Category سیاست

اسلام آباد: سپریم کورٹ نے شہباز شریف کو بیرون ملک جانے کی اجازت دینے کے خلاف حکومتی اپیل سماعت کے لیے مقرر کردی۔

شہباز شریف کو لاہور ہائی کورٹ کی جانب سے بیرون ملک جانے کی اجازت دینے کے خلاف حکومت نے سپریم کورٹ میں اپیل دائر کی تھی جسے اب سپریم کورٹ نے سماعت کے لیے مقرر کردیا۔

جسٹس اعجاز الاحسن کی سربراہی میں دو رکنی بنچ 25 مئی کو سماعت کرے گا جس کے لیے سپریم کورٹ نے ڈپٹی اٹارنی جنرل کو نوٹس جاری کردیا۔

یاد رہے کہ لاہور ہائی کورٹ نے اپوزیشن لیڈر شہباز شریف کو بیرون ملک جانے کی اجازت دی تھی جس کے بعد وفاقی حکومت نے عدالت عالیہ کے فیصلہ سپریم کورٹ میں چیلنج کر رکھا ہے۔

جہانگیر ترین ہم خیال گروپ کا دباؤ کام کرگیا جس کے بعد وزیراعلیٰ پنجاب تحفظات دور کرنے کےلیے تیار ہوگئے۔

جہانگیر ترین کے قریبی ساتھی راجہ ریاض نے دعویٰ کیا ہےکہ وزیراعلیٰ ہاؤس کی جانب سے ان سے رابطہ کیا گیا ہے اور ان کی عثمان بزدار سے ملاقات کا امکان ہے۔

راجہ ریاض کا کہنا تھا کہ وزیراعلیٰ ہاوس نے کہا ہے کہ تحفظات دور کرنے کو تیار ہیں۔

ذرائع کا کہناہےکہ پنجاب اسمبلی میں پارلیمانی لیڈر سعید اکبرنوانی کل پنجاب اسمبلی میں خطاب کریں گے اور ترین گروپ کے خلاف انتقامی کارروائیوں سے بھی اسمبلی فلور پرآگاہ کریں گے۔

گزشتہ روز جہانگیر ترین نے اسمبلیوں میں ہم خیال گروپ کی تشکیل کو پنجاب حکومت کی انتقامی کارروائیوں کا ردعمل قرار دیا تھا اور کہا تھا کہ اپنی آواز اٹھانے کے لیے گروپ بنایا ہے لیکن پی ٹی آئی کا حصہ ہیں اور رہیں گے۔

واضح رہےکہ جہانگیر ترین کے معاملے پر وزیراعظم نے گزشتہ ماہ ان کے ہم خیال گروپ سے ملاقات کی تھی اور وزیراعظم نے معاملات کی تحقیقات کی ذمہ داری علی ظفر کو سونپی تھی جس کے بعد علی ظفر نے رپورٹ بھی تیار کرلی ہے۔

وفاقی وزیر داخلہ شیخ رشید کا کہنا ہے کہ شریف خاندان کے خلاف حدیبیہ پیپر ملز کیس 2 سے 3 ہفتے میں دائر کردیں گے۔

لاہور میں پریس کانفرنس کرتے ہوئے شیخ رشید کا کہنا تھا کہ ‘یہ بہت بزدل لوگ ہیں، ہر کوئی وطن واپس آنا چاہتا ہے اور یہ ملک سے بھاگ رہے ہیں’۔

ان کا کہنا تھا کہ ‘جس دن شہباز شریف کی ضمانت ہوئی اسی دن انہوں نے ٹکٹ کرایا، یہ بھاگنا چاہتے تھے’۔

انہوں نے کہا کہ ‘ملک کے آدھے مسئلے حل ہوجائیں اگر ہم صحیح کیس تیار کریں اور ہماری تحقیقات ایسی ہوں کہ ہم عدالتوں سے اپنے کیس کی منظوری کراسکیں’۔

انہوں نے بتایا کہ ان کی وزیر اعلیٰ پنجاب سے ملاقات ہوئی ہے اور اس میں سیاسی صورتحال پر گفتگو ہوئی ہے۔

+شیخ رشید کا کہنا تھا کہ ‘وزیر اعلیٰ نے مجھ سے خاص طور پر کہا ہے کہ اگر جہانگیر ترین کے لوگوں کو گلہ ہے تو وہ ہمیں بتائیں، وہ کسی قسم کی انتقامی کروائی نہ کر رہے ہیں اور نہ کرنے کی خواہش رکھتے ہیں’۔

شہباز شریف کا نام ای سی ایل میں ڈالے جانے کے حوالے سے سوال کے جواب میں شیخ رشید کا کہنا تھا کہ ‘یہ بزدل لوگ ہیں، دنیا میں تمام اپوزیشن لیڈر وطن واپس آنا چاہتے ہیں اور یہ بھاگنا چاہتے ہیں’۔

ان کا کہنا تھا کہ ‘بہادر آدمی بہادر ہوتا ہے، میں ملک سے بھاگنے کے بجائے اڈیالا جیل میں پھانسی پر لٹکنا پسند کروں گا’۔

