Category پاکستان

لاہور: وزیراعلیٰ پنجاب نے مزدور کی کم سے کم اجرت 20 ہزار روپے مقرر کرنے کا اعلان کردیا۔

یوم مئی کی مناسبت سے جاری بیان میں وزیراعلیٰ پنجاب عثمان بزدار نے کہا کہ لاہور،ننکانہ صاحب اور ملتان میں محنت کشوں کو 1296 فلیٹس بھی الاٹ کردیے گئے ہیں۔

انہوں نے کہا کہ یہ سب تحریک انصاف کی حکومت کا محنت کشوں کے لیے تحفہ ہے۔

پاکستان میں کورونا وائرس کی تیسری لہر کا زور کسی طور ٹوٹتا دکھائی نہیں دے رہا اور ملک میں 5 ہزار 360 مریضوں کی حالت تشویشناک ہے جو وبا کی پہلی لہر کے عروج سے بھی بڑی تعداد ہے۔

کووِڈ-19 کے اعداد و شمار کے لیے بنائی گئی سرکاری ویب سائٹ کے مطابق گزشتہ 24 گھنٹوں میں پاکستان میں مزید 5 ہزار 112 افراد میں وائرس کی تشخیص ہوئی جبکہ 131 مریض انتقال کر گئے۔

وبا کی تشخیص کے لیے 29 اپریل کو مجموعی طور پر 49 ہزار 99 ٹیسٹ کیے گئے جس کے نتیجے میں نتائج مثبت آنے کی شرح 10.41 فیصد رہی جبکہ فعال کیسز 91 ہزار 547 تک پہنچ چکے ہیں۔

ملک میں مجموعی طور پر اب تک کورونا وائرس سے 8 لاکھ 20 ہزار 823 افراد متاثر ہو چکے ہیں جن میں سے 17 ہزار 811 زندگی کی بازی ہار گئے۔

علاوہ ازیں گزشتہ 24 گھنٹے کے دوران مزید 3 ہزار 272 مریض صحتیاب ہوئے اور مجموعی طور پر اب تک 7 لاکھ 11 ہزار 456 مریض صحتیاب ہوچکے ہیں۔

واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد سے وبا کے پھیلاؤ میں اتار چڑھاؤ جاری ہے اور اب تک بیماری کی 2 لہریں دیکھی جاچکی ہیں جبکہ تیسری لہر کا پھیلاؤ بدستور جاری ہے۔

کیسز میں حالیہ اضافے کے پیشِ نظر تعلیمی اداروں کی بندش، کاروبار کے اوقات مختصر، دفاتر میں کم حاضری سمیت متعدد اقدامات کیے گئے ہیں اور صورتحال بہتر نہ ہونے پر لاک ڈاؤن کا عندیہ بھی دیا گیا ہے۔

پاکستان میں 30 اپریل کو چاروں صوبوں اور وفاقی اکائیوں میں کورونا وائرس کیسز اور اموات کی صورتحال درج ذیل ہے:

پنجاب
وبا کی تیسری لہر نے صوبہ پنجاب کو سب سے زیادہ متاثر کیا ہے اور گزشتہ 24 گھنٹوں کے دوران صوبے میں 2 ہزار 296 نئے کیسز رپورٹ ہوئے اور مزید 83 مریض دم توڑ گئے۔

پنجاب میں اب تک 3 لاکھ ایک ہزار 114 کورونا کیسز رپورٹ ہو چکے ہیں جس میں مرنے والوں کی تعداد 8 ہزار 410 تک پہنچ گئی ہے۔

خیبر پختونخوا
کورونا وائرس کی حالیہ لہر کے دوران پنجاب کے بعد صوبہ خیبرپختونخوا زیادہ متاثر ہوا ہے اور یہاں گزشتہ روز مزید ایک ہزار 34 نئے کیسز سامنے آئے جبکہ 36 مریض دم توڑ گئے۔

خیبر پختونخوا میں اب تک رپورٹ ہونے والے کیسز کی مجموعی تعداد ایک لاکھ 17 ہزار 557 ہے جبکہ 3 ہزار 274 مریض انتقال کر چکے ہیں۔

سندھ
ملک کے دوسرے بڑے صوبے سندھ میں بھی کیسز میں واضح اضافہ دیکھنے میں آرہا ہے اور یہاں گزشتہ 24 گھنٹوں میں ایک ہزار 60 کیسز رپورٹ ہوئے جس کے بعد مجموعی کیسز کی تعداد 2 لاکھ 82 ہزار 445 ہو گئی ہے۔

