Category پاکستان

پاکستان نے بابر اعظم کی ریکارڈ ساز سنچری کی بدولت جنوبی افریقہ کو تیسرے ٹی20 میچ میں یکطرفہ مقابلے کے بعد 9 وکٹوں سے شکست دے دی۔

سنچورین میں کھیلے گئے سیریز کے تیسرے ٹی20 میچ میں پاکستان نے ٹاس جیت کر پہلے باؤلنگ کا فیصلہ کیا۔

جنوبی افریقہ نے اننگز کا آغاز کیا تو اوپنرز نے ٹیم کو 108 رنز کا عمدہ آغاز فراہم کیا اور اپنی اپنی نصف سنچریاں بھی مکمل کیں۔

اس شراکت کا خاتمہ اس وقت ہوا جب ایڈن مرکرم 31 گیندوں پر 4 چھکوں اوت چھ چوکوں سے مزین 63 رنز کی اننگز کھیلنے کے بعد محمد نواز کی وکٹ بنے۔

جیارج لنڈے نے بھی 11 گیندوں رپ 22 رنز کی جارحانہ اننگز کھیلی لیکن اس سے قبل کہ وہ مزید خطرناک ثابت ہوتے، فہیم اشرف نے ان کی وکٹیں بکھیر دیں جبکہ جینمن ملان بھی 55 رنز بنانے کے بعد نواز کی دوسری وکٹ بن گئے۔

کپتان ہنری کلاسن اور ایندائل فلکوایو کچھ خاطر خواہ کارکدگی نہ دکھا سکے اور بالترتیب 15 اور 11 رنز بنانے کے بعد پویلین لوٹے۔

اختتامی اوورز میں راسی وین ڈر ڈوسن نے جارحانہ بیٹنگ کرتے ہوئے 20 گیندوں پر 34 رنز کی اننگز کھیلی جس کی بدولت جنوبی افریقہ کی ٹیم مقررہ اوور میں 5 وکٹوں کے نقصان پر 203 رنز بنانے میں کامیاب رہی۔

پاکستان کی جانب سے محمد نواز 2 وکٹوں کے ساتھ سب سے کامیاب باؤلر رہے جبکہ فہیم اشرف، حسن علی اور شاہین شاہ آفریدی نے ایک، ایک وکٹ حاصل کی۔

پاکستان نے ہدف کا تعاقب شروع کیا تو ابتدائی دو اوورز میں دونوں بلے باز زیادہ کھل کر بیٹنگ نہ کر سکے اور ایسا لگا کہ شاید پاکستانی ٹیم ایک بڑے ہدف کے بوجھ تلے دب کر مجموعے کے حصول میں ناکام رہے۔

لیکن پھر بابر اعظم اور محمد رضوان دونوں نے جارحانہ بیٹنگ کا سلسلہ شروع اور جنوبی افریقی باؤلرز کے چھکے چھڑا دیے۔

دونوں کھلاڑیوں بالخصوص بابر کا انداز انتائی جارحانہ تھا جو گزشتہ میچ میں سست رفتار نصف سنچری کی کسر پوری کرنے کے موڈ میں نظر آئے۔

گزشتہ میچ میں 50 گیندوں پر 50 رنز بنانے والے قومی ٹیم کے کپتان نے اس میچ میں صرف 27 گیندوں پر اپنی نصف سنچری مکمل کی۔

دوسرے اینڈ سے رضوان نے بھی ان کا بھرپور ساتھ دیا اور 32 گیندوں پر نصف سنچری مکمل کی۔

جنوبی افریقہ کو اس موقع پر وکٹ لینے کا موقع ملا جب 13ویں اوور کی پہلی گیند پر رضوان نے پوائنٹ پر شاٹ کھیلا لیکن وہاں موجود بلجون کیچ نہ تھام سکے۔

بابر نے عمدہ بیٹنگ کا سلسلہ جاری رکھا اور 27 گیندوں پر نصف بنانے والے بلے باز نئے اپنی دوسری نصف سنچری صرف 22 گیندوں پر بناتے ہوئے ٹی20 انٹرنیشنل میں پہلی سنچری مکمل کر لی۔

ببار نے صرف 49 گیندوں پر اپنی نصف سنچری مکمل کی اور ہدف کے تعاقب سے محض چند قدم کی دوری پر 122 رنز کی شاندار انگز کھیلنے کے بعد پویلین لوٹے، 59 رنز کی اس اننگز میں 4 چھکے اور 15 چوکے شامل تھے۔

پاکستان نے 18 اوورز میں 204 کا ہدف حاصل کر لیا اور سیریز میں 1-2 کی برتری بھی حاصل کر لی۔

محمد رضوان نے 47 گیندوں پر 73 رنز کی اننگز کھیلی اور ناقابل شکست رہے۔

بابر اعظم کو عمدہ بیٹنگ پر میچ کا بہترین کھلاڑی قرار دیا گیا،

یاد رہے کہ سنچورین میں کھیلے جا رہے سیریز کے تیسرے ٹی20 میں پاکستان کے کپتان بابر اعظم نے ٹاس جیت کر پہلے جنوبی افریقہ کو بیٹنگ کی دعوت دی۔

پاکستان نے میچ کے لیے ٹیم میں تین تبدیلیاں کرتے ہوئے محمد حسنین، شرجیل خان اور عثمان قادر کو آرام کا موقع فراہم کیا ہے۔

ان تینوں کھلاڑیوں کی جگہ فخر زمان، حارث رؤف اور آصف علی کو فائنل الیون کا حصہ بنایا گیا ہے۔

حیران کن امر یہ ہے کہ گزشتہ میچ میں باؤلنگ کی ناکامی کے باوجود اس میچ میں لیگ اسپنر عثمان قادر کی جگہ ایک باؤلر کم کر کے آصف علی کو ٹیم میں شامل کیا گیا ہے۔

میچ کیلئے دونوں ٹیمیں ان کھلاڑیوں پر مشتمل ہیں۔

پاکستان: بابر اعظم(کپتان)، فخر زمان، حیدر علی، محمد رضوان، محمد حفیظ، آصف علی، محمد نواز، فہیم اشرف، حسن علی، شاہین شاہ آفریدی اور حارث رؤف۔

