Category شوبز

لاہور: پاکستان شوبز انڈسٹری کے معروف اداکار عمران عباس پنجابی فلم جی وے سوہنیا جی میں ڈیبیو کرنے کو تیار ہیں، انہوں نے فلم کا ٹیزر مداحوں کے ساتھ شیئر کر دیا۔فوٹو اینڈ ویڈیو شیئرنگ پلیٹ فارم انسٹاگرام پر عمران عباس نے اپنی پہلی بھارتی پنجابی فلم کی جھلک شیئر کرتے ہوئے لکھا کہ میں اپنے پہلے یو ایس-انڈو پروڈکشن کی جانب سے پیش کردہ منصوبے کا اعلان کرتے ہوئے بہت پْرجوش ہوں۔انہوں نے کیپشن میں مزید لکھا کہ میری فلم ’جی وی سوہنیا جی رواں سال 6 اکتوبر کو سنیما گھروں کی زینت بنے گی

لندن :معروف پاکستانی اداکارہ سجل علی نے کرینہ کپور خان کی فلم کبھی خوشی کبھی غم سے مشہور کردار پوجا کو نئے انداز میں پیش کیا۔برطانوی نشریاتی ادارے کے صحافی ہارون رشید نے فوٹو اینڈ ویڈیو شیئرنگ ایپ انسٹاگرام پر سجل علی کے ساتھ اپنی ویڈیو شیئر کی ہے۔اس ویڈیو میں دونوں نے فلم کبھی خوشی کبھی غم کے ایک سین کو اپنے انداز میں دوبارہ پیش کیا، جس میں ایک لڑکا پوجا سے اپنے ساتھ فلم دیکھنے کے لیے چلنے کو کہتا ہے اور پوجا اس پیشکش کو انتہائی نرالے انداز میں ٹھکرا دیتی ہے۔سجل علی اور ہارون رشید دونوں نے ہی فلم کے اس منظر کو بہت زبردست انداز سے پیش کیا ہے اور سوشل میڈیا صارفین کی جانب سے اس ویڈیو کو بہت پسند بھی کیا جارہا ہے۔اس ویڈیو میں ہارون رشید کو ہلکے نیلے رنگ کی شرٹ کیساتھ سفید رنگ کی ٹی شرٹ اور سیاہ رنگ کی جینز پہنے جبکہ سجل علی سفید رنگ کے کْرتے اور پاجامے کے ساتھ لال رنگ کی چوڑیاں پہنے بہت ہی خوبصورت لگ رہی ہیں۔

نیو یارک : ہالی ووڈ کے مشہور اداکار بروس ویلیس لاعلاج دماغی بیماری میں مبتلا ہوگئے۔غیرملکی میڈیا کے مطابق 67 سالہ بروس ویلیس کے اہلخانہ نے بتایا کہ گزشتہ سال اداکار کو دماغی بیماری’آفیشیا‘ کے باعث بولنے میں مشکلات ہوتی تھیں جس کے بعد ان کی حالت میں بہتری آئی۔رپورٹس کے مطابق اہلخانہ نے کہا کہ اب بروس ویلیس کے دماغ میں مزید بیماری کی تشخیص ہوئی ہے۔ ڈیمینشیا نامی بیماری انسان کے دماغ کے ان حصوں کو متاثر کرتی ہے جس سے اس کی شخصیت، زبان اور برتاو کا تعلق ہوتا ہے۔اداکار کے خاندان کی جانب سے جاری ہونے والے بیان میں کہا گیا ہے کہ بیماری تکلیف دہ ہے تاہم اس کی صحیح تشخیص سے اطمینان ہوا۔

کراچی:کراچی میں آج جمعہ سے تیسرے دو روزہ دِیوے فلم فیسٹول 2023 کا آغاز ہوگا، فیسٹول میں مختلف موضوعات پر پاکستانی فلمسازوں کی جانب سے بنائی گئی فلمیں نمائش کیلئے پیش کی جائیں گی۔فاؤنڈیشن آف آرٹ دِیوے اور کراچی لٹریچر فیسٹیول کے اشتراک سے کراچی کے نجی ہوٹل میں آج سے منعقد ہونے والے دو روز ہ دِیوے فلم فیسٹیول کے دوران محبت اور جدائی، نقصان کے صدموں، بڑھاپے اور تلاش ذات جیسے انسانی جذبات پر مشتمل کہانیوں سمیت موسمیاتی تبدیلیوں اور غیر متوقع مواقع پر ملنے والی چھوٹی موٹی خوشیوں جیسے موضوعات کا احاطہ کرتی فلمیں نمائش کیلئے پیش کی جائیں گی۔دو روزہ فلم فیسٹیول کے دوران مختلف فلموں کی نمائش کے ساتھ فلم ڈائریکٹرز کے ساتھ گفتگو کے سیشنز بھی منعقد کیے جائیں گے۔فیسٹیول کے پہلے روز 17 فروری کو فلمساز مہرین جبار کی بیڑا غر ق آمنہ مقبول حسین اور بینش سرفراز کی صنفِ تال سمیت دیگر فلمیں نمائش کیلئے پیش کی جائیں گی۔فاؤنڈیشن آف آرٹ دِیوے کے مطابق دیوے فلم فیسٹیول کا مقصد انڈیپینڈنٹ پاکستانی فلمسازوں کی جانب سے بنائی ہوئی، شارٹ فلم، ڈاکیومینٹریز اور فیچر فلموں سمیت اینیمیٹڈ فلموں کا احاطہ کرتے ہوئے فلمسازوں کی حوصلہ افزائی کرنا ہے۔

