Category شوبز

سندھ ہائیکورٹ میں اداکارہ کبریٰ خان کی میجر (ر) عادل فاروق راجہ کے خلاف درخواست پر سماعت ہوئی جس دوران عدالت میں  ایف آئی اے نے  کبری خان کے خلاف مہم چلانے والے سوشل میڈیا اکاؤنٹس سے متعلق رپورٹ پیش کی۔

ایف آئی اے کی رپورٹ میں  بتایا گیا کہ کبریٰ خان کی درخواست پر کارروائی شروع کردی ہے، کبریٰ خان کے خلاف مہم چلانے والے تمام اکاؤنٹس بلاک کرنے کیلئے پی ٹی اے کو معاملہ بھیج دیا گیا ہے، ساتھ ہی پی ٹی اے کو یوٹیوب ، ٹوئٹر ، انسٹا گرام سمیت دیگر اکاؤنٹس بلاک کرنے کیلئے کہہ دیا گیا ہے۔

عدالت نے درخواست گزار کو ایف آئی اے کی انکوائری میں تعاون کی ہدایت کردی اور سماعت 23 جنوری تک ملتوی کردی۔

 واضح رہے کہ اداکارہ کبریٰ خان نے یوٹیوبر کے خلاف عدالت سے رجوع  کیا تھا، اداکارہ کی جانب سے دائر درخواست میں کہا گیا تھاکہ  یو ٹیوبر اور سابق فوجی افسر نے میڈیا انڈسٹری کی چار اداکاراؤں کے خلاف جھوٹے الزامات لگا کر ان کی تذلیل کی، جھوٹے اور من گھڑت الزامات سے میری اور دیگر اداکاراؤں کی عزت ووقار کو مجروح کیا گیا۔

پاکستان کی معروف اداکارہ سجل علی  کا کہنا ہے کہ مجھے محسوس  ہوتا ہے کہ میرا ابھی آغاز ہے اور میرے پاس ابھی کرنے کو بہت کچھ ہے

 سجل علی نے زندگی میں آگے بڑھنے کے حوالے سے بات کرتے ہوئے کہا کہ  میرے پاس مستقبل میں ابھی کرنے کو بہت کچھ ہے اور  مجھے لگتا ہے کہ مجھے زندگی میں ابھی بہت کچھ کرنا ہے لیکن وقت کم ہے،  ہمیں بعض اوقات  لگتا ہے کہ ہمارے پاس بہت وقت ہے لیکن ایسا ہوتا نہیں، میں بہت کچھ سیکھنا چاہتی ہوں اور سیکھتی بھی ہوں کیوں کہ مجھے لگتا ہے کہ ابھی میرا آغاز ہے۔

دورا ن انٹرویو سجل نے زندگی میں ملنے والی تکلیف اور اس کے بعد ملنے والی خوشی پر بات کرتے ہوئے کہا کہ خوشی غم انسان کی زندگی کا حصہ ہے اور کوئی بھی انسان یہ نہیں کہہ سکتا کہ ایک تکلیف کے بعد سب آسان ہوگا، زندگی میں اتار چڑھاؤ ہی زندگی کی خوبصورتی ہیں لیکن میرا ماننا ہے کہ اللہ چھوٹی سی تکلیف پر بہترین سے نوازتا ہے جس پر میں پھر سے پرجوش ہوکر اللہ سے مخاطب ہوتی ہوں کہ اللہ پاک آپ نے اتنا کچھ نواز دیا۔  

بالی وڈ سپر اسٹار ہریتھک روشن اور صبا آزاد کے حوالے سے بھارتی میڈیا کا دعویٰ ہے کہ دونوں کی شادی کی تیاریوں کا آغاز کردیا گیا ہے۔

