Category سیاست

لاہور: اپوزیشن لیڈر شہباز شریف نے اعلان کیا ہےکہ عوام دشمن بجٹ کو منظور نہیں ہونے دیں گے۔

ایک بیان میں شہباز شریف نے کہا کہ عوامی مفادات کے منافی بجٹ سازی کی مزاحمت کریں گے اور عوام دشمن بجٹ منظور نہیں ہونے دیں گے۔

شہباز شریف نے پارٹی کی اکنامک ایڈوائزری پارٹی کو ہدایت کی کہ پری بجٹ سیمینارکیا جائے تاکہ عوام کو معیشت کی حقیقت کاپتا چل سکے، معاشی ماہرین پری بجٹ سیمینار میں معیشت کی حقیقت قوم کو بتائیں گے۔

ان کا کہنا تھا کہ حکومتی معاشی ہیرا پھیریوں کی قیمت عوام مہنگائی سے ہر روز ادا کررہے ہیں۔

اسلام آباد: مسلم لیگ ن کے سیکرٹری جنرل احسن اقبال نے کہا ہے کہ عمران خان نے معیشت کو پٹڑی سے اتارکر چندے اورفطرانے والی بنادیا ہے۔

ان خیالات کا اظہار انہوں نے اسلام آباد میں شاہد خاقان عباسی کی رہائش گاہ پر خرم دستگیر اور مریم اورنگزیب کے ہمراہ پریس کانفرنس میں کیا۔ ان کا کہنا تھا کہ پاکستان پیپلز پارٹی اور اے این پی سے علیحدگی کا فیصلہ اپنا ہے پی ڈی ایم کی8 جماعتیں متحد ہیں اور 29 مئی کو سربراہی اجلاس میں حکومت مخالف تحریک کے لیے اپنی حکمت عملی طے کریں گے۔ عمران خان نےملکی معیشت کو پٹری سے اتار کر چندے اور فطرانے والی معیشت میں تبدیل کر دیا ہے۔

احسن اقبال نے کہا کہ نواز شریف کو28 مئی 1998 کو ایٹمی دھماکوں کی پاداش میں اقتدار سے اتار کر جیل میں قید بعد ازاں جلا وطن کر دیا گیا۔ اور اب دوبارہ نواز شریف کو سی پیک کا دھماکا کرنے پر اقتدار سے الگ کر کے تاحیات نااہلی اور جیل بھیجا گیا۔

ان کا کہنا تھا کہ ہم ملک کودوبارہ اس گرداب سے نکالنے کا عزم کرتے ہیں اور اس سال یوم تکبیر کے ساتھ یوم جمہورت بھی منائیں گے. احسن اقبال کا کہنا تھا کہ بھارت نے پانچ ایٹمی دھماکے کر کے ہماری غیرت کو چلینج کیا تھا، جس کے جواب میں نواز شریف نے عوامی امنگوں کے مطابق بھارت کے پانچ ایٹمی دھماکوں کے مقابلے میں چھ دھماکے کر کے پاکستان کو ایٹمی قوت بنایا۔

انہوں نے کہا کہ ایٹمی دھماکوں پر نواز شریف کو امریکی صدر سمیت بڑی طاقتوں نے فون کیے لیکن نواز شریف نے عوام کی قومی غیرت کے مطابق فیصلہ کیا یہ دن ہماری قومی غیرت اور خودمختاری کے تحفظ کا دن ہے۔

اسلام آباد: وزیراعظم عمران خان نے کہا ہے کہ جن ممالک میں قانون کی حکمرانی نہیں ہوتی وہ جلد یا بدیر تباہ ہوجاتے ہیں۔

مراکش کے شہر رباط میں عالمی سیرت کانفرنس سے ورچوئل خطاب کرتے ہوئے وزیراعظم عمران خان نے حضرت محمد ﷺ نے مضبوط معاشرے کی بنیاد رکھی، 12 سال کی قلیل مدت میں 2 سپر پاورز روم اور فارس نے نئے انقلاب کےسامنے گھٹنے ٹیک دیئے، اسلام کے بنیادی اصولوں پر عمل کرکے مسلمان کامیابی اور کھوئی ہوئی عظمت حاصل کرسکتے ہیں، جن ممالک نے ان اصولوں پرعمل کیا وہ ترقی کرگئے۔

عمران خان نے کہا کہ مدینہ کی ریاست 2 بنیادی اصولوں پرقائم ہوئی، ایک قانون سب کیلئےبرابرہوگا اور دوسرا فلاحی ریاست ہوگی، پہلےقومیں اس لیےتباہ ہوئیں کیوں کہ امیر،غریب کیلئےالگ الگ قانون تھا، جن ممالک میں قانون کی حکمرانی نہیں ہوتی اور جنگل کا قانون ہوتا ہے کہ جس کی لاٹھی اس کی بھینس، وہ ممالک جلد یا بدیر تباہ ہوجاتے ہیں۔

