Category سیاست

اسلام آباد(ایمر ا نیوز)وفاقی وزیر خزانہ سینیٹر اسحاق ڈار کی زیر صدارت ایگزیکٹو کمیٹی آف دی نیشنل اکنامک کونسل (ایکنک) کے اجلاس میں اربوں روپے کے منصوبوں کی منظوری دے دی گئی۔
اسحاق ڈار کی زیر صدارت ہونے والے ایکنک اجلاس کا اعلامیہ جاری کیا گیا ہے جس میں بتایا گیا ہے کہ اجلاس میں سیالکوٹ میں 500 کے وی کا سب اسٹیشن بنانےکی منظوری دی گئی۔
وزارت خزانہ کے مطابق سب اسٹیشن کے قیام پر 31 ارب 82 کروڑ روپے کی لاگت آئے گی جس میں سے 17 ارب 20 کروڑ روپے کی فنڈنگ فرانس کا ترقیاتی ادارہ فراہم کرےگا۔
اجلاس میں این ٹی ڈی سی سسٹم میں بہتری کے لیے 500 اور 220 کے وی کے منصوبے کی منظوری بھی دی گئی، این ٹی ڈی سی سسٹم میں بہتری پر15 ارب روپے سے زیادہ لاگت آئے گی، منصوبے کے لیے 8 ارب 92 کروڑ روپے ایشین ڈویلپمنٹ بینک فراہم کرےگا۔
وزارت خزانہ کے حکام کا کہنا ہے کہ منصوبے سے رحیم یار خان، فیصل آباد، ملتان، شیخوپورہ، دادو اور کشمور کے صارفین کو فائدہ ہو گا، بجلی کی طلب پوری ہونے کے ساتھ لائن لاسز میں کمی آئے گی۔
اعلامیے میں بتایا گیا ہے کہ وہاڑی میں 220 کے وی سب اسٹیشن کو 500کے وی پر منتقل کرنےکا فیصلہ کیا گیا ہے، سب اسٹیشن کی اپ گریڈیشن پر17 ارب روپے سے زیادہ لاگت آئے گی۔
وزارت خزانہ کی جانب سے جاری اعلامیے میں بتایا گیا ہے کہ ایکنک اجلاس میں چشمہ رائٹ بینک کینال منصوبے کی تعمیر کی منظوری بھی دی گئی، منصوبے پر189 ارب 60 کروڑ روپےخرچ ہوں گے، وفاقی حکومت 65 فیصد جبکہ خیبرپختونخواحکومت 35 فیصد فنڈ کا انتظام کرے گی۔
ایکنک اجلاس میں 43 ارب 80 کروڑ لاگت کے نولانگ ملٹی پرپز ڈیم کی بھی منظوری دی گئی، ضلع جھل مگسی میں 186 فٹ اونچا اور 2996 فٹ طویل ڈیم تعمیر کیا جائے گا، منصوبے سے سیلاب کی روک تھام، غربت میں کمی اور سماجی ترقی ہو گی۔
اس کے علاوہ اجلاس میں ایچ ای سی نے افغان طلبا کے لیے علامہ اقبال اسکالرشپ منصوبے کی بھی منظوری دی، افغان طلبا کو 4500 اسکالر شپس دی جائیں گی جس پر 12 ارب 70 کروڑ روپے کی لاگت آئے گی۔
اعلامیے میں بتایا گیا ہے کہ قومی شاہراہ این 25کراچی کوئٹہ چمن روڈ کو دو رویہ کرنےکا منصوبہ ہے، این 25 کو دو رویہ کرنے پر 74 ارب 71 کروڑ روپے لاگت آئے گی، منصوبہ کے تحت کراچی تا خضدار سڑک کو دو رویہ بنایا جائے گا۔

لاہور(ایمرا نیوز) وزیر معدنیات پنجاب لطیف نذر گجر نے اپنی وزارت سے مستعفی ہونے کا فیصلہ کر لیا۔
پاکستان تحریک انصاف کے رہنما نے گفتگو کرتے ہوئے تصدیق کی کہ میری کچھ ذاتی وجوہات ہیں جس وجہ سے وزرات سے الگ ہونے کا فیصلہ کیا، میں کچھ اپنے حلقے کو وقت دونگا اور وزیراعلیٰ کی وطن واپسی پر وزارت سے استعفیٰ پیش کروں گا۔
لطیف نذر گجر کا مزید کہنا تھا کہ پارٹی سے کوئی گلہ نہیں، نہ ہی قیادت سے شکوہ ہے، پارٹی کا سٹی صدر ہوں ناراضگی والی کوئی بات نہیں، ایک دو روز میں مستعفی ہوجاؤں گا۔

