Category پاکستان

لاہور(ایمرا نیوز)لاہور کی خصوصی عدالت نے ایف آئی اے کی جانب سے بنائے گئے منی لانڈرنگ کے مقدمے میں وزیر اعظم شہباز شریف اور ان کے صاحبزداے و سابق وزیر اعلیٰ پنجاب حمزہ شہباز کی بریت کی درخواستوں پر فیصلہ محفوظ کرلیا۔
یاد رہے کہ ایف آئی اے نے نومبر 2020 میں ان کے خلاف پاکستان پینل کوڈ، کرپشن کی روک تھام ایکٹ اور انسداد منی لانڈرنگ ایکٹ کی دفعات کے تحت مقدمہ درج کیا تھا، شہباز شریف اور حمزہ شہباز کو شوگر اسکینڈل میں منی لانڈرنگ کے کیس کا سامنا ہے، جب کہ سلیمان شہباز برطانیہ مفرور ہیں۔
شہباز شریف اور حمزہ شہباز سمیت دیگر کے خلاف منی لانڈرنگ کیس کی اسپیشل کورٹ سینٹرل میں سماعت ہوئی جہاں وزیراعظم آج پیش نہیں ہوئے، ان کی قانونی ٹیم نے ایک دن کی حاضری معافی کی درخواست جمع کرائی۔
وزیر اعظم کی حاضری سے استثنیٰ کی درخواست پر مؤقف اپنایا گیا کہ وہ سرکاری مصروفیات کے باعث آج عدالت میں پیش نہیں ہوسکتے، عدالت وزیراعظم کی ایک روزہ حاضری معافی کی درخواست منظور کرے۔
اسی طرح حمزہ شہباز بھی عدالت میں پیش نہیں ہوئے، ان کے وکلا نے ان کی آج کی حاضری سے معافی کی درخواست دائر کی، درخواست اسپیشل کورٹ سینٹرل کے جج اعجاز اعوان کے روبرو دائر کی گئی۔
اس دوران شہباز شریف اور حمزہ شہباز کی بریت کی درخواست پر سماعت ہوئی، اسپیشل کورٹ سینٹرل کے جج اعجاز اعوان نے درخواست پر سماعت کی، وکیل امجد پرویز نے مؤقف اپنایا کہ عدالت میں تحریری دلائل بھی جمع کرا دیے ہیں، ایف آئی اے کے کسی بھی گواہ نے شہباز شریف یا حمزہ شہباز کانام نہیں لیا، تفتیشی افسر نے گواہان کے بیان توڑ مروڑ کر پیش کرنے کی کوشش کی۔
امجد پرویز نے کہا کہ ایف آئی اے نے بدنیتی کی بنیاد پر یہ کیس بنایا، شہباز شریف اور حمزہ شہباز کے اکاؤنٹ میں کوئی رقم نہیں آئی، قانون کے مطابق پراسکیوشن کو اپنا کیس ثابت کرنا ہے، رشوت کے الزام میں پراسکیوشن کوئی ثبوت پیش نہیں کر سکا، اپنے کیریئر میں ایسا کیس نہیں دیکھا جس میں پراسکیوشن بغیر ثبوت کے چل رہا ہے۔
ایف آئی اے کے وکیل فاروق باجوہ نے کہا کہ ملزم مسرور انور شہباز شریف کے اکاؤنٹ کو آپریٹ کرتا رہا ہے۔ امجد پرویز نے کہا کہ یہ بات حقائق کے برعکس ہے، مسرور نے کبھی شہباز شریف کا اکاؤنٹ آپریٹ نہیں کیا۔
فاروق باجوہ نے کہا کہ جتنے بھی بے نامی اکاؤنٹس ہیں انہیں رمضان شوگر مل کے ملازمین آپریٹ کرتے تھے، اس پر امجد پرویز کا کہنا تھا کہ اس کیس بھی جتنا بھی ریکارڈ ہے وہ گزشتہ دور حکومت میں مرتب کیا گیا۔