لا ہور:پاکستان شوبز انڈسٹری کی معروف اداکارہ ایمن خان نے کہا ہے کہ سکرین پر واپس آوں گی لیکن ابھی نہیں ۔ اپنے ایک انٹرویو میں انہوں نے کہا کہ وہ اسکرین پر واپس آئیں گی لیکن ابھی نہیں۔اداکارہ نے مزید کہا کہ دراصل میں نے کافی چھوٹی عمر میں کام شروع کر دیا تھا اور بہت کام کیا ہے، پھر میری شادی ہو گئی تو میں نے کچھ وقت کے لئے بریک لیا پھر جلد ہی بیٹی ہوگئی، جس کے بعد میں نے مزید بریک لیا اور ابھی وہ بہت چھوٹی ہے اس لئے میں ابھی مزید کچھ اور وقت بریک لوں گی لیکن میں اپنی بریک سے بھی لطف اندوز ہو رہی ہوں۔ اداکارہ نے کہا کہ میرا بڑے پردے پر کام کرنا سب کے لئے ایک سرپرائز ہو سکتا ہے، حتیٰ کہ منیب کے لئے بھی سرپرائز ہوگا

لندن :پاکستان کی معروف اداکارہ سجل علی نے کہا ہے کہ جمائما خان کی فلم میں کام کرنے کا تجربہ شاندار رہا۔لندن میں جمائما خان کی فلم کے پریمیئر میں سجل علی نے میڈیا سے گفتگو کرتے ہوئے کہا کہ عالمی سطح کی فلم میں پاکستان کی نمائندگی پر فخر ہے۔سجل علی نے کہا کہ شیکھر کپور کے ساتھ کام اور شبانہ اعظمی کے ساتھ اسکرین شیئر کر کے ایک خواب پورا ہوا۔اداکارہ نے کہا کہ وابستہ توقعات سے پریشان تھی لیکن فلم میں شاندار پرفارمنس پر خوش ہوں۔انہوں نے کہا کہ اس فلم میں مغرب کو رنگا رنگ پاکستان دکھے گا

انقرہ : عالمی شہرت یافتہ تاریخی تْرک سیریز ’ ارطغرل غازی‘ میں مرکزی کردار ادا کرنے والے تْرک اداکار انگین آلتان دوزیتان نے ترکیہ اور شام میں آنے والے تباہ کن زلزلے سے متاثرہ ترک بچوں کی تعلیم جاری رکھنے کے لیے مدد کی اپیل کی ہے۔انگین آلتان دوزیتان نے فوٹو اینڈ ویڈیو شیئرنگ ایپ انسٹاگرام پر ایک ویڈیو پیغام جاری کیا ہے۔اْنہوں نے اپنا یہ ویڈیو پیغام شیئر کرتے ہوئے لکھا کہ موجودہ صورتحال میں سب زخموں کو کیسے بھراجائے، ایک چیز ہمارے بچوں کے زخموں کو بھر سکتی ہے ۔ اْنہوں نے لکھا کہ ’زلزلے کی تباہی سے متاثرہ ہمارے بچوں کو 100 فیصد اسکالرشپ پر تعلیم دی جارہی ہے ۔

لندن میں مقیم مقامی گلوکار اور موسیقار چاہت فتح علی خان کا کہنا ہے کہ پی ایس ایل 8 کیلئے ان کا بنایا گیا ترانہ پی سی بی کے آفیشل ترانے سے زیادہ اچھا ہے۔

لندن میں جیونیوز سے گفتگو کے دوران  صحافی نے چاہت فتح علی خان   سے  پی ایس 7 ، پی ایس ایل 8 اور ان کے بنائے گئے ترانے کے موازنے سے متعلق  سوال کیا جس کے جواب میں چاہت فتح علی خان  نے کہا کہ  ’ یہ سب اللہ کا کرم ہے کیوں کہ اگر آپ سوشل میڈیا دیکھیں  تو میرے بنائے گئے گانے کو زیادہ دیکھا جارہا ہے، پی ایس ایل آفیشل کا نیا ترانہ اچھا  ہے لیکن اسٹائل وہی پرانا ہے،  ہماری گلوکاری کی فیلڈ ایسی ہے جس میں ہمارے  مداح  ناظرین اور سامعین نئی نئی ایجادات کو دیکھنا چاہتے ہیں۔‘