جنوبی افریقہ: ہنری کلاسن(کپتان)، جینمن ملان، ایڈن مرکرم، راسی وین ڈر ڈوسن، پیٹ وین بلجون، جیارج لنڈے، ایندائل فلکوایو، سیسانڈا مگالا، بیورن ہینڈرکس، لیزاڈ ولیمز اور تبریز شمسی۔

تحریک لبیک پاکستان (ٹی ایل پی) کے سربراہ علامہ سعد حسین رضوی کی گرفتاری کے خلاف ملک کے مختلف شہروں میں شروع ہونے والا احتجاج تیسرے روز بھی جاری ہے جہاں مظاہرین نے ملک کی اہم شاہراہوں پر دھرنا دے رکھا ہے جس کی وجہ سے ملک میں آمد و رفت اور ٹریفک کی روانی متاثر ہوئی ہے۔

مختلف مقامات پر مظاہرین کی پولیس کے ساتھ جھڑپوں کے نتیجے میں اہلکاروں سمیت سینکڑوں افراد زخمی اور متعدد جاں بحق ہوچکے ہیں۔

لاہور میں چونگی امر سدھو ، بھٹہ چوک ، نیا شادباغ چوک، دروغا والا، یتیم خانہ چوک، کرول گھاٹی رنگ روڈ، اسکیم موڑ، سمن آباد موڑ، بابو صابو چوک اور ڈیوس روڈ سے مال روڈ جانے والی روڈ بند ہے۔

ٹی ایل پی کے مشتعل مظاہرین کے ایک گروہ، جو بظاہر ایک پولیس اہلکار کا پیچھا کر رہے تھے، نے لاہور جنرل ہسپتال کی ایمرجنسی پر دھاوا بول دیا۔

ہسپتال ذرائع کے مطابق لاٹھیاں اور ڈنڈے لے کر مظاہرین نے ایمرجنسی کے دروازے کو توڑنے کی کوشش کی۔

لاہور پولیس کے ایک سینئر اہلکار نے نام ظاہر نہ کرنے کی شرط پر ڈان سے گفتگو کرتے ہوئے کہا کہ اب تک ٹی ایل پی کے 100 ورکرز کو گرفتار کیا جا چکا ہے۔

جہلم میں پولیس نے مشترکہ آپریشن کے بعد جی ٹی دینا روڈ کو کلیئر کردیا اور ٹی ایل پی ورکرز کو گرفتار کرلیا۔

پولیس ترجمان نے بتایا کہ آنے جانے والی دونوں سڑک کو ٹریفک کے لیے کھول دیا گیا ہے اور حکام نے قانون کو اپنے ہاتھ میں لینے والوں کو گرفتار بھی کیا ہے۔

کھاریاں میں پولیس نے ٹی ایل پی ورکرز کے خلاف سڑکیں بند کرنے اور ریاستی امور میں مداخلت کرنے کے پر دو الگ الگ مقدمات درج کیے۔

چونیاں میں پولیس عہدیداروں اور ٹی ایل پی ورکرز کے درمیان تصادم کے نتیجے میں ایک ڈی ایس پی اور ایک ایس ایچ او زخمی ہوگیا۔

ٹی ایل پی کے متعدد زخمی ورکرز کو بھی ہسپتال منتقل کردیا گیا ہے۔

رپورٹ کے مطابق ساہیوال میں نیشنل ہائی کو خالی کرانے کے لیے پولیس کے آپریشن میں 50 سے زائد پولیس اہلکار زخمی ہوئے۔

ڈی ایس پی سلیم راتھ کا کہنا تھا کہ 300 پولیس اہلکاروں نے آپریشن میں حصہ لیا۔

ریسکیو 1122 ذرائع کے مطابق 16 پولیس اہلکاروں کو ڈی ایچ کیو ٹیچنگ ہسپتال منتقل کیا گیا جبکہ باقی دیگر کو جائے وقوع پر ہی ابتدائی طبی امداد فراہم کی گئی۔

اوکاڑہ: پاک پتن اور ساہیوال ضلع سے ٹی ایل پی کے تقریباً 120 مقامی کارکنوں کو گرفتار کیا گیا۔

ایڈیشنل ڈی آئی جی ساہیوال نے ڈان سے گفتگو کرتے ہوئے بتایا کہ پولس نے اب تک گرفتار ٹی ایل پی کارکنوں کے خلاف کوئی مقدمہ درج نہیں کیا ہے۔

گجرات: گزشتہ روز ہونے والے احتجاج کے دوران پتھراؤ اور تشدد سے ڈی پی او عمر سلامت اور ڈی ایس پی خاریاں افتخار تارڑ کے ہمراہ 22 پولیس اہلکار زخمی ہوئے۔

علاقے سے 130 ٹی ایل پی اہلکاروں کو پاکستان پینل کوڈ اور انسداد دہشت گردی ایکٹ کے تحت گرفتار کیا گیا۔

رحیم یار خان: نیشنل ہائی وے پر چوک بہادرپور کے مقام پر ٹی ایل پی کے کیمپ میں بھگدڑ سے ایک راہگیر ہلاک اور 5 زخمی ہوگئے۔

پولیس کے موقع پر پہنچتے ہی ٹی ایل پی ورکرز مشتعل ہوگئے اور انہوں نے پولیس پر پتھراؤ کیا۔

فیصل آباد: مظاہرے کے دوران ایک شخص کے جاں بحق اور پولیس اہلکاروں سمیت 9 کے زخمی ہونے پر پولیس 200 ٹی ایل پی ورکرز کے خلاف مقدمہ درج کرلیا۔

ٹی ایل پی کے درجنوں ورکرز لاٹھیوں کے ساتھ شہر کے مختلف علاقوں کا چکر لگاتے رہے اور بازار بند کرائے۔

گوجرانوالہ: چندا دا قلعہ بائی پاس کے مقام پر ٹی ایل پی کارکنوں نے چار پولیس اہلکار اور ایک ریسکیو اہلکار کو شدید زخمی کردیا۔

ذرائع کے مطابق ٹی ایل پی کارکنوں کے خلاف مقدمہ درج کرلیا گیا ہے اور ان میں سے چند کو گرفتار بھی کرلیا گیا ہے۔

ڈیرہ غازی خان: غازی گھاٹ پل پر ٹی ایل پی کے دھرنے کے خلاف پولیس آپریشن کے دوران درجنوں پولیس اہلکار اور مظاہرین زخمی ہوگئے۔

