 9 افراد کا تعلق ملتان سے ہے۔

حادثے میں جاں بحق ہونے والوں کی تعداد سے متعلق محمد خالد بھٹو نے بتایا کہ صبح 8 بجے تک متوفیوں کی تعداد 9 تھی۔

انہوں نے بتایا کہ حادثے میں جاں بحق ہونے والوں میں محمد ریاض ولد محمد رمضان، محمد اجمل ولد رحیم بخش، اللہ دتا ولد نذیر ڈوگر، غلام عباس ولد ایم ڈی، ندیم ولد اختر، شکیل، لطیف ولد ولی محمد، عمران اورمحمد فاروق شامل ہیں۔

ان کا کہنا تھا کہ شدید زخمی ہونے والوں میں 45 سالہ فیصل اور 35 سالہ عدیل ہیں۔

علاوہ ازیں محمد خالد نے بتایا کہ متاثرین کے اہلخانہ کو معلومات فراہم کرنے کے لیے روہڑی میں ہیلپ ڈیسک قائم کردی گئی ہے۔

حکام نے حادثے کی اطلاع پر روہڑی، پنو عاقل اور سکھر کے ہسپتالوں میں ایمرجنسی نافذ کردی جبکہ ڈاکٹر اور عملے کو گھروں سے طلب کرلیا۔

ترجمان موٹروے پولیس نے بتایا کہ ریسکیو ٹیم کی مدد سے الٹنے والی بس کو سیدھا کردیا گیا ہے۔

انہوں نے بتایا کہ کوچ کے مسافروں میں اکثریت مزدور طبقے سے تھی جو عید کی چھٹیاں گزار کر واپس کراچی جا رہے تھے۔

کراچی: سندھ ہائیکورٹ نے خیبرپختونخوا میں لاپتا افراد کے بارے میں حراستی مراکز سے تفصیلات جمع نہ کرانے اور ان کے احکامات کی مسلسل خلاف ورزی پر وزارت داخلہ کے وفاقی سیکریٹری کی گرفتاری کے ناقابل ضمانت وارنٹ گرفتاری جاری کردیے۔

رپورٹ کے مطابق جسٹس محمد کریم خان آغا کی سربراہی میں دو ججز پر مشتمل بینچ نے اسلام آباد پولیس کے انسپکٹر جنرل کو ہدایت کی کہ وہ سیکریٹری داخلہ یوسف نسیم کھوکھر کو گرفتار کریں اور انہیں 27 مئی کو عدالت کے سامنے پیش کریں۔

بینچ نے سیکریٹری وزارت داخلہ کو بھی شوکاز نوٹس جاری کرتے ہوئے سوال کیا کہ اس کے احکامات کی خلاف ورزی پر ان کے خلاف کارروائی کیوں نہیں کی جائے اور دوبارہ انہیں ہدایت کی کہ خیبر پختونخوا میں حراستی مراکز کی فہرست پیش کی جائے جس میں وہاں زیر حراست افراد کے نام ہوں اور ان ناموں کو واضح کیا جائے جو لاپتا افراد ہیں اور جن کے مقدمات سندھ ہائی کورٹ میں زیر سماعت ہیں۔

جب بینچ نے لاپتا افراد کے بارے میں درخواستوں کے ایک سیٹ پر سماعت کی تو سیکریٹری داخلہ غیر حاضر رہے اور انہوں نے صرف ایک لاپتا شخص کے بارے میں باضابطہ رپورٹ ارسال کی تھی۔

بینچ نے کہا کہ سیکریٹری داخلہ نے ڈپٹی سیکریٹری ندیم بھٹی کو عدالت کی مدد کے لیے بھیجا تھا لیکن ان کے پاس فائل کرنے کے لیے کوئی رپورٹ نہیں ہے۔