چاہت فتح علی خان نے دعویٰ کیا کہ  ’میرا خیال ہے کہ میرا گانا زیادہ اچھا ہے کیوں کہ  وہ منفرد ہے، میں نے ایک نئے اسٹائل سے گایا ہے،  پی ایس ایل کیلئے لکھے گئے گانے کی میری لیرکس بہت آسان ہیں، اس گانے کو ریلیز کرنے کے بعد چھوٹے چھوٹے بچوں کے والدین کی میرے  پاس کالز اور  میسیجز  آرہے ہیں کہ ہمارے بچے آپ سے بات کرنا چاہتے ہیں ‘۔

چاہت فتح علی خان  نے مزید کہاکہ ’میرے لیرکس اور منفرد انداز سے گائے گانے نے  پچھلے  پی ایس ایل کے آفیشل ترانے کو بھی پیچھے چھوڑدیا ہے، اب کے پی ایس ایل ترانے کو تو زیادہ لوگ  دیکھ ہی نہیں رہے‘۔

ویلنٹائن کے موقع پر عفت عمر کی جانب سے شاہ رخ خان کا ایک ویڈیو پیغام شیئر کیا گیا تھا جس میں شاہ رخ خان نے عفت عمر کو خوش رہنے کی تلقین کی اور ان کی کامیابیوں کیلئے دعا مانگی تھی۔

عفت عمر کے شیئر کرنے کے بعد یہ ویڈیو سوشل میڈیا پر تیزی سے مقبول ہوگئی، اس حوالے  سے جیو ویب سے گفتگو کرتے ہوئے عفت عمر نے بتایا کہ ’شاہ رخ خان نے مجھے دو سال قبل یہ ویڈیو پیغام بھیجا تھا، ہوا کچھ یوں کہ شاہ رخ اور میرے ایک مشترکہ دوست ہیں جن  سے میں نے فرمائش کی تھی کہ ان کی جب بھی سپر اسٹار شاہ رخ خان سے ملاقات ہو، ان سے میرے لیے ایک ویڈیو بنوائیں لہٰذا دو سال قبل ان دوست کے ذریعے مجھے شاہ رخ کا یہ پیغام موصول ہوا جسے میں نے ویلنٹائن ڈے پر شیئر کردیا‘۔

دوران گفتگو  عفت عمر   نے یہ بھی بتایا کہ ’انہیں شاہ رخ  اپنے پہلے ٹی وی سیریل’ فوجی ‘ کے وقت سے پسند ہیں، شاہ رخ تب سے  میرا کرش اور میری جان ہیں اور شاہ رخ کا بھیجا گیا یہ خوبصورت تحفہ میرے لیے بے حد اہمیت کا حامل ہے جسے میں کبھی نہیں بھول سکتی‘۔

پاکستانی اداکار اور ٹی وی شو کے میزبان دانش تیمور نے انکشاف کیا ہے کہ انہیں کرینہ کپور کے ساتھ ایک بالی وڈ فلم کی پیشکش ہوئی تھی لیکن کچھ مسائل کے باعث وہ فلم نہ کرسکے۔

حال ہی میں نجی ٹی وی کے ایک شو میں گفتگو کرتے ہوئے دانش تیمور نے تصدیق کی کہ انہیں بالی وڈ فلم ‘ویرے دی ویڈنگ’ میں کرینہ کے ہمراہ کام کی پیشکش ہوئی تھی جسے انہوں نے قبول کرلیا تھا۔

اداکار نے کہا ‘میرے ساتھ جاوید شیخ کو بھی فلم میں کردار کی پیشکش ہوئی تھی، میں اور عائزہ مجھے کردار ملنے پر بے حد خوش تھے، ہم نے یہ بات سب سے پوشیدہ رکھی اور سوچا جب فلم آئے گی تب سب دیکھ ہی لیں گے’۔

دانش نے بتایا کہ ‘شوٹنگ کے آغاز میں 14 سے 15 دن رہ گئے تھے ، ہماری شوٹنگ تھائی لینڈ میں ہونا تھی لیکن پھر خبر آئی کہ کرینہ کپور حاملہ ہیں اور فلم کی شوٹنگ ملتوی کردی گئی ہے’۔

اداکار کے مطابق ‘شوٹنگ کو تقریباً ایک سال کے لیے ملتوی کیا تھا اور وہ مدت پوری ہونے سے قبل بھارت اور پاکستان کے تعلقات خراب ہوگئے اور بھارتی حکومت نے کہا کہ اب کوئی پاکستانی اداکار بالی وڈ میں کام نہیں کرے گا‘۔

واضح رہے کہ فلم ویرے دی ویڈنگ میں کرینہ کے علاوہ اداکارہ سونم کپور اور سوارا بھاسکر بھی تھیں، فلم کو 2018 میں ریلیز کیا گیا تھا۔