پولیس نے 80 مظاہرین کے خلاف مقدمہ درج کرلیا۔

مزید 4 افراد جاں بحق
ایک روز قبل چار افراد ہلاک سینکڑوں مظاہرین اور پولیس اہلکار زخمی ہوئے تھے اور ٹی ایل پی کے ہزاروں ورکرز کو گرفتار کرکے قانون نافذ کرنے والے اہلکاروں پر حملہ کرنے اور مرکزی شاہراہوں اور سڑکوں کو بند کرنے کا مقدمہ درج کیا گیا۔

منگل کو وفاقی کابینہ نے امن و امان برقرار رکھنے کے لیے رمضان کے مقدس مہینے کے دوران ملک کے تمام بڑے شہروں میں پاکستان رینجرز کی تعیناتی کا فیصلہ کیا تھا اور اس عزم کا اظہار کیا تھا کہ موجودہ حکومت ٹی ایل پی کے کسی بھی قسم کے دباؤ میں نہیں آئے گی۔

کابینہ کے بعد اجلاس کے بعد پریس کانفرنس کرتے ہوئے وزیر برائے سائنس و ٹیکنالوجی فواد چوہدری نے کہا تھا کہ ‘ہر تنظیم کا احتجاج کا حق ہے اور ہم ٹی ایل پی سے بات چیت کرنے کے لیے تیار ہیں’۔

ایک سوال کے جواب میں وزیر نے کہا کہ حکومت ٹی ایل پی کے ساتھ بیٹھنے کے لیے تیار ہے تاہم وہ کسی بھی تنظیم سے کوئی ڈکٹیشن نہیں لے گی۔

انہوں نے کہا کہ حکومت کسی بھی گروپ کو قانون کو اپنے ہاتھ میں لینے کی اجازت نہیں دے گی۔

سڑکوں کی بندش
نیشنل ہائی ویز موٹر وے پولیس نے شہریوں کو تلقین کی کہ وہ غیر ضروری سفر سے گریز کریں اور سفر سے قبل راستوں کے حوالے سے معلومات ضرور حاصل کرلیں۔

سماجی روابط کی ویب سائٹ ٹوئٹر پر انہوں نے ہائی ویز کی بندش کے حوالے سے معلومات شیئر کرتے ہوئے بتایا کہ ای ایم ای کالونی، چونگ، ماراکا، موہلنوال، موہلنوال بائی پاس اور خانیوال ٹول پلازہ کے مقام پر ہائی ویز احتجاج کی وجہ سے بند ہیں۔

اسلام آباد کے ڈپٹی کمشنر حمزہ شفقت نے ٹوئٹر پر بیان جاری کرتے ہوئے کہا کہ وفاقی دارالحکومت کی تمام سڑکیں بشمول خارجی راستوں اور داخلی راستوں پر ٹریفک کھول دیا گیا ہے۔

بہارہ کہو اور فیض آباد میں پولیس کی بھاری نفری بھی تعینات کردی گئی تھی جبکہ فرانسیسی سفارتخانے جانے والی تمام سڑکیں بند کردی گئیں۔

لاہور کی مرکزی شاہراہیں اور راستے بدستور بند ہیں جبکہ کراچی اور اسلام آباد میں بھی ٹریفک معمول سے کم ہے۔

سٹی ٹریفک پولیس لاہور کے مطابق شہر کے مضافاتی علاقے آریان پنڈ رائیونڈ روڈ کو صبح سویرے مظاہرین نے بند کردیا تھا تاہم مظاہرین کو منتشر کرنے کے بعد اس سڑک کو کھول دیا گیا ہے اور اب وہاں ٹریفک معمول کے مطابق ہے۔

دوسری جانب کراچی میں ٹریفک کی صورتحال گزشتہ روز کے مقابلے میں کافی بہتر نظر آرہی ہے۔

کراچی ٹریفک پولیس کا کہنا ہے کہ حب ریور روڈ اور ناردرن بائی پاس پر احتجاجی مظاہرہ ختم ہوگیا ہے اور اسے ٹریفک کے لیے کھول دیا گیا ہے۔

انہوں نے بتایا کہ ڈرگ روڈ اور اسٹار گیٹ پر بھی جاری دھرنا ختم ہوگیا ہے جس کے باعث سڑکیں کھول دی گئی ہیں اور ٹریفک کی روانی معمول کے مطابق جاری ہے۔

ننکانہ صاحب میں لاہور-جڑانوالہ روڈ پر ٹریفک بحال کردی گئی۔

اطلاعات کے مطابق ٹی ایل پی کے حامیوں نے ملتان روڈ اور ملانوالہ بائی پاس کو بلاک کردیا ہے جس کے نتیجے میں میلوں تک گاڑیوں کی قطاریں لگ گئیں۔

احتجاج کیوں؟
ٹی ایل پی نے فرانس میں شائع ہونے والے گستاخانہ خاکوں پر رواں سال فروری میں فرانس کے سفیر کو ملک بدر کرنے اور فرانسیسی اشیا کی درآمد پر پابندی عائد کرنے کے مطالبے کے ساتھ احتجاج کیا تھا۔

حکومت نے 16 نومبر کو ٹی ایل پی کے ساتھ ایک سمجھوتہ کیا تھا کہ اس معاملے کا فیصلہ کرنے کے لیے پارلیمان کو شامل کیا جائے گا اور جب 16 فروری کی ڈیڈ لائن آئی تو حکومت نے سمجھوتے پر عملدرآمد کے لیے مزید وقت مانگا۔

جس پر ٹی ایل پی نے مزید ڈھائی ماہ یعنی 20 اپریل تک اپنے احتجاج کو مؤخر کرنے پر رضامندی کا اظہار کیا تھا۔

اس حوالے سے گزشتہ ہفتے کے اختتام پر اتوار کے روز سعد رضوی نے ایک ویڈیو پیغام میں ٹی ایل پی کارکنان کو کہا تھا کہ اگر حکومت ڈیڈ لائن تک مطالبات پورے کرنے میں ناکام رہتی ہے تو احتجاج کے لیے تیار رہیں، جس کے باعث حکومت نے انہیں گزشتہ روز گرفتار کرلیا تھا۔

