Category سیاست

وزیراعظم عمران خان نے وفاقی وزیر داخلہ شیخ رشید کو صوبہ سندھ کا دورہ کرنے کی ہدایت کی ہے اور کہا ہے کہ وہ قانون نافذ کرنے والے اداروں کے حکام سے ملاقات کرکے صوبے میں بڑھتے ہوئے جرائم کی روک تھام کے لیے حکمت عملی ترتیب دیں۔

وفاقی وزیر داخلہ کو ہدایت کی گئی ہے وہ واپس آکر وزیراعظم کو اس حوالے سے رپورٹ پیش کریں۔

وفاقی وزیر اطلاعات فواد چوہدری نے مذکورہ تفصیلات شیئر کیں، جن کا کہنا تھا کہ وزیراعظم نے مذکورہ فیصلہ گورنر سندھ عمران اسمٰعیل اور وفاقی وزیر منصوبہ بندی و ترقی اسد عمر سے صوبے کی صورت حال پر تفصیلی بات چیت کے بعد کیا۔

انہوں نے سماجی روابط کی ویب سائٹ ٹوئٹر پر ٹوئٹ کرتے ہوئے کہا کہ ‘دونوں نے وزیراعظم کو سندھ میں امن و امان کی صورت حال، بڑھتے ہوئے جرائم اور بد انتظامی کے حوالے سے آگاہ کیا’۔

گزشتہ روز وفاقی وزیر اسد عمر نے پاکستان تحریک انصاف (پی ٹی آئی) سکھر کے رہنما سید طاہر شاہ کی رہائش گاہ پر میڈیا سے گفتگو کرتے ہوئے کہا تھا کہ اب تو یہ حالات پیدا ہوچکے ہیں کہ سندھ میں پولیس کو تحفظ فراہم کرنے کی ضرورت پڑرہی ہے، سندھ پولیس اگر اپنی حفاظت نہیں کرسکتی تو باقی شہریوں کی حفاظت کیسے کرے گی۔

انہوں نے کہا تھا کہ شکارپور کا علاقہ ڈاکوؤں کے ہاتھوں یرغمال بنا ہوا ہے، اب وفاق اپنی ذمہ داریاں پوری کرتے ہوئے رینجرز سے آپریشن کرائے تاکہ لوگوں کی جان و مال کی حفاظت کو یقینی بنایا جاسکے کیونکہ پولیس وہاں مکمل طور پر ناکام ہوچکی ہے۔

ان کا کہنا تھا کہ سندھ میں امن و امان کے حالات بہتر نہیں ہیں، سندھ میں جس بھی علاقے میں ٹھہریں، سب سے بڑا مسئلہ شہری جان و مال کا تحفظ نہ ہونے کی شکایات کرتے ہیں، دو سے تین ماہ قبل بھی سندھ کا دورہ کیا، تب بھی یہی شکایات تھیں، اب حالات اس سے بھی زیادہ خراب ہوچکے ہیں۔

شکار پور آپریشن
واضح رہے کہ وفاقی وزرا کی جانب سے یہ خدشات ایک ایسے وقت میں سامنے آئے ہیں جب ایک روز قبل ہی شکار پور میں ڈاکوؤں کے ایک گروپ کے خلاف آپریشن میں 2 پولیس اہلکاروں سمیت 4 افراد ہلاک ہوگئے۔

بعد ازاں پولیس نے قبائلی سربراہ سردار تیغو خان تیغانی کو ان کے دو بیٹوں کے ساتھ کراچی سے گرفتار کیا، جن پر شکار پور میں اغوا کاروں کی سرپرستی کا الزام ہے۔

یہ پیش رفت ضلع شکارپور کے علاقے گڑھی تیغو میں ڈاکوؤں کے خلاف آپریشن میں 2 پولیس اہلکاروں، ایس ایچ کے نجی گارڈ اور پولیس کے ساتھ کام کرنے والے نجی فوٹوگرافر کے جاں بحق ہونے کے ایک روز بعد عمل میں آئی۔

پولیس کا دعویٰ ہے کہ انہوں نے آپریشن کے دوران 6 اغواکاروں کو ہلاک کردیا تھا۔

پولیس انسپکٹر سید امیر علی شاہ کے ذریعے ریاست کی مدعیت میں درج کی گئی ایف آئی آر میں الزام لگایا گیا تھا کہ سردار تیغانی اور ان کے 2 بیٹے اپنے آبائی علاقے گڑھی تیغو میں ‘ اغواکاروں کی سرپرستی’ کررہے ہیں۔

ایف آئی آر میں کہا گیا کہ پولیس نے 2 مغویوں عنایت اللہ اور نقیب اللہ پٹھان کی بازیابی کے لیے گڑھی تیغو میں چھاپا مارا تھا اور جب نامزد اغوا کاروں نے پولیس کی بکتر بند گاڑی (اے پی سی) پر راکٹوں سے حملہ کیا تھا تو اس کے نتیجے میں 2 اہلکار جاں بحق ہوگئے تھے۔

وفاقی وزیر اطلاعات فواد چوہدری نے کہا ہے کہ کابینہ نے کالعدم قرار دی جانے والی جماعت تحریک لبیک پاکستان (ٹی ایل پی) کی نظر ثانی درخواست پر وزارت داخلہ کے تحت کمیٹی تشکیل دینے کی منظوری دے دی۔

اسلام آباد میں وفاقی وزیر منصوبہ بندی اسد عمر کے ہمراہ کابینہ اجلاس کے بعد میڈیا ریفنگ کے دوران انہوں نے کہا کہ انسداد دہشت گردی ایکٹ کے تحت ٹی ایل پی کی نظرثانی کی درخواست کا جائزہ لیا گیا۔

علاوہ ازیں انہوں نے کابینہ کے اجلاس سے متعلق تفصیلات بتائیں کہ پچھلے دس برس میں 226 کابینہ کے اجلاس ہوچکے ہیں۔

انہوں نے کہا کہ پیپلز پارٹی نے 67 اجلاس اور مسلم لیگ (ن) نے 3 سال میں صرف 23 اجلاس کیے۔

