Category پاکستان

لاہور: پاکستان کے شماریات بیورو (پی بی ایس) نے چھٹی آبادی اور ہاؤسنگ مردم شماری 2017 کے حتمی نتائج اپنی ویب سائٹ پر شائع کردیے ہیں جس کے مطابق ملک کی مجموعی آبادی 20 کروڑ 76 لاکھ 80 ہزار ہے اور سالانہ شرح نمو 2.4 فیصد ہے۔

رپورٹ کے مطابق آبادی میں 10 کروڑ 60 لاکھ 18 ہزار مرد، 10 کروڑ 13 لاکھ 44 ہزار خواتین اور 3 لاکھ 21 ہزار 744 خواجہ سرا شامل ہیں۔

بیورو نے ویب سائٹ پر لکھا کہ ‘مشترکہ مفادات کونسل (سی سی آئی) نے 16 دسمبر 2016 کو پاک فوج کے تعاون سے مردم شماری کو دو مراحل میں کرنے کا فیصلہ کیا، پی بی ایس نے اوسطا 200 سے 250 مکانوں پر مشتمل مردم شماری چھوٹے چھوٹے بلاکس بنائے جس میں مجموعی طور پر 16 لاکھ 80 ہزار سے زائد بلاکس آئے جن کی اچھی طرح سے مقرر کردہ حدود اور نقشے تھے’۔

انہوں نے کہا کہ ‘حد بندی کا سارا عمل صوبائی حکومتوں، مقامی حکومتوں، محکمہ ریونیو اور ضلعی انتظامیہ کے ساتھ قریبی رابطوں کے ذریعے انجام دیا گیا ہے’۔

واضح رہے کہ تین سال کی تاخیر کے بعد وفاقی کابینہ نے گزشتہ سال دسمبر میں وزیر اعظم عمران خان کی زیرصدارت ایک اجلاس میں 2017 کی مردم شماری کی منظوری دی تھی جس میں وفاقی حکومت کے اتحادی متحدہ قومی موومنٹ کی طرف سے اختلافی نوٹ بھی پیش کی گیا تھا۔

جہاں سندھ نے اس عمل کی مخالفت کی تھی وہیں اس نے حتمی نتائج کے اجرا کو بھی مسترد کردیا جسے گزشتہ ماہ سی سی آئی نے منظور کیا تھا۔

سندھ اور دیگر اسٹیک ہولڈرز کی جانب سے اٹھائے گئے اعتراضات کو مدنظر رکھتے ہوئے حکومت نے کسی بھی غلطی کے امکانات سے بچنے کے لیے جدید ترین ٹیکنالوجی کا استعمال کرتے ہوئے اکتوبر میں اگلی مردم شماری کرانے کا فیصلہ کیا ہے۔

حکومت نے 2023 تک نئی مردم شماری کے نتائج جاری کرنے کا بھی عہد کیا ہے۔

2017 کی مردم شماری کے حتمی نتائج کے مطابق ملک کی سالانہ نمو بالترتیب 1981 اور 1998 کی مردم شماری کے بالترتیب 3.06 فیصد اور 2.69 فیصد سے 2.4 فیصد پر آگئی ہے۔

2017 کی مردم شماری میں کل گنتی میں سے 13 کروڑ 20 لاکھ 13 ہزار دیہی اور 7 کروڑ 56 لاکھ 70 ہزار شہری آبادی شامل ہے۔

خیبر پختونخوا کی آبادی 2017 میں 3 کروڑ 5 لاکھ 10 ہزار دکھائی گئی جبکہ فاٹا کی آبادی 49 لاکھ 90 ہزار بتائی گئی۔

پنجاب آبادی کے لحاظ سے سب سے بڑا صوبہ ہے جہاں کل آبادی 10 کروڑ 99 لاکھ 90 ہزار ہے اور سندھ 2017 کی مردم شماری میں 4 کروڑ 78 لاکھ 50 ہزار افراد رہتے ہیں۔

اسی طرح بلوچستان کی آبادی تقریبا ایک کروڑ 23 لاکھ 40 ہزار جبکہ وفاقی دارالحکومت اسلام آباد کی آبادی 20 لاکھ بتائی گئی۔

مذاہب کی بنیاد پر آبادی کی کل تعداد میں 96.47 فیصد مسلمان شامل ہیں، اس کے بعد 1.27 فیصد عیسائی، 1.73 فیصد ہندو، 0.09 فیصد احمدی، 0.41 فیصد شیڈول ذات اور 0.02 فیصد دیگر شامل ہیں۔

