Category سیاست

لاہور: شہباز شریف نے بلیک لسٹ سے نام نکلوانے کے لئے دی گئی درخواستیں واپس لینے کا فیصلہ کرلیا۔

مسلم لیگ (ن) کے صدر شہباز شریف نے اپنا نام ای سی ایل سے نکلوانے اور عدالتی فیصلے پر عمل درآمد کروانے سے متعلق اپنی تمام درخواستیں واپس لینے کا فیصلہ کیا ہے، اور اس حوالے سے انہوں نے لاہور ہائی کورٹ سے بھی رجوع کرلیا ہے۔

شہباز شریف کی جانب سے لاہور ہائی کورٹ میں اعظم نذیر تارڑ اور امجد پرویز ایڈووکیٹ نے درخواست دائر کی ہے، جس میں مؤقف پیش کیا گیا ہے کہ وفاقی حکومت نے شہباز شریف کا نام ای سی ایل میں شامل کردیا ہے، نام ای سی ایل میں شامل ہونے کے باعث درخواست واپس لینا چاہتے ہیں، جب کہ عدالت نے 26مئی کے لیے عمل درآمد کیس میں نوٹسز جاری کررکھے ہیں، ہم عمل درآمد سے متعلق درخواست کی پیروی نہیں کرنا چاہتے عدالت درخواست واپس کرے۔

دوسری جانب لاہور ہائی کورٹ نے شہبازشریف کی درخواست سماعت کے لئے مقرر کردی ہے، اور جسٹس علی باقر نجفی 24 مئی کو شہباز شریف کی درخواست پر سماعت کریں گے۔

واضح رہے کہ لاہور ہائیکورٹ کے جسٹس علی باقر نجفی نے شہباز شریف کو 8 ہفتوں کے لیے بیرون ملک جانے کی اجازت دی تھی، تاہم شہبازشریف کو حکومت کی جانب سے بیرون ملک جانے سے روک دیا گیا تھا، جس پر انہوں نے ڈی جی ایف آئی اے، سیکرٹری داخلہ، اور وفاقی حکومت کو فریق بناتے ہوئے لاہور ہائی کورٹ میں توہین عدالت کی درخواست دائر کی تھی، جس میں مؤقف پیش کیا گیا تھا کہ عدالت نے مجھے بیرون ملک جانے کی اجازت دی لیکن امیگریشن حکام نے بیرون ملک جانے سے روک دیا، عدالت سے استدعا ہے کہ متعلقہ حکام کے خلاف توہین عدالت کی کارروائی کی جائے۔

بلاول بھٹو زرداری نے کہا ہے کہ معاشی ترقی کے جھوٹے دعوے پرپی ٹی آئی حکومت کو شرم آنی چاہیے۔

اپنے بیان میں چیئرمین پیپلز پارٹی بلاول نے کہا کہ عمران خان کو آزمانے والوں نے پاکستان کےعوام کو بدترین آزمائش میں مبتلا کردیا۔

انہوں نے کہا کہ ریٹائرڈ ملازمین سے پینشن پر 10 فیصد ٹیکس لینے کا منصوبہ مسترد کرتے ہیں، عوام دشمن پالیسیوں کا ہرفورم پرمقابلہ کریں گے۔

بلاول نے کہا کہ خیبرپختونخوامیں شرح غربت 27 فیصد پر پہنچ چکی ہے، سندھ میں کمی ہوئی ہے۔

اسلام آباد: نیب نے جعلی اکاؤنٹس کیس میں آصف زرداری، یوسف رضا گیلانی اور حسین لوائی سمیت دیگر کے خلاف ریفرنسز میں 23 ارب 85 کروڑ روپے بھی وصول کرلئے۔

چیئرمین نیب جاوید اقبال کی زیر صدارت اجلاس ہوا، جس میں نیب راولپنڈی کی کارکردگی کا جائزہ لیا گیا، اور ڈی جی نیب راولپنڈی نے کارکردگی سے متعلق بریفنگ دیتے ہوئے بتایا کہ نیب راولپنڈی نے احتساب عدالتوں میں جعلی اکاوٴنٹس کیسز کی تحقیقات کے بعد 14 ریفرنس دائر کئے اور جعلی بنک اکاونٹس کیس میں 23 ارب روپے سے زائد وصول کیے۔

