Category سیاست

اسلا م آباد(ایمر ا نیوز)چیئرمین پی ٹی آئی عمران خان نے اسلام آباد ہائیکورٹ میں پیشی کے موقع پر صحافیوں سے غیر رسمی گفتگو کی۔
اسلام آباد ہائیکورٹ کے چیف جسٹس نے ممنوعہ فنڈنگ کیس میں حفاظتی ضمانت کی درخواست دائر کرنے کے بعد عمران خان کو عدالت طلب کیا۔
عدالت آمد پر صحافی نے عمران خان سے سوال کیا کہ اگر ضمانت نہ ملی تو کیا ہوگا؟ اس پر سابق وزیرعظم نے جواب دیا ’جیل‘، میں نے جیل کی تیاری بھی کررکھی ہے۔
عمران خان نے کہا کہ انٹیلی جنس ایجنسیاں سرویلنس رکھتی ہیں، ٹیلی فون ٹیپ ہوتے ہیں مگر اس کو ریلیز کیا جارہا ہےجو نیشنل سکیورٹی کا مسئلہ ہے، ایجنسیوں کا یہ کام نہیں کہ فون ٹیپ کرکےاسے ریلیز کیا جائے، ایجنسیوں کا کام پروٹیکٹ کرنا ہوتا ہے۔
صدر مملکت سے متعلق عمران خان نے کہا کہ عارف علوی نے اپنے بیان کی وضاحت کردی ہے۔

دادو(ایمرانیوز)نوبل انعام یافتہ ملالہ یوسف زئی سیلاب زدہ علاقوں کا دورہ کرنے دادو پہنچ گئیں جس میں انہیں دادو سمیت اطراف کے علاقوں کا دورہ کروایا جائے گا۔
وزیراعلیٰ سندھ کے ترجمان عبدالرشید چنا نے بتایا کہ ملالہ یوسف زئی اس وقت ضلع دادو کے سیلاب سے متاثرہ علاقے جوہی کے دورے پر ہیں جہاں انہوں نے جوہی کے سیلاب زدہ علاقے چھنڈن میں ٹینٹ سٹی کا معائنہ کیا۔انہوں نے اس موقع پر سیلاب متاثرین سے ملاقات کی اور ان کے ساتھ گھل مل گئیں۔
سیلاب متاثرہ خواتین نے ملالہ کو کیمپ میں خوش آمدید کیا، ملالہ نے کیمپ میں خواتین سے ان کے مسائل سنے اور انہیں حوصلہ دیا، انہوں نے متاثرہ خواتین کو حوصلہ دیتے ہوئے کہا کہ آپ اس مشکل وقت کا بہادری سے مقابلہ کر رہی ہیں، آپ بہادر خواتین ہیں۔
دوسری جانب وزیر تعلیم سید سردار شاہ نے ملالہ یوسف زئی کو بریفنگ دیتے ہوئے کہا کہ اب بھی بہت سارے علاقوں میں پانی موجود ہے، پانی کی نکاسی کے بعد مزید سروے کرکے اسکولوں کے نقصانات کا تعین کیا جائے گا۔
انہوں نے بتایا کہ12000 اسکولوں میں 20 لاکھ بچوں کی تعلیم متاثر ہوئی ہے جس پر ملالہ یوسف زئی نے تشویش کا اظہار کیا۔

لاہور ( ایمرا نیوز ) وزیر داخلہ ہاشم ڈوگر کے بعد پنجاب کے ایک اور وزیر مستعفی ہوگئے، وزیر معدنیات لطیف نذر نے استعفیٰ قیادت کوبھجوا دیا۔
تفصیلات کے مطابق پنجاب کے وزیر معدنیا ت جنہوں نے چند روز قبل مستعفی ہونے کا فیصلہ کیا تھا اب وہ باضابطہ مستعفی ہوگئے، لطیف نذر نے اس بات کی تصدیق کی ہے کہ انہوں نے وزرت سے استعفیٰ دیدیا ہے۔۔
خیال رہے کہ لطیف نذر فیصل آباد کے ضمنی الیکشن کے عمل میں حصہ لینے کے لئے مستعفی ہوئے، لطیف نذر کا استعفیٰ بدھ کو منظور ہونے کا امکان ہے، وہ وزیر کی حیثیت سے ضمنی الیکشن کی سرگرمیوں میں حصہ نہیں لے سکتے۔
استعفے کی وجہ صرف فیصل آباد کے ضمنی الیکشن میں حصہ لینے کے لئے الیکشن کمیشن کی پابندیوں سے بچنا ہے۔

