Category سیاست

گوجرانوالہ:گوجرانوالہ کی انسداد دہشت گردی عدالت نے اداروں کو دھمکانے اور چیف سیکریٹری کو جان سے مارنے کی دھمکیاں دینے سے متعلق مقدمے میں وفاقی وزیر داخلہ رانا ثنا اللہ کو گرفتار کرکے 7 مارچ کو پیش کرنے کا حکم دے دیا۔انسداد دہشت گردی عدالت کے جج رانا زاہد اقبال نے رانا ثنا اللہ کے خلاف درج مقدمے کی سماعت کی۔گجرات پولیس نے مقدمے کی تفتیش مکمل کر کے اخراج رپورٹ عدالت میں پیش کی تھی تاہم عدالت نے پولیس کی اخراج رپورٹ کو مسترد کر دیا۔عدالت نے مقدمے کی اخراج رپورٹ مرتب کرنے پر ایس پی انویسٹی گیشن گجرات، متعلقہ ڈی ایس پی اور تفتیشی آفیسر کو شو کاز نوٹس جاری کرتے ہوئے ذاتی حیثیت میں پیش ہونے کا حکم دیا۔اس کے علاوہ عدالت نے مقدمے کے ملزم رانا ثنا اللہ کے قابل ضمانت وارنٹ گرفتاری بھی جاری کر دیے۔انسداد دہشت گردی عدالت نے مقدمے کی آئندہ سماعت پر تمام پولیس افسران کو عدالت طلب کرتے ہوئے سماعت 7 مارچ تک ملتوی کر دی۔عدالت نے حکم دیا کہ ملزم رانا ثنا اللہ کو گرفتار کر کے عدالت میں پیش کیا جائے۔واضح رہے کہ حکومت پنجاب نے 15 اپریل 2021 اور 29 جنوری 2022 کو اپنی تقاریر کے دوران عدلیہ اور سرکاری افسران کو دھمکیاں دینے پر حکومت پنجاب کی طرف سے وفاقی وزیر داخلہ رانا ثنااللہ کے خلاف دہشت گردی کا مقدمہ درج کیا گیا تھا۔فرسٹ انفارمیشن رپورٹ (ایف آئی آر) کی نقل کے مطابق پنجاب کے شہری شیخ شیہکاز عالم کی شکایت پر وفاقی وزیر داخلہ رانا ثنااللہ کے خلاف انسداد دہشت گردی کے سیکشن 7 جبکہ ضابطہ فوجداری کے سیکشن 353 ، 186 ، 189 اور 506 کے تحت مقدمہ درج کیا گیا تھا۔شکایت کنندہ نے مؤقف اختیار کیا ہے کہ 15 اپریل 2021 اور 29 جنوری 2022 کو اپنی تقاریر میں وفاقی وزیر داخلہ رانا ثنااللہ نے عدلیہ کو اپنا فرض ادا کرنے سے روکنے اور پنجاب پولیس کے افسران کے بچوں کو مارنے کی دھمکی دی تھی۔ایف آئی آر میں رانا ثنااللہ کا بیان بھی شامل کیا گیا جو ایک نجی ٹی وی پر نشر بھی ہوا ۔ایف آئی آر میں کہا گیا تھا کہ رانا ثنااللہ کے بیان کا مقصد عدلیہ، چیف سیکریٹری پنجاب، کمشنر اور ملک کے عوام میں خوف و ہراس پھیلانا تھا، ان کا مقصد سرکاری ملازمین کو اپنے فرائض کی ادائیگی اور قانونی ذمہ داریوں کو پورا کرنے سے روکنا تھا۔درخواست گزار نے مزید کہا تھا کہ وفاقی وزیر کی تقاریر نے عدلیہ، بیوروکریسی، پولیس، انتظامیہ اور قوم میں خوف و ہراس پھیلایا اور استدعا کی گئی ہے کہ رانا ثنااللہ کے بیان کی تحقیقات کی جائیں اور انہیں سزا دی جائے تاکہ سرکاری اہلکاروں کے خلاف بولنے والے دوسرے شہریوں کے لیے ایک مثال بن سکے۔

