Category پاکستان

کراچی: پولیس نے دفعہ ایک سو چوالیس کے باوجود سمندر جانے پر مزید تین افراد کو گرفتار کرلیا، جس کے گرفتار افراد کی مجموعی تعداد 20 ہوگئی ہے۔

تفصیلات کے مطابق کراچی میں شہریوں کو ساحل پر جانا مہنگا پڑگیا، ساحل پر دفعہ ایک سوچوالیس کی خلاف ورزی پرمزید 3 افراد کو گرفتار کرلیا گیا۔

ایس ایس پی ساؤتھ اسد رضا نے بتایا کہ گزشتہ روز سی ویو کے اطراف سے 17 افراد کو گرفتار کیا تھا، زیرحراست افراد پابندی کے باوجود سمندر پر جانے کی کوشش کررہے تھے۔

ایس ایس پی ساؤتھ کا کہنا تھا کہ گرفتار افراد کے خلاف 3 مقدمات درج کیے گئے تھے۔

کراچی میں ساحل کے قریب رہائش پذیر افراد کو اپنے گھر خالی کرنے کی ہدایت جاری کردی گئی۔

ڈی ایچ اے انتظامیہ کا کہنا ہے کہ سمندری طوفان کے باعث ساحل پر تیاریاں جاری ہیں اور انتظامیہ نے شہریوں کی حفاظت کی خاطر یہ فیصلہ کیا۔

انتظامیہ کا کہنا ہے کہ ساحل کے نزدیک سی ویو اپارٹمنٹ اور درخشاں ولاز سے نقل مکانی کی جائے جبکہ چھوٹا بخاری، چھوٹا شہباز، نشاط اور اطراف کے علاقوں کے رہائشی بھی گھروں کو خالی کریں۔

دوسری جانب سمندری طوفان بپرجوائے کے پیشِ نظر کراچی میں ممکنہ حالات کے حوالے سے اقدامات کرتے ہوئے سیکیورٹی ڈویژن کا اربن فلڈنگ ریسکیو یونٹ ایس ایس یو ہیڈ کوارٹرز میں قائم کردیا گیا۔

ترجمان ایس ایس یو کے مطابق شہر میں ممکنہ بارشوں اور ہنگامی حالات پر اربن فلڈنگ ریسکیو یونٹ ہمہ وقت تیار رہے گا۔

ترجمان کا کہنا ہے کہ اربن فلڈنگ ریسکیو یونٹ بارش میں پھنسے شہریوں اور ہنگامی حالات سے نمٹنے کی صلاحیت رکھتا ہے، یہ یونٹ خصوصی تربیت یافتہ ایس ایس یو کمانڈوز پر مشتمل ہے۔

پشاور: 9 مئی کے بعد سے روپوش سابق گورنر شاہ فرمان کے گھر پر چھاپا مارا  گیا جس میں 2 گاڑیاں برآمد کی گئیں۔ 

پشاور  میں سابق گورنر شاہ فرمان کے گھر پرپولیس اور محکمہ ایکسائیز نے مشترکہ چھاپا مارا۔ 

حکام کے مطابق چھاپے کے وقت سابق گورنر خیبرپختونخوا گھرپر موجود نہیں تھے، وہ  9 مئی کے واقعات کے بعد سے روپوش ہیں۔

محکمہ ایکسائز کے حکام کے مطابق چھاپے کے دوران ملنے والی دونوں گاڑیوں کا لیبارٹری ٹیسٹ کیا جائے گا۔ 

خیال رہے کہ سانحہ 9 مئی کے بعد سے منظر سے غائب شاہ فرمان کے لیے پولیس چھاپے ماررہی ہے۔

ان کے علاوہ پی ٹی آئی کے رہنما مراد سعید، میاں اسلم اقبال، حماد اظہر اور دیگر بھی روپوش ہیں جن کی گرفتاری کے لیے کوششیں جاری ہیں۔

اسلام آباد: وفاقی وزیر موسمیاتی تبدیلی شیری رحمان کا کہنا ہے کہ طوفان پاکستان کے ساحلی علاقوں سے ضرور ٹکرائے گا، عوام طوفان کی صورتحال کومعمولی نہ سمجھیں۔