اس میں مزید کہا گیا کہ بینچ نے لاپتا افراد کی مختلف درخواستوں میں گزشتہ سماعتوں پر متعدد احکامات جاری کیے تھے جس میں سیکریٹری داخلہ کو حراستی مراکز سے رپورٹیں اکٹھا کرکے جمع کروانے کی ہدایت کی گئی تھیں اور 5 مارچ کو وزارت داخلہ کے جوائنٹ سیکریٹری نے ایک رپورٹ دائر کی تھی جس میں یہ دعوٰی کیا گیا تھا کہ حراستی مراکز خیبر پختونخوا حکومت کے زیر انتظام ہیں اور انہوں نے رپورٹ پیش کرنے کے لیے اس سے رجوع کیا ہے۔

سیکریٹری داخلہ کی بھیجی گئی تازہ رپورٹ میں یہ دعوٰی کیا گیا کہ ایک لاپتا شخص سید علی مہدی نقوی کے پی میں کسی بھی حراستی مرکز میں نہیں اور یہ معاملہ بھی سپریم کورٹ کے سامنے زیر التوا ہے۔

تاہم بینچ نے مشاہدہ کیا کہ سیکریٹری نے اپنے پہلے کے احکامات کی پوری طرح تعمیل نہیں کی اور اس حقیقت کو چھپانے کی کوشش کی کہ یہ معاملہ سپریم کورٹ کے سامنے زیر التوا ہے۔

بینچ نے مزید کہا کہ سیکریٹری پھر سے اپنے احکامات کی تعمیل کرنے میں ناکام رہے ہیں اور انہوں نے نہ تو عدالت میں پیش ہونے کی زحمت کی ہے اور نہ ہی ایک اضافی یا جوائنٹ سیکریٹری کو عدالت کی معاونت کے لیے بھیجا ہے بلکہ ڈپٹی سیکریٹری کو سماعت میں شریک ہونے کے لیے کہا ہے۔

اس میں مزید کہا گیا کہ ‘یہ اس بات کا واضح اشارہ ہے کہ لاپتا افراد کا پتا لگانے میں انہیں بہت کم دلچسپی ہے اور انہیں اس عدالت کے احکامات کا احترام نہیں ہے جس کی وہ مسلسل خلاف ورزی کرتے ہیں’۔

بینچ نے اپنے حکم میں مزید کہا کہ ‘اس صورتحال میں ہمارے پاس کوئی چارہ نہیں ہے کہ وہ سیکریٹری وزارت داخلہ یوسف نسیم کھوکھر، جو خود کو ایک غیر معمولی اہم شخص اور قانون سے بالاتر سمجھتے ہیں، کے خلاف ناقابل ضمانت وارنٹ جاری کریں۔

عدالت نے اسلام آباد پولیس کے آئی جی کو ہدایت کی کہ وہ وارنٹ گرفتاری پر عملدرآمد کو یقینی بنائے اور 27 مئی کو عدالت کے سامنے سیکریٹری داخلہ کو پیش کرے۔

قبل ازیں بینچ نے لاپتا افراد کی مختلف درخواستوں میں جاری کردہ اپنی ہدایات پر عمل نہ کرنے پر سیکریٹری داخلہ کو شوکاز نوٹس بھی جاری کیا تھا جس میں کہا گیا تھا کہ وہ لاپتا افراد کے بارے میں کے پی میں حراستی مراکز سے تفصیلات فراہم کرے۔

بینچ نے ان کیسز میں بہت کم دلچسپی لینے پر وفاقی حکام پر برہمی کا اظہار بھی کیا تھا اور کہا تھا کہ لاپتا ہونے کے خلاف ابھی تک کوئی قانون سازی نہیں کی گئی ہے۔

مزید یہ ریمارکس دیئے گئے تھے کہ وفاقی حکومت لاپتا افراد کا سراغ لگانے کے بارے میں آواز بلند کررہی ہے لیکن سیکریٹری داخلہ اور دفاع کے طرز عمل سے ظاہر ہوا ہے کہ یہ صرف دکھاوے کے لیے ہے اور اس پر عملی اقدام نہیں کیا جارہا ہے۔

