Category سیاست

لاہور:لاہور ہائیکورٹ نے فرح خان عرف گوگی کی درخواست پر نیب کو نوٹس جاری کرتے ہوئے جواب طلب کر لیا۔لاہور ہائیکورٹ کے جسٹس شہرام سرور کی سربراہی میں دو رکنی بنچ نے فرح خان، ان کے شوہر احسن جمیل اورغوثیہ بلڈرز کی متفرق درخواست پر سماعت کی۔فرح گوگی نے درخواست میں نیب کے نوٹسز کو چیلنج کرتے ہوئے مؤقف اختیار کیا کہ نیب بد نیتی کی بنیاد پر نوٹسز جاری کررہا ہے، نیب کے پاس پرائیویٹ کاروبار میں کارروائی کا اختیار نہیں ہے لیکن اس کے باوجود بار بار نوٹسز جاری کیے جا رہے ہیں۔درخواست گزاروں کے وکیل کے مطابق نیب نوٹسز کی تعمیل کیلئے پولیس کو استعمال کر رہا ہے جس کا کوئی جواز نہیں ہے۔ وکیل نے استدعا کی کہ نیب نوٹس پر عمل درآمد معطل کیا جائے۔عدالت نے نیب نوٹسز پر فوری حکم امتناعی جاری کرنے کی استدعا مسترد کردی، اور ریمارکس دیے کہ درخواست گزاروں کا نام ایگزٹ کنٹرول لسٹ میں نہیں ہے نہ ہی بلیک لسٹ ہوئے ہیں۔عدالت نے درخواست پر نیب کو نوٹس جاری کرتے ہوئے جواب طلب کرلیا، اور کیس کی سماعت ملتوی کردی۔

کراچی:سندھ ہائی کورٹ نے قومی اداروں کے خلاف تضحیک آمیز بیانات کیس میں پی ٹی آئی رہنما شہبازگل کی درخواست کی فوری سماعت کی استدعا مسترد کردی۔ پی ٹی آئی رہنما نے عدالت سے استدعا کرتے ہوئے مؤقف اختیار کیا کہ ایک واقعہ کا ایک ہی مقدمہ درج کیا جاسکتا ہے، عدالت سے درخواست ہے کہ کراچی میں درج مقدمات کو کالعدم قرار دیا جائے، اور درخواست پر فوری سماعت کی جائے۔عدالت نے شہبازگل کی درخواست کی فوری سماعت کی استدعامسترد کر دی، اور جسٹس عرفان سادات نے ریمارکس دیے کہ ہم صرف نئے کیسزکی فوری سماعت کی اجازت دیتے ہیں، پہلے سے زیرسماعت مقدمے میں فوری سماعت کی استدعا منظور نہیں کی جاتی، عدالتی قواعد کے مطابق روسٹر برانچ کے ذریعے درخواست دائرکی جائے۔یاد رہے کہ شہباز گل نے گرفتاری سے بچنے کے لیے سندھ ہائیکورٹ سے رجوع کیا تھا ،شہبازگل نے اپنی درخواست میں مؤقف پیش کیا کہ میرے خلاف تھانہ سرجانی ٹاون، بریگیڈ اور رضویہ میں مقدمات درج کیے گئے ہیں، اسی بیان سے متعلق ایک مقدمہ لاہور کے تھانہ مانگا منڈی میں درج ہوچکا ہے

پشاور : چیئرمین امن ترقی پارٹی محمد فائق شاہ نے بلدیاتی انتخابات کو بار بار موخر کر نے کی مذمت کی ہے اور کہا ہے کہ یہ عمل غیر جمہوری اور غیر قانونی ہے، عجلت میں نیا ترمیمی قانون اور عوام کا اختیار چھننا غیر جمہوری قدم ہے الیکشن کمیشن پر جانبداری کا تاثر ابھرے گا کراچی، حیدرآباد اور اسلام آباد میں بار بار التوا الیکشن، کوئی جمہوری عمل نہیں ہے حکومتوں کو عوام کی شراکت اقتدار کی جدوجہد ہضم نہیں ہوتی عدالتوں سے اپیل ہے کہ ایسے عمل کو روکا جائے تاکہ منصفانہ نظام کی بنیاد اور الیکشن پر اعتماد پیدا ہو اصلاحات ضرور کی جائیں مگر الیکشن کے انعقاد سے چند دن قبل الیکشن کا التوا قابل مذمت عمل ہے حکمران اتحاد خوف اور فسطائیت کا راستہ چھوڑ کر عوام پر اعتماد کرے اس سے انہیں جمہوریت اور عوام کو فائدہ پہنچے گا، محمد فائق شاہ نے کہا کہ پارلیمنٹ عوامی مفاد کی بجائے ذاتی مفادات کے بل فوری پاس کرتی اور اپنی ساکھ کھو رہی ہے اسی طرح اداروں کو بدنام اور کمزور کیا جاتا ہے عوام اسے تسلیم نہیں کریں گے امن ترقی پارٹی عوام کے ساتھ کھڑی ہے اور ہر فورم پر عوام کا مقدمہ لڑے گی۔