وکیل ایف آئی اے نے کہا کہ گلزار احمد کی وفات کے بعد بھی اس کا اکاؤنٹ آپریٹ ہوتا رہا، مسرور انور نے شہباز شریف اور گلزار احمد کے اکاؤنٹ سے ٹرانزیکشنز کیں، عدالت نے ایف آئی اے کے وکیل سے استفسار کیا کہ کیا آپ کے پاس اس بات کا کوئی ثبوت یا ریکارڈ ہے جس پر وکیل ایف آئی اے نے جواب دیا کہ ریکارڈ میں اس بات کا ثبوت نہیں ہے۔
فریقین کے دلائل سننے کے بعد اسپیشل سینٹرل کورٹ نے شہباز شریف اور حمزہ شہباز کی بریت کی درخواستوں پر فیصلہ محفوظ کر لیا جو بعد میں سنایا جائے گا۔

لاہور(ایمرا نیوز)چیئرمین پی ٹی آئی عمران خان نے پنجاب کی وزارت داخلہ کے لیے سابق گورنر پنجاب عمر سرفراز چیمہ کے نام کی منظوری دی ہے۔ذرائع کاکہنا ہےکہ عمر سرفراز چیمہ کو وزیراعلیٰ کا مشیر برائے داخلہ لگایا جائے گا۔
صوبائی وزیر داخلہ ہاشم ڈوگر کے مستعفی ہونے کے بعد پنجاب میں وزارت داخلہ کا منصب خالی تھا۔
سینئر صحافی کے مطابق عمران خان ہاشم ڈوگر سے خوش نہیں تھے اس لیےانہوں نے خود ہاشم ڈوگر سے استعفیٰ لیا تاہم ہاشم ڈوگر نے استعفے کی وجہ ذاتی وجوہات بتائی ہے۔

اسلام آباد(ایمرا نیوز)ایک سینئر صحافی کا کہنا ہے کہ سابق وزیراعظم عمران خان نے ہاشم ڈوگر سے استعفیٰ خود لیا ہے۔
صحافی نے ہاشم ڈوگر کے استعفیٰ سے متعلق بات کرتے ہوئے کہا کہ ہماری اطلا ع کے مطابق وزیرداخلہ پنجاب ہاشم ڈوگر سے عمران خان نے خود استعفیٰ لیا ہے۔
انہوں نے کہا کہ عمران خان وزیرداخلہ پنجاب ہاشم ڈوگر سے خوش نہیں تھے، ہاشم ڈوگر پر چارج شیٹ میں ایک الزام یہ بھی تھا کہ ان کا تعلق اسٹیبلشمنٹ کے سینئر افسر سے ہے اور یہ ان سے ابھی بھی ملتے ہیں، اس کے علاوہ یہ بھی الزام ہے کہ ہاشم ڈوگر نے پنجاب سے اسلام آباد لائے جانے والے کنٹینرز روکنے کے لیے کوئی کردار ادا نہیں کیا۔
دوسری جانب ہاشم ڈوگر نے ٹوئٹر پر جاری بیان میں استعفے سے متعلق چلنے والی خبروں کی تردید کردی۔ہاشم ڈوگر نے لکھا کہ عمران خان میرے لیڈر ہیں اور ہمیشہ رہیں گے، چیئرمین عمران خان نے کسی بات کا حکم نہیں دیا، میں نے ذاتی وجوہات پر استعفیٰ دیا ہے اور ہمیشہ خان کا وفادار رہوں گا۔
یاد رہے کہ گزشتہ روز وزیر داخلہ پنجاب ہاشم ڈوگر نے وزارت سے استعفیٰ دے دیا تھا، ہاشم ڈوگر نے ہاتھ سے لکھا ہوا اپنا استعفیٰ وزیراعلیٰ پنجاب چوہدری پرویز الٰہی کو پیش کیا جس میں انہوں نے مستعفی ہونے کی وجہ ذاتی وجوہات کو قرار دیا۔