انہوں نے بتایا کہ ‘شریف خاندان کے 5 لوگ مفرور ہیں، 14 ملزم ہیں جن میں سے 4 سلطانی گواہ بن چکے ہیں’۔

وزیر داخلہ کا کہنا تھا کہ ‘شہباز شریف شاید اسے پسند نہ کریں مگر وہ 15 روز کے اندر ای سی ایل میں نام کے اندراج کے خلاف اپیل کرسکتے ہیں’۔

ان کا کہنا تھا کہ ‘نواز شریف کے کیس میں بہت منظم طریقے سے کھیلا گیا، میں بھی ان 14 وزرا میں تھا جنہوں نے کہا تھا کہ انہیں جانے دیا جائے’۔

ایک سوال کے جواب میں ان کا کہنا تھا کہ ‘میں دل سے یہ کہہ رہا ہوں، جہانگیر ترین کا گروپ عمران خان کو ہی ووٹ دے گا، مجھے کوئی شک نہیں ان پر، گلے شکوے ہوتے ہیں ہمیں اسے دور کرنا چاہیے’۔

انہوں نے کہا کہ ‘وزیر اعلیٰ پنجاب کے خلاف تحریک عدم اعتماد نہیں آرہی’۔

ان کا کہنا تھا کہ ‘میں احتساب نہیں دیکھتا، شہزاد اکبر دیکھتے ہیں، میں اس چیز کا جوابدہ ہوں جو مجھ سے منسلک ہے’۔

شیخ رشید کا کہنا تھا کہ ‘علی ظفر کو اپنی رپورٹ دے دینی چاہیے، ان پر جہانگیر ترین کے لوگ بھی اعتماد کرتے ہیں اور حکومت بھی، وہ اپنی رپورٹ جمع کراکر جان چھڑائیں’۔

ان کا کہنا تھا کہ ‘میں اپنی بات پر قائم ہوں مسلم لیگ (ن) میں دو دھڑے ہیں جس میں سے ایک شہباز شریف کا جو میری پارٹی ہے اور دوسرا نواز شریف اور مریم نواز کا جس نے انہیں اس مقام تک پہنچایا ہے’۔

انہوں نے کہا کہ ‘آج پی ڈی ایم کہاں ہے، پی ڈی ایم ٹائیں ٹائیں فش ہے، مجھے مولانا فضل الرحمٰن سے ہمدردی ہے’۔

وزیر داخلہ کا کہنا تھا کہ ‘جہانگیر ترین سمجھدار ہے، اس ملک کو بحران میں نہیں ڈالنا، ملک عمران خان کی قیادت میں بہتری کی جانب جارہا اسے جانے دیں’۔

انہوں نے کہا کہ ‘وزیر اعظم کو کسی سے کوئی خطرہ نہیں اور وہ اس بحران سے سرخرو ہوکر نکلیں گے’۔

مہگائی کے حوالے سے ایک سوال کے جواب میں ان کا کہنا تھا کہ ‘میں نے شوکت ترین سے گزارش کی ہے کہ مہنگائی پر اقدامات کریں تنخواہ دار طبقے کا اپنی تنخواہ میں گزارا نہیں ہوتا’۔

مسلم لیگ(ن) کے صدر میاں شہباز شریف نے کہا ہے کہ رنگ روڈ کے اصل منصوبے میں توسیع شامل نہیں تھی اور وزیراعظم عمران خان نے اس منصوبے میں توسیع کی خود منظوری دی۔

چارسدہ میں میڈیا سے گفتگو کرتے ہوئے مسلم لیگ (ن) کے صدر نے کہا کہ آج ہم بیگم نسیم ولی خان مرحومہ کی تعزیت کے لیے یہاں حاضر ہوئے ہیں، بیگم نسیم ولی ایک بہادر اور دلیر خاتون تھیں، انہوں نے صرف خیبر پختونخوا میں ہی نہیں بلکہ پاکستان کی سیاسی جدوجہد میں اپنا کردار ادا کیا اور جب ان کے خاوند ولی خان کو حراست میں لیا گیا تو انہوں نے جرات کے ساتھ سیاسی عمل کو بڑھایا۔

شہباز شریف نے کہا کہ 1977 میں وہ پہلی خاتون تھیں جو خیبر پختونخوا میں براہ راست ووٹوں سے منتخب ہوئیں اور اس طرح انہوں نے سیاسی میدان میں خواتین کو فروغ دیا کہ وہ براہ راست ووٹ سے آئیں اور اس ملک کی سیاست میں اپنا بھرپور کردار ادا کریں۔

ان کا کہنا تھا کہ عوامی نیشنل پارٹی کی پاکستان کے لیے خدمات اور دہشت گردی کے خلاف قربانیاں بے مثال ہیں، بشیر احمد بلور دہشت گردی کا نشانہ بنے، ان کے بیٹے ہارون بلور نے بھی جام شہادت نوش کیا، میاں افتخار کے جواں سال بیٹے شہید ہو گئے اور انہوں نے ان حالات کا جس جرات اور ہمت سے مقابلہ کیا اس کی جتنی بھی ستائش کی جائے وہ کم ہے۔