وزیراعظم کا کہنا تھا کہ مدینہ کی فلاحی ریاست میں غریب، بوڑھوں، یتیموں، خواتین کا خیال رکھا جاتا تھا، پنشن کا نظام سب سے پہلے دوسرے خلیفہ راشد حضرت عمرؓ کے دور میں آیا۔

عمران خان نے چین کی تعریف کرتے ہوئے کہا کہ ہم نے چین کی حالیہ ترقی دیکھی جہاں 30 سال میں 70 کروڑ افراد کو غربت سے نکالا گیا، انہوں نے نہ صرف معاشرے میں غریبوں کا خیال رکھا بلکہ 700 وزرا سطح کے افسران کو کرپشن پر جیل میں ڈالا، طاقتور کو قانون کے نیچے لایا گیا، یہ معاشرے کی ترقی کا راز ہے۔

بھکر: وزیراعلیٰ پنجاب عثمان بزدار کا کہنا ہے کہ دونوں ہم خیال گروپ ہمارے ہیں، اور اختلافات ختم ہو چکے ہیں۔

بھکر میں بات کرتے ہوئے وزیراعلی پنجاب عثمان بزدار کا کہنا تھا کہ تحریک انصاف میں بننے والے دونوں ہم خیال گروپ ہمارے ہیں اور ہمارے اختلافات بھی ختم ہوچکے ہیں، جب کہ اختلاف پیدا کرنے والوں کو ناکامی کا سامنا کرنا پڑا۔

وزیراعلی پنجاب کا کہنا تھا کہ دونوں گروپوں کے لیڈر ہمارے ساتھی اور بھائی ہیں، سعید اکبر نوانی اور غضنفر عباس چھینہ دونوں میرے لئے قابل عزت و احترام ہیں، ہم مل جل کر ملک اور قوم کی خدمت کا جذبہ رکھتے ہیں، یہ سب تحریک انصاف کا حصہ ہیں اور پارٹی کے تمام لوگ ایک دوسرے کے لئے لازم و ملزوم ہیں۔

واضح رہے کہ تحریک انصاف کے ناراض رہنما اور چینی اسکینڈل میں نامزد ملزم جہانگیر ترین گزشتہ کئی ماہ سے تحریک انصاف کی پنجاب حکومت سے نالاں نظر آتے ہیں، اور وہ متعدد بار میڈیا پر بھی اس حوالے سے اظہار کرچکے ہیں، جب کہ گزشتہ روز تحریک انصاف کا ایک اور ہم خیال گروپ بھی سامنے آیا تھا، جس کی بیٹھک میں شکوے و شکایات کئے گئے اور پنجاب حکومت سے تحفظات کا اظہار کیا گیا تھا۔

پاکستان پیپلز پارٹی (پی پی پی) کے چیئرمین بلاول بھٹو زرداری نے کہا کہ پیپلز پارٹی، مسلم لیگ (ن) کی نائب صدر مریم نواز یا قائد نواز نواز شریف کو جوابدہ نہیں ہے اور ان کا مؤقف برقرار ہے۔

بدین میں پریس کانفرنس کرتے ہوئے بلاول سے مریم کے حالیہ بیان کے حوالے سے سوال کیا گیا جہاں مسلم لیگ(ن) کی صدر نے کہا تھا کہ پیپلز پارٹی نے شوکاز نوٹس کا جواب نہیں دیا تھا اور پاکستان ڈیموکریٹک موومنٹ (پی ڈی ایم) کے سیکریٹری جنرل شاہد خاقان عباسی کی جانب سے دیے گئے بیان کی حمایت کی تھی۔

شاہد خاقان عباسی نے منگل کے روز بیان میںآ کہا تھا کہ حزب اختلاف کے اتحاد میں پیپلز پارٹی کے لیے کوئی جگہ نہیں ہے جب تک کہ اس نے اس اعتماد کو بحال نہیں کیا جو انہوں نے توڑا تھا، پی ڈی ایم نے پیپلز پارٹی سے شوکاز نوٹس کے ذریعے جواب طلب کیا تھا جس کے بلاول نے ٹکڑے ٹکڑے کر دیے تھے، ہم نے جواب طلب کیا تھا، شوکاز نوٹس کے پھٹے ہوئے ٹکڑوں کو جوڑیں، اسے پڑھیں اور ہمیں وہ وضاحت دیں جس کا ہم نے مطالبہ کیا تھا۔

بدھ کو پریس کانفرنس سے خطاب کرتے ہوئے پیپلز پارٹی کے چیئرمین نے اعتراف کیا کہ انہوں نے شوکاز نوٹس پھاڑ دیا ہے اور پی ڈی ایم کے بارے میں ان کے موقف میں کوئی تبدیلی نہیں آئی ہے۔