فواد چوہدری نے کہا کہ مسئلہ فلسیطن اور کشمیر پر وزیر اعظم نے وزیر خارجہ اور ان کی ٹیم کو سراہا ہے۔

انہوں نے کہا کہ شاہ محمود قریشی کو فلسطین کے مسئلے پر قائدانہ کردار پر خراج تحسین پیش کیا گیا۔

فواد چوہدری نے بتایا کہ پاک چین اقتصادی راہداری (سی پیک) سے منسلک اور سرمایہ کاری کی نیت سے آنے والے چینی باشندوں کے لیے ویزا کا خصوصی نظام منظور کیا گیا ہے۔

انہوں نے کہا کہ سی پیک سے منسلک چینی باشندوں کو 2 سال کے لیے ورک انٹری ویزا، چین میں پاکستانی مشن کی جانب سے 48 گھنٹوں میں جاری کیا جائے گا۔

فواد چوہدری نے کہا کہ ’سیکیورٹی کلیئرنس لازمی طور پر 30 دنوں میں کرلی جائے گی‘۔

وزیر اطلاعات نے کہا کہ چیف ایگزیکٹو افسر پاکستان ہاؤسنگ اتھارٹی فاؤنڈیشن تعینات کرنے کی سمری مؤخر کردی ہے۔

فواد چوہدری نے بتایا کہ پاک افغان ٹرانزٹ معاہدے میں 6 ماہ کی توسیع کی منظوری دی ہے۔

انہوں نے بتایا کہ بوسنیا کو کورونا سے بچاؤ پر پاکستان معاونت کرے گا۔

علاوہ ازیں انہوں نے کہا کہ کابینہ اجلاس میں ترکی اور سعودی عرب کے درمیان تعلقات کی تعریف کی گئی۔

انہوں نے بتایا کہ کابینہ کمیٹی ادارہ جاتی اصلاحات کے 29 اپریل کے فیصلوں کی توثیق کی۔

اس موقع پر اسد عمر نے گفتگو کرتے ہوئے کہا کہ کابینہ میں معاشی شرح نمو میں بہتری کے بنیادی محرکات پر گفتگو ہوئی اور دو چار چیزیں آپ کے علم لانا چاہتا ہوں جن کی وجہ سے معیشت میں نمایاں بہتری آئی۔

ان کا کہنا تھا کہ جس سال میں دنیا کی بڑی بڑی معیشتیں مشکلات کا شکار تھیں، جب کووڈ-19 کا اتنا بڑا چیلنج تھا تو ہمارے بہتر نتائج کی بنیاد کیا ہے اور اس کی بنیادی وجہ وزیراعظم کا اپنے ملک کے کمزور اور غریب طبقے کو بچا کر رکھنے کا فیصلہ تھا اور کورونا کا دفاع ایسے کرنا ہے کہ جس سے غربت میں بے تحاشا اضافہ اور لوگوں کا روزگار بند نہ ہو جائے۔

انہوں نے کہا کہ ہماری کوششوں کے باوجود بھی لوگوں کو مشکلات کا سامنا کرنا پڑا لیکن باقی دنیا کی نسبت ہم بہتر رہے اور ہمارا کمزور طبقہ اس کے اثر سے جلد نکل آیا اور این سی او سی میں توازن کے ساتھ چلنے کی حکمت عملی بنائی گئی اور اگر آپ خطے خصوصاً مغربی اور مشرقی ہمسایہ ممالک سے مقابلہ کر کے دیکھیں تو ہم اس بحران سے نکلنے میں کامیاب رہے اور بڑے اداروں نے گواہی دی اس وبا کے دوران پاکستان میں کام بہتر ہوا ہے۔

وزیر منصوبہ بندی نے کہا کہ انتہائی چھوٹے دورانیے میں احساس پروگرام شروع کیا گیا جو پاکستان کی تاریخ کا سب سے بڑا پروگرام چلایا گیا جس میں پاکستان کے ہر تیسرے گھر میں یہ پیسہ پہنچا اور یہ غریب لوگوں کو دیا گیا تو یہی پیسہ واپس معیشت کا حصہ بنا۔

انہوں نے اسٹیٹ بینک کے کردار کو سراہتے ہوئے کہا کہ وزارت فنانس نے پیکج متعارف کرا کے کاروباری افراد کی مدد کی اور وزیر اعظم نے تعمیراتی شعبے کی خود قیادت کی اور آئی ایم ایف سے مراعات حاصل کی گئیں۔

اسد عمر نے کہا کہ گزشتہ سال کے مقابلے میں بیرون ملک مقیم پاکستانی 5.4 ارب ڈالر زیادہ ترسیلات زر بھیج چکے ہیں اور الیکشن کمیشن سے ہماری استدعا ہے کہ وہ لوگ جنہوں نے اتنے مشکل میں پاکستان کی مدد کی ہے، انہیں ووٹ کا حق ملنا چاہیے اور سپریم کورٹ کے حکم پر عملدرآمد میں جو بھی رکاوٹیں ہیں، انہیں دور کرنا چاہیے۔

ان کا کہنا تھا کہ 5.4 ارب ڈالر 10 ماہ میں ترسیلات زر آ چکی ہے اور یہ اضافہ 6 سے ساڑھے 6 ارب ڈالر تک جائے گا تو اس کا مطلب یہ ہوا کہ ایک ہزار ارب روپے پاکستانیوں کے ہاتھ میں آئے۔

انہوں نے کہا کہ زراعت میں پانچ بڑی فصلیں ہیں جن میں سے کپاس کی فصل اچھی نہیں ہوئی، 4 میں سے 3 فصلوں کی ریکارڈ پیداوار ہوئی ہے، پاکستان کی تاریخ کی سب سے زیادہ گندم، مئی اور چاول پیدا ہوا، گنے کی فصل بھی بہترین رہی اور پاکستان کی تاریخ کی دوسری سب سے بڑی گنے کی فصل ہوئی۔