گلگت: شسپر گلیشیئر جھیل سے پانی کے اخراج میں اضافے نے حسن آباد کے قریب نچلے بہاؤ کے قریب رہنے والوں کو خوف میں مبتلا کردیا۔

مئی 2018 میں موچوہر گلیشیئر نے پانی کا بہاؤ روک دیا تھا جس نے شیسپر گلیشیئر میں ایک جھیل بن گئی تھی، ان دونوں گلیشیئرز سے نکلنے والی نہر حسن آباد کے مقام پر دریائے ہنزہ میں گرتی ہے۔

رپورٹ کے مطابق ضلعی انتظامیہ کا کہنا تھا کہ ہنگامی صورتحال سے نمٹنے کے لیے اقدامات اٹھائے جارہے ہیں۔

گلیشیئر جھیل پھٹنے کی صورت میں شاہراہ قراقرم کا ایک حصہ، ایک پُل، حسن آباد گاؤں کے 100 سے زائد گھر، 2 بجلی گھر، فرنٹیئر ورکس آرگنائزیشن کا ایک کیمپ آفس اور سیکڑوں کنال زرعی زمین زیر آب آنے کا امکان ہے۔

اس کے علاوہ اس سے مرکزی ہنزہ کے لیے پینے کے پانی کے ذرائع متاثر ہوسکتے ہیں اور دریائے ہنزہ کا بہاؤ رک سکتا ہے۔

ہنزہ کے ڈپٹی کمشنر فیاض احمد نے کہا ہے کہ علاقے میں موجود اہم تنصیبات اور رہائشیوں کے تحفظ کے لیے تمام ممکنہ اقدامات اٹھائے جاچکے ہیں۔

انہوں نے بتایا کہ شسپر گلیشیئر سے ہفتے کو پانی کا اخراج شروع ہوا ترھا اور اتوار کے روز اس کی مقدار 2 ہزار 300 کیوسک تک جا پہنچی تھی۔

انہوں نے بتایا کہ جون 2019 اور مئی 2020 میں جھیل کے پھٹنے سے 4 مکانات، 250 کنال زرعی زمین، متعدد پھل دار اور غیر پھل دار درخت، شاہراہِ قراقرم کا ایک حصہ اور نچلے بہاؤ کے علاقوں میں ایک ہائیڈرو پاور اسٹیشن متاثر ہوا تھا۔

ڈپٹی کمشنر ہنزہ کا کہنا تھا کہ خطرے کے سب سے زیادہ شکار علاقوں کو سیلابی صورتحال سے بچانے کے لیے حسن آباد نالے کے ساتھ ایک حفاظتی دیوار تعمیر کی جاچکی ہے۔

انہوں نے مزید کہا کہ `اگر پانی کا بہاؤ موجودہ مقدار سے جاری رہا تو آئندہ چند روز میں 60 فیصد پانی نکل جائے گا`۔

انہوں نے بتایا کہ اگر پانی کا اخراج 4 ہزار کیوسک تک پہنچا تو خطرے کے شکار علاقوں میں 30 گھروں کے رہائشیوں کو نکالنے کے لیے 3 کیمپ قائم کردیے گئے ہیں۔

انقرہ: پاکستان اور ترکی نے نہتے فلسطینیوں پر اسرائیلی ظلم و ستم اور بربریت کیخلاف مشترکہ طور پر آواز اُٹھانے کا فیصلہ کیا ہے۔

تفصیل کے مطابق وزیر خارجہ مخدوم شاہ محمود قریشی نے منگل کو انقرہ میں اپنے ترک ہم منصب میولوت چاوش اولو سے ملاقات کی۔ بات چیت کے دوران دونوں وزرائے خارجہ نے فلسطین میں امن و امان کی صورتحال پر تبادلہ خیال کیا۔

ترک وزیر خارجہ میولوت چاوش اولو نے او آئی سی کی ایگزیکٹو کمیٹی کے وزرائے خارجہ اجلاس میں وزیر خارجہ مخدوم شاہ محمود قریشی کے خطاب اور پاکستان کی جانب سے مظلوم فلسطینیوں کی مسلسل اور بھرپور حمایت کو سراہا۔

وزیر خارجہ شاہ محمود قریشی نے فلسطین کے معاملے پر ترک صدر رجب طیب اردوان اور ترک حکومت کے ٹھوس اور واضح موقف کی تعریف کی اور کہا کہ غزہ میں اسرائیلی حملوں، رمضان المبارک اوعیدالفطر کے دوران فلسطین میں پرتشدد واقعات کے تسلسل سے پوری امت مسلمہ دل گرفتہ ہے۔

