Category Pin post

اسلام آباد: سابق وزیراعظم عمران خان کی اسلام آباد ہائی کورٹ پیشی کے موقع پر سخت ترین سیکیورٹی انتظامات کئے گئے پولیس، ایف سی اور رینجرز کی بھاری نفری اسلام آباد ہائی کورٹ کے اطراف میں تعینات کی گئی ہائی کورٹ کی طرف جانے والے تمام راستے خاردار تاریں لگائی گئی سری نگر ایکسپریس وے سے جی ٹین کی طرف جانے والی سڑک اور سروس روڈ بھاری بلاک لگا کر گاڑیوں کا داخلہ بند کر دیا گیا سائلین بھی رْل گئے ہائی کورٹ میں داخلے کے لیے خصوصی پاسز جاری کئے گئے دن بھر سائلین اور سیکیورٹی اہلکاروں کے درمیان توں تکرار ہوتی رہی ہے۔

اسلام آباد:سوڈان سے انخلا کے بعد 149 پاکستانیوں کا پہلا قافلہ بحفاظت کراچی پہنچ گیا۔ جمعہ کو دفتر خارجہ سے جاری بیان کے مطابق سوڈان سے 149 پاکستانی بحفاظت کراچی پہنچ گئے ہیں۔ بیان میں کہا گیا ہے کہ سوڈان سے ہر پاکستانی کا محفوظ انخلا اور انہیں بحفاظت گھر پہنچانا ہماری اولین ترجیح ہے۔دوسری جانب وزیراعظم محمد شہبازشریف نے سوڈان سے پاکستانیوں کے بحفاظت انخلا کی کوششوں کو سراہتے ہوئے ہدایت کی ہے کہ تمام پاکستانیوں کی بحفاظت واپسی تک بھرپور جذبے سے کام جاری رکھا جائے ۔ وزیراعظم نے پاکستانیوں کی سوڈان سے بحفاظت وطن واپسی پر اظہار تشکر کیا اور پاکستانیوں کی واپسی کے آپریشن میں شریک آئی ایس آئی سمیت تمام فورسز کو خراج تحسین بھی پیش کیا۔ وزیراعظم نے 847 پاکستانیوں کے بحفاظت سوڈان کی بندرگاہ پہنچنے پر اطمینان کااظہار کیا اور 107 پاکستانیوں کے جدہ پہنچنے پر اظہار تشکر کیا۔وزیراعظم نے جدہ میں سرکاری رہائش اور پاکستانیوں کو واپس لانے کے لئے پاک فضائیہ کے انتظامات کی بھی تعریف کی۔ وزیراعظم نے وزیرخارجہ بلاول بھٹو، وزیرمملکت خارجہ حنا ربانی کھر اور سیکرٹری وزارت خارجہ کو خراج تحسین پیش کیا ۔وزیراعظم نے سوڈان میں پاکستانی سفیر، میر بہروز ریگی، ہیڈآف چانسری محمد سعید، ڈیفنس اتاشی کرنل محمد ہارون، کمرشل اتاشی عطااللہ کی بھی خراج تحسین کیا۔ وزیراعظم نے سوڈان میں پاکستانی سفارت خانے کے عملے محمد بلال شفیق اور راشد خان کو بھی خصوصی شاباش دی۔ وزیراعظم نے ٹیم کو ہدایت کی کہ سوڈان سے تمام پاکستانیوں کی بحفاظت واپسی تک بھرپور جذبے سے کام جاری رکھیں۔

راولپنڈی:ضلع خیبر کے علاقے تیرہ میں شہید ہونے والے سپاہی باسط اور وقاص کی نمازجنازہ ادا، شہداء پورے فوجی اعزاز کیساتھ آبائی علاقوں میں سپرد خاک کر دیا گیا۔