ہریتھک کی جانب سے باضابطہ طور پر اب تک اپنے رشتے کا اعتراف نہیں کیا گیا البتہ گزشتہ ایک سال میں اداکار کے ہمراہ صبا آزاد کو کئی مواقع پر ایک ساتھ دیکھا گیا جس سے ان کے رشتے میں ہونے کا پتا چلتا ہے۔

اب بھارتی میڈیا نے اپنی رپورٹ میں دعویٰ کیا ہے کہ بلآخر ہریتھک کے گھر والوں نے صبا آزاد کو قبول کرلیا ہے اور اب شادی کی تیاریوں کا آغاز بھی ہوچکا ہے۔

رپورٹس کے مطابق ہریتھک کے گھر والوں نے صبا کو ان کے لیے پرفیکٹ میچ قرار دیا ہے، اس کے علاوہ اداکار کے بچے بھی اس رشتے پر خوش ہیں۔

بھارتی میڈیا کا دعویٰ ہے کہ ہریتھک اور صبا رواں برس کے آخر تک رشتہ ازدواج میں منسلک ہوجائیں گے، دونوں کی شادی کی تقریب میں قریبی رشتہ دار اور چند دوست شرکت کریں گے۔

خیال رہے کہ بالی وڈ میں سب سے فٹ اداکار ہریتھک روشن آج اپنی 49ویں سالگرہ منارہے ہیں۔

نادیہ خان نے حال ہی میں ایک سوشل میڈیا پوڈ کاسٹ میں اس نازک موضوع پر گفتگو کی اور کہا آج کل شادیاں ٹوٹنے کی وجہ بے وفائی ہے کیونکہ اگر دیکھا جائے تو 90 کی دہائی میں کسی لڑکے کو کوئی لڑکی اچھی لگتی تھی تو اس کے لیے بہت مشکل ہوتا تھا کہ وہ اس لڑکی سے بات کرسکے۔

انہوں نے کہا آج کل سوشل میڈیا کے دور میں یہ چیز بہت آسان ہوگئی ہے، لوگ ڈیٹ پر جاتے ہیں، گھروں میں چلے جاتے ہیں، پہلے ایسا نہیں تھا، اب لڑکوں کو اپنے ارد گرد بہت ساری لڑکیاں آرام سے مل جاتی ہیں، اسی لیے افیئر آسان ہوگئے ہیں، تو اس لیے انہیں اپنے گھر میں موجود بیوی سمجھ میں نہیں آتی اور انہیں اپنی بیوی سے بوریت ہونے لگتی ہے۔

نادیہ خان نے مزید کہا کہ میں ایسی بہت سی لڑکیوں کو جانتی ہوں جن کے شادی شدہ مردوں کے ساتھ افیئرز ہیں اور مجھے یہ سب کچھ دیکھ کر بہت دکھ ہوتا ہے، مرد جھوٹ بہت بولتے ہیں یہاں تک کہ گھر والوں سے چھپ کر دوسری شادیاں کررہے ہیں۔

انہوں نے کہا کہ اس صورتحال میں لڑکیاں بھی غلط ہیں ان کو اپنا ایک اصول ہونا چاہیے کہ اگر کوئی آدمی شادی شدہ ہے تو انہیں اس کے ساتھ کوئی رشتہ نہیں رکھنا چاہیے۔

اداکارہ کا کہنا تھا کہ کچھ لڑکیوں کا ایک مسئلہ یہ بھی ہے کہ ان کی خواہش ہوتی ہے کہ کوئی پیسے والا بندہ مل جائے جو فوراً کوئی جائیداد ان کے نام کرے یا پھر بڑی رقم 3,4 کروڑ ان کے اکاؤنٹ میں ٹرانسفر کروادے۔

نادیہ خان نے اپنی بات مکمل کرتے ہوئے کہا کہ طلاق کی شرح بڑھنے کی ایک بڑی وجہ یہ بھی ہے کہ اب خواتین مالی طور پر آزاد ہیں، تو انہیں یہ مسئلہ نہیں ہوتا کہ طلاق کے بعد انہیں کون سنبھالے گا وہ اپنا خیال خود رکھ سکتی ہیں اس لیے اب وہ بھی کوئی غلط بات برداشت نہیں کرتیں۔