انہوں نے کہا کہ ہم مریم یا میاں نواز شریف کو جوابدہ نہیں ہیں، ہم پیپلز پارٹی اور پیپلز پارٹی کے کارکنوں کے جوابدہ ہیں اور ہمیں لگتا ہے کہ اصل خوشی پیپلز پارٹی کے کارکنوں کے ساتھ مل کر سیاست کرنے میں ہے۔

بلاول نے کہا کہ شہباز شریف قومی اسمبلی میں حزب اختلاف کے رہنما اور مسلم لیگ (ن) کے صدر تھے، اس طرح پیپلز پارٹی ان کے مؤقف اور بیانات کو مسلم لیگ (ن) کی باضابطہ پالیسی سمجھتی ہے اور اسی کے مطابق سیاست کرے گی۔

انہوں نے مزید کہا کہ پیپلز پارٹی جمعیت علمائے اسلام (جے یو آئی-ف) کے سربراہ مولانا فضل الرحمن کا احترام کرتی ہے اور دونوں جماعتوں کے درمیان اچھے تعلقات اور رابطے تھے، تاہم پیپلز پارٹی اپنے نظریے، اصولوں اور احترام کے ساتھ سیاست کرتی ہے اور ہم اپنے موقف کو تبدیل نہیں کریں گے۔

انہوں نے جمہوریت کے فروغ، سویلین بالادستی اور وزیر اعظم عمران خان کی اصل میں مخالفت کرنے والوں کو مخاطب کرتے ہوئے کہا کہ اپوزیشن میں شامل ہمارے دوستوں کو پیپلز پارٹی کی مخالفت کرنے کے بجائے حکومت کو نشانہ بنانا چاہیے۔

پی ڈی ایم کی بحالی کی کوشش
شہباز نے پیر کو اختلاف کی تمام مرکزی جماعتوں کو عشائیے پر مدعو کیا تھا جس میں پی ڈی ایم کو بحال کرنے کی کوشش کی گئی۔

تاہم پیپلز پارٹی کو اس اتحاد میں واپس لانے کی کوشش ناکام ہوتی نظر آتی ہے کیونکہ بلاول عشائیے میں شریک نہیں ہوئے حالانکہ ان کی پارٹی کے سینئر قائدین دعوت میں شریک تھے۔

پیپلز پارٹی کے رہنما فرحت اللہ بابر نے کہا کہ اجلاس نے تعلقات پر جمی برف کو توڑ دیا ہے اور اپوزیشن رہنماؤں کو اکٹھا اور ایک دوسرے سے بات چیت کا پلیٹ فارم مہیا کیا، انہوں نے یہ بھی کہا کہ یہ پی ڈی ایم کا اجلاس نہیں تھا لہذا اس پروگرام میں پی ڈی ایم کا معاملہ زیر بحث نہیں آیا۔

بابر نے کہا کہ پیپلز پارٹی کے وفد نے شہباز کو یقین دلایا ہے کہ پارٹی مشترکہ اپوزیشن کے ان تمام اقدامات کی حمایت کرے گی جو آئندہ بجٹ میں عوام دشمن فیصلوں کا راستہ روکیں گی۔

صحافیوں کے تحفظ کا بل
بدھ کی پریس کانفرنس کے دوران بلاول نے مزید کہا کہ وہ سندھ اسمبلی میں کمیٹی کی جانب سے منظور شدہ صحافیوں کے تحفظ کے بل کے لیے حکومت سندھ، محکمہ قانون اور صحافی برادری کے شکر گزار ہیں۔

ان کا کہنا تھا کہ امید ہے کہ سندھ اسمبلی سے منظوری کے بعد یہ قانون کی شکل اختیار کر جائے گا، یہ انتہائی افسوس کی بات ہے کہ ہمیں اکیسویں صدی میں اس طرح کے بل پاس کرنے پڑ رہے ہیں جب آپ کو آئین کے مطابق تمام تحفظ ملنا چاہیے۔

انہوں نے صحافیوں کو نشانہ بنانے اور ناانصافی کی مذمت کرتے ہوئے کہا کہ وزیر اطلاعات سندھ ناصر شاہ صحافیوں کے ساتھ ناانصافی میں ملوث ہر فرد کو سزا دینے کی کوششوں میں مصروف ہیں۔

بلاول نے منگل کی شب اسلام آباد میں صحافی اور یوٹیوبر اسد علی طور پر حملے کی بھی مذمت کی، انہوں نے سوال کیا کہ اگر وفاقی حکومت کے زیر سایہ صحافی خود کو محفوظ محسوس نہیں کرتے تو پورے پاکستان کو کیا پیغام جائے گا۔

انہوں نے دوسرے صوبوں کو لیکچر دینے پر خصوصی طور پر وزیر داخلہ شیخ رشید کو تنقید کا نشانہ بناتے ہوئے وہ اسلام آباد میں اپنی حدود میں ایک صحافی کو تحفظ کی فراہمی میں ناکام رہے ہیں، یہ انتہائی شرمناک بات ہے کہ کس طرح اسلام آباد میں ہر ماہ صحافیوں کے گھروں پر مبینہ طور پر حملہ کیا جا رہا ہے، انہوں نے کیا کہ اس معاملے کی اعلیٰ سطح پر کارروائی اور انکوائری کی جائے۔

