Category Pin post

کراچی : پاکستانی معروف فنکار جوڑی سارہ خان اور فلک شبیر نے بیٹی سے انوکھی محبت کا اظہار کرتے ہوے کہا ہے کہ عالیانہ کو اسکول بھی نہیں بھیجنا چاہتے ۔شوبز انڈسٹری کی اس خوبصورت جوڑی نے نجی ٹی وی کے شو میں بطور مہمان شرکت کی۔ سارا خان نے دلچسپ گفتگو کے دوران بتایا کہ اْن کا بچپن سے خواب تھا کہ اْن کی شادی گلوکار سے ہو۔اس دوران سارا خان نے اپنی بیٹی عالیانہ سے حسد کا اظہار کرتے ہوئے کہا کہ پہلے فلک شبیر گھر آ کر مجھے گلے لگاتے تھے اب عالیانہ کو گلے لگاتے ہیں۔عالیانہ سے متعلق بات کرتے ہوئے اس جوڑی کا کہنا تھا کہ ہم تو چاہتے ہی نہیں کہ عالیانہ اسکول جائے، ہم اپنی بیٹی کو دیر سے اسکول بھیجیں گے، اْس کی گھر پر تعلیم و تربیت چل رہی ہے۔سارا خان کا کہنا تھا کہ ہمیں اسکولنگ سسٹم پر اتنا یقین
نہیں ہے، گھر پر عالیانہ کے لیے اتنا اچھا پلے روم ا بنایا ہوا ہے کہ محلّے کے بچے آکر بھی اْس میں کھلتے ہیں

جڑانوالہ :ماہ رمضان میں شہریوں کیلئے دالوں کا حصول بھی مشکل ہوگیا، قیمتوں میں کئی گنا اضافے سے خریدار وں کی پریشانیاں بڑھ گئیں۔رمضان المبارک میں مہنگائی کا جن بے قابو ہے، دالیں بھی عوام کی دسترس سے باہر ہوگئیں۔چنے کی دال میں 20 روپے اضافہ ہوگیا، 260 روپے کلو فروخت ہونے لگی، 270 روپے کلو والا چاول بھی 70 روپے اضافے سے 340 روپے پر پہنچ گیا جبکہ فی کلو لوبیا 380 روپے کلو میں دستیاب ہے۔شہری جو چکن اور گوشت کی قیمتوں سے پہلے ہی پریشان تھے اب دالوں کی قیمتیں بڑھنے سے مزید مشکلات کا شکار ہوگئے ہیں۔ انتظامیہ کارروائیوں کے باوجود گراں فروشوں اور ذخیرہ اندوزوں کو نکیل ڈالنے میں ناکام ہے، رمضان میں عوام کو ریلیف دینے کیلئے اس بار سستے بازار بھی قائم نہیں ہوسکی

اسلام آباد:وفاقی وزیر اطلاعات مریم اورنگزیب نے کہا ہے کہ پنجاب الیکشن کے حوالے سے امیدواروں کے کاغذات نامزدگی واپس نہیں لیے گئے، انتخابات میں ڈٹ کر مقابلہ ہوگا۔اپنے ایک بیان میں وفاقی وزیر اطلاعات نے کہا کہ حکومتی اتحاد میں شامل جماعتوں کی جانب سے پنجاب اسمبلی کے انتخابات کے لیے جمع کرائے جانے والے کاغذات نامزدگی واپس لینے کی اطلاعات جھوٹ اور پروپیگنڈا ہے۔مریم اورنگزیب کے مطابق پارٹی قیادت نے ایسا کوئی فیصلہ نہیں کیا۔ یہ اطلاعات من گھڑت اور محض قیاس آرائیاں ہیں۔ حکومت میں شامل تمام جماعتیں ایک ہی دن ملک بھر میں الیکشن کی حامی ہیں۔ میڈیا سے گزارش ہے کہ ایسی خبر نشر کرنے سے پہلے ترجمان سے تصدیق کرلے۔انہوں نے کہا کہ فارن ایجنٹ ، فتنے فساد، آئین شکن ،گھڑی چور کا ڈٹ کر مقابلہ کریں گے

