Category پاکستان

وزیراعظم شہباز شریف خواتین کے عالمی دن پر خصوصی پیغام جاری کیا ہے۔

وزیر اعظم شہباز شریف کا کہنا ہے کہ خواتین کا عالمی دن بین الاقوامی سطح پر خواتین کے معاشرے میں کلیدی کردار کو پہچاننے اور انسانی تہذیب کے ارتقاء میں ان کی خدمات کے اعتراف کا دن ہے۔

انہوں نے کہا کہ تاریخ گواہ ہے کہ انسانی معاشرے کی ترقی خواتین کے تعمیری کردار کے بغیر ممکن نہ تھی۔تحریکِ پاکستان میں فاطمہ جناح ہوں یا بیگم رعنا لیاقت علی خان، محترمہ بینظیر بھٹو شہید ہوں یا ملالہ یوسف زئی، خواتین کا پاکستان کی ترقی اور ارتقاء میں مرکزی کردار کسی قیمت جھٹلایا نہیں جا سکتا۔

وزیرِ اعظم شہباز شریف نےکہا کہ ہمارے دین اسلام نے خواتین کو آج سے 14 سو سال پہلے برابری کے حقوق دیے۔ ماں کے قدموں تلے جنت اور بیٹی کو گھر کی رحمت قرار دیا، اسلام  خواتین کے وقار کو ماند کیے بغیر انہیں زندگی کے ہر شعبے میں مثبت کردار ادا کرنے کی حوصلہ افزائی کرتا ہے۔

ان کا کہنا تھا کہ موجودہ انسانی معاشرہ خواتین کی ہر شعبے میں خدمات کی مثالوں سے بھرا پڑا ہے، اکیسویں صدی کی دنیا میں خواتین مردوں کے شانہ بشانہ انسانی تہذیب کی ترقی میں مصروفِ عمل ہیں، آج کسی بھی شعبے کو اٹھا کر دیکھ لیں آپ کو خواتین اپنی گھریلو ذمہ داریوں کی احسن طریقے سے انجام دہی کے ساتھ ساتھ ہر شعبے میں قائدانہ کردار میں نظر آئیں گی جو خوش آئند امر ہے۔

وزیر اعظم نے کہا کہ حکومتِ پاکستان خواتین کو ان کے منصفانہ حقوق کی فراہمی کیلئے ہر وقت کوشاں ہے. پاکستان کی تقریباً نصف آبادی خواتین پر مبنی ہے۔ آج قوم کی با صلاحیت بیٹیاں، مائیں اور بہنیں باوقار طریقے سے ملک و قوم کی خدمت میں مصروفِ عمل ہیں۔

انہوں نے کہا کہ خواتین کو مزید با اختیار، ان کے تحفظ اور منصفانہ حقوق کو یقینی بنانے کیلئے پورے معاشرے کو مل کر کام کرنا ہوگا، اس میں سول سوسائٹی، میڈیا اور حکومت سب کو تعاون سے نہ صرف خواتین کے حقوق اور ان کے تحفظ کا عہد کرنا ہوگا بلکہ اس حوالے سے آگاہی میں بڑھ چڑھ کر حصہ لینا ہوگا۔

شہباز شریف کا کہنا تھا کہ میرا اپنے ملک کی باصلاحیت خواتین سے آج کے دن کی نسبت سے یہ وعدہ ہے کہ ہماری حکومت خواتین کے منصفانہ حقوق، ان کے تحفظ اور ان کو یکساں تعلیم و ترقی کے مواقع فراہم کرنے کیلئے اقدامات اٹھاتی رہے گی، آپ ملک و قوم کا فخر ہیں اور پاکستان کو ترقی کی منازل طے کرنے کیلئے آپ کی صلاحیتوں اور خدمات کی ضرورت ہے۔

واضح رہے کہ دنیا بھر میں آج خواتین کا دن منایا جا رہا ہے۔

اسلام آباد: آرمی چیف جنرل سید عاصم منیر نے پیر کو ملک کی 10؍ سرکردہ کاروباری شخصیات سے ملاقات کی اور وزیر خزانہ اسحاق ڈار کی موجودگی میں انہیں یقین دہانی کرائی کہ پاکستان مشکل معاشی حالات سے کامیابی سے باہر نکل آئے گا‘ ڈیفالٹ کا خطرہ ٹل چکا ہے، ملک ترقی کرے گا اور ہم ایک خوشحال قوم بن کر ابھریں گے۔ 

