Category سائنس اور ٹیکنالوجی

(نیٹ نیوز/ایمرا نیوز)
معروف سائنس دان اسٹیفن ہاکنگ کی 22 ذاتی اشیاء آن لائن نیلامی کے لیے پیش کر دی گئی ہیں۔نیلامی سے متعلق مشہور فرم کرسٹی کے تحت اسٹیفن ہاکنگ کی ذاتی اشیاء نیلامی کے لیے پیش کی گئی ہیں، ان میں عظیم برطانوی سائنس دان کی مقالوں کی کاپیاں ، ان کی وھیل چیئر ، میڈلز اور دیگر اشیاء شامل ہیں۔ ذرائع کے مطابق اسٹیفن ہاکنگ کی وھیل چیئر کی نیلامی سے حاصل ہونے والی رقم ضرورت مندوں میں تقسیم کی جائے گی۔واضح رہے کہ آن لائن نیلامی آج سے شروع ہو گی اور 8 نومبر تک جاری رہے گی ۔

(نیٹ نیوز/ایمرا نیوز)
سماجی رابطے کی مقبول ویب سائٹ ٹوئٹر پر غیر اخلاقی اور نفرت انگیز مواد اور تبصروں کو روکنے کے لیے ہر ممکن کوشش جاری ہے، ایسے میں قیاس آرائیاں ہیں کہ ممکنہ طور پر ٹوئٹر پر لائیک کا آپشن ختم کردیا جائے گا۔برطانوی نیوز ویب سائٹ ٹیلی گراف کی رپورٹ کے مطابق ٹوئٹر کی جانب سے لائیک بٹن یعنی ٹوئیٹ کے نیچے موجود دل والے آئیکون کو ختم کرنے کی حکمت عملی پر غور کیا جارہا ہے۔ٹوئٹر پر نفرت انگیز تبصروں کو روکنے کیلئے پالیسی سخت کرنے کا فیصلہ ٹوئٹر کمپنی کی جانب سے یہ فیصلہ اس لیے کیا جارہا ہے تاکہ سوشل نیٹ ورک پر کسی بھی بات پر تجزیے یا مباحثے کا معیار پہلے سے مزید بہتر ہوسکے۔گزشتہ ہفتے ٹوئٹر کمپنی کے بانی جیک ڈورسی نے ایک تقریب کے دوران کہا تھا کہ انہیں ہارٹ شیپ یا دل والا آئیکون پسند نہیں اور جلد اس سے چھٹکارا مل جائے گا۔ دوسری جانب ٹوئٹر کمیونیکیشن ٹیم کی جانب سے بھی اس حوالے سے بیان سامنے آیا ہے کہ وہ سروس کے حوالے سے ہر چیز پر دوبارہ غور کر رہے ہیں جس میں لائک بٹن بھی شامل ہے۔ٹوئٹر کے اس فیصلے کے بعد صارفین کی جانب سے ملے جلے ردعمل کا اظہار کیا جارہا ہے۔صارفین کا کہنا تھا کہ ٹوئٹر کو اس سے بڑے چیلنجز درپیش ہیں لیکن وہ بنیادی چیزوں میں تبدیلی کرنا چاہتا ہے جو کہ غلط ہے۔کمپنی کی جانب سے اس حوالے سے اب تک کوئی واضح اعلان نہیں گیا اور رپورٹس ہیں کہ فی الحال اس پر صرف کام جاری ہے۔

امریکہ(نیٹ نیوز/ایمرا نیوز) امریکی خلائی جہاز پارکر سولر پروب نے سورج کے قریب تر جانے کا نیا ریکارڈ قائم کر دیا۔
ناسا کی جانب سے جاری اعلامیے کے مطابق، 29 اکتوبر کو پارکر سولر پروب سورج کے اتنے قریب پہنچ گیا کہ سورج اور خلائی جہاز کے درمیان فاصلہ 4کروڑ 20 لاکھ کلومیٹر رہ گیا جو ایک ریکارڈ ہے۔ناسا کو توقع ہے کہ پارکر سولر پروب سورج کی جانب سفر کرنے والا سب سے تیز رفتار خلائی جہاز کا ریکارڈ بھی اپنے نام کرلےگا۔اس سے پہلےیہ دونوں ریکارڈ اپریل1976 میں جرمن امریکن ہیلیوس ٹو نامی خلائی جہاز نے قائم کئے تھے۔