لاہور:پاکستان تحریک انصاف کے رہنما اسد عمر نے کہا ہے کہ پارلیمان کی اقلیت نے کل ایک غیر آئینی قرار داد پاس کی، پورا ملک جلد الیکشن کی طرف جائے گا، ملک میں آئین کی حکمرانی برقرار رہے گی۔لاہور کی انسداد دہشت گردی عدالت کے باہر میڈیا سے گفتگو کرتے ہوئے سابق وفاقی وزیر اسد عمر نے کہا کہ سپریم کو فیصلہ بالکل واضح ہے،قومی اسمبلی اجلاس میں سب نے آئین کے منافی تقاریر کیں، پارلیمان کی اقلیت نے فیصلہ کیا، اسمبلی میںجو قرار داد پاس ہوئی اس کی جگہ ردی کی ٹوکری میں ہے، 342 کے ہاؤس کے اندر 42 لوگوں کے دستخط ہیں۔ان کا کہنا تھا کہ پہلے یہ عمران خان سے ڈرتے تھے، اب قوم سے ڈر رہے ہیں، پورا ملک جلد الیکشن کی طرف جائے گا، ملک میں آئین کی حکمرانی برقرار رہے گی۔پی ٹی آئی رہنما نے مزید کہا کہ فیصلے عوام نے کرنے ہیں اور یہ حق عوام سے کوئی نہیں چھین سکتا، یہ لوگ کہتے ہیں کہ ہم فیصلہ قبول نہیں کرتے، آج ملک میں مہنگائی کی شرح 45 فیصد ہے۔

ممبئی : بھارت کی معروف ڈانسر اور ماڈل ملائیکہ اروڑا نے پہلی بار اداکار ارجن کپور کے ساتھ شادی اور مستقبل کی منصوبہ بندی سے متعلق کھل کر بات کی۔ ملائیکہ اروڑا اور کرن ارجن کے درمیان عمر میں 12 سال کا فرق ہونے کے باوجود زبردست ہم آہنگی ہے اور دونوں 2016 سے ایک ساتھ دیکھے جا رہے ہیں تاہم شادی سے متعلق دونوں نے کہا تھا کہ ابھی کچھ وقت لگے گا۔لیکن اب ایک انٹرویو میں ملائیکہ اروڑا نے اس تاثر کو غلط قرار دیا کہ وہ دوسری شادی سے متعلق فیصلہ کرتے ہوئے گھبرا رہی ہیں یا خوف زدہ ہیں۔معروف ڈانسر نے مزید کہا کہ میں ارجن کے ساتھ گھر بنانا اور اپنے تعلقات کو اگلے درجے تک لے جانا پسند کروں گی جس کے لیے اب ہم دونوں تیار ہیں۔ملائیکہ نے کہا کہ دراصل وہ زیادہ منصوبہ بندی نہیں کرتیں۔ اس لیے شادی کی تاریخ کسی بھی وقت آسکتی ہے۔ میں ابھی بتاکر سرپرائز کے لطف کو ختم کرنا نہیں چاہتی۔یہ پہلی بار ہے جب ملائیکہ یا ارجن کپور نے شادی سے متعلق کوئی بات کی ہے ورنہ دونوں نے ہمیشہ ہی موقف اپنایا ہے کہ ابھی وہ ساتھ گھومتے پھرتے ہیں اور انجوائے کرتے ہیں باقی باتیں بعد کی ہیں۔فلم انڈسٹری میں آنے سے قبل ارجن کپور کے سلمان خان کی بہن ارپیتا خان کے ساتھ تعلقات تھے۔ شوبز میں انٹری کے بعد وہ سوناکشی سنہا کے قریب آگئے تاہم یہ تعلق بھی جلد ٹوٹ گیا اور اب 2016 سے وہ ملائیکہ اروڑا کے ساتھ ہیں۔

اسلام آباد:وزیراعظم میاں محمد شہباز شریف سے اراکین اسمبلی اورمتحدہ قومی موومنٹ وفد کی ملاقات ،ملک کی مجموعی سیاسی صورتحال ،مردم شماری ، متعلقہ حلقوں کے امور سے متعلق بات چیت کی گئی ۔رکن قومی اسمبلی چوہدری نثار چیمہ نے ملاقات کے دوران اپنے حلقے کے امور سے متعلق وزیراعظم کو آگاہ کیا وزیراعظم نے حلقے کے تمام مسائل حل کرنے کی یقین دہانی کرائی ملاقات میں ملک کی موجودہ سیاسی صورتحال پر بھی بات چیت کی ۔ مزید برآں وزیراعظم سے متحدہ قومی موومنٹ کے ایک وفد نے بھی ملاقات کی جس میں ملک میں جاری مردم شماری سے متعلق بات چیت کے علاوہ ملک میں سیاسی و معاشی صورتحال پر گفتگو کی گئی متحدہ قومی موومنٹ وفد نے وزیراعظم کو مردم شماری اور اپنے متعلقہ حلقوں سے متعلق مسائل سے وزیراعظم کو آگاہ کیا اور مردم شماری میں شفافیت لانے کا مطالبہ کیا جسے وزیراعظم نے فوری حل کرنے کی یقین دہانی کرائی ۔ متحدہ وفد میں وفاقی وزیر انفارمیشن ٹیکنالوجی و ٹیلی کام امین الحق , سابق رکن قومی اسمبلی فاروق ستار موجود تھے جبکہ وفاقی وزیر اقتصادی امور سردار ایاز صادق بھی موجود تھے.۔ دریں اثناء اراکین قوی اسمبلی علی گوہر بلوچ، معین وٹو اور آغا رفیع اللہ نے بھی وزیراعظم سے الگ الگ ملاقات کی اور اپنے علاقے کے مسائل سے آگاہ کیا ملاقاتوں میں ملک کی موجودہ صورتحال پر بھی گفتگو کی گئی

اسلام آباد :پاکستان پیپلزپارٹی کی رہنما و وفاقی وزیر شازیہ مری نے کہا ہے کہ پیپلز پار ٹی آئین دینے والی جماعت ہے اور ملک میں جمہوریت کی بنیاد رکھی اور جانیں قربان کی ہیں چار اپریل پاکستان کو وہ تاریخی دن ہے جس دن قائد جمہوریت زوالفقار علی بھٹو کو شہید کیا گیا بے شک جسمانی طور پر ہم سے الگ کیا گیا لیکن ان کی روح ہمارے ساتھ ہے اور مطالبہ کرتی ہے کہ جو ریفرنس 2011 میں سپریم کورٹ بیجھا گیا اس کا کیا بنا عدلیہ میں تقسیم پاکستان کیلئے خطرناک ہے کوئی جمہوریت پسند اس تقسیم سے خوش نہیں پیپلز پارٹی نے جمہوریت کی حفاظت کیلئے قربانیاں دی ہیں کبھی معین قریشی کبھی عمران خان کو لایا جاتا ہے ان خیالات کا انہوں نے قومی اسمبلی کے اجلاس میں کیا انہوں نے کہا کہ ملک میں جو حالات اور بالخصوص ایک ایشو ہے اس پر ایوان میں بات کرنا ضروری ہے مسجد الاقصی فلسطین میں اسرائیل کی جانب سے کی جانے والی بربریت کی سخت الفاظ میں مذمت کرتے ہیں انڈیا میں مسلم کش واقعات میں اضافہ ہوتا جا رہاہے ایوان کے توسط سے آواز کو بلند کرے اور بھارت تک اپنے جذبات پہنچائے مودی ہوش کے ناخن لے اور مسلم کش اقدامات ترک کرے پاکستان کے اندر جب جب آئینی اختیار سے باہر جا کر آئینی کا کھلواڑ کرتے ہیں ایسے میں ملک غیر مستحکم ہوتا ہے اس وقت پاکستان کو معاشی اور سیاسی استحکام کی ضرورت ہے جب جب پاکستان میں جمہوریت کو پٹری پر لیا گیا اس پارلیمان کے خلاف سازش کے گئی بے شک عدلیہ کے اند کئی مشکلات ہیں ، تقسیم موجود ہے پاکستان کے لیے ٹھیک نہیں کوئی جمہوریت پسند شخص اس طرح کی تقسیم دیکھ کر خوش نہیں ہوتا پیپلز پار ٹی آئین دینے والی جماعت ہے اور ملک میں جمہوریت کی بنیاد رکھی اور جانیں قربان کی ہیں ہمارے قبرستان گواہی دیتے ہیں اور داستانیں بیان کرتے ہیں کہ جانیں کیوں دی گئی منچورین امیدوار عمران خان نیازی کو لایا گیا ، گملے میں ایک سیاست دان لگایا گیا اور اسے لانے کے لئے