نیب اعلامیے میں بتایا گیا کہ نیب نے جعلی اکاؤنٹس کیس میں 23 ارب 85 کروڑ روپے وصول کر لئے، یہ رقم آصف زرداری، یوسف رضا گیلانی اور حسین لوائی سمیت دیگر کے خلاف ریفرنسز میں ریکور کی۔

اس موقع پر چیئرمن نیب جسٹس (ر) جاوید اقبال کا کہنا تھا کہ نیب پر بلاجواز تنقید نہ کی جائے، بلاوجہ وہی تنقید کرتے جن کو نیب قانون کا علم ہی نہیں، نیب کے خلاف ایک منظم پرپیگنڈہ کیا جا رہا ہے، ہمیشہ کہا کہ مثبت تنقید کا خیرمقدم کہیں گے۔

شیئر

اسلام آباد: وزیراعظم عمران خان نے کہا کہ نیب 23 سال سے کرپشن کیخلاف کام کررہا ہے، لیکن ہم اس لیے کرپشن پر قابو نہیں پا سکے کیونکہ ہم صرف چھوٹے لوگوں کو پکڑتے ہیں۔

وزیراعظم نے کراچی نیوکلیئر پاور پلانٹ یونٹ ٹو کا افتتاح کر دیا۔ اس موقع پر خطاب کرتے ہوئے انہوں نے کہا کہ پاور پلانٹ 1100 میگاواٹ بجلی پیدا کرےگا، چین کے اشتراک سےلگائے گئے پلانٹ سے نوجوانوں کو تکنیکی تربیت دینےمیں مدد ملےگی، پاک چین سفارتی تعلقات کو70سال ہوچکے، اور دونوں نے ہر مشکل وقت میں ایک دوسرےکاساتھ دیا۔

عمران خان کا کہنا تھا کہ چین نے بہت کم عرصےمیں غربت سمیت دیگرمسائل پرقابو پایا، ہم ان سے بہت کچھ سیکھ سکتے ہیں، لوگوں کوغربت سے نکالنا ہماری حکومت کی ترجیح ہے، ملک کیلئے کلین انرجی بہت ضروری ہے، پاکستان کوسب سےزیادہ موسمیاتی تبدیلیوں کاسامنا ہے، پاکستان کے دریاؤں میں 80 فیصد پانی گلیشئرز سے آتا ہے، گلوبل وارمنگ میں ایسےمنصوبےکسی نعمت سےکم نہیں، سی پیک گیم چینجر منصوبہ ہے، زرعی شعبے میں بھی چین سے مدد لے رہے ہیں۔

وزیراعظم نے کہا کہ ہم کرپشن کےخلاف بھی جہادلڑرہےہیں، کرپشن کاخاتمہ کیے بغیر کوئی ملک ترقی نہیں کرسکتا، جب تک طاقتورقانون کےنیچےنہیں آئےگا ترقی ممکن نہیں، چین نے کئی لوگوں کوکرپشن پر سخت سزائیں دی ہیں، نیب 23 سال سے کرپشن کیخلاف کام کررہا ہے، لیکن ہم اس لیے کرپشن پر قابو نہیں پا سکے کیونکہ ہم صرف چھوٹےلوگوں کو پکڑتے ہیں، جب کہ چین میں دیکھا گیا کہ اوپر کی کرپشن پر ہاتھ ڈالا گیا تب ملک میں کرپشن کم ہوتی ہے۔

راولپنڈی: نیب نے مسلم لیگ (ن) کے رہنما احسن اقبال کے خلاف نارووال اسپورٹس سٹی پروجیکٹ میں مبینہ ناجائز اختیارات کے استعمال پر ریفرنس دائر کردیا۔

چیئرمین نیب جاوید اقبال کی زیر صدارت اجلاس ہوا، جس میں نیب راولپنڈی کی کارکردگی کا جائزہ لیا گیا.