اسلام آباد : وفاقی وزیر برائے ماحولیاتی تبدیلی سینیٹر شیری رحمان نے بارکھان واقعے پر افسوس کا اظہار کرتے ہوئے کہا ہے کہ بارکھنان کے افسوسناک اور قابل مذمت واقعے کے محرکات اور وجوہات جو بھی ہوں، یہ ہمارے معاشرے کے مجموعی شعور پر سوالیہ نشان ہے۔ اپنے ایک ٹویٹ میں وفاقی وزیر کا کہنا تھا کہ ہم کون سی صدی میں رہتے ہیں جہاں طاقتوروں نے نجی جیل بنائے ہوئے ہیں؟ جہاں لوگوں، عورتوں اور بچوں پر تشدد کر کے ان کی لاشیں کنویں میں پھینک دی جاتی ہیں؟ پوسٹ مارٹم میں دل دہلادینے والے انکشافات سامنے آ رہے ہیں۔ انہوں نے کہا کہ جو متاثرین اور ان کے خاندان پر گزری ہے اس کا کوئی ازالہ نہیں کر سکتا، بہیمانہ تشدد، قتل اور لاشوں کی بے حرمتی نے ہم سب کا سر شرم سے جھکا دیا ہے، اس واقعے کی جلد از جلد تحقیقات کر کے واقعے میں ملوث مجرموں کو کڑی سزا دی جائے۔

سپریم کورٹ کے سینئر جج جسٹس قاضی فائزعیسیٰ نے سائفر کی تحقیقات کے لیے دائر اپیلوں کی چیمبر میں سماعت کی جس میں عدالت نے رجسٹرار آفس کے اعتراضات برقرار رکھتے ہوئے اعتراضات کے خلاف اپیلیں خارج کردیں۔

دورانِ سماعت جسٹس قاضی فائز عیسیٰ نے کہا کہ سائفر کی تحقیقات کرانا حکومت کا کام ہے، عدالت کیوں مداخلت کرے؟ مبینہ بین الاقوامی سازش سے عمران حکومت گرانے کی تحقیقات اُس وقت کے وزیراعظم چاہتے تو خود کراسکتے تھے، عدالت سنی سنائی باتوں کی تحقیقات کا حکم کیسے دے سکتی ہے، ہم قیاس آرائیوں پر یقین نہیں رکھتے۔

معزز جج نے کہا کہ وزیراعظم چاہتے تو سفارتی سطح پر تعلقات منقطع کرسکتے تھے، حکومتی اختیارات میں مداخلت نہیں کریں گے اور  نہ حکومت کو اپنے اختیارات میں مداخلت کی اجازت دیں گے، میں کاغذ لہرا کر الزام لگاؤں کہ مجھے فلاں وکیل نے قتل کی دھمکی دی، کیا اس طرح ایف آئی آر درج ہوجائے گی؟

جسٹس قاضی فائز نے  وکیل جی ایم چوہدری سے مکالمہ کیا کہ سپریم کورٹ کے برابر میں پارلیمنٹ کی عمارت قائم ہے، جائیں جاکرپارلیمنٹ کوکہیں وہ ہمیں اختیاردے پھر ہم مداخلت کرسکتے ہیں، سب سنی سنائی باتیں ہیں۔

دورانِ سماعت وکیل جی ایم چوہدری نے پاکستان کمیشن آف انکوائری کا حوالہ دیا جس پر جسٹس قاضی فائز نے کہا کہ کمیشن آف انکوائری ایکٹ میں انکوائری کمیشن بنانےکا اختیاربھی حکومت کے پاس ہے، جس کا کام ہے اسی کو کرنا چاہیے،اسی سے ملک آگے بڑھے گا۔

وکیل نعیم الحسن نے اپنے دلائل میں کہا کہ اس وقت حکومت نے سکیورٹی کونسل کی میٹنگ بلائی اور ڈیمارش جاری کیا گیا، جسٹس قاضی نے وکیل سے سوال کیا کہ یہ ڈیمارش کیا ہوتا ہے؟ اس پر وکیل نے کہا کہ مجھے نہیں پتا جس پر معزز جج نے کہا کہ مجھے بھی نہیں پتا۔