انہوں نے معاشی بہتری کے محرکات بتاتے ہوئے مزید کہا کہ بڑی پیمانے کی صنعت میں ماہوار 10 فیصد سے زائد اضافہ ہو رہا ہے اور مجموعی طور پر 9 فیصد کا اضافہ ہو چکا ہے اور ان اعدادوشمار میں اضافہ متوقع ہے۔

وفاقی وزیر نے کہا کہ تعمیراتی شعبے کی شرح نمو کی پیمائش ممکن نہیں لیکن سیمنٹ کی فروخت کے ذریعے اس کا اندازہ لگایا جا سکتا ہے اور گزشتہ کئی ماہ سے سیمنٹ ریکارڈ فروخت ہو رہی ہے۔

ان کا کہنا تھا کہ نجی شعبے میں 60 فیصد اضافہ ریکارڈ کیا گیا ہے لیکن اس سے بھی بڑی خبر ہے کہ نجی شعبہ سرمایہ کاری کے لیے جو پیسہ لے رہا ہے وہ پچھلے سال نہ ہونے کے برابر تھا لیکن اس سال پہلے 9 ماہ میں نجی شعبے کی جانب سے لیے جانے والے قرضوں میں 126 ارب روپے کا اضافہ ہوا ہے۔

وزیراعظم عمران خان نے کہا ہے کہ حکومت نے ملک کے نوجوانوں کو روزگار کی فراہمی کے لیے 2 خصوصی پروگرامز شروع کیے ہیں جس سے استفادہ کر کے وہ اپنے آپ کو اور ملک کو فائدہ پہنچا سکتے ہیں۔

نوجوانوں کے نام اپنے خصوصی پیغام میں وزیر اعظم عمران خان نے کہا کہ زیادہ تر نوجوانوں کو روزگار نہیں ملتا اور وہ کہتے ہیں کہ سرکاری نوکری پر لگادو لیکن حکومت کتنے لوگوں کو بھرتی کرسکتی ہے جبکہ حکومت کے پاس ویسے ہی اتنے ملازمین بھرتی کردیے گئے ہیں کہ پینش کا بل ہی ملک کو نیچے لے کر جارہا ہے۔

انہوں نے کہا کہ ہمارے پاس اس سے بہتر حل موجود ہے، ساری دنیا میں روزگار نجی شعبے میں ملتا ہے یا لوگ خود اپنے کاروبار شروع کرتے ہیں یعنی درمیانی اور متوسط صنعتیں جنہیں اسٹارٹ اپ کہا جاتا ہے، وہ پھر پیسہ بناتے ہیں۔

وزیر اعظم نے اعلان کیا کہ حکومت نوجوانوں کے لیے 2 پروگرامز لے کر آرہی ہے، اس میں سب سے پہلے اسکلز ایجوکیشن ہے جس کے لیے ہم ایک لاکھ 70 ہزار اسکالرشپس دے رہے ہیں، اس میں نوجوانوں کو ہنر مند بنایا جائے گا۔

پروگرام کی مزید تفصیلات سے آگاہ کرتے ہوئے انہوں نے کہا کہ اس میں سے 50 ہزار ایسی اسکالرشپس ہیں جو ہائی اینڈ اسکل ہے، مثلاً جدید ٹیکنالوجی جیسے آرٹیفیشل انٹیلیجنس وغیرہ۔

ان کا کہنا تھا کہ یہ وہ چیزیں آرہی ہیں کہ 6، 6 ماہ کے کورسز کے بعد آپ کو وہ نوکریاں ملیں گی کہ آپ سوچ بھی نہیں سکتے کیوں کہ دنیا بہت تیزی سے ٹیکنالوجی کے انقلاب کی جانب جارہی ہے۔

ساتھ ہی ان کا کہنا تھا کہ حکومت نوجوانوں کو دونوں طرح کے ہنر سکھائے گی، ہر کوئی ہائی ٹیکنالوجی کا کورس نہیں کرسکتا لیکن ہم 50 ہزار نوجوانوں کو موقع دیں گے۔

انہوں نے نوجوانوں کو مخاطب کرتے ہوئے کہا کہ اگر آپ کے پاس اپنا کاروبار کرنے کے لیے کسی قسم کا آئیڈیا ہے جسے اسٹارٹ اپس کہا جاتا ہے اور آپ کے پاس پیسے نہیں ہیں تو اس کے لیے ہم نے ایک کھرب روپے مختص کیے ہیں۔

وزیراعظم نے بتایا کہ اس رقم سے کامیاب نوجوان پروگرام کے تحت نوجوانوں کو قرضے دیے جائیں گے تاہم آپ کے پاس اپنے کام، کاروبار کا کوئی بھی آئیڈیا ہو تو آپ کو قرض کے حصول کے لیے میرٹ پر کوالیفائی کرنا پڑے گا۔

ان کا کہنا تھا کہ پاکستان کی تاریخ میں پہلی مرتبہ 100 ارب روپے کی رقم مختص کی گئی ہے تاکہ نوجوان اپنا کاروبار شروع کرسکیں۔

ساتھ ہی ان کا کہنا تھا کہ ہماری کوشش یہ ہے کہ ہم ہر سال اس میں اضافہ کرتے رہیں اور زیادہ سے زیادہ نوجوانوں تک پہنچ سکیں اور نوجوان آبادی کو بھی روزگار ملے اور یہ ملک کو بھی اٹھا سکیں۔

وزیر اعظم نے اُمید ظاہر کی کہ نوجوان اسکلز ایجوکیشن اور کامیاب جواب پروگرام سے پوری طرح فائدہ اٹھا کر اپنے ساتھ ساتھ ملک کو بھی فائدہ پہنچائیں گے۔

جمعیت علمائے اسلام (ف) اور پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمٰن نے کہا ہے کہ اے این پی اور پیپلز پارٹی کو کہا گیا ہے کہ آپ اپنے فیصلوں پر نظرِثانی کریں آپ سے جلد بازی ہوگئی ہے اور ضرورت سے زیادہ مؤقف دیا۔

