Category سیاست

راولپنڈی: شیخ رشید کا کہنا ہے کہ جہانگیر ترین بجٹ میں عمران خان کو ووٹ دیں گے، پارٹی میں چھوٹے موٹے اختلافات ہوتے رہتے ہیں، جمعہ کو لال حویلی کے باہر فلسطین سے یکجہتی کیلئے جلسہ ہوگا۔

وفاقی وزیر داخلہ شیخ رشید نے ڈاکٹر فیصل سلطان کے ہمراہ راولپنڈی میں میڈیا سے گفتگو کرتے ہوئے کہا کہ ہمارے دو بڑے پراجیکٹ ہیں، ایک نالہ لئ اور دوسرا مدر اینڈ چائلڈ ہسپتال ہے، یہ دونوں بن گئے تو راولپنڈی مکمل ہو جائے گا، ڈاکٹر فیصل کا مشکور ہوں، وہ ماں بچہ ہسپتال دیکھنے کیلئے آئے، کینسر کا بھی ایک ڈیپارٹمنٹ ہوگا، 16 سال سے جو کام روکا ہوا تھا، وہ 2 سال میں 80 فیصد تک مکمل کیا، 6 ماہ کے اندر کوشش کرینگے کہ ایک او پی ڈی چل جائے، مشینری کو 100 بیڈ کیساتھ چلا دیں، انگریز دور کے بعد یہ ماڈرن ہسپتال ہوگا۔

شیخ رشید کا کہنا تھا کہ سعودی عرب کا دورہ بہت کامیاب ہوا، سعودی عرب سے ایسے تعلقات ہوگئے ہیں جیسے پہلے کبھی نہیں تھے۔ انہوں نے کہا کہ جمعہ کو لال حویلی میں فلسطین کے حوالے سے جلسہ ہوگا۔

اسلام آباد: تحریک انصاف کے رہنما جہانگیر ترین اور ان کے ہم خیال ارکان اسمبلی نے پارٹی کے متوازی اپنا گروپ بنانے کا باضابطہ اعلان کردیا جب قومی و پنجاب اسمبلی میں اپنے پارلیمانی لیڈر بھی مقرر کردیے۔

جہانگیر ترین گروپ کی جانب سے ہم خیال 31 ارکان اسمبلی کے لیے عشایہ دیا گیا جہاں اس گروپ کو باضابطہ طور پر سامنے لانے کا اعلان کیا گیا۔

رکن پنجاب اسمبلی سلمان نعیم نے بتایا کہ جہانگیر ترین کے عشایے میں ہم خیال ارکان اسمبلی نے شرکت کی اور یہیں گروپ کو باضابطہ طور پر سامنے لانے کا فیصلہ کیا گیا اور گروپ کا نام جہانگیر ترین ہم خیال گروپ رکھا گیا ہے اور گروپ کے ارکان سے وفاداری کا حلف لیا جائے گا۔
انہوں ںے بتایا کہ ہم خیال ارکان اسمبلی نے جمعہ کو پنجاب اسمبلی میں پاور شو کا فیصلہ کیا ہے ساتھ ہی یہ بھی فیصلہ کیا ہے کہ قومی اور صوبائی اسمبلیوں میں اپنے پارلیمانی لیڈرز مقرر کیے جائیں جس کے لیے راجہ ریاض کو قومی اسمبلی اور پنجاب اسمبلی میں سعید اکبر نوانی کو پارلیمانی لیڈر مقرر کیا گیا ہے۔

نعمان لنگڑیال نے کہا کہ اجلاس میں 31 ارکان اسمبلی نے شرکت کی، جہانگیر ترین کے ساتھ غلط ہوا اسی لیے ان کا ساتھ دے رہے ہیں، ہمیں وزیراعظم عمران خان پر اعتماد ہے لیکن ہم اپنے ایجنڈے پر متفق ہیں، ہم جہانگیر ترین کی پیشی پر ان کے ساتھ جائیں گے۔

ذرائع کے مطابق گروپ کا اتوار کو دوبارہ اجلاس طلب کرلیا گیا ہے جہاں آئندہ کا لائحہ عمل طے کیا جائے گا۔

اسلام آباد: وفاقی وزیر اطلاعات فواد چوہدری کا کہنا ہےکہ اگلے پانچ سال بھی ہماری حکومت ہوگی اور کوئی قانون سازی نہیں رکے گی۔