بعد ازاں عدالت نے رجسٹرار آفس کے اعتراضات برقرار رکھے اوردرخواستیں مسترد کردیں۔

وزیرداخلہ رانا ثنااللہ کی زیرصدارت ملک میں امن وامان کی صورتحال کےحوالے سے اجلاس ہوا جس میں سیکرٹری داخلہ یوسف نسیم کھوکھر، پنجاب، سندھ، خیبرپختونخوا اوراسلام آباد کے آئی جیز سمیت دیگر حکام شریک ہوئے۔

اجلاس میں پی ٹی آئی کی جیل بھروتحریک کے تناظرمیں امن وامان کی صورتحال پر بریفنگ دی گئی اور اجلاس میں فیصلہ کیا گیا کہ ملک میں امن و امان کی صورتحال کویقینی بنایا جائے گا اور قانون توڑنے والوں کو گرفتار کیا جائے گا۔

اجلاس میں فیصلہ کیا گیا کہ امن دشمنوں کا ریکارڈ رکھا جائے اور اسے ان کے کیریکٹر سرٹیفکیٹ میں واضح کیا جائے گا۔

وزیر داخلہ کا کہنا تھاکہ جیل بھرو تحریک کے اصل مقاصد ایک ڈرامہ رچانا، میڈیا کی توجہ حاصل کرنا ہے، جیل بھروتحریک کا مقصد امن وامان کی صورتحال متاثر کرنا اور سیاسی عدم استحکام پیدا کرنا ہے۔

انہوں نے ہدایت کی کہ قانون توڑنے والوں کے خلاف شواہد اکٹھے کرکے عوام کے سامنے لائے جائیں، خواتین اور غریب کارکنوں کی گرفتاری سے گریز کیا جائے۔

وزیرداخلہ نے کراچی میں دہشت گردی کا حملہ پسپا کرنے میں آئی جی سندھ اورپولیس فورس کو سراہا۔

خیال رہے کہ پاکستان تحریک انصاف کی جیل بھرو تحریک کل سے لاہور میں شروع ہوگی۔

چیئرنگ کراس مال روڈ کے لیے  پی ٹی آئی کارکنوں کے قافلے جیل روڈ سے روانہ ہونا شروع ہوگئے۔

دوسری جانب محکمہ داخلہ پنجاب کی جانب سے مال روڈ، مین بلیوارڈ گلبرگ اور سول سیکرٹریٹ کے اطراف ایک ہفتے کے لیے دفعہ 144 نافذ کردی گئی ہے۔

تحریک انصاف کی جانب سے پہلے مرحلے میں شاہ محمود قریشی اور عمر سرفراز چیمہ سمیت 5 رہنماؤں اور 200 کارکنوں کی گرفتاری پیش کرنےکا اعلان کیا گیا ہے۔

ادھر  پنجاب کی نگران حکومت نے حکمت عملی بنائی ہےکہ چونکہ لاہور کی جیلوں میں مزید قیدیوں کی گنجائش نہیں ہے  اس لیے گرفتار  افرادکو میانوالی اور ڈی جی خان جیلوں میں بھیجنا پڑےگا۔

پاکستان تحریک انصاف (پی ٹی آئی) کی جیل بھرو تحریک کے آغاز پر وائس چیئرمین شاہ محمود قریشی اور جنرل سیکرٹری اسد عمر سمیت کئی رہنماؤں نے گرفتاری دے دی۔

لاہور میں کیپیٹل سٹی پولیس آفیسر (سی سی پی او) آفس پر پی ٹی آئی کےکئی رہنما اور کارکن قیدیوں کی گاڑی میں سوار ہوگئے اور قیدیوں کی وین کی چھت پرچڑھ گئے۔

گرفتاری دینے والوں میں عمر سرفراز چیمہ، اعظم سواتی اور دیگر شامل ہیں۔

اس حوالے سے پولیس نے بتایا کہ ہم نےگرفتارنہیں کیا، یہ خود ہی پریژن وین میں آکربیٹھ گئے۔