دہاندلی کے تمام ریکارڈ توڑے گئے پارلیمان سے اختیارات چھیننے کی کوشش کی جا رہی ہے اور گھٹیا حرکتیں کی جا رہی ہیں چار اپریل پاکستان کو وہ تاریخی دن ہے جس دن قائد جمہوریت زوالفقار علی بھٹو کو شہید کیا گیا بے شک جسمانی طور پر ہم سے الگ کیا گیا لیکن ان کی روح ہمارے ساتھ ہے اور مطالبہ کرتی ہے کہ جو ریفرنس 2011 میں دائیر کیا گیا اس کا کیا بنا آصف علی زرداری نے 2011 میں عدلیہ کو صدارتی ریفرینس بھیجا آج بارہ سال گزر گئے لیکن انصاف نہیں ملا جب ہم بات کرتے ہیں تو سیاسی کہا جاتا ہے لیکن اسی عدالت کے احاطے میں ایک پار ٹی کے ترانے بجتے ہیں خواہشات کے مطابق عدالتوں میں جلسے منعقد کئے جا رہے ہیں ہم اداروں کا احترام کرتے ہیں :ہم لارڈ شپ کا احترام کرتے ہیں ، پارلیمنٹیرین کو کردار ادا کرنا ہوگا ہر ادارے کی عزت ہوتی ہے ، پارلیمنٹ سپریم ہے آئین کا آرٹیکل 176 سپریم کورٹ اور چیف جسٹس کے متعلق بتاتا ہے کیا ہم جمہوریت میں اظہار آزادی رائے کا حق نہیں رکھتے انہوں نے کہا کہ اس وقت پاکستان غیر یقینی کا متحمل نہیں ہوسکتا اس وقت ملک کو سیاسی، سیکورٹی اور معاشی استحکام کی ضرورت ہے مختلف اوقات میں جمہوریت کے ساتھ کھلواڑ کیا جارہا ہے عدلیہ میں تقسیم پاکستان کیلئے خطرناک ہے کوئی جمہوریت پسند اس تقسیم سے خوش نہیں پیپلز پارٹی نے جمہوریت کی حفاظت کیلئے قربانیاں دی ہیں کبھی معین قریشی کبھی عمران خان کو لایا جاتا ہے جب گملے میں سیاستدان اگایا گیا دھاندلی کے تمام ریکارڈز توڑے گئے باپ پارٹی کے رہنما خالد مگسی نے کہا کہ مسجد اقصیٰ میں مسلمانوں پر ہونے والے حملے کی شدید الفاظ میں مذمت کرتا ہوں،ستر سال سے ہماری عادت بن گئی ہے کہ کبھی نظریہ ضرورت پر اور کبھی نظریہ محبت میں فیصلے ہو رہے ہیں آئین بنانے والے کو اس ملک میں پھانسی لگا دی گئی جب کے اس کیس میں پھانسی نہیں ہو سکتی تھی اب فیصلے دو اور تین اور چار تین سے فیصلے آ رہے ہیں سیاسی انتقام لیئے جارہے ہیں، ہمیں بجٹ سے پہلے عمران خان سے ملاقات کی تو پھر ہمیں کہا گیا وزیراعظم کا کھانا نہیں کھائیں گے تو ہم نے کہا کہ ہمیں کہیں اور کھانے پر جانا تھا لیکن جب میں چلے گئے تو راستے میں مجھے فون آیا کہ آپ نے کسی کے کھانے پر نہیں جانا یہ صورت حال تھی عمران خان 22 سال کی محنت سے آتا تو اپنے پاؤں پر آتا ،اس ملک کو انسانوں کے لئے بنایا ہے سب کیلئے آئین آور قانون برابر ہونا چاہیے انہوں نے کہا کہ اگر سپریم کورٹ نے فیصلہ ہی دینا تھا فل کورٹ بینچ ہی دے دیتا اس فیصلے سے سب کو تسلی ہوجاتی،ملک کو کسی طرف لیکر جایا جا رہا ہے ہمیشہ پنجاب کیلئے رویہ الگ رہا ہے بے نظیر بھٹو کے قتل کے بعد بھی الیکشن ہو گئے تھے پہلی مرتبہ اس ایوان کو موقع ملا ہے کہ اس سے ایسا فیصلہ جانا چاہیے ہمیں گھبرانا نہیں چاہئے یہ سپریم ادارہ ہے اس کے لیے کوئی بھی قربانی دینا پڑے اس ایوان کی قدر ہونی چاہیے کیونکہ یہ قانون سازی کرتا ہے باقی سب ادارے اس کے بنائے ہوئے قانون پر عمل کرتے ہیں۔۔۔