صوبے میں کورونا وائرس سے مزید 4 مریضوں کا انتقال ہوا، مجموعی طور پر یہاں اب تک 4 ہزار 633 افراد لقمہ اجل بن چکے ہیں۔

اسلام آباد
اسلام آباد میں گزشتہ 24 گھنٹوں کے دوران مزید 427 نئے کیسز رپورٹ ہوئے جبکہ مزید 2 مریض اس وبا کے باعث زندگی کی بازی ہار گئے۔

وفاقی دارالحکومت میں اب تک مجموعی طور پر 75 ہزار 67 افراد وائرس کا شکار ہوچکے ہیں جن میں سے انتقال کر جانے والوں کی تعداد 679 ہے۔

آزاد کشمیر
آزاد کشمیر میں گزشتہ 24 گھنٹوں کے دوران مزید 126 افراد میں وائرس کی تصدیق ہوئی جبکہ 5 مریض دم توڑ گئے۔

یہاں مجموعی طور پر 17 ہزار 57 افراد وائرس سے متاثر ہوئے جس میں سے 475 انتقال کر گئے۔

بلوچستان
بلوچستان میں کورونا وائرس نے مزید 160 افراد کو متاثر کیا اور مزید ایک مریض دم توڑ گیا۔

یوں صوبے میں اب تک رپورٹ ہونے والے کیسز کی مجموعی تعداد 22 ہزار 278 اور اموات کی تعداد 234 تک پہنچ گئی ہے۔

گلگت بلتستان
گلگت بلتستان میں گزشتہ روز 9 کیسز سامنے آئے، یہاں اب تک رپورٹ ہونے والے کیسز کی تعداد 5 ہزار 305 ہے۔

علاوہ ازیں یہاں گزشتہ روز مزید ایک مریض دم توڑ گیا، یوں اموات کی تعداد 106 ہوگئی۔

لاہور: وزیراعظم عمران خان کی جانب سے چینی اسکینڈل کی تحقیقات کے معاملے کی نگرانی کرنے والے سینیٹر بیرسٹر علی ظفر نے گزشتہ روز پاکستان تحریک انصاف کے منحرف رہنما جہانگیر ترین کی قانونی ٹیم اور وفاقی تحقیقاتی ادارے کے افسران سے علیحدہ علیحدہ ملاقاتیں کیں جنہوں نے انہیں اب تک کی تحقیقات کے حوالے سے آگاہ کیا۔

رپورٹ کے مطابق سینیٹر بیرسٹر علی ظفر نے ڈان کو بتایا کہ ‘مجھے یقین ہے کہ جہانگیر ترین کے خلاف مقدمے سے متعلق ایف آئی اے کی تحقیقات جلد مکمل کرلی جائیں گی، جس کے لیے ممکنہ طور پر ایک ماہ لگ سکتے ہیں، اُمید ہے کہ مئی کے دوران وزیر اعظم کو حتمی رپورٹ بھی پیش کردی جائے گی’۔

بیرسٹر علی ظفر کا کہنا تھا کہ ‘وہ سچائی جاننے کیلئے’ ایف آئی اے اور جہانگیر ترین کی قانونی اور مالیاتی ٹیم سے ملاقتیں جاری رکھیں گے’۔

انہوں نے مزید کہا کہ اس دوران اگر مناسب رہے تو ایف آئی اے چینی اسکینڈل پر تحقیقات جاری رکھ سکتا ہے۔

وزیراعظم نے اس ہفتے اپنے با اعتماد فرد سینیٹر علی ظفر پر مشتمل ایک رکنی کمیٹی تشکیل دی تھی تاکہ وہ اس بات کی حقیقت سے انہیں آگاہ کرسکیں اور ان الزامات کی تحقیقات کرسکیں کہ حکومت اور پی ٹی آئی کے اہم عہدوں پر موجود افراد جہانگیر ترین کو سیاسی انتقام کا نشانہ بنا رہے ہیں۔

وزیر اعظم عمران خان نے کمیٹی بنانے کا فیصلہ ان کی پارٹی کے 30 قانون سازوں کی ملاقات کے بعد کیا جن کا مؤقف تھا کہ جہانگیر ترین کو نشانہ بنایا جا رہا ہے۔