اسلام آباد(ایمرا نیوز)وفاقی حکومت نے سابق وزیر اعظم اور پاکستان تحریک انصاف (پی ٹی آئی)کے چیئرمین عمران خان کو نظر بند کرنے کا منصوبہ تیار کرلیا۔ رپورٹ کے مطابق پولیس ذرائع نے بتایا کہ وفاقی حکومت کی جانب سے تیار کیے گئے منصوبے کے تحت بہت زیادہ زیر بحث لانگ مارچ کے اعلان کے بعد عمران خان کو ان کی بنی گالہ رہائش گاہ پر نظر بند کرنے کے لیے پولیس کو گرین سگنل دے دیا گیا ہے۔
پی ٹی آئی چیئرمین پارٹی کارکنوں سے کہہ چکے کہ وہ وزیر اعظم شہباز شریف کی زیر قیادت موجودہ مخلوط حکومت کا تختہ الٹنے کے لیے فیصلہ کن لانگ مارچ کے لیے تیار رہیں، حالیہ دنوں میں ملک کے کچھ اضلاع میں پی ٹی آئی حامیوں اور رہنماؤں سے حلف لیا گیا کہ وہ ’حقیقی آزادی مارچ‘ کے لیے ہر قربانی دیں گے۔
ذرائع کے مطابق حکومت نے پی ٹی آئی چیئرمین کو اسلام آباد میں داخل ہونے سے قبل گرفتار کرنے کے لیے ‘پلان بی‘ بھی تیار کیا ہے۔
پلان بی کے مطابق اگر وہ خیبر پختونخوا یا پنجاب سے لانگ مارچ شروع کرتے ہیں اور جنوب سے دارالحکومت میں داخل ہونے کی کوشش کرتے ہیں تو انہیں روات ٹی کراس پر گرفتار کیا جائے گا۔
ذرائع نے بتایا کہ اگر انہوں نے شمال مغرب سے دارالحکومت میں داخل ہونے کی کوشش کی تو پولیس انہیں ترنول میں گرفتار کرنے کے لیے تعینات کی جائے گی۔

اسلام آباد (ایمرا نیوز)چیئرمین تحریک انصاف عمران خان کا کہنا ہے کہ اگر مجھے کچھ ہوا تو قوم 4 لوگوں کو کبھی معاف نہیں کرے گی۔
ایک بیان میں عمران خان نے کہا کہ مجھ کچھ ہوا تو ٹیپ ریلیز ہو گی جس میں چار لوگوں کے نام پوری قوم کے سامنے آئیں گے، ان چار لوگوں کو میری قوم معاف نہیں کرے گی۔
چیئرمین پی ٹی آئی نے کہا کہ چار لوگوں نے مجھے مروانے کا فیصلہ کیا ہے، اگر مجھے کسی نے قتل کیا تو یہ لوگ کہیں گے مذہبی جنونی نے قتل کیا۔
عمران خان نے کہا کہ موجودہ حکمرانوں نے نیب، ایف آئی اے پر اپنے لوگ بٹھا کر کیسز ختم کرائے، یہ صرف اپنے کرپشن کے کیسز ختم کر رہے ہیں، یہ ہرطرف مار کھا رہے ہیں اور جعلی آڈیوز بنائی گئی ہیں۔
انہوں نے مزید کہا کہ آڈیوز لیک کی جا رہی ہیں، ن لیگ نے جعلی ویڈیوزبنائی ہوئی ہیں جس کی ماہر مریم نواز ہیں، میرے خلاف پلاننگ کرنے والے ناکام ہو جائیں گے۔