عوام ایک بار پھر پاکستان پیپلز پارٹی کو اقتدار میں دیکھنا چاہتی ہے، صوبائی رہنما

پشاور:پاکستان پیپلز پارٹی کے صوبائی ڈپٹی سیکرٹری کوآرڈی نیشن فرزند علی وزیر نے کہا ہے کہ عمران خان اقتدار سے محروم ہونے کے بعد ہوش وحواس کھو چکا ہے اور وہ حصول اقتدار کیلئے کچھ بھی کرنے کو تیار ہے مگر اب ان کا وقت گیا،عوام نے ان کے روز روز کے تماشوں سے خود کو الگ کرلیا جس طرح انہوں نے اداروں اور ان اداروں کے اعلیٰ افسران کو بدنام کرنے کی ناکام کوشش کی اس سے محب وطن پاکستانی مایوس ہوئے ۔ انہوں نے کہاکہ پاکستان پیپلز پارٹی کے چیئرمین اور وفاقی وزیر خارجہ بلاول بھٹو زرداری نے کم مدت میں خودکوبڑا لیڈر ثابت کیا اور کم مدت میں عالمی دنیا میں پاکستان کے وقار کو بلند کیا اور اپنے موقف کو منوایا ہے ، اس سے نوجوان قائد کی صلاحیتوں کا اندازہ لگایا جا سکتاہے اس وقت عالمی لیڈروں میں بلاول بھٹو کانام بھی شامل ہے ۔ انہوں نے کہاکہ پاکستان میں بالخصوص خیبرپختونخوا میں بڑے بڑے نامور سیاسی قائدین پیپلز پارٹی میں جلد شامل ہونگے پیپلز پارٹی ہی واحد جماعت ہے جس نے ہمیشہ اقتدار میں آ کر غریب عوام کی خدمت اور ان کوروزگار دیا ہے مہنگائی کم کی ہے اب عوام ایک بار پھر پیپلز پارٹی کو اقتدار میں دیکھنا چاہتی ہے آ نے والے الیکشن میں پیپلز پارٹی ملک بھر سے کامیاب ہوگی اور آ نے والا وزیراعظم انشاء اللہ نوجوان چیئرمین پیپلز پارٹی بلاول بھٹو زرداری ہونگے پیپلز پارٹی کے جیالے پارٹی پیغام گھر گھر پہنچائیں۔

اسلام آباد:الیکشن کمیشن میں افسران کے بڑے پیمانے پر تبادلے کر دیئے گئے ہیں۔اس حوالے سے الیکشن کمیشن نے افسران کے تبادلوں کا نوٹیفکیشن جاری کر دیاہے۔الیکشن کمیشن نے کن ڈسٹرکٹ الیکشن کمشنرز کو تبدیل کیا گیا ہے۔لاہور، گجرانوالہ، مظفرگڑھ ،سرگودھا، بہاولپور اور بدین ،خیرپور، کراچی وسطی، گھوٹکی، مٹیاری ،خیرپور، کراچی وسطی، گھوٹکی، مٹیاری کے ڈسٹرکٹ الیکشن کمشنر بھی تبدیل کردیے گئے۔ساہیوال، ناروال، جعفر آباد، بہاولپور، چارسدہ، کراچی کے الیکشن افسران کو بھی تبدیل کر دیاگیاہے۔الیکشن کمیشن نے افسران کے تبادلے کا نوٹیفکیشن جاری کر دیا۔