جب ان سے سوال پوچھا گیا کہ کیا جیل سے رہائی کسی ڈیل کا نتیجہ ہے تو انہوں نے کہا کہ کیا میں پہلی مرتبہ گرفتار ہوا ہوں؟ اس سے پہلے 1996 میں گرفتار ہوا، اس کے بعد مجھے میاں نواز شریف کے ساتھ اٹک قلعے میں رکھا گیا، لانڈھی جیل میں وقت گزارا، نواز شریف، ان کی صاحبزادی، حمزہ شہباز نے جیل کاٹی، کیا یہ ڈیلیں ہیں؟ کچھ خدا کا خوف کریں۔

انہوں نے کہا کہ اس حکومت نے اس ملک کی معیشت کا بیڑا غرق کردیا ہے، اس ملک میں بیروزگاری اور آسمانوں چھوتی مہنگائی، غربت میں اضافہ ہوا ہے، عام آدمی کا جینا اجیرن ہو گیا ہے، عام آدمی ایک وقت کی روٹی کو بھی ترس گیا ہے، پاکستان میں کووڈ کی تیسری لہر کے دوران ان کی نااہلی کی وجہ سے ملک میں وبا نے تباہی مچا دی۔

ان کا کہنا تھا کہ حکومت نے ویکسین کا انتظام تک نہیں کیا، یہ کووڈ کا تیسرا حملہ ہوا ہے درمیان میں آنے والے وقفوں میں جو انہیں وقت ملا تھا اس میں انہیں ویکسین منگوانی چاہیے تھی، انہوں نے تو خیرات میں ملنے والی ویکسین پر تکیہ کیا اور ہر موقع پر چور ڈاکو کی رٹ لگائے رکھی۔

انہوں نے کہا کہ تین سال چور ڈاکو کرتے ہوئے ملک کہاں پہنچ گیا ہے، آج ہم ویکسینیشن کے حوالے سے بنگلہ دیش اور خطے کے بعض ممالک سے بھی پیچھے ہیں، اگر نواز شریف کی حکومت ہوتی تو جس طرح سے ڈینگی کا مقابلہ کیا گیا تھا، اسی طرح کووڈ کا بھی کیا جاتا، اس وقت انہوں نے ہمیں ڈینگی برادران کہا تھا۔

جہانگیر ترین گروپ کی جانب سے کسی رابطے کے حوالے سے سوال پر مسلم لیگ (ن) کے صدر نے کہا کہ یہ پی ٹی آئی جانے اور جہانگیر ترین جانیں، یہ ان کا اندرونی معاملہ ہے، ہمارا اس میں کوئی عمل دخل نہیں ہے۔

شہباز شریف نے کہا کہ رنگ روڈ اسکینڈل پر ہماری پارٹی نے بڑی وضاحت کے ساتھ بات کو اٹھایا، اسکینڈل اور اس کے کردار سامنے آ چکے ہیں، اس رنگ روڈ کی 17-2016 میں میرے دور میں منصوبہ بندی ہو چکی تھی اور اس کی اصولی منظوری دی جا چکی تھی، ڈاکٹر توقیر میرے سیکریٹری رہے ہیں، میں نے اس شخص کو بہت ایماندار، ذمے دار اور محنتی پایا۔

انہوں نے کہا کہ اس منصوبے میں توسیع کی وزیراعظم عمران خان نے خود اجازت دی، جو رنگ روڈ کا اصل منصوبہ تھا اس میں یہ توسیع شامل نہیں تھی، یہ عمران خان نے خود منظوری دی ہے اور جب شور مچا تو یوٹرن لے لیا۔

ان کا کہنا تھا کہ میں ان کے کس کس اسکینڈل کی بات کروں، چینی پہلے برآمد کی گئی اور اربوں روپے چینی کے برآمد کنندگان کو سبسڈی کی شکل میں دیے گئے اور روپے اور ڈالر کی قدر میں فرق کی وجہ سے منافع میں اضافہ ہو رہا تھا، 40 سے 50 ارب روپے کا بے پناہ منافع ہوا اور اس کے بعد لاکھوں ڈالر کے زرمبادلہ کے ذخائر کی چینی درآمد کی گئی اور چینی 110 روپے فی کلو پر پہنچ گئی۔

قومی اسمبلی میں قائد حزب اختلاف نے کہا کہ گندم کی بھی یہی صورتحال ہے، دوا کے اسکینڈل آئے، ویکسینی نیشن کی قیمتوں کا بھی معاملہ دیکھیں، نواز شریف کے دور میں پبلک ٹرانسپورٹ کے چار منصوبے بنے، کیا کوئی ایک دھیلے کی بھی کرپشن ثابت کر سکا۔

انہوں نے کہا کہ بی آر ٹی پشاور میں 126 ارب روپے کی کرپشن ہوئی، بسیں چلی نہیں بلکہ جلیں اور آج کل نجانے اس منصوبے کی کیا صورتحال ہے، ہمارے میٹرو کے تینوں منصوبے 100 ارب روپے میں بنتے ہیں جن کی مسافت 75 کلو میٹر ہے، یہ 26 کلومیٹر کا منصوبہ ہے جس میں 126 ارب روپے کا ٹیکہ لگا۔