فلوریڈا:(نیٹ نیوز/ایمرا نیوز) وسطی افریقہ کی جھیل میں مگرمچھ کی ایک بالکل نئی قسم دریافت ہوئی ہے لیکن افسوسناک خبر یہ ہے کہ ایسے مگرمچھوں کی تعداد بہت کم ہے اور ان کی بقا کو شدید خطرات لاحق ہیں۔

میٹھے پانی میں رہنے والا یہ مگرمچھ درمیانے درجے کا ہے اور اس کی تھوتھنی پتلی اور ہموار ہے ۔ پہلے ماہرین اسے ایک نئی قسم سمجھے تھے مگر اب ان مگرمچھوں کو دو مختلف اقسام میں بیان کیا گیا ہے۔ماہرین نے وسطی افریقہ کے چھ ممالک کے فطری ماحول یا قید میں ایسے مگرمچھوں کے ڈی این اے کا جائزہ لیا ہے۔ اس تحقیق سے معلوم ہوا ہے کہ جسے وہ صرف ایک قسم کا مگرمچھ جان رہے تھے اصل میں ان کی دو اقسام ہیں لیکن ان کی ظاہری کیفیت ہوبہو یکساں ہے۔ ان میں سے ایک نوع مغربی افریقہ میں پائی جاتی ہے جبکہ دوسری قسم وسطی افریقہ میں عام ہے۔اسے فلوریڈا انٹرنیشنل یونیورسٹی کے ماہر میتھیو شرلے نے دریافت کیا ہے۔ ان کے مطابق ان مگرمچھوں کی 90 فیصد تعداد ختم ہوچکی ہے اور اب ماحول میں ان کی 10 فیصد تعداد بچی ہے جس کے تحفظ کے لیے خاطر خواہ اقدامات کرنا ہوں گے۔ اسی بنا پر مغربی افریقہ کی قسم کی بقا کو شدید خطرات لاحق ہیں۔ انٹرنیشنل یونین آف کنزرویشن آف نیچر (آئی یو سی این) نے ہموار تھوتنی والے اس مگرمچھ کو 2014 میں ہی شدید خطرے سے دوچار جانداروں کی فہرست میں شامل کرلیا تھا۔اس مخلوق کا قدرتی مسکن تباہ ہورہا ہے، ان کا شکار کیا جاتا ہے، اور مچھلیوں کے شکار سے ان کی غذا ختم ہورہی ہے اور اکثر یہ جال میں بھی پھنس جاتے ہیں۔ اسی بنا پر مگرمچھوں کی تعداد تیزی سے گھٹ رہی ہے۔

کیلیفورنیا:(نیٹ نیوز/میڈیا 92 نیوز) میساچیوسٹس انسٹی ٹیوٹ آف ٹیکنالوجی کے نمائندہ جریدے ’’ٹیکنالوجی ریویو‘‘ نے 35 سال سے کم عمر 35 باصلاحیت افراد کی فہرست میں دو پاکستانی خواتین کو بھی شامل کرلیا۔

واضح رہے کہ امریکا میں واقع میساچیوسیٹس انسٹی ٹیوٹ آف ٹیکنالوجی (ایم آئی ٹی) کا نمائندہ جریدہ ٹیکنالوجی ریویو 1899 سے شائع ہورہا ہے جس نے پچھلے کئی سال سے ’’فوربس 500‘‘ کی طرز پر سائنسی تحقیق اور ٹیکنالوجی میں جدید اختراعات و ایجادات کے حوالے سے بہترین منصوبوں، اداروں اور شخصیات کو نمایاں کرنے کےلیے مختلف سالانہ فہرستیں شائع کرنا شروع کی ہیں۔ ان ہی میں سے ایک سالانہ فہرست 35 سال سے کم عمر کے ایسے 35 افراد پر مشتمل ہوتی ہے جنہوں نے کوئی غیرمعمولی کارنامہ سرانجام دیا ہو۔ اسی مناسبت سے یہ فہرست ’’35 انڈر 35‘‘ بھی کہلاتی ہے۔ اس سال ٹیکنالوجی ریویو کی ’’35 انڈر 35‘‘ فہرست میں دو پاکستانی خواتین بھی شامل ہیں جو پاکستان کےلیے کسی اہم اعزاز سے کم بات نہیں۔

