Category پاکستان

کلر کلہار: چیئرمین پاکستان تحریک انصاف اور سابق وزیراعظم عمران خان کے قافلے میں شامل 3 گاڑیوں کو کلرکہار کے قریب حادثہ پیش آیا ہے۔

اسلام آباد جاتے ہوئے کلرکہار کے قریب حادثہ تیز رفتاری کے باعث پیش آیا جس کے نتیجے میں 3 افراد زخمی ہوئے ہیں، متاثرہ گاڑیوں میں پی ٹی آئی حافظ آباد کے کارکن سوار تھے۔

موٹروے پولیس نے موقع پر پہنچ کر زخمیوں کو ہسپتال پہنچانے کیلئے ریسکیوکا عمل شروع کر دیا ہے۔

دوسری جانب حادثے کے بعد چیئرمین پی ٹی آئی عمران خان نے موٹر وے پر اپنا قافلہ روک دیا، گاڑی سے باہر نکل کر پارٹی رہنماؤں کو زخمیوں کو فوری طبی امداد فراہم کرنے کی ہدایت کی۔

واضح رہے کہ توشہ خانہ کیس میں پیش ہونے کے لیے سابق وزیراعظم و تحریک انصاف کے چیئرمین عمران خان کا قافلہ اسلام آباد کیلئے رواں دواں ہے۔

اکستان تحریک انصاف کے جنرل سیکرٹری اسد عمر نے پی ڈی ایم حکومت کی جانب سے عمران خان کی غیرقانونی طورپر گرفتاری کے امکانات کے تناظر میں چیف جسٹس عمر عطا بندیال کو خط لکھ دیا۔

چیف جسٹس کے نام لکھے گئے خط میں پی ٹی آئی کی جانب سے مؤقف اختیار کیا گیا کہ عمران خان عدالت میں پیشی کے لئے اسلام آباد آ رہے ہیں، پی ڈی ایم حکومت عمران خان کو نشانِ انتقام بنانا چاہتی ہے، عدالتی احکامات کی تعظیم میں عمران خان لاہور سے اسلام آباد کے لئے روانہ ہوئے۔

اسد عمر نے لکھا کہ عمران خان نے کل لاہور ہائی کورٹ سے 9 مقدمات میں ضمانت حاصل کی، معزز عدالت عالیہ نے حکام کو عمران خان کے خلاف ظالمانہ انتقامی کارروائیوں سے منع کیا، پولیس نے عدالتی احکامات کو پیروں تلے روندتے ہوئے ان کی رہائش گاہ پر دھاوا بولا، عمران خان کی رہائش گاہ پر حملے کے دوران گھر کے دروازے توڑے گئے اور دیواریں منہدم کر دی گئیں۔

انہوں نے لکھا کہ اسلام آباد میں پولیس نے بدترین خوف و ہراس کا ماحول قائم کر رکھا ہے، میڈیا اور وکلاء سمیت اہم لوگوں کو عدالت میں داخلے سے روک دیا گیا ہے، چیئرمین تحریک انصاف کو کسی نامعلوم مقدمے میں گرفتار کرنے کے عزائم واضح طور پر دکھائی دے رہے ہیں، عمران خان اپنی جان کو لاحق خطرات سے بھی مسلسل آگاہ کرتے آئے ہیں ۔

 اسد عمر نے چیف جسٹس آف پاکستان سے استدعا کی کہ چیئرمین تحریک انصاف کی زندگی اور بنیادی حقوق کے تحفظ کے لئے عدالت فوری از خود نوٹس لے۔

لاہور : پاکستان بھر میں کورونا کیسز میں ممکنہ اضافے کے خدشے کے پیش نظر لاہور سمیت پنجاب بھر میں ماسک پہننا لازمی قرار دے دیا گیا ہے ۔

اس حوالے سے محکمہ صحت پنجاب نے نوٹی فکیشن جاری کردیاہے  ، نوٹی فکیشن کے مطابق لاہور سمیت پنجاب میں رش والے مقامات پر ماسک پہننا لازمی ہوگا۔

نوٹی فکیشن میں محکمہ صحت پنجاب نے تمام ہسپتالوں میں بھی  ماسک پہننا لازمی قرار دے دیا ہے ۔