نیب اعلامیہ میں بتایا گیا کہ احسن اقبال نے اختیارات کا ناجائز استعمال کیا، اور پاکستان اسپورٹس بورڈ اور نیسپاک پر دباؤ ڈال کر توسیع کرائی، پروجیکٹ میں توسیع کرکے لاگت 3 کروڑ 47 لاکھ سے 2 ارب 99 کروڑ تک لے گئے،

احسن اقبال نے اسپورٹس کمپلیکس کے لئے زمین کی نشاندہی بھی خود کی، اور خریدی گئی زمین کے خسرہ نمبر تک خود فراہم کئے۔

لاہور: تحریک انصاف کے رہنما جہانگیر ترین کے نامزد گروپ کی وزیراعلیٰ پنجاب سے ملاقات ہوئی جس میں عثمان بزدار نے اراکین کو تحفظات دور کرنے کی یقین دہانی کرائی۔

جہانگیر ترین گروپ کے لیڈر سعید اکبر نوانی، نعمان لنگڑیالم اجمل چیمہ، عون چوہدری، عمر آفتاب، نذیر چوہان اور زورا وڑائچ شامل تھے۔

جہانگیر ترین گروپ کے وفد نے وزیراعلیٰ پنجاب کو اپنے تحفظات سے آگاہ کیا جس پر عثمان بزدار نے انہیں تحفظات کے ازالے کی یقین دہانی کرائی جب کہ اراکین اسمبلی نے وزیراعلیٗ پنجاب کی قیادت پر مکمل اعتماد کا اظہار کیا۔

تحفظات کا ازالہ کریں گے: بزدار
وزیراعلیٰ پنجاب کا کہنا تھا کہ ہم وزیر اعظم عمران خان کی قیادت میں متحد ہیں اور میرے دروازے آپ سب کےلیے کھلے ہیں، کبھی کسی سے ناانصافی کی اور نہ کریں گے۔

انہوں نے کہا کہ انتقام کی سیاست ہمارا شیوہ نہیں، آپ کے جائز تحفظات کا ازالہ کیا جائے گا، ہماری پارٹی کا نام تحریک انصاف ہے اور ہم انصاف کی عمل داری پر یقین رکھتے ہیں۔

وزیراعلیٰ سے جوبات ہوئی اس پر مطمئن ہیں: ترین گروپ
وزیراعلیٰ سے ملاقات کے بعد میڈیا سے گفتگو کرتے ہوئے سعید اکبر نوانی نے کہا کہ جہانگیر ترین گروپ حقیقت ہے، پہلے بھی کہا تھا افواہوں میں کوئی صداقت نہیں۔

انہوں نے کہا کہ وزیراعلیٰ پنجاب سے ملاقات میں ہم نے کھل کر بات کی، بجٹ بھی ڈسکس کیا، ہم حکومت کے ساتھ ہیں اور وزیراعلیٰ سے جو بات ہوئی اس پر مکمل مطمئن ہیں۔

سعید نوانی کا کہنا تھا کہ ہم چاہتے تھے کہ شفاف انکوائری ہوئی اس کا جو بھی نتیجہ آئے گا قبول ہوگا۔

ترین گروپ کے رکن نعمان لنگڑیال نے کہا کہ آج ہمارا وفد وزیراعلیٰ سے ملا ہے، وزیراعظم نے وعدہ کیا تھا کہ جہانگیر ترین سے ناانصافی نہیں ہوگی، ہم پی ٹی آئی کا حصہ تھے ، ہیں اور رہیں گے۔

گزشتہ روز تحریک انصاف کے رہنما جہانگیر ترین نے پنجاب حکومت پر انتقامی کارروائیاں کرنے کا الزام عائد کرتے ہوئے کہا تھا کہ صوبائی حکومت دباؤ ڈال رہی ہے اس لیے اسمبلی میں آواز اٹھانے کے لیے گروپ بنایا۔

واضح رہےکہ جہانگیر ترین کے معاملے پر وزیراعظم نے گزشتہ ماہ ان کے ہم خیال گروپ سے ملاقات کی تھی اور وزیراعظم نے معاملات کی تحقیقات کی ذمہ داری علی ظفر کو سونپی تھی۔