ملاقات کے حوالے سے باضابطہ طور پر کوئی بیان سامنے نہیں آیا لیکن ذرائع کا کہنا ہے کہ آرمی چیف پوری ملاقات کے دوران پرامید نظر آئے اور اس اعتماد کا اظہار کیا کہ موجودہ معاشی مشکلات پر قابو پا لیا جائے گا۔ 

انہوں نے کاروباری افراد سے کہا کہ وہ پرعزم اور پراعتماد رہیں۔ ایک ذریعے کے مطابق، آرمی چیف نے مختلف شعبوں سے تعلق رکھنے والے کاروباری افراد کو بتایا کہ قوم پر مشکلات آتی ہیں اور ہمیں مشکل حالات کا سامنا ہے لیکن بدتر حالات کو ہم پیچھے چھوڑ چکے ہیں اور ہم قائم و دائم رہیں گے۔ 

جنرل عاصم نے اسلامی تعلیمات کا حوالہ دیا اور شرکاء کو یقین دہانی کرائی کہ پاکستان موجودہ امتحان میں کامیاب ہو جائے گا۔

ملاقات میں شامل ایک شخص نے نام ظاہر نہ کرنے کی شرط پر کہا کہ کاروباری افراد نے آرمی چیف سے ملاقات کی درخواست کی تھی۔ وزیر خزانہ کو آرمی چیف نے سیشن میں شرکت کیلئے مدعو کیا تھا۔ کاروباری افراد نے اس ملاقات کو انتہائی کامیاب قرار دیا۔ 

آرمی چیف اور وزیر خزانہ نے کاروباری افراد کو بتایا کہ آئی ایم ایف کی تمام پیشگی شرائط کو پورا کر دیا گیا ہے اور چند روز میں ہی معاہدہ ہو جائے گا۔ انہوں نے بتایا کہ آئی ایم ایف نے یہ بھی کہا ہے کہ معیشت میں تیزی لانے کیلئے دوست ممالک سے کیے جانے والے معاہدوں کو بھی دستاویزی شکل دی جائے۔ 

کاروباری افراد کو بتایا گیا کہ دوست ممالک نے بھی وعدے کیے ہیں کہ وہ زراعت، کان کنی اور آئی ٹی کے شعبہ جات میں سرمایہ کاری کریں گے۔ حکومت کو توقع ہے کہ ان ممالک سے پیشگی سرمایہ (ایڈوانس ایکوئٹی) ملے گا۔ یہ کہا گیا کہ سول اور ملٹری قیادت نے مل کر دوست ممالک کو اس سرمایہ کاری کیلئے قائل کیا۔ 

ایک ذریعے کا کہنا تھا کہ آرمی چیف سے کاروباری افراد نے سوال کیا کہ اسٹیبلشمنٹ سیاست دانوں کو ایک جگہ بٹھانے کیلئے کوشش کیوں نہیں کر رہی تاکہ ملک کو درپیش سنگین چیلنجز کا مقابلہ کیا جا سکے۔ کاروباری افراد نے آرمی چیف کو بتایا کہ قوم توقع کرتی ہے کہ فوج معاشرے میں مزیدافرا تفری اور تفریق کی اجازت نہیں دے گی۔آرمی چیف سے ملاقات کیلئے آئے ان دس کاروباری افراد میں سے پانچ کا تعلق کراچی جب کہ پانچ کا لاہور سے تھا۔

اس سے قبل وزارت خزانہ نے الیکشن کمیشن کو اضافی گرانٹس دینے سے معذرت کرلی تھی جب کہ وزارت داخلہ نے فوج اور پیراملٹری فورسز کی عدم دستیابی سے آگاہ کیا تھا۔ 

دوسری جانب خیبرپختونخوا اسمبلی کے انتخابات کی تاریخ مقرر کرنے کے لیے گورنر اور الیکشن کمیشن کے درمیان آج مشاورت نہ ہوسکی۔ 

گورنر خیبرپختونخوا نے الیکشن کمیشن کو مشاورت کے لیے 7 اور 8 مارچ کی تاریخ دی تھی۔ 

گورنر ہاؤس کے ذرائع کا کہنا ہے کہ آج مشاورت کا کوئی امکان نہیں کیونکہ الیکشن کمیشن اب تک گورنر کے خط کا کوئی جواب نہیں دیا ہے۔

سندھ حکومت نے کل تمام سرکاری و نجی اسکول و کالجز میں چھٹی کا اعلان کردیا۔

ملک میں آج شب برات مذہبی عقیدت و احترام سے منائی جائے گی اور آج شب عبادات کا اہتمام کیا جائے گا۔