حرا حسین:
ان میں سے پہلی خاتون 28 سالہ حرا حسین ہیں جنہیں ٹیکنالوجی اور سماجی اختراع کے زمرے میں شامل کیا گیا ہے۔ حرا حسین نے کثیر لسانی کراؤڈ سورس پلیٹ فارم بنایا ہے جس کے تحت گھریلو تشدد اور جبر کی شکار خواتین کسی وکیل کے بغیر بھی اپنا مقدمہ درج کروا سکتی ہیں۔ ساتھ ہی نفسیاتی تشدد کو بھی آشکار کیا جاسکتا ہے۔
یہ کام انہوں نے برطانیہ میں رہتے ہوئے کیا ہے جہاں پاکستان اور دیگر ممالک سے آنے والی خواتین پر شادی کے بعد جبر کیا جاتا ہے۔ یہ خواتین طلاق، خلع، بچوں کی کفالت اور سیاسی پناہ جیسے پیچیدہ قوانین سے ناواقف ہوتی ہیں اور بسا اوقات معلومات ہونے کے باوجود بھی اس عمل سے دور اور خوف زدہ رہتی ہیں۔ 2013 میں حرا نے چین نامی اوپن سورس تنظیم بنائی اور آج اس سے وابستہ 400 رضا کاروں میں 70 فیصد ایسی خواتین شامل ہیں جو خود تشدد اور گھریلو زیادتیوں سے گزر چکی ہیں۔ اس ضمن میں کراؤڈ سورس پلیٹ فارم کے ذریعے نفسیاتی، سماجی اور قانونی پیچیدگیوں پر گہری تحقیق کی گئی ہے۔ مثلاً اگر کوئی بھارتی خاتون گھریلو جبر کا نشانہ بنتی ہے اور اس مصیبت سے چھٹکارا چاہتی ہے تو اس کی مدد کےلیے بھارتی قوانین کی روشنی میں رہنمائی موجود ہوتی ہے۔ اسی طرح پاکستان ، بنگلہ دیش اور دیگر کئی ممالک کی خواتین اپنے اپنے ممالک کے قانون کو دیکھتے ہوئے اپنے حق سے آگاہ رہتی ہیں اور اس صورتحال سے باہر آسکتی ہیں۔ حال ہی میں حرا حسین نے اپنے پلیٹ فارم پر ایک چیٹ بوٹ بھی متعارف کروایا ہے جو کسی بھی خاتون کی آن لائن مدد کرتا ہے اور اس کا مسئلہ دیکھ کر درست مشورہ دیتا ہے۔ دوسری جانب ویب سائٹ پر چند کلکس سے آسان معلومات تک رسائی حاصل کی جاسکتی ہے۔

شہربانو:
31 سالہ شہربانو نے ریاست کی جانب سے سنسرشپ کے خلاف عملی قدم اٹھایا ہے اور اس عمل کو منظم انداز میں سمجھنے کی کوشش کی ہے۔
پاکستان میں پیدا ہونے والی شہربانو اس وقت یونیورسٹی کالج لندن میں زیرِ تعلیم ہیں۔ جب 2012 میں پاکستان میں یوٹیوب پر پابندی لگائی گئی تو شہربانو نے اپنے اس کام کا آغاز کیا۔ اگرچہ لوگ اس پر چپ رہے لیکن شہربانو نے اس پر تحقیق کرتے ہوئے ریاستی سنسرشپ کو شکست دینے کی ٹھانی۔
انہوں نے تین سال تک پاکستان میں انٹرنیٹ سروس فراہم کرنے والی کمپنیوں (آئی ایس پیز) کا ڈیٹا جمع کیا۔ اسے چینی گریٹ فائر وال پر بھی آزمایا گیا جسے چین میں انٹرنیٹ سنسرشپ کےلیے استعمال کیا جاتا ہے۔ اس دوران انہوں نے غور کیا کہ بعض بنیادی تکنیکی پابندیوں کی وجہ سے انٹرنیٹ سنسرشپ کی جاتی ہے۔ خاص ویب سائٹ کو روکنے والے سنسرشپ ماڈیول ویب سائٹ سرور اور صارف کے براؤزر کے درمیان کام کرتے ہیں۔
ان باتوں کو سمجھنے کے بعد شہربانو نے انکرپشن چھیڑے بغیر پابندیوں کو عبور کرنے کا طریقہ وضع کیا۔ مثلاً اس میں غلط اسپیلنگ یا کسی اور وجہ سے ریکویسٹ بھیجی گئی لیکن اسی کے ساتھ اصل ویب سائٹ کی ریکویسٹ بھی شامل ہوگئی۔
شہربانو نے یہ بھی بتایا کہ بے نام صارفین (anonymous users) اور ٹی او آر (The Onion Router) جیسے سیکیورٹی سافٹ ویئر اور ایڈ بلاکرز کس طرح کام کرتے ہیں اور کس طرح انٹرنیٹ کے استعمال کو بد سے بدتر بنادیتے ہیں۔
اسی کام کو آگے بڑھاتے ہوئے شہربانو نے کئی کمپیوٹر ماہرین کے ساتھ کام کرکے آن لائن رابطوں کی آزادی کو یقینی بنانے پر کام شروع کردیا۔ اپنی جامعہ میں پوسٹ ڈاکٹرل تحقیق میں اب وہ شفاف بلاک چین جیسے نظام پر کام کررہی ہیں۔ اس ضمن میں انہوں نے چین اسپیس جیسے اسمارٹ کنٹریکٹ پلیٹ فارم بنائے ہیں۔ اس کی مدد سے آن لائن سیکیورٹی بڑھائی جاسکتی ہے لیکن بہت شفاف انداز میں۔