اسلام آباد میں نیوز کانفرنس کرتے ہوئے مولانا فضل الرحمٰن نے کہا کہ پی ڈی ایم کی جانب سے آپ کا پورا احترام رکھا گیا لیکن آپ کے جواب نے پی ڈی ایم کی توہین کی ہے جس کا ازالہ آپ کو کرنا پڑے گا۔

پی پی پی کے بیان سے متعلق ایک اور سوال پر ان کا کہنا تھا کہ پیپلز پارٹی کی قیادت ابھی میچور نہیں ہے کہ سیاستدانوں کے پروٹوکول کو فالو کر سکے۔

جو کام تین سال میں نہیں ہوسکا وہ کیا 2 سالوں میں ہوجائے گا؟ کے جواب میں مولانا نے کہا کہ جب تک تحریک اپنے اصولوں پر قائم ہے تو اس سے مستقبل وابستہ کیا جاسکتا ہے۔

انہوں نے کہا کہ پی ڈی ایم کی تحریک اپنے اصولوں پر قائم ہے جس کے لیے کچھ دوستوں کی قربانی بھی دی، اس بنیاد پر ہم پاکستان کو ایک روشن مستقبل دینے کے لیے پر امید ہیں۔

پیپلز پارٹی اور اے این پی کی دوبارہ پی ڈی ایم میں شمولیت سے متعلق سوال کے جواب میں انہوں نے کہا کہ ان جماعتوں کو پی ڈی ایم کے سربراہی اجلاس میں مدعو کرنے کی کوئی تجویز موجود نہیں ہے۔

ان کا کہنا تھا کہ جو جماعتیں پی ڈی ایم کا حصہ ہیں انہی کے سربراہان اجلاس میں بیٹھیں گے، غور و فکر اور فیصلہ کریں گے، اس طرح ہوائی طور پر فیصلے نہیں ہوا کرتے۔

کیا شہباز شریف سے ملاقات میں پیپلز پارٹی یا اے این پی کی واپسی کے حوالے سے کوئی بات ہوئی؟ کے جواب میں مولانا فضل الرحمٰن کا کہنا تھا کہ طے کیا گیا ہے کہ اس حوالے سے کوئی بھی فیصلہ پی ڈی ایم کے اجلاس میں کیا جائے گا۔

ایک سوال کے جواب میں انہوں نے کہا کہ ہم چاہتے ہیں کہ ہر ایک اپنے آئینی دائرہ کار میں رہے اس حوالے سے کسی کو کوئی بات بری نہیں لگنی چاہیے، ملک کو سیاست دان اکیلے نہیں چلاتے اس میں بیوروکریسی اور اسٹیبلشمنٹ بھی ساتھ چلتی ہے۔

ان کا کہنا تھا کہ ضمنی الیکشن میں واضح ہوگیا اسٹیبلشمنٹ کردار ادا کرے تو نتیجہ کیا ہوتا ہے اور نہ کرے تو کیا ہوتا ہے۔

سربراہ جے یو آئی (ف) نے کہا کہ جے یو آئی (ف) کی مرکزی مجلس شوریٰ نے وقف املاک ایکٹ کو مسترد کرتے ہوئے قرآن و سنت اور آئین کے منافی قرار دیا ہے۔

انہوں نے کہا کہ اس قانون کو واپس لے کر اسے نظر ثانی کے لیے اسلامی نظریاتی کونسل میں بھیجا جائے، حکومت نے نئے بورڈز کی منظوری دے کر مدارس کے نظم و ضبط کو تباہ کرنے کی کوشش کی ہے۔

انہوں نے مزید کہا کہ جے یو آئی سے کسی طرح بھی وابستہ کوئی بھی مدرسہ کسی سرکاری بورڈ میں شمولیت اختیار نہیں کرے گا، ہم سمجھتے ہیں حکومت کے یہ اقدامات مدارس کو کمزور کرنے کے عالمی قوتوں کے ایجنڈے کی تکمیل کے لیے کیے گئے۔

مولانا فضل الرحمٰن نے کہا کہ ہمارا عزم ہے کہ اسٹیبلشمنٹ کی پشت پناہی میں بنائے گئے یہ بورڈ اسی طرح غیر مؤثر کردیے جائیں گے جیسے پرویز مشرف کے ماڈل مدرسہ بورڈ کے منصوبے کو ناکام بنایا گیا تھا۔

انہوں نے کہا کہ ہمارا اصولی مؤقف ہے کہ پاکستان کی فضائی اور زمینی حدود کسی کو استعمال کرنے کی اجازت نہ دی جائے، یہ کہنا کہ القاعدہ پھر زندہ ہوگئی ہے، یہ القاعدہ ساری زندگی امریکی مفادات کے لیے زندہ ہوتی رہے گی جسے بنیاد بنا کر وہ ساری دنیا میں فوجیں بھیجتے رہیں گے لیکن یہ ڈرامے اب نہیں چلیں گے۔

مسلم لیگ (ن) کی رہنما مریم نواز نے گزشتہ روز شہباز شریف کے دیے گئے عشائیے میں شرکت نہ کرنے کے حوالے سے کہا ہے کہ جہاں شہباز شریف موجود ہوں وہاں میری موجودگی کی ضرورت نہیں ہے، اس کا ایشو نہ بنایا جائے۔

اسلام آباد ہائیکورٹ میں پیشی کے موقع پر میڈیا سے گفتگو کے دوران گزشتہ رٍوز شہباز شریف کی جانب سے پاکستان ڈیموکریٹک موومنٹ (پی ڈی ایم) کی جماعتوں کو دیے گئے عشائیے میں عدم شرکت سے متعلق سوال پر مریم نواز نے کہا کہ وہ قائد حزب اختلاف ہیں اور انہوں نے پارلیمینٹیرینز کے لیے عشائیہ دیا تھا اور میں رکن پارلیمان نہیں ہوں۔