پیپلز پارٹی کے چیئرمین نے ایک بار پھر بحریہ ٹاؤن کراچی کو سپریم کورٹ کے حکم کے مطابق فنڈز جاری کرنے اور معاوضے کی ادائیگی کرنے کا مطابہ دہرایا تاکہ اس رقم کو بنیادی ڈھانچے اور ترقی پر خرچ کیا جاسکے۔

بلاول نے کہا کہ ہم سندھ میں کاروباری سرگرمی اور ترقی کے خواہاں ہیں تاہم کسی کی غنڈہ گردی کو قبول نہیں کریں گے۔

بلاول نے پانی سے متعلق امور اور مسائل کے بارے میں بھی بات کرتے ہوئے کہا کہ مساوات اور انصاف کی بنیاد پر پانی کی تقسیم پر ایک نیا اتفاق رائے پیدا کرنے کی ضرورت ہے، پیپلز پارٹی ہر سطح پر پانی کی تقسیم کے حوالے سے ہونے والی ناانصافی کے معاملے پر لڑنے کے لیے تیار ہے۔

وزیر داخلہ شیخ رشید احمد نے کہا ہے کہ امن و امان صوبے کا مسئلہ ہے اور وہ وزیر اعظم کی ہدایت پر کراچی کے دورے پر آئے ہیں، صوبہ سندھ میں گورنر راج آرہا ہے اور نہ ہی آپریشن کرنے جا رہے ہیں۔

واضح رہے کہ وزیر اعظم عمران خان کی ہدایت پر وفاقی وزیر داخلہ شیخ رشید احمد امن و امان کی صورتحال کا جائزہ لینے کے لیے 2 روزہ دورے پر کراچی پہنچ گئے ہیں۔

کراچی پہنچنے پر میڈیا سے گفتگو کرتے ہوئے وزیر داخلہ نے کہا کہ میں کسی مشن پر نہیں ہوں، امن و امان صوبے کا مسئلہ ہے اور کل دوپہر گورنر سندھ سے ملاقات کر کے نادرا کا دورہ بھی کروں گا۔

ان کا کہنا تھا کہ نادرا بہت بڑی چور بازاری ہے، اس ملک میں کرپشن کے ڈھیر ہیں اور نئے چیئرمین کے ساتھ مل کر ان کا صفایا کرنا ہے۔

وزیر داخلہ نے کہا کہ میں وزیراعلیٰ مراد علی شاہ کا احترام کرتا ہوں لیکن میں غیر ذمے دار نہیں ہوں اور وزیراعظم کو حقائق پر مبنی رپورٹ پیش کروں گا۔

انہوں نے کہا کہ یہ جو آپ کہہ رہے ہیں کہ گورنر راج آ رہا ہے یا ہم آپریشن کرنے جا رہے ہیں تو ایسا کچھ نہیں ہے، رینجرز اور ایف سے بات کر کے معاملات بہتر کریں گے اور اسی لیے صبح 10 بجے مل رہے ہیں لیکن حتمی فیصلہ عمران خان کا ہے۔

ایک اور سوال کے جواب میں انہوں نے کہا کہ عمران خان کے دور میں وزارت داخلہ کی جانب سے کسی چھرے کی بندوق کا لائسنس بھی جاری نہیں ہوا، یہ انہی کے دور میں جاری کیے گئے۔

اس موقع پر انہوں نے یقین دہانی کرائی کہ وہ کراچی سے منشیات کا خاتمہ کریں گے اور اینٹی نارکوٹکس فورس کے سربراہ سے بات کریں گے۔

شیخ رشید نے کہا کہ میں عمران خان کی ٹیم کا ایک وزیر ہوں، وزیراعظم نے اسد عمر اور گورنر سندھ کے کہنے پر مجھے حکم دیا ہے کہ میں کراچی جاؤں اور انہیں رپورٹ کروں، جس نے مجھے آرڈر دیا ہے میں اس کو رپورٹ جمع کراؤں گا۔

ان کا کہنا تھا کہ امن و امان صوبے کا مسئلہ ہے، جو وزیر اعلیٰ کہیں گے، امن و امان کے قیام کے لیے سارے سندھ کو صاف کریں گے اور امن کا گہوارہ بنائیں گے۔

وزیر داخلہ نے واضح کیا کہ میں سندھ کے مسئلے کی بات کرنے نہیں بلکہ امن و امان پر بات کرنے آیا ہوں، نہ کسی کی وزارت میں مداخلت کرتا ہوں اور نہ ہی کسی کو اپنی وزارت میں دخل دینے دیتا ہوں۔