کراچی: وزیراعلیٰ سندھ مراد علی شاہ کا کہنا ہے کہ سندھ میں کیسز بڑھ رہے ہیں، صوبے میں نرمی کرنا مشکل ہوتا ہوا لگ رہا ہے۔

وزیراعلیٰ سندھ مراد علی شاہ کی زیر صدات کورونا وائرس کے صوبائی ٹاسک فورس کا اجلاس ہوا، جس میں صوبائی وزراء، چیف سیکریٹری، آئی جی پولیس، ایڈیشنل چیف سیکریٹری داخلہ، کمشنر کراچی، ایڈیشنل آئی جی کراچی، کور فائیو، رینجرز اور ڈبلیو ایچ او کے نمائندے بھی شریک ہوئے۔

مراد علی شاہ کا کہنا تھا کہ کل 20421 ریکارڈ کورونا ٹیسٹ کیے گئے جس میں 9000 صرف کراچی کے تھے، ان میں سے 2 ہزار 76 کیسز مثبت آئے جو 10 اعشاریہ 2 فیصد ہے، صرف کراچی میں 16 اعشاریہ 82 فیصد کیسز مثبت آئے۔

وزیراعلیٰ سندھ نے کہا کہ عید الفطر 13 مئی کو ہوئی اس دن صوبے میں 1232 کیسز تھے، عید کے بعد 19 مئی کو 2076 کیسز آئے جو 10.2 فیصد ہیں، اس سے ظاہر ہوتا ہے کہ سندھ میں کیسز بڑھ رہے ہیں، ہمیں صوبے میں نرمی کرنا مشکل ہوتا ہوا لگ رہا ہے۔

ترجمان وزیراعلیٰ سندھ کے مطابق ٹاسک فورس کے ممبران اور ماہرین نے وزیراعلیٰ سندھ کو موجودہ بندش کو جاری رکھنے کا مشورہ دیا، اور کہا کہ ہوسکے تو مزید سخت فیصلے کریں۔ اجلاس میں ٹاسک فورس نے حالیہ بندشوں کو برقرار رکھنے کا فیصلہ کرلیا گیا۔

ترجمان نے بتایا کہ ہفتے کو ٹاسک فورس کا دوبارہ اجلاس ہوگا، جس میں صورتحال کا جائزہ لیا جائے گا، اگر کیسز کی شرح کم ہوئی تو نرمی اور اگر بڑھ گئے تو مزید سختی کریں گے۔ وزیراعلیٰ سندھ نے ٹاسک فورس کے ممبران کو ہدایت کی کہ صورتحال کا جائزہ لیکر مزید اقدامات کے لئے اپنی تجاویز دیں۔ جب کہ ڈبلیو ایچ او کے نمائندے بھی ہفتے کے اجلاس میں اپنی سفارشات دیں گے۔

آڈیٹر جنرل نے انکشاف کیا ہے کہ کورونا وبا کیلئے دئیے گئے مالیاتی پیکج میں بے ضابطگیاں ہوئیں۔

کورونا وبا کے دوران 12 کھرب روپے سے زائد کے پیکج میں بے ضابطگیوں کا انکشاف ہوا ہے، اور آڈیٹرجنرل پاکستان نے تصدیق کرتے ہوئے کہا ہے کہ کورونا وبا کیلئے دئیے گئے مالیاتی پیکج میں بے ضابطگیاں ہوئیں۔

آڈیٹر جنرل نے بتایا کہ کورونا وبا کے دوران آئی ایم ایف نے پاکستان کو 1 ارب 38 کروڑ ڈالر رقم فراہم کی تھی اور یہ رقم کورونا وبا کی روک تھام کیلئے پاکستان کی امداد کے طور پر فراہم کی گئی تھی، جب کہ حکومت نے آئی ایم ایف شرائط پر کووڈ اخراجات کے آڈٹ کا فیصلہ کیا گیا تھا۔
آڈیٹرجنرل کے مطابق آڈیٹر جنرل آف پاکستان کی جانب سے رپورٹ مکمل کی جا چکی ہے، تاہم اے جی پی کو وزارت خزانہ کی جانب سے رپورٹ کی اشاعت سے روکا گیا ہے، وزارت خزانہ نے آڈیٹر جنرل کی خصوصی آڈٹ رپورٹ کو ڈسکس کرنے کیلئے وقت مانگا ہے، وزارت خزانہ سے تصدیق ہونے کے بعد خصوصی رپورٹ شائع کی جائے گی۔