واضح رہے کہ سعد رضوی ٹی ایل پی کے مرحوم قائد خادم حسین رضوی کے بیٹے ہیں۔

ٹی ایل پی سربراہ کی گرفتاری کے بعد ملک کے مختلف حصوں میں احتجاجی مظاہرے اور دھرنے شروع ہوگئے جنہوں نے بعض مقامات پر پر تشدد صورتحال اختیار کرلی جس کے بعد ٹی ایل پی نے فیصل آباد اور کراچی میں ایک ایک کارکن کی ہلاکت کا دعویٰ کیا۔

سربراہ پاک فوج جنرل قمر جاوید باجوہ کا کہنا ہے کہ پاکستان افغان امن عمل کو ہمیشہ سپورٹ کرتا رہے گا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ اور امریکی وزیرخارجہ انٹونی جی بلنکن کا ٹیلی فون پر رابطہ ہوا، جس میں باہمی دلچسپی کے امور اور علاقائی سلامتی کی صورتحال پر بات چیت اور افغان امن عمل میں پیش رفت اورمختلف شعبوں میں دوطرفہ تعاون پر بھی تبادلہ خیال کیا گیا۔

آئی ایس پی آر کے مطابق سربراہ پاک فوج جنرل قمر جاوید باجوہ نے کہا کہ پاکستان افغانوں کی قیادت میں افغان امن عمل کو ہمیشہ تعاون کرتا رہے گا۔ جب کہ امریکی وزیر خارجہ نے خطے کے امن و استحکام کے لئے پاکستان کی مسلسل کوششوں کی تعریف کرتے ہوئے پاک امریکا باہمی تعلقات مزید بڑھانے کی ضرورت پرزور دیا۔
چاپانی سفیر کا دورہ جی ایچ کیو

آئی ایس پی آر کے مطابق پاکستان میں تعینات جاپانی سفیر نے جی ایچ کیو راولپنڈی کا دورہ کیا اور آرمی چیف جنرل قمر جاوید سے ملاقات کی، ملاقات میں باہمی دلچسپی علاقائی سکیورٹی اور باہمی تعاون پر تبادلہ خیال کیا گیا۔

اس موقع پر آرمی چیف کا کہنا تھا کہ پاکستان جاپان کے ساتھ تعلقات کوخصوصی اہمیت دیتا ہے، علاقائی استحکام کے لیے جاپان کی کوششیں لائق تحسین ہے۔ چاپانی سفیر کا کہنا تھا کہ خطے میں امن و استحکام کے لیے پاکستان کا کردار قابل قدر ہے، افغان مفاہمتی عمل کے لیے پاکستان کی کوششیں لائق تحسین ہیں۔

نیشنل کمانڈ اینڈ آپریشن سینٹر (این سی او سی) نے کورونا کے پھیلاؤ کو روکنے کے لیے رمضان المبارک کے دوران سحری سے شام 6 بجے تک کاروبار کھولنے کی اجازت دینے کا فیصلہ کیا ہے۔

وفاقی وزیر اور سربراہ نیشنل کمانڈ اینڈ آپریشن سینٹر اسد عمر کی زیر صدرات این سی او سی کا خصوصی اجلاس ہوا جس میں ملک بھر میں آج سے کورونا ایس او پیز پر عمل درآمد کروانے کا فیصلہ کیا گیا۔

این سی او سی اعلامیے کے مطابق اجلاس میں فیصلہ کیا گیا کہ کورونا کے خطرے کو مدنظر رکھ کر سخت ایس او پیز کے ساتھ وسیع لاک ڈاؤن لگایا جائے گا، مارکیٹیں صبح سحری سے شام 6 بجے تک کھلی رہیں گی جبکہ ملک بھر میں ہفتہ، اتوار کو کاروبار بند رہے گا۔

اعلامیے میں کہا گیا ہے کہ افطار سے رات 12 بجے تک ہوٹلوں کے باہر کھانے کی اجازت ہو گی، بین الصوبائی ٹرانسپورٹ ہفتے میں دو دن بند رہےگی جبکہ سینما گھر اور مزارات مکمل طور پر بند رہیں گے۔

اجلاس میں فیصلہ کیا گیا کہ اندرون شہر ٹرانسپورٹ 50 فیصد مسافروں کے ساتھ چلے گی جبکہ ریلوے کو 70 فیصد مسافروں کے ساتھ چلایا جائےگا، رمضان میں رش سے بچنے کے لیے اضافی ٹرینیں چلائی جائیں گی۔

این سی او سی کے مطابق کھیلوں اور ثقافتی میلوں سمیت دیگر تقریبات پر مکمل پابندی ہو گی اور ایس او پیز پر این سی او سی کا جائزہ اجلاس 10 رمضان المبارک کو ہو گا۔

اسلام آباد: سپریم کورٹ کے فاضل جج جسٹس قاضی امین نے مقدمے کی سماعت کے دوران ریمارکس دیئے کہ رمضان میں شیطان بند ہوتا ہے اور ملزمان کو ضمانت مل رہی ہے۔

سپریم کورٹ میں محکمہ بلدیات سندھ کے 200 سے زائد ملازمین کی عبوری ضمانتوں کی درخواست پر سماعت ہوئی۔ سپریم کورٹ نے عبوری ضمانتیں منظور کرتے ہوئے تمام ملزمان کو سندھ ہائی کورٹ سے رجوع کرنے کی ہدایت کردی۔ عدالت عظمیٰ نے قرار دیا کہ سندھ ہائی کورٹ میرٹ پر تمام کیسز کا جائزہ لے کر فیصلہ دے۔

دوران سماعت جسٹس قاضی امین نے ریمارکس دیئے کہ پاکستان واحد ملک ہے جہاں ضمانت قبل ازگرفتاری 2،2 سال برقرار رہتی ہے، یہ دنیا کا واحد ملک ہے جہاں فوجداری نظام انصاف کا یہ حال ہے، سندھ ہائی کورٹ نے ملزمان کو کہا کہ پیسے جمع کراؤ اور گھر جاوَ۔
جسٹس قاضی امین نے ریمارکس دیئے کہ رمضان میں شیطان بند ہوتا ہے اور ملزمان کو ضمانت مل رہی ہے، ملزمان کے ساتھ یکساں سلوک ہونا چاہیے، قومی مفاد میں نیب کے اقدامات پر بات ہوسکتی ہے۔