اس سے قبل وفاقی وزیر داخلہ شیخ رشید نے آج کراچی کے لیے روانگی سے قبل اسلام آباد ایئرپورٹ پر گفتگو کرتے ہوئے کہا تھا کہ وزیر اعظم کی ہدایت پر ہم کراچی جا رہے ہیں اور کل سب لوگوں سے ملاقات ہو گی۔

ان کا کہنا تھا کہ کراچی میں امن و امان کا جائزہ لینے کے لیے جارہا ہوں اور مشن صرف امن ہے۔

انہوں نے کہا تھا کہ کراچی میں میری اہم ملاقاتیں طے ہیں، وزیر اعلیٰ سندھ مراد علی شاہ سے بھی ملاقات ہو گی اور رینجرز ہیڈ کوارٹرز کا دورہ بھی کروں گا۔

شیخ رشید احمد نے مزید کہا کہ کراچی سے واپسی پر وزیر اعظم کو امن و امان کی صورتحال کے حوالے سے رپورٹ پیش کروں گا۔

دوسری جانب وزیر داخلہ نے امن وامان کی صورتحال پر کراچی میں آج ہنگامی اجلاس طلب کر لیا۔

وزیر داخلہ کی زیر صدارت امن و امان سے متعلق اجلاس رینجرز ہیڈ کوارٹر میں ہوگا جس میں وہ کراچی اور سندھ میں امن و امان سے متعلق اہم فیصلے کریں گے۔

اس کے علاوہ شیخ رشید کی کل صبح 10 بجے کی وزیر اعلیٰ سندھ سے ملاقات طے ہے جس میں صوبے میں امن وامان اور وفاق سے جڑے امور کا جائزہ لیا جائے گا۔

وفاقی وزیر داخلہ وزیراعلیٰ سے ملاقات کے بعد دوپہر ایک بجے گورنر سندھ عمران اسمٰعیل سے بھی بل مصافحہ ملاقات کریں گے۔

یاد رہے کہ گزشتہ روز وزیراعظم عمران خان نے وفاقی وزیر داخلہ شیخ رشید کو صوبہ سندھ کا دورہ کرنے کی ہدایت کرتے ہوئے کہا تھا کہ وہ قانون نافذ کرنے والے اداروں کے حکام سے ملاقات کرکے صوبے میں بڑھتے ہوئے جرائم کی روک تھام کے لیے حکمت عملی ترتیب دیں۔

وفاقی وزیر داخلہ کو ہدایت کی گئی تھیوہ واپس آکر وزیراعظم کو اس حوالے سے رپورٹ پیش کریں۔

وزیر اطلاعات فواد چوہدری کے مطابق گورنر سندھ عمران اسمٰعیل اور وزیر منصوبہ بندی و ترقی اسد عمر نے وزیر اعظم سے صوبے کی صورتحال پر تفصیلی گفتگو کی تھی جس کے بعد وزیر داخلہ کو بھیجنے کا فیصلہ کیا گیا تھا۔

وفاقی وزیر اسد عمر نے پاکستان تحریک انصاف (پی ٹی آئی) سکھر کے رہنما سید طاہر شاہ کی رہائش گاہ پر میڈیا سے گفتگو کرتے ہوئے کہا تھا کہ اب تو یہ حالات پیدا ہوچکے ہیں کہ سندھ میں پولیس کو تحفظ فراہم کرنے کی ضرورت پڑرہی ہے، سندھ پولیس اگر اپنی حفاظت نہیں کرسکتی تو باقی شہریوں کی حفاظت کیسے کرے گی۔

انہوں نے کہا تھا کہ شکارپور کا علاقہ ڈاکوؤں کے ہاتھوں یرغمال بنا ہوا ہے، اب وفاق اپنی ذمہ داریاں پوری کرتے ہوئے رینجرز سے آپریشن کرائے تاکہ لوگوں کی جان و مال کی حفاظت کو یقینی بنایا جاسکے کیونکہ پولیس وہاں مکمل طور پر ناکام ہوچکی ہے۔

وفاقی وزرا کی جانب سے یہ خدشات ایک ایسے وقت میں سامنے آئے ہیں جب ایک روز قبل ہی شکار پور میں ڈاکوؤں کے ایک گروپ کے خلاف آپریشن میں 2 پولیس اہلکاروں سمیت 4 افراد ہلاک ہوگئے۔

بعد ازاں پولیس نے قبائلی سربراہ سردار تیغو خان تیغانی کو ان کے دو بیٹوں کے ساتھ کراچی سے گرفتار کیا تھا، جن پر شکار پور میں اغوا کاروں کی سرپرستی کا الزام ہے۔

لاہور: جہانگیر ترین گروپ کے بعد تحریک انصاف کا ایک اور گروپ بھی سامنے آیا ہے جس میں 15 ارکان کے نام شامل ہیں۔

ایکسپریس نیوز کے مطابق جہانگیر ترین گروپ کے بعد تحریک انصاف کا ہم خیال گروپ بھی حرکت میں آگیا ہے، اور گزشتہ رات ہم خیال گروپ کے 15 سے زائد اراکین کو عشائیہ دیا گیا۔