شہباز شریف نے کہا کہ یہ جھوٹ بولتے ہیں کہ مہنگی بجلی کے منصوبے دیے گئے، یہ ایل این جی کے منصوبے ناصرف پاکستان بلکہ دنیا میں سستے ترین اور جدید ٹیکنالوجی کے حامل 5 ہزار میگا واٹ کے منصوبے اس برق رفتاری سے لگے کہ دنیا میں اس کی کوئی دوسری مثال نہیں ہے۔

انہوں نے کہا کہ پاکستان کی تاریخ میں اس سے بدترین حکومت نہ کوئی آئی اور خدا کرے کہ دوبارہ نہ آئے۔

عوامی نیشنل پارٹی کی پاکستان ڈیمو کریٹک موومنٹ میں واپسی کے حوالے سے سوال پر شہباز شریف نے کہا کہ میں آج تعزیت کے لیے حاضر ہوا ہوں، جب سیاسی موقع آئے گا تو سیاست پر ضرور بات کروں گا۔

لاہور: ملکی سیاست میں انتہائی اہم پیشرفت سامنے آئی ہے۔ مسلم لیگ (ن) کے سابق رہنما چودھری نثار علی خان نے پنجاب اسمبلی کا حلف اٹھانے کا اصولی فیصلہ کر لیا ہے، وہ 24 مئی کو حلف اٹھائیں گے۔

خیال رہے کہ چودھری نثار علی خان 2018ء کے الیکشن میں پی پی 10 راولپنڈی سے رکن پنجاب اسمبلی منتخب ہوئے تھے۔ ذرائع کا کہنا ہے کہ انہوں نے حلف اٹھانے کا فیصلہ اپنے حلقے کے ساتھیوں کی مشاورت سے کیا۔ اس فیصلے کا مقصد اپنے حلقہ کے عوام کی نمائندگی کے سوائے کچھ اور نہیں ہے۔

اس سے قبل میڈیا میں یہ خبریں زیر گردش تھیں کہ چودھری نثار نے پنجاب اسمبلی کا حلف اٹھانے سے انکار کر دیا ہے۔ ان کی جانب سے منسوب بیان میں کہا گیا تھا کہ آئین اور قانون میں کہیں نہیں لکھا کہ جو حلف نہیں اٹھائے گا، وہ رکن پنجاب اسمبلی ہی نہیں رہے گا۔

ذرائع کے مطابق مسلم لیگ (ن) کے صدر میاں شہباز شریف اور چودھری نثار علی خان کے درمیان ٹیلی فونک رابطہ ہوا ہے۔ چودھری نثار نے شہباز شریف کو رہائی پر مبارکباد دی۔

دونوں رہنماؤں نے موجودہ ملکی سیاسی صورتحال پر بھی تبادلہ خیال کیا۔ ذرائع کا کہنا ہے کہ چودھری نثار پیر کے روز دوپہر کو لاہور پہنچیں گے کیونکہ ان کی شہباز شریف سے ملاقات متوقع ہے۔

خیال رہے کہ سینئر سیاستدان چودھری نثار نے پنجاب اسمبلی میں حلف اٹھانے کی خبروں کی تردید کر دی تھی۔ دنیا نیوز سے گفتگو کرتے ہوئے انہوں نے کہا تھا کہ میری اسمبلی رکنیت کا حلف اٹھانے کا کوئی ارادہ نہیں، اس حوالے سے چلنے والی خبروں میں کوئی صداقت نہیں۔ حلقے کی خدمت کیلئے حلف اٹھانا ضروری نہیں حلقے میں رہ کر بھی عوام کی خدمت کی جا سکتی ہے۔

سابق وزیراعظم میاں محمدنواز شریف کی شیخوپورہ کے قصبے فیروز وٹواں میں اراضی کی نیلامی کا عمل مکمل کرلیاگیا۔

چوہدری محمد بوٹا نامی شخص نے ایک کروڑ ایک لاکھ روپے فی ایکڑکےحساب سے سب سے زیادہ بولی دی، بولی کے موقع پر اراضی کے 6 دعوےدار بھی سامنے آگئے۔

سابق وزیر اعظم محمدنواز شریف کی اراضی کی نیلامی کا عمل شیخو پوہ میونسپل دفتر میں صبح 10 بجے شروع ہوا جو ساڑھے 3 بجےسہ پہر تک جاری رہا۔

اراضی کی خریداری کیلئے3امیدوار سامنے آئے ، سب سے زیادہ بولی ایک کروڑ ایک لاکھ روپے فی ایکڑ کےحساب سےمحمد بوٹا نامی شخص نے لگائی۔

اس بولی کے مطابق زمین کی قیمت گیارہ کروڑ روپے سے زائد بنتی ہے ، نیلامی میں حصہ لینے والوں کو 10 لاکھ زر ضمانت جمع کروانےکی ہدایت کی گئی۔

نواز شریف کی جائیداد کی نیلامی کا حکم 22 اپریل کو احتساب عدالت اسلام آباد نے دیا تھا، نیلامی کی فی ایکڑا بتدائی قیمت 70 لاکھ روپے مقرر کی گئی تھی۔

انچارج بولی اجمل فاروق کا کہنا ہے کہ نواز شریف کے نام 88 کنال 4مرلے جائیداد کی نیلامی کا عمل مکمل کرلیا گیا، بولی کی قیمت کے بارے میں عدالت کو آگاہ کر دیا جائے گا۔