دوسری جانب جہانگیر ترین کے حمایت یافتہ گروپ کے مطالبے پر حکومت نے ایف آئی اے لاہور کے ڈائریکٹر محمد رضوان کو تبدیل کردیا، جو شوگر اسکینڈل کی تحقیقات کی سربراہی کررہے تھے، ان کے تبادلے کے بعد مقدمے میں نامزد افراد کے خلاف کچھ عرصے کیلئے کارروائی روک دی گئی ہے۔

جہانگیر ترین نے نئی تحقیقاتی ٹیم کی تشکیل کا مطالبہ کیا ہے جو وزیر اعظم کے مشیر برائے احتساب شہزاد اکبر کے اثر و رسوخ سے پاک ہو۔

جہانگیر ترین اور شہزاد اکبر کے درمیان تناؤ
ڈان سے بات کرتے ہوئے پی ٹی آئی کے رکن قومی اسمبلی راجا ریاض، جہانگیر ترین کی حمایت میں 40 اراکین اسمبلی کے تعداد کا دعویٰ کرنے والے، نے انکشاف کیا کہ ایک معاملے میں دونوں کے درمیان جھگڑا ہونے کے بعد شہزاد اکبر نے جہانگیر ترین کی مخالفت شروع کی۔

ان کا مزید کہنا تھا کہ جہانگیر ترین نے ماضی میں کسی مسئلے میں شہزاد اکبر کو نظر انداز کیا تھا جس کے بعد شہزاد اکبر جہانگیر ترین سے بدلہ لینا چاہتے تھے، اور اب شہزاد اکبر نے جہانگیر ترین کو سبق سیکھانے کے لیے ایف آئی اے کا استعمال کر رہے ہیں۔

راجا ریاض نے دعویٰ کیا کہ شوگر انکوائری کی سربراہی کرنے والے افسر رضوان نے شہزاد اکبر کے ایما پر جہانگیر ترین اور ان کے بیٹے کے خلاف درج کیے گئے مقدمے میں بے بنیاد الزامات لگائے۔

راجا ریاض کا کہنا تھا کہ ہمیں اُمید ہے کہ عدالت جہانگیر ترین کے خلاف مقدمہ خارج کرنے کا حکم دے گی، جو مفروضوں کی بنیاد پر بنایا گیا ہے، اور انہوں نے مذکورہ معاملے کی تحقیقات کرنے والی ایک رکنی کمیٹی پر مکمل اعتماد کا اظہار کیا۔

شوگر اسکینڈل پر ہونے والی اب تک کی تحقیقات کے مطابق ایف آئی اے کی جانب سے 30 شوگر ملز کے خلاف مقدمات کا اندراج کیا گیا ہے جس میں وفاقی وزیر خسرو بختیار اور ان کے اہل خانہ بڑے حصہ دار کے طور پر نامزد ہیں۔

ایف آئی اے رپورٹ کے مطابق ‘چینی کی قیمتوں سے متعلق سٹہ مافیا سے تعلق پر پاکستان مسلم لیگ (ن) کے صدر شہباز شریف اور ان کے بیٹے حمزہ شہباز اور دو میڈیا ہاوسز کی شوگر ملز پر مقدمات درج کیے گئے’، اس کے علاوہ ایجنسی کی جانب سے 40 کے قریب سٹہ مافیا کے ارکان کے خلاف بھی مقدمات قائم کیے گئے ہیں۔

ہالا: پی ایس کیو سی اے کی خصوصی ٹیم نے سابق ڈی جی ایف آئی اے بشیر میمن کی سانگھڑ و شہدادپور روڈ پر واقع گھی فیکٹری پر چھاپہ مارا اور کوالٹی چیک کرنے کے ساتھ لائسنس سے متعلق ریکارڈ طلب کرلیا ہے۔

پاکستان اسٹینڈرڈ کوالٹی کنٹرول اتھارٹی کی ٹیم نے سابق ڈی جی ایف آئی اے بشیر میمن کی سانگھڑ و شہدادپور روڈ پر واقع گھی فیکٹری پرچھاپے کے دوران ریکارڈ اور لائسنس چیک کیا۔ لائسنس کی تجدید نہ ہونے پر فیکٹری انتظامیہ سے پوچھ گچھ کی گئی۔