اسلام آباد(ایمرا نیوز)ممنوعہ فنڈنگ کیس میں عدالت کے طلب کرنے پر عمران خان اسلام آباد ہائیکورٹ پہنچ گئےوفاقی تحقیقاتی ادارے (ایف آئی اے) نے چیئرمین پی ٹی آئی عمران خان کے خلاف ممنوعہ فنڈنگ کا مقدمہ درج کیا ہے جس کے بعد سابق وزیراعظم نے گرفتاری سے بچنے کے لیے عدالت سے رجوع کیا۔
عمران خان نے حفاظتی ضمانت کے لیے اسلام آبادہائیکورٹ میں درخواست دائر کی جس میں مؤقف اختیار کیا گیا ہےکہ ایف آئی اے نے فارن ایکسچینج ایکٹ کے تحت مقدمہ درج کررکھا ہے، عدالت حفاظتی ضمانت منظورکرے تاکہ متعلقہ عدالت میں پیش ہوسکیں۔
چیف جسٹس اسلام آباد ہائیکورٹ جسٹس اطہر من اللہ نے عمران خان ی درخواست پر سماعت کی جس دوران پی ٹی آئی چیئرمین کے وکیل نے کہا کہ عمران خان کی گرفتاری کا خدشہ ہے۔
جسٹس اطہر نے سوال کیا کہ آپ کے خیال میں ممنوعہ فنڈنگ کیس کون سی عدالت جانا چاہیے ؟ اس پر وکیل نے کہا کہ کیس اسپیشل جج سینٹرل کی عدالت جانا چاہیے۔
عدالت نے پوچھا کہ عمران خان کہاں ہیں؟ پیش کیوں نہیں ہوئے؟ وکیل نے کہا کہ عدالت حکم کرے تو عمران خان فوری عدالت پیش ہوجائیں گے، بنی گالہ میں پولیس نے ان کے گھر کا محاصرہ کیا ہوا ہے، غیرمعمولی صورتحال کےباعث درخواست گزار پیش نہیں ہوئے۔
جسٹس اطہر نے کہا کہ درخواست گزار تین بجے تک اس عدالت میں پیش ہوجائیں ، اس پر ان کے وکیل نے مؤقف اپنایا کہ تین بجے دیر ہو جائے گی ابھی آدھے گھنٹے میں آجاتے ہیں۔
اسلام آباد ہائیکورٹ نے حکم دیا کہ عدالت میں پیش ہونے تک عمران خان کو گرفتار نہ کیا جائے جب کہ عدالت نے انتظامیہ کو سابق وزیراعظم کو ہراساں کرنے سے بھی روک دیا۔
عمران خان پر الزام کیا ہے؟ایف آئی آر میں ابراج گروپ کے اکاؤنٹ سے 21لاکھ ڈالر کی رقم کی منتقلی کا ذکر ہے اور مقدمے میں سردار اظہر طارق، طارق شفیع اور یونس عامر کیانی بھی نامزد ہیں۔
ایف آئی آر کے متن کے مطابق ابراج گروپ نے تحریک انصاف کے اکاؤنٹ میں پیسے بھیجے، یہ پیسے ایک بینک کی جناح ایونیو برانچ میں بھیجے گئے۔
ایف آئی آر کے متن میں کہا گیا ہے کہ تحریک انصاف نے عارف نقوی کا بیان حلفی الیکشن کمیشن میں جمع کرایا تاہم عارف نقوی کا الیکشن کمیشن میں جمع کرایا گیابیان حلفی جھوٹا اورجعلی ہے۔
ایف آئی آر کے متن کے مطابق تحریک انصاف کا نجی بینک میں اکاؤنٹ تھا جو نیا پاکستان کے نام پر بنایا گیا، نجی بینک کا منیجر بھی مقدمہ میں نامزد کیا گیا ہے، بینک منیجر نےغیر قانونی بینک اکاؤنٹ آپریٹ کرنے کی اجازت دی۔