لاہور:وزیراعلیٰ پنجاب چودھری پرویز الٰہی نے کہا ہے کہ تلہ گنگ کو ضلع کا درجہ دے کر اپنا وعدہ پورا کردیا۔تفصیلات کے مطابق وزیراعلیٰ پنجاب سے تلہ گنگ سے تعلق رکھنے والے رکن پنجاب اسمبلی حافظ عمار یاسر نے ملاقات کی، ملاقات میں وزیراعلی چودھری پرویز الٰہی نے ڈسٹرکٹ کمپلیکس تلہ گنگ کیلئے اراضی منتقلی کا نوٹیفکیشن ایم پی اے حافظ عمار یاسرکے حوالے کیا۔نوٹیفکیشن کے مطابق تلہ گنگ میں محکمہ زراعت کی اراضی ڈسٹرکٹ گورنمنٹ کو ڈسٹرکٹ کمپلیکس کیلئے ٹرانسفر کی گئی ہے۔اس موقع پر گفتگو کرتے ہوئے وزیراعلی پنجاب چودھری پرویز الٰہی نے کہا کہ تلہ گنگ کو ضلع کا درجہ دے کر وعدہ پورا کیا ہے، تلہ گنگ ڈسٹرکٹ کمپلیکس کیلئے جلد تعمیراتی سرگرمیاں شروع ہوجائیں گی، عوام کی سہولت کیلئے شہر کے وسط میں ڈسٹرکٹ کمپلیکس تعمیر کیا جائے گا۔وزیراعلی پنجاب چودھری پرویز الٰہی نے کہا کہ تلہ گنگ کے لوگ میرے اپنے ہیں،ان کیلئے اوربھی بہت کچھ کرنا چاہتا ہوں۔

سکھر :وزیراعظم کے مشیر قمر زمان کائرہ نے کہا ہیکہ عمران خان نے امریکا اور سعودیہ سے تعلقات خراب کیے جب کہ امریکا کے تعلقات ہمارے ساتھ اچھے نہیں مگر ہمیں اس کے آگے جھکنا نہیں۔سکھر میں تقریب سے خطاب کرتے ہوئے قمر زمان کائرہ نے کہاکہ کیا الیکشن کرانے، قانون اور آئین بنانے سے جمہوریت آجاتی ہے۔ ادارے کھڑے کرنے سے عمارتیں بنانے سے جمہوریت نہیں آتی۔انہوں نے کہا کہ پاکستان مشکل دور سے گزر رہا ہے اس لیے مشکل فیصلے کرنا پڑیں گے، 9 ہزار ارب پاکستان کی آمدنی اور14 ہزار ارب پاکستان کا خرچہ ہے، مارکیٹ 8 بجے بند کرنے سے 100 ارب روپے سالانہ بچت ہوتی ہے مگر مارکیٹس بند کرنے کو کاروباری حضرات تیار نہیں جب کہ ورک لوڈ کم کرنیکے لیے 20 فیصدگھر سے کام کرنیکی بات کی تو تنقید کی گئی۔ انہوں نے کہا کہ امریکا کے تعلقات ہمارے ساتھ اچھے نہیں مگر ہمیں اس کے آگے جھکنا نہیں، عمران خان نے امریکا اور سعودیہ سے تعلقات خراب کیے، آج بلاول بھٹو وزیر خارجہ بن کر عالمی دنیا سے تعلقات بہتر بنارہے ہیں

ملتان :پاکستان تحریک انصاف کے وائس چیئرمین اور سابق وزیر خارجہ شاہ محمود قریشی نے کہا ہے کہ بلاول بھٹو ہمیں اسمبلی میں آنے کی دعوت نہیں دے سکتے، اسمبلی آنے کی دعوت دینا وزیراعظم کا استحقاق ہے۔بدھ کے روز اپنے ایک بیان میں شاہ محمود قریشی نے کہا کہ ہم پارلیمنٹ میں اپنا کردار ادا کرنے کے لئے تیار ہیں لیکن حکومت سنجیدہ نہیں ہے اور انتخابات کی تاریخ نہیں دے رہی۔اسٹیبلشمنٹ کے ساتھ رابطوں سے متعلق سوال کے جواب میں ان کا کہنا تھا کہ اسٹیبلشمنٹ غیر سیاسی ہے ہم کیسے ان سے رابطہ کر سکتے ہیں؟شاہ محمود قریشی نے چیئرمین پیپلز پارٹی بلاول بھٹو کے بیان پر ردعمل دیتے ہوئے کہا کہ بلاول ہمیں پارلیمنٹ میں آنے کی دعوت نہیں دے سکتے یہ وزیراعظم کا استحقاق ہے۔یاد رہے کہ وزیر خارجہ بلاول بھٹو زرداری نے بینظیر بھٹو کی برسی پر کیے گئے خطاب میں سابق وزیر اعظم عمران خان کو پارلیمنٹ میں واپس آنے کی وارننگ دی تھی۔