کیلیفورنیا:(نیٹ نیوز/ایمرا نیوز) ہر سوشل میڈیا ایپ میں اسٹیکرز اور اینی میٹڈ تصاویر (گفس) اسے عوام میں مقبول بناتی ہیں کیونکہ لوگ انہیں اپنے احساسات کی ترجمانی کے لیے استعمال کرتے ہیں۔ اسی بنا پر اب واٹس ایپ کے بی ٹا ورژن میں ڈھیروں نئے اسٹیکرز کا اضافہ کیا گیا ہے۔

نیا اسٹیکر پیک واٹس ایپ بی ٹا ورژن 2.18.329 میں شامل کیا گیا ہے جوں ہی آپ ایموجیز یا گفس میں جاتے ہیں ان کے تیسرے ٹیب میں نئے اسٹیکر نظر آجائیں گے تاہم ابھی انہیں ایکٹو نہیں کیا گیا اس کے لیے سرور کی جانب سے سوئچنگ کی ضرورت ہوگی جو چند روز میں دستیاب ہوجائے گی۔ان اسٹیکرز کے نئے پیک میں آپ کو جو بھی پسند آئے اسے بار بار استعمال کرنے کے لیے تھرتھراتے اسٹیکر پر ٹیپ کرکے اسے فیورٹس کی فہرست میں شامل کرسکتے ہیں تاہم بی ٹا کی وجہ اسٹیکرز ایکٹو ہونے میں کچھ وقت لگ سکتا ہے۔ فی الحال 12 اسٹیکرز پیک شامل کیے گئے ہیں جن می

نیویارک(نیٹ نیوز/ایمرا نیوز) گوگل گزشتہ دو سال میں 13 سینئر منیجرز سمیت 48 ملازمین کو جنسی ہراسانی کے الزام میں نوکری سے نکال چکا ہے۔ادارے کے سی ای او سندر پِچائی نے ملازمین کے نام خط میں کہا ہے کہ ان کا ادارہ کسی غیر مناسب روئیے کو انتہائی سختی سے لیتا ہے۔

سندر پِچائی نے یہ خط امریکی اخبار نیویارک ٹائمز کی اس خبر کے بعد لکھا ،جس میں دعویٰ کیا گیا تھا کہ اختیارات کے غلط استعمال کے الزامات کے باوجود گوگل نے اینڈرائڈ کے بانی اینڈی رُوبن کو نوکری چھوڑنے پر 9 کروڑ امریکی ڈالر ادا کئے، جس کی رُوبن کے ترجمان نے تردید کرتے ہوئے کہا کہ وہ 2014 میں کمپنی چھوڑ چکے تھے۔گوگل کے سی ای او لکھتے ہیں کہ نیویارک ٹائمز کی خبر پڑھنا انتہائی مشکل تھا اور گوگل ملازمین کو کام کے لیے محفوظ جگہ دینے کے لئے انتہائی سنجیدہ ہے۔