مقدمہ ایف آئی اے بینکنگ سرکل تھانے میں درج کیا گیا اور مقدمہ ایف آئی اے کے کارپوریٹ بینکنگ سرکل نے درج کیا۔
ایف آئی آر میں کہا گیا ہے کہ ملزمان نے فارن ایکسچینج ایکٹ کی خلاف ورزی کی، ملزمان نجی بینک اکاؤنٹ کے بینفشری ہیں۔
تحریک انصاف کے سیف اللہ نیازی بھی ایف آئی آر میں نامزد ہیں۔

اسلام آباد (ایمرا نیوز)اسلام آباد ہائیکورٹ نے ممنوعہ فنڈنگ کیس میں چیئرمین پاکستان تحریک انصاف اور سابق وزیراعظم عمران خان کی درخواست اعتراضات نظر انداز کرتے ہوئے عدالت پیشی تک گرفتاری سے روک دیا اور آدھے گھنٹے میں عدالت طلب کر لیا۔
اسلام آباد ہائیکورٹ میں فارن ایکسچینج ایکٹ کے تحت درج ایف آئی اے کیس میں عمران خان کی درخواست ضمانت پر سماعت جاری ہے، چیف جسٹس اسلام آباد ہائیکورٹ جسٹس اطہر من اللہ عمران خان کی درخواست پر سماعت کر رہے ہیں۔
وکیل عمران خان نے عدالت کو بتایا کہ عمران خان کے دو شریک ملزمان نے ضمانت کے لئے بینکنگ کورٹ سے رجوع کیا، بینکنگ کورٹ اور سپیشل جج سینٹرل دونوں عدالتوں نے سننے سے معذرت کی، عمران خان کی گرفتاری کا خدشہ ہے۔
جسٹس اطہر من اللہ نے سوال کیا کہ آپ کے خیال میں ممنوعہ فنڈنگ کیس کون سی عدالت میں جانا چاہئے؟ جس پر وکیل نے جواب دیا کہ ممنوعہ فنڈنگ کیس سپیشل جج سینٹرل کی عدالت جانا چاہیے۔
چیف جسٹس اسلام آباد ہائیکورٹ نے استفسار کیا کہ عمران خان کہاں ہیں ؟ پیش کیوں نہیں ہوئے ؟ وکیل نے جواب دیا کہ عدالت حکم کرے تو عمران خان فوری عدالت پیش ہوجائیں گے، بنی گالہ میں پولیس نے عمران خان کے گھر کا محاصرہ کیا ہوا ہے۔
اسلام آباد ہائیکورٹ نے عدالت پیشی تک عمران خان کی گرفتاری سے روک دیا، درخواست گزار تین بجے تک اس عدالت میں پیش ہوجائیں، وکیل نے کہا تین بجے دیر ہو جائے گی ابھی آدھے گھنٹے میں آجاتے ہیں، چیف جسٹس ہائیکورٹ نے کہا ٹھیک ہے آجائیں۔
واضح رہے کہ عمران خان نے فارن ایکسچینج ایکٹ کے تحت درج مقدمے میں حفاظتی ضمانت کے لئے اسلام آباد ہائی کورٹ سے رجوع کیا ہے۔
درخواست میں استدعا کی گئی ہے کہ ایف آئی اے نے فارن ایکسچینج ایکٹ کے تحت مقدمہ درج کر رکھا ہے ۔عدالت حفاظتی ضمانت منظور کرے تاکہ متعلقہ عدالت میں پیش ہو سکیں۔