سابق ڈی جی ایف آئی اے بشیر میمن کا کہنا تھا کہ گھی فیکٹری کے لائسنس کی تجدید کیلئے پہلے ہی درخواست جمع کرواچکا ہو۔ رزق دینے والا اللھ ہے۔ مجھے کسی کا ڈر اور خوف نہیں۔پی ٹی آئی کے حکمرانوں پر الزامات عائد نہیں کیے بلکہ حقیقت بیان کی ہے۔ اگر میں نے اتنے ہی غلط اور جھوٹے الزام لگائے تو انہیں پریشان ہونے کی کیا ضرورت ہے۔

ہالا میں واقع اپنی رہائشگاہ پر ایکسپریس سے خصوصی گفتگو کرتے ہوئے بشیر میمن کا کہنا تھا کہ الزامات تو وہ ہوتے جو تحریری دیتا میں نے تو باتیں کی۔ اب یہ لوگ لیگل پراسیس میں آگئے ہیں اور مجھے ایک قانونی نوٹس بھیجا گیا ہے۔ ان کی مہربانی ہے میں اس کا جواب دونگا۔

بشیر میمن نے واضح کیا کہ نون لیگ سے میرا کوئی تعلق نہیں، میں اب ریٹائرڈ ہو کر گھر میں بیٹھا ہوں۔ کیا نون لیگ دوبارہ پاور میں آنے کے بعد مجھے پھر نوکری دے گی۔؟ مجھے سمجھ نہیں آرہی کس طرح کی باتیں کی جارہی ہیں۔ ہونا تو یہ چاہیے کہ حکمرانوں کو چاہیے تھا کہ میں نے جو کہا اس کے بارے میں میڈیا میں آکر بتاتے کہ میں نے کیا جھوٹ بولا۔ الٹا سوشل میڈیا پر طوفان بدتمیزی برپا کردیا اور انہیں مغلظات تک دی جارہی ہیں۔ انہوں نے کہا کہ مغلظات دینے والے بچوں سے کہتا ہو کہ وہ غلیظ باتوں سے اجتناب برتیں۔

وفاقی وزیر منصوبہ بندی و نیشنل کمانڈ اینڈ آپریشن سینٹر (این سی او سی) کے سربراہ اسد عمر نے کہا ہے کہ کورونا وبا کے باعث ملک میں اگلے چند ہفتے خطرناک ہیں اس لیے ایس او پیز پر عمل کیا جائے۔ کورونا وائرس کے تشویشناک مریضوں کی تعداد گزشتہ سال جون کے مقابلے میں 57 فیصد زیادہ ہے۔

سماجی رابطے کی ویب سائٹ پر ٹوئٹس میں اسد عمر نے کہا کہ ‘ملک میں کورونا وائرس کے تشویشناک مریضوں کی تعداد 5 ہزار 360 ہوچکی ہے جو گزشتہ سال جون کے مقابلے میں 57 فیصد زیادہ ہے’۔

انہوں نے کہا کہ ‘ابھی تک کورونا کے اتنے زیادہ کیسز کو منظم طریقے سے نمٹایا اور یہ پورے نظام میں آکسیجن کی پیداوار سے بستروں تک کی استعداد کار بڑھانے کے باعث ممکن ہوا’۔

اسد عمر نے کہا کہ ‘پاکستان میں گزشتہ سال آکسیجن کی پیداواری صلاحیت 487 ٹن یومیہ تھی، اسے بڑھا کر 798 ٹن کردیا گیا ہے، گزشتہ جون میں آکسیجن کی پیداوار 465 ٹن یومیہ سے 725 ٹن ہوگئی ہے’۔

انہوں نے کہا کہ ‘ہم نے تقسیم کو یقینی بنانے کے لیے گزشتہ سال 19 ہزار 200 آکسیجن سلنڈرز بھی درآمد کیے تھے’۔

ان کا کہنا تھا کہ وفاقی و صوبائی حکومتوں کے اقدامات کے باعث تشویشناک مریضوں میں 2 ہزار سے زائد اضافے کے باوجود گزشتہ جون کے مقابلے میں اس بار آکسیجن کی سپلائی کی صورتحال بہتر ہے۔

وفاقی وزیر نے کہا کہ آکسیجن کی استعداد کار بڑھانے کے لیے گزشتہ روز این سی او سی کے اجلاس میں 6 ہزار آکسیجن، 5 ہزار سلنڈرز اور 20 کرائیوجینک ٹینکس درآمد کرنے کا فیصلہ کیا گیا ہے۔