جاپان(نیٹ نیوز/ایمرا نیوز) جاپانی کمپنی ٹچ فوکس نے ایسی جدید اور اسمارٹ عینک بنائی ہے جو صرف ایک ٹچ پر کبھی قریب تو کبھی دور کے چشمے میں بدل جاتی ہے۔ اس چشمے کی بدولت آپ کو قریب اور دور کی الگ الگ عینک کی کوئی ضرورت نہیں رہے گی اور ایک ہی عینک آپ کےلیے کافی رہے گی۔

اس سے قبل ایک اور کمپنی پکسل آپٹکس نے بھی دعویٰ کیا تھا کہ وہ ایسے الیکٹرونک چشموں پر کام کررہی ہے جو نہ صرف دور اور قریب کی نظروں کےلیے کافی ہے بلکہ کئی نمبروں کے لحاظ سے ایک بٹن دبانے پر فوکس ہوسکتے ہیں۔ اس کمپنی کے ذکر کے باوجود اب تک ان کی کوئی مصنوعات منظرِ عام پر نہ آسکیں۔

تاہم جاپان کی اس کمپنی نے پکسل آپٹکس کے کام کو وہیں سے شروع کیا جہاں سے وہ تھم گیا تھا۔ ٹچ فوکس کمپنی کی عینک میں کنپٹی کے پاس ایک بٹن نصب ہے جو لیکوئڈ کرسٹل سسٹم استعمال کرتا ہے۔ اس عینک کو 20 مختلف فریموں میں پیش کیا جارہا ہے۔
عینک کے عدسے مائع قلموں (لیکویڈ کرسٹلز) پر مشتمل ہیں جو دور کی نظر اور مطالعے کے چشمے میں ڈھل جاتے ہیں۔ عینک یوایس بی سے چارج ہوتی ہے اور صرف استعمال کے وقت بجلی خرچ کرتی ہے۔ تاہم اس کی قیمت بہت زیادہ رکھی گئی ہے جو 2200 ڈالر کے لگ بھگ ہے۔

ویانا، آسٹریا:(نیٹ نیوز/ایمرا نیوز) ان دنوں دنیا بھر میں پلاسٹک کی آلودگی کا بہت چرچا ہے کیونکہ پلاسٹک ہزاروں برس میں بھی ختم نہیں ہوتا۔ یہ ٹوٹتا پھوٹتا اور پس کر باریک ہوتا رہتا ہے لیکن گھل کر ختم نہیں ہوتا۔ اب ایک سروے سے انکشاف ہوا ہے کہ پلاسٹک کے باریک خردبینی ذرات انسانی جسم میں بھی پہنچ رہے ہیں۔ایک عرصے سے ماہرین کا گمان تھا کہ سمندری حیات پلاسٹک سے شدید آلودہ ہورہی ہے بلکہ وہ موت کی شکار ہورہی ہے۔ ماہرین کے مطابق سمندری غذا کھانے والے کے جسموں میں پلاسٹک کے ذرات موجود ہوسکتے ہیں۔ دوسری جانب حالیہ تحقیق سے معلوم ہوا ہے کہ 93 فیصد بوتلوں کے پانی میں پلاسٹک کے خردبینی ذرات پائے جاتے ہیں۔اب دنیا بھر میں انسانی فضلے کے سروے کے بعد انکشاف ہوا ہے کہ انسان بھی پلاسٹک کی آلودگی سے متاثر ہورہے ہیں۔ اس ضمن میں میڈیکل یونیورسٹی آف ویانا نے آسٹریا کے محکمہ ماحولیات کے تعاون سے ایک سروے کیا ہے جس میں فِن لینڈ، اٹلی، جاپان، پولینڈ، ہالینڈ، برطانیہ ، روس اور آسٹریا کے لوگوں کا مطالعہ کیا گیا تھا۔