شب برات کے موقع پر محکمہ تعلیم سندھ نےکل تمام سرکاری و نجی اسکولوں اور کالجز میں چھٹی کا اعلان کیا ہے۔

محکمہ تعلیم نے چھٹی کا نوٹیفیکشن بھی جاری کردیا۔

سندھ حکومت نے ہندو برادری کے لیے عام تعطیل کا نوٹیفکیشن بھی جاری کردیا۔

نوٹیفکیشن کے مطابق سندھ حکومت کے محکموں میں کام کرنے والے ہندو ملازمین کے لیے 6 مارچ اور کل 7 مارچ کو تعطیل ہوگی۔

قومی اسمبلی کی قائمہ کمیٹی برائے ایوی ایشن میں انکشاف ہوا ہےکہ پی آئی اے کے پائلٹس نے تنخواہوں پر 35 سے 40 فیصد تک ٹیکس کے خلاف بڑی تعداد میں مستعفی ہونا شروع کردیا ہے۔

ذرائع کا کہنا ہےکہ پی آئی اے نے پائلٹس کی تنخواہوں پر 35 سے 40 فیصد ٹیکس عائد کیا ہے جس کے تحت 8 لاکھ تنخواہ لینے والے پائلٹ کو ساڑھے 3 لاکھ روپے اضافی ٹیکس ادا کرنا پڑرہا ہے۔

رکن کمیٹی سائرہ بانو نے کہا کہ دو درجن سے زائد پائلٹس نے استعفے دے رکھے ہیں جنہیں منظور نہیں کیا جارہا، پی آئی اے کے جہازوں کا حالیہ ڈیلے بھی پائلٹس کی کمی کے سبب ہے۔

پی آئی اے حکام نے قائمہ کمیٹی برائے ایوی ایشن میں استعفوں کی تصدیق کرتے ہوئے بتایا کہ پائلٹس کے استعفے موصول ہوئے ہیں جس پر حکومت نے پی آئی اے میں 250 نئے پائلٹ بھرتی کرنے کے لیے خط لکھا ہے۔

پی آئی اے کے چیف کمرشل آفیسر نے بتایا کہ حکومت نے پائلٹس کی نئی بھرتیوں پر تاحال جواب نہیں دیا، سپریم کورٹ نے پی آئی اے میں نئی بھرتیوں پر پابندی عائد کررکھی ہے۔

پاکستان مسلم لیگ (ن) یوتھ ونگ گوجرانوالہ ڈویژن کا اجلاس مریم نواز کی صدارت میں منعقد ہوا، اجلاس میں یوتھ ونگ گوجرانوالہ ڈویژن کی کارکردگی اور تنظیمی ڈھانچے کا جائزہ لیا گیا۔

مریم نواز نے کہا کہ گوجرانوالہ شیروں کا شہر تھا، ہے اور رہے گا، یوتھ ونگ کا جذبہ متاثر کن ہے، مسلم لیگ (ن) نوجوانوں کی جماعت بن چکی ہے، مشکل حالات میں یوتھ ونگ نے جرات مندانہ کردار ادا کیا۔

انہوں نے کہا کہ پاکستان کا مستقبل نوجوانوں کے ہاتھ میں ہے، تعلیم و تربیت، جدید ٹیکنالوجی، ہنرمندی اور شعور نوجوانوں کی ترقی کے راستے ہیں، مشکلات سے لڑ کر زندگی میں مقام بنانا ہی ایک جوان کی شان ہوتی ہے۔

مریم نواز کا کہنا تھا کہ نوجوان ہی ملک کی مستقبل کی قیادت ہیں، اللہ تعالیٰ نے موقع دیا ہے، نوجوانوں کو منظم قوت بنائیں گے، مریم نواز نے گوجرانوالہ کنونشن کے پنڈال کے باہر موجود نوجوانوں کے جذبے کو بھی سراہا۔

اس موقع پر یوتھ ونگ نے مریم نواز کو سینئر نائب صدر اور چیف آرگنائزر بننے پر مبارکباد پیش کی، یوتھ ونگ کے عہدیداروں اور کارکنوں نے کہا کہ آپ کے حکم اور رہنمائی کے منتظر ہیں۔

ذرائع کے مطابق وزیر مذہبی امور مفتی عبدالشکور نے وزیر خزانہ اسحاق ڈار سے ملاقات کی، ملاقات کے دوران حج پالیسی، اسپانسر شپ سکیم، سعودی عرب میں رقوم کی ادائیگی اور فاٹا اصلاحات پر تبادلہ خیال کیا گیا۔