انہوں نے کہا کہ اس پیشگی فیصلہ سازی کی وجہ سے پاکستان کو اس قسم کی صورتحال سے بچنے میں مدد ملی جو دیگر ممالک میں دیکھی گئی۔

تاہم اسد عمر نے تنبیہ کی کہ چیلنج ابھی ختم نہیں ہوا بلکہ اس میں اضافہ ہورہا ہے۔

ان کا کہنا تھا کہ ہمیں احتیاطی تدابیر اختیار کرنے کی ضرورت ہے، ایس او پیز پر عمل درآمد وقت کی اہم ضرورت ہے اور آئندہ چند ہفتے ‘نازک’ ہیں۔

انہوں نے کہا کہ ‘اگر ہم نے بیماری کو تیزی سے پھیلنے کا موقع دیا تو کوئی بھی نظام اس پر قابو نہیں پاسکے گا’۔

واضح رہے کہ گزشتہ روز این سی او سی نے فیصلہ کیا تھا مصری شاہ کی اسکریپ انڈسٹری کو بند کر کے آکسیجن کو ہیلتھ کیئر سیکٹر کی جانب موڑ دیا جائے گا۔

اجلاس میں عید کی چھٹیوں کے دوران عوام پر ‘گھروں میں رہنے اور محفوظ رہنے’ کی ضرورت پر زور دیا گیا۔

اسلام آباد: حکومت نے آئندہ 15 روز کے لئے پیٹرولیم مصنوعات کی قیمتیں برقرار رکھنے کا فیصلہ کیا ہے۔

وزارت خزانہ کی جانب سے جاری اعلامیے کے مطابق پٹرول کی قیمت 108.56 روپے فی لیٹر جب کہ ہائی اسپیڈ ڈیزل کی قیمت 110.76 روپے فی لیٹربرقرار رہیں گی۔

اعلامیہ کے مطابق مٹی کے تیل کی قیمت 80 روپے فی لیٹر اور لائٹ ڈیزل آئل کی قیمت 77.65 روپے فی لیٹربرقرار رہے گی اور یہ قیمتیں پندرہ مئی 2021 تک لاگو رہیں گی۔

نیشنل کمانڈ اینڈ آپریشن سینٹر (این سی او سی) نے 10 سے 15 مئی تک عید الفطر کی چھٹیوں کا اعلان اور 5 سے 20 مئی تک مسافر پروازوں کی پاکستان آمد پر پابندی کا فیصلہ کیا ہے۔

مائیکرو بلاگنگ ویب سائٹ ٹوئٹر پر جاری پریس ریلیز میں فورم کی جانب سے ملک بھر میں 8 سے 16 مئی کے دوران عوام کی نقل و حرکت روکنے کے اقدامات کا اعلان کیا گیا ہے۔

اعلامیے میں کہا گیا کہ 10 سے 15 مئی تک عید الفطر کی چھٹیوں کا اعلان قومی سطح پر نقل و حرکت محدود رکھنے کے ارادے کو ظاہر کرتا ہے۔

بیان کے مطابق یومِ علی کرمہ اللہ وجہہ، اعتکاف، شب قدر، جمعتہ الوداع اور نماز عید کے لیے جامع ایس او پیز یکم مئی تک جاری کیے جائیں گے۔

کاروباری بندشیں
عوام کو گھروں تک محدود رکھنے کی حکمت عملی کے تحت مندرجہ ذیل کے سوا تمام کاروباری مراکز، دکانیں اور مارکیٹیں بند رکھی جائیں گی۔

اشیائے خورونوش کی دکانیں، میڈیکل اسٹور، میڈیکل سہولیات/ویکسینیشن سینٹر، پھل سبزی اور گوشت کی دکانوں، بیکریز، پیٹرول پمپس، کھانا خریدنے یا گھر پر منگوانے، یوٹیلیٹی سروسز (گیس، بجلی فون) اور میڈیا وغیرہ۔

علاوہ ازیں چاند رات بازاروں بشمول مہندی، جیولری، کپڑوں اور دیگر اشیا کی فروخت پر بھی پابندی ہوگی۔

سیاحت
مقامی اور غیر مقامی افراد کے لیے سیاحت پر مکمل پابندی ہوگی، اور سیاحتی مقامات پر ریزورٹس، تفریحی مقامات، پبلک پارکس، شاپنگ مالز، ہوٹلز اور ریسٹورنٹس وغیرہ بند رہیں گے۔