اس کے علاوہ انہوں نے اپنی پہلی شادی کی ناکامی کے بارے میں بات کرتے ہوئے کہا کہ اکیلے بچوں کو سنبھالنا مشکل ہوتا ہے کیونکہ انسان کا دماغ تھوڑا الجھا ہوا ہوتا ہے، جب آپ کام پر ہوں تو آپ کادھیان گھر کی طرف ہوتا ہے اور اگر آپ گھر پر ہوں تو آپ کو یہ فکر ہوتی ہے کہ آپ کو کام کرنا ہے کیونکہ بچوں کی ضرورتیں بھی پوری کرنی ہوتی ہیں۔

نادیہ نے کہا کہ میری ذمہ داری دوہری تھی تو ظاہر ہے زندگی مشکل تھی، میں نےطلاق کے بعد اپنا مارننگ شو بھی اسی لیے چھوڑا تھا کیونکہ میرے بچوں کو میری ضرورت تھی لیکن دوسری شادی کے بعد اب زندگی بہت اچھی گزر رہی ہے۔

واضح رہے کہ نادیہ خان نے 2 سال قبل 2021 میں فیصل ممتاز سے تیسری شادی کی تھی۔

اداکارہ کی جانب سے انسٹاگرام پر گزشتہ شام  اپنے نوزائیدہ بیٹے اور شوہر کے ہمراہ تصاویر جاری کی گئیں اور یہ خوشخبری مداحوں کو دی۔

غنا علی نے بیٹے کی پیدائش پر اللہ کا شکر ادا کرتے ہوئے طویل جذباتی اور محبت بھرا کیپشن لکھا جس میں انہوں نے بتایا کہ بیٹے کا نام ’محمد علی جاہ عمیر ‘ رکھا ہے۔

غنا نے پوسٹ کے کیپشن میں لکھا کہ ’ہماری فیملی میں آج ایک بیٹے کی آمد ہوئی ہے، فائجہ (بیٹی) کا بھائی آگیا ہے، ہم خوشی کے ساتھ اپنے بیٹے محمد علی جاہ عمیر کی پیدائش کا اعلان کرتے ہیں۔

اداکارہ نے مزید لکھا کہ اب ہمارے گھر میں دو بچے ہیں اور یہ بیٹا اللہ تعالیٰ کا کرم ہے، ہم نے ساتویں مہینے کے حمل کے ساتھ عمرہ ادا کیا جو میری زندگی کا یاد گار وقت ہے۔

انہوں نے لکھا کہ مجھے نہیں معلوم کہ مجھ میں اتنی ہمت کہاں سے آئی، اللہ کا شکر ہے اور اس کے بعد میرے شوہر کا ، میرے دونوں بچے خوش نصیب ہیں کہ انہیں ایک ایسا باپ ملا ہے جو ہر مشکل میں ان کے ساتھ سائے کی طرح کھڑا ہے جو اپنی ضروریات کو پورا کرنے سے پہلے ہمیشہ دوسروں کا سوچتا ہے۔

ساتھ ہی غنا نے دعا کی کہ ان کے دونوں بچے اپنے والد جیسے ہی بنیں اور ہمیشہ مشکل وقت میں ایسے ہی میسر رہیں جیسے ان کے والد ان کے لیے ہوتے ہیں۔

واضح رہے کہ غنا علی کے یہاں اس سے قبل ایک بیٹی فائجہ ہے جس کی پیدائش 2021 میں ہوئی تھی۔

بھارتی ریپر بادشاہ بھی پاکستانی اداکارہ ہانیہ عامر کے مداح نکلے اور انہوں نے اداکارہ کی دل کھول کر تعریف کی۔