پولیس نے اہلکاروں سمیت سب کا داخلہ سی سی پی او آفس میں روک دیا جس کے بعد پی ٹی آئی کارکن سی سی پی او آفس کےسامنے سڑک پر لیٹ گئے۔

پی ٹی آئی رہنماؤں اور کارکنوں نے پولیس سے گرفتار کرنےکا مطالبہ کیا۔ کارکن وین میں چڑھ کر سیلفیاں بناتے رہے، پی ٹی آئی کے سوشل میڈیا اکاؤنٹ سے بھی گرفتاری دینے والے رہنماؤں کی سیلفی جاری کی گئی ہے۔

بعد ازاں تحریک انصاف کے متعدد کارکن پولیس وین سے اتر گئے اور سی سی پی او آفس سے واپس چیئرنگ کراس کی طرف روانہ ہوگئے۔

اسلام آباد:سابق وزیراعظم شاہد خاقان عباسی نے کہا ہے کہ نیب کو جڑ سے اکھاڑنے کی ضرورت ہے ،نیب کیسز تو ابھی بھی چل رہے ہیں، آفتاب سلطان ہی بہتر بتا سکتے ہیں ان پر کس کا دبائو تھا۔ میڈیا سے گفتگو کرتے ہوئے شاہد خاقان عباسی نے کہا کہ سیاستدانوں کو اغواء کرنے کے حق میں نہیں ، نظام میں درستگی کی ضرورت ہے۔ انہوں نے کہا کہ الیکشن کو نہیں روکا جاسکتا آئین کا تقاضا ہے کہ انتخابات لازمی ہیں الیکشن ہونے چاہیے نتیجہ جو بھی ہو بعد میں دیکھا جائے گا بدقسمتی ہے کہ انتخابات بھی قومی مسائل کا حل نہیں ملکی مسائل کا واحد حل مل کر بیٹھنے میں ہیں۔ انہوں نے کہا کہ آفتاب سلطان پر کس کا دبائو تھا یہ وہ خود ہی بہتر بتا سکتے ہیں۔ انہوں نے کہا کہ نیب کو جڑ سے اکھاڑنے کی ضرورت ہے نیب کیسز تو ابھی بھی چل رہے ہیں۔شاہد خاقان عباسی نے ایک بار پھر واضح کیا کہ نئی جماعت بنانے کا کوئی منصوبہ نہیں ہے اور نہ ہی مقصد ہے جیل بھرو تحریک سے مسائل حل نہیں ہونگے سیاستدانوں کو اغواء￿ کرنے حق میں نہیں نظام میں درستگی کی ضرورت ہے

اسلام آباد:نئے چیئرمین نیب کے لئے تین نام سامنے آگئے ہیں ،وزیر اعظم شہباز شریف قومی اسمبلی میں اپوزیشن لیڈر راجہ ریاض سے مشاورت کرینگے ،ذرائع نے کا کہنا ہے کہ نئے چیئرمین نیب کے لئے سابق چیف سیکرٹری پنجاب اعظم سلیمان اور عرفان الٰہی اور بشیر میمن کے نام سامنے آئے ہیں، ،چیئرن نیب وزیراعظم اور اپویشن لیڈر کی مشاورت سے تعینات ہونگے۔وزیراعظم شہباز شریف اور راجا ریاض کے درمیان مشاورت کا سلسلہ آج ہی شروع ہوگا۔اپوزیشن لیڈر کی جانب سے چیئرمین نیب کا نام سامنے آسکتاہے