اسلام آباد(ایمر ا نیوز)وفاقی وزیر داخلہ رانا ثنا اللہ کا کہنا ہے کہ ہمیں عمران خان کے ارادوں کا پتا ہے اور ہم پی ٹی آئی کے لانگ مارچ کو ہر صورت ناکام بنائیں گے۔
اسلام آباد میں پریس کانفرنس کرتے ہوئے وزیر داخلہ کا کہنا تھا اگر پی ٹی آئی جمہوری اور قانونی طریقے سے احتجاج کرنا چاہتی ہے یا دھرنا دینا چاہتی ہے تو ہم انہیں سہولت بھی دیں گے اور اجازت بھی دیں گے لیکن اگر وہ اسلام آباد کی طرف چڑھائی کرنا چاہتے ہیں تو ہم انہیں روکیں گے اور اس انداز میں روکیں گے کہ ان کے وہم و گمان میں بھی نہیں ہو گا۔
وفاقی وزیر کا کہنا تھا عمران خان لانگ مارچ کا اعلان کرے پھر دیکھے ہم کیا کرتے ہیں، ہمیں عمران خان کے ارادوں کا پتا ہے، لانگ مارچ کو ناکام بنانے کے لیے ہر حربہ استعمال کریں گے۔
ان کا کہنا تھا کہ فرح گوگی عمران خان کی فرنٹ مین تھی، کسی کو چور اور کسی کو ڈاکو کہا گیا اور اپنا کردار فرح گوگی ہے، یہ کہتا ہےمیں نیٹ اینڈ کلین ہوں، ویسے عدالتی نیٹ اینڈکلین تویہ ہے، عمران خان کسی بھی طریقے سے اقتدار میں آنا چاہتے ہیں لیکن پاکستان کے مستقبل کے لیے اس فتنے کی سرکوبی ضروری ہے۔
سائفر کے معاملے پر گفتگو کرتے ہوئے وزیر داخلہ کا کہنا تھا کہ عمران خان نے پوری خارجہ پالیسی کا بیڑا غرق کر دیا، کیا اس کے بعد کوئی سفیر آپ کے ملک کو سائفر بھیجے گا، ایک جھوٹا بیانیہ گھڑنے کے لیے قوم کے ساتھ کھیل کھیلا گیا، عمران خان نے اتنا نقصان پہنچایا کہ اس کے اثر کو کئی دہائیوں تک برداشت کرنا پڑے گا۔
ان کا کہنا تھا کہ یہ فتنہ بے نقاب ہو رہا ہے اور قوم کو اس کی شناخت بھی ہو رہی ہے، یہ قوم کا بھی فرض ہے کہ اس بڑے فتنے کا ادراک کرے، اس شخص نے نوجوانوں کو گمراہ کیا اور حلف لیا، عمران خان قوم کو تقسیم کر رہا ہے، آج آڈیو لیک ہونے کے بعد رہی سہی کسر بھی پوری ہو گئی ہے۔
وفاقی وزیر کا کہنا تھا جن دنوں تحریک عدم اعتماد لائی گئی یہ ان دنوں کی بات ہے، یہ فتنہ خان کہہ رہا تھا کہ آپ کو غلط فہمی ہوگئی ہے کہ نمبر گیم پورا ہو گیا ہے، یہ اس کا مکروہ چہرہ ہے کہ 5 ایم این اے تو میں خرید رہا ہوں۔

اسلام آباد(ایمرا نیوز) ایف آئی اے نے پی ٹی آئی کے ایک اور رہنما عامر کیانی کی رہائش گاہ پر چھاپہ مارا۔
ایف آئی اے ذرائع کے مطابق تحریک انصاف کے رہنما اور سابق وزیر عامر کیانی کی راولپنڈی میں واقع رہائش گاہ پر چھاپہ مارا گیا ہے۔
ایف آئی اے کے چھاپے کے نتیجے میں عامر کیانی کی گرفتاری کی تصدیق نہیں کی گئی ہے۔
دوسری جانب ایف آئی اے نے پی ٹی آئی کے دیگر دو رہنماؤں کو گرفتار کیا ہے جن میں سیف اللہ نیازی اور حامد زمان شامل ہیں۔

لاہور (ایمرانیوز)پاکستان مسلم لیگ ن کی نائب صدر مریم نواز لندن پہنچ گئی ہیں، انہوں نے اپنے والد، بھائیوں اور خاندان کے دیگر افراد سے کئی سال بعد ملاقات کی تو آنسو چھلک پڑے۔
مریم نواز ایئرپورٹ پہنچیں تو ان کے بھائی حسین نواز اور ن لیگی کارکنوں کی بڑی تعداد استقبال کیلئے موجود تھی، انہیں ایئرپورٹ سے ایون فیلڈ لایا گیا جہاں انہوں نے استقبال کرنے والے کارکنوں کا شکریہ ادا کیا۔
نائب صدر مسلم لیگ ن کارکنوں کا شکریہ ادا کرنے کے بعد ایون فیلڈ فلیٹس میں اپنے والد کی رہائش گاہ پہنچیں، مریم نواز نے نواز شریف، حسن نواز اور خاندان کے دیگر افراد سے ملاقات کی، والد سے گلے ملیں تو آبدیدہ ہوگئیں۔
واضح رہے کہ مریم نواز کو لاہور ہائیکورٹ کے حکم پر پیر کے روز پاسپورٹ واپس ملا تھا جبکہ وہ منگل کی صبح لاہور سے دوحہ روانہ ہوئیں، جہاں ایک روز قیام کے بعد وہ لندن پہنچی ہیں، امکان ہے کہ مریم نواز تقریباً ایک ماہ تک لندن میں مقیم رہیں گی۔

