Category پاکستان

رمضان میں سحر وافطار کے دوران بجلی کی لوڈشیڈنگ نہیں ہوگی۔

وفاقی حکومت نے تمام بجلی کمپنیوں کو ہدایات جاری کر دیں۔ ڈسکوز کو سحر و افطار اور تروایح کے اوقات میں لوڈ شیڈنگ نہ کرنے کی ہدایت کی گئی ہے۔

حکام ڈسکوز نے کہا ہے کہ بجلی چوری والے علاقوں میں 2 سے 7 گھنٹے یومیہ لوڈشیڈنگ ہو گی، پاور کنٹرول سینٹر سے فیڈرز پر لوڈ کی نگرانی کی جائے گی، صارفین کی شکایات کے فوری ازالے کو ہر صورت ممکن بنایا جائے گا۔

الیکٹرانک میڈیا رپورٹرایسوسی ایشن (ایمرا)کے صدر محمد آصف بٹ،سیئرنائب صدر جواد ملک،نائب صدرعرفان ملک،سیکرٹری سلیم شیخ،ایڈیشنل نعمان شیخ،فنانس سیکرٹری ارشد چوہدری،سینئر جوائنٹ سیکرٹری کنورعزیر،جوائنٹ سیکرٹری عبدالقادر خواجہ،انفارمیشن سیکرٹری شفیق شریف،آفس سیکرٹری افضل سیال اور ایمراباڈی کاخبریں گروپ آف نیوز پیپرکے بانی ،کالمسٹ،سینئر صحافی ضیاء شاہد کےانتقال پرگہرےدکھ اور افسوس کااظہار

بانی ایڈیٹر ۔سینئر صحافی ضیا شاہد کے انتقال پر اظہار افسوس کرتے ہوئے صدر ایمرا آصف بٹ کا کہنا تھا کہ انکی صحافتی خدمات تادیر یاد رکھی جائیں گی. انہوں نے آزادی صحافت کے لئے گراں قدر خدمات انجام دیں. سینئر صحافی ضیاء شاہد کے انتقال پر ان کے صاحبزادے امتنان شاہد اور اہلخانہ سے اظہار تعزیت کرتے ہیں۔ ضیاء شاہد ایک نڈر بے باک صحافی تھے۔انہوں نے ہمیشہ مظلوم اور پسے ہوئے طبقے کے لئے آواز بلند کی۔ ضیاء شاہد نے بطورصحافی اردو صحافت کو ایک نئی جہت سے متعارف کروایا۔
انہوں نے مزید کہا کہ ضیاء شاہد کی صحافت اور صحافتی اداروں کے لئے خدمات کو خراج تحسین پیش کرتے ہیں۔ ضیاء شاہد کی وفات سے پیدا ہونےوالا خلا مدتوں پر نہیں ہوسکتا۔ دعا ہے کہ اللہ تعالی مرحوم کی مغفرت فرمائے اور جنت الفردوس میں اعلی مقام عطا فرمائے۔آمین

وفاقی وزیر منصوبہ بندی و ترقی اسد عمر نے کہا ہے کہ مشترکہ مفادات کونسل نے متفقہ طور پر 2017 کی مردم شماری منظور کرتے ہوئے فوری طور پر نئی مردم شماری کرانے کا فیصلہ کیا ہے۔

مشترکہ مفادات کونسل کے اجلاس کے بعد اسلام آباد میں پریس کانفرنس کرتے ہوئے اسد عمر نے کہا کہ مردم شماری کے حوالے سے کابینہ کی کمیٹی بھی بنا دی گئی تھی اور انہوں نے اس حوالے سے اپنی سفارشات بھی مرتب کی تھیں۔

انہوں نے کہا کہ مردم شماری الیکشن کی بنیاد بنتی ہے اور تازہ ترین حلقہ بندیوں کی بنیاد پر حلقہ بندیاں کی جاتی ہیں اور اسی کی بنیاد پر الیکشن کرائے جاتے ہیں جبکہ 2018 کے الیکشن کو خاص آئینی ترمیم کے ذریعے خصوصی استثنیٰ دیا گیا تھا۔