تفصیلات کے مطابق وفاقی وزیر موسمیاتی تبدیلی شیری رحمان نے پریس کانفرنس کرتے ہوئے کہا کہ سمندری طوفان کو کافی دنوں سے مانیٹر کر رہے ہیں، این ڈی ایم اے صوبائی اداروں کے ساتھ کام کر رہا ہے، طوفان غیر متوقع طور پر رفتار اور راستہ بدل سکتے ہیں۔

شیری رحمان کا کہنا تھا کہ طوفان اب تھوڑا بہت پاکستان کی طرف رخ کر چکا ہے، بلوچستان کی طرف طوفان کی شدت کم سندھ میں خطرات زیادہ ہیں اور سندھ میں متعلقہ ادارے ہائی الرٹ ہیں۔

وفاقی وزیر موسمیاتی تبدیلی نے بتایا کہ طوفان پاکستان کے ساحلی علاقوں سے ضرور ٹکرائے گا، تمام اداروں سے رابطے میں ہیں، اب طوفان نارتھ کی طرف جارہا ہے۔

ان کا کہنا تھا کہ طوفان کے حوالے سے بدین اور ٹھٹھہ ہائی رسک ایریاز ہیں، 14 سے 16 جون تک مزید علاقے تیز بارشوں اور ہواؤں کی زد میں ہوں گے۔

شیری رحمان نے بتایا کہ طوفان کے اثرات دوسرے علاقوں میں پہنچیں گے، کراچی کو لوگ سی ویو خالی کرنا چاہیں تو ضرور کریں،ٓ سولر پینل، چھتیں، کمزور مکان ہواؤں اور بارشوں کی زد میں آسکتے ہیں۔

وفاقی وزیر نے کہا کہ کراچی میں بھی ہنگامی حالات ہیں، عوام طوفان کی صورتحال کومعمولی نہ سمجھیں، ماہی گیر طوفان کی وارننگ کو سنجیدگی سے لیں۔

ان کا کہنا تھا کہ سمندری طوفان آئندہ چند دنوں میں پاکستان پہنچ جائے گا، طوفان بھارت سے پاکستان کی طرف رخ کر چکا ہے، سمندری طوفان بلوچستان کی طرف رخ کر رہا ہے، جس کے باعث تیز ہواؤں اور بارشیں برسنے کا سبب بنے گا۔

شیری رحمان نے مزید کہا کہ سجاول آدھااورکیٹی بندرکو تقریباًخالی کرالیاگیا ہے، کئی علاقوں سےلوگوں کازبردستی انخلاکرایاجارہا ہے،جان ہے تو جہان ہے۔

وزیر موسمیاتی تبدیلی نے کہا کہ آج شام وزیر اعظم کو سائیکلون سے متعلق بریفنگ دیں گے، سندھ سیلاب سے سب سے زیادہ متاثر ہوا تھا، کوشش ہوگی کہ لوگوں کو ریلیف کیمپ سے گھروں تک لے جائیں، ہم چاہتے ہیں فلڈ ریلیف کا تخمینہ الگ کیا جائے.

اسلام آباد : مسلم لیگ کے سینئر رہنما شاہد خاقان عباسی کا کہنا ہے کہ نیب کا ادارہ ملک میں رہے گا تو ملک نہیں چلے گا، حکومت اس ادارے کو ختم کرے۔

تفصیلات کے مطابق مسلم لیگ کے سینئر رہنما اور سابق وزیراعظم شاہد خاقان عباسی نے نیب عدالت میں پیشی کے موقع پر میڈیا سے گفتگو کرتے ہوئے کہا کہ 4 سال سے عدالت آرہا ہوں،ابھی تک کیس چلا نہیں ، میرے خلاف الزام لگایا تھا کیس توچلائیں۔

شاہد خاقان عباسی کا کہنا تھا کہ نیب کو چیلنج کرتا ہوں ،اگر گواہ نہیں ہے، جھوٹے کیس بنائے ہیں تو شرمندگی کااظہار کرے ،معافی مانگے۔