آئی ایس پی آر کے مطابق سکیورٹی فورسز اور دہشت گردوں کے درمیان ضلع خیبر کے علاقے تیرہ میں فائرنگ کے تبادلے کے دوران جام شہادت نوش کرنے والے پشاور کے 24 سالہ سپاہی باسط علی شہید اور چارسدہ کے 26 سالہ سپاہی وقاص علی شاہ شہید کی نماز جنازہ ادا کردی گئی، شہداء کو ان کے اپنے آبائی علاقوں میں پورے فوجی اعزاز کے ساتھ سپرد خاک کر دیا گیا، نماز جنازہ میں حاضر سروس اور ریٹائرڈ فوجی و سول افسران، عزیز و اقارب اور تمام شعبہ ہائے زندگی سے تعلق رکھنے والے افراد نے بڑی تعداد میں شرکت کی، ترجمان کے مطابق مسلح افواج مادر وطن کے چپے چپے سے دہشت گردی کی لعنت کے خاتمے کے لئے پرعزم ہیں، جوانوں کی یہ قربانیاں دہشت گردی کی لعنت کو ختم کرنے کے ہمارے عزم کو مضبوط کرتی ہیں۔

اسلام آباد:وزیراعظم محمد شہباز شریف اور چینی وزیراعظم نے دونوں ممالک کے درمیان تمام شعبوں میں تعاون بڑھانے پر اتفاق کیا ہے تاکہ علاقائی امن، خوشحالی اور استحکام میں اپنا کردار ادا کرنے کے ساتھ ساتھ اپنے ممالک کے لوگوں کو فائدہ پہنچانے کے مشترکہ مقاصد کو حاصل کیا جا سکے۔جمعرات کو وزیراعظم آفس کی جانب سے جاری بیان کے مطابق وزیر اعظم محمد شہباز شریف اور چین کے وزیر اعظم لی چھیانگ کے درمیا ن ٹیلی فون پر بات چیت ہوئی ،یہ گفتگو روایتی گرمجوشی اور ہم آہنگی پرمبنی تھی جس میں پاک چین سدا بہار سٹریٹجک کوآپریٹو پارٹنرشپ کو اجاگرکیا گیا۔شہباز شریف نے چینی وزیر اعظم کواس عہدے کیلئے ان کے حالیہ انتخاب پر مبارکباد دی جو چینی قوم کے گہرے اعتماد اور عوامی خدمت میں ان کی بہت سی کامیابیوں سے پیدا ہونے والے ان پر اعتماد کی عکاسی کرتا ہے۔سدا بہارشراکت دار اور قریبی دوستوں کی حیثیت سیپاکستان نے چین کی پرامن ترقی کو بین الاقوامی امن اور استحکام کے مثبت عنصر کے طور پر سراہا اور اس بات پر یقین ظاہر کیا کہ چین ترقی اور بحالی کی جانب اپنے سفر میں اہم سنگ میل حاصل کرتا رہے گا۔وزیر اعظم نے چین کے بنیادی مسائل بشمول ون چائنا پالیسی، تائیوان، تبت، سنکیانگ، ہانگ کانگ اور بحیرہ جنوبی چین پر پاکستان کی بھرپورحمایت کا اعادہ کیا۔ انہوں نے جموں و کشمیر کے تنازع پر چین کے اصولی موقف اور بنیادی مسائل پر پاکستان کی حمایت پر چین کا تہہ دل سے شکریہ ادا کیا۔ چینی وزیر اعظم نے چین کے لیے پاکستان کی حمایت کو سراہا اور پاکستان کی قومی ترقی، خودمختاری اور علاقائی سالمیت کے لیے چین کی حمایت جاری رکھنے کا اعادہ کیا۔انہوں نے کہا کہ سدا بہار دوست کی حیثیت سے چین پاکستان کے ساتھ ہر وقت کھڑا رہے گا۔نومبر 2022 میں وزیر اعظم کے دورہ چین اور صدر شی جن پنگ اور چینی قیادت کے ساتھ وسیع گفتگو کو یاد کرتے ہوئے، دونوں رہنماں نے سی پیک سمیت اہم شعبوں میں دو طرفہ تعاون کا جائزہ لیا۔ انہوں نے تمام شعبوں میں اپنے تعاون کو بڑھانے پر اتفاق کیا تاکہ علاقائی امن، خوشحالی اور استحکام میں اپنا کردار ادا کرنے کے ساتھ ساتھ اپنے ممالک کے لوگوں کو فائدہ پہنچانے کے مشترکہ مقاصد کو حاصل کیا جا سکے۔