اسلام آباد میں الیکٹرانک ووٹنگ مشین کے حوالے سے میڈیا کو بریفنگ دیتے ہوئے فواد چوہدری نے کہا کہ الیکشن اصلاحات پر تمام جماعتیں بیٹھیں اور متفقہ فیصلہ کریں، الیکشن کمیشن نے مشین کیلئے 36 شرائط دی تھیں، تمام پوری کردی گئی ہیں۔

انہوں نے کہا کہ الیکٹرانک ووٹنگ مشین بجلی سے نہیں چلتی،اس کی اپنی بیٹری ہے اور جو لوگ موبائل استعمال کرسکتے ہیں وہ اس مشین کو آرام سے چلالیں گے جب کہ جتنی الیکشن کمیشن کی اس وقت لاگت آرہی ہے اتنی ہی اس مشینوں پر بھی آئے گی، ہم نے 49 ترامیم دی ہیں، اپوزیشن اپنے مشورے دے، یہ کوئی حل نہیں کہ ہر الیکشن کے بعد روئیں۔

ایک سوال کے جواب میں فواد چوہدری کا کہنا تھا کہ عمران خان ناصرف وزیراعظم ہیں بلکہ پارٹی چیئرمین بھی ہیں، حکومت کے دو سال پورے ہوگئے ہیں اور تین سال بھی پورے ہوں گے ، اگلے پانچ سال بھی ہماری حکومت ہوگی، کوئی قانون سازی نا سینیٹ میں رکے گی اور نا ہی قومی اسمبلی میں رکے گی۔

کراچی: بلاول بھٹو زرداری نے کہا ہے کہ عمران حکومت میں ہونے والی کرپشن معیشت کی تباہی کی وجہ ہے، جس ملک کا حکمران کرپٹ ہو، وہاں کی معیشت کبھی مستحکم نہیں ہوسکتی۔

چیئرمین پاکستان پیپلزپارٹی بلاول بھٹو زرداری نے اپنے بیان میں کہا کہ وزیراعظم، وزیروں اور مشیروں کو قربانی کا بکرا بنا کر کرپشن پر پردہ نہیں ڈال سکتے، عمران خان صاحب، آپ کو ایک ایک روپے کا حساب دینا ہوگا، ٹیکس بڑھا کر ٹارگٹ پورا کرنے کا ڈرامہ کرنے والے ملک لوٹ رہے ہیں، عالمی ادارے ملک میں کرپشن میں اضافے کے انکشافات کرچکے ہیں۔

اسلام آباد: شہباز گل نے کہا ہے کہ کرپشن کے بے تاج بادشاہ کے سپوت آج کرپشن پر بھاشن بازی کر رہے ہیں، پیپلز پارٹی میں کرپشن کے مہارتھیوں کی بھرمار ہے۔

معاون خصوصی شہباز گِل نے بلاول بھٹو زرداری کے بیان پر ردعمل دیتے ہوئے کہا کہ جعلی اکاؤنٹس کیس میں زرداری اور فریال تالپور پر 35 ارب روپے سے زائد لانڈرنگ کے کیسز ہیں، موصوف پر اوپل 225 کے جعلی اکاؤنٹس میں تقریباً 5 ارب کی منی لانڈرنگ کا الزام ہے، زرداری کے قریبی ساتھیوں نے سیاست کی آڑ میں اربوں کی کرپشن کی، مافیا ڈان آصف زرداری کے کرتوتوں کا حساب کون دیگا؟۔

شہباز گِل کا کہنا تھا کہ پاکستان کا المیہ ہے کہ بھتہ خور اور قاتل بھی اسمبلی فلور پر تقریریں کر رہے ہیں، ‏‎‎ہر سال تھر میں بھوک سے مرنے والے بچوں کی تعداد پچھلے سال سے زیادہ ہوتی ہے، کتوں کے کاٹنے کی ویکسین سیاسی فون پر ملتی ہے، صدقے کے بکرے بھی جعلی اکاؤنٹس سے خریدنے والے کرپشن پر بات کر رہے ہیں۔

لاہور: لاہور ہائیکورٹ نے قومی اسمبلی میں اپوزیشن لیڈر شہباز شریف کو بیرون ملک جانے سے روکنے کیخلاف درخواست پر وفاقی حکومت سے جواب مانگ لیا ہے۔