پاکستان میں کورونا وائرس کی صورتحال مسلسل بگڑ رہی ہے، ساتھ ہی رمضان المبارک کا بھی آغاز ہوچکا ہے جس کے پیشِ نظر نیشنل کمانڈ اینڈ آپریشن سینٹر (این سی او سی) نے مزید پابندیاں عائد کردی ہیں۔

کووِڈ-19 کے اعداد و شمار کے لیے بنائی گئی سرکاری ویب سائٹ کے مطابق گزشتہ 24 گھنٹوں میں پاکستان میں مزید 4 ہزار 681 افراد وائرس سے متاثر ہوئے جبکہ 135 مریض انتقال کر گئے جو جون کے بعد ایک روز میں رپورٹ ہونے والی اموات کی سب سے بڑی تعداد ہے۔

وبا کی تشخیص کے لیے 13 اپریل کو مجموعی طور پر 48 ہزار 92 ٹیسٹس کیے گئے جس کے نتیجے میں کورونا کیسز مثبت آنے کی شرح 9.7 فیصد رہی جبکہ فعال کیسز 76 ہزار 757 تک پہنچ چکے ہیں۔

ملک میں مجموعی طور پر اب تک کورونا وائرس سے 7 لاکھ 34 ہزار 423 افراد متاثر ہو چکے ہیں جن میں سے 15 ہزار 754 زندگی کی بازی ہار گئے۔

علاوہ ازیں گزشتہ 24 گھنٹے کے دوران مزید 3 ہزار 645 مریض صحتیاب ہوئے اور مجموعی طور پر اب تک 6 لاکھ 41 ہزار 912 مریض صحتیاب ہوچکے ہیں۔

واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد سے وبا کے پھیلاؤ میں اتار چڑھاؤ جاری ہے اور اب تک بیماری کی 2 لہریں دیکھی جاچکی ہیں جبکہ تیسری لہر کا پھیلاؤ بدستور جاری ہے۔

کیسز میں حالیہ اضافے کے پیشِ نظر کئی علاقوں میں دوبارہ لاک ڈاؤن اور اسمارٹ لاک ڈاؤن لگایا گیا ہے جبکہ کاروباری سرگرمیوں کے اوقات کار بھی محدود کردیے گئے ہیں اس کے علاوہ متاثرہ علاقوں میں تعلیمی ادارے بھی بند ہیں۔

پاکستان میں 13 اپریل کو چاروں صوبوں اور وفاقی اکائیوں میں کورونا وائرس کیسز اور اموات کی صورتحال درج ذیل ہے:

پنجاب
وبا کی تیسری لہر نے صوبہ پنجاب کو بری طرح اپنی لپیٹ میں لے رکھا ہے اور گزشتہ 24 گھنٹوں کے دوران صوبے میں مزید 2 ہزار 775 افراد اس وائرس کا شکار بنے۔

پنجاب میں اب تک 2 لاکھ 55 ہزار 571 کورونا کیسز رپورٹ ہو چکے ہیں اور وبا کے باعث مزید 79 مریضوں کے انتقال سے مرنے والوں کی تعداد 7 ہزار 141 تک پہنچ گئی ہے۔

خیبر پختونخوا
حالیہ لہر کے دوران پنجاب کے بعد صوبہ خیبرپختونخوا زیادہ متاثر ہوا ہے اور یہاں گزشتہ روز مزید ایک ہزار 770 نئے کیسز سامنے آئے جبکہ 49 مریض دم توڑ گئے۔

خیبر پختونخوا میں اب تک رپورٹ ہونے والے کیسز کی مجموعی تعداد ایک لاکھ ایک ہزار 45 ہے جبکہ 2 ہزار 732 مریض انتقال کر چکے ہیں۔

اسلام آباد
اسلام آباد میں گزشتہ 24 گھنٹوں کے دوران مزید 508 نئے کیسز رپورٹ ہوئے جبکہ مزید 2 مریض اس وبا کے باعث زندگی کی بازی ہار گئے۔

وفاقی دارالحکومت میں اب تک مجموعی طور پر 67 ہزار 491 افراد وائرس کا شکار ہوچکے ہیں جن میں سے انتقال کر جانے والوں کی تعداد 619 ہے۔

سندھ
ملک کے دوسرے بڑے صوبے سندھ میں وبائی صورتحال نسبتاً بہتر تھی تاہم اب اس میں معمولی اضافہ نظر آرہا ہے اور یہاں گزشتہ 24 گھنٹوں میں 366 کیسز رپورٹ ہوئے جس کے بعد مجموعی کیسز کی تعداد 2 لاکھ 69 ہزار 840 ہو گئی ہے۔

صوبے میں کورونا وائرس سے مزید کسی مریض کا انتقال نہیں ہوا، مجموعی طور پر یہاں اب تک 4 ہزار 530 افراد لقمہ اجل بن چکے ہیں۔

آزاد کشمیر
آزاد کشمیر میں گزشتہ 24 گھنٹوں کے دوران مزید 150 افراد میں وائرس کی تصدیق ہوئی جبکہ 3 مریض دم توڑ گئے۔

آزاد کشمیر میں مجموعی طور پر 14 ہزار 837 افراد وائرس سے متاثر ہوئے جس میں سے 410 انتقال کر گئے۔

بلوچستان
بلوچستان میں کورونا وائرس نے مزید 102 افراد کو متاثر کیا اور 2 مریض انتقال کر گئے۔

یوں صوبے میں اب تک رپورٹ ہونے والے کیسز کی مجموعی تعداد 20 ہزار 499 اور اموات کی تعداد 219 تک پہنچ گئی ہے۔

گلگت بلتستان
گلگت بلتستان میں ملک کے دیگر حصوں کی مناسبت سے بیماری کا پھیلاؤ کافی حد تک کنٹرول میں ہے اور گزشتہ روز 10 کیسز سامنے آئے، یہاں اب تک رپورٹ ہونے والے کیسز کی تعداد 5 ہزار 140 ہے۔

گلگت بلتستان میں 9 مارچ کے بعد مزید کسی مریض کا انتقال نہیں ہوا اور اموات کی تعداد 103 پر برقرار ہے۔