سیاحتی مقامات، پکنک کی جگہوں بالخصوص، مری، گلیات، سوات کالام، ساحل سمندر، اور شمالی علاقہ جات سمیت دیگر گھومنے پھرنے کی جگہوں پو جانے والے راستے بند ہوں گے۔

البتہ گلگت بلتستان اور آزاد کشمیر کے مقامہ افراد کو اپنے گھروں کو واپس جانے کی اجازت ہوگی۔

ٹرانسپورٹ
نجی گاڑیوں، ٹیکسیوں، رکشوں میں 50 فیصد مسافروں کو بٹھانے کی اجازت ہوگی اس کے علاوہ بین الصوبائی، اندرونِ شہر اور شہروں کے درمیان چلنے والی ٹرانسپورٹ پر پابندی رہے گی۔

عید کے پیش نظر مسافروں کے حجم کو تقسیم کرنے کے لیے 7 مئی تک اضافی ٹرینیں چلائی جائیں گی اور اس کے بعد ایس او پیز کے ساتھ 70 فیصد گنجائش بحال کردی جائے گی۔

میڈیا
ساتھ ہی پرنٹ، الیکٹرانک اور سوشل میڈیا کے ذریعے عید الفطر کے دوران گھروں میں رہنے سے متعلق پیغامات نشر کرنے کا بھی فیصلہ کیا۔

عید کی چھٹیوں کے دوران میڈیا کو خصوصی پروگرامز، موویز، ڈرامے اور انٹرٹینمنٹ شوز نشر کرنے کی ہدایت کی گئی تا کہ عوام گھروں میں رہ سکیں جبکہ عید کی تعطیلات کے دوران بجلی کی بلا تعطل فراہمی یقینی بنانے کا بھی کہا گیا۔

5 سے 20 مئی تک مسافر پروازوں کی آمد پر پابندی
قبل ازیں ملک میں کورونا وائرس کی صورتحال کا جائزہ لینے اور اقدامات کے لیے این سی او سی کا اجلاس وزیر منصوبہ بندی اسد عمر کی سربراہی میں ہوا۔

اس حوالے سے جاری کردہ بیان میں بتایا گیا کہ اجلاس میں عالمی سطح پر وائرس کے پھیلاؤ میں اضافے کے پیشِ نظر پاکستان آنے والی مسافر پروازوں کو 5 سے 20 مئی تک روکنے کا فیصلہ کیا گیا ہے۔

بعدازاں 18 مئی 2021 کو ان پابندیوں کا دوبارہ جائزہ لیا جائے گا، اس ضمن میں تفصیلی ہدایات سول ایوی ایشن اتھارٹی (سی اے اے) جاری کرے گی۔

اجلاس میں ساتھ فورم نے 3 مئی 2021 سے 40 سے 49 سال کی عمر کے افراد کی ویکسینیشن کا فیصلہ کیا ہے

دورانِ اجلاس ملک میں آکسیجن کی پیداوار اور فراہمی کا بھی جائزہ لیا گیا اور 6 ہزار میٹرک ٹن آکسیجن اور 5 ہزار آکسیجن سلینڈرز درآمد کرنے کی اجازت دینےکا بھی فیصلہ کیا گیا تا کہ ملک میں صحت کی سہولیات کو بہتر بنایا جاسکے۔

علاوہ ازیں 20 کرائیوجینک ٹینکس درآمد کرنے کی اجازت بھی دے دی گئی۔

این سی او سی نے فیصلہ کیا مصری شاہ کی اسکریپ انڈسٹری کو بند کر کے آکسیجن کو ہیلتھ کیئر سیکٹر کی جانب موڑ دیا جائے گا۔

اجلاس میں عید کی چھٹیوں کے دوران ‘گھروں میں رہنے اور محفوظ رہنے’ کی ضرورت پر زور دیا گیا۔

اس ضمن میں مارکیٹوں کی بندش(استثنیٰ کے ساتھ)، انٹرسٹی اور انٹرا سٹی پبلک ٹرانسپورٹ اور سیاحت کے حوالے سے جامع رہنما ہدایات متعلقہ وزارتوں کو جاری کردی گئی ہیں۔