لاہور ہائیکورٹ کے جسٹس علی باقر نجفی نے اپوزیشن لیڈر شہباز شریف کی درخواست پر سماعت کی۔ شہباز شریف کے وکلا نے موقف اپنایا کہ عدالت نے اپوزیشن لیڈر کو آٹھ ہفتوں کیلیے بیرون ملک جانے کی اجازت دی تھی لیکن انہیں لاہور ایئرپورٹ پر روک لیا گیا۔ سماعت کے دوران وفاقی حکومت کے وکیل نے درخواست کی مخالفت کی۔ عدالت نے سماعت 26 مئی تک ملتوی کر دی۔

لاہور: کالعدم تحریک لبیک پاکستان کے سربراہ سعد رضوی کی نظر بندی کو لاہورہائیکورٹ میں چیلنج کردیا گیا۔

حافظ سعد رضوی کے چچا نے اپنے وکیل کی وساطت سے درخواست دائر کی جس میں ہوم سیکرٹری پنجاب، ڈی سی لاہور، سی سی پی او، سپرنٹنڈنٹ کوٹ لکھپت جیل کو فریق بنایا۔

انہوں نے درخواست میں موقف اختیار کیا کہ 12 اپریل کو حافظ سعد رضوی کو ایس ایچ او نواں کوٹ نے غیر قانونی حراست میں لیا، ان کی گرفتاری کی وجوہات جاننے کیلئے سی سی پی او اور ڈی سی لاہور سے رجوع کیا مگر کوئی شنوائی نہ ہوئی۔

چچا سعد رضوی نے کہا کہ ایس ایچ او نواں کوٹ نے بھی گرفتاری کی وجوہات بتانے سے گریز کیا، سی سی پی او اور ڈی سی لاہور نے زبانی طور پر کہا کہ حافظ سعد رضوی کو ایک ماہ بعد رہا کر دیا جائے گا، لیکن ایک ماہ کا عرصہ گزرنے کے باوجود حافظ سعد رضوی کو رہا نہیں کیا گیا۔

درخواست گزار نے بتایا کہ اس سلسلے میں ڈی سی لاہور سے رجوع کرنے پر سعد رضوی کی نظر بندی کا زائد المیعاد شدہ حکمنامہ تھما دیا گیا، سعد رضوی کسی بھی ریاست مخالف سرگرمیوں میں ملوث نہیں رہا، ان کی نظر بندی آئین کے آرٹیکل 4، 9 اور 25 کیخلاف ورزی ہے، لہذا حافظ سعد رضوی کی نظر بندی غیرقانونی اور غیر آئینی قرار دے کر کالعدم کی جائے اور رہائی کا بھی حکم دیا جائے۔

اسلام آباد: نیب نے کیپٹن (ر) صفدر، امان اللہ جدون اور دیگر کے خلاف تحقیقات عدم ثبوت پر بند کرنے کی منظوری دے دی۔

چئیرمین جسٹس نیب جاوید اقبال کی زیرصدارت قومی احتساب بیورو کے ایگزیکٹو بورڈ کا اجلاس ہوا، جس میں این ایچ اے کے افسران، اہلکاران، کیپٹن (ر) صفدر اعوان ، پاک پی ڈبلیو ڈی کے افسران، اہلکاران اور دیگر، محمد ارسلہ خان اور دیگر، سابق آئی جی ڈاکٹر مجیب الرحمان اور دیگر کے خلاف انکوائریز، سابق وزیر پیٹرولیم امان اللہ خان جدون اور دیگر جب کہ گلیات ڈویلپمنٹ اتھارٹی کے افسران، اہلکاران اور دیگر کے خلاف انوسٹی گیشن اب تک کے عدم ثبوت کی بنیاد پر قانون کے مطابق بند کرنے کی منظوری دی گئی۔

ایگزیکٹو بورڈ کے اجلا س میں 3 ریفرنسز کی منظوری دی گئی، جن میں احسان اللہ محسود سابق سینئر رکن بورڈ آف ریونیو خیبر پختونخوا ہ کے خلاف بدعنوانی کاریفرنس دائر کرنے کی منظوری دی گئی، ملزم پر اختیارات کا ناجائز استعمال کرتے ہوئے غیر قانونی طورپر ڈیرہ اسمٰعیل خان میں 1976کنال سرکاری زمین الاٹ کرنے کا الزام ہے جس سے قومی خزانہ کوبھاری نقصان پہنچا۔