شاہ محمود قریشی نے کہا کہ وزیر اعظم عمران خان کی ہدایت پر ہم پاکستان میں 21 مئی کو فلسطینی بھائیوں کے ساتھ اظہار یکجہتی کیلئے “یوم یکجہتی فلسطین” کے طور پر منا رہے ہیں۔

دونوں وزرائے خارجہ نے نہتے فلسطینیوں پر اسرائیلی جارحیت اور فلسطینیوں کی جبراً بے دخلی کی پر زور مذمت کی اور اسرائیلی جارحیت کے خلاف اقوام متحدہ میں مل کر آواز اُٹھانے کا فیصلہ کیا۔

وزیر خارجہ نے کہا کہ فلسطینی بھائیوں کو تنہا نہیں چھوڑیں گے۔ ترک وزیر خارجہ میولوت چاوش اولو نے وزیر خارجہ مخدوم شاہ محمود قریشی اور ان کے وفد کے اعزاز میں ظہرانہ دیا۔

اسلام آباد: وفاقی کابینہ نے فلسطین کے لیے امدادی سامان بھجوانے کی منظوری دے دی۔

وزیراعظم عمران خان کی زیرصدارت وفاقی کابینہ کا اجلاس ہوا۔ اجلاس میں کابینہ نے فلسطین کے لیے امدادی سامان بھجوانے کی منظوری دے دی۔ منظوری کے بعد حکومت پاکستان فلسطین کے لیے طبی سامان بھجوائے گی۔

وفاقی کابینہ نے ای سی سی اجلاس کے فیصلوں کی توثیق کردی۔ ای سی سی نے آئی پی پیز کو 40 فیصد واجبات ادا کرنے کی منظوری دی تھی۔ وفاقی کابینہ نے کرتارپور راہداری منصوبے کو پیپرا رولز سے استثنی دینے کی اصولی منظوری دے دی جب کہ تکنیکی معاملات دیکھنے کے لیے معاملہ پیپرا کو بھجوا دیا۔

کابینہ نے اقوام متحدہ کی چارگاڑیوں کو پاکستان کے راستے کابل لے جانے کی منظوری بھی دی۔ پاک چین سفارتی تعلقات کے 70 سال مکمل ہونے پریادگاری سکہ جاری کرنے کی منظوری دی۔

کابینہ نے ریلوے پولیس کے دائرہ اختیارسے متعلقہ ایس آراوز جاری کرنے کی منظوری سمیت الیکشن کمیشن کی سالانہ رپورٹ پارلیمنٹ میں پیش کرنے کی منظوری دے دی۔ اجلاس میں وفاقی کابینہ نے نجی ایئرلائن کو پیسنجر اینڈ کارگو لائسنس جاری کرنے کی منظوری بھی دی۔

ذرائع کے مطابق کابینہ کے اجلاس میں پاکستان ہاؤسنگ اتھارٹی فاونڈیشن کے چیف ایگزیکٹوکی تعیناتی کی منظوری موخرکرنے سمیت الیکٹرانک سرٹیفیکیشن ایکریڈیشن کونسل کے ارکان تعینات کرنے کی منظوری موخرکردی۔

بیرون ملک پاکستانی مشنزمیں کمیونٹی ویلفیئر اتاشی تعینات کرنے کی منظوری بھی موخرکردی گئی۔ دوسری جانب کابینہ کمیٹی برائے ادارہ جاتی اصلاحات کے فیصلوں سمیت کابینہ کمیٹی برائے قانون سازی کے فیصلوں کی بھی توثیق کردی۔

پاکستان میں کورونا وائرس کی تیسری لہر کا عروج اپریل میں دیکھا گیا جس کے بعد اب یومیہ کیسز اور فعال کیسز کی تعداد میں نمایاں کمی دیکھنے میں آئی ہے۔

سرکاری سطح پر عالمی وبا کے اعداد و شمار مرتب کرنے والی سرکاری ویب سائٹ کے مطابق گزشتہ 24 گھنٹوں میں ملک میں 2 ہزار 566 افراد وائرس سے متاثر ہوئے جبکہ مزید 135 افراد انتقال کر گئے۔

ملک میں 17 مئی کو مجموعی طور پر کووڈ-19 کی تشخیص کے لیے 29 ہزار801 ٹیسٹس کیے گئے جس کے نتیجے میں کورونا کیسز کے مثبت آنے کی شرح 8.6 فیصد رہی اور فعال کیسز کم ہو کر 67 ہزار 665 رہ گئے ہیں۔

پاکستان میں اب تک 8 لاکھ 82 ہزار 928 افراد کے وائرس سے متاثر ہونے کی تصدیق ہوچکی ہے جن میں سے 19 ہزار 752 زندگی کی بازی ہار گئے۔