این سی او سی کی ہدایات کے بعد محکمہ صحت پنجاب کی گائیڈ لائنز جاری کی گئی ہیں ، اس حوالے سے تمام ڈسٹرکٹ ہیلتھ اتھارٹیز کو عمل درآمد کروانے کے احکامات دیے گئے۔

ذرائع کے مطابق کچہری میں فول پروف سکیورٹی کیلئے ایڈیشنل سیشن جج ظفر اقبال نے خط لکھ دیا ہے، سیکرٹری داخلہ، آئی جی اسلام آباد اور حساس اداروں کو فول پروف سکیورٹی کے انتظامات کے لیے خط ارسال کیا گیا ہے۔

ذرائع کے مطابق اسلام آباد پولیس کی جانب سے اڈیالہ جیل سے قیدیوں کو کل کچہری نہ لانے کی تجویز دی گئی ہے، اسلام آباد پولیس کی جانب سے تمام عدالتوں کو 10 بجے تک تمام کیسز نمٹانے کی بھی تجویز دی گئی ہے۔

اس حوالے سے ذرائع کا یہ بھی کہنا ہے کہ اسلام آباد پولیس نے 10 بجے کے بعد غیرمتعلقہ افراد کو ضلعی کچہری میں داخلے کی اجازت نہ دینے کی تجویز بھی دی ہے۔

ذرائع کے مطابق عمران خان کی کل 10 بجے کے بعد ضلعی کچہری میں ممکنہ پیشی متوقع ہے۔

نارووال: پاکستان مسلم لیگ (ن) کے مرکزی رہنما اور وفاقی وزیر برائے منصوبہ بندی و ترقی احسن اقبال نے کہا ہے کہ عمران خان پاکستان میں جتھوں اور تشدد کی سیاست کر رہا ہے، جمہوریت میں ہمیشہ بات چیت ہوتی ہے تشدد نہیں ہوتا۔

میڈیا سے گفتگو کرتے ہوئے لیگی رہنما احسن اقبال نے کہا کہ عمران خان اپنی انا کیلئے نوجوانوں کی قربانی دینا چاہتا ہے، عمران خان کی خواہش ہے کہ مزید چند نوجوانوں کی لاشیں گریں، یہ پاکستان سے محبت نہیں کرتا یہ لاشوں کا سوداگر ہے۔

انہوں نے کہا کہ پاکستان کے آئین اور قانون کے ساتھ کھیلنے کی کسی کو اجازت نہیں ہونی چاہیے، نہتے پولیس ملازمین پر عمران خان کے کارکنوں نے تشدد اور حملے کیے، پولیس ملازمین پر پٹرول بم پھینکے گئے جس سے لاتعداد ملازمین زخمی ہوگئے۔

احسن اقبال کا مزید کہنا تھا کہ عمران خان کے ساتھ زیادتی نہیں ہو رہی بلکہ وہ پاکستان کے آئین، قانون اور عدالتوں کے ساتھ زیادتی کر رہا ہے، پاکستان میں افراتفری اور انتشار پیدا کرکے دنیا کو بتایا جا رہا ہے کہ ان سے زیادتی ہو رہی ہے۔

اسلام آباد: سپریم کورٹ کی شرعی عدالت نے سود کے فیصلے کے خلاف سٹیٹ بینک اور نیشنل بینک کی اپیلیں خارج کر دیں۔

چیف جسٹس عمر عطا بندیال نے چیمبر میں متفرق درخواستوں پر سماعت کی، وکیل سلمان اکرم راجہ سٹیٹ بینک اور نیشنل بینک کی طرف سے پیش ہوئے۔

وکیل سلمان اکرم راجہ نے کہا کہ مجھے ہدایات ہیں کہ سود خاتمے کے فیصلے کے خلاف اپیلیں واپس لی جائیں، اپیلوں کی واپسی کے لیے متفرق درخواستیں دائر کیں ہیں، چیف جسٹس نے اپیلیں واپس لینے کی بنیاد پر خارج کر دیں۔

چیف جسٹس عمر عطا بندیال نے اپیلیں واپس لینے کی متفرق درخواستیں بھی منظور کر لیں۔

 مریم نواز شریف کی زیر صدارت لاہور ڈویژن کا اجلاس ہوا۔ اس موقع پر گفتگو کرتے ہوئے مریم نواز نے کہا کہ الیکشن لڑیں گے اور جیتیں گے، سلیکشن پہلے قبول کی نہ آئندہ ہونے دیں گے۔