ملک میں کورونا سے مزید 150 افراد انتقال کر گئے جبکہ 5480 نئے کیسز بھی رپورٹ ہوئے ہیں۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 57013 ٹیسٹ کیے گئے جس میں سے 5480 افراد میں کورونا وائرس کی تصدیق ہوئی جبکہ وائرس سے 150 افراد انتقال کر گئے۔

سرکاری پورٹل کے مطابق ملک میں کورونا کے مثبت کیسز کی شرح 9.61 فیصد رہی۔

سرکاری اعداد و شمار کے مطابق ملک میں کورونا سے ہلاکتوں کی تعداد 17680 ہو گئی ہے اور مجموعی کیسز 8 لاکھ 15711 تک جاپہنچے ہیں جب کہ فعال کیسز کی تعداد 89838 ہے۔

اس کے علاوہ 24 گھنٹوں کے دوران ملک بھر میں 3699 مریض کورونا سے صحتیاب بھی ہوئے جس کے بعد مجموعی طور پر صحتیاب ہونے والوں کی تعداد 7 لاکھ 8193 ہو گئی ہے۔

صوبوں کی صورتحال
سرکاری پورٹل کے مطابق سندھ میں کورونا کے مریضوں کی مجموعی تعداد 281385 ہوگئی ہے جب کہ 4629 افراد اب تک انتقال کرچکے ہیں۔

پنجاب میں کورونا کے کل مریضوں کی تعداد 298818 ہے اور 8327 افراد وائرس میں مبتلا ہوکر جان سے جا چکے ہیں جب کہ بلوچستان میں مریضوں کی کل تعداد 22118 اور ہلاکتیں 233 ہو چکی ہیں۔

خیبرپختونخوا میں کورونا کے مریضوں کی تعداد 116523 اور 3238 ہلاکتیں ہو چکی ہیں جبکہ آزاد کشمیر میں 16931 افراد وائرس میں مبتلا ہوچکے ہیں اور 470 افراد انتقال کر گئے۔

اس کے علاوہ گلگت بلتستان میں اب تک کورونا کے مریضوں کی تعداد 5296 اور 106 افراد انتقال کرچکے ہیں۔

پورٹل کے مطابق وفاقی دارالحکومت اسلام آباد میں کورونا کے مریضوں کی مجموعی تعداد 74640 ہے اور اب تک 677 مریض انتقال کر چکے ہیں۔

سپریم جوڈیشل کونسل (ایس جے سی) نے حال ہی میں مقدمہ جیتنے والے سپریم کورٹ کے جج جسٹس قاضی فائز عیسیٰ کے خلاف مزید کارروائی نہ کرنے کا فیصلہ کیا ہے۔

رپورٹ کے مطابق سپریم کورٹ آف پاکستان نے صدارتی ریفرنس پر حکم کے خلاف جسٹس قاضی فائز عیسیٰ کی نظرثانی درخواستیں منظور کر لی تھی۔

باخبر ذرائع نے بتایا کہ چیف جسٹس آف پاکستان گلزار احمد کی سربراہی میں ایس جے سی نے 10 رکنی سپریم کورٹ بینچ کے 26 اپریل کے فیصلے کی روشنی میں جسٹس قاضی فائز عیسیٰ کے خلاف مزید کارروائی نہ کرنے کا فیصلہ کیا ہے۔

جسٹس قاضی فائر عیسیٰ نے صدارتی ریفرنس پر سپریم کورٹ کے 19 جون 2020 کے فیصلے کے خلاف نظرثانی درخواست دائر کی تھی۔

عدالت نے اپنے حکم میں جسٹس قاضی فائز عیسیٰ کی اہلیہ کے آف شور اثاثوں کا معاملہ وفاقی ریونیو بورڈ (ایف بی آر) کو بھیجنے کا فیصلہ سنایا تھا۔

سپریم کورٹ کے حالیہ اکثریتی فیصلے میں جسٹس قاضی فائز عیسیٰ کی اہلیہ اور ان کے بچوں کی جائیدادوں سے متعلق ایف بی آر سمیت تمام فورمز کی قانونی کارروائی کالعدم قرار دیتے ہوئے کہا گیا تھا کہ ایف بی آر کی مرتب کردہ رپورٹ سپریم جوڈیشل کونسل سمیت کسی عدالتی فورم پر چیلنج نہیں ہوسکتی۔

جسٹس عمر عطا بندیال کی سربراہی میں 10 ‏رکنی فل بینچ نے جسٹس قاضی فائز عیسٰی نظرثانی کیس پر سماعت کی تھی۔