علاوہ ازیں گزشتہ 24 گھنٹوں میں وائرس کا شکار مزید 2 ہزار 989 افراد صحتیاب ہوئے یوں کورونا سے صحتیاب ہونے والے مریضوں کی مجموعی تعداد 7 لاکھ 95 ہزار 511 تک جاپہنچی ہے۔

واضح رہے کہ پاکستان میں کورونا وائرس کے پہلے کیس کی تصدیق 26 فروری 2020 کو ہوئی تھی، جس کے بعد سے وبا کے پھیلاؤ میں اتار چڑھاؤ جاری ہے اور اب تک وائرس کی 3 لہریں دیکھی جاچکی ہیں۔

ملک میں 18 مئی 2021 کو کورونا وائرس کیسز اور اموات کی صورتحال کچھ یوں ہے:

پنجاب
کورونا وبا کی تیسری لہر کے دوران سب سے زیادہ متاثر ہونے والے صوبے پنجاب میں کیسز میں دوبارہ اضافہ دیکھنے میں آرہا ہے اور گزشتہ 24 گھنٹوں کے دوران یہاں کورونا کے مزید ایک ہزار 413 کیسز رپورٹ ہوئے جبکہ 89 مریض انتقال کر گئے۔

پنجاب میں مجموعی طو پر کورونا وائرس سے 3 لاکھ 28 ہزار 775 افراد متاثر جبکہ 9 ہزار 500 انتقال کرچکے ہیں۔

سندھ
صوبہ سندھ میں وبا کا پھیلاؤ بڑھ رہا ہے اور یہاں گزشتہ 24 گھنٹوں میں کورونا وائرس کے719 کیسز کی تصدیق ہوئی جبکہ مزید 23 مریض دم توڑ گئے۔

مذکورہ اضافے کے بعد سندھ میں کورونا سے متاثرہ افراد کی مجموعی تعداد 2 لاکھ 99 ہزار 913 جبکہ اموات کی مجموعی تعداد 4 ہزار 824 تک جاپہنچی ہے۔

خیبرپختونخوا
کورونا وائرس کی تیسری لہر نے پنجاب کے بعد خیبرپختونخوا کو زیادہ متاثر کیا تھا اور یہاں گزشتہ روز کووڈ-19 کے مزید 186 کیسز اور 18 اموات رپورٹ ہوئیں۔

اب تک خیبر پختونخوا میں مجموعی طور پر ایک لاکھ 27 ہزار 224 افراد وبا سے متاثر جبکہ 3 ہزار 804 لقمہ اجل بن چکے ہیں۔

بلوچستان
گزشتہ 24 گھنٹوں کے دوران ملک کے سب سے وسیع صوبے میں مزید 65 افراد وائرس سے متاثر پائے گئے۔

نئے کیسز کے اضافے کے بعد بلوچستان میں عالمی وبا سے متاثرہ افراد کی مجموعی تعداد 23 ہزار 931 ہوگئی جبکہ اموات کی تعداد 267 پر برقرار ہے۔

اسلام آباد
کورونا کی تیسری لہر نے وفاقی دارالحکومت اسلام آباد کو بھی متاثر کیا ہے جہاں گزشتہ 24 گھنٹوں میں کورونا وائرس کے مزید 150 کیسز اور 2 اموات رپورٹ ہوئیں۔

اسلام آباد میں کورونا متاثرین کی مجموعی تعداد 79 ہزار 221 ہے جبکہ 731 افراد وبا سے انتقال کرچکے ہیں۔

آزاد کشمیر
آزاد کشمیر میں گزشتہ 24 گھنٹوں کے دوران کورونا وائرس کے مزید 28 کیسز کی تصدیق ہوئی اور 3 مریض دم توڑ گئے۔

مذکورہ اضافے کے بعد آزاد کشمیر میں کورونا وائرس مجموعی طور پر 18 ہزار 286 افراد کو متاثر کرچکا ہے جبکہ 517 افراد کی موت کا سبب بھی بنا ہے۔

گلگت بلتستان
کورونا وائرس سے سب سے کم گلگت بلتستان متاثر ہوا ہے اور وہاں گزشتہ 24 گھنٹوں میں 5 کیس سامنے آئے اور 30 اپریل کے بعد سے مزید کوئی موت رپورٹ نہیں ہوئی۔

گلگت بلتستان میں کورونا وائرس سے متاثرہ افراد کی مجموعی تعداد 5 ہزار 428 جبکہ اموات کی مجموعی تعداد 107 ہے۔