ن لیگی رہنما نے کہا کہ حکومت کو کہتا ہوں نیب ادارہ ختم کرے، نیب جیسے ادارہ ہوگا توملک ترقی نہیں کرے گا،اس ادارے کو ختم کریں۔

گذشتہ روز سابق وزیراعظم شاہد خاقان عباسی کا کہنا تھا کہ وفاق اس وقت کنگال ہے، صوبے سمجھتے ہیں وفاق ہمارے حقوق ہڑپ کر رہا ہے لیکن جس کے پاس خود وسائل نہیں وہ دوسروں کو کیا دے گا، جس ملک کے اخراجات کا پچپن فیصد سود میں چلا جائے تو بتائیں پیچھے کیا رہ جاتا ہے۔

وزیراعظم شہباز شریف 14 سے 15 جون تک آذربائیجان کا دورہ کریں گے۔

ترجمان دفتر خارجہ کے مطابق آذربایجان کے صدر کی دعوت پر وزیر اعظم آذربائیجان کا دو روزہ سرکاری دورہ کریں گے۔ آذربائیجان کے ساتھ تعاون کے ترجیحی شعبوں کی نمائندگی کرنے والے وزراء وزیر اعظم کے وفد کا حصہ ہوں گے۔

وزیر اعظم صدر الہام علیوف سے تجارت، سرمایہ کاری اور توانائی سمیت تعاون کے اہم شعبوں پر وسیع مذاکرات کریں گے کثیرالجہتی فورمز میں باہمی تشویش اور تعاون کے علاقائی اور عالمی امور پر بھی تبادلہ خیال کیا جائے گا۔

ترجمان کا کہنا ہے کہ پاکستان اور آذربائیجان کے تعلقات عقیدے، ثقافت اور تاریخ کی مشترکات سے جڑے ہوئے ہیں

ملکی ایوی ایشن اور پاکستان سے چین (ارومچی) جانے والوں کیلئے اچھی خبر آگئی۔

تفصیلات کے مطابق چائناسدرن ائیرلائن نے لاہور سے ارومچی کیلئےدوبارہ پروازوں کا آغاز کر دیا۔ اس حوالے سے لاہور ایئرپورٹ پر تقریب کا انعقاد کیا گیا جس میں چین کےقونصل جنرل ژاؤ شیرین کی شرکت کی۔

تقریب میں سی اواو، ایئرپورٹ منیجر، سی ایس او اور ایئرلائن /جی ایچ اے کے نمائندے بھی شریک تھے۔ چینی قونصل جنرل نےفلائٹ آپریشن بحالی پرایئرپورٹ انتظامیہ و دیگر ایجنسیوں کاشکریہ اداکیا۔چینی قونصل جنرل نے ایئرلائن اور مسافروں کیلئے لاہور ارومچی روٹ کی اہمیت پر روشنی ڈالی۔ چائناسدرن ایئرلائنز نے 2020 میں کورونا کے باعث اپنا آپریشن معطل کر دیا تھا۔

اسلام آباد: عالمی مالیاتی فنڈ (آئی ایم ایف) نے آئندہ مالی سال کے بجٹ پر عدم اطمینان کا اظہار اور پیٹرولیم مصنوعات پر لیوی بڑھانے کا مطالبہ کر دیا۔

وزارت خزانہ کے حکام نے سینیٹ کی قائمہ کمیٹی برائے خزانہ کو بریفنگ دیتے ہوئے بتایا کہ آئی ایم ایف نے پٹرولیم مصنوعات پر لیوی بڑھانے کا مطالبہ کرتے ہوئے 50 روپے فی لیٹر لیوی کو ناکافی قرار دے دیا۔

وزارت خزانہ کے حکام نے بتایا کہ مالیاتی فنڈ نے پٹرولیم لیوی 50 روپے فی لیٹر سے بڑھانے کا مطالبہ کیا ہے، آئی ایم ایف نے 9 جائزہ مکمل کرنے کیلیے لیوی بڑھانے کی شرط عائد کی ہے، پٹرولیم مصنوعات پر لیوی نہ بڑھانے پر آئی ایم ایف تاحال مطمئن نہیں۔