راولپنڈی (ایمرا نیوز)عوامی مسلم لیگ کے سربراہ شیخ رشید احمد کا کہنا ہے کہ نیب ترمیم سے چوروں کو کھلی چھٹی اور انصاف کو سزائے موت ہوگئی ہے۔
لاہور میں میڈیا سے گفتگو کرتے ہوئے عوامی مسلم لیگ کے سربراہ شیخ رشید احمد کا کہنا تھا کہ قانون نواز شریف کو لائے گا یا مزید مجرموں کو بھگائے گا، اس کا انتظار کریں، ن لیگ کی خواہش کی تعیناتی نہ ہونے پر اس کی پارٹنر شپ ٹوٹ سکتی ہے۔
نیب ترمیم کے حوالے سے گفتگو کرتے ہوئے شیخ رشید کا کہنا تھا نیب ترمیم سے چوروں کو کھلی چھٹی اور انصاف کو سزائے موت ہوگئی ہے جبکہ موڈیز نے مزید 5 بینکوں کی رینکنگ کم کر دی ہے۔
سربراہ عوامی مسلم لیگ کا کہنا تھا کہ حالات خراب ہوئے تو سیاست اور سیاستدان نرغے میں آسکتے ہیں۔

آستانہ (ایمرانیوز)وزیراعظم شہباز شریف سیکا سربراہی اجلاس میں شرکت کے لیے قازقستان پہنچ گئے ہیں جہاں وہ علاقائی اور عالمی مسائل پر پاکستان کا نقطہ نظر اجاگر کریں گے۔
وزیراعظم شہباز شریف ایشیاء میں اعتماد سازی کے اقدامات پر ہونے والے سربراہی اجلاس میں شرکت کے لیے دو روزہ دورے پر قازقستان پہنچے ہیں، شہباز شریف کل آستانہ شہر میں سیکا کے چھٹے سربراہی اجلاس سے خطاب بھی کریں گے۔
وزیراعظم سیکا سربراہی اجلاس میں علاقائی اور عالمی مسائل پر پاکستان کا نقطہ نظر اجاگر کریں گے اور سیکا رکن ممالک کے رہنماؤں سے ملاقاتیں بھی کریں گے۔
وزیراعظم کا اس حوالے سے جاری بیان میں کہنا ہے کہ موسمیاتی تبدیلیوں سے نقصانات نے مربوط کوشش کی اہمیت کو بڑھا دیا ہے، دنیا کو توانائی اور خوراک کی قیمتوں میں اضافے کی وجہ سے کساد بازاری کا سامنا ہے، علاقائی اورعالمی مسائل پرپاکستان کانقطہ نظر بھی اجاگر کریں گے۔
خیال رہے کہ سیکا 1992 میں قائم کیا گیا بین الحکومتی ادارہ ہے جس میں ایشیا کے 27 ممالک شامل ہیں، سیکا ایشیا میں امن، سلامتی اور سماجی و اقتصادی ترقی کو فروغ دینے پر توجہ رکھتا ہے اور پاکستان سیکا کے بانی ارکان میں سے ایک ہے۔

اسلا م آباد(ایمر ا نیوز)چیئرمین پی ٹی آئی عمران خان نے اسلام آباد ہائیکورٹ میں پیشی کے موقع پر صحافیوں سے غیر رسمی گفتگو کی۔
اسلام آباد ہائیکورٹ کے چیف جسٹس نے ممنوعہ فنڈنگ کیس میں حفاظتی ضمانت کی درخواست دائر کرنے کے بعد عمران خان کو عدالت طلب کیا۔
عدالت آمد پر صحافی نے عمران خان سے سوال کیا کہ اگر ضمانت نہ ملی تو کیا ہوگا؟ اس پر سابق وزیرعظم نے جواب دیا ’جیل‘، میں نے جیل کی تیاری بھی کررکھی ہے۔