ان کا کہنا تھا کہ ضمنی انتخابات پرانی حلقہ بندیوں اور مردم شماری سے ہو سکتے ہیں لیکن مقامی حکومتوں کے انتخابات نئی مردم شماری کی بنیاد پر ہی ہوں گے اور اس میں عدلیہ کی بھی بہت زیادہ دلچسپی ہے۔

وفاقی وزیر نے کہا کہ 2023 الیکشن سے پہلے مردم شماری پر حتمی فیصلہ نہ ہو تو آئینی ترمیم کا استثنیٰ ختم ہونے کے سبب اگلا الیکشن 1998 میں ہوئی مردم شماری کی بنیاد پر ہو گا جس کے نتیجے میں تینوں چھوٹے صوبوں کی اسمبلی میں نمائندگی کم ہو جائے گی اور پنجاب کی نمائندگی بڑھ جائے گی۔

ان کا کہنا تھا کہ 2017 کی مردم شماری پر ملک بھر میں سوالات اٹھائے گئے اور جب ملک کے کئی حصوں سے سوالات اٹھائے جا رہے ہوں تو یہ ملک کی یکجہتی کے لیے اچھی چیز نہیں ہے، اس پر اتفاق رائے اور عوام کو اعتماد ہونا چاہیے لہٰذا اگر ملک کے کئی علاقوں سے سوالیہ نشان کھڑے ہو جائیں تو یہ کوئی اچھی صورتحال نہیں ہے۔

ان کا کہنا تھا کہ مشترکہ مفادات میں مردم شماری کا آڈٹ وغیرہ کرنے کا طریقہ نہیں ہے، آپ اسے منظور کریں یا مسترد کردیں، اگر اہم ان دونوں میں سے کوئی بھی فیصلہ نہیں لیتے تو نئی مردم شماری کرانے سے ہم قاصر ہیں، پرانی مردم شماری ہمیں قبول نہیں ہے لہٰذا اسے منظور یا مسترد کیے بغیر ہم آگے نہیں بڑھ سکتے۔

اسد عمر نے کہا کہ اس صورتحال کو دیکھتے ہوئے مشترکہ مفادات کونسل کے اجلاس میں اکثریت رائے سے فیصلہ کیا گیا کہ مردم شماری کے نتائج کی منظوری دیتے ہیں۔

ان کا کہنا تھا کہ اس کے ساتھ ساتھ یہ فیصلہ بھی کیا گیا کہ اگلی مردم شماری کے لیے 10سال انتظار کرنے کی ضرورت نہیں ہے کیونکہ اس مردم شماری پر سوالیہ نشان موجود ہے لہٰذا فوری بنیاد پر نئی مردم شماری کرانی ہے۔

وفاقی وزیر منصوبہ بندی نے کہا کہ ہم نے چند ماہ قبل ڈپٹی کمشنر پلانگ کمیشن کی سربراہی میں ایک ٹیکنیکل ٹیم بنائی تھی جس میں سرکاری لوگ اور مردم شماری پر مہارت رکھنے والے ماہرین شماریات بھی موجود ہیں اور وہ کافی حد تک کام مکمل بھی کر چکے ہیں۔

ان کا کہنا تھا کہ اگلے چھ سے 8 ہفتے کے اندر نئی مردم شماری کا فریم ورک تیار کر لیا جائے گا کیونکہ ہم نے پرانے طریقہ کار کے مطابق مردم شماری نہیں کرانی۔

انہوں نے مزید کہا کہ جون کے وسط تک یہ عمل مکمل کر لیا جائے گا جس کے بعد ہم مشترکہ مفادات کونسل سے منظوری لے لیں گے اور اس منظوری کے چار ماہ کے بعد اس پر کام شروع کیا جا سکتا ہے، اسی سال اکتوبر میں تک نئی مردم مشاری پر کام شروع ہو جائے گا اور 18 مہینے کا عمل 2023 کے ابتدائی چھ ماہ میں مکمل ہو جائے گا۔