مریم نواز کا کہنا تھا کہ سازشی کرداروں سے مکمل نجات نہیں ملی، ووٹ کی عزت کے لئے ترازو کے پلڑے برابر کرنے کی فیصلہ کن جدوجہد جاری ہے، ترازو برابر ہوگا تو انصاف کی فتح ہوگی، آر ٹی ایس کی جگہ بابا زحمت کے چیلوں نے لے لی ہے۔

انہوں نے کہا کہ نواز شریف شیر لیڈر ہے جو کارکنوں کی ڈھال بنا تھا، نواز شریف جھوٹے مقدمات میں اپنی بیٹی کے ساتھ لندن سے جیل چلا گیا، یہ ہوتی ہے بہادری۔

مریم نواز نے مزید کہا کہ زمان پارک کے گیدڑ کو دیکھ لو جو عورتوں بچوں کو ڈھال بنائے ہوئے ہے، ایک گیدڑ زمان پارک سے عدالت جانے سے ڈرتا ہے، یہ پولیس اور رینجرز اہلکاروں کے نہیں عدالت اور ججوں کے سر پھاڑ رہا ہے، ملک کے ٹکڑے کرنے کی باتیں کرنے والا عدالتی احکامات کے ٹکڑے ٹکڑے کر رہا ہے۔

متحدہ قومی موومنٹ کی جانب سے 18 مارچ کو باغ جناح کراچی میں جلسہ کے سلسلے میں مختلف علاقوں میں کیمپس لگائے جائیں گے۔

ایم کیو ایم نے جلسے اور استقبالیہ کیمپس کی سکیورٹی کے لیے پولیس اور کمشنر کراچی کو خط لکھ دیا ہے۔

اسلام آبادؔ:مارچ پولیو مہم کا پہلا مرحلہ جاری ہے ترجمان وزارت صحت کے مطابق پہلے مرحلے میں مہم 13 مارچ سے جاری ہے -مہم 17 مارچ تک ہو گی-وفاقی وزیر صحت عبدالقادر پٹیل نے کہا کہ والدین اپنے بچوں کو ضرور قطرے پلوائیں پہلے مرحلے میں پنجاب کے 13 اضلاع ، سندھ کے 16 اضلاع اور اسلام آباد میں مہم جاری ہے۔ فرنٹ لائن ورکرز کے ساتھ تعاون کریں-مطلوبہ ہدف والدین کے تعاون سے حاصل کرسکتے ہیں -پولیو کے خاتمے کیلئے ہنگامی بنیادوں پر اقدامات کیے جارھے ہیں -کسی بھی قسم کی شکایت یا معلومات کے 1166 پر رابط کریں-

پولیس کی جانب سے زمان پارک کینال روڈ سے پی ٹی آئی کارکنوں کو حراست میں لیا جارہا ہے۔

پولیس کی جانب سے زمان پارک کے قریب واٹرکینن اور بھاری نفری پہنچادی گئی ہے۔

پی ٹی آئی کے ڈنڈا بردار کارکن بھی زمان پارک میں موجود ہیں، عمران خان کی رہائش گاہ  کے سامنے پولیس اور کارکن آمنے سامنے آگئے، پی ٹی آئی کارکنوں نے پولیس پر پتھراؤ کیا اور کئی گاڑیوں کے شیشے توڑ دیے۔

خیال رہے کہ  تحریک انصاف نے آج لاہور میں ریلی کا اعلان کر رکھا ہے، ریلی کے حوالے سے فواد  چوہدری کا کہنا تھا کہ ریلی آئین اور عدلیہ سے اظہار یکجہتی کے لیے نکالی جائےگی۔

دوسری جانب محکمہ داخلہ پنجاب نے لاہور میں دفعہ 144 نافذ کردی ہے۔

صوبائی محکمہ داخلہ کی جانب سے جاری نوٹیفکیشن کے مطابق لاہور میں احتجاج، دھرنے اور مظاہروں پر بھی پابندی عائد کردی گئی ہے جس کا نفاذ آج سے ہوگا اور7 روز تک جاری رہےگا۔

نوٹیفکیشن کے مطابق پابندی لاہور میں ٹریفک اور سکیورٹی کی خراب صورتحال کے پیش نظر لگائی گئی ہے۔