ذرائع کے مطابق عشایئے میں سردار شہاب الدین خان، ملک غضنفرعباس چھینہ، سردار محی الدین خان کھوسہ، عامر عنایت خان شاہانی، اعجاز سلطان بندیشہ، نواب علی رضا خان خاکوانی، تیمور امجد لالی، بلال اصغر وڑائچ، کرنل (ر) غضنفرعلی شاہ، اعجازخان جازی، فیصل فاروق چیمہ، گلریز افضل چن، علی اصغر خان لاہڑی اوراحسن جہانگیر بھٹی شریک تھے۔
ذرائع نے بتایا کہ عشایئے میں تمام راکان نے بجٹ میں ہم خیال گروپ کے لئے ترقیاتی اسیکمیں شامل نہ کرنے پر شکوے و شکایات کے انبار لگادیئے، تاہم اس بیٹھک میں فیصلہ ہوا کہ گروپ اپنے تمام تحفظات وزیراعلیٰ پنجاب عثمان بزدار کے سامنے رکھے گا، اوراس کے بعد آئندہ کا لائحہ عمل طے کیا جائے گا۔

سابق وفاقی وزیر داخلہ اور پاکستان مسلم لیگ (ن) کے ناراض سینئر سیاستدان چوہدری نثار علی خان نے 2018 کے عام انتخابات میں کامیابی حاصل کرنے کے تقریباً 2 سال 10 ماہ کے بعد آج (بروز بدھ) بطور رکن پنجاب اسمبلی حلف اٹھالیا۔

چوہدری نثار علی خان حکومتی چیمبر سے ایوان زیریں میں داخل ہوئے اور داخل ہوتے ہی انہوں نے نشست سے متعلق سوال کیا۔

انہوں نے ساتھ ہی کہا کہ اگر میری نشست نامزد نہیں ہے تو پیچھے بیٹھ جاتا ہوں لیکن ڈی جی پنجاب اسمبلی کی جانب سے بتائے جانے پر چوہدری نثار علی خان صوبائی وزرا کی نشست پر بیٹھ گئے۔

حلف سے قبل سیکریٹری پنجاب اسمبلی محمد خان بھٹی نے چوہدری نثار علی خان سے ملاقات کی اور انہیں واضح کیا کہ پٹیشنز کا اسٹیٹس چیک کرنے کے لیے 2 دن کا وقت مانگا گیا تھا، انہوں نے مزید کہا کہ آپ کے مشکور ہیں کہ آپ نے تعاون کیا۔

چوہدری نثار علی خان نے پنجاب اسمبلی میں رکن کی حیثیت سے حلف اٹھا لیا
یاد رہے کہ 2 روز قبل بھی چوہدری نثار علی خان حلف لینے کے لیے پنجاب اسمبلی آئے تھے لیکن ان کو کہا گیا تھا کہ ان کا حلف نہیں لیا جاسکتا کیونکہ عدلیہ میں ان کے خلاف پٹیشنز زیر سماعت ہیں ہمیں چیک کرنے کا وقت دیا جائے۔

خیال رہے کہ سابق وفاقی وزیر داخلہ اور پاکستان مسلم لیگ (ن) کے ناراض سینئر سیاستدان چوہدری نثار علی خان نے 2018 کے عام انتخابات میں کامیابی حاصل کی تھی لیکن اس وقت حلف نہیں اٹھایا تھا۔

انہوں نے آج (بروز بدھ) انتخابات میں کامیابی کے دو سال 10 ماہ کے بعد بطور رکن پنجاب اسمبلی حلف اٹھا لیا۔

چوہدری نثار علی خان سے رکن صوبائی اسمبلی کا حلف قائم مقام اسپیکر سردار دوست محمد مزاری نے لیا۔

بعد ازاں چوہدری نثار علی خان صوبائی اسمبلی کے رکن کے طور پر حلف اٹھانے کے بعد ایوان سے واپس روانہ ہو گئے۔

دوسری جانب ذرائع کے مطابق چوہدری نثار علی خان نے کسی بھی ناخوشگوار واقعے سے بچنے کے لیے سیکیورٹی کے طور پر 60 افراد کو بلایا تھا اور انہوں نے ان افراد کے نام پہلے ہی اسمبلی سیکریٹریٹ سے منظور کروائے تھے۔

ذرائع نے مزید بتایا کہ چوہدری نثار کے پنجاب اسمبلی آنے کے موقع پر سیکیورٹی اہلکاروں کی جانب سے سخت سیکیورٹی اقدامات کیے گئے تھے اور کسی کو بھی اسپیکر کے چیمبر تک جانے کی اجازت نہیں تھی۔

بعد ازاں چوہدری نثار نے صوبائی اسمبلی سے جاتے ہوئے میڈیا سے غیر رسمی گفتگو کی اور بتایا کہ جلد لاہور کا دورہ کروں گا اور صحافیوں سے تفصیلی بات کروں گا۔