واشنگٹن: امریکا نے گوانتانامو بے میں قید سب سے پرانے قیدی 73 سالہ پاکستانی شہری سیف اللہ پراچہ کو رہا کرنے کی منظوری دے دی۔

عالمی خبر رساں ادارے کے مطابق کیوبا میں قائم امریکی حراستی مرکز گوانتاناموبے میں القاعدہ سے تعلق کے شبے میں 16 سال سے قید پاکستانی شہری سیف اللہ پراچہ کو رہا کرنے کی منظوری دیدی ہے۔

سیف اللہ پرچہ پر القاعدہ سے تعلق رکھنے کا الزام تو تھا تاہم ان پر کسی قسم کے جرم میں فرد جرم عائد نہیں کی گئی تھی جس پر ان کے وکیل نے نومبر میں قیدیوں کے نظرثانی بورڈ سے رجوع کیا تھا۔ بورڈ کے سامنے سیف اللہ پراچہ آٹھویں بار پیش ہوئے تھے۔ بورڈ نے انہیں دیگر دو قیدیوں سمیت بری کرتے ہوئے رہا کرنے کی سفارش کی تھی۔

سیف اللہ پراچہ سے متعلق قیدیوں کے نظرثانی بورڈ کا تفصیلی فیصلہ تو جاری نہیں کیا گیا، تاہم ایک بیان میں کہا گیا کہ ’پراچہ اب خطرہ نہیں رہے‘۔ سیف اللّٰہ پراچہ کو 2003 میں تھائی لینڈ سے گرفتار کیا گیا تھا اور ان پر القاعدہ سے تعلقات رکھنے کا الزام تھا جب کہ انہیں اگلے برس ہی گوانتاناموبے منتقل کردیا گیا تھا۔

ش

کراچی میں شدید گرمی کے دوران موسم نے اچانک انگڑائی لی اور مٹی و گرد وغبار کے طوفان کے ساتھ ساتھ بارش بھی ہوئی۔

شہر کے مختلف علاقوں میں گرد و غبار اور مٹی کا شدید طوفان دیکھا گیا۔

ملیر، کورنگی، کیماڑی، آئی آئی چند ریگر روڑ اور دیگر علاقوں میں مٹی اور گرد و غبار کا طوفان آیا اور کہیں ہلکی بارش بھی ہوئی۔

موسم کی معمولی تبدیلی کے ساتھ ہی شہر کے مختلف علاقوں میں بجلی بھی منقطع کردی گئی اور شہری گھروں سے باہر نکل آئے۔

دوسری جانب کے الیکٹرک اپنے بیان میں کہا کہ شدید گرد آلود طوفان کی وجہ سے کراچی کے چند علاقوں میں بجلی کی فراہمی متاثر ہوئی۔

بیان میں کہا گیا کہ بجلی کی بحالی کے لیے ٹیمیں کام کر رہی ہیں، 1900 فیڈرز میں سے 300 فیڈرز متاثر ہوئے ہیں۔

سماجی رابطوں کی ویب سائٹس پر شہریوں نے ویڈیوز اور تصاویر بھی جاری کیں۔

محکمہ موسمیات کے سردار سرفراز نے ڈان ڈاٹ کام کو بتایا کہ گرد آلود طوفان کی وجہ جنوبی پاکستان میں سائیکلون سسٹم کا اثر ہے جو موسم کی مقامی صورت حال سے ضم ہوا۔

ان کا کہنا تھا کہ جب سائیکلون سسٹم خطے سے نہیں جاتا اس وقت تک کراچی میں گرد آلود طوفان دوبارہ آسکتا ہے۔

سردار سرفراز نے کہا کہ شہر کا درجہ حرارت طوفان کے فوری بعد 7 سے 8 ڈگری گر گیا اور اس کی توقع بھی تھی کہ موسم معمول پر آئے گا۔

خیال رہے کہ محکمہ موسمیات نے کراچی میں سخت گرمی اور خشک موسم کے ساتھ تیز ہوائیں چلنے کی پیش گوئی کی تھی۔

کراچی سمیت سندھ کے مخلتف اضلاع بھارت میں ٹکرانے والے طوفان تاؤتے کے زیر اثر ہیں اور کراچی میں گرمی شدت 43.5 ڈگری ریکارڈ کیا گیا تھا۔

محکمہ موسمیات نے کہا تھا کہ کراچی، حیدرآباد، شہید بینظیر آباد، بدین، میر پور خاص، ٹنڈو الہیار اور ٹھٹہ کے اضلاع میں تیزہوائیں چلیں گے۔

محکمہ موسمیات کے ڈائریکٹر سردار سرفراز کا کہنا تھا کہ زیریں سندھ میں بھی موسم اسی طرح رہنے کا امکان ہے اور آندھی شمال کی جانب بڑھے گی۔