گزشتہ روز بھارتی سنگر و ریپر ادتیہ پرتیک سنگھ سسودیا عرف بادشاہ نے مداحوں سے سوال وجواب کے سیشن کے دوران اداکارہ ہانیہ کے مداح ہونے کا اعتراف کیا جس کی ویڈیو سوشل میڈیا پر وائرل ہوگئی۔

وائرل ویڈیو میں بادشاہ نے کہا کہ میں ہانیہ کو فولو کرتا ہوں وہ مجھے بڑی مست بندی لگتی ہے،ہانیہ کی پوسٹ دیکھ کر ایک دم سے موڈ اچھا (Uplift) ہوجاتاہے، ہانیہ ایک شخصیت ہے اور مجھے لگتا ہے وہ ایک بہترین انسان ہیں۔ ہانیہ ایک شخصیت ہے اور مجھے لگتا ہے وہ ایک بہترین انسان ہیں۔

تاہم اب بادشاہ کی ویڈیو کو ہانیہ عامر کی جانب سے انسٹااسٹوری پر شیئر کیا گیا اور ساتھ ہی ہانیہ نے کیپشن  میں لکھا کہ ’ آپ  بھی بہت مست ہو‘۔

واضح رہے کہ اس سے قبل بادشاہ نے ہانیہ عامر کی پوسٹ پر کمنٹ کیا تھا جو سوشل میڈیا پر کئی روز زیر گردش رہا۔

ممبئی: بالی ووڈ سپر اسٹار اکشے کمار کی اہلیہ سابقہ اداکارہ ٹوئنکل کھنہ نے آٹو رکشوں سے اپنے عشق پر مبنی ایک وڈیو شیئر کی ہے جو سوشل میڈیا پر وائرل ہوگئی ہے۔ٹوئنکل کھنہ نے انسٹاگرام پر ایک ویڈیو اپلوڈ کی ہے جس میں دیکھا جاسکتا ہے کہ وہ اپنے بیٹی نتارا کے ساتھ رکشہ میں سفر کررہی ہیں۔سابقہ اداکارہ نے ویڈیو کے ساتھ اپنے مداحوں کیلئے ایک دلچسپ کیپشن لکھا کہ اب آپ کو پتہ چل گیا ہو گا کہ میری پہلی کتاب کے سرورق پر رکشہ کیوں ہے۔انہوں نے بتایا کہ لڑکپن میں میرے دوست مجھے ’رکشہ رانی‘ کہا کرتے تھے اور پرانی عادتیں مشکل سے ختم ہوتی ہیں۔ٹوئنکل کھنہ ماضی میں متعدد بڑی فلموں میں کام کرچکی ہیں اور وہ بالی وڈ سپر اسٹار عامر خان کے ساتھ فلم ’میلہ‘ میں بھی جلوہ گر ہوئی تھیں۔سوشل میڈیا پر ان کے مداحوں نے ویڈیو کو بہت پسند کیا، ان کی عاجزی کو سراہا اور کہا کہ وہ ایک ’سونے کا دل‘ رکھتی ہیں

لاہور : پاکستان شوبز انڈسٹری کے سینئر اداکار نعمان اعجاز نے ملک میں بڑھتی ہوئی طلاق کی شرح کو کم کرنے کے لیے ایک اہم مشورہ دے دیا ہے۔نعمان اعجاز نے ایک ویب شو میں بطور مہمان شرکت کی جہاں اْنہوں نے سماجی اور معاشرتی مسائل پر بھی بات کی۔ اْنہوں نے ملک میں بڑھتی ہوئی طلاق کی شرح کے حوالے سے بات کرتے ہوئے کہا کہ خدا کے لیے بچوں کی چھوٹی عمر میں شادیاں کرنا چھوڑ دیں، جب تک آپ کا بچہ کمانے کے قابل نہ ہوجائے اور اپنی بیوی کے اخراجات اْٹھانے کے قابل نہ ہوجائے اس کی شادی نہ کریں۔اْنہوں نے کہا کہ اس طرح کے فیصلوں سے اپنے بچوں کی زندگیوں کو خراب نہ کریں، اپنے بچوں کو سمجھدار ہونے کے بعد اپنی زندگی کے فیصلے خود کرنے دیں۔اداکار کے خیال میں زیادہ تر شادی شدہ جوڑوں کے درمیان صرف پیسوں کی وجہ سے ہی لڑائیاں شروع ہوتی ہیں اور پھر بات طلاق تک پہنچ جاتی ہے۔