ان کا کہنا تھا کہ اجلاس میں شرکت نہیں کروں گا صرف اپ لوگوں سے ملاقات کروں گا۔

جب ان سے ایک صحافی نے سوال کیا کہ کس پارٹی میں جا رہے ہیں؟ تو سابق وفاقی وزیر داخلہ نے جواب دیا کہ ابھی کہیں نہیں جا رہا، علاوہ ازیں انہوں نے مسلم لیگ (ن) کے سینئر رہنما شاہد خاقان عباسی کے بیان پر کوئی ردعمل نہیں دیا۔

‘دو روز قبل چوہدری نثار کو کیوں واپس بھیج دیا گیا تھا’
خیال رہے کہ چوہدری نثار 24 مئی کو حلف اٹھانے کے لیے پنجاب اسمبلی گئے تھے لیکن انہیں بتایا گیا کہ آپ حلف نہیں اٹھا سکتے، اسپیکر اور ڈپٹی اسپیکر اسمبلی میں موجود نہیں ہیں۔

سابق وزیر داخلہ نے ڈیڑھ گھنٹہ سیکریٹری اسمبلی محمد خان بھٹی کے ساتھ اسپیکر کے کمرے میں گزارا اور حلف لیے بغیر واپس روانہ ہو گئے۔

تاہم ایوان سے واپسی پر میڈیا سے بات کرتے ہوئے سابق وزیرِ داخلہ اور مسلم لیگ (ن) کے ناراض رہنما چوہدری نثار احمد نے کہا تھا کہ وہ کسی سیاسی کھیل کا حصہ نہیں ہیں اور اپنے مؤقف پر آج بھی قائم ہیں۔

چوہدری نثار کا کہنا تھا کہ سیاست سے 3 سال تک کنارہ کشی کے بعد میں آج میڈیا کے سامنے پیش ہوا ہوں۔

انہوں نے کہا کہ آپ جانتے ہیں کہ پچھلے الیکشن میں، میں صوبائی اسمبلی کی نشست سے 34 ہزار سے ووٹوں کی لیڈ سے منتخب ہوا، میں اصل میں قومی اسمبلی کی نشست سے الیکشن لڑ رہا تھا وہاں سے ناکام ہوا یا مجھے ناکام کروایا گیا۔

چوہدری نثار کا مسلم لیگ (ن) سے ناراضی کا معاملہ
چوہدری نثار نے سال 2018 کے انتخابات سے قبل 34 سالہ رفاقت کے بعد مسلم لیگ (ن) سے اپنی راہیں جدا کرلی تھیں، پارٹی سے رخصت ہونے سے پہلے انہوں نے کھلے عام شریف برادران کے فیصلوں پر ناراضی کا اظہار کیا تھا، آخری مرتبہ وہ بیگم کلثوم نواز کے جنازے میں شرکت کے وقت دیکھے گئے تھے۔

چوہدری نثار اور شریف برادران کے درمیان اختلافات اس وقت کھل کر سامنے آئے تھے جب سابق وزیر نے کہا تھا کہ وہ انتخابی ٹکٹ کے لیے مسلم لیگ (ن) کی پارلیمانی کمیٹی سے بھیک نہیں مانگیں گے۔

اس کے علاوہ انہوں نے مسلم لیگ (ن) کے ’خاندانی جماعت‘ بننے پر بھی تنقید کی تھی جس پر انہوں نے کہا تھا کہ میں کبھی پارٹی چھوڑنا نہیں چاہتا تھا لیکن اب پارٹی میں رہنا مشکل ہے۔

بعدازاں چوہدری نثار نے 2018 میں آزاد امیدوار کی حیثیت سے انتخابات میں حصہ لیا تھا اور پنجاب اسمبلی کی نشست حاصل کرنے میں کامیاب ہوگئے تھے تاہم انہوں نے اب تک رکنیت کا حلف نہیں اٹھایا۔

یہاں یہ بات مدِ نظر رہے کہ اپریل کے اوائل میں وفاقی کابینہ نے الیکشن ایکٹ 2017 میں ترمیم کی منظوری دی تھی جس کے نتیجے میں سابق وزیر خزانہ اسحٰق ڈار اور سابق وزیر داخلہ چوہدری نثار علی خان کی بالترتیب سینیٹ اور پنجاب اسمبلی سے رکنیت منسوخ ہوسکتی ہے۔

لاہور: پیپلز پارٹی اور ن لیگ کے ایک گروپ کے درمیان سیاسی کشیدگی مزید بڑھ چکی ہے جس کی وجہ سے شہبازشریف اپوزیشن جماعتوں کو قریب لانے میں ناکام ہوگئے ہیں۔