عمران خان نے کہا کہ انٹیلی جنس ایجنسیاں سرویلنس رکھتی ہیں، ٹیلی فون ٹیپ ہوتے ہیں مگر اس کو ریلیز کیا جارہا ہےجو نیشنل سکیورٹی کا مسئلہ ہے، ایجنسیوں کا یہ کام نہیں کہ فون ٹیپ کرکےاسے ریلیز کیا جائے، ایجنسیوں کا کام پروٹیکٹ کرنا ہوتا ہے۔
صدر مملکت سے متعلق عمران خان نے کہا کہ عارف علوی نے اپنے بیان کی وضاحت کردی ہے۔

دادو(ایمرانیوز)نوبل انعام یافتہ ملالہ یوسف زئی سیلاب زدہ علاقوں کا دورہ کرنے دادو پہنچ گئیں جس میں انہیں دادو سمیت اطراف کے علاقوں کا دورہ کروایا جائے گا۔
وزیراعلیٰ سندھ کے ترجمان عبدالرشید چنا نے بتایا کہ ملالہ یوسف زئی اس وقت ضلع دادو کے سیلاب سے متاثرہ علاقے جوہی کے دورے پر ہیں جہاں انہوں نے جوہی کے سیلاب زدہ علاقے چھنڈن میں ٹینٹ سٹی کا معائنہ کیا۔انہوں نے اس موقع پر سیلاب متاثرین سے ملاقات کی اور ان کے ساتھ گھل مل گئیں۔
سیلاب متاثرہ خواتین نے ملالہ کو کیمپ میں خوش آمدید کیا، ملالہ نے کیمپ میں خواتین سے ان کے مسائل سنے اور انہیں حوصلہ دیا، انہوں نے متاثرہ خواتین کو حوصلہ دیتے ہوئے کہا کہ آپ اس مشکل وقت کا بہادری سے مقابلہ کر رہی ہیں، آپ بہادر خواتین ہیں۔
دوسری جانب وزیر تعلیم سید سردار شاہ نے ملالہ یوسف زئی کو بریفنگ دیتے ہوئے کہا کہ اب بھی بہت سارے علاقوں میں پانی موجود ہے، پانی کی نکاسی کے بعد مزید سروے کرکے اسکولوں کے نقصانات کا تعین کیا جائے گا۔
انہوں نے بتایا کہ12000 اسکولوں میں 20 لاکھ بچوں کی تعلیم متاثر ہوئی ہے جس پر ملالہ یوسف زئی نے تشویش کا اظہار کیا۔

راولپنڈی (ایمرا نیوز)پاک فوج میں 12 میجر جنرلز کو لیفٹیننٹ جنرل کے عہدے پر ترقی دے دی گئی ہے جسے آئندہ ماہ کے اختتام پر کمانڈ کی تبدیلی سے قبل اعلیٰ قیادت میں بڑے پیمانے پر ردوبدل کے مرحلے کا حصہ سمجھا جا رہا ہے۔
رپورٹ کے مطابق پاک فوج کے شعبہ تعلقات عامہ (آئی ایس پی آر) سے جاری بیان میں بتایا گیا کہ ترقی پانے والے جنرلز میں میجر جنرل انعام حیدر ملک، میجر جنرل فیاض حسین شاہ، میجر جنرل نعمان زکریا، میجر جنرل محمد ظفر اقبال، میجر جنرل ایمن بلال صفدر، میجر جنرل احسن گلریز، میجر جنرل سید عامر رضا، میجر جنرل سید عامر رضا، میجر جنرل شاہد امتیاز، میجر جنرل محمد منیر افسر، میجر جنرل بابر افتخار، میجر جنرل یوسف جمال اور میجر جنرل کاشف نذیر شامل ہیں۔