ملک میں کورونا کے باعث ایک اور ہلاکت خیز دن رہا جس میں 118 افراد وائرس سے انتقال کرگئے۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 50520 ٹیسٹ کیے گئے جن میں سے 4318 افراد میں کورونا وائرس کی تصدیق ہوئی جب کہ وائرس سے 118 ہلاکتیں ہوئیں۔

سرکاری پورٹل کے مطابق ملک میں گزشتہ 24 گھنٹوں کے دوران کورونا کے مثبت کیسز کی شرح 8.5 فیصد رہی۔

سرکاری پورٹل کے مطابق ملک میں کورونا سے ہلاکتوں کی تعداد 15619 ہوگئی اور مجموعی کیسز 7 لاکھ 29920 تک جاپہنچے ہیں جب کہ فعال کیسز کی تعداد 76034 ہے۔

اس کے علاوہ 24 گھنٹوں کے دوران ملک بھر میں 3432 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 638267 ہوگئی ہے۔

سرکاری پورٹل کے مطابق سندھ میں کورونا کے مریضوں کی مجموعی تعداد 269474 ہوگئی ہے جب کہ 4530 افراد اب تک انتقال کرچکے ہیں۔

پنجاب میں کورونا کے کل مریضوں کی تعداد 252974 ہے اور 7062 افراد وائرس میں مبتلا ہوکر جان سے جاچکے ہیں جب کہ بلوچستان میں مریضوں کی کل تعداد 20397 اور ہلاکتیں 217 ہوچکی ہیں۔

خیبرپختونخوا میں کورونا کے مریضوں کی تعداد 100275 اور 2683 ہلاکتیں ہوچکی ہیں جب کہ آزاد کشمیر میں 14687 افراد وائرس میں مبتلا ہوچکے ہیں اور 407 افراد انتقال کرگئے۔

اس کے علاوہ گلگت بلتستان میں اب تک کورونا کے مریضوں کی تعداد 5130 اور 103 افراد انتقال کرچکے ہیں۔

پورٹل کے مطابق وفاقی دارالحکومت اسلام آباد میں کورونا کے مریضوں کی مجموعی تعداد 66983 ہے اور اب تک 617 مریض انتقال کرچکے ہیں۔

سپریم کورٹ نے صدارتی ریفرنس سے متعلق فیصلے کے خلاف جسٹس قاضی فائز عیسیٰ کی نظر ثانی اپیل کی سماعت براہ راست نشر کرنے کی درخواست مسترد کردی۔

خیال رہے سپریم کورٹ نے 18 مارچ کو اس درخواست پر فیصلہ محفوظ کیا تھا جسے آج سناتے ہوئے عدالت عظمیٰ کے 10 رکنی بینچ نے 4 کے مقابلے 6 ججز کے اکثریتی فیصلے کی بنیاد پر درخواست مسترد کی۔

جسٹس عمر عطا بندیال کی سربراہی میں اس 10 رکنی بینچ کے دیگر اراکین میں جسٹس مقبول باقر، جسٹس منظور احمد ملک، جسٹس مظہر عالم میاں خیل، جسٹس سجاد علی شاہ، جسٹس سید منصور علی شاہ، جسٹس منیب اختر، جسٹس یحییٰ آفریدی، جسٹس قاضی محمد امین احمد اور جسٹس امین الدین خان شامل ہیں۔

مختصر فیصلہ جسٹس عمر عطا بندیال نے پڑھ کر سنایا جس میں سپریم کورٹ نے کہا کہ معلومات تک رسائی عوام کا بنیادی حق ہے لیکن معلومات تک کس انداز میں رسائی دی جاسکتی ہے یہ انتظامی معاملہ ہے۔

اختلافی نوٹ میں جسٹس مقبول باقر، جسٹس منظور احمد ملک، جسٹس مظہر عالم خان میاں خیل اور جسٹس سید منصور علی نے کہا کہ آئین کی دفعہ 19-اے ریاستی اداروں پر شہریوں کے بنیادی حقوق کے حصول کو یقینی بنانے اور عوامی اہمیت کے معاملات میں معلومات تک رسائی کے لیے ضروری اقدامات کرنے کی ذمہ داری عائد کرتی ہے۔

نوٹ میں لکھا گیا کہ آئین کی دفعہ 184 (3) کے تحت کیسز بشمول نظرِ ثانی درخواستیں اور دیگر معاملات عوامی اہمیت کے حامل ہیں اور عوام کو عدالت میں سنے جانے والے ان کیسز کی کارروائی دیکھنے اور جاننے کا حق ہے۔

ساتھ ہی اختلافی نوٹ میں براہ راست نشریات کی استدعا منظور کرتے ہوئے کہا گیا کہ یہ عوامی مفاد کا کیس ہے، سپریم کورٹ ویب سائٹ پر براہ راست دکھایا جائے اور عدالتی کارروائی کی آڈیو ریکارڈنگ ویب سائٹ پر ڈالی جائے۔

سپریم کورٹ میں سماعت کے دوران جسٹس قاضی فائز عیسیٰ نے کہا کہ فیصلہ تحریر کرنے اور اس سے اختلاف کرنے والے ججز کے نام جاننا چاہتا ہوں۔

جس پر بینچ کے سربراہ عمر عطا بندیال نے کہا کہ فیصلہ پڑھیں گے تو آپ کو ناموں کا اندازہ ہوجائے گا۔

جسٹس عمر عطا بندیال نے درخواست گزار جج کو کہا کہ نظر ثانی درخواستوں پر دلائل دیں جس پر جسٹس قاضی فائز عیسیٰ نے جواب دیا کہ میں ذہنی طور پر دلائل کے لیے تیار نہیں ہوں۔

جسٹس قاضی امین نے استفسار کیا کہ کیا آپ تفصیلی فیصلے کے بعد نظر ثانی درخواست پر دلائل دیں گے؟ جس پر درخواست گزار جج نے کہا کہ میرا انحصار عدالت پر ہے، اگر کہیں گے تو دلائل شروع کر دوں گا۔

دورانِ سماعت جسٹس قاضی فائز عیسیٰ کی اہلیہ سرینا عیسیٰ نے کہا کہ ایک حکومتی عہدیدار خاتون نے توہین عدالت کی، فواد چوہدری نے عدالت کو اسکینڈلائیز کیا، کسی کے خلاف کوئی کارروائی نہیں ہوئی۔