آرمی چیف جنرل قمر جاوید باجوہ سرکاری دورہ پر یوکرین پہنچ گئے جہاں انہوں نے یوکرینی وزیراعظم اور ڈپٹی وزیراعظم سے ملاقاتیں کیں۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سرکاری دورہ پر یوکرین پہنچ گئے اس موقع پر آرمی چیف نے یوکرینی وزیراعظم اور ڈپٹی وزیراعظم سے ملاقاتیں کیں، آرمی چیف کی یوکرین کے وزیربرائے صنعت سے بھی ملاقات ہوئی۔ ملاقاتوں میں افغان امن عمل اور باہمی دلچسپی کے امورپر تبادلہ خیال کیا گیا۔

ترجمان پاک فوج کے مطابق یوکرینی وزیراعظم اور نائب وزیراعظم نے خطے میں قیام امن کیلئے پاکستان کی کوششوں کو سراہا۔ ملاقات میں دونوں ممالک کے مابین دفاعی تعاون کے فروغ پر بھی تبادلہ خیال کیا گیا۔

آرمی چیف نے یوکرینی وزیردفاع اور یوکرینی مسلح افواج کے سربراہ سے بھی ملاقات کی۔ آرمی چیف کو وزارت دفاع پہنچنے پر گارڈ آف آنر پیش کیا گیا۔ ملاقات میں دونوں ممالک نے ملٹری ٹو ملٹری تعلقات کو وسعت دینے پر اتفاق کرتے ہوئے کہا کہ دفاعی پیداوار، تربیت، انسداد دہشتگردی اور انٹیلجنس کے شعبوں میں تعاون بڑھایا جائے گا۔

اس موقع پر پاک فوج کے سربراہ کا کہنا تھا کہ پاکستان یوکرین کے ساتھ مختلف شعبوں میں تعلقات کو اہمیت دیتا ہے، دونوں ممالک بامقصد تعلقات کو وسعت دے سکتے ہیں۔

نیشنل کمانڈ اینڈ آپریشن سینٹر (این سی او سی) نے ملک بھر میں کورونا کیسز کا جائزہ لینے کے بعد فیصلہ کیا ہے کہ 24 مئی 2021 سے آؤٹ ڈور ریسٹورنٹس اور 5 فیصد سے کم مثبت شرح کے حامل اضلاع میں تعلیمی ادارے سمیت دیگر شعبوں کو مرحلہ وار کھول دیا جائے گا۔

این سی او سی کی جانب سے جاری اعلامیے میں کہا گیا ہے کہ وفاقی وزیر منصوبہ بندی اسد عمر کی زیرصدارت این سی او سی کا اجلاس ہوا جہاں لیفٹننٹ جنرل حمودالزمان نے بھی اجلاس کی مشترکہ صدارت کی، وزیراعظم کے معاون خصوصی برائے صحت، وزیر صحت سندھ اور تمام وفاقی اکائیوں کے چیف سیکریٹریز نے ویڈیولنک کے ذریعے شرکت کی۔

بیان میں کہا گیا کہ اجلاس میں ملک میں کورونا کی صورت حال کا تفصیل سے جائزہ لیا گیا اور اہم فیصلے کیے گئے۔

این سی او سی نے 24 مئی 2021 سے اہم شعبوں کو ملک بھر میں تمام احتیاطی تدابیر کے ساتھ کھولنے کا فیصلہ کیا۔