جڑانوالہ : جڑانوالہ مسلم لیگ(ن) کے رہنما طلال چوہدری نے کہا ہے کہ عارف علوی ملک کے صدر بنیں عمران خان کے صدر نہ بنیں،پاکستان کووہ الیکشن چاہیے جو پاکستان کی ضرورت پوری کرے،صدر نے جس طرح اعلان کیا اس طرح الیکشن نہیں ہوسکتا،قانون میں الیکشن کا طریقہ کار موجودہے۔ صدر مملکت کی جانب سے پنجاب اور خیبر پختونخوا میں انتخابات کی تاریخ کے اعلان پر ردعمل دیتے ہوئے جڑانوالہ میں طلال چوہدری نے آن لائن سے گفتگو کر تے ہو کہا کہ صدر مملکت کے کہنے پر الیکشن ہو سکتا ہے نہ ہو گا۔طلال چوہدری کا کہنا تھا صدر مملکت عمران خان کے صدر نہ بنیں ملک کے صدر بنیں، آئین کے مطابق الیکشن کی تاریخ دینا صدر کا کام نہیں، عارف علوی نے صدر کے دفتر کو مذاق بنا لیا ہے۔طلال چوہدری نے کہا کہ پاکستان کو وہ الیکشن چا ہیے جو پاکستان کی ضرورت پوری کرے، جس طرح سے صدر نے کیا ہے، اس طرح سے الیکشن نہیں ہو سکتا، قانون میں الیکشن کا طریقہ کار موجود ہے۔رہنما مسلم لیگ ن نے کہا کہ الیکشن کو متنازع بنانے کے لیے صدر مملکت نے اپنا منصب استعمال کرنا شروع کر دیا ہے، الیکشن کی تاریخ دینے کے صدر کے فیصلے کی کوئی حیثیت نہیں ہے، صدر کے کہنے پر الیکشن ہو گا نہ ہو سکتا ہے۔انہوں نے مزید کہا کہ ہم الیکشن کی تیاری شروع کر چکے، مریم نواز ہر ضلع میں جا رہی ہیں، جلسے اور کنونشن کر رہی ہیں، ہم مارشل لاء سے نہیں ڈرے الیکشن سے کیا ڈریں گے لیکن خان صاحب چاہتے ہیں ان کی خواہش کے مطابق الیکشن ہوں اور اسمبلیاں چلیں۔طلال چوہدری کا کہنا تھا پی ٹی آئی اور صدر عارف علوی نے الیکشن کو متنازع بنانے کے لیے پہلا قدم اٹھا لیا ہے لیکن الیکشن کمیشن اپنی ذمے داریاں پوری کرے گا۔

اسلام آباد :مرکزی سینئر نائب صدر فواد چودھری نے کہا ہے کہ چیئرمین نیب کا استعفیٰ فاشسٹ نظام کے ٹوٹنے کی طرف بڑا قدم ہے۔ اپنے ایک بیان میں فواد چوہدری نے نیب کے استعفیٰ کا خیرمقدم کرتے ہوئے کہا کہ آفتاب سلطان نے اپنے کام میں‘‘مداخلت’’کے خلاف استعفیٰ دیا، چیف الیکشن کمشنر کیلئے چیئرمین نیب کے استعفیٰ میں بڑا پیغام ہے، میں ان 22افسران کو جن کو پنجاب میں مداخلت کرنے کیلئے لگایا گیا ہے کہتا ہوں وہ بھی خود کو اس نظام سے علیحدہ کریں، یہ ملک اور بیوروکریسی دونوں کے مفاد میں ہے۔ انہوں نے مزید کہا کہ چیئرمین نیب کا استعفیٰ تحریک انصاف کے مؤقف کی واضح توثیق ہے، روزِاول سے کہہ رہے ہیں کہ نظامِ احتساب کی تباہی این آر او دیکر لائے گئے مجرموں کا کلیدی ہدف ہے، ان مجرموں نے سازش سے اقتدار ملتے ہی سب سے پہلے نیب کو تباہ کیا، اپنے 11 سو ارب کی چوری بچانے کیلئے انہوں نے نیب قانون میں نہایت شرمناک ترامیم کیں۔لازم ہے کہ ریاستی ادارے مجرموں کے اشاروں پر کھیلنے کی بجائے آئین و قانون کی بالادستی کی راہ اختیار کریں، کٹھ پتلی راج انشاء اللہ جلد انجام کو پہنچے گا، ریاست اور عوام کو آگے بڑھنا ہے