Category پاکستان

ذرائع کے مطابق چیئرمین تحریک انصاف عمران خان نے گزشتہ روز سابق وزیراعلیٰ پنجاب عثمان بزدار کو یقین دہانی کرائی تھی کہ پنجاب اسمبلی تحلیل کرنے سے پہلے ہی تونسہ کو ضلع کا درجہ دے دیا جائے گا، عمران خان نے وزیراعلیٰ پنجاب کو ہدایت کی تھی کہ تونسہ کو ضلع کا درجہ دینے کے لیے اقدامات کیے جائیں۔

آج وزیراعلیٰ پنجاب چوہدری پرویز الٰہی سے ڈیرہ غازی خان کے ارکان قومی و صوبائی اسمبلی نے ملاقات کی جس کے بعد پرویز الٰہی نے بتایا کہ تونسہ کو ضلع کا درجہ دینے کی حتمی منظوری دے دی ہے۔

چوہدری پرویز الٰہی کا کہنا تھا ڈی جی خان کے ارکان اسمبلی کے مطالبے پر تونسہ کو ضلع کا درجہ دینےکا اقدام کیا، میں نے 2005 میں تونسہ کو ضلع کا درجہ دینےکااعلان کیا تھا، تونسہ کو ضلع کا درجہ دینے کی حتمی منظوری بھی میں نے دی ہے۔

انہوں نے مزید کہا کہی ضلع بننے سے تونسہ کے انتظامی امور میں بہتری آئے گی۔

ذرائع پنجاب حکومت کا بتانا ہے کہ کابینہ سے بھی تونسہ کو ضلع کا درجہ دینے کی منظوری لی جائےگی۔

ڈی جی خان سے تعلق رکھنے والے ارکان قومی و صوبائی اسمبلی نے تونسہ کو ضلع کا درجہ دینے پر وزیراعلیٰ پنجاب کا شکریہ ادا کیا۔

کراچی: عالمی منڈی میں خام تیل کی قیمت میں کمی کے باعث پاکستان میں پیٹرولیم مصنوعات کی قیمتوں  میں کمی کی جاسکتی ہے۔

انڈسٹری ذرائع کے مطابق عالمی منڈی میں خام تیل کی قیمتوں کے اثرات پاکستان میں تیل کی قیمتوں پر بھی پڑسکتے ہیں جس کے تحت فی لیٹر ڈیزل 9 روپے سستا ہونے کا تخمینہ ہے  جب کہ پیٹرول کی قیمت میں بھی ساڑھے 7 روپے فی  لیٹر کمی کا امکان ہے۔

ذرائع نے بتایا کہ آئی ایم ایف دباؤکے تحت سیلز ٹیکس اور پی ڈی ایل بڑھائے جانے کا امکان ہے۔

ذرائع کا کہنا ہےکہ قیمتوں میں کمی سیلز ٹیکس  اور پی ڈی ایل میں ایڈجسٹ ہوئی تو تیل  کی قیمتوں میں کوئی کمی نہیں کی جائے گی۔

اسلام آباد:وزیراعظم شہباز شریف نے کہا ہے کہ پاکستان کو سری لنکا بنانے کی خواہش رکھنے والوں کو ہمیشہ کی طرح مایوسی ہوگی۔

حکومت کی معاشی ٹیم کے اجلاس کی صدارت کرتے ہوئے وزیراعظم شہباز شریف نے کہا ہے کہ سابق حکومت کی تباہ حال معیشت کو بحال کریں گے۔ ان شا اللہ پاکستان دیوالیہ نہیں ہوگا۔

قبل ازیں اجلاس میں وزیر خزانہ اسحاق ڈار، گورنر اسٹیٹ بینک اور ایف بی آر حکام نے وزیراعظم کو ملکی معاشی صورت حال پر بریفنگ دی۔

اجلاس میں وزیر اعظم کو قرضوں کی واپسی کے شیڈول اور آئی ایم ایف سے جاری بات چیت سے متعلق تفصیلات سے آگاہ کیا گیا، علاوہ ازیں معاشی ٹیم نے وزیر اعظم کو زرمبادلہ کے ذخائر سمیت ڈالر کی قدر کے محرکات کے حوالے سے بھی بتایا۔

وزیراعظم کی زیر صدارت اجلاس میں موجود وزیر خزانہ اسحاق ڈار نے کہا کہ ملک کے دیوالیہ ہونے کا کوئی امکان نہیں ہے، قرضوں کی بروقت ادائیگیاں کی جائیں گی۔
دوران اجلاس وزیراعظم شہباز شریف نے حکومتی معاشی ٹیم کو ہدایت کی کہ معیشت کو مستحکم اور عوام کو ریلیف فراہم کیا جائے۔