درج ذیل شعبے 24 مئی 2021 سے کھول دیے جائیں گے۔

• آؤٹ ڈور ریسٹورنٹس رات 12بجے تک جبکہ کھانا ساتھ لے جانے کی سہولت 24 گھنٹے دستیاب ہوگی۔

• سیاحت کا شعبہ کووڈ پروٹوکولز کی مکمل پاسداری کے ساتھ کھول دیا جائے گا اور صوبوں کو اس حوالے سے الگ ہدایات جاری کردی جائیں گی۔

• تعلیمی ادارے مشروط کھول دیے جائیں گے جن اضلاع میں کیسز کی مثبت شرح 5 فیصد سے کم ہوگی وہاں ادارے کھولنے کی اجازت ہوگی۔

• این سی او سی کے مطابق 27 مئی کو جائزہ لینے کے بعد یکم جون سے کھلے مقامات میں شادی کی تقریبات کی اجازت ہوگی تاہم شرکا کی تعداد 150 تک محدود ہوگی۔

• یکم جون سے مخصوص سرجریز کی بھی اجازت ہوگی۔

• اسی طرح جو تعلیمی ادارے 24 مئی کو نہیں کھلے ہوں وہ بھی 7 جون کو کھلیں گے۔

• میٹرک اور انٹرمیڈیٹ کے تمام امتحانات 20 جون کے بعد منعقد ہوں گے، تمام پروفیشنلز اور نان پروفیشنلز امتحانات وزارت صحت کی تجویز پر کیس ٹو کیس کی بنیاد پر ہوں گے۔

این سی او سی نے جن شعبوں پر بندشیں برقرار رکھی ہیں، ان میں درج ذیل شامل ہیں:

• تمام مزارات، سنیما، پارکس، انڈور جم بدستور بند رہیں گے تاہم ایس او پیز پر سختی کے ساتھ ٹریکس پر واکنگ اور جوگنگ کی اجازت ہوگی۔

• ہوٹلوں کے اندر کھانے کی اجازت نہیں ہوگی۔

• کھیل، میلے، ثقافتی، موسیقی اور دیگر پروگراموں پر پابندی ہوگی۔

• کھلے اور بند مقامات میں تمام قسم کے اجتماعات بشمول مذہبی اجتماعات پر پابندی ہوگی۔

• بین الصوبائی ٹرانسپورٹ پر22 مئی سے ہفتے میں دو دن پابندی ہوگی۔

این سی او سی کے اجلاس میں فیصلہ کیا گیا کہ گڈانی اور مسری شاہ انڈسٹریز کو 20 مئی سے کھول دیا جائے گا تاہم ماسک پر زور دیتے ہوئے کہا گیا کہ کیسز والے مقامات پر لاک ڈاؤن پر سختی سے عمل درآمد کیا جائے گا۔

بیان کے مطابق داخلی سفری اور لینڈ بارڈر منیجمنٹ کی پالیسی کو فی الحال برقرار رکھاجائے گا۔

این سی او سی کا کہنا تھا کہ 27 مئی اور 7 جون کو تفصیلی جائزہ لیا جائے گا اور وائرس کے پھیلاؤ کو روکنے کے لیے مناسب اقدامات کیے جائیں گے۔

قبل ازیں وفاقی وزیر منصوبہ بندی اسد عمر نے کہا تھا کہ اس وقت ہسپتالوں میں 4 ہزار 500 مریض آکسیجن پر ہیں اور اگر فوری طور پر کئی شعبوں کو کھول دیتے ہیں تو مسئلہ ہوجاتا۔

ان کا کہنا تھا کہ ہمیں ویکسینیشن کے ہدف کو پورا کرنا ہے اور عوام پر زور دیا کہ وہ ویکسین لگوائیں تاکہ حکومت پابندیاں ہٹانے میں آسانی ہوگی اور حالات معمول پر آئیں گے۔

اسد عمر نے کہا کہ خطے کے حوالے سے برطانیہ، امریکا اور یورپی ممالک کے جیسے حالات کا خوف تھا لیکن عوام اور انتظامیہ کا شکریہ کہ انہوں نے عیدالفطر کے دوران محنت کی۔