نیلامی کے موقع پر اسی اراضی کے 6 دعوےدار بھی سامنے آگئے جنہیں عدالت سے رجوع کرنے کا کہہ دیا گیا۔

پشاور: وزیراعظم عمران خان نے کہا کہ سارے مافیا اکٹھے ہوکر مجھے سے این آر او لینے کی کوشش کررہے ہیں، مافیا این آراو لینے میں کبھی کامیاب نہیں ہوگا۔

صنعتی ورکرز کے لئے رہائشی منصوبےکی افتتاحی تقریب سے خطاب کرتے ہوئے وزیراعظم عمران خان کا کہنا تھا کہ مدینہ کی ریاست پر اللہ تعالیٰ نے سب سے زیادہ نعمتیں بخشی تھیں، ریاست مدینہ دنیاکی تاریخ کاسب سے بڑاانقلاب تھا، جب بھی قوم نبیﷺ کےراستے پرچلتی ہےتوبہت ترقی کرجاتی ہے، پاکستان کےخواب کےبارے کسی نے سمجھایاہی نہیں، ماضی میں کسی نے بھی مزدور طبقے کیلئے نہیں سوچا، بڑوں کیلئے این آر او اور غریب جیلوں میں جارہے ہیں۔

وزیراعظم نے کہا کہ موجودہ حکومت شہریوں کی فلاح وبہبود کیلئے کوشاں ہے، 2013کے بعدخیبر پختون خوا غربت میں کمی آئی، خیبر پختونخوا میں انسانوں پر سرمایہ کاری کی گئی، ہمارے 5سال پورے ہونے پر صحت کا انقلاب آئے گا، خیبر پختونخوا کے تمام شہریوں کے پاس ہیلتھ کارڈ موجود ہے، کورونا کی موجودہ لہر فلیٹ ہو چکی، احتیاط جاری رکھی تو سیاحت سمیت سب شعبے کھل جائیں گے۔

عمران خان کا کہنا تھا کہ ہم نے اگلے الیکشن کا نہیں بلکہ قوم کے مستقبل کے لیے سوچا ہے، اپنے کمزور طبقے کی ذمہ داری لے لی ہے، پانچ سال بعد دیکھناچاہتا ہوں کہ کمزورطبقے کوہم نے کیسے اوپر اٹھایا ہے، عام آدمی کو گھر بنانے کیلئے اب بینک قرضے دیں گے، ایک آدمی جتنا گھر کا کرایہ دیتا ہے اتنی اس کی بینک کی قسط ہونی چاہیے۔

وزیراعظم نے کہا کہ قانون کی بالادستی پہلااصول ہے، امیراورغریب کےلیےالگ الگ قانون سےپاکستان تباہ ہوا، پاکستان میں غریب کیلئےجیل اورطاقتورکیلئےاین آراوہے، سارے مافیا اکٹھے ہوکر مجھے سے این آر او لینے کی کوشش کررہے ہیں، مافیا این آراو لینے میں کبھی کامیاب نہیں ہوگا، میں کبھی اس مافیا کو این آر او نہیں دوں گا، ملک سے بھاگنے والے زیادہ دیر نہیں بچیں گے ان کو واپس لے کر آئیں گے، لندن بیٹھے مافیاز کو بھی جلد پاکستان لائیں گے۔

عمران خان کا کہنا تھا کہ ماضی میں کمیشن بنانے کے لیے ڈیم کی بجائے بجلی کے مہنگے منصوبے لگائے گئے، مہنگے منصوبوں سے بجلی خریدیں یا نہ خریدیں، ادائیگی کرنا پڑتی ہے، ماضی کی حکومتوں نے جلد بازی میں معاہدے کرکے آئی پی پیز سے پیسے کھائے، جس قیمت پر بجلی بن رہی ہے اس سے کم قیمت سے فروخت ہورہی ہے، 2023 تک گردشی قرضہ 1455 ارب روپے پر پہنچ جائے گا،

ہم پاکستان میں پانی سے 50 ہزار میگاواٹ بجلی بنا سکتے ہیں، 2028 تک 10 بڑے پانی کے پراجیکٹ مکمل ہو جائیں گے، مہنمد ڈیم 2025 میں مکمل ہوجائے گا، ہمیں اناج پیدا کرنے کے لیے زمینوں کو سیراب کرنا ہے، اس ڈیم سے17 ہزار ایکڑ سیراب ہو جائےگی، اور پشاور کو اس ڈیم سے 300 ملین گیلن پانی ملے گا، یہ ڈیم ہمیں آج سے 50سال پہلے بنانے چاہیے تھے۔

اسلام آباد: توشہ خانہ ریفرنس میں بڑی پیش رفت سامنے آئی ہے اور اسلام آباد ہائیکورٹ نے نواز شریف کی جائیدادوں کی نیلامی رکوانے کی درخواستیں مسترد کردیں۔

اسلام آباد ہائی کورٹ کے جسٹس عامر فاروق کی سربراہی میں دو رکنی بنچ نے سابق وزیر اعظم نواز شریف کی جائیداد نیلامی رکوانے کیلئے میاں اقبال برکت، اسلم عزیز اور محمد اشرف کی درخواستوں پر سماعت کی۔