وفاقی وزیر نے بتایا کہ مردم شماری کا فیصلہ اتفاق رائے سے کیا گیا جس میں وفاق کے 7 اراکین، بلوچستان، پنجاب اور خیبر پختونخوا کے وزرائے اعلیٰ نے اس کے حق میں ووٹ دیا جبکہ وزیر اعلیٰ سندھ نے اس کے خلاف ووٹ دیا۔

اسلام آباد: دور دراز علاقوں کی احساس محرومی سے متعلق کیس کی سماعت کے دوران جسٹس عمر عطا بندیال نے ریمارکس دیے کہ موٹر وے سے نیچے جاؤ تو سڑکوں کے حال کا پتہ چلتا ہے۔

سپریم کورٹ میں دور دراز علاقوں کی احساس محرومی سے متعلق کیس کی سماعت جسٹس عمر عطا بندیال کی سربراہی میں 3 رکنی بینچ نے کی۔

درخواست گزار راجا ناصر کا کہنا تھا کہ قومی اقتصادی کونسل کا اجلاس سال میں 2 مرتبہ ہونا چاہیے، اقتصادی کونسل اجلاس باقاعدگی سے نا بلانا آئینی مینڈیٹ کی خلاف ورزی ہے، صوبائی سطح پر وسائل کی تقسیم متوازن اور برابری کے اصول پر ہونی چاہیے۔

جسٹس عمر عطا بندیال نے ریمارکس دیے کہ صوبوں کےکئی علاقوں میں ضرورت سے زیادہ توجہ دی جاتی ہے، صوبوں میں ایسےعلاقے بھی ہیں جہاں عوام کو بالکل نظرانداز کیا جا رہا ہے۔

ان کا کہنا تھا کہ بلوچستان کے کئی علاقوں میں پینے کا پانی تک میسر نہیں، موٹروے سے نیچے جاؤ تو سڑکوں کے حال کا پتہ چلتا ہے، شہروں میں عالیشان اسکول ہیں جبکہ دیہی علاقوں میں تعلیم کا برا حال ہے۔

جسٹس عمر عطا بندیال نے اپنے ریمارکس میں مزید کہا کہ متوازن ترقی اور وسائل کی مساوی تقسیم آئینی ذمہ داری ہے۔

درخواست گزار راجا ناصر کا کہنا تھا کہ لاہور میں اربوں روپے خرچ کر دیے جاتے ہیں، باقی صوبوں کے عوام چیختے رہ جاتے ہیں۔

جسٹس منیب اختر نے ریمارکس دیے کہ نیشنل اکنامک پالیسی بنانا عدالت کا کام نہیں، کس ضلع کو فنڈز دیے جانے چاہئیں یہ عدالت کیسے کہہ سکتی ہے؟

جسٹس عمر عطا بندیال نے کہا کہ عدالت کا آرٹیکل 184 تھری کے مقدمات میں معیار سخت ہو گیا ہے، آرٹیکل 184 تھری کا مقدمہ عام نہیں، بڑا سیریس ہوتا ہے۔

جسٹس عمر عطا بندیال نے درخواست گزار سے مکالمہ کرتے ہوئے کہا کہ آپ کی درخواست اچھی ہے لیکن اس میں ترمیم کر لیں، درخواست کی استدعا اور دلائل میں فرق ہے۔

بعدازاں سپریم کورٹ نے درخواست گزار کو آئینی درخواست میں ترمیم کی اجازت دے دی۔

پاکستان میں کورونا وائرس کی صورتحال مسلسل بگڑ رہی ہے لیکن اس کے باوجود عوام میں وبا سے بچاؤ کے لیے بنائے گئے اسٹینڈرڈ آپریٹنگ پروسیجرز (ایس او پیز) پر عملدرآمد کی صورتحال حوصلہ افزا نہیں۔