جڑانوالہ :پنجاب اسمبلی کے عام انتخابات کے لئے فیصل آباد میں تحریک انصاف کی ٹکٹوں کی تقسیم پر پارٹی میں گروپ بندیاں۔ پارٹی ٹکٹ نہ ملنے پر کھلاڑی ناراض‘ تحریک انصاف کے پارٹی ٹکٹوں کی تقسیم کے حوالے سے بہت بڑا اپ سیٹ دیکھنے میں آ رہا ہے۔پارٹی ٹکٹوں کی تقسیم کے حوالے سے عمران خان کے انتہائی قریبی تصور کئے جانے والے اور پی ٹی آئی کے اہم عہدیدار کو یکسر طور پر نظر انداز کر دیا گیا،کپتان سے نظر ثانی کرنے کا مطالبہ‘ کپتان نے بھی اپنے کھلاڑیوں کے تحفظات دور کرنے کے لئے اپنی سربراہی میں ریویو کمیٹی قائم کر دی۔جس میں نظرثانی کی درخواست دائر کرنے والے امیدواروں کو فردا- فرداسنا جائے گا اور ان کے تحفظات دور کئے جائیں گے۔پی ٹی آئی کے اندرونی ذرائع کے مطابق فیصل آباد میں دو سے تین امیدواروں کے پارٹی ٹکٹ تبدیل کئے جا سکتے ہیں۔ تاہم حتمی طور پر فیصلہ عمران خان ہی کریں گے۔فیصل آباد میں تحریک انصاف کے پارٹی ٹکٹوں کی تقسیم کے حوالے سے بہت بڑا اپ سیٹ دیکھنے میں آ رہا ہے۔پارٹی ٹکٹوں کی تقسیم کے حوالے سے عمران خان کے انتہائی قریبی تصور کئے جانے والے اور پی ٹی آئی کے اہم عہدیدار کو یکسر طور پر نظر انداز کر دیا گیا مذکورہ عہدیدار کے حقیقی بھائی کو بھی پارٹی ٹکٹ نہیں دیا گیا۔ جبکہ اس کے ایم این اے کے حلقہ میں شامل 3صوبائی حلقوں کے امیدواروں کو پارٹی ٹکٹ بھی ان کی رضامندی کے برعکس جاری کئے گئے ہیں۔قبل ازیں مذکورہ عہدیدار نے بہت سارے عوامی مقامات اور پارٹی کی میٹنگز میں دعویٰ کیا تھا کہ فیصل آباد میں ان کی مرضی کے مطابق ہی پارٹی ٹکٹ جاری ہوں گے مگر حالات اس کے برعکس نکلے۔جس پر مذکورہ عہدیدار انتہائی بددل ہو گیا اور وہ پارٹی کا عہدہ چھوڑنے پر غور کر رہا ہے چند دنوں تک صورتحال واضح ہو جائے گی۔ واضح رہے کہ عیدالفطر سے دوروز قبل 20 اپریل کو پاکستان تحریک انصاف کے چیئرمین عمران خان نے فیصل آباد کے 21صوبائی حلقوں سمیت پنجاب بھر کے 297حلقوں میں پارٹی امیدواروں کو ٹکٹس جاری کر دیئے تھے۔ دیگر اضلاع کی طرح فیصل آباد میں بھی تحریک انصاف کے ٹکٹ کے کئی امیدوار منہ دیکھتے رہ گئے جبکہ متعدد سابق وزیر‘مشیر اور ارکان اسمبلی کو ٹکٹ نہیں دیئے گئے تھے ان میں سے بعض نے تو اپنے لیڈر کا فیصلہ من و عن قبول کر لیا مگر بہت ساروں نے اس پر احتجاج کیا۔جس کے پیش نظر عمران خان نے ان پارٹی رہنمائوں کے تحفظات دور کرنے کے ریویو کمیٹی قائم کر دی جو آج اور کل ان متاثرہ امیدواروں کو فردا فردا سنے گی اور ان کے تحفظات دور کرے گی۔اس حوالے سے معلوم ہوا ہے کہ فیصل آباد شہر کے دو سے تین ٹکٹ تبدیل کئے جا سکتے ہیں ان میں پی پی 112‘ پی پی 113اور پی پی 115کے نام لئے جا رہے ہیں۔