کراچی : وزیر خزانہ اسحاق ڈار نے ایک بار پھر واضح کیا ہے کہ ثابت کر سکتا ہوں پاکستان کے ڈیفالٹ ہونے کا کوئی خدشہ نہیں، سنگین مسائل کے باوجود ہم پیرس کلب نہیں جائیں گے، سیاسی گیم اسکورنگ کرکے پاکستانی معیشت کو نقصان پہنچایا گیا ہے، تین ماہ سے وزارت خزانہ کے منصب پر فائز ہوں اور ہر وقت ڈیفالٹ کی باتیں سنتا ہوں،کسی سے کوئی انتقام نہیں لیں گے بلکہ معیشت کو ٹھیک کریں گے ،پاکستان کی معاشی ترقی دنیا دیکھے گی۔بدھ کے روزپاکستان سٹاک ایکسچینج کی تقریب سے خطاب کرتے ہوئے اسحاق ڈار نے کہا ہے کہ پی ٹی آئی حکومت نے ایس ای سی پر توجہ نہیں دی، سستی سیاست کے لیے پاکستان کو نقصان پہنچایا جا رہا ہے اور ملک کے ڈیفالٹ کی باتیں کی جا رہی ہیں، لوگوں کو خوف میں مبتلا کر دیا کوئی ڈالر تو کوئی سونا خرید رہا ہے، سیاسی مقاصد کے لیے ایسی باتیں کرنا درست نہیں ہے۔انہوں نے مزید کہا کہ سنگین مسائل ہیں لیکن ہمیں اس کا حل نکالنا ہے، ہمیں کسی کو انتقام کا نشانہ نہیں بنانا، ملک کی معیشت کو ٹھیک کرنا ہے، ، ہم مدد کے لیے پیرس کلب نہیں جائیں گے، آنے والے چند ماہ میں پاکستان کی پوزیشن واضح ہو جائے گی، میں پاکستان کے ایشوز کو حل کر رہا ہوں، یہ ماضی کا پاکستان نہیں، ملک کیوں ڈیفالٹ کرے گا۔ان کا کہنا تھا 2013 میں بھی کہا جا رہا تھا کہ پاکستان 6 ماہ میں ڈیفالٹ کر جائے گا، ڈکٹیٹر آئی ایم ایف کا پروگروم پورا نہیں کر سکے، ن لیگ نے آئی ایم ایف کا پروگرام پورا کیا تھا۔اسحاق ڈار نے کہا کہ معیشت پر جو تجربے ہوئے اس کا جوابداہ میں نہیں ہوں، ڈالر کی ہمسایہ ملک کو اسمگلنگ ایک بڑا مسئلہ ہے، ہمیں ڈالر، گندم اور کھاد کی اسمگلنگ کو روکنا ہے، اگلے 6 سے 7 سال میں پاکستان کو 35 ارب ڈالرز کی ضرورت ہو گی۔ اسحاق ڈار نے کہا ہے کہ سیاسی گیم اسکورنگ کرکے پاکستانی معیشت کو نقصان پہنچایا گیا ہے، تین ماہ سے وزارت خزانہ کے منصب پر فائز ہوں اور ہر وقت ڈیفالٹ کی باتیں سنتا ہوں۔پاکستان کا ڈیفالٹ ہونے کا کوئی چانس نہیں ہے، ملکی زرمبادلہ ذخائر کم ہیں مگر ڈیفالٹ کا خطرہ بالکل نہیں اور میں ثابت کرسکتا ہوں پاکستان ڈیفالٹ نہیں کرے گا،انہوں نے کہا کہ 2013 میں بھی معاشی حالات انتہائی ابتر تھے اور تین سال کے عرصے میں معیشت کھڑی کر دی، پاکستان 2013 میں بھی ڈیفالٹ کے دہانے پر تھا مگر بہتر معاشی اقدامات سے باہر آگئے تھے۔اسحاق ڈار نے اعتراف کیا کہ پاکستان اس وقت معاشی بھنور میں پھنسا ہوا ہے جس کے لیے آئی ایم ایف کے پاس جانا انتہائی ضروری ہوگیا ہے، کیپیٹل مارکیٹ کی بہتری کے لیے چیئرمین ایس ای سی پی کو ہدایات جاری کر دی ہیں۔