کووِڈ-19 کے اعداد و شمار کے لیے بنائی گئی سرکاری ویب سائٹ کے مطابق پاکستان میں مزید 4 ہزار 584 افراد وائرس سے متاثر ہوئے جبکہ 58 مریض انتقال کر گئے۔

وبا کی تشخیص کے لیے 11 اپریل کو مجموعی طور پر 44 ہزار 514 ٹیسٹس کیے گئے جس کے نتیجے میں کورونا کیسز مثبت آنے کی شرح 10.29 فیصد رہی جبکہ فعال کیسز 75 ہزار 266 تک پہنچ چکے ہیں۔

ملک میں مجموعی طور پر اب تک کورونا وائرس سے 7 لاکھ 25 ہزار 602 افراد متاثر ہو چکے ہیں جن میں سے 15 ہزار 501 زندگی کی بازی ہار گئے۔

علاوہ ازیں گزشتہ 24 گھنٹے کے دوران مزید 3 ہزار 135 مریض صحتیاب ہوئے اور مجموعی طور پر اب تک 6 لاکھ 34 ہزار 835 مریض صحتیاب ہوچکے ہیں۔

واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد سے وبا کے پھیلاؤ میں اتار چڑھاؤ جاری ہے اور اب تک بیماری کی 2 لہریں دیکھی جاچکی ہیں جبکہ تیسری لہر کا پھیلاؤ بدستور جاری ہے۔

کیسز میں حالیہ اضافے کے پیشِ نظر کئی علاقوں میں دوبارہ لاک ڈاؤن اور اسمارٹ لاک ڈاؤن لگایا گیا ہے جبکہ کاروباری سرگرمیوں کے اوقات کار بھی محدود کردیے گئے ہیں اس کے علاوہ متاثرہ علاقوں میں تعلیمی ادارے بھی بند ہیں۔

پاکستان میں 12 اپریل کو چاروں صوبوں اور وفاقی اکائیوں میں کورونا وائرس کیسز اور اموات کی صورتحال درج ذیل ہے:

پنجاب
وبا کی تیسری لہر نے صوبہ پنجاب کو بری طرح اپنی لپیٹ میں لے رکھا ہے اور گزشتہ 24 گھنٹوں کے دوران صوبے میں مزید 2 ہزار 21 افراد اس وائرس کا شکار بنے۔

پنجاب میں اب تک 2 لاکھ 50 ہزار 459 کورونا کیسز رپورٹ ہو چکے ہیں اور وبا کے باعث مزید 21 مریضوں کے انتقال سے مرنے والوں کی تعداد 6 ہزار 988 تک پہنچ گئی ہے۔

خیبر پختونخوا
حالیہ لہر کے دوران پنجاب کے بعد صوبہ خیبرپختونخوا زیادہ متاثر ہوا ہے اور یہاں گزشتہ روز مزید ایک ہزار 294 نئے کیسز سامنے آئے جبکہ 33 مریض دم توڑ گئے۔

خیبر پختونخوا میں اب تک رپورٹ ہونے والے کیسز کی مجموعی تعداد 99 ہزار 595 ہے جبکہ 2 ہزار 651 مریض انتقال کر چکے ہیں۔

اسلام آباد
اسلام آباد میں گزشتہ 24 گھنٹوں کے دوران مزید 680 نئے کیسز رپورٹ ہوئے جبکہ مزید 4 مریض اس وبا کے باعث زندگی کی بازی ہار گئے۔

وفاقی دارالحکومت میں اب تک مجموعی طور پر 66 ہزار 380 افراد وائرس کا شکار ہوچکے ہیں جن میں سے انتقال کر جانے والوں کی تعداد 611 ہے۔

سندھ
ملک کے دوسرے بڑے صوبے سندھ میں وبائی صورتحال نسبتاً بہتر تھی تاہم اب اس میں معمولی اضافہ نظر آرہا ہے اور یہاں گزشتہ 24 گھنٹوں میں 376 کیسز رپورٹ ہوئے جس کے بعد مجموعی کیسز کی تعداد 2 لاکھ 69 ہزار 126 ہو گئی ہے۔