سرینا عیسیٰ نے مزید کہا کہ یوسف رضا گیلانی اور دیگر سیاسی جماعتوں کے رہنماؤں کو توہین عدالت کی سزائیں سنائی گئیں لیکن رجسٹرار نے فواد چوہدری کے خلاف توہین عدالت کیس کو سماعت کے لیے مقرر نہیں کیا۔

جسٹس قاضی فائز عیسیٰ نے کہا کہ سمجھ نہیں آئی توہین عدالت کی درخواستیں سماعت کے لیے کیوں مقرر نہیں ہوئیں یہ عدالت کی عزت و تکریم کا معاملہ ہے۔

اس پر جسٹس عمر عطا بندیال نے کہا کہ آپ ذہنی طور پر دلائل کے لیے تیار ہو جائیں، توہین عدالت کی درخواستیں بھی سماعت کے لیے مقرر ہو جائیں گی۔

بعدازاں جسٹس عمر عطا بندیال کی سربراہی میں 10 رکنی لارجر بینچ نے نظر ثانی اپیل کی سماعت کل تک کے لیے ملتوی کردی جس میں جسٹس قاضی فائز عیسیٰ دلائل دیں گے۔

معاملے کا پس منظر
خیال رہے کہ 19 جون 2020 کو سپریم کورٹ کے 10 رکنی بینچ نے 7 ججز کے اپنے اکثریتی مختصر حکم میں جسٹس قاضی فائز عیسیٰ کے خلاف صدارتی ریفرنس کو کالعدم قرار دیا تھا۔

عدالت عظمیٰ کے 10 رکنی بینچ میں سے انہیں 7 اراکین نے مختصر حکم نامے میں پیرا گراف 3 سے 11 کے ذریعے سپریم جوڈیشل کونسل (ایس جے سی) کے سامنے دائر ریفرنس کو کالعدم قرار دیا تھا اور فیڈرل بورڈ آف ریونیو (ایف بی آر) کو ان کے اہل خانہ سے ان کی جائیدادوں سے متعلق وضاحت طلب کرنے کا حکم دیتے ہوئے معاملے پر رپورٹ سپریم جوڈیشل کونسل میں جمع کرانے کا کہا تھا۔

عدالتی بینچ میں شامل جسٹس مقبول باقر، جسٹس سید منصور علی شاہ اور جسٹس یحییٰ آفریدی نے بھی جسٹس عیسیٰ کے خلاف صدارتی ریفرنس کو کالعدم قرار دیا تھا لیکن انہوں نے اکثریتی فیصلے کے خلاف اختلافی نوٹ لکھا تھا۔

بعد ازاں عدالت عظمیٰ کے اس مختصر فیصلے کے پیراگرافس 3 سے 11 کو دوبارہ دیکھنے کے لیے 8 نظرثانی درخواستیں دائر کی گئی تھی۔

یہ درخواستیں جسٹس قاضی فائز عیسیٰ، ان کی اہلیہ سرینا عیسیٰ کے ساتھ ساتھ سپریم کورٹ بار ایسوسی ایشن، سندھ ہائیکورٹ بار ایسوسی ایشن، کوئٹہ بار ایسوسی ایشن کے صدر، پنجاب بار کونسل کے وائس چیئرمین، ایڈووکیٹ عابد حسن منٹو اور پاکستان بار کونسل نے دائر کی تھیں۔

اپنی نظرثانی درخواستوں میں درخواست گزاروں نے اعتراض اٹھایا تھا کہ 19 جون کے مختصر فیصلے میں پیراگرافس 3 سے 11 کی ہدایات/ آبزرویشنز یا مواد غیر ضروری، ضرورت سے زیادہ، متضاد اور غیرقانونی ہے اور یہ حذف کرنے کے قابل ہے چونکہ اس سے ریکارڈ میں ’غلطی‘ اور ’ایرر‘ ہوا ہے لہٰذا اس پر نظرثانی کی جائے اور اسے حذف کیا جائے۔

بعد ازاں اس کیس کا 23 اکتوبر کو تفصیلی فیصلہ جاری کیا گیا تھا جو 174 صفحات پر مشتمل تھا، جس میں سپرم کورٹ نے قرار دیا تھا کہ آئین کے آرٹیکل 209 (5) کے تحت صدر مملکت عارف علوی غور شدہ رائے نہیں بنا پائے لہٰذا جسٹس قاضی فائز عیسیٰ کے خلاف صدارتی ریفرنس میں ’مختلف نقائص‘ موجود تھے۔

تفصیلی فیصلے کے بعد اکتوبر میں سپریم کورٹ کو 4 ترمیم شدہ درخواستیں موصول ہوئی تھی جن میں جسٹس فائز عیسیٰ کے خلاف صدارتی ریفرنس سے متعلق اکثریتی فیصلے پر سوال اٹھائے گئے تھے۔

اس معاملے پر عدالت کی جانب سے نظرثانی کے لیے پہلے ایک 6 رکنی بینچ تشکیل دیا گیا تھا تاہم درخواست گزروں نے 6 رکنی نظرثانی بینچ کی تشکیل کو چیلنج کردیا تھا اور یہ مؤقف اپنایا گیا تھا کہ جسٹس عیسیٰ کے خلاف کیس میں اکثریتی فیصلے سے اختلاف کرنے والے تینوں ججز کو نظرثانی بینچ کا حصہ نہیں بنایا گیا۔

مزید پڑھیں: جسٹس قاضی فائز عیسیٰ کون ہیں؟

5 دسمبر کو جسٹس قاضی فائز عیسی نے صدارتی ریفرنس کے خلاف آئینی درخواست پر سپریم کورٹ کے فیصلے پر نظر ثانی کی اضافی درخواست داخل کی تھی اور کہا تھا کہ سپریم کورٹ نے سپریم جوڈیشل کونسل کے تعصب سے متعلق میری درخواست پر سماعت ہی نہیں کی۔

ساتھ ہی جسٹس قاضی فائز عیسیٰ نے نظر ثانی درخواست میں استدعا کی تھی کہ سماعت ٹی وی پر براہ راست نشر کرنے کا حکم دیا جائے۔