ایک ہی وقت میں لیفٹیننٹ جنرل کے عہدے پر اتنی بڑی تعداد میں ترقیاں خال ہی دیکھنے کو ملتی ہیں، فوج میں ترقیاں تقریباً ایک برس سے التوا کا شکار تھیں جوکہ عام طور پر خالی اسامیوں کی بنیاد پر کی جاتی ہیں۔
ترقی پانے والے 12 نئے جنرلز اکتوبر 2021 کے وسط میں 3 لیفٹیننٹ جنرلز کی ریٹائرمنٹ کی وجہ سے خالی ہونے والی اسامیوں پر کام کریں گے، ایک سال قبل ریٹائر ہونے والوں میں سابق آئی جی آرمز لیفٹیننٹ جنرل ماجد احسان، سابق کیو ایم جی لیفٹیننٹ جنرل عامر عباسی اور آرمی ایئر ڈیفنس کمانڈ کے سابق کمانڈر لیفٹیننٹ جنرل حمود الزمان خان شامل ہیں۔
سابق انجینئر ان چیف لیفٹیننٹ جنرل معظم اعجاز جولائی میں ریٹائر ہو گئے تھے جبکہ چند ہفتے قبل ریٹائر ہونے والے 5 جنرلز میں سابق لاہور کور کمانڈر لیفٹیننٹ جنرل عبدالعزیز، سابق ڈی جی اسٹریٹجک پلانز ڈویژن لیفٹیننٹ جنرل ندیم ذکی منج، سابق منگلا کور کمانڈر لیفٹیننٹ جنرل شاہین مظہر محمود، سابق آئی جی ٹریننگ اینڈ ایویلیوایشن لیفٹیننٹ جنرل سید محمد عدنان اور سابق ڈی جی جوائنٹ اسٹاف ہیڈ کوارٹر لیفٹیننٹ جنرل وسیم اشرف شامل ہیں۔
دسویں اسامی 2 اگست کو سیلاب متاثرین کے لیے امدادی کارروائیوں کے دوران ہیلی کاپٹر حادثے میں سابق کور کمانڈر بلوچستان لیفٹیننٹ جنرل سرفراز علی کی شہادت کے بعد خالی ہوئی تھی۔
چیئرمین جوائنٹ چیفس آف اسٹاف کمیٹی جنرل ندیم رضا اور چیف آف آرمی اسٹاف جنرل قمر جاوید باجوہ کی ریٹائرمنٹ کے باعث خالی ہونے والی فور اسٹار اسامیوں کو پُر کرنے کے لیے 2 لیفٹیننٹ جنرلز کی ترقی کے پیش نظر مزید 2 جنرلز کو ترقی دی گئی ہے۔
فوج میں اس سطح پر ترقیوں کا اختیار صرف چیف آف آرمی اسٹاف کے پاس ہے لیکن روایتی طور پر سربراہان یہ فیصلے لیتے وقت دیگر سینئر جرنیلوں سے غیر رسمی مشاورت کرتے ہیں۔

ان تازہ ترین ترقیوں کو جنرل قمر جاوید باجوہ کی جانب سے اپنی ریٹائرمنٹ سے قبل لیے جانے والے نتیجہ خیز فیصلوں میں سے ایک کے طور پر دیکھا جا رہا ہے کیونکہ ترقی پانے والے 12 افسران نئے آرمی چیف کی ٹیم کا اہم حصہ ہوں گے۔
اب سب کی نظریں ان ترقی پانے والے افسران کی پوسٹنگ پر ہوں گی جو کہ جلد ہی جی ایچ کیو کی جانب سے کردی جائیں گی جبکہ اس وقت کئی اہم عہدے خالی بھی پڑے ہیں۔
جنرل قمر جاوید باجوہ کو 2016 میں اپنے تقرر کے فوراً بعد 7 میجر جنرلز کو ترقی دینے کا موقع ملا جس سے انہیں اپنی ٹیم بنانے میں مدد ملی، اس وقت 2 افسران کو فور اسٹار رینک پر ترقی دینے اور 4 دیگر افسران کے اپنے عہدے سے مستعفی ہونے کی وجہ سے یہ 7 عہدے خالی ہوگئے تھے۔