ان کا کہنا تھا کہ شہباز شریف نے گزشتہ روز جو عشائیہ دیا وہ پی ڈی ایم کا نہیں تھا بلکہ بطور اپوزیشن لیڈر اپنے فرائض کی ذمہ داریوں کی ادائیگی کے لیے منعقد کیا تھا، وہ بجٹ سے متعلق منصوبہ بندی کے لیے تھا اس سے پی ڈی ایم کا کوئی لینا دینا نہیں ہے۔

ان کا کہنا تھا کہ پی ڈی ایم کا اور مسلم لیگ (ن) کا آج بھی وہی مؤقف ہے جو کل شاہد خاقان عباسی صاحب نے کہا اور اس میں کوئی تبدیلی نہیں آئی ہے۔

شہباز شریف کی سربراہی میں ممکنہ نئے اتحاد کے حوالے سے پوچھے گئے سوال کے جواب میں انہوں نے کسی نئے اتحاد کی تردید کی اور کہا کہ پی ڈی ایم موجود ہے، اور پی ڈی ایم نے رمضان المبارک کے بعد اگلے لائحہ عمل کے لیے اجلاس کا فیصلہ کیا تھا جو آئندہ چند روز میں ہوگا اور اس میں فیصلہ کیا جائے گا کہ کیا کرنا ہے۔

تحریک عدم اعتماد سے متعلق سوال کے جواب میں رہنما مسلم لیگ (ن) نے کہا کہ تحریک عدم اعتماد پیش کرنے کے لیے ہمیں پنجاب میں نمبرز کی ضرورت نہیں ہمارے پاس نمبر سے زیادہ اراکین موجود ہیں۔

ایک سوال کے جواب میں انہوں نے کہا کہ شاہد خاقان عباسی کی میڈیا ٹاک میں نے نہیں سنی لیکن عدالت میں مجھ سے سوال کیا گیا جس میں یہ جواب دیا کہ شاہد خاقان عباسی نے وہی مؤقف پیش کیا جو مسلم لیگ (ن) کا مؤقف ہے، جو میرا اور پی ڈی ایم کا مؤقف ہے۔

انہوں نے کہا کہ جن جماعتوں کو اظہار وجوہ کے نوٹسز جاری ہوئے تھے ان کا جواب ابھی تک نہیں آیا تو جب وہ جواب آجائے گا تو بیٹھ کر دیکھیں گے کہ اس کا کیا کرنا ہے۔

ایک سوال کے جواب میں مریم نواز نے کہا کہ یہ جو حکومت کی جانب سے اعداد و شمار کا ہیر پھیر کر کے شرح نمو بتائی جارہی ہے وہ ایسا جھوٹ ہے کہ خود ان کے اپنے لوگ ماننے کو تیار نہیں ہیں، حفیظ پاشا نے کہا کہ یہ ناممکن ہے۔

انہوں نے کہا کہ میں سمجھتی ہوں کہ اعداد و شمار سے ہٹ کر شرح نمو کا اگر حقیقی پیمانہ دیکھنا ہے تو آئیں میرے ساتھ لوگوں کے گھروں میں بازاروں میں چلیں، کس طرح ہر طبقہ مہنگائی سے متاثر ہے چاہے وہ امیر طبقہ ہو اور غریب تو بالکل پِس گیا ہے، آئیں میرے ساتھ چلیں اور دیکھیں کہ لوگوں کے گھروں میں، ان کی آمدن میں کیسی ترقی ہورہی ہے۔

ان کا کہنا تھا کہ عوام تباہ حال ہوگئے ہیں، جھولیاں اٹھا کر بددعائیں دے رہے ہیں، بازاروں میں جائیں اور وہ 2 چار اسٹال فکس میچ نہ ہو، کسی سبزی منڈی میں چلیں، کسی کریانہ کی دکان پر کسی غریب کے گھر میں چلیں اور دیکھیں وہاں حالات کیا ہیں، آپ کو معلوم ہوگا کہ مہنگائی نے کس طرح لوگوں کی زندگیوں کو عذاب میں مبتلا کردیا ہے۔

سپریم کورٹ نے اپوزیشن لیڈر شہباز شریف کے بیرون ملک جانے اور نام بلیک لسٹ سے نکالنے کے خلاف وفاقی حکومت کی درخواست پر لاہور ہائی کورٹ سے مقدمے کا ریکارڈ طلب کرتے ہوئے شہباز شریف سمیت فریقین کو نوٹس جاری کردیے جبکہ قومی احتساب بیور (نیب) کو نوٹس جاری کرنے کی استدعا مسترد کردی۔

صدر مسلم لیگ (ن) شہباز شریف کے خلاف وفاقی حکومت کی درخواست پر سماعت جسٹس اعجازالاحسن کی سربراہی میں دو رکنی بینچ نے کی۔

اٹارنی جنرل نے دلائل دیتے ہوئے کہا مسئلہ کسی کے بیرون ملک جانے کا نہیں عدالتی طریقہ کار کا ہے، جس رفتار سے عدالت لگی اور حکم پر عملدرآمد کا کہا گیا وہ قابل تشویش ہے۔

انہوں نے کہا کہ ہائی کورٹ میں جمعۃ الوداع کے روز اعتراضات لگے اور اسی دن دور بھی ہوئے۔

جسٹس سجاد علی شاہ نے ریمارکس دیے کہ شہباز شریف نے ہائی کورٹ سے درخواست واپس لے لی ہے اور درخواست واپس ہونے پر وفاق کی اپیل کیسے سنی جا سکتی ہے؟

اٹارنی جنرل نے کہا کہ درخواست واپس لینے کے حکم میں بیرون ملک جانے کی اجازت دینے کا فیصلہ واپس نہیں لیا گیا اور شہباز شریف کی توہین عدالت کی درخواست زیر التوا ہے۔

انہوں نے مزید کہا کہ شہباز شریف کی ضمانت طبی بنیاد پر نہیں ہوئی۔

جس پر جسٹس اعجاز الاحسن نے استفسار کیا کہ کیا ضمانت کے دوران بیرون ملک جانے پر پابندی ہے؟