اسلام آباد: راولپنڈی رنگ روڈ کی آڑ میں مبینہ طور پر 131 ارب روپے کی زمین کی خریدو فروخت کا انکشاف ہوا ہے۔

ذرائع کے مطابق رنگ روڈ کی نئی الائنمنٹ سے 50 سے زائد طاقتور لوگوں اور رئیل اسٹیٹ ڈیلرز نے ممکنہ فائدہ اٹھایا اور رنگ روڈ سے جڑے کئی کاروباری افراد نے تقریباً 64000 کنال سے زائد زمین حاصل کی۔

ذرائع کا کہنا ہےکہ ڈیڑھ درجن کے قریب وزرا، ارکان اسمبلی، تین درجن ہاؤسنگ سوسائٹیز اور بلڈرز نے اس رنگ روڈ سے بلواسطہ یا بلاواسطہ ممکنہ فائدہ اٹھایا، 18 ارکان اسمبلی کی مجموعی طور پر 17117 کنال زمین بالواسطہ یا بلاواسطہ اس رنگ روڈ سے جڑی ہے اور 17117 کنال میں زیادہ تر زمین خاندانی جائیدادیں ہیں۔

ذرائع نے بتایا کہ ارکان اسمبلی میں 2 پی پی کے ایم این ایز کی 2400 کنال سنجانی کی زمین بھی شامل ہے جب کہ تین حکومتی وزرا کی تقریباً 2500 کنال فتح جنگ، پسوال، اٹک اور اسلام آباد مار گلا ایونیو کی زمین شامل ہے، رنگ روڈ پسوال زگ زیگ اور اٹک کے احاطے میں تحریک انصاف کے 2 ایم این اے اور 4 ایم پی اے کی تقریباً 1800کنال کی زمین شامل ہے، اس کے علاوہ رنگ روڈ کے احاطے میں (ن) لیگ کے ایک سینیٹر، ایک ایم این اے اور 2 ایم پی اے کی 6000 سے زائد کنال کی زمین شامل ہے۔

ذرائع کے مطابق اٹک لوپ کے گردو نواح میں 18 ہاؤسنگ سوسائٹیز نے 13000 کنال زمین خرید کر 11 ارب کا کاروبار کیا، رنگ روڈ کی آڑ میں راولپنڈی کے احاطے میں 10 سوسائٹیز اور کئی افراد نے 24500 کنال زمین سے تقریباً 50 ارب روپے کا کاروبار ہوا۔

ذرائع کا کہنا ہےکہ اسلام آباد میں 8 بڑی سوسائٹیز اور کاروباری افراد نے 10 ہزار سے زائد کنال خرید کر 35 ارب سے زائد کا کاروبار کیا، رنگ روڈ کے گرد کاروبار کرنے والی تقریباً 60 فیصد سوسائٹیز غیر قانونی ہیں اور 17 سوسائٹیز کے ذمے ایک ارب 70 کروڑ کا ٹیکس بھی واجب الادا ہے جب کہ پراپرٹی ڈیلرز اور ہاؤسنگ سوسائٹی کے خلاف 300 سے زائد کیس نیب اور عدالتوں میں زیر التوا ہیں۔

ذرائع کے مطابق راولپنڈی اور اٹک ضلعی انتظامیہ کی طرف زمین حاصل کرنے کی مد میں دیے جانے والے 3 ارب 50 کروڑ کے معاملے کی تحقیقات جاری ہیں۔

اسلام آباد: پی ٹی آئی کی مالی دستاویزات کا جائزہ ختم ہوگیا جبکہ الیکشن کمیشن آف پاکستان (ای سی پی) نے درخواست گزار کی جانب سے اس عمل کو 3 دن تک بڑھانے کے لیے تازہ ترین درخواست کو نہ ہی قبول کیا ہے اور نہ ہی مسترد کیا ہے۔

رپورٹ کے مطابق یہ جائزہ بدھ کے روز اختتام پذیر ہونا تھا تاہم ای سی پی اسکروٹنی کمیٹی نے 14 اپریل کے الیکشن کمیشن کے حکم کے مطابق 40 گھنٹوں کے تجربے کو پورا کرنے کے لیے اسے مزید 3 گھنٹے بڑھایا۔