ان کا کہنا تھا کہ عید سکون سے گزر گئی، اس وقت وائرس کے پھیلاؤ کے معمولی خدشات پیدا ہوائے تھے تاہم زیادہ بہتری آئی ہے۔

پاکستان میں ایک مرتبہ پھر کورونا وائرس کے 3 ہزار سے زائد کیسز رپورٹ ہوئے اور صوبہ سندھ میں کیسز کی تعداد میں اضافہ ہو رہا ہے جبکہ 24 گھنٹوں میں مزید 104 افراد ہلاک ہو گئے۔

سرکاری سطح پر عالمی وبا کے اعداد و شمار مرتب کرنے والی سرکاری ویب سائٹ کے مطابق گزشتہ 24 گھنٹوں میں ملک میں 3 ہزار 256 افراد وائرس سے متاثر ہوئے جبکہ مزید 104 افراد انتقال کر گئے۔

ملک میں 18 مئی کو مجموعی طور پر کووڈ-19 کی تشخیص کے لیے 41 ہزار 771 ٹیسٹ کیے گئے جس کے بعد ملک میں فعال کیسز کم ہو کر 66 ہزار 377 رہ گئے ہیں۔

پاکستان میں اب تک 8 لاکھ 86 ہزار 184 افراد کے وائرس سے متاثر ہونے کی تصدیق ہوچکی ہے جن میں سے 19 ہزار 856 موت کے منہ میں جا چکے ہیں۔

گزشتہ 24 گھنٹوں میں وائرس کا شکار مزید 4 ہزار 440 افراد صحتیاب ہوئے یوں کورونا سے صحتیاب ہونے والے مریضوں کی مجموعی تعداد 7 لاکھ 99 ہزار 951 تک جاپہنچی ہے اور صحتیابی کی شرح 90.3فیصد ہے۔

واضح رہے کہ پاکستان میں کورونا وائرس کے پہلے کیس کی تصدیق 26 فروری 2020 کو ہوئی تھی، جس کے بعد سے وبا کے پھیلاؤ میں اتار چڑھاؤ جاری ہے اور اب تک وائرس کی 3 لہریں دیکھی جاچکی ہیں۔

موجودہ لہر کے دوران کورونا وائرس کے کیسز اور اموات میں اضافے کے پیشِ نظر عوام کو گھروں تک محدود رکھنے کے لیے عیدالفطر کے موقع پر تفریحی مقامات بشمول پبلک پارکس، پکنک پوائنٹس، سیاحتی مقامات، ساحلِ سمندر وغیرہ بند رکھے گئے تھے۔

ملک میں 19 مئی 2021 کو کورونا وائرس کیسز اور اموات کی صورتحال کچھ یوں ہے:

پنجاب
صوبہ پنجاب میں گزشتہ 24 گھنٹوں کے دوران ایک ہزار 138 افراد وائرس کا شکار ہوئے جبکہ 63 افراد انتقال کر گئے۔

صوبے میں وائرس سے مجموعی طور پر 3 لاکھ 29 ہزار 913 افراد وائرس کا شکار ہوئے اور اب تک 9 ہزار 563 ہلاک ہو چکے ہیں۔

سندھ
ملک کے دیگر حصوں کی نسبت صوبہ سندھ میں کیسز میں اضافہ ہو رہا ہے اور صوبے میں سب سے زیادہ ایک ہزار 334 کیسز رپورٹ ہوئے جبکہ 11 افراد ہلاک ہو گئے۔

صوبے میں اب تک 3 لاکھ ایک ہزار 247 افراد کورونا وائرس سے متاثر اور 4 ہزار 835 موت کے منہ میں جا چکے ہیں۔

خیبر پختونخوا
خیبر پختونخوا میں مزید 385 افراد میں وائرس کی تصدیق ہوئی جبکہ کووڈ-19 کے سبب 23 افراد کی موت واقع ہو گئی۔