حال ہی میں ترقی پانے والے افسران میں سے چند ایک جنرل قمر جاوید باجوہ کے ساتھ کام کر چکے ہیں، ان افسران میں وائس چیف آف جنرل اسٹاف اے جنرل نعمان ذکریا، ڈی جی آئی ایس پی آر جنرل بابر افتخار اور ڈی جی پرسپیکٹیو پلاننگ سیل جنرل ایمن بلال صفدر شامل ہیں۔
جنرل انعام حیدر ملک ڈائریکٹر جنرل ورکس اور چیف انجینئر رہے، جنرل فیاض حسین شاہ ڈی جی ڈاکٹرائن اینڈ ایویلیوایشن ٹریننگ اینڈ ایویلیوایشن برانچ رہے، جنرل احسن گلریز ٹریننگ اینڈ ایویلیوایشن برانچ میں ڈی جی ملٹری ٹریننگ رہے، جنرل محمد ظفر اقبال آرمی ایئر ڈیفنس کمانڈ میں آفیشیٹنگ کمانڈر رہے، جنرل سید عامر رضا ایچ آئی ٹی کے چیئرمین رہے، جنرل شاہد امتیاز اسکول آف انفنٹری اینڈ ٹیکٹکس کوئٹہ کے کمانڈنٹ رہے، جنرل منیر افسر آئی جی فرنٹیئر کور (ساؤتھ) خیبر پختونخوا رہے، جنرل یوسف جمال ڈی جی نیشنل لاجسٹکس سیل رہے جبکہ جنرل کاشف نذیر کا تعلق کور آف انجینئرز سے ہے اور وہ گزشتہ سال آئی ایس آئی میں ایک اہم عہدے پر فائز رہے۔
اس دوران تقریباً 20 میجر جنرلز کو برطرف بھی کیا گیا لیکن اس حوالے سے ایک دو کے سوا کوئی بڑا سرپرائز نہیں تھا۔

لاہور ( ایمرا نیوز ) وزیر داخلہ ہاشم ڈوگر کے بعد پنجاب کے ایک اور وزیر مستعفی ہوگئے، وزیر معدنیات لطیف نذر نے استعفیٰ قیادت کوبھجوا دیا۔
تفصیلات کے مطابق پنجاب کے وزیر معدنیا ت جنہوں نے چند روز قبل مستعفی ہونے کا فیصلہ کیا تھا اب وہ باضابطہ مستعفی ہوگئے، لطیف نذر نے اس بات کی تصدیق کی ہے کہ انہوں نے وزرت سے استعفیٰ دیدیا ہے۔۔
خیال رہے کہ لطیف نذر فیصل آباد کے ضمنی الیکشن کے عمل میں حصہ لینے کے لئے مستعفی ہوئے، لطیف نذر کا استعفیٰ بدھ کو منظور ہونے کا امکان ہے، وہ وزیر کی حیثیت سے ضمنی الیکشن کی سرگرمیوں میں حصہ نہیں لے سکتے۔
استعفے کی وجہ صرف فیصل آباد کے ضمنی الیکشن میں حصہ لینے کے لئے الیکشن کمیشن کی پابندیوں سے بچنا ہے۔

اسلام آباد(ایمرا نیوز)ممنوعہ فنڈنگ کیس میں عدالت کے طلب کرنے پر عمران خان اسلام آباد ہائیکورٹ پہنچ گئےوفاقی تحقیقاتی ادارے (ایف آئی اے) نے چیئرمین پی ٹی آئی عمران خان کے خلاف ممنوعہ فنڈنگ کا مقدمہ درج کیا ہے جس کے بعد سابق وزیراعظم نے گرفتاری سے بچنے کے لیے عدالت سے رجوع کیا۔