صوبے میں کورونا وائرس سے مزید ایک مریض کا انتقال ہوا، مجموعی طور پر یہاں اب تک 4 ہزار 530 افراد لقمہ اجل بن چکے ہیں۔

آزاد کشمیر
آزاد کشمیر میں گزشتہ 24 گھنٹوں کے دوران مزید 133 افراد میں وائرس کی تصدیق ہوئی جبکہ 4 مریض دم توڑ گئے۔

آزاد کشمیر میں مجموعی طور پر 14 ہزار 594 افراد وائرس سے متاثر ہوئے جس میں سے 403 انتقال کر گئے۔

بلوچستان
بلوچستان میں کورونا وائرس نے مزید 80 افراد کو متاثر کیا اور کسی مریض کا انتقال نہیں ہوا۔

یوں صوبے میں اب تک رپورٹ ہونے والے کیسز کی مجموعی تعداد 20 ہزار 321 اور اموات کی تعداد 215 پر برقرار ہے۔

پاکستان ٹیلی کمیونی کیشن اتھاٹی (پی ٹی اے) نے سماجی رابطے کی ویب سائٹ ‘ٹوئٹر’ کی انتظامیہ کو اعلیٰ عدلیہ کے خلاف توہین آمیز ٹوئٹس اور ٹرینڈز کو فوری طور پر بلاک یا ہٹانے کی ہدایت کردی۔

پی ٹی اے کی جانب سے ٹوئٹر انتظامیہ کو بتایا گیا ہے کہ اس طرح کے مواد یا ٹرینڈز کی موجودگی آزادی اظہار کی تعریف کے زمرے میں نہیں آتی، لہٰذا اسے فوری طور پر ہٹایا جانا چاہیے۔

سوشل میڈیا پلیٹ فارم کو یہ ہدایت بھی کی گئی ہے کہ وہ قانونی کارروائی سے بچنے کے لیے غیر قانونی اور نقصان دہ آن لائن مواد کو ہٹانے کے لیے پی ٹی اے کی درخواستوں پر موثر اور فوری طور پر کارروائی کرے۔

بیان میں کہا گیا کہ پی ٹی اے، ڈیجیٹل پلیٹ فارمز کو معاونت و سہولت فراہم کرنے کے لیے پرعزم ہے بشرطیکہ وہ ملکی قوانین پر عمل پیرا رہیں۔

واضح رہے کہ گزشتہ روز ٹوئٹر پر اعلیٰ عدلیہ کے حوالے سے توہین آمیز ٹوئٹس سامنے آئی تھیں۔

اس سے قبل بھی پی ٹی اے مختلف سوشل میڈیا پلیٹ فارمز کو کئی بار نازیبا، توہین آمیز اور غیر اخلاقی مواد ہٹانے کی ہدایت کر چکا ہے۔

ترجمان دفتر خارجہ زاہد حفیظ چودھری نے کہا ہے کہ پاکستان ایف اے ٹی ایف ایکشن پلان پر مکمل عملدرآمد کے قریب ہے، 27 میں سے24 اہداف پر عملدرآمد اس کا ثبوت ہے.

برطانیہ کی طرف سے پاکستان کو ہائی رسک ممالک میں شامل کرنے کے معاملے پر بات کرتے ہوئے ترجمان دفتر خارجہ کی جانب سے جاری بیان میں کہا گیا ہے کہ پاکستان نے منی لانڈرنگ اورٹیرر فنانسنگ ترمیمی ریگولیشنز کا جائزہ لیا۔ برطانیہ کا پاکستان سے متعلق موقف حقائق پر مبنی نہیں ہے۔

ترجمان دفتر خارجہ نے کہا کہ پاکستان نے گزشتہ دو سال میں اینٹی منی لانڈرنگ، کاؤنٹر ٹیرر فنانسنگ، قانون سازی، ادارہ جاتی اور انتظامی اقدامات اٹھائے۔ عالمی برادری نے پاکستان کے اقدامات کو تسلیم کیا۔