اس ضمن میں لوگوں کے ایک گروہ کو ایک ہفتے تک سمندری مچھلی کھلائی گئی، پلاسٹک میں لپیٹے گئے کھانے کھلائے گئے اور پلاسٹک کی بوتل سے پانی پیا۔ اس کے بعد ان کے فضلے کے نمونے دیکھے گئے۔ سب کے فضلوں میں نو مختلف طرح کے پلاسٹک کے آثار پائے گئے جن میں پولی پروپائلین (پی پی) اور پولی ایتھائلین ٹیریفتھلیٹ (پی ای ٹی) پلاسٹک سب سے عام اور مقدار میں زیادہ تھے۔ماہرین نے بتایا کہ فضلے کے ہر نمونے میں پلاسٹک کے ذرات دیکھے گئے جن کی جسامت 50 سے 500 مائیکرومیٹر تک تھی اور فی دس گرام فضلے میں 20 ذرات دیکھے گئے۔ اس سے ظاہر ہوتا ہے کہ ہماری اطراف کا پلاسٹک پیٹ میں جارہا ہے۔ بعض ماہرین نے خبردار کیا ہے کہ پلاسٹک کے انتہائی باریک ذرات انسانی خون میں بھی شامل ہوسکتے ہیں لیکن اس ضمن میں باقاعدہ تحقیق لازمی ہے۔ماہرین نے اس کے نتائج سے خبردار کرتے ہوئے کہا ہے کہ پلاسٹک کے ذرات معدے اور آنتوں کے امراض کی وجہ بن سکتے ہیں اور جگر، لمفی نالیوں اور خون تک میں پہنچ سکتے ہیں۔

کیلیفورنیا:(نیٹ نیوز/ایمرا نیوز) حالیہ چند برس میں زمین کے پڑوسی سیارے مریخ پر کسی نہ کسی صورت میں موجود حیات کی نئی بحث چل پڑی ہے لیکن اب ماہرین کہہ رہے ہیں کہ سرخ سیارے پر زندگی جاننے کے لیے اس کی مٹی کے اندر جھانکنا ہوگا کیونکہ وہاں آکسیجن کی مناسب مقدار دریافت ہوئی ہے۔

نیچر جیو سائنس میں شائع ایک رپورٹ کے مطابق مریخ کی مٹی میں آکسیجن موجود ہے۔ یہ بات حالیہ دو اہم دریافتوں سے بھی ثابت ہوتی ہے۔ اول مریخ پربھیجے گئے خلائی روبوٹ ’کیوروسٹٰی‘ نے چند پتھر دیکھے ہیں جو بھرپور آکسیڈائزڈ ہیں یعنی آکسیجن سے بھرپور ہیں۔ شاید یہ عمل بار بار پانی کے اندرونی رساؤ کی وجہ سے عمل پذیر ہوا ہوگا۔دوم مریخ پر نمکین پانی کے ذخائر بھی ملے ہیں جہاں آکسیجن بھرپور مقدار میں ہوسکتی ہے۔ سائنس داں اسی بنیاد پر کہہ رہے ہیں کہ مریخ کی مٹی تلے موجود آکسیجن کی مقدار سادہ حیات کے لیے بہت کافی ہوسکتی ہے۔پیساڈینا ، کیلی فورنیا میں واقع مشہور جیٹ پروپلشن لیبارٹری (جے پی ایل) سے وابستہ سائنسداں ولاڈا اسٹاکن کووچ کہتے ہیں ’ ہم نے مریخ کے مختلف مقامات پر حیرت انگیز دریافتیں کی ہیں جو نمکین پانی کے ذخائر کی صورت میں موجود ہیں۔ ان میں خرد نامئے (مثلاً بیکٹیریا) یہاں تک کہ اسفنج تک کی نشوونما کے لیے آکسیجن کی بھرپور مقدار پائی جاتی ہے جو سادہ جان داروں کوآسانی سے زندہ رکھ سکتی ہے۔‘لیکن ماہرین نے کہا ہے کہ اس کا یہ ہرگز مطلب نہیں کہ انہوں نے مریخ پر زندگی دریافت کرلی ہے بلکہ صرف اس کے امکان کو ظاہر کیا ہے اور اگر حیات کسی صورت میں موجود بھی ہے تب بھی اس کی آزمائش کی کوئی ٹیکنالوجی ہمارے پاس نہیں ہے تاہم اس ضمن میں 2020ء میں ناسا ایک اور جدید ترین روبوٹ مریخ پر بھیجے گا۔ماہرین کے مطابق مریخ کے قطب جنوبی میں نمکین پانی کی جھیلیں ہوسکتی ہیں یہی وجہ ہے کہ مریخ پر زندگی کے لیے پانی اور آکسیجن پر بھرپور غور کیا جارہا ہے۔