لاہور (ایمرا نیوز) مشیر اطلاعات پنجاب عمرسرفراز چیمہ نے کہا ہے کہ شہباز، زرداری حکومت بوکھلاہٹ اور خوف میں پے درپے غلطیاں کررہی ہے، عمران خان قوم کا صادق اور امین رہنما ہے۔
مشیر اطلاعات عمر سرفراز چیمہ نے اپنے بیان میں کہا کہ امپورٹڈ حکومت کو عمران خان پر بھونڈے الزامات لگاتے ہوئے شرم آنی چاہیے، ایف آئی اے شہباز زرداری حکومت کی زر خرید غلام بن چکی ہے، ثابت شدہ کرپٹ شہباز شریف کو فرد جرم عائد ہونے سے بچا لیتی ہے، دوسری طرف ایماندار اور ملک کے سب سے بڑے رہنما پر بوگس مقدمات درج کیے جا رہے ہیں۔
عمر سرفراز چیمہ نے کہا کہ پی ٹی آئی نے ممنوعہ فنڈنگ کیس میں تمام ثبوت مہیا کئے اور کسی قطری خط کا سہارا نہیں لیا گیا، امپورٹڈ حکومت جتنے جتن کر لے ناکامی اسکا مقدر بنے گی۔

واشنگٹن(ایمرا نیوز)امریکی وزارت خارجہ کے ترجمان نیڈ پرائس کا کہنا ہے کہ افغان عوام کے مستقبل اور افغانستان میں استحکام پر پاکستان سے بات چیت ہوتی رہتی ہے، خطے میں سکیورٹی کی صورتحال اور چیلنجز پر پاکستان سے مستقل بات ہوتی ہے۔
اپنے ایک بیان میں نیڈ پرائس نے کہا کہ ڈپٹی سیکرٹری آف اسٹیٹ وینڈی شرمین کی پاکستان کے آرمی چیف سے ملاقات ہوئی تھی، پاکستان کے اعلیٰ عہدیداران سے ملاقاتیں ہوتی رہتی ہیں۔
ترجمان امریکی وزارت خارجہ نے کہا کہ امریکا پاکستان کے ساتھ دیرینہ تعاون کی قدرکرتا ہے، پاکستان اور امریکا کے متعدد معاملات میں مفادات یکساں ہیں، پاکستان میں جمہوری طریقے سے منتخب سویلین حکومت ہے، پاکستان کے ساتھ مختلف شعبوں میں تعاون جاری ہے، پاک امریکا تعاون اور مفادات سکیورٹی اورمعیشت پر ہیں۔
نیڈ پرائس کا کہنا تھا کہ سیلاب زدگان کی امداد کیلئے دی گئی رقم کی مانیٹرنگ کا طریقہ کار موجود ہے، امریکا اور یو ایس ایڈ کے نمائندے متاثرہ علاقوں کا دورہ کرتے ہیں اور رپورٹ پیش کرتے ہیں، سندھ اور بلوچستان کے 10 اضلاع کا دورہ کیا گیا ہے، یو ایس ایڈ کی ٹیم نے گزشتہ ماہ یہ دورے کئے تاکہ ضروریات اور امداد کا جائزہ لیا جا سکے، یو ایس ایڈ مقامی پارٹرنرز کے ساتھ بھی کام کرتی ہے۔
ان کا کہنا تھا کہ امریکی انتظامیہ کی کوشش ہے کہ اسرائیل اور دیگر عرب و مسلم ممالک کے درمیان پل کا کردار ادا کرے۔