راولپنڈی:پاکستان تحریک انصاف نے راولپنڈی کے 15صوبائی حلقوں میں سے3حلقوں پر امیدواروں کی تبدیلی کا بگل بجا دیا۔الیکشن کمیشن کی جانب سے انتخابی نشانات کی الاٹمنٹ کے موقع پر پہلے سے اعلان کردہ تین امیدواروں سے پارٹی ٹکٹ واپس لے لئے گئے نامزد امیدواروں کی تبدیلی کے بعدکرنل شبیر اعوان،خاتون امیدوار طیبہ ابراہیم اور موجودہ ایم پی اے چوہدر ی عدنان کو انتخابی عمل سے آؤٹ کر کے بالترتیب طارق محمود مرتضیٰ،کرنل (ر)اجمل اورسابق ایم پی اے عارف عباسی کو نیاامیدوار نامزد کر دیا گیا ۔یہ تبدیلی پنجاب اسمبلی کے حلقہ پی پی7راولپنڈی ii(کہوٹہ،کلر سیداں)،حلقہ پی پی10راولپنڈی v(چکری، چک بیلی،روات چونترہ)اور حلقہ پی پی 11راولپنڈی vi(چکلالہ کنٹونمنٹ بورڈ)میں کی گئی ہے اس بات کا فیصلہ 4رکنی ریویو کمیٹی کی مشاورت سے کیا گیا قبل ازیں پی پی7کا ٹکٹ کرنل شبیر اعوان کو دیا گیا تھا جو اب تبدیل کر کے آر ڈی اے کے سابق چیئر مین طارق محمود مرتضیٰ کو دیا گیاہے، پی پی10کا ٹکٹ ایف بی آر کے اعلیٰ افسر چوہدری ابراہیم گجر کی اہلیہ طیبہ ابراہیم کو دیا گیا تھا جو اب کرنل (ر)اجمل کو جاری کر دیا گیا ہے اسی طرح پی پی11کا ٹکٹ موجودہ ایم پی اے عدنان چوہدری سے واپس لے کر سابق ایم پی اے و سابق چیئرمین آر ڈی اے عارف عباسی کو دے دیا گیا ہے نامزدگیوں میں تبدیلی کے بعدانتخابی نشانات کی الاٹمنٹ تبدیل شدہ امیدواروں کو کر دی گئی ہے یاد رہے کہ نو نامزد تینوں امیدواروں کو نظر انداز کر کے دوسرے امیدواروں کو ٹکٹ جاری کئے گئے تھے 2002کے عام انتخابات میں طارق محمود مرتضیٰ نے صوبائی حلقہ پی پی2سے سینئر مسلم لیگی رہنما راجہ ظفرالحق کے صاحبزادے راجہ محمد علی کے مقابلے میں انتخابات میں حصہ لیا تھاقبل ازیں 2008کے انتخابات میں کرنل شبیر بھی ایم پی اے منتخب ہو چکے ہیں 2013کے عام انتخابات میں کرنل اجمل نے قومی اسمبلی کے حلقہ این اے52میں سابق وزیر داخلہ چوہدری نثارکے مقابلے میں انتخابات میں حصہ لیا تھا اور 70ہزار ووٹ حاصل کئے تھے جبکہ 2018کے عام انتخابات قومی اسمبلی کے حلقہ این اے59سے کرنل اجمل کو نظر انداز کر کے یہ ٹکٹ سرور خان کو دے دیا گیا تھا اس طرح 2013کے انتخابات میں حلقہ پی پی11سے ایم پی اے منتخب ہونے والے عارف عباسی کو ہٹا کر شیخ رشید اور عامر کیانی کی ایما پر 2018میں یہ ٹکٹ عدنان چوہدری کو دے دیا گیا تھاتاہم اب یہ ٹکٹ موجودہ ایم پی اے عدنان چوہدری سے واپس لے کر دوبارہ عارف عباسی کو دے دیا گیا ادھر پارٹی ٹکٹ میں تبدیلی کے فیصلے کو تحریک انصاف کے حلقوں میں خوش آئند قرار دیا جارہا ہے تحریک انصاف کے کارکنوں کے مطابق مذکورہ تینوں امیدوار تحریک انصاف کے دیرینہ کارکن اور کارکن دوست ہیں جن کی کامیابی سے نہ صرف راولپنڈی میں تحریک انصاف کو مزید تقویت ملے گی