ان کا کہنا تھا کہ کراچی اور مٹھی میں ٹمپریچر ایک جیسا رہے گا۔

انہوں نے کہا کہ سندھ میں موسم بدھ کو بہتری کی جانب گامزن ہوگااور سمندری ہوائیں طوفان کو روک دیں گی۔

محکمہ موسمیات کے مطابق مئی میں سب سے زیادہ گرمی 47.8 ڈگری کا ریکارڈ ہے جو 1938 میں ہوئی تھی۔

گزشتہ ایک دہائی کے دوران 2015 میں 46 ڈگری ریکارڈ کی گئی تھی۔

دوسری جانب آندھی کے باعث مختلف حادثات میں بچے اور خاتون سمیت تین افراد جاں بحق ہو گئے .

شارع فیصل پر تیز ہوا کے باعث درخت اور بجلی کا تار گرگیا، شیرشاہ محمدی روڈ پر گھر کی دیوار گرنے سے 10 سالہ بچہ جاں بحق ہوگیا۔

اورنگی ٹاون 4 نمبر ہزارہ چوک پر 3 ماہ قبل لگائی گئی پی ایم ٹی گر گئی، پی ایم ٹی گرنے والے علاقے میں کے الیکٹرک کی ٹیمیں پہنچ گئی ہیں اور ترجمان کے الیکٹرک کا کہنا ہے کہ متاثرہ علاقوں میں جلد بجلی بحال کردی جائے گی۔

اس کے علاوہ بلدیہ گلشن غازی میں گھر کی چھت گرنے سے ایک خاتون اور مرد جاں بحق ہوگئے۔

راشد منہاس روڈ پر شاپنگ مال پر لگا بل بورڈ کرنے سے2 افراد زخمی ہوگئے۔ مال انتظامیہ کے مطابق بل بورڈ گرنے سے شاپنگ آوٹ لیٹ کے دو ملازمین زخمی ہوئے ،دونوں زخمی ملازمین مال میں موجود ایمبولینس پر نجی اسپتال منتقل کردیے گئے ہیں۔

اس کے علاوہ آئی آئی چندریگر روڈ پر کثیر المنزلہ بینک کے شیشے اکھڑ گئے تاہم کسی قسم کا نقصان نہیں ہوا۔

اسلام آباد: کیپٹل ڈویلپمنٹ اتھارٹی (سی ڈی اے) نے اسلام آباد میں کچہری کے ساتھ فٹ بال گراؤنڈ میں بنے 200 سے زائد غیر قانونی چیمبرز گرا دیئے۔

اسلام آباد کچہری کیساتھ ایف ایٹ فٹ بال گراؤنڈ پر وکلا کے غیر قانونی چیمبرز گرادیے گئے ،سی ڈی اے نے آپریشن کرکے فٹ بال گراونڈ پر بنے دو سو سے زائد غیر قانونی چیمبرز گرائے۔ سپریم کورٹ کی دی گئی مہلت کے باوجود وکلاء نے غیر قانونی چیمبرز ختم نہیں کیے تھے۔

سی ڈی اے نے فٹ بال گراؤنڈ سے چیمبرز خالی کرنے کا آخری نوٹس دو دن قبل آویزاں کئے تھے۔

اسلام آباد: قومی اسمبلی اجلاس میں فلسطینیوں کے ساتھ اظہار یکجہتی اور مسجد اقصی پر اسرائیلی بربریت کیخلاف متفقہ قرارداد منظور کرلی گئی۔

قومی اسمبلی اجلاس شروع ہوا تو اسپیکر اسد قیصر نے اجلاس فلسطین کے نام کرنے کا اعلان کیا، مشیر پارلیمانی امور بابر اعوان نے معمول کا ایجنڈا معطل کرنے کی قرارداد پیش کی جس کو منظور کرلیا گیا۔

قائد حزب اختلاف شہباز شریف کا جمعہ کو یوم القدس منانے اور حکومت سے آگے بڑھ کر کشمیراور فلسطین کا مقدمہ لڑنے کا مطالبہ کرتے ہوئے کہا کہ اسرائیل کی بدترین سفاکی زوروں پر ہے، ماضی میں فاشسٹ ہٹلر جہاں تھا، آج وہاں نیتن یاہو کھڑا ہے، غزہ میں الجزیرہ چینل کی بلڈنگ کو گرتے دنیا نے دیکھا، اس طرح کی سفاکی پہلے کبھی نہیں دیکھی گئی۔