اس موقع پر اسحاق ڈار کا کہنا تھا کہ سابقہ حکومت کے آئی ایم ایف سے معاہدوں کے باعث ہمارے ہاتھ بندھے ہوئے ہیں، اللہ کے مہمانوں کی آسانی اور سہولت کے لیے حکومت ہر ممکن اقدام کرے گی۔

ذرائع کا کہنا ہے کہ وزیر خزانہ نے حج انتظامات کے لیے وزارت مذہبی امور کو ہر ممکن تعاون کی یقین دہانی کرا دی، حج اسپانسر شپ سکیم صرف بیرون ملک مقیم پاکستانیوں یا ان کے عزیز و اقارب کے لیے ہے، بیرون ملک سے غیر ملکی زرمبادلہ بھجوانے والے پاکستانی سکیم سے فائدہ اٹھاسکیں گے، اسپانسر شپ سکیم میں شمولیت کے لیے پاکستانی پاسپورٹ لازمی قرار دیا گیا ہے۔

ذرائع نے بتایا ہے کہ اسپانسر شپ حج سکیم کا کوٹہ 50 فیصد مقرر کرنے کا اصولی فیصلہ کیا جا چکا ہے، دیگر 50 فیصد حج کوٹہ سرکاری، نجی حج سکیم کے لیے مختص کیے جانے کا اصولی فیصلہ کیا گیا۔

ریگولر حج سکیم کے تحت پاکستانی نامزد بینکوں میں حج درخواستیں جمع ہوں گی، موجودہ ڈالر ریٹ کے حساب سے حج اخراجات کا تخمینہ 11 سے 12 لاکھ روپے کے درمیان ہے۔

ذرائع کا کہنا ہے کہ اگلے ہفتے کابینہ سے منظوری ملتے ہی وزیر مذہبی امور درخواستوں کی وصولی کا باضابطہ اعلان کریں گے، سرکاری حج سکیم کی درخواست کی وصولی 13 مارچ سے شروع کیے جانے کا امکان ہے۔