لاہور(ایمرا نیوز) حکومت پنجاب نے ایک بار پھر وفاق کی درخواست مسترد کرتے ہوئے سی سی پی او لاہور غلام محمود ڈوگر کو ریلیوکرنے سے انکار کر دیا۔
ذرائع کے مطابق وفاق نے سی سی پی او لاہور کو ریلیو کرنےکے لیے حکومت پنجاب کو مراسلہ بھیجا ہے تاہم پنجاب نے ایک بار پھر سی سی پی او لاہور کو ریلیو کرنے سے انکار کر دیا ہے۔
ذرائع کے مطابق وفاق کی جانب سے حکومت پنجاب کو بھیجے گئے مراسلے میں کہا گیا ہے کہ سی سی پی او لاہور غلام محمود ڈوگر کے خلاف بعض شکایات پر انکوائری کرنی ہے لہذا انہیں ریلیو کیا جائے۔
ذرائع حکومت پنجاب کا بتانا ہے کہ صوبائی حکومت نے وفاق کو جوابی مراسلے میں کہا ہے کہ سی سی پی او لاہور کے خلاف شکایات ہمیں بھیج دیں، ہم انکوائری کر لیں گے۔
یاد رہے کہ سی سی پی او لاہور غلام محمود ڈوگر کی چیئرمین پی ٹی آئی عمران خان سے بھی ملاقات ہوئی ہے جس میں عمران خان نے انہیں یقین دلایا ہے کہ جب تک وہ چاہیں گے ان سے کام لیں گے۔

اسلا م آباد(ایمرا نیوز)چیئرمین تحریک انصاف عمران خان کی نئی لیک ہونے والی مبینہ آڈیو پر مسلم لیگ ن کے سیکرٹری جنرل اور وفاقی وزیر احسن اقبال نے ردعمل کا اظہار کیا ہے۔
عمران خان کی ایک اور مبینہ آڈیو لیک ہوئی ہے جس میں انہیں کہتے سنا جا سکتا ہے کہ ایسا مت سوچیں کہ سب ختم ہو گیا ہے، میں اپنی طرف سے کئی چالیں چل رہا ہوں، جو میں پبلک نہیں کر سکتا۔
لیک آڈیو میں عمران خان یہ بھی کہہ رہے ہیں کہ 5 تو میں خرید رہا ہوں، یہ میسج دینا ہےکہ وہ جو پانچ ہیں نا وہ بڑے اہم ہیں۔
چیئرمین پی ٹی آئی کی نئی لیک ہونے والی آڈیو پر وفاقی وزیر برائے منصوبہ بندی احسن اقبال کا ردعمل سامنے آیا ہے۔
احسن اقبال نے سوشل میڈیا پر عمران خان کی میبنہ لیک آڈیو کو ری ٹوئٹ کرتے ہوئے لکھا کہ یہ دغا باز اور فراڈ ہے۔

اسلام آباد (ایمرا نیوز)وزیر خارجہ بلاول بھٹو زرداری نے کہا ہےکہ امریکی وزیرخارجہ سے ملاقات میں ڈونلڈ لو بھی تھے جن سے سائفریا مبینہ دھمکی پر بات نہیں ہوئی۔
بلاول بھٹو زرداری نے کہا کہ بلنکن سے بات چیت کا محور سیلاب سے تباہی تھا، غیر ملکی سازش کی بات کرنے والے امریکیوں سے الیکشن کی بات کریں تو افسوسناک ہے۔
انہوں نے کہا خان صاحب کی کوشش ہے کہ زبردستی کسی امپائرکی انگلی اٹھ جائے، امپائرکی انگلی اٹھنے سے متعلق عمران کی کوشش ناکام رہےگی، خان صاحب تو لیاری الیکشن تک سے بھاگ نکلے،عمران خان نے تونبیل گبول کے بھی مقابلے سے راہ فراراختیارکی۔
وزیر خارجہ کا کہنا تھا کہ پی ٹی آئی کا یوٹرن پر یوٹرن ہوتا ہے، استعفے منظورہونا شروع ہوئے تو عمران خان عدالت جا پہنچے، عدالت کو فیصلہ کرنا ہوگا کہ کب تک عمران کو لاڈلےکی طرح چلائیں گے۔
انہوں نے مزید کہا کہ خان کا مقصد یہ ہےکہ اگروہ وزیراعظم نہیں تو بھلےجمہوریت جائے، پرامید ہوں اپنے اداروں سےکہ کوئی عمران کی باتوں میں نہیں پھنسیں گے، نومبر میں کوئی بڑا طوفان یا ہیجان انگیز مون سون نہیں آئے گا، نومبرنارمل مہینہ بن کر ہمارے کیلینڈر سے گزرجائےگا۔