اسلام آباد(ایمرا نیوز)پی ٹی آئی رہنما فواد چوہدری نے کہا ہےکہ صدر مملکت قومی سلامتی کمیٹی کے اجلاس میں نہیں تھے اس لیے انہیں سائفر کے شواہد کا علم نہیں۔
ایک بیان میں فواد چوہدری نے کہا کہ صدر نے ویسی ہی بات کی جیسی ان کو کرنی چاہیے تھی، صدر مملکت قومی سلامتی کمیٹی کی میٹنگ میں موجود نہیں تھے اس لیے ان کو سائفر سے متعلق شواہد کا علم نہیں، ان کی بھی اور پارٹی کی بھی یہی رائے ہے کہ آرمی کو 100 فیصد نیوٹرل ہونا چاہیے۔
انہوں نے کہا کہ حکومت تیار نہیں تھی، میڈیا کے دباؤ پر الیکشن کمیشن نے ضمنی اور بلدیاتی الیکشن کرانے کا فیصلہ کیا۔
فواد چوہدری کاکہنا تھاکہ تحریک انصاف کو نواز شریف کے پاکستان واپس آنے سے کوئی مسئلہ نہیں، وہ قانونی تقاضے پورے کریں اور واپس آجائیں۔
پی ٹی آئی رہنما نے مارچ کا اسی ہفتے اعلان ہونے کا دعویٰ بھی کیا۔

اسلام آباد(ایمرا نیوز) وزیراعظم شہباز شریف اور چوہدری شجاعت کی ملاقات کی اندرونی کہانی سامنے آگئی۔
ذرائع کے مطابق وزیراعظم نے چوہدری شجاعت سے ان کی صحت کے بارے میں دریافت کیا جس پر چوہدری شجاعت نے وزیراعظم سے مہنگائی کم کرنے کا مطالبہ کیا اور مسکراتے ہوئے جواب دیا کہ آپ مہنگائی کم کردیں، میری صحت مزید بہتر ہوجائے گی۔
لیگی رہنما کے جواب پر وزیراعظم نے کہا کہ ڈار صاحب نے آکر ڈالرکی قیمت کم کردی اب مہنگائی کم کرنے پرتوجہ ہے۔
اس پر چوہدری شجاعت نے کہا کہ وزیراعظم صاحب، آپ کے ساتھ کھڑے ہیں مگر عوام کو ریلیف دیں، تیل کی قیمتوں میں کمی لائیں اور کھانے پینےکی اشیاء کی قیمتیں کم کریں۔
ذرائع نے بتایا کہ اس دوران چوہدری شجاعت نے وزیراعظم کو آرمی چیف کی تقرری پر بھی مشورہ دیا اور کہا کہ یہ حساس اور قومی ذمہ داری والامعاملہ ہے،کسی کی نہ سنیں اور آئین و قانون کے مطابق فیصلہ کریں۔
چوہدری شجاعت کے مشورے پر وزیراعظم شہباز شریف نے کہا کہ بالکل ایسا ہی ہوگا چوہدری صاحب۔
ذرائع کا کہنا ہےکہ چوہدری شجاعت کے صاحبزادے چوہدری سالک وزیراعظم کے ہمراہ اگلے ماہ چین بھی جائیں گے۔

نیویارک(ایمرا نیوز) امریکی صدرجوبائیڈن نے تیل کی پیداوارمیں کمی پر سعودی عرب کو سنگین نتائج کی دھمکی دے دی۔
امریکی چینل کو انٹرویو دیتے ہوئے امریکی صدر جوبائیڈن نے کہا ہے کہ یہ نہیں بتاؤں گا کہ میرے ذہن میں کیا ہے مگر سعودی عرب کو نتائج بھگتنا ہوں گے۔
جوبائیڈن نے کہا ہے کہ تیل کی پیداوار میں کمی امریکی مفادات کے خلاف ہے کہ اب وقت آگیا ہے کہ سعودی عرب کے ساتھ تعلقات پر نظرثانی کی جائے۔
انہوں نے کہا ہے کہ اوپیک پلس نے نومبر سے تیل کی پیداوار میں یومیہ 20 لاکھ بیرل کمی کا اعلان کیا ہے، اوپیک پلس کے فیصلے سے تیل کی قیمتوں میں اضافے کا خدشہ ہے۔
روس یوکرین جنگ کے حوالے سے صدر جوبائیڈن کا کہنا تھا کہ روس اٹیمی ہتھیار استعمال کرنے کی غلطی کبھی نہیں کرے گا، پیوٹن نے یوکرین جنگ شروع کرنے سے پہلے غلط اندازہ لگایا۔