اجلاس میں مقبول احمد لہڑی سابق ضلعی ناظم، ڈاکٹر کلیم اللہ، سابق مئیر میٹر و پولیٹن کارپوریشن کوئٹہ اور دیگر کے خلاف بدعنوانی کاریفرنس دائر کرنے کی منظوری دی گئی، ملزمان پر اختیارات کا ناجائز استعمال کرتے ہوئے 5292 مربع فٹ سرکاری زمین کوڑیوں کے داموں لیز پر دینے کا الزام ہے، جس سے قومی خزانہ کو 529 ملین روپے کا نقصان پہنچا۔ جب کہ میر محمد امین عمرانی سابق وزیر ایکسائز اینڈ ٹیکسیشن حکومت بلوچستان اور دیگر کے خلاف بدعنوانی کا ریفرنس دائر کرنے کی منظوری دی گئی، ملزم پر اختیارات کا ناجائز استعمال کرتے ہوئے غیر قانونی طور پر آمدن سے زائد اثاثے بنانے کا الزام ہے۔

ایگزیکٹو بورڈ کے اجلاس میں 9 انکوائریز کی منظوری دی گئی، جن میں ڈاکٹر نوید ڈائریکٹر جنرل ایگریکلچر ریسرچ، طارق محمود ایڈمنسٹریٹو آفیسر اور دیگر، وزارت ہاؤسنگ اینڈ ورکس کے افسران، اہلکاران، پاکستان ورکس ڈیپارٹمنٹ اور دیگر، ممتاز خان، سابق چیف کنزرویٹوفاریسٹ اور دیگر،ناصر خان سابق رکن قومی اسمبلی اور دیگر،شہاب خٹک سیکرٹری سی اینڈ ڈبلیو ڈیپارٹمنٹ خیبر پختونخواہ اور دیگر،محمد نسیم منیجنگ ڈائریکٹر،ناصر،غفور جنرل منیجر،علی الرحمان ذونل منیجر ڈبلیو ایس ایس پی اور دیگر، ریونیو ڈیپارٹمنٹ گوادر کے افسران، اہلکاران اور دیگر،غلام حسین جعفر اور دیگر، چئیرمین ٹاؤن شپ ہاؤسنگ اسکیم ضلع خضدار اوردیگر، امیر مقام سابق مشیر برائے وزیر اعظم کے خلاف انکوائریز کی منظوری شامل ہے۔

اجلاس میں 3 انوسٹی گیشنز کی منظوری دی گئی، جن میں محکمہ صحت کوئٹہ کی انتظامیہ اور دیگر،عبد الرازق درانی سابق ڈائریکٹر جنرل گوادرپورٹ اتھارٹی کے افسران، اہلکاران اور دیگر، ریونیو ڈیپارٹمنٹ گوادر کے افسران، اہلکاران اور دیگر کے خلاف انوسٹی گیشنز کی منظوری شامل ہے۔

اجلاس میں سول ایوی ایشن اتھارٹی کے افسران، اہلکاران اور دیگر کے خلاف انکوائری قانون کے مطابق مزید کاروائی کے لئے ڈی جی سی اے اے کو بھجوا نے کی منظوری دی گئی۔ این ٹی ڈی سی کے افسران، اہلکاران اور دیگر کے خلاف تین انکوائریز قانون کے مطابق مزید کاروائی کے لئے نیپرا کو بھجوانے کی منظوری دی گئی۔

پشاور ہائیکورٹ نے ریمارکس دیے ہیں کہ حکومت ہر معاملے پر کشکول ہاتھ میں اٹھائے لئے پھرتی ہے اس طرح تو مسائل حل نہیں ہونگے۔

چیف جسٹس قیصررشید اور جسٹس ارشد علی پرمشتمل پشاور ہائیکورٹ کے دو رکنی بینچ نے پی ٹی وی کے ملازم کے سروس سے متعلق کیس کی سماعت کی۔