لاہور:لاہور میں پتنگ بازوں کی طرف سے کل ( اتوار ) بسنت منانے کے اعلان کے بعد پولیس نے بھی آپریشنل تیاریاں مکمل کر لیں ، تھانوں کی سطح پر اسپیشل ٹیمیں تشکیل دے کر پتنگ بازی ایکٹ کی خلاف ورزی پر بلاامتیاز فوری پرچہ دینے کی ہدایت کر دی گئی ، صوبہ بھر میں پتنگ بازی کے خلاف دفعہ 144نافذ ہے جس کی خلاف ورزی پر 3سال قید اور ایک لاکھ روپے جرمانہ ہو سکتا ہے ۔ تفصیلات کے مطابق پتنگ بازوں نے آج بروز اتوار 5مارچ کا بسنت کا اعلان کررکھا ہے ۔ ڈی آئی جی آپریشنز افضال احمد کوثر کے حکم پر لاہور پولیس نے پتنگ بازوں کے خلاف گھیرا تنگ کر دیا ۔ افضال احمد کوثر نے پتنگ وڈور مینوفیکچرر اور سیلرز کی ڈور ناکنگ کی ہدایت کر دی۔ترجمان آپریشنز ونگ کے مطابق ریکارڈ یافتہ مجرمان سے ضمانتی مچلکے لئے جارہے ہیں۔ پتنگ بازی ایکٹ کی خلاف ورزی پر بلاامتیاز فوری پرچہ دینے کی ہدایت کر دی گئی جبکہ تھانوں کی سطح پر اسپیشل ٹیمیں تشکیل دے دی گئیں۔ڈی آئی جی آپریشنز نے ہدایت کی کہ انسدادِ پتنگ بازی ٹیمیں اپنی اپنی بیٹس میں متحرک رہیں،پتنگ سازی میں ملوث عناصر کو جیل کی ہوا کھانا پڑے گی۔ بلند عمارات سمیت پولیس ڈرونز کی مدد لی جائے گی۔ پتنگ بازی کے انسداد کیلئے تمام تر وسائل بروئے کار لائیں جائیں گے۔ پتنگ بازی کی روک تھام کیلئے داخلی وخارجی ناکوں پر سخت چیکنگ عمل میں لائیں۔ ڈولفن سکواڈ، پی آریو اورتھانوں کی گاڑیاں موثر گشت یقینی بنائیں۔ حکومت پنجاب کی جانب سے پتنگ بازی اور بسنت کے تہوار پر سخت پابندی عائد ہے ۔ صوبے بھر میں پتنگ بازی کے خلاف دفعہ 144نافذ ہے جس کی خلاف ورزی کی صورت میں 3سال قید اور ایک لاکھ روپے جرمانہ یا دونوں سزائیں ہو سکتی ہیں ۔ اس کے ساتھ کیمیل ڈور ، پتنگ بنانے اور بیچنے والوں کو 6ماہ قید اور ایک لاکھ روپے جرمانہ ہو سکتا ہے ۔ پولیس حکام نے شہریوں سے درخواست کی کہ والدین اپنے بچوں کو خونی کھیل سے روکیں۔ سول سوسائٹی و اساتذہ اس ضمن میں اپنا کردار ادا کریں۔ پتنگ بازی کی اطلاع فوراً 15پر دیں ، اطلاع دینے والے کا نام صیغہ راز میں رکھا جائے گا ۔ دوسری جانب لاہورمیں پولیس نے پتنگ فروش ڈیلرز اور پتنگ بازوں کے خلاف کارروائی کرتے ہوئے مختلف علاقوں سے 42 افراد کو گرفتارکرلیا۔ایس پی کینٹ اویس شفیق نے بتایا کہ لسٹڈ و ریکارڈ یافتہ 11 پتنگ فروش ڈیلر اور31 پتنگ باز کو گرفتارکیا گیا جن میں رفیق، کاشف، عثمان، عمر، کبیر وغیرہ شامل ہیں۔انہوں نے کہا کہ ملزمان سے 2423پتنگیں، 47ڈور کی چرخیاں، 55ڈور کی پینیاں برآمد کی گئی جبکہ ہزاروں پتنگیں بنانے والا خام مال بھی برآمد کرلیا گیا۔انہوں نے بتاا کہ ملزمان نے مختلف علاقوں میں پتنگیں سپلای کرنے کا اعتراف کیا ہے جن پر مقدمات درج کرلئے گئے اور پتنگ فروش ڈیلروں، پتنگ بازوں سے آہنی ہاتھوں نمٹا جاے گا۔جبکہ ترجمان آپریشنز ونگ کے مطابق پتنگ سازی اورفروخت کنندگان کے خلاف کریک ڈان جاری ہے اور گذشتہ ہفتے میں لاہور کے مختلف تھانوں میں 389مقدمات درج کیے گئے ۔ مختلف کاروائیوں کے دوران 392ملزمان گرفتارکئے گئے۔اسپیشل کریک ڈائون میں 02مینوفیکچرراور 29سیلرز شامل ہیں ، سٹی ڈویژن سے 88، کینٹ 87، سول لائنز ڈویژن سے 36 ملزمان گرفتار،صدر 48، اقبال ٹائون 67اور ماڈل ٹائون ڈویژن سے 66 ملزمان گرفتار کیے گئے ۔ مختلف آپریشنز کے دوران 06ہزار 431 پتنگیں برآمد کی گئیں۔ 77 چرخیاں، 174 پنی ڈور اور 80 گچھیاں قبضہ میں لی گئیں۔ شہری پتنگ بازی کی اطلاع 15 پر دیں۔

کاؤنٹر ٹیررزم ڈیپارٹمنٹ پنجاب (سی ٹی ڈی ) سے جاری بیان کے مطابق سی ٹی ڈی نے دہشتگردی  کا منصوبہ ناکام بنا دیا ، لاہور سے پانچ اور سرگودھا سے تین دہشت گردوں کو گرفتار کرلیا گیا ، گرفتار دہشت گردوں میں محمد لقمان شاہد ، سید انس وقار اور ثنا اللہ ، سلیمان خان اور نجیب اللہ شامل ہیں ۔

سی ٹی ڈی حکام کے مطابق سرگودھا آپریشن کے دوران تین دہشت گرد گرفتار ہوئے جن میں ارشاد اللہ اور محمد طاہر شامل ہیں ۔

سی ٹی ڈی حکام کا کہنا ہے کہ گرفتار دہشت گردوں سے بم ، دھماکہ خیز مواد ، ڈیٹونیٹر اسلحہ اور کالعدم تنظیم کی فنڈنگ کا سامان بھی برآمد ہوا ہے ۔

ترجمان کے مطابق سی ٹی ڈی نے رواں ہفتے پولیس اور قانون نافذ کرنے والے اداروں کی مدد سے 382 کومبنگ آپریشن کیے ، کومبنگ آپریشن کے دوران 18020 افراد کو چیک کیا گیا جن میں 59 مشتبہ افراد گرفتار ہوئے۔