درخواست گزار کے وکیل نے کہا کہ یکم اکتوبر 2020 کو جائیدادوں کو کیس سے منسلک کیا گیا پھر 22 اپریل کو نیلامی کا آرڈر کیا گیا۔ عدالت نے استفسار کیا کہ آپ نے ان جائیدادوں سے متعلق اعتراضات داخل کیوں نہیں کئے؟۔

درخواست گزار کے وکلا نے کل شیخوپورہ کی جگہ کی نیلامی کی تفصیلات عدالت کے سامنے پیش کرتے ہوئے کہا کہ شیخوپورہ کی زرعی اراضی خرید لی گئی تھی اس کا کیس بھی زیر التوا ہے۔

عدالت نے کہا کہ جب کل نیلامی ہونے والی ہے تو آپ نے اتنی دیر سے کیوں پٹیشن فائل کی؟۔ وکیل درخواست گزار نے بتایا کہ ہمیں کل نیلامی کے آرڈر کی مصدقہ کاپی ملی ہے، جائیداد نیلامی کے لیے قانونی تقاضے بھی پورے نہیں کیے گئے۔

محمد اشرف نے درخواست میں کہا کہ نواز شریف کی شیخو پورہ کی جائیدادیں 20 مئی کو نیلام کرنے کی تاریخ مقرر کر دی گئی، حالانکہ میں نے شیخوپورہ کی 88 کنال اراضی نواز شریف سے خرید کر بذریعہ چیک 7 کروڑ 75 لاکھ کی ادائیگی بھی کردی ہے۔ اسلم عزیز نے درخواست میں کہا کہ ڈی سی لاہور 105 ایکڑ اراضی نیلام کرنے کے لیے قبضہ میں لے رہے ہیں۔

وکیل قاضی مصباح نے کہا کہ جائیداد نیلامی کا مقاصد اشتہاری کو سرنڈر کرنے پر مجبور کرنا ہے، لیکن ان تین زمینوں کی نیلامی سے نوازشریف سرنڈر پر مجبور نہیں ہوں گے، کیونکہ ان جائیدادوں پر اب اور لوگ کے حقوق ہیں ، لہذا ان جائیدادوں کی نیلامی سے نواز شریف کو اثر نہیں پڑنا۔

اسلام آباد ہائی کورٹ نے نواز شریف کی جائیداد نیلامی رکوانے کی درخواستیں ناقابل سماعت قرار دے کر مسترد کردیں۔

عدالت نے قرار دیا کہ درخواست گزار کے پاس متبادل فورم موجود ہے، نیلامی رکوانے کے لیے ٹرائل کورٹ سے رجوع کیا جا سکتا ہے، متبادل فورم موجود ہونے پر ہائی کورٹ آئین کے آرٹیکل 199 کے تحت یہ درخواستیں نہیں سن سکتی۔

واضح رہے کہ شیخوپورہ میں کل نواز شریف کی زرعی اراضی نیلام کی جائے گی۔ ڈی سی شیخوپورہ نے نیلامی کی تاریخ بیس مئی مقرر کررکھی ہے۔

پاکستان تحریک انصاف (پی ٹی آئی) کے ناراض رہنما جہانگیر ترین نے ان تمام میڈیا رپورٹس کو مسترد کردیا جس میں ‘جہانگیر ترین گروپ’ تشکیل دینے کی بات کی گئی۔

لاہور میں بیکنگ جرائم کورٹ کے احاطے کے باہر میڈیا سے بات کرتے ہوئے انہوں نے کہا کہ ‘میں ان میڈیا رپورٹ کو مسترد کرتا ہوں اور واضح کردینا چاہتا ہوں کہ ہم پی ٹی آئی کا حصہ تھے، ہیں اور انشااللہ رہیں گے’۔

جہانگیر ترین نے کہا کہ ‘وضاحت ضروری ہے کہ دو مسائل ہیں، پہلا مسئلہ جہانگیر اور ایف آئی اے کا، جس کے ساتھ میرے تمام دوست کھڑے ہیں’۔

انہوں نے کہا کہ جب میرے دوست وزیر اعظم عمران خان سے ملے تو وہ خوش دلی سے ملے اور علی ظفر کو معاملے کی انکوائری کے لیے نامزد کیا۔

علاوہ ازیں انہوں نے بتایا کہ وفاقی تحقیقاتی ادارے (ایف آئی اے) نے جس جس معاملے پر سوال اٹھایا تھا انہیں دستاویزات فراہم کردی گئیں یعنی تمام منی ٹریل دے دی۔

ان کا کہنا تھا کہ علی ظفر کی رپورٹ جلد منظر عام پر آجائے گی۔

جہانگیر ترین نے واضح کیا کہ ‘ لیکن اس کے ساتھ دوسرا مسئلہ شروع ہوگیا’۔ تاہم انہوں نے یہ واضح نہیں کیا کہ یہ دوسرا مسئلہ کیا ہے۔

انہوں نے کہا کہ جب وزیر اعظم عمران خان نے کہا کہ جہانگیر ترین کے ساتھ کوئی انتقامی کارروائی نہیں ہوگی اور انصاف ملے گا تو مجھے ان پر پورا یقین تھا۔