ذرائع کے مطابق حکومت نے ڈالر، گندم اور یوریا کی افغانستان سمگلنگ کو روکنے کے لیے ٹھوس اقدامات اٹھانے کا فیصلہ کیا ہے۔

اس سلسلے میں وزیراعظم نے ہدایات جاری کی ہیں کہ ڈالر کی سمگلنگ کو روکنے کے لیے تمام اداروں میں روابط مضبوط کرتے ہوئے ہوئے سخت ایکشن لیا جائے۔

وزیراعظم شہباز شریف کی زیر صدارت اجلاس میں فیصلہ کیا گیا ہے کہ حکومت مالیاتی اداروں سے کی گئی کمٹمنٹ کو پورا کرے گی۔

جہانیاں:پاکستان سمیت دنیا بھر میں مسیحی برادری کرسمس کا تہوار 25دسمبر کوجوش و خروش سے منائے گی۔مختلف شہروں میں مذہبی تقریبات کا انعقاد اور ملکی ترقی اورخوشحالی کے لیے دعائیں مانگی جائیں گی۔تفصیلات کے مطابق پاکستان سمیت دنیا بھر میں مسیحی برادری 25دسمبر کو حضرت عیسیٰ علیہ اسلام کے یوم ولادت کے سلسلے میں کرسمس کا تہوار منائے گی۔اس سلسلے میںجہانیاں،ٹھٹھہ صادق آباد سمیت ملک کے دیگر شہروں میں کرسمس کے موقع پر تقریبات منعقد کرکے ملکی ترقی اورخوشحالی کے لیے دعائیں مانگی جائیں گی۔کرسمس ٹریز کی تیاری کے ساتھ ساتھ تمام چرچز کو انتہائی خوبصورتی سے سجا دیا گیا ہے۔کرسمس کی مناسبت سے گرجا گھروں میں خصوصی عبادات اور دعائیہ تقریبات کا انعقاد کیا جائے گا جہاں مسیحی برادری کے افراد اپنی مذہبی تقریبات کی ادائیگی اور عبادات کریں گے،اس موقع پر ملکی ترقی، قیام امن اور سلامتی و خوشحالی کی خصوصی دعائیں مانگی جائیں گی۔ ۔کرسمس کے موقع پر جہانیاں سمیت صوبہ بھر میں سکیورٹی کے انتہائی سخت انتظامات کئے گئے ہیں۔ عبادتگاہوں میں آنے والے مسیحیوں کو جامع تلاشی کے بعد اندر داخل ہونے کی اجازت ہو گی۔پولیس کی طرف سے مسیحی عبادتگاہوں کی طرف آنے والے راستوں کی ناکہ بندی کی جائے گی جبکہ عبادتگاہوں کے اندر اور چھتوں پر بھی سکیورٹی تعینات ہو گی۔پولیس افسران سکیورٹی انتظامات چیک کرنے کے لئے پیٹرولنگ بھی کریں گے۔

گزشتہ 24 گھنٹوں کے دوران ملک بھر میں کوئی ہلاکت رپورٹ نہیں ہوئی،این آئی ایچ

اسلام آباد : ملک بھر میں عالمی وباء کورونا وائرس کے کیسز کی شرح میں مسلسل کمی کا سلسلہ جاری ہے۔قومی ادارہ صحت (این آئی ایچ) کی رپورٹ کے مطابق گزشتہ 24 گھنٹوں میں کورونا وائرس کے 5 ہزار 702 ٹیسٹ کیے گئے جن میں سے 14 مریضوں میں عالمی وباء کی تشخیص ہوئی ہے۔این آئی ایچ کے مطابق گزشتہ 24 گھنٹوں کے دوران کورونا مثبت کیسز کی شرح 0.25 فیصد رہی ہے جبکہ ملک بھر میں کوئی ہلاکت رپورٹ نہیں ہوئی۔قومی ادارہ صحت (این آئی ایچ) کی رپورٹ کے مطابق ملک بھر میں اب بھی عالمی وباء￿ کورونا وائرس کا شکار 33 مریضوں کی حالت تشویشناک ہے

وزیر خزانہ سینیٹر سحاق ڈار کا کہنا ہے کہ پاکستان کو سبسڈی ٹارگٹڈ کرنا ہو گی اور ایکسپورٹ بڑھانا ہوں گی۔

اسلام آباد میں تقریب سے خطاب کرتے ہوئے اسحاق ڈار کا کہنا تھا کورونا وبا کی وجہ سے بہت سے ملکوں نے ٹیکس ریٹ میں اضافہ کیا، ہمارے پاس بھی ٹیکس ٹو جی ڈی پی ریٹ بڑھانے کے علاوہ کوئی دوسرا راستہ نہیں، دنیا کے متعدد بڑے ممالک کا قرض ٹوجی ڈی پی پاکستان سے کہیں زیادہ ہے۔