اٹارنی جنرل نے کہا کہ توہین عدالت درخواست کے ذریعے بیرون ملک روانگی کے فیصلے پر عمل کرایا جاسکتا اور اگر کوئی قانونی پابندی نہ ہو تو جیل سے سیدھا ایئرپورٹ جایا جا سکتا ہے۔

انہوں نے کہا کہ لاہور ہائی کورٹ کے فیصلے پر عملدرآمد نہ ہونے پر انہوں نے توہین عدالت کی درخواست دائر کی۔

جسٹس سجاد علی شاہ نے استفسار کیا کہ توہین عدالت سے متعلق عدالت نے کیا کہا؟

اٹارنی جنرل نے جواب دیا کہ اس معاملے پر عدالت خاموش رہی۔

جسٹس سجاد علی شاہ نے دوبارہ استفسار کیا کہ کیا شہباز شریف کے بیرون ملک جانے کا سوال اب ختم ہوچکا؟

اٹارنی جنرل نے کہا کہ شہباز شریف کی جانب سے درخواست دائر ہوتے ہی سماعت کے لیے مقرر ہوگئی جبکہ ہائی کورٹ نے فریقین کو نوٹس جاری کیے بغیر فیصلہ دے دیا۔

انہوں نے مزید کہا کہ 7مئی جمعۃ الوداع کے دن ہائی کورٹ نے فیصلہ دیا۔

جس پر جسٹس سجاد علی شاہ نے ریمارکس دیے کہ درخواست بھی 7مئی کو ہی دائر ہوئی۔

جسٹس اعجاز الاحسن نے ریمارکس دے کہ حیرت ہے کہ ہائی کورٹ نے فریقین کو سنے بغیر فیصلہ کیسے دے دیا۔

اٹارنی جنرل نے کہا کہ معاملہ اس کے بیرون ملک جانے کا نہیں بلکہ ہائی کورٹ کے فیصلے کا ہے۔

انہوں نے مزید کہا کہ شہباز شریف کے بقول ان کا نام بلیک لسٹ میں تھا، وفاق کا موقف سنا جاتا تو آگاہ کر دیتے کہ نام بلیک لسٹ میں نہیں ہے بلکہ ای سی ایل میں ہے۔

جسٹس اعجاز الاحسن نے ریماکس دیے کہ اتنی جلدی میں سارا کام کیسے ہو سکتا ہے؟ جبکہ انتہائی ارجنٹ درخواست پر چیف جسٹس کی باقاعدہ تحریر ہوتی ہے۔

عدالت نے رجسٹرار لاہور ہائی کورٹ سے ریکارڈ طلب کرتے ہوئے شہباز شریف سمیت فریقین کو نوٹس جاری کردیے۔

علاوہ ازیں عدالت نے نیب کو نوٹس جاری کرنے کی استدعا مسترد کر تے ہوئے سماعت آئندہ بدھ تک ملتوی کردی۔

راولپنڈی: وزیراعظم عمران خان کے زیر صدارت آئی ایس آئی ہیڈ کوارٹرز میں اہم اجلاس منعقد ہوا جس میں انھیں ملکی سیکیورٹی صورتحال سمیت اہم امور پر بریفنگ دی گئی۔

وزیراعظم عمران خان اپنے رفقا کے ہمراہ آئی ایس آئی ہیڈ کوارٹرز پہنچے تو لیفٹیننٹ جنرل فیض حمید نے ان کا استقبال کیا۔ بعد ازاں انہوں نے ایک اہم اجلاس میں وزیراعظم کو اہم معاملات پر بریفنگ دی۔

اس اہم اجلاس میں وفاقی وزیر داخلہ شیخ رشید، وزیر خزانہ شوکت ترین اور مشیر قومی سلامتی معید یوسف نے شرکت کی۔

ذرائع کے مطابق اجلاس میں اعلیٰ عسکری حکام اور وزارت خارجہ کے حکام بھی شریک تھے۔ اجلاس میں افغان امن عمل میں پاکستان کے کردار پر تفصیلی بات چیت کی گئی جبکہ ملکی سلامتی سے متعلق امور پر بھی تفصیلی غور کیا گیا۔

وزیراعظم کو ملک کی اندرونی اور بیرونی سیکیورٹی صورتحال پر بھی بریفنگ دی گئی۔ ذرائع کے مطابق وزیراعظم وفد کے ہمراہ 3 گھنٹے سے زائد تک آئی ایس آئی ہیڈ کوراٹرز میں موجود رہے۔

وزیراعظم عمران خان کے دورہ آئی ایس آئی ہیڈ کوارٹرز کا اعلامیہ جاری کر دیا گیا ہے جس میں کہا گیا ہے کہ اس موقع پر چیف آف آرمی سٹاف چیف جنرل قمر جاوید باجوہ، چئیرمین جوائنٹ چیف آف سٹاف کمیٹی جنرل ندیم رضا، ائیر چیف مارشل ظہیر احمد بابر اور نیول چیف ایڈمرل محمد امجد خان نیازی بھی ہمراہ تھے۔

اجلاس میں اعلیٰ قومی اور عسکری قیادت کو علاقائی اور ملکی سلامتی کی صورتحال پر بریفنگ دی گئی۔ وزیراعظم نے قومی سلامتی کو درپیش چیلنجز کے خلاف آئی ایس آئی کی پیشہ ورانہ صلاحیتوں کو سراہا۔

مسلم لیگ ن کے جنرل سیکرٹری احسن اقبال کا کہنا ہےکہ کرتارپور راہداری منصوبہ قواعد وضوابط کے خلاف بنایا گیا، قومی احتساب بیورو (نیب) میں جرات ہے کہ وزیراعظم اور وزیر منصوبہ بندی کےخلاف ریفرنس بنائے؟

اسلام آباد میں احتساب عدالت میں پیشی کے بعد میڈیا سے گفتگو میں احسن اقبال نے کہا کہ عمران خان نے کابینہ سے 17ارب روپے کا این آر او حاصل کر لیا ہے، منصوبے کا ٹینڈر ہوتا تو پانچ ارب روپے کی بچت ہوسکتی تھی،ن لیگ اپنے دور میں لیےگئے قرضوں کی پائی پائی کا حساب ہر فورم پر دینے کو تیار ہے۔