انہوں نے کہا کہ وزیر اعظم عمران خان انصاف پسند انسان ہیں اور انصاف کے تقاضے پورے کریں گے۔

جہانگیر ترین نے الزام لگایا کہ ‘اس کے بعد یہ ہوا کہ پنجاب حکومت نے میرے ساتھیوں کے ساتھ انتقامی کارروائیاں شروع کردیں’۔

ان کا کہنا تھا کہ ‘اس دباؤ کے پیش نظر میرے ساتھیوں نے فیصلہ کیا کہ پنجاب میں آواز اٹھائیں گے’۔

جہانگیر ترین نے کہا کہ ‘اس کی تمام تر ذمہ داری پنجاب حکومت پر تھی جو بالکل غلط رویہ تھا اور انہوں نے افسران کے تبادلے کرنا شروع کردیے تھے’۔

انہوں نے واضح کیا کہ ‘یاد رکھیں یہ گروپ کل نہیں بنا بلکہ تین مہینے پہلے بنا تھا، یہ تاثر غلط ہے کہ یہ گروپ کل بنا ہے’۔

ان کا کہنا تھا کہ ‘وزیر اعظم عمران خان کی پالیسی کے خلاف میرے ساتھیوں پر ڈباؤ ڈالا جارہا ہے اور صوبائی اسمبلی میں اس دباؤ کے خلاف آواز اٹھانے کے لیے ضروری تھا کہ ہم ایک رکن صوبائی اسمبلی کو نامزد کرتے تاکہ وہ رہنمائی کریں’۔

جہانگیر ترین نے کہا کہ یہ اتنی سے بات تھی لیکن میڈیا نے اسے ‘فارورڈبلاک’ قرار دے دیا۔

انہوں نے ایک مرتبہ پھر زور دیا کہ ہم پی ٹی آئی کا حصہ ہیں اور رہیں گے۔

جہانگیر ترین نے پنجاب حکومت پر زور دیا کہ وہ انتقامی کارروائی سے باز رہیں کیونکہ وہ جن اراکین صوبائی اسمبلی پر دباؤ ڈال رہے ہیں دراصل وہ ہی آپ کی حکومت کا حصہ ہیں۔

جہانگیر ترین نے کہا کہ ‘ایک مرتبہ پھر یہ کہوں گا کہ ایف آئی آر میں چینی کا کوئی تذکرہ نہیں ہے’۔

گزشتہ روز میڈیا پر خبریں گردش کررہی تھیں کہ فیصل آباد سے تعلق رکھنے والے رکن قومی اسمبلی اور جہانگیر ترین کی حمایت میں سب سے آگے رہنے والے راجا ریاض کو قومی اسمبلی میں گروپ کا پارلیمانی رہنما بنایا گیا ہے جبکہ پنجاب اسمبلی میں سعید اکبر اس کی سربراہی کریں گے۔

یہ اعلان جہانگیر ترین کی جانب سے منعقدہ ایک عشایئے میں سامنے آیا تھا جہاں راجا ریاض کے مطابق مزید 4 اراکین قومی اسمبلی اور اتنے ہی ایم پی ایز نے گروپ میں شمولیت اختیار کی تھی۔

جہانگیر ترین اور علی ترین کی عبوری ضمانت میں 31 مئی تک توسیع
اس سے قبل سیشن کورٹ میں جہانگیر ترین اور ان کے بیٹے علی ترین کی عبوری ضمانتوں پر سماعت کے دوران ایڈیشنل سیشن جج حامد حسین نے ایف آئی اے کے افسر سے استفسار کیا کہ تفتیش کہاں تک پہنچی؟

دوران سماعت جہانگیر ترین اور علی ترین کمرہ عدالت میں موجود تھے جبکہ ایف آئی اے کے ڈپٹی ڈائریکٹر چاند اشرف نے بتایا کہ تفتیش جاری ہے اور ہم ریکارڈ کا جائزہ لے رہے ہیں۔

انہوں نے مزید کہا کہ بھاری ٹرانزیکشنز ہوئیں وہ اس پر تحقیقات کر رہے ہیں۔

علاوہ ازیں ایف آئی اے نے جہانگیر ترین اور علی ترین کی انکوائری رپورٹ عدالت میں پیش کی۔

جج حامد حسین نے ایف آئی اے کی انکوائری رپورٹ کا جائزہ لیا۔

اس دوران ایف آئی اے کے افسر نے بتایا کہ ایک ملزم امجد پرویز نے انویسٹی گیشن جوائن نہیں کی۔

علاوہ ازیں وکیل جہانگیر ترین نے کہا کہ ایف آئی اے جہانگیر ترین سے 2008 2009 کا ریکارڈ مانگ رہا ہے جبکہ ان کی بے گناہی کے لیے ہمارے پاس والیم موجود ہیں۔

انہوں نے کہا کہ جہانگیر ترین کے پاس مکمل ریکارڈ موجود ہے ہم ہوا میں بات نہیں کریں گے۔

ان کا کہنا تھا کہ جہانگیر ترین گروپ کے ہر بندے نے ایف آئی اے کی انویسٹی گیشن جوائن کی ہے۔

جج حامد حسین نے ریماکس دیے کہ ایف آئی اے فوری طور پر تفتیش مکمل کرے آئندہ مزید وقت نہیں دیا جائے گا۔