انہوں نے کہا کہ پاکستان کو ٹیکسوں کا دائرہ کار بڑھانے کی ضرورت ہے اور میں ایف بی آر کے ٹریک اینڈ ٹریس سسٹم کی مکمل حمایت کرتا ہوں۔

ان کا کہنا تھا پانچ سال قبل ہم کہاں تھے اور اب کہاں ہیں، گزشتہ چار سالوں میں اکنامک مینجمنٹ مکمل طور پر ناکام رہی، چار سالوں میں ہمارے قرضے 30 سے 54 کھرب تک پہنچ گٸے، میں بہت عرصے سے چارٹر آف اکانومی کا کہہ رہا ہوں۔

اسحاق ڈار کا کہنا تھا کیا امریکا، جاپان اور برطانیہ میں کہا جاتا ہے کہ ان کا ملک قرضوں کی دلدل میں پھنس گیا، پاکستان کو بھی معیشت کو سیاست سے الگ کرنا ہو گا۔

وزیر خزانہ کا کہنا تھا کیا بنگلا دیش سمیت دیگر ممالک کرنسی مارکیٹ میں مداخلت نہیں کر رہے، اسمگلرز اور ہنڈی مافیا نے ملکی معیشیت کو یرغمال بنایا ہوا ہے جس کی وجہ سے پاکستان میں بھی حکومت کو مارکیٹ میں مداخلت کرنا پڑتی ہے۔

انہوں نے کہا کہ نیب کے ڈر سے کوئی کام نہیں کرنا چاہتا، ہمیں بہت سے سرکاری اداروں کو پرائیویٹائز کرنا چاہیے۔

اسحاق ڈار کا کہنا تھا غریب اور نادار لوگوں کو سبسڈی دینا ریاست کی ذمہ داری ہے لیکن ہمارے ملک میں سبسڈی ٹارگیٹڈ ہونی چاہیے، ہم سوشل سکیورٹی کے لیے جتنا خرچ کر سکتے ہیں ہمیں کرنا چاہیے، ہمیں ایکسپورٹس بڑھانا ہوں گی کیونکہ ہم بیرونی قرضوں پر مزید انحصار نہیں کر سکتے۔

ان کا کہنا تھا میں پاکستان کے بارے میں ہمیشہ جذباتی ہو جاتا ہوں، میں نے پاکستان کے لیے جذباتی ہونے کی قیمت ادا کی اور پانچ سال جلاوطنی کاٹی۔

وزیر خزانہ کا کہنا تھا آئی ایم ایف کے ساتھ نواں ریویو جاری ہے، پاکستان نے آئی ایم ایف کے ساتھ اعتماد کا فقدان پیدا کیا، قرض دینے والوں کی اپنی شرائط ہوتی ہیں، آئی ایم ایف نے سیلاب بحالی کے اخراجات کی تفصیل مانگی ہے۔

پاکستان تحریک انصاف کے چیئرمین و سابق وزیراعظم عمران خان نے کہا ہے کہ پنجاب اسمبلی اسی مہینے تحلیل ہونے جارہی ہے۔

عمران خان کی زیر صدارت مشاورتی اجلاس ہوا جس میں بھکر، میانوالی، پاکپتن، ساہیوال سے تعلق رکھنے والے ارکان اسمبلی شریک ہوئے۔

ذرائع کے مطابق ارکان نے پنجاب اسمبلی کی تحلیل کے فیصلے کی توثیق کی۔

ذرائع نے بتایا کہ اجلاس سے خطاب میں عمران خان کا کہنا تھاکہ پنجاب اسمبلی اسی ماہ تحلیل ہونے جارہی ہے اور 20 دسمبر سے قبل اسمبلی تحلیل کی تاریخ کا اعلان کردیا جائے گا۔

انہوں نے کہا کہ ق لیگ اہم اتحادی ہے اور انھیں اپنے فیصلے سے آگاہ کردیا ہے، مسلم لیگ ق اسمبلی کی تحلیل کے معاملے پر ہمارے ساتھ ایک پیج پر ہے، ہماری سیاست ملک سے بالاتر نہیں،اس حکومت نے ملکی معیشت کو تباہ کر دیا۔

اسپیکر پنجاب اسمبلی سبطین خان کا کہنا تھاکہ تمام ارکان اسمبلی نے عمران خان کے فیصلے کی توثیق کی ہے۔

پی ایس او نے لیٹر آف کریڈٹ بچانے کے لیے وزارت خزانہ سے 120 سے 150 ارب روپے مانگ لئے