پاکستان اور آئی ایم ایف کے درمیان مذاکرات کے معاملے پر وزارت خزانہ کے حکام نے بتایا کہ آئی ایم ایف نے آئندہ مالی سال کے بجٹ پر عدم اطمینان کا اظہار کیا، مالیاتی فنڈ نے ایف بی آر ٹیکس ہدف پر تحفظات کا اظہار کیا ہے۔

’آئی ایم ایف نے ایف بی آر ٹیکس وصولی کی کوششیں ناکافی قرار دیں۔ اس نے ٹیکس نیٹ میں اضافے کے اقدامات بھی ناکافی قرار دیے ہیں۔ آئی ایم ایف نے پاکستان کو ٹیکس وصولیاں بڑھانے کے اقدامات کرنے کا کہا ہے۔‘

حکام نے کمیٹی کو بتایا کہ آئندہ مالی سال کے بجٹ میں ایف بی آر کا ٹیکس ہدف 9200 ارب مقرر کیا گیا ہے، آئی ایم ایف نے 869 ارب کی لیوی جمع کرانے کیلیے لیوی کا ریٹ بڑھانے کا مطالبہ کیا۔

بحیرہ عرب میں اٹھنے والے سمندری طوفان اور اس سے بچنے کے ممکنہ اقدامات کے تحت متوقع خطرے کے پیش نظر پی آئی اے کی جانب سےحفاظتی انتظامات مکمل کر لیے گئے۔

ایئرپورٹس، ہوائی گزرگاہوں پر طوفان کے اثرات کل صبح 3 بجے نمودار ہونا شروع ہوں گے۔ تیزہواؤں، گرد و غبار کی وجہ سے پروازوں کا رخ متبادل ایئرپورٹس کی جانب موڑ دیا جائے گا۔

کراچی اور سکھر کی پروازوں کیلئے خراب موسم پر لاہور یا ملتان کو متبادل کےطور پر استعمال کیا جائےگا۔ تیزہواؤں اور جھکڑ کے باعث آج کراچی سکھر کراچی پرواز منسوخ کردی گئیں جب کہ کل کی پرواز کافیصلہ موسم کی مناسبت سےلیاجائےگا۔

ترجمان کا کہنا ہے کہ پی آئی اے نے ممکنہ صورتحال کے پیش نظر ایمرجنسی ریسپانس سنٹر کو فعال کر دیا ہے۔
سمندری طوفان سے متعلق کراچی ایئرپورٹ پر حتیاطی تدابیر پر مبنی الرٹ جاری کر دیا۔الرٹ ڈپٹی ڈائریکٹرایئر سائیڈ نے جاری کیا۔

الرٹ میں کہا گیا ہے کہ 13 سے 17 جون تک سمندری طوفان سے موسلادھار بارش، گرد و غبارکےطوفان کا خدشہ ہے پارک کیے گئے ہلکے وزن کےطیارےکی محفوظ جگہ پر پارکنگ کویقینی بنایا جائے۔

کراچی: امریکی جیل میں قید ڈاکٹر عافیہ صدیقی سے ملاقات کے بعد ان کی بہن ڈاکٹر فوزیہ صدیقی واپس کراچی پہنچ گئیں۔کراچی ایئرپورٹ پر میڈیا سے گفتگو کرتے ہوئے ڈاکٹرفوزیہ نے بتایا کہ عافیہ صدیقی کے ساتھ دوسری ملاقات جولائی میں ہے، بہن سے پہلے بھی ملاقات ہو سکتی تھی لیکن اس حکومت نے کرائی، وزیر اعظم شہباز شریف اور وزیر خارجہ بلا ول بھٹو نے مدد کی۔ڈاکٹر فوزیہ صدیقی کا کہنا تھا کہ تصور بھی نہیں کر سکتی تھی کہ عافیہ صدیقی اتنے برے حال میں ہے، اگر کوشش کریں تو عافیہ کی واپسی بہت آسان ہے۔انہوں نے کہا کہ عافیہ صدیقی کے ساتھ ملاقات میں ایک بڑا ہاتھ اسلام آباد ہائیکورٹ کا بھی تھا، فوزیہ نے ایک بار پھر دہرایا کہ عافیہ کی رہائی کی کنجی اسلام آباد میں ہے۔