اپوزیشن لیڈر نے کہا کہ اسرائیل نے اوسلو معاہدے کو ردی کی ٹوکری میں پھینک دیا، یاسر عرفات، منہان بھیگن کو نوبل پرائز ملے لیکن آزاد فلسطین کا قیام آج تک نہ ہو سکا، کشمیر کی طرح فلسطین کی قراردادوں کو بھی ٹھکرا دیا گیا، فلسطین میں قتل عام اسلامی دنیا کے لیے پیغام ہے، جس کی لاٹھی اس کی بھینس کا رواج جڑیں پکڑ رہا ہے، قومی اسمبلی کو آج 22 کروڑ عوام کی دلوں کی آواز بننا ہے۔

شہباز شریف نے کہا کہ اگر خدانخواستہ ایسی ہلکی سی حرکت کوئی اسلامی ملک کرتا تو پھر کیا عالمی طاقتیں ہاتھ پر ہاتھ رکھ کر بیٹھتی؟ اگر کوئی اسلامی ملک ایسا کرتا تو فوری جنگ مسلط کر دی جاتی اور ہر قسم کی پابندیاں لگا دی جاتیں، آج عالمی میڈیا خاموش ہے، اس کی زبان کو تالے لگ گئے ہیں۔

دوسری جانب وزیر خارجہ شاہ محمود قریشی کہا کہ ہماری پہلی ذمہ داری فلسطین میں سیز فائر کرانا ہے، سلامتی کونسل اور او آئی سی میں پاکستان کے تاریخی موقف پر رجحان بڑا واضح دکھائی دے رہا تھا، پاکستان، ترکی، سوڈان اور فلسطین ملکر امریکہ جارہے ہیں۔

وزیر خارجہ کا کہنا تھا کہ میں یہاں چین کی قیادت کو خراج تحسین پیش کرتا ہوں، چین نے سلامتی کونسل کو یکجا کرنے کی کوشش کی، سلامتی کونسل کے تمام ممبران قائل ہو چکے تھے لیکن بدقسمتی سے امریکا نے ویٹو کرکے راستے میں رکاوٹ ڈالی، امریکہ فی الفور سیز فائر کراسکتا ہے، امریکہ تنہا جو کردار ادا کرسکتا ہے وہ کوئی اور نہیں کرسکتا۔

وزیر خارجہ نے جنرل اسمبلی کا اجلاس اور امریکہ سے اپنا کرادار ادا کرنے کا مطالبہ کرتے ہوئے کہا پاکستان مسئلہ فلسطین پر وزیراعظم عمران خان کی قیادت میں قائدانہ کردار ادا کرے گا اور ایوان سے وعدہ ہے کہ ہم مسئلہ فلسطین اور مسئلہ کشمیر پر کبھی آنچ نہیں آنے دیں گے، مانتا ہوں راستے کٹھن ہے، عالمی دنیا کا دہرا معیار ہے لیکن سچائی میں بڑا وزن ہوتا ہے۔

پاکستان میں کورونا وائرس کی تیسری لہر کے پھیلاؤ میں 3 روز تک کمی کے بعد دوبارہ اضافہ دیکھنے میں آرہا ہے اور یومیہ کیسز ایک مرتبہ پھر 3 ہزار کی سطح عبور کر گئے۔

سرکاری سطح پر عالمی وبا کے اعداد و شمار مرتب کرنے والی سرکاری ویب سائٹ کے مطابق گزشتہ 24 گھنٹوں میں ملک میں 3 ہزار 232 افراد وائرس سے متاثر ہوئے جبکہ مزید 74 افراد انتقال کر گئے۔

ملک میں 16 مئی کو مجموعی طور پر کووڈ-19 کی تشخیص کے لیے 36 ہزار 725 ٹیسٹس کیے گئے جس کے نتیجے میں کورونا کیسز کے مثبت آنے کی شرح 8.80 فیصد رہی اور فعال کیسز کم ہو کر 68 ہزار 223 رہ گئے ہیں۔

پاکستان میں اب تک 8 لاکھ 80 ہزار 362 افراد کے وائرس سے متاثر ہونے کی تصدیق ہوچکی ہے جن میں سے 19 ہزار 617 زندگی کی بازی ہار گئے۔

علاوہ ازیں گزشتہ 24 گھنٹوں میں وائرس کا شکار مزید 3 ہزار 754 افراد صحتیاب ہوئے یوں کورونا سے صحتیاب ہونے والے مریضوں کی مجموعی تعداد 7 لاکھ 92 ہزار 522 تک جاپہنچی ہے۔