جسٹس عمر عطا بندیال نے کونسل کے پہلے سیشن میں شرکت نہیں کی تھی اور پہلے ہی عدم شرکت سے متعلق آگاہ کردیا تھا۔

تاہم جسٹس عمر عطا بندیال دوسرے سیشن میں موجود تھے جس میں صدر ڈاکٹر عارف علوی کی جانب سے سندھ ہائی کورٹ کے جج کے کے آغا کے خلاف ایک مختلف ریفرنس دائر کیا گیا، اسی دوران جسٹس قاضی فائز عیسیٰ کے خلاف ریفرنس دائر کیا گیا تھا۔

جسٹس کے کے آغا پر الزامات عائد ہیں کہ اگرچہ انہوں نے 2018 میں اپنی غیر ملکی جائیداد ظاہر کی لیکن وہ ان کی قیمت بتانے میں ناکام رہے اور انہوں نے ٹیکس سال 2015 سے قبل پاکستان میں اپنی غیر منقولہ جائیدادوں کو چھپا لیا، اس حقیقت کے باوجود کہ ان کی سالانہ آمدنی 10 لاکھ سے زائد تھی۔

اس سے قبل ایس جے سی، جس کا اجلاس 14 اپریل کو ہونا تھا، نے اپنا اجلاس 28 اپریل تک ملتوی کردیا تھا تاکہ فیصلہ کیا جاسکے کہ تین جائیدادوں پر ایف بی آر کی تحقیقات کی بنیاد پر جسٹس قاضی فائز عیسیٰ کے خلاف آگے چلنا چاہیے یا نہیں۔

ایس جے سی کی جانب سے ایف بی آر کی اس رپورٹ کا معاملہ اٹھایا گیا جس میں تحقیقاتی ادارے نے سرینا عیسیٰ پر 14 ستمبر 2020 کو ٹیکس جرمانہ عائد کیا تھا۔

سرینا عیسیٰ اور ان کے بچوں کے نام بیرون ملک جائیداد تھی جسے ظاہر نہیں کیا گیا تھا۔

تاہم، ایس جے سی نے سپریم کورٹ کے اس مختصر حکم کے بعد مزید کارروائی نہ کرنے کا فیصلہ کیا جس میں اس کے بعد کی تمام کارروائی، اقدامات، آرڈرز معلومات، 19 جون 2020 کو جاری ہونے والی ہدایات، فیصلے اور اس کی تفصیلی وجوہات کالعدم قرار دے دی گئی تھی۔

اس آرڈر میں یہ بھی واضح کردیا گیا تھا کہ ایس جے سی سمیت کوئی بھی فورم کسی بھی رپورٹ پر غور و فکر نہیں کرے گا۔

تازہ ترین حکم کے نتیجے میں 19 جون کے مختصر آرڈر میں 4 سے 11 کے پیراگراف اور اس کے بعد 23 اکتوبر 2020 کے تفصیلی فیصلے کو واپس لیا گیا۔

3 نئی تقرریوں کے بعد وفاقی کابینہ میں ارکان کی تعداد 50 ہوگئی۔

تحریک انصاب کے رہنما فرخ حبیب وزیر مملکت اطلاعات و نشریات مقرر کردیئے گئے ہیں اور کابینہ ڈویژن نے فرخ حبیب کی بطور وزیر مملکت تعیناتی کا نوٹیفکیشن جاری کردیا ہے، فرخ حبیب کو اطلاعات و نشریات کا قلمدان سونپا گیا ہے۔

دوسری جانب عثمان ڈار کو بھی دوبارہ وزیراعظم کا معاون خصوصی برائے یوتھ افیئرز مقرر کردیا گیا ہے، جب کہ ڈاکٹر وقار مسعود وزیر اعظم کے معاون خصوصی خزانہ و ریونیو مقرر کئے گئے ہیں، وقار مسعود اس سے قبل وزیر اعظم کے معاون خصوصی ریونیو تھے۔

کابینہ ڈویژن نے عثمان ڈار اور وقار مسعود کے بطور معاون خصوصی تقرری کے نوٹیفکیشن جاری کردیے ہیں، جس کے بعد وفاقی کابینہ ارکان کی تعداد 50 ہو گئی ہے۔ وفاقی کابینہ میں 27 وزراء، 4 وزرائے مملکت، 15 معاونین خصوصی اور 4 مشیران شامل ہیں۔