صوبے میں اب تک وائرس سے ایک لاکھ 27 ہزار 609 افراد متاثر اور 3 ہزار 827 ہلاک ہو چکے ہیں۔

بلوچستان
صوبہ بلوچستان میں 133 افراد وائرس کا شکار ہوئے اور مزید تین افراد لقمہ اجل بن گئے۔

رقبے کے لحاظ سے ملک کے سب سے بڑے صوبے میں اب تک وائرس سے 24 ہزار افراد متاثر اور 270 انتقال کر چکے ہیں جبکہ 22 ہزار 747 صحتیاب بھی ہو چکے ہیں۔

اسلام آباد
اسلام آباد میں گزشتہ 24 گھنٹوں کے دوران 181 افراد میں وائرس کی تصدیق ہوئی اور مزید 2 افراد ہلاک ہو گئے۔

وفاقی دارالحکومت میں اب تک 79 ہزار 552 افراد وائرس سے متاثر ہو چکے ہیں جبکہ 735 کی موت واقع ہوچکی ہے۔

آزاد کشمیر
آزاد کشمیر میں کورونا کورونا وائرس کے مزید 74 نئے کیسز رپورٹ ہوئے اور 2 افراد انتقال کر گئے۔

کورونا وائرس سے آزاد کشمیر میں اب تک 18 ہزار 360 افراد متاثر اور 519 ہلاک ہوچکے ہیں۔

گلگت بلتستان
گلگت بلتستان اس وقت ملک کا سب سے کم متاثرہ علاقہ ہے جہاں گزشتہ 24 گھنٹوں کے دوران صرف 11 کیسز رپورٹ ہوئے اور کسی کی موت واقع نہیں ہوئی۔

گلگت بلتستان میں اب 5 ہزار 439 افراد وائرس سے متاثر اور 107 موت کے منہ میں جا چکے ہیں۔

اسلام آباد: چیئرمین نیب جاوید اقبال کا کہنا ہےکہ آٹا چینی اور رنگ روڈ اسکینڈل سمیت تمام کیسز کو منطقی انجام تک پہنچایا جائیگا۔

چیئرمین نیب جسٹس (ر) جاوید اقبال کی زیر صدارت نیب ایگزیکٹو بورڈ کا اجلاس ہوا جس میں ڈپٹی چیئرمین نیب، پراسیکیوٹرجنرل نیب، ڈی جی آپریشنز اور دیگر افسران شریک ہوئے۔

اس موقع پر چیئرمین نیب کا کہنا تھا کہ نیب نے بڑی مچھلیوں کے خلاف اربوں روپے کے 1269 ریفرنسز عدالتوں میں دائر کیے ہیں، نیب اور کرپشن ساتھ ساتھ نہیں چل سکتے اورکرپشن کا خاتمہ نیب کی اولین ترجیح ہے۔

انہوں نے کہا کہ نیب کا تعلق کسی سیاسی جماعت، گروہ یا فرد سے نہیں بلکہ صرف ریاست پاکستان سے ہے، نیب پربلاجواز تنقید کرنے والے عدالتوں میں ٹھوس شواہد کی بنیاد پر دائر ریفرنسز کا دفاع کریں۔

چیئرمین نیب کا کہنا تھا کہ نیب شوگر، آٹا اور رنگ روڈ اسیکنڈل، منی لانڈرنگ، جعلی اکاؤنٹس کیس کو منطقی انجام تک پہنچائے گا، اختیارات کا ناجائز استعمال، آمدن سے زائد اثاثے، غیرقانونی ہاؤسنگ سوسائٹیز اسکینڈلزکو بھی منطقی انجام تک پہنچایا جائیگا، اس کے علاوہ مضاربہ اسکینڈل کے ملزمان کو قانون کے مطابق سزا دلوانے کیلئے کوشاں ہیں۔