واضح رہے کہ پاکستان میں کورونا وائرس کے پہلے کیس کی تصدیق 26 فروری 2020 کو ہوئی تھی، جس کے بعد سے وبا کے پھیلاؤ میں اتار چڑھاؤ جاری ہے اور اب تک وائرس کی 3 لہریں دیکھی جاچکی ہیں۔

موجودہ لہر کے دوران کورونا وائرس کے کیسز اور اموات میں اضافے کے پیشِ نظر عوام کو گھروں تک محدود رکھنے کے لیے عیدالفطر کے موقع پر تفریحی مقامات بشمول پبلک پارکس، پکنک پوائنٹس، سیاحتی مقامات، ساحلِ سمندر وغیرہ بند رکھے گئے ہیں۔

ملک میں 17 مئی 2021 کو کورونا وائرس کیسز اور اموات کی صورتحال کچھ یوں ہے:

پنجاب
کورونا وبا کی تیسری لہر کے دوران سب سے زیادہ متاثر ہونے والے صوبے پنجاب میں 2 روز کے بعد کیسز میں دوبارہ اضافہ دیکھنے میں آیا۔

گزشتہ 24 گھنٹوں کے دوران یہاں کورونا کے مزید ایک ہزار 700 کیسز رپورٹ ہوئے جبکہ 44 مریض انتقال کر گئے۔

پنجاب میں مجموعی طو پر کورونا وائرس سے 3 لاکھ 27 ہزار 362 افراد متاثر جبکہ 9 ہزار 411 انتقال کرچکے ہیں۔

سندھ
صوبہ سندھ میں وبا کا پھیلاؤ بڑھ رہا ہے اور یہاں گزشتہ 24 گھنٹوں میں کورونا وائرس کے ایک ہزار 116 کیسز کی تصدیق ہوئی جبکہ مزید 7 مریض دم توڑ گئے۔

مذکورہ اضافے کے بعد سندھ میں کورونا سے متاثرہ افراد کی مجموعی تعداد 2 لاکھ 99 ہزار 194 جبکہ اموات کی مجموعی تعداد 4 ہزار 801 تک جاپہنچی ہے۔

خیبرپختونخوا
کورونا وائرس کی تیسری لہر نے پنجاب کے بعد خیبرپختونخوا کو زیادہ متاثر کیا تھا اور یہاں بھی مسلسم 3 روز تک کمی کے بعد گزشتہ روز کیسز میں معمولی اضافہ دیکھا گیا رجحان ہے اور کووڈ-19 کے مزید 251 کیسز اور 20 اموات رپورٹ ہوئیں۔

اب تک خیبر پختونخوا میں مجموعی طور پر ایک لاکھ 27 ہزار 38 افراد وبا سے متاثر جبکہ 3 ہزار 786 لقمہ اجل بن چکے ہیں۔

بلوچستان
گزشتہ 24 گھنٹوں کے دوران ملک کے سب سے وسیع صوبے میں مزید 35 افراد وائرس سے متاثر پائے گئے اور 3 انتقال کرگئے۔

نئے کیسز کے اضافے کے بعد بلوچستان میں عالمی وبا سے متاثرہ افراد کی مجموعی تعداد 23 ہزار 866 ہوگئی جبکہ اموات کی تعداد 267 تک جا پہنچی ہے۔

اسلام آباد
کورونا کی تیسری لہر نے وفاقی دارالحکومت اسلام آباد کو بھی متاثر کیا ہے جہاں گزشتہ 24 گھنٹوں میں کورونا وائرس کے مزید 98 کیسز سامنے آئے۔

اسلام آباد میں کورونا متاثرین کی مجموعی تعداد 79 ہزار 221 ہے جبکہ 731 افراد وبا سے انتقال کرچکے ہیں۔

آزاد کشمیر
آزاد کشمیر میں گزشتہ 24 گھنٹوں کے دوران کورونا وائرس کے مزید 27 کیسز کی تصدیق ہوئی اور ایک مریض دم توڑ گیا۔

مذکورہ اضافے کے بعد آزاد کشمیر میں کورونا وائرس مجموعی طور پر 18 ہزار 258 افراد کو متاثر کرچکا ہے جبکہ 514 افراد کی موت کا سبب بھی بنا ہے۔

گلگت بلتستان
کورونا وائرس سے سب سے کم گلگت بلتستان متاثر ہوا ہے اور وہاں گزشتہ 24 گھنٹوں میں 5 کیس سامنے آئے اور 30 اپریل کے بعد سے مزید کوئی موت رپورٹ نہیں ہوئی۔

گلگت بلتستان میں کورونا وائرس سے متاثرہ افراد کی مجموعی تعداد 5 ہزار 423 جبکہ اموات کی مجموعی تعداد 107 ہے۔