جس کے بعد بینچ تشکیل کے معاملے پر سماعت ہوئی تھیں اور عدالت نے 10 دسمبر 2020 کو اپنا فیصلہ محفوظ کیا تھا کہ آیا یہی بینچ یا ایک لارجر بینچ جسٹس عیسیٰ کیس میں نظرثانی درخواستوں کا تعین کرے گا۔

بالآخر 22 فروری 2021 کو جاری کردہ 28 صفحات پر مشتمل فیصلے میں مذکورہ معاملہ چیف جسٹس کو بھیج دیا گیا تھا کہ وہ بینچ کی تشکیل سے متعلق فیصلہ کریں اور وہ نظرثانی درخواستوں کی سماعت کے لیے لارجر بینچ تشکیل دے سکتے ہیں۔

بعد ازاں 23 فروری 2021 کو چیف جسٹس پاکستان نے جسٹس عمر عطا بندیال کی سربراہی میں ایک 10 رکنی بینچ تشکیل دیا تھا جس میں ان تینوں ججز کو بھی شامل کرلیا گیا تھا جنہوں نے مرکزی فیصلے پر اختلافی نوٹ لکھا تھا۔

مذکورہ بینچ نے نظرِ ثانی کیس کی سماعت براہِ راست نشر کرنے کی اپیل کی بھی سماعت کی جس کے دلائل جسٹس قاضی فائز عیسیٰ نے خود دیے تھے۔

مذکورہ درخواست پر 18 مارچ کو فیصلہ محفوظ کیا گیا جسے 13 اپریل کو سناتے ہوئے درخواست مسترد کردی گئی۔

محکمہ داخلہ سندھ نے کورونا ایس او پیز پر عملدرآمد کے لیے نیا نوٹیفیکشن جاری کردیا جس میں صوبے بھر میں نافذ پابندیوں میں 16 مئی تک توسیع کی گئی ہے۔

کورونا ایس او پیز کے حوالے سے جاری کردہ نوٹیفیکیشن کے مطابق کاروباری سرگرمیاں صبح 6 سے رات 8 بجے تک جاری رہیں گے جب کہ جمعہ اور اتوار کو کاروباری سرگرمیاں معطل رہیں گی۔

نوٹیفکیشن کے مطابق ریسٹورینٹس میں آؤٹ ڈور سروس کی اجازت رات 10 بجے تک ہوگی، تفریحی پارکس، سینما، مزارات مکمل طور پر بند ہوں گے جب کہ شادی بیاہ کی انڈور اور آؤٹ ڈور تقریبات سماجی، سیاسی، ثقافتی، کھیلوں، میوزیکل اور مذہبی تقریبات پر پابندی ہوگی۔

اس کے علاوہ سرکاری اور نجی دفاتر میں پالیسی کے تحت اسٹاف کی حاضری 50 فیصد ہوگی۔

صوبہ بلوچستان کے ضلع لسبیلہ کی تحصیل حب میں فٹبال میچ کے دوران دھماکے کے نتیجے میں 12 افراد زخمی ہو گئے۔

حب میں الہ آباد ٹاؤن کے علاقے میں شہدائے پولیس کے اعزاز میں منعقدہ فٹبال میچ کے دوران زوردار دھماکا ہوا جس کے نتیجے میں ایک درجن افراد زخمی ہوئے۔

دھماکا تماشائیوں کے اسٹینڈز میں ہوا اور تمام زخمی افراد کو ہسپتال منتقل کردیا گیا۔

پولیس اور قانون نافذ کرنے والے اداروں نے جائے وقوع پر پہنچ کر واقعے کی تحقیقات شروع کردی ہیں۔

زخمیوں کو ابتدائی طور پر حب کے جام غلام قادر ہسپتال منتقل کیا گیا اور ابتدائی طبی امداد کے بعد کراچی منتقل کردیا جائے گا۔

اسسٹنٹ کمشنر لسبیلہ لیفٹیننٹ (ر) محمد احمد ظہیر ہسپتال نے مریضوں کی عیادت کے بعد ڈان نیوز سے گفتگو کرتے ہوئے کہا کہ دھماکے میں دو افراد زیادہ زخمی ہوئے لیکن ان کی حالت بھی خطرے سے باہر ہے۔

ایس ایس پی لسبیلہ طارق الٰہی نے بھی جائے وقوع کا دورہ کیا اور اسے دیسی ساختہ آئی ای ڈی کا دھماکا قرار دیا۔

واضح رہے کہ یہ میچ پولیس شہدا کے اعزاز میں کھیلا جارہا تھا اور آج ٹورنامنٹ کے فائنل میچ کے دوران دھماکا ہو گیا۔

پولیس واقعہ کے حوالے سے تفتیش کررہی ہے۔

یہ پہلا موقع نہیں کہ فٹبال میچ کے دوران دھماکا ہوا ہو بلکہ اس سے قبل اس طرح کے واقعات رونما ہو چکے ہیں۔

2015 میں سابقہ فاٹا کی کرم ایجنسی کی تحصیل علی زئی میں فٹبال میچ کے دوران گراؤنڈ میں دو خود کش بمباروں کی جانب سے حملے کی کوشش کی گئی تاہم سیکیورٹی فورسز نے دونوں کو فائرنگ کرکے ہلاک کردیا تھا۔

2013 میں کراچی کے علاقے لیاری میں فٹبال میچ کے دوران دھماکے کے نتیجے میں 7 افراد ہلاک ہو گئے تھے۔

دھماکا خیز مواد صوبائی وزیر جاوید ناگوری کی گاڑی کے قریب ایک موٹر سائیکل میں نصب کیا گیا تھا اور واقعے میں ایک درجن سے زائد افراد زخمی ہوئے تھے۔

اس سے قبل 2008 میں مستونگ کے علاقے میں نواب نوروز خان فٹبال اسٹیڈیم میں دھماکے کے نتیجے میں اسٹیڈیم کے ایک حصے کو نقصان پہنچا تھا۔

جس وقت یہ دھماکا ہوا تھا تو اس وقت کے وزیر اعلیٰ نواب محمد اسلم رئیسانی بھی اسٹیڈیم میں میچ دیکھ رہے تھے لیکن اس دھماکے میں خوش قسمتی سے کسی بھی قسم کا جانی نقصان نہیں ہوا تھا۔