احسن اقبال کا کہنا تھا کہ حکومت چلی نہیں اور ملک کا بیڑہ غرق کر دیا، موجودہ حکومت نے تمام قرضے خسارہ پورے کرنے کے لیے حاصل کیے جو عمران نیازی کی نااہلی اور ناکامی کی نذر ہوگئے۔

ان کا کہنا تھا کہ تین سالوں میں آپ نے مافیاز کو پالا، حکومت ان سے کیسے لڑ سکتی ہے؟ ضمنی انتخابات میں ہار کے بعد عمران خان کو شکست نظر آ رہی ہے، حکومتی مشیر کہہ رہے ہیں کہ معیشت ٹیک آف کر گئی، اگر مہنگائی کا ٹیک آف کرنا معیشت کا ٹیک آف کرنا ہے تو آپ ٹھیک کہہ رہے ہیں۔

سابق وزیرِ داخلہ اور آزاد حیثیت میں انتخابات میں حصہ لینے والے مسلم لیگ (ن) کے ناراض رہنما چوہدری نثار احمد نے کہا ہے کہ وہ کسی سیاسی کھیل کا حصہ نہیں ہیں اور اپنے مؤقف پر آج بھی قائم ہیں۔

لاہور میں پنجاب اسمبلی کے باہر میڈیا سے گفتگو کرتے ہوئے چوہدری نثار کا کہنا تھا کہ سیاست سے 3 سال تک کنارہ کشی کے بعد میں آج میڈیا کے سامنے پیش ہوا ہوں۔

انہوں نے کہا کہ آپ جانتے ہیں کہ پچھلے الیکشن میں، میں صوبائی اسملی کی نشتست سے 34 ہزار سے ووٹوں کی لیڈ سے منتخب ہوا، میں اصل میں قومی اسمبلی کی نشست سے الیکشن لڑ رہا تھا وہاں سے ناکام ہوا یا مجھے ناکام کیا گیا۔

چوہدری نثار کا کہنا تھا کہ میرا ایک مؤقف تھا اور میں اس مؤقف پر آج بھی قائم ہوں۔

انہوں نے مزید کہا کہ حلف لینے کا فیصلہ اس لیے کیا کہ ایک سیاسی پیش رفت ہوئی، حکومت ایک خودشاختہ آرڈیننس لانے کی کوشش میں ہے حالانکہ سینیٹ، قومی اسمبلی کے لیے ارکان کا اہل ہونا، ان کا انتخاب اور نااہلی یہ سب آئین میں شامل ہیں کہ کس طرح الیکشن ہوتا ہے، حلف لیا جاتا ہے اور کس طریقے سے نااہل قرار دیا جاتا ہے۔

چوہدری نثار کا مزید کہنا تھا کہ حکومت ایک ایسا آرڈیننس لانے کی کوشش میں ہے جس میں ایک نااہلی کا اضافہ کیا جائے گا، اگر نااہلی قانون کے مطابق ہو تو ہمیں کوئی اعتراض نہیں مگر رات کے اندھیرے میں آرڈینن کے ذریعے ہو تو اس پر اعتراضات ہیں۔

اپنی بات کو جاری رکھتے ہوئے انہوں نے کہا کہ اب اگر ایسا ہوجاتا تو میں خود تو الیکشن نہ لڑتا میرا نمائندہ لڑتا تو کہتے کہ ایک طرف انہیں نظام پر شکوک ہیں اور دوسری طرف یہ الیکشن میں حصہ لے رہے ہیں یہ تو مان گئے ہیں، اگر نہ لڑتا تو مخالفین کو ایک فری ہینڈ دینے کے مترادف تھا خاص طور پر جب عام انتخابات بہت قریب ہیں۔

چوہدری نثار نے کہا کہ اس لیے میں نے حلف لینے کا فیصلہ کیا، میں کسی سیاسی کھیل کا حصہ نہیں ہوں، آپ کو بالکل یقین دہانی ہونی چاہیے۔

ان کا کہنا تھا کہ ہم نے ایک ہفتہ قبل حلف لینے سے متعلق تحریری طور پر صوبائی اسمبلی کو بھی آگاہ کیا اور الیکشن کمیشن کو بھی اس کی کاپی ارسال کی تھی اور دن متعین تھا مگر آج یہ کہا گیا کہ اسپیکر اور ڈپٹی اسپیکر کے بغیر حلف نہیں لیا جاسکتا، یہ مؤقف بالکل ٖغلط ہے۔

چوہدری نثار نے مزید کہا کہ جو بھی چیئرمین ہوتا ہے اس کے پاس اسپیکر کے مکمل اختیارات ہوتے ہیں تو اس کے حوالے سے ہمارا کیا مؤقف ہوگا یا ہم کیا کریں گے، اس سلسلے میں ہم قانونی رائے لیں گے اور عین ممکن ہے کہ کل یا پرسوں ہم عدالت جائیں۔

ایک سوال کے جواب میں انہوں نے کہا کہ لاہور میں بیٹھ کر یہ فیصلے نہ کریں میرے حلقے میں جائیں اور لوگوں سے ہوچھیں کہ میں نمائندگی کررہا ہوں یا نہیں، نہ صرف صوبائی اسمبلی کے حلقے بلکہ قومی اسمبلی کے حلقوں میں بھی جاکر پوچھیں کہ میں ان کی نمائندگی کررہا ہوں یا نہیں۔

انہوں نے کہا کہ عمران خان کے اور بھی بہت دوست ہیں، ان کو مشورے کی ضرورت نہیں ہے، ویسے بھی پاکستان میں جب کوئی حکمران بن جاتا ہے تو بہت سارے لوگ مشورے دینے کے لیے اکٹھے ہوجاتے ہیں۔