درخواست گزار اکبر ایس بابر نے پی ٹی آئی کے اصل بینک اسٹیٹمنٹ کے جائزے کے لیے درخواست دائر کی تھی جسے اسکروٹنی کمیٹی نے خفیہ رکھا تھا۔

ذرائع نے انکشاف کیا کہ پی ٹی آئی کے کسی بھی اصلی بینک اسٹیٹمنٹ بشمول اسٹیٹ بینک کی جانب سے طلب کردہ 23 پی ٹی آئی بینک اسٹیٹمنٹس کا جائزہ لینے کی اجازت نہیں ہے۔

اکتوبر 2018 میں اسکروٹنی کمیٹی کے ایک رکن نے پی ٹی آئی سے ان اکاؤنٹس میں ملنے والے لاکھوں ڈالر کے جوابات طلب کیے تھے۔

جوابات فراہم کرنے کے بجائے آڈیٹر کو کمیٹی سے ہٹا دیا گیا تھا۔

انہوں نے مزید کہا کہ درخواست گزار کے دو مالیاتی تجزیہ کاروں نے پی ٹی آئی کے دستاویزات کی مکمل جانچ پڑتال کی۔

ای سی پی یا کمیٹی پی ٹی آئی کے بینک کے اسٹیٹمنٹ کا جائزہ لینے کی اجازت ملنے کے علاوہ اب توجہ دائر درخواست گزار اور اسکروٹنی کمیٹی کی طرف ہوگی کہ وہ رواں ماہ کے آخر تک اپنے نتائج کو حتمی شکل دے اور ای سی پی کے سامنے پیش کرے۔

جائزے کے اختتام پر میڈیا سے گفتگو کرتے ہوئے درخواست گزار اور پی ٹی آئی کے بانی رکن اکبر ایس بابر نے اسکروٹنی کمیٹی کی جانب سے جائزے کے عمل میں رکاوٹ پیدا کرنے کو افسوس ناک قرار دیا۔

انہوں نے کہا کہ مشاہدے کے لیے جو معلومات شیئر کی گئی ہیں وہ صرف ‘کہانی کا ایک حصہ’ ہے لیکن میگا فنڈنگ اسکینڈل کی کہانی بہت بڑی ہے۔

انہوں نے کہا کہ آئندہ چند دنوں میں رپورٹ کو حتمی شکل دینے کے بعد اسے ای سی پی کے سامنے پیش کیا جائے گا اور اسے منظر عام پر لایا جائے گا۔

ان کا کہنا تھا کہ جیسے ہی یہ رپورٹ منظر عام پر آئے گی ‘ایک ارب روپے کا بے نامی سونامی’ تحریک انصاف کو ٹکرائے گا۔

اکبر ایس بابر نے وزیر اعظم عمران خان کو غیر ملکی فنڈنگ کے معاملے پر براہ راست ٹی وی پر مباحثے کا بھی چیلنج دیا اور کہا کہ لوگوں کو حقائق خود سے معلوم ہونے چاہئیں تاکہ وہ فیصلہ کریں کہ کون ایماندار ہے۔

انہوں نے کہا کہ وزیر اعظم کی آواز میں صداقت ختم ہوگئی ہے، عام عوام اور پی ٹی آئی کے اپنے لوگوں نے حکومت ککو مسترد کردیا ہے جسے حکومت کرنے اور کام کرنا آتا ہی نہیں۔

اسلام آباد: قائد حزب اختلاف شہباز شریف کی جانب سے اقوام متحدہ کو یادداشت پیش کرنے کا اعلان کیا تو حکومت نے بھی اپوزیشن لیڈر کی پیشکش کو قبول کر لیا۔

عوام کے لئے خوش آئند بات یہ ہے کہ فلسطین کے معاملے پر قومی اسمبلی میں حکومت اور اپوزیشن متحد نظرآئے، گزشتہ روز ایوان میں فلسطین پر مظالم کے حوالے سے قرارداد منظور کی گئی، جس پر آج قومی اسمبلی میں قائد حزب اختلاف شہبازشریف نے تجویز دی کہ اس قرارداد کو اقوام متحدہ کے دفتر میں جا کر پیش کرنا چاہیے۔