اسلام آباد :پاکستان میں پیٹرولیم مصنوعات کا بحران پیدا ہونے کا خدشہ ہوگیا ،پی ایس او پر تیل کی سپلائی کے حوالے سے بوجھ بڑھ گیا،ذرائع نے بتایا کہ پی ایس او انتظامیہ نے وزارت خزانہ کو ایس او ایس کال دیدی ،تمام آئل مارکیٹنگ کمپنیز کو ایل سیز کھلوانے میں مشکلات کا سامنا ،دیگر آئل کمپنیوں کی ایل سیز نہ کھلنے کے باعث پی ایس او پر ذمہ داری بڑھ گئی،وزارت خزانہ نے پی ایس او کا 602 ارب روپیہ ادا کرنا ہے،پی ایس او کو تیل درآمد کرنے کے لیے لیٹر آف کریڈٹ ڈیفالٹ ہونے کا خدشہ ہے،پی ایس او نے لیٹر آف کریڈٹ بچانے کے لیے وزارت خزانہ سے 120 سے 150 ارب روپے مانگ لئے ، زرائع کے مطابق توانائی کے شعبے کا سرکلر ڈیٹ 4 ہزار177 ارب روپے کی سطح سے تجاوز کرگیا ،انرجی سیکٹر کا سرکلر ڈیٹ 129 ارب روپے سالانہ کی رفتار سے بڑھ رہا ہے، بجلی کے شعبے کا سرکلر ڈیٹ 2ہزار277 ارب روپے سے زائد ہے، گیس کے شعبے کا سرکلر ڈیٹ 1400 ارب روپے تک ہے،وفاقی اور صوبائی حکومتیں بجلی کمپنیوں کی 950 ارب روپے کی نادہندہ ہیں،سرکلر ڈیٹ کے باعث انرجی چین متاثر ہونے کا خدشہ پیدا ہوگیا ہے

اسلام آباد: وفاقی وزارت صحت نے ملک میں دواؤں کے بحران کے خدشے کے پیش نظر وزارت خزانہ کو خط لکھ دیا۔

وزارت صحت  کے حکام کے مطابق ادویات کے خام مال کیلئے ایل سیز نہ کھولی گئیں تو ادویات کے بحران کا خدشہ ہے، ادویہ ساز کمپنیوں کے پاس صرف چند ہفتوں کا خام مال بچا ہے۔

حکام کی جانب سے بتایا گیا کہ ڈرگ ریگولیٹری اتھارٹی آف پاکستان کی سفارش پر وزارت خزانہ کو خط لکھا ہے۔

دوسری جانب پاکستان فارماسوٹیکل مینو فیکچررز ایسوسی ایشن کا کہنا ہےکہ بھارتی خام مال ساز کمپنیوں نے پاکستان کو ڈیفالٹ قرار دے دیا ہے، بھارتی اور چینی کمپنیاں اب پاکستانیوں کو ادھارپرخام مال نہیں دے رہیں، ایل سیز کھولنے کا مسئلہ حل نہ کیا گیا تو ملک میں ادویات اور میڈیکل ڈیوائسز کا سنگین بحران ہوگا۔

علاوہ ازیں ترجمان اسٹیٹ بینک نے کہا ہےکہ پیٹرولیم اور فارما سوٹیکل مصنوعات کی درآمد پرکوئی پابندی نہیں، گورنر اسٹیٹ بینک کی واضح ہدایات ہیں کہ پیٹرولیم اور فارما سیوٹیکل کیلئے ایل سیز بند نہ کی جائیں۔

ترجمان کا کہنا تھا کہ جو بینک فارماسوٹیکل امپورٹ کے لیے ایل سی نہیں کھول رہے، ان کی نشاندہی کریں۔

وزیراعظم شہباز شریف نے سکھر حیدرآباد موٹروے منصوبے کا سنگ بنیاد رکھ دیا۔

تقریب سے خطاب میں وزیراعظم نے کہا کہ یہ منصوبہ تیس ماہ میں مکمل ہوگا جسے پبلک پرائیوٹ پارٹنر شپ کے ذریعے مکمل کیا جائے گا، ٹرانسپورٹرز اور مسافروں کو اس سے بہت فائدہ ہوگا۔

انہوں نے کہا کہ کوئی دو رائے نہیں پاکستان میں موٹروے کی بنیاد نواز شریف نے رکھی اور اس کے معمار نوازشریف ہی ہیں، ہمیں اس کو مزید آگے بڑھانا ہے، سو فیصد متفق ہوں بلوچستان سے سڑکوں کو ملانے پر تیزی سے کام کرنا چاہیے کیونکہ بلوچستان ہمارا بہت اہم صوبہ ہے، بلوچستان کی ترقی کے بغیر پاکستان کی ترقی نامکمل ہے۔

اس موقع پر وزیراعظم نے کہا کہ سکھر روہڑی پل کا نواز شریف نے اعلان کیا تھا میں آج اس کی تکمیل کا اعلان کرتا ہوں۔