چوہدری نثار نے کہا کہ میں پھر بھی عمران خان سے یہی کہوں گا کہ ٹھنڈا کرکے کھائیں حکمران کو سب کو اکٹھا لے کر چلنا ہوتا ہے، آج اس ملک کو افہام و تفہیم اور قوم کو متحد کرنے کی ضرورت ہے۔

حلف کیلئے پنجاب اسمبلی کا دورہ
چوہدری نثار آج (24 مئی کو) حلف اٹھانے کے لیے پنجاب اسمبلی گئے تھے لیکن انہیں بتایا گیا کہ آپ حلف نہیں اٹھا سکتے، اسپیکر اور ڈپٹی اسپیکر اسمبلی میں موجود نہیں ہیں۔

سابق وزیر داخلہ نے ڈیڑھ گھنٹہ سیکرٹری اسمبلی محمد خان بھٹی کے ساتھ اسپیکر کے کمرے میں گزارا اور حلف لیے بغیر واپس روانہ ہو گئے۔

تاہم چوہدری نثار نے جاتے جاتے حلف کے لیے دو دن بعد دوبارہ آنے کا اعلان بھی کیا۔

واضح رہے کہ نون لیگ کے ناراض رہنما چوہدری نثار تقريبا 3سال بعد آج 24 مئی کو پنجاب اسمبلی کی رکنیت کا حلف اٹھائیں گے۔

یاد رہے کہ چوہدری نثار کا کہنا تھا کہ حلف اٹھانے سے قطعاً اُن کے موقف میں تبدیلی نہیں آئے گی اور اسمبلی سے کسی قسم کی مراعات، تنخواہ یا ٹی اے ڈی اے نہیں ليں گے۔

گزشتہ روز چوہدری نثار نے اسمبلی کی رکنیت کا حلف اٹھانے کے حوالے سے پائی جانے والی مختلف قیاس آرائیوں پر اپنی خاموشی توڑتے ہوئے ایک باضابطہ بیان جاری کیا تھا اور کہا تھا کہ وہ 24 مئی کو حلف اٹھائیں گے۔

خیال رہے کہ چوہدری نثار نے سال 2018 کے انتخابات سے قبل 34 سالہ رفاقت کے بعد مسلم لیگ (ن) سے اپنی راہیں جدا کرلی تھیں، پارٹی سے رخصت ہونے سے پہلے انہوں نے کھلے عام شریف برادران کے فیصلوں پر ناراضی کا اظہار کیا تھا، آخری مرتبہ وہ بیگم کلثوم نواز کے جنازے میں شرکت کے وقت دیکھے گئے تھے۔

چوہدری نثار اور شریف برادران کے درمیان اختلافات اس وقت کھل کر سامنے آئے تھے جب سابق وزیر نے کہا تھا کہ وہ انتخابی ٹکٹ کے لیے مسلم لیگ (ن) کی پارلیمانی کمیٹی سے بھیک نہیں مانگیں گے۔

اس کے علاوہ انہوں نے مسلم لیگ (ن) کے ’خاندانی جماعت‘ بننے پر بھی تنقید کی تھی جس پر انہوں نے کہا تھا کہ میں کبھی پارٹی چھوڑنا نہیں چاہتا تھا لیکن اب پارٹی میں رہنا مشکل ہے۔

بعدازاں چوہدری نثار نے 2018 میں آزاد امیدوار کی حیثیت سے انتخابات میں حصہ لیا تھا اور پنجاب اسمبلی کی نشست حاصل کرنے میں کامیاب ہوگئے تھے تاہم انہوں نے اب تک رکنیت کا حلف نہیں اٹھایا۔

یہاں یہ بات مدِ نظر رہے کہ اپریل کے اوائل میں وفاقی کابینہ نے الیکشن ایکٹ 2017 میں ترمیم کی منظوری دی تھی جس کے نتیجے میں سابق وزیر خزانہ اسحٰق ڈار اور سابق وزیر داخلہ چوہدری نثار علی خان کی بالترتیب سینیٹ اور پنجاب اسمبلی سے رکنیت منسوخ ہوسکتی ہے۔

پشاور: خیبرپختونخوا کے وزیراعلیٰ محمود خان بھیس بدل کر ڈی سی آفس پہنچ گئے، مقررہ لائسنس فیس سے زیادہ وصول کرنے پر لائسنس برانچ کے انچارج سمیت عملے کو معطل کر دیا۔ ڈپٹی کمشنر کو معاملات بہتر بنانے کے لیے وارننگ دے دی۔

وزیراعلیٰ محمود خان ڈی سی آفس میں کرپشن کا بازار گرم ہونے سے متعلق شہری کی شکایت پر بھیس بدل کر ڈی سی آفس پہنچ گئے۔ وزیر اعلیٰ نے عام شہری کی طرح معاملات کا جائزہ لیا۔ اسلحہ لائسنس کا عملہ مقررہ فیس سے زائد وصولی پر رنگے ہاتھوں پکڑا گیا، عملہ 300 کی بجائے ایک ہزار روپے فی لائسنس وصول کر رہا تھا۔ محمود خان نے مقررہ لائسنس فیس سے زیادہ وصول کرنے پر لائسنس برانچ کے انچارج سمیت برانچ کے سارے عملے کو معطل کر دیا۔

محمود خان نے معطل اہلکاروں کے خلاف انکوائری کی ہدایت بھی جاری کیں جبکہ ڈی سی آفس کے معاملات کی چھان بین کے لئے انکوائری کمیٹی بنانے کا اعلان کیا۔ وزیراعلیٰ نے ڈی سی آفس میں سکیورٹی اور انتظامی معاملات پر عدم اطمینان کا اظہار کیا اور ڈپٹی کمشنر کو معاملات بہتر بنانے کے لئے وارننگ جاری کیں۔ ان کا کہنا تھا کہ بدعنوانی کسی صورت برداشت نہیں، بدعنوانی میں ملوث کسی بھی اہلکارکو معاف نہیں کیا جائے گا، خود عوام کے درمیان جا کر معاملات کا جائزہ لیتا رہوں گا۔