شہبازشریف نے اقوام متحدہ کو یادداشت پیش کرنے کا اعلان کیا تو ناصرف پیپلزپارٹی نے اس اقدام کو خوش آئند قرار دیا بلکہ حکومت نے بھی اس پیشکش کو قبول کرلیا۔ تحریک انصاف کے رہنما اور چیف وہیپ عامر ڈوگر نے کہا کہ پورا ایوان فلسطین کے معاملے پر ایک پیج پر ہے، تمام جماعتوں اور ارکان کے شکر گزار ہیں۔ پیپلزپارٹی کے رہنما راجا پرویز اشرف نے کہا کہ پاکستان کا مؤقف مشترکہ طور پر جانے سے اچھا پیغام جائے گا۔

قائد حزب اختلاف شہباز شریف کا قومی اسمبلی میں اظہار خیال کرتے ہوئے کہا کہ قومی اسمبلی اجلاس سے اسرائیلی بربریت کیخلاف قرارداد متفقہ تھی، فلسطین کے حق میں قرارداد پاکستانی عوام کے دل کی غمازی کرتی ہے، قومی اسمبلی سے منظور قرارداد آج یو این دفتر میں لے کر جا پیش کی جائےگی، حکومت کی طرف سے ہمارے ساتھ جو جانا چاہے ہمارے ساتھ چلے، حکومتی ارکان بھی ہمارے ساتھ چلیں تو یہ فلسطین کاز کیلئے بڑی خدمت ہوگی۔

بعد ازاں اپوزیشن لیڈر شہبازشریف نے اسرائیلی جارحیت کے خلاف قومی اسمبلی کی قرارداد اقوام متحدہ کے پاکستان میں دفتر میں پیش کردی،

فلسطین پر قومی اسمبلی کی منظور کردہ متفقہ قرارداد اقوام متحدہ کے پاکستان میں نمائندے جولئین ہارنیس کے حوالے کی گئی، قرارداد اقوام متحدہ کے سیکریٹری جنرل انتونیو گوتیریس اور جنرل اسمبلی کے صدر وولکن بوزکر کے نام لکھی گئی ہے، جس میں فلسطین کے خلاف اسرائیل کے وحشیانہ حملے، قتل عام اور انسانی حقوق کی خلاف ورزیاں روکنے کا مطالبہ کیا گیا ہے۔

اس موقع پر شہبازشریف کا کہنا تھا کہ دہائیوں سے فلسطین اور کشمیر میں ظلم ہورہا ہے، فلسطینیوں پر ظلم کا بازار گرم کیا گیا، اسرائیل کی بمباری سے فلسطین کی کئی عمارتیں تباہ ہوئیں، اور فلسطینیوں کو بڑی تعداد میں شہید کردیا گیا، مسجد الاقصی میں بربریت کی گئی، ایسے غمناک منآظر پہلے نہیں دیکھے تھے، اسرائیلی وزیراعظم کا رویہ فاشسٹ ہے، جس کی شدید الفاظ میں مذمت کرتے ہیں۔

اسلام آباد: وزیر اعظم عمران خان نے کہا ہے کہ تحریک انصاف قانون کی حکم رانی کی جنگ لڑرہی ہے، مافیازبلیک میل کرناچاہتی ہیں، انہیں یہ خوف لاحق ہے کہ کہیں حکومت کام یاب نہ ہوجائے، لیکن مافیاز ہمیں ناکام نہیں کر سکتی۔

وزیر اعظم عمران خان نےنوکنڈی تاماشکیل شاہراہ کا سنگ بنیاد رکھنے کی ورچوئل تقریب سے خطاب میں کہا ہے کہ پاکستان تحریک انصاف قانون کی حکم رانی کی جنگ لڑرہی ہے، مافیا بلیک میل کرناچاہتاہے، وہ کہتے ہیں کہ اگراین آراونہ دیا توحکومت گرادیں گے، مخالفین کواپنی سیاسی موت نظرآرہی ہے، مافیاکوخوف ہےکہ حکومت کام یاب نہ ہوجائے، لیکن یہ ہمیں ناکام نہیں کر سکتے، 5 سال بعد دیکھنا چاہتا ہوں کہ مافیاز کو قانون کے نیچے لے کر آؤں۔