انہوں نے ریمارکس دیے کہ اگر آئندہ سماعت تک انوسٹی گیشن مکمل نہ کی گئی تو شوکاز نوٹس جاری کیے جائیں گے۔

بعدازاں سیشن کورٹ نے دو مقدمات میں جہانگیر ترین اور علی ترین کی عبوری ضمانت میں 31 مئی تک توسیع کر دی۔

بینکنگ جرائم کورٹ نے ایف آئی اے کو جلد تفتیش مکمل کرنے کا حکم دے دیا
بیکنگ جرائم کورٹ کے جج امیر محمد خان نے جعلی بینک اکاؤنٹ کیس میں درخواست ضمانت پر جہانگیر ترین اور علی ترین کی عبوری ضمانت میں 31 مئی تک توسیع کر دی۔

جہانگیر ترین اور علی ترین بینکنگ جرائم کورٹ میں پیش ہوئے جہاں بیکنگ جرائم کورٹ کے جج امیر محمد خان نے سماعت کی ۔

وکیل جہانگیر ترین نے کہا کہ یف آئی اے نے جہانگیر ترین کے خلاف تین کیسز درج کیے ہیں۔

بیرسٹر سلمان صفدر نے کہا کہ سیشن کورٹ نے ایف آئی اے کے 31 مئی تک انوسٹی گیشن مکمل کرنے کی ہدایت کی ہے۔

انہوں نے بتایا کہ عید کی چھٹیوں میں بھی جہانگیر ترین کی ٹیم ریکارڈ اکٹھا کرتی رہی، 10 بینک اکاؤنٹس کا مکمل ریکارڈ اکٹھا کر لیا ہے اور ایف آئی اے کو جمع بھی کرا دیا ہے۔

بیرسٹر سلمان صفدر نے بتایا کہ ساری منی ٹریل موجود ہے جو ایف آئی اے کے حوالے کر دیا ہے۔

جس پر ایف آئی اے نے کہا کہ ہمیں ابھی ریکارڈ ملا ہے ہم رہکارڈ کا جائزہ لے رہے ہیں جلد انوسٹی گیشن مکمل کر لیں گے۔

جج امیر محمد خان نے ایف آئی اے سے استفسار کیا کہ کیا ایف آئی اے جہانگیر ترین اور علی ترین کو گرفتار کرنا چاہتا ہے؟

جس پر ایف آئی اے کے متعلقہ افسران جہانگیر ترین اور علی ترین کی گرفتاری سے متعلق عدالت میں واضح جواب نہ دے سکے۔

ایف آئی اے تفتیشی افسر نے بتایا کہ ابھی انوسٹی گیشن جاری ہے اس کے بعد گرفتاری سے متعلق عدالت کو آگاہ کریں گے۔

بینکنگ جرائم کورٹ نے ایف آئی اے کو جلد انوسٹی گیشن مکمل کرنے کا حکم دے دیا۔

عدالت نے جہانگیر ترین اور علی ترین کی عبوری ضمانت میں 31 مئی تک توسیع کر دی۔

اسلام آباد: وزیرخارجہ شاہ محمود قریشی کا کہنا ہے کہ ہمارے تمام اراکین، پارٹی ڈسپلن کے پابند ہیں، پارٹی ڈسپلن کی خلاف ورزی کرنے والوں کی رکنیت متاثر ہو سکتی ہے۔

نجی ٹی وی شو میں بات کرتے ہوئے وزیرخارجہ شاہ محمود قریشی کا کہنا تھا کہ وزیراعظم عمران خان نے تحفظات کا اظہار کرنے والے اراکین کی گفتگو سنی اور انہیں انصاف کی یقین دہانی کرائی، ان کی خواہش تھی کہ تحقیقات کیلئے ان کی پسندیدہ شخصیت کو نامزد کیا جائے، وزیر اعظم نے ان کے کہنے پر علی ظفر کو ذمہ داریاں تفویض کیں، علی ظفر نے ابھی اپنی رپورٹ وزیر اعظم عمران خان کو پیش نہیں کی، عمران خان کو آپ اپنا لیڈر تسلیم کرتے ہیں تو ان پر اعتماد کریں۔

وزیرخارجہ کا کہنا تھا کہ ہمارے تمام اراکین، پارٹی ڈسپلن کے پابند ہیں، پارٹی ڈسپلن کی خلاف ورزی کرنے والوں کی رکنیت متاثر ہو سکتی ہے امید ہے وہ ایسا نہیں کریں گے، اعتماد کے ووٹ اور فنانس بل پر کوئی پارٹی ڈسپلن کی خلاف ورزی نہیں کر سکتا۔

شاہ محمود قریشی نے کہا کہ عمران خان پارٹی کے بانی چیئرمین ہیں، ان کے ووٹرز نہ ہوتے تو یہ صاحبان بھی آج اسمبلیوں میں نہ ہوتے، اگر آپ عمران خان پر اعتماد نہیں رکھتے تو آپ کے پاس تحریک انصاف میں رہنے کی گنجائش نہیں رہتی، عمران خان کو لیڈر مانتے ہیں تو پھر ان کے فیصلوں پر آمادگی کا اظہار کرنا چاہیے۔