انہوں نے کہا کہ ستمبر کو ذمہ داری سنبھالتے ہی پاکستان اسٹاک ایکسچینج اور ایس ای سی پی کو فوکس کیا لیکن بدقسمتی سے ایس ای سی پی میں سالوں سے کمشنرز تعینات ہی نہیں تھے،اسحاق ڈار نے کہا کہ پاکستان اسٹاک ایکسچینج سے ملکی معیشت کو بہتر سمت لے جایا جا سکتا ہے، دنیا کی پانچویں اسٹاک مارکیٹ اس وقت انتہائی مشکل میں ہے اور خواہش ہے اسٹاک مارکیٹ کا گولڈن دور واپس آئے، پاکستان اسٹاک ایکسچینج میں سرمایہ کاروں کیلئے ایف بی آر کی پالیسی کو بھی نرم کیا جا رہا ہے،وزیر خزانہ نے کہا کہ لوگوں کو ڈرا کر رکھا ہوا ہے کوئی سونا تو کوئی ڈالر خرید رہا ہے، ہمیں لوگوں کو اس ڈر سے نکالنا ہے۔ انہوں نے دعویٰ کیا کہ پاکستان کی معاشی ترقی دنیا دیکھے گی۔انہوں نے کہا کہ پاکستان کو 31ارب ڈالر کا بندوبست کرنا ہے، توانائی بحران کی وجہ سے ایکسپورٹ متاثر ہوئی ہے، اسٹیٹ بینک نے کل رات امپورٹ سے متعلق نیا سرکلر جاری کر دیا ہے جس میں امپورٹ پر عائد پابندیوں کو ہٹا دیا گیا ہے، شق 87، 85 اور 84 ختم کرکے امپورٹر کو ریلیف دے دیا ہے جبکہ توانائی، فارما اور اسپیئر پارٹیس کی امپورٹ پر عائد پابندیاں بھی ختم کر دی گئی ہیں۔اسحاق ڈار نے کہا کہ کرنسی مارکیٹ میں ڈالر کی اسمگلنگ سب سے بڑا مسئلہ ہے، فارن اکاؤنٹس میں سرمایہ کاری اور فارن ایکسچینج کا باہر جانا تشویشناک عمل ہے، ایس ای سی پی کو اس مسئلے پر ہدایت کی ہے، ڈالر اور کھاد کی اسمگلنگ کے لیے سیکیورٹی ایجنسیوں کے ساتھ پلان بنا لیا ہے۔انہوں نے کہا کہ انٹر بینک میں ڈالر کی قدر اس وقت بلند ہے لیکن روپے کی بے قدری بہت بڑا مسئلہ ہے اور مجھ سے پہلے جو تجربے ہوئے اسکا میں ذمہ دار نہیں، تین ماہ سے پہلے جو معاشی تجربے ہوئے اسکا میں نہیں حکومت ذمہ دار ہے، پیڑولیم مصنوعات کی قیمتوں میں کمی اور مستحکم رکھنا حکومت کی بہتر پالیسی کا نتیجہ ہے،وزیر خزانہ کا کہنا تھا کہ پاکستان کو 35 سو ارب روپے کی چھ سال میں ضرورت ہے، پانچ ماہ میں کرنٹ اکاونٹ خسارے کو کم کیا ہے جبکہ پاکستانی معیشت کو 30 ارب ڈالر کا نقصان ہوا ہے۔

اسلام آباد: تحریک انصاف کے رہنما اسد عمر کا کہنا ہے کہ اللہ نے عمران خان کو زندگی دی ورنہ اس تاریک باب میں اضافے کا پورا منصوبہ تھا۔

پی ٹی آئی کے رہنما اسد عمر  نے شہید بینظیر بھٹو کی برسی کے موقع پر  ٹوئٹر پر بیان جاری کیا۔

اسد عمر نے کہا کہ 27 دسمبر 2007 پاکستان کی تاریخ کا ایک سیاہ دن تھا، بد قسمتی سے باربار مقبول عوامی لیڈرز کو قتل کرکے راستے سے ہٹایا گیا۔

انہوں  نے کہا کہ لیاقت علی خان سے لے کر بےنظیر تک یہ سلسلہ جاری رہاہے، اللہ نے عمران خان کو زندگی دی ورنہ اس تاریک باب میں اضافے کا پورا منصوبہ تھا۔