ان کا کہنا تھا کہ مخالفین کی خواہش ہے کہ حکومت ناکام ہو جائے، وفاق میں حکومت میں آئے تو پہلے ہی دن کہا گیا کہ ناکام ہو گئے، مخالفین کہتے تھے کہاں ہے نیا پختونخوا؟، ہم کے پی میں دوتہائی اکثریت لے کر دوبارہ واپس آگئے۔

انہوں نے کہا کہ ماضی میں قانون کی نہیں طاقت کی حکم رانی تھی، وہ معاشرہ ترقی نہیں کرسکتا جہاں قانون کی بالادستی نہ ہو، جب قانون کےسامنےسب برابرنہیں ہوتو وہاں جنگل کاقانون ہوتاہے، مدینہ کی ریاست میں قانون کی بالادستی تھی۔

انہوں نے بتایا کہ ہماری حکومت کوبہت خراب معاشی حالات ملے، اتنے معاشی مسئلے کسی حکومت کو نہیں ملے جو ہماری حکومت کو ملے، اقتدار میں آنے کے بعد پہلا سال معیشت کوسنبھالنے میں لگا اوردوسرے سال کوروناآگیا، ہم نےمعیشت اورعوام دونوں کو کورونا سےبچایا، دنیابھر میں تسلیم کیا جاتا ہے کہ کورونا میں جس ملک نے اپنی معیشت کو بچایا وہ پاکستان ہے، ایس او پیز پر عملدرآمد کریں تو اس مشکل وقت سے بھی نکل جائیں گے۔ انہوں نے کہا کہ اگر قرضوں کی قسطیں ادانہ کرتے توڈیفالٹ کرجاتے، 50 سال بعد پاکستان کی انڈسٹری ترقی کی راہ پر گامزن ہے۔

وزیر اعظم کا کہنا تھا کہ بلوچستان سے ووٹ نہ ملنے کی وجہ سے بلوچستا ن کو چھوڑ دیا گیا، جس کی وجہ سے بلوچستان دیگر صوبوں سے پیچھے رہ گیا ہے، ماضی میں بلوچستان کے مسائل پر توجہ نہیں دی گئی، بلوچستان کے لوگوں کو یہ تاثر نہیں جانا چاہیے کہ ان کی کوئی فکر نہیں کرتا، پیچھے رہ جانے والے علاقوں کو مرکزی دھارے میں لائیں گے۔

انہوں نے کہا کہ نوکنڈی وہ علاقہ ہے جسے ملک بھول چکا تھا، سڑک کی تعمیر پر این ایچ اے کو خراج تحسین پیش کرتا ہوں، اس شاہراہ کے بہت دوررس نتائج ملیں گے، ملک کے مستقبل کےلیے علاقوں کو جوڑنا بہت ضروری ہے، نوکنڈی سے ماشکیل ملک کا پسماندہ ترین علاقہ ہے، بلوچستان کا ایک مسئلہ علاقوں میں بہت زیادہ فاصلہ ہے، کوشش ہے کہ ہر علاقے میں ٹرک چلیں تا کہ کوئی بھوکا نہ سوئے، ہماری کوشش ہے کہ مزدور کو مفت کھانا اور رہائش دیں۔

وزیر اعظم کا کہنا تھا کہ بھارت میں سب سے زیادہ امیر اور غریب میں فرق ہے، چین نے 70کروڑ لوگوں کو غربت سے نکالا، چین نےکرپشن پر425 وزیروں کوجیل میں ڈالا۔

ہماری اولین ترجیح غربت کا خاتمہ ہے، خیبر پختونخوا کے تمام شہریوں کو ہیلتھ کار ڈ مل گیا ہے، اگلے مرحلے میں پنجاب کے تمام شہریوں کو صحت کارڈ دیے جائیں گے۔ تعلیمی نظام میں بہتری کے لیے ملک میں پہلی بار ایک نصاب لے کر آ رہے ہیں۔