عمران خان نے حفاظتی ضمانت کے لیے اسلام آبادہائیکورٹ میں درخواست دائر کی جس میں مؤقف اختیار کیا گیا ہےکہ ایف آئی اے نے فارن ایکسچینج ایکٹ کے تحت مقدمہ درج کررکھا ہے، عدالت حفاظتی ضمانت منظورکرے تاکہ متعلقہ عدالت میں پیش ہوسکیں۔
چیف جسٹس اسلام آباد ہائیکورٹ جسٹس اطہر من اللہ نے عمران خان ی درخواست پر سماعت کی جس دوران پی ٹی آئی چیئرمین کے وکیل نے کہا کہ عمران خان کی گرفتاری کا خدشہ ہے۔
جسٹس اطہر نے سوال کیا کہ آپ کے خیال میں ممنوعہ فنڈنگ کیس کون سی عدالت جانا چاہیے ؟ اس پر وکیل نے کہا کہ کیس اسپیشل جج سینٹرل کی عدالت جانا چاہیے۔
عدالت نے پوچھا کہ عمران خان کہاں ہیں؟ پیش کیوں نہیں ہوئے؟ وکیل نے کہا کہ عدالت حکم کرے تو عمران خان فوری عدالت پیش ہوجائیں گے، بنی گالہ میں پولیس نے ان کے گھر کا محاصرہ کیا ہوا ہے، غیرمعمولی صورتحال کےباعث درخواست گزار پیش نہیں ہوئے۔
جسٹس اطہر نے کہا کہ درخواست گزار تین بجے تک اس عدالت میں پیش ہوجائیں ، اس پر ان کے وکیل نے مؤقف اپنایا کہ تین بجے دیر ہو جائے گی ابھی آدھے گھنٹے میں آجاتے ہیں۔
اسلام آباد ہائیکورٹ نے حکم دیا کہ عدالت میں پیش ہونے تک عمران خان کو گرفتار نہ کیا جائے جب کہ عدالت نے انتظامیہ کو سابق وزیراعظم کو ہراساں کرنے سے بھی روک دیا۔
عمران خان پر الزام کیا ہے؟ایف آئی آر میں ابراج گروپ کے اکاؤنٹ سے 21لاکھ ڈالر کی رقم کی منتقلی کا ذکر ہے اور مقدمے میں سردار اظہر طارق، طارق شفیع اور یونس عامر کیانی بھی نامزد ہیں۔
ایف آئی آر کے متن کے مطابق ابراج گروپ نے تحریک انصاف کے اکاؤنٹ میں پیسے بھیجے، یہ پیسے ایک بینک کی جناح ایونیو برانچ میں بھیجے گئے۔
ایف آئی آر کے متن میں کہا گیا ہے کہ تحریک انصاف نے عارف نقوی کا بیان حلفی الیکشن کمیشن میں جمع کرایا تاہم عارف نقوی کا الیکشن کمیشن میں جمع کرایا گیابیان حلفی جھوٹا اورجعلی ہے۔
ایف آئی آر کے متن کے مطابق تحریک انصاف کا نجی بینک میں اکاؤنٹ تھا جو نیا پاکستان کے نام پر بنایا گیا، نجی بینک کا منیجر بھی مقدمہ میں نامزد کیا گیا ہے، بینک منیجر نےغیر قانونی بینک اکاؤنٹ آپریٹ کرنے کی اجازت دی۔

مقدمہ ایف آئی اے بینکنگ سرکل تھانے میں درج کیا گیا اور مقدمہ ایف آئی اے کے کارپوریٹ بینکنگ سرکل نے درج کیا۔
ایف آئی آر میں کہا گیا ہے کہ ملزمان نے فارن ایکسچینج ایکٹ کی خلاف ورزی کی، ملزمان نجی بینک اکاؤنٹ کے بینفشری ہیں۔
تحریک انصاف کے سیف اللہ نیازی بھی ایف آئی آر میں نامزد ہیں۔