بیان میں کہا گیا ہے کہ امید ہے کہ حقائق کی روشنی میں برطانیہ ریگولیشنز کا دوبارہ جائزہ لیتے ہوئے سیاسی بنیادوں پر غلط اقدامات سے اجتناب کرے گا۔

خیال رہے کہ گزشتہ روز برطانیہ نے پاکستان کو 21 ہائی رسک ممالک کی فہرست میں شامل کردیا تھا۔ رپورٹ کے مطابق منی لانڈرنگ اور دہشت گردی کی معاونت جیسے مسائل سے دوچار ممالک کو اس فہرست میں شامل کیا جاتا ہے۔

ہائی رسک ممالک کی فہرست میں پاکستان کا نمبر 15 واں ہے جبکہ اس میں شام، یوگنڈا، یمن اور زمبابوے بھی شامل ہیں۔ دسمبر 2020ء کی برطانوی حکومت کی رپورٹ کے مطابق پاکستان اور برطانیہ کے درمیان ناجائز رقوم کا تبادلہ جاری ہے۔

برطانوی حکومت کے مطابق ٹیکس کنٹرول کا نہ ہونا، دہشت گردی کی مالی معاونت اور منی لانڈرنگ کے مسائل سے دوچار ملک خطرہ ہیں۔

گورنر پنجاب چودھری سرور نے کہا ہے کہ مقبوضہ کشمیر میں مسجد پر بمباری مذہبی آزادی کا قتل ہے، بھارت کی مسلم دشمنی خطے میں انارکی کو ہوا دے رہی ہے۔
گورنر پنجاب چودھری سرور نے سماجی رابطے کی ویب سائٹ پر ٹویٹ کرتے ہوئے کہا کہ نریندر مودی سب سے بڑا دہشت گرد اور امن دشمن ہے، امت مسلمہ کو خاموشی ختم کر کے بھارتی دہشت گردی کے خلاف کھڑا ہونا ہوگا، کون سا مذہب مذہبی مقامات کی بے حرمتی کی اجازت دیتا ہے ؟ بدقسمتی سے یو این او کا مردہ ضمیر بلکتے کشمیریوں کی آواز سننے سے قاصر ہے۔

چودھری سرور نے کشمیر میں مسجد پر بھارتی افواج کی بمباری کی ویڈیو بھی شیئر کی۔ ان کا کہنا تھا کہ جب تک مسئلہ کشمیر حل نہیں ہوتا خطے میں امن قائم نہیں ہوسکتا، بھارت سن لے وہ کشمیریوں کی تحریک آزاد کی آواز دبا نہیں سکتا۔

پاکستان پیپلزپارٹی نے پی ڈی ایم کے تمام عہدوں سے احتجاجا مستعفی ہونے کا اعلان کر دیا۔ انہوں نے کہا کہ سیاسی اتحاد میں کسی قسم کے شوکاز نوٹس کی مثال نہیں ملتی، شوکاز نوٹس پر پیپلزپارٹی اور اے این پی سے معافی مانگی جائے، اے این پی کو اکیلا نہیں چھوڑیں گے ان کے ساتھ کھڑے ہیں۔
چیئرمین پیپلزپارٹی بلاول بھٹو نے نیوز کانفرنس کرتے ہوئے کہا کہ استعفے ایٹم بم ہیں، آخری ہتھیار ہونا چاہیے، پیپلزپارٹی کا استعفوں کا مؤقف آخری آپشن ہوگا، ہمارا آج بھی یہی مؤقف ہے کل بھی یہی تھا، قومی و صوبائی اسمبلیوں سے استعفے آخری ہتھیار ہونے چاہئیں، سینیٹ الیکشن میں حصہ لے کر حکومت کا مقابلہ کیا، ضمنی الیکشن میں حصہ لے کر حکومت کو ایکسپوز کر دیا، ضمنی الیکشن میں عوام نے بتا دیا کہ وہ اپوزیشن کے ساتھ ہیں۔