چیف جسٹس قیصر رشید نے ریمارکس دیے کہ اگر ہماری حکومت کو ساری چیزوں کےلئے باہر کے ممالک سے بھیک اور مدد لینی ہے تو پھر یہ حکومت کس طرح چلا رہے ہیں، ہر ادارے کےلئے باہر سے ماہرین طلب کئے جائیں گے تو کیا ہمارے ملک میں ایسا کوئی نہیں جس میں اداروں کو ٹھیک کرنے کی اہلیت ہو؟، حکومت ہر معاملے پر کشکول ہاتھ میں اٹھائے لئے پھرتی ہے اس طرح تو مسائل حل نہیں ہونگے، حکومت کی کارکردگی نہ ہونے کے برابر ہے ہر چیز میں باہر سے امداد طلب کی جاتی ہے، اس میں خدشہ پیدا ہوگا کہ ملک کی سلامتی پر سمجھوتا کیا جا رہا ہے کیونکہ اگر باہر سے کوئی آکر آپ کےلئے ادارے ٹھیک کرتا ہے تو انکے مفادات کو بھی تو تحفظ ملے گا، کیا حکومت کو خبر نہیں کہ سرکاری ٹی وی خوشامد نامہ بن گیا ہے۔

پی ٹی وی کے وکیل نے کہا کہ درخواست گزار کے سروس سے متعلق تمام امور یہاں سے فائنل کرکے اسلام آباد بھیجے گئے ہیں چونکہ اب وہاں پر پی ٹی وی کی ری اسٹرکچرنگ ہو رہی ہے اور بورڈ آف گورنر بھی تحلیل کر دیا گیا ہے اسلئے یہ تاخیر کا شکار ہو رہے ہیں۔

پی ٹی وی کے وکیل نے بتایا کہ ایک پرائیوٹ فارم اس کی ری اسٹرکچرنگ کررہی ہے۔ چیف جسٹس قیصر رشید خان نے ریمارکس دیے کہ سرکاری ٹی وی صرف خوشامد نامہ بن گیا ہے لوگ لاکھوں تنخواہ لے رہے ہیں لیکن کچھ کام نہیں کرتے۔

عدالت نے منیجنگ ڈائریکٹر پی ٹی وی کو کل طلب کرتے ہوئے سماعت ملتوی کردی۔

اسلام آباد: قومی اسمبلی میں 8 پرائیویٹ اراکین کی جانب سے پیش کردہ بل کے بعد حزب اختلاف نے 3 صدارتی آرڈیننس پیش کرنے پر اسمبلی سے واک آؤٹ کردیا بعدازاں آرڈیننس کو مزید 120 دن کے لیے بڑھا دیے گئے۔

رپورٹ کے مطابق انسانی حقوق کے وزیر ڈاکٹر شیریں مزاری کی جانب سے پیش کردہ جرنلسٹ کے تحفظ بل پر اپوزیشن اور حکومت کے اراکین کے مابین سخت جملوں کا تبادلہ بھی ہوا۔

اپوزیشن کا دعوی تھا کہ یہ ایک پرانا بل ہے لیکن حکومت اس کا کریڈٹ لینا چاہتی ہے۔

واک آؤٹ کے فورا بعد ہی حزب اختلاف کے رکن ابرار علی شاہ نے نا مکمل کورم کی نشاندہی کی اور سیشن 20 منٹ کے بعد شروع ہوا۔

اجلاس شام 8 بجکر 15 منٹ تک جاری رہا اور اس وقت اختتام پذیر ہوا جب حزب اختلاف کی ایک اور رکن شاہدہ رحمانی نے نامکمل کورم کی نشاندہی کی۔

بعدازاں ایوان جمعہ کی صبح 11 بجے تک ملتوی کردیا گیا۔

8 پرائیوٹ ممبروں کے بلوں میں منشیات سے متعلق مادوں کے کنٹرول (ترمیمی) بل 2021، زخمی شخص کیلئے لازمی علاج کا بل 2021، آئین (ترمیمی) بل 2021 (آرٹیکل 37 میں ترمیم)، انتخابات (ترمیمی) بل202 ایل شامل ہیں، اسلام آباد ہیلتھ کیئر ریگولیشن (ترمیمی) بل 2021، مغربی پاکستان خالص خوراک (ترمیمی) بل 2021، آئین (ترمیمی) بل 2021 (آرٹیکل – 140 اے میں ترمیم) اور بینظیر انکم سپورٹ پروگرام (ترمیمی) بل 2021 شامل تھے۔

سید محمود شاہ، سید آغا رفیع اللہ، کیسو مال کھیل داس، سید جاوید حسنین، ڈاکٹر مہرین رزاق بھٹو، نصرت واحد، کشور زہرہ اور نوید عامر جیوا نے ایوان میں یہ بل پیش کیے۔