پنجاب حکومت ننے راولپنڈی رنگ روڈ کی نئی الائنمنٹ کا آغاز کردیا ہے۔

یہ فیصلہ وزیر اعظم عمران خان کی جانب سے انتہائی ضروری راولپنڈی رنگ روڈ منصوبے کی الائنمنٹ میں مبینہ تبدیلیوں کے نوٹس لینے کے بعد کیا گیا ہے جس سے نہ صرف اس منصوبے کی لاگت میں 25 ارب روپے کا اضافہ ہوا ہے بلکہ مبینہ طور پر چند نجی ہاؤسنگ سوسائٹیز کو فائدہ ہوا ہے۔

جہاں راولپنڈی رنگ روڈ (آر آر آر) منصوبے کا تنازع گہرا ہوتا جارہا ہے وہیں وزیر اعظم کے معاون خصوصی برائے اوور سیز پاکستانی زلفی بخاری نے اپنے عہدے سے استعفیٰ دے دیا اور وزیر ایوی ایشن غلام سرور نے کہا ہے کہ اگر ان کے خلاف بدعنوانی کے الزامات ثابت ہوگئے تو وہ سیاست چھوڑ دیں گے۔

حکومت پنجاب کے سینئر عہدیدار کے مطابق راولپنڈی کے کمشنر کے علاوہ ڈپٹی کمشنر اور ایڈیشنل کمشنر کی دو علیحدہ علیحدہ فیکٹ فائنڈنگ (حقائق تلاش کرنے والی) رپورٹ وزیر اعظم عمران خان کے دفتر پہنچنے پر آر آر آر کیس کو قومی احتساب بیورو (نیب) اور محکمہ انسداد بدعنوانی (اے سی ڈی) کے پاس بھجوا دیا گیا ہے۔

دوسری جانب صوبائی حکومت نے رنگ روڈ کی نئی الائنمنٹ کا کام بھی شروع کردیا ہے۔

کمشنر راولپنڈی سید گلزار حسین شاہ نے پنجاب کے چیف سکریٹری کو بریفنگ دیتے ہوئے کہا کہ وزیر اعلی پنجاب کی ہدایت کے مطابق راولپنڈی رنگ روڈ کی الائنمنٹ پر کام شروع کردیا گیا ہے۔

انہوں نے کہا کہ اس بات کو یقینی بنایا گیا ہے کہ نئی الائنمنٹ بدعنوانی سے پاک ہو۔

چیف سکریٹری نے ہدایت کی کہ لاگت کے تخمینے کے ساتھ متبادل تجاویز جلد سے جلد ان کے پاس پیش کی جائیں تاکہ اسی بجٹ کے ذریعے منصوبہ مکمل کیا جاسکے۔

انہوں نے تمام افواہوں کو مسترد کیا جس میں کہا گیا تھا کہ راولپنڈی رنگ روڈ منصوبہ بند کردیا گیا ہے۔

اس کے علاوہ انہوں نے کہا کہ راولپنڈی کے رہائشیوں کے لیے اس منصوبے کی اہمیت واضح ہے لہذا اس کو روکنے کا کوئی فائدہ نہیں ہے۔

ان کا کہنا تھا کہ’ دراصل اسے انفرادی مفادات کے بجائے کرپشن فری اور عوامی مفاد میں بنایا گیا ہے’۔

انہوں نے جلد از جلد پی سی ون جمع کروانے کی ہدایت کی۔

ان خیالات کا اظہار انہوں نے پنجاب کے چیف سکریٹری کو راولپنڈی رنگ روڈ کے بارے میں ویڈیو لنک کے ذریعے ایک اجلاس میں بریفنگ دیتے ہوئے کیا۔

اس اجلاس کے دوران ڈائریکٹر ڈویلپمنٹ نازیہ سدھن، ایڈیشنل ڈپٹی کمشنر (ریونیو) کیپٹن (ر) قاسم اعجاز، آر ڈی اے کے ڈپٹی ڈائریکٹر عزیز اللہ اور متعلقہ دیگر سرکاری عہدیدار موجود تھے۔