لاہور: فلم دی لیجنڈ آف مولا جٹ کی بے پناہ کامیابی کے بعد اداکارہ حمائمہ ملک اب اپنے نئے ڈرامہ سیریل ’’جندو‘‘ میں نظر آئیں گی۔گرین انٹرٹینمٹ کی جانب سے نیا ڈراما سیریل جندو کا ٹریلر جاری کردیا گیا ہے جس میں حمائمہ ملک ’’جندو‘‘ کا مرکزی کردار ادا کررہی ہیں، بظاہر اس ڈرامے کے کرداروں نے پنجابی زبان کا انتخاب کیا ہے۔جندو کی شوٹنگ پاکستان کے دیہاتی علاقوں اور صحراؤں میں کی گئی ہے جہاں ایک عورت قبائلی پدرانہ نظام اور ناانصافی کے خلاف بغاوت کرنے کا فیصلہ کرتی ہے۔ٹریلر کا آغاز حمائمہ ملک کے ڈائیلاگ سے ہوتا ہے جہاں وہ کہتی ہیں کہ ’ظلم سہنے والوں کو مظلوم کہنا سب سے بڑا گناہ ہے ، سب سے بڑے ظالم تو یہی ہیں جو ظلم دیکھ کر آواز نہ اٹھائیں ۔ڈرامے کی دیگر کاسٹ میں گوہر رشید، سمیعہ ممتاز، نذر الحسن، ہاجرہ یامین، فراز علی اور نعیمہ بٹ بھی شامل ہیں ۔

اسلام آباد:پنجاب میں عام انتخابات التوا کیس میں سپریم کورٹ نے الیکشن کمیشن کا فیصلہ کالعدم قرار دیتے ہوئے 14 مئی کو پنجاب میں الیکشن کرانے کا حکم دیدیا ،سپریم کورٹ نے اپنے فیصلے میں قرار دیا کہ آئین الیکشن کمیشن کو 90 دن سے آگے جانے کی اجازت نہیں دیتا، الیکشن کمیشن نے 22 مارچ کو غیر قانونی حکم جاری کیا۔ عدالت نے الیکشن کمیشن کا 30 اپریل کو پنجاب میں انتخابات کا شیڈول ترمیم کے ساتھ بحال کردیا۔سپریم کورٹ نے حکومت کو 10 اپریل تک فنڈز مہیا کرنے کا حکم دیتے ہوئے کہا ہے کہ پنجاب کی نگراں حکومت، چیف سیکرٹری اور آئی جی 10 اپریل تک الیکشن کی سکیورٹی کا مکمل پلان پیش کریں۔ وفاقی حکومت کو 21 ارب جاری کرنے کا حکم دیا ہے۔اگر وفاقی اور نگراں حکومت نے الیکشن کمیشن کی معاونت نہ کی تو کمیشن سپریم کورٹ کو آگاہ کرے۔سپریم کورٹ نے اپنے فیصلے میں الیکشن شیڈول دے دیا، جس کے مطابق کاغذات نامزدگی 10 اپریل تک جمع کیے جائیں گے۔ اپیل کرنے کی آخری تاریخ 17 اپریل ہوگی اور اپیلوں پر نظرثانی 18 اپریل تک ہوگی۔ امیدواروں کی حتمی فہرست 19 اپریل کو جاری کی جائے گی۔ امیدواروں کو الیکشن نشانات 20 اپریل کو جاری کیے جائیں گے۔عدالتی حکم میں کہا گیا ہے کہ 11 اپریل کو الیکشن کمیشن فنڈز وصولی کی رپورٹ عدالت میں جمع کرائے۔ الیکشن کمیشن کی رپورٹ بینچ ممبران کے چیمبر میں دی جائے گی۔ فنڈز جاری نہ ہوئے تو عدالت رپورٹ کی روشنی میں مناسب حکم جاری کرے گی۔ حکومت پنجاب آئینی ذمہ داریاں نبھانے میں مکمل تعاون کرے گی۔پہلے مرحلے میں پنجاب میں الیکشن کے لیے فنڈز فراہم کیے جائیں۔ نگراں حکومت، آئی جی، چیف سیکرٹری پنجاب سکیورٹی فراہمی یقینی بنائیں۔ وفاقی حکومت الیکشن کے انعقاد کے لیے ہرممکن سہولیات فراہم کرے۔ پنجاب میں اضافی سکیورٹی کے لیے اقدامات کیے جائیں۔ انتخابات کا منصفانہ اور شفاف انعقاد یقینی بنایا جائے،عدالت عظمی نے اپنے شارٹ آرڈر میں واضح کیا کہ یکم مارچ کو حکم پر تین دو کے تناسب سے عمل درآمد ہو چکا ہے۔ اور یہی حکم درست ہے اس فیصلہ میں دو ججز کو اختلافی نوٹس اقلیتی ہونے کے سبب اثر انداز نہیں ہو گا۔ شارٹ آرڈر میں جسٹس قاضی فائز عیسیٰ پر مشتمل دو رکنی بنچ کے از خود نوٹسز کیسز کی سماعتوں کو رولز کی تیاری تک روکنے کے جاری فیصلہ کی کوئی قانونی حیثیت نہیں۔ خیبر پختونخوا کی حد تک جنرل الیکشن کیلئے درخواست گزاروں کو متعلقہ فورم سے رجوع کرنے کی ہدائیت جاری کی گئی ہیں۔تفصیلی فیصلہ بعد میں سنایا جائے گا۔قبل ازیں انتخابات التوا کیس کے سلسلے میں وزارت دفاع نے سربمہر رپورٹ سپریم کورٹ میں جمع کرائی۔اٹارنی جنرل اور وزارت دفاع کے حکام کی جانب سے سکیورٹی اہل کاروں کی دستیابی سے متعلق سربمہر رپورٹ چیف جسٹس کو پیش کی گئی۔چیف جسٹس آف پاکستان عمر عطا بندیال، جسٹس منیب اختر اور جسٹس اعجاز الاحسن نے چیمبر میں رپورٹ کا جائزہ لیا۔

کراچی :ڈپریشن کا کوئی وجود ہی نہیں ہے، یہ اللّٰہ تعالیٰ سے دوری کا نام ہے ، اداکارہ ریشم بیان دیکر تنقید کی زد آگئیں ۔ ریشم نے حال ہی میں ذہنی کیفیت ڈپریشن سے متعلق بات کرتے ہوے ڈپریشن کے وجود سے ہی انکار کر دیا ۔ ریشم سوشل میڈیا پر کافی متحرک ہیں اور اکثر و بیشتر وہ اپنے اکاؤنٹ پر کھانا پکاتے ہوئے ویڈیوز اپلوڈ کر رہی ہوتی ہیں، اِن ویڈیوز میں ریشم کو خود اپنے ہاتھوں سے غریب عوام میں تقسیم کرنے کے لیے کھانا بناتے ہوئے دیکھا جا سکتا ہے۔ریشم ملنے ملانے اور مل بیٹھ کر کھانے کی دلدادہ نظر آ تی ہیں اسی لیے وہ آئے دن شوبز انڈسٹری کی شخصیات کے ساتھ بھی دعوتوں کی تصویریں اپلوڈ کرتی رہتی ہیں۔ ڈپریشن کے بارے میں ریشم کا بیان سوشل میڈیا کے پیجز پر کافی وائرل ہوا جسے کچھ انٹرنیٹ صارفین کی جانب سے پسند تو کسی کی جانب سے تنقید کا نشانہ بنایا گیا۔تنقید کرتے ہوئے صارفین کا کہنا تھا کہ ڈپریشن ایک واضح کیفیت ہے، یہ لوگوں کو کافی متاثر کرتا ہے اسے جھٹلایا نہیں جا سکتا۔بعد ازاں ریشم نے ایک اسی بیان سے متعلق انسٹا پر ایک پوسٹ بھی شیئر کی جس میں اْن کا کہنا تھا کہ ’ہر انسان کی اپنی سوچ ہوتی ہے اور میرے نزدیک ہر مسئلے کا حل اللّٰہ سے محبت اور اللہ سے لگاؤ میں ہے، پھر چاہے وہ ڈپریشن ہو یا کوئی اور مسئلہ، شاید کچھ لوگوں کو میری بات سمجھ نہیں آئی، گہری باتیں ہر ایک کو سمجھ آتی بھی نہیں، تنقید کرنے والوں کو میں یہ کہنا چاہتی ہوں کہ اپنی انرجی کسی مثبت چیز کے لیے سنبھال کر رکھیں، اللّٰہ آپ سب کو خوش رکھے آمین‘۔