اسپیکر قومی اسمبلی اسد قیصر نے تبادلہ خیال کے لیے بلوں کو متعلقہ قائمہ کمیٹیوں کے حوالے کردیا۔

کیپیٹل ڈیولپمنٹ اتھارٹی (ترمیمی) آرڈیننس 2021، انکم ٹیکس (ترمیمی) آرڈیننس 2021 اور پی اے ایف وار کالج انسٹی ٹیوٹ آرڈیننس 2021 میں مزید 120 دنوں کے لیے توسیع شدہ تین آرڈیننس ہیں۔

وزیر اعظم کے مشیر برائے پارلیمانی امور ڈاکٹر بابر اعوان نے ان آرڈیننسز کو پیش کیا۔

اس پر اپوزیشن نے واک آؤٹ کیا اور اجلاس 20 منٹ کے لیے معطل کردیا گیا۔

جب اجلاس دوبارہ شروع ہوا تو اپوزیشن ارکان اپنی نشستوں پر واپس آئے اور اجلاس ساڑھے آٹھ بجے تک جاری رہا۔

وزیر اعظم کے مشیر برائے پارلیمانی امور ڈاکٹر بابر اعوان نے ان آرڈیننسز کو منتقل کیا۔ اس پر اپوزیشن نے واک آؤٹ کیا اور اجلاس 20 منٹ کے لئے معطل کردیا گیا۔

جب اجلاس دوبارہ شروع ہوا تو اپوزیشن ارکان اپنی نشستوں پر واپس آئے اور اجلاس ساڑھے آٹھ بجے تک جاری رہا۔ ڈاکٹر بابر اعوان نے نجی ممبروں کے دن حکومتی ایجنڈا لینے کے لیے قواعد کو معطل کرنے کی قرارداد پیش کی۔

حزب اختلاف کے قانون سازوں سید نوید قمر اور شاہدہ اختر علی نے سرکاری معاملات کو آگے بڑھانے کے اقدام پر اعتراض کیا لیکن ڈاکٹر بابر اعوان نے کہا کہ یہ قراردادیں پیر کے ایجنڈے میں تھیں لیکن انہیں ایوان کو معصوم فلسطینی عوام کے خلاف اسرائیلی جارحیت پر تبادلہ خیال کرنے کی اجازت دینے کے لیے چھوڑ دیا گیا تھا۔

جب ڈاکٹر شیریں مزاری نے جرنلسٹس کے تحفظ بل کو پیش کیا تو پاکستان پیپلز پارٹی کی رکن ڈاکٹر نفیسہ شاہ نے دعوی کیا کہ یہ وہی بل تھا جس کو حکومت نے 2012 میں پیش کیا تھا۔

تاہم ڈاکٹر شیریں مزاری نے زور دیا کہ یہ بل نیا ہے اور انہوں نے خود اس کا مسودہ تیار کیا تھا۔

پاکستان مسلم لیگ نواز (ن) کی قانون ساز رکن مریم اورنگزیب نے کہا کہ ان کی حکومت نے 2016 میں پی پی پی کے بل کو اپ گریڈ کیا تھا اور اس طرح کے تین بلوں کو منظوری کی ضرورت ہے۔

ڈاکٹر شیریں مزاری نے کہا کہ سن 2015 میں پیش کردہ بل کو میڈیا ہاؤسز اور تنظیموں نے مسترد کردیا تھا اور اسی وجہ سے انہوں نے تین سال کی سخت محنت کے بعد ایک نیا بل پیش کیا جس کے بارے میں انہوں نے کہا کہ تمام اسٹیک ہولڈرز کے لیے قابل قبول ہے۔

اسپیکر اسد قیصر نے کہا کہ وہ یہ جاننے کے لیے کہ یہ پرانا تھا یا نیا دونوں بلوں کی جانچ پڑتال کریں گے۔

مسلم لیگ (ن) کے رہنما احسن اقبال نے یونیورسٹی کے قیام کا بل پیش کیا جس سے اسلامی اصول و اقدار کو فروغ ملے گا۔

تاہم وزیر تعلیم شفقت محمود نے کہا کہ بل کو ہائر ایجوکیشن کمیشن کی تمام ضروریات کو پورا کیے بغیر بحث کے لیے متعلقہ کمیٹی کے پاس نہیں بھیج سکتا۔