بلکہ سیاسی مخالفین کو انتخابی میدان میں کلین سویپ کرنے میں اس ضمن میں پی پی10کے سابق امیدوار امیدوار عدنان چوہدری نے پارٹی ٹکٹ اور امیدواروں کی تبدیلی سے لاعلمی کا اظہار کرتے ہوئے بتایا کہ انہیں فی الوقت کسی تبدیلی سے آگاہ نہیں کیا گیا تاہم انہوں نے بتایا کہ ان کے خلاف لینڈ مافیا پہلے سے سرگرم تھا جس نے پہلے سے واضح کر رکھا تھا کہ عدنان چوہدری کو انتخابی ٹکٹ نہیں لینے دیا جائے گا جبکہ ان کی جگہ نامزدنئے امیدواروں کا موقف ہے کہ چونکہ یہ پارٹی کا فیصلہ ہے اور ماضی میں ہم نے پارٹی کے ہر فیصلے کو دل و جان سے قبول کر کے پارٹی کے نامزد امیدواروں کی انتخابی مہم میں حصہ لیا ہے انہوں نے اس توقع کا اظہار کیاکہ ان کی نامزدگی سے تحریک انصاف راولپندی میں پوری طرح متحد ہو کر عمران خان کے ایجنڈے کی کامیابی کے لئے جدوجہد جاری رکھے گی۔

ممبئی: بالی ووڈ سْپر اسٹار سلمان خان کو بدنامِ زمانہ گینگسٹر لارنس بشنوئی کی جانب سے قتل کی دھمکیاں ملنے کے بعد انہوں نے بلٹ پروف گاڑی خرید لی۔ میڈیا رپورٹ کے مطابق سلمان خان کو بدنامِ زمانہ گینگسٹر لارنس بشنوئی کی جانب سے حال ہی میں متعدد بار قتل کی دھمکیاں دی گئی ہیں جس کے بعد اداکار نے اپنی سیکیورٹی کو یقینی بنانے کیلئے خود بہتر اقدامات کرنے شروع کر دیئے ہیں۔سلمان خان نے اپنی حفاظت کیلئے جدید اور مہنگی ترین بلٹ پروف گاڑی سیو پٹرو نیسیان خرید ی ہے جو کہ خاص طور پر بیرون ملک سے درآمد کروائی گئی ہے اور اس وقت بھارت میں دستیاب نہیں ہے۔

اسلام آباد:پاکستان کرکٹ ٹیم کے مایہ ناز اور تجربہ کار آل راونڈر عماد وسیم نے کہا ہے کہ اگر اب انہیں بغیر کسی ٹھوس وجہ کے قومی ٹیم سے نکالا گیا تو وہ اس کے خلاف قدم اٹھائیں گے۔ایک انٹرویو میں انہوں نے کہا کہ ساری جگہ پرفارمنس ہورہی تھی، مجھے ہمیشہ سے اپنی صلاحیتیوں پر یقین ہے اور رہے گا، میں خود یہ بات کہتا ہوں کہ اگر اس لیول پر کارکردگی نہ دکھا سکوں تو ریٹائرمنٹ لے کر سائیڈ پر ہوجاوںگا۔آل راونڈر نے کہا الحمداللہ اللہ پاک نے اتنی عزت دی ہے، عزت سے کھیلوں گا اور عزت سے ہی ریٹائر ہوں گا۔سال سوا سال ضائع ہونے سے متعلق سوال پر عماد بولیپاکستان کی طرف سے نہ کھیلنے سے مایوسی ہوتی ہے لیکن میرا مالی طور پر کوئی نقصان نہیں ہوا بلکہ میں نے اس سے 10 گنا زیادہ ہی کمایا ہے۔عماد وسیم نے کہا کہ میں نے کچھ چیزیں سنی ہیں کہ پی سی بی نے کہا کہ کنڈیشنز ایسی تھیں کہ عماد کو نہیں کھلا سکتے تھے، اگر کنڈیشنز کا مسئلہ ہوتا تو جنوبی افریقی لیگ مجھے سائن نہ کرتی، یہ لیگ میں سیاسی مسئلے کی وجہ سے نہیں کھیل سکا، باقی بگ بیش بھی مجھے سائن نہ کرتی۔انہوں نے مزید کہا ‘میں یہاں بیٹھ کر کچھ بھی بول سکتا ہوں، کسی کو بھی نشانہ بنا سکتا ہوں لیکن مجھ میں اور ان میں پھر کیا فرق رہے گا؟ پاکستانی عوام سمیت سب کو سب کچھ پتا ہے، مجھے بحث میں نہیں پڑنا، میں نے اپنا معاملہ اللہ تعالی پر چھوڑا تھا کہ اللہ دیکھ رہا ہے۔قومی کرکٹر کا کہنا تھا کہ ‘میں کہنا چاہوں گا کہ یہ جو سال سوا سال مجھے ناچاہتے ہوئے بھی بتایا نہیں گیا اور ڈراپ کردیا، اب اس طرح نہیں ہوسکے گا کیونکہ اب اس بار میرے ایکشن اہم ہوں گے کیونکہ اب مجھے بغیر کسی وجہ کے باہر نکالا گیا تو میں پروفیشنل طریقے سے یہ معاملات حل کرنے کی کوشش کروں گا اور قدم اٹھاوں گا۔

اسلام آباد:رویت ہلال ریسرچ کونسل کے سیکرٹری جنرل خالد اعجاز مفتی نے کہا ہے کہ 20 اپریل کی شام عیدالفطر کا چاند نظر نہیں آئے گا لہذا عید الفطر 30 روزے مکمل ہونے کے بعد ہفتہ 22 اپریل کو منائی جائے گی۔ خالد اعجاز مفتی نے بتایا کہ 20 اپریل کو پاکستانی وقت کے مطابق نیا چاند صبح 9 بجکر 13 منٹ پر پیدا ہوگا، اس روز چاند کی عمر 10 گھنٹے سے بھی کم ہوگی۔انہوں نے کہا کہ دکھائی دینے کیلئے چاند کی عمر 19 گھنٹے سے زائد ہونی چاہیے، اس روز مطلع صاف ہوا تو بھی چاند دکھائی نہیں دے گا۔خالد اعجاز مفتی کا کہنا تھا کہ 21 اپریل کو 30 رمضان اور 22 اپریل کو یکم شوال ہوگی۔

اسلام آباد: ڈسٹرکٹ اینڈ سیشن کورٹ اسلام آباد کے ایڈیشنل سیشن جج نے عمران خان کیخلاف توشہ خانہ کیس کی سماعت 11 اپریل تک ملتوی کر دی۔ الیکشن کمیشن کی جانب سے توشہ خانہ کیس کی جلد سماعت مقرر کرنے کی درخواست پر سماعت ہوئی۔پی ٹی آئی کے جونیئر وکیل نے عدالت کو بتایا کہ ہمارے کسی سینئر وکیل اور نہ ہی عمران خان کو نوٹس کی تعمیل ہوئی، پولیس کی جانب سے تاحال نوٹس کی تعمیل کی رپورٹ عدالت میں جمع نہیں کرائی جا سکی۔اس سے قبل ایڈیشنل سیشن جج نے تعمیلی نوٹس کی رپورٹ جمع ہونے تک توشہ خانہ کیس کی سماعت میں وقفہ کیا تھا۔واضح رہے کہ عمران خان کو توشہ خانہ کیس میں ڈسٹرکٹ اینڈ سیشن کورٹ اسلام آباد نے ذاتی حیثیت میں طلب کر رکھا تھا۔سابق وزیراعظم عمران خان کی نااہلی کے لئے دائر کیا جانے والا توشہ خانہ ریفرنس حکمران جماعت کے 5 ارکان قومی اسمبلی کی درخواست پر سپیکر قومی اسمبلی نے الیکشن کمیشن کو بھجوایا تھا۔ریفرنس میں الزام عائد کیا گیا تھا کہ عمران خان نے توشہ خانہ سے حاصل ہونے والے تحائف کو فروخت کرکے جو آمدن حاصل کی اسے اثاثوں میں ڈکلیئر نہیں کیا۔آئین کے آرٹیکل 63 کے تحت دائر کیے جانے والے ریفرنس میں آرٹیکل 62 ون ایف کے تحت عمران خان کی نااہلی کا مطالبہ کیا گیا ہے۔کیس کی سماعت کے دوران عمران خان کے وکیل بیرسٹر علی ظفر نے موقف اپنایا تھا کہ 62 ون ایف کے تحت نااہلی صرف عدلیہ کا اختیار ہے جبکہ سپریم کورٹ کے مطابق الیکشن کمیشن کوئی عدالت نہیں۔