پی ڈی ایم کا سربراہی اجلاس 29 مئی کو ہوگا، جس کی میزبانی شہباز شریف کریں گے، تاہم اپوزیشن لیڈر سیاسی جماعتوں کو قریب لانے میں تاحال کامیاب نہ ہوسکے۔

پی ڈیم ذرائع کا کہنا ہے کہ پیپلز پارٹی اور ن لیگ کے ایک گروپ کے درمیان سیاسی کشیدگی مزید بڑھ چکی ہے، مشترکہ دوستوں نے کوششیں کیں مگر پیپلز پارٹی کے اپنے فیصلے آڑے آرہے ہیں، جب کہ مسلم لیگ (ن) کی طرف سے بھی سخت بیان بازی دوری کی وجہ بنی۔
اس خبرکوبھی پڑھیں: شہبازشریف کی تمام اپوزیشن قائدین کوعشائیے کی دعوت

پی ڈی ایم ذرائع کا کہنا ہے کہ سیاسی جماعت کی اپنی شناخت اور حیثیت ہوتی ہے، بعض امور پر اختلاف فطری امر ہوتا ہے، جب تک مسلم لیگ (ن) اور پیپلز پارٹی کی قیادت براہ راست معاملات پر غور نہ کرے، پیپلز پارٹی اور اے این پی کی اپوزیشن اتحاد میں شمولیت ممکنات میں نہیں، جب کہ پی ڈی ایم اتحاد میں شامل تمام جماعتوں کی آرا بھی لازمی ہے۔

ذرائع نے بتایا کہ پی ڈی ایم کے سربراہی اجلاس میں اے این پی اور پیپلز پارٹی بارے غور کیا جائے گا، تاہم دوسری جانب پیپلز پارٹی غیر مشروط طور پر واپسی چاہتی ہے، اور ن لیگ غلطیوں کے ازالے کی خواہاں ہے، اور موجودہ صورتحال میں مولانا فضل الرحمان کافی پریشان ہیں، مولانا کا جھکاؤ کسی حد تک ن لیگ کی طرف ہے، البتہ پیپلز پارٹی کو بھی منانے کے خواہاں ہیں، لیکن شہباز شریک کے مفاہمتی اور مریم نواز کے مزاحمتی بیانیہ کے باعث بھی مشکلات ہیں۔

لاہور ہائی کورٹ نے اسسٹنٹ کمشنر پاکپتن پر تشدد کے معاملے میں مسلم لیگ (ن) کے رکن پنجاب اسمبلی نوید علی کی عبوری ضمانت خارج کردی جس کے بعد انہیں احاطہ عدالت سے گرفتار کر لیا گیا۔

جسٹس شہرام سرور نے نوید علی کی عبوری ضمانت کی درخواست پر سماعت کی۔

نوید علی اور ان کے والد احمد رانا عبوری ضمانت کی معیاد ختم ہونے پر عدالت میں پیش ہوئے۔

ایڈیشنل آئی جی انویسٹی گیشن کی جانب سے رپورٹ عدالت میں پیش کی گئی۔

سرکاری وکیل نے عدالت کو بتایا کہ اس کیس میں مرکزی ملزم میاں نوید ہے، ان کی عمر مارکی پر شادی کی تقریب کی خلاف ورزی کرنے پر چھاپہ مارا گیا، جرمانہ کرنے کی صورت میں میاں نوید نے دھمکیاں دی اور اغوا کی کوشش کی جبکہ 50 ہزار روپے جرمانے کی رقم بھی چھین لی گئی۔

انہوں نے کہا کہ میاں نوید، اسسٹنٹ کمشنر پاکپتن کو اغوا کر کے لے جاتے ہوئے فون پر بھی اشتعال دلاتے رہے۔

لیگی رکن صوبائی اسمبلی کے وکیل نے کہا کہ میاں نوید نے مارکی ٹھیکے پر دی ہوئی ہے جہاں اسسٹنٹ کمشنر پروگرام کرنا چاہتے تھے، انہیں انکار کرنے پر میاں نوید کے خلاف جھوٹا مقدمہ بنایا گیا۔

ان کا کہنا تھا کہ اسسٹنٹ کمشنر، میاں نوید کو اٹھا کر تھانے لے گئے، وہ اپنی رپورٹ میں بتائیں کہ شادی میں کونسی دوسری ڈش پکائی گئی؟

میاں نوید کے وکیل نے کہا کہ اسسٹنٹ کمشنر نے دعویٰ کیا کہ انہیں 5 سے 6 افراد نے مارا مگر میڈیکل نہیں کروایا، اے سی کے اس جھوٹے کیس کی وجہ سے میرے موکل کو 60 سے 65 کروڑ روپے کا نقصان ہوا ہے، وہ اس کیس میں او ایس ڈی بھی ہو چکے ہیں۔

عدالت نے دلائل سننے کے بعد نوید علی کی عبوری ضمانت خارج کردی جس کے بعد پولیس نے لیگی ایم پی اے کو احاطہ عدالت سے گرفتار کر لیا۔