بلاول بھٹو نے کہا کہ سیاست عزت اور برابری کی بنیاد پر کی جاتی ہے، ہم پر کوئی فیصلے مسلط نہ کرے، جس کو استعفیٰ دینا ہے دے دیں لیکن کسی پارٹی کو ڈکٹیٹ نہ کریں، پنجاب میں سینیٹ کی 5 نشستیں پی ٹی آئی کو دی گئیں تو کوئی نوٹس نہیں دیا گیا۔

حکومت کی معاشی پالیسیوں پر تنقید کرتے ہوئے بلاول بھٹو نے کہا کہ پہلے دن سے پیپلزپارٹی معاشی پالیسی پر تنقید کرتی رہی، آئی ایم ایف سے ڈیل پاکستان کے مفاد میں نہیں، تحریک انصاف کی آئی ایم ایف ڈیل عوام دشمن ڈیل ہے، یہ ڈیل پاکستان کے مفاد میں نہیں ہے، اس ڈیل کے ذریعے غریب عوام کو ٹارگٹ کیا جا رہا ہے، ڈیل سے معاشی ترقی کی راہ میں رکاوٹیں پیدا ہوں گی، عوام کے کندھوں پر اتنا بوجھ ڈالیں جتنا وہ برداشت کرسکیں۔

کرکٹ بورڈ نے پاکستان سپر لیگ 6 کے باقی میچز کا شیڈول جاری کردیا۔

پاکستان کرکٹ بورڈ نے پی ایس ایل کے باقی میچز کا شیڈول جاری کر دیا جس کے مطابق سپر لیگ 6 کے بقیہ میچز کا آغاز یکم جون سے ہوگا جب کہ ٹورنامنٹ کا فائنل 20 جون کو کھیلا جائے گا، ایونٹ کے تمام شرکاء کے لیے 22 مئی سےایک ہی ہوٹل میں قرنطینہ کی 7 روزہ مدت کا آغاز کیا جائے گا۔

پی سی بی کے مطابق 3 روزہ ٹریننگ سیشنز کے بعد یکم جون سے ایونٹ شروع ہوجائے گا، تمام میچز نیشنل اسٹیڈیم کراچی میں کھیلے جائیں گے، نائٹ میچز کا آغاز رات 8 بجے سے ہوگا جب کہ ڈبل ہیڈر والے دن پہلا میچ شام 5 بجے اور دوسرا رات 10 بجے شروع ہوگا۔

واضح رہے کہ پاکستان سپر لیگ کے چھٹے ایڈیشن کو کورونا کے بڑھتے کیسز کے باعث ملتوی کردیا گیا تھا۔ پی ایس ایل کے چھٹے ایڈیشن کے دوران 7 افراد کے کورونا ٹیسٹ مثبت آئے تھے جن میں 6 کھلاڑی اور ایک آفیشل شامل ہے۔

پی ایس ایل پوائنٹس ٹیبل

20 فروری سے شروع ہونے والے پاکستان سپر لیگ کے چھٹے ایڈیشن میں اب تک 14 میچز کھیلے گئے ہیں جس میں کراچی کنگز 6 پوائنٹس کے ساتھ پوائنٹس ٹیبل پر سرفہرست ہے۔ پشاور زلمی بھی 3 میچ جیت کر 6 پوائنٹس لینے میں کامیاب رہی تاہم وہ رن ریٹ کی وجہ سے دوسرے نمبر پر ہے۔ اسلام آباد یونائیٹڈ اور لاہور قلندرز 6،6 پوائنٹس کے ساتھ تیسرے اور چوتھے نمبر پر موجود ہیں۔

دوسری جانب لیگ میں واحد میچ جیتنے والی ملتان سلطانز اور کوئٹہ گلیڈی ایٹرز 2,2 پوائنٹس کے ساتھ بالتریب پانچویں اور چھٹی پوزیشن پر براجمان ہیں۔