لاہور :پاکستانی شوبز انڈسٹری کے معروف اداکار بلال عباس نے کہا ہے کہ محبت ایک ایسی چیز ہے جو کبھی بھی ہوسکتی ہے اور جب کسی کو ہونی ہوتی ہے تو اسے کوئی روک نہیں سکتا۔اداکار بلال عباس نے اپنے حالیہ انٹرویو کے دوران کہا کہ میں ابھی محبت کو سمجھنے کی کوشش کر رہا ہوں، فی الحال کسی سے محبت نہیں اور نہ ہی کسی سے محبت کی باتیں کرتا ہوں۔بلال عباس نے کہا کہ محبت ایک دوسرے کی عزت، ایک دوسرے کے لیے قربانی دینے، ہر مشکلات میں ساتھ نبھانے اور ایک دوسرے کے لیے کچھ بڑھ کر کام کرنے کا نام ہے۔اداکار نے مزید کہا کہ اگر کوئی شخص کسی کے ساتھ محبت کا دعویٰ کرے اور بدلے میں اس کے لیے بڑھ کر کوئی کام نہ کرے، اسے عزت نہ دے اور سکون نہ پہنچا سکے تو سمجھ جائیں کہ وہ شخص صرف باتیں کر رہا ہے۔

جہانیاں: پاکستانی پنجابی فلموں کے نامور اداکار سلطان راہی کو اپنے مداحوں سے بچھڑے27 برس بیت گئے ان کی برسی9جنوری پیرکو منائی گئی۔ اس سلسلے میں جہانیاں،ٹھٹھہ صادق آباد سمیت ملک کے مختلف شہروں میں ان کے مداحوں کے زیر اہتمام تعزیتی تقریبات کا اہتمام کیا گیا اور ان کی مغفرت کیلئے دعائیں مانگی گئیں۔ سلطان راہی 80ء کے عشرے میں پنجابی فلموں کے معروف ہیرو رہے ہیں انہوں نے 15برس تک فلمی دنیا پر راج کیا اورسات سو سے زائد فلموں میں اداکاری کرکے عالمی ریکارڈ قائم کیاہے جن میں پانچ سو فلموں میں انہوں نے بطور ہیرو کردار ادا کیا ہے۔پنجابی فلموں کے نامور ہیرو سلطان محمد المعروف سلطان راہی1938ء کو بھارت کے شہر سہارن پور میں پیدا ہوئے قیام پاکستان کے بعد وہ پاکستان منتقل ہو گئے۔سلطان راہی نے 1971ء میں اپنے فلمی کیریئر کا آغاز کیا اس دوران پنجابی فلم ’’ بشیرا ‘‘ کی کامیابی نے انہیں سپر سٹار بنا دیا سلطان راہی اور مصطفیٰ قریشی کی جوڑی فلم کی کامیابی کی ضمانت بن گئی ان کی فلم ’’ مولا جٹ ‘‘ نے باکس آفس پر کامیابی کے ریکارڈ قائم کیے ان کی دیگر کامیاب فلموں میں ’ سالا صاحب، چن وریام،اتھرا پتر،ملے گا ظلم دا بدلہ، ’ وحشی جٹ ‘ ، ’ شیر خان ‘ ، ’ شعلے ‘ ، ’ آخری جنگ ‘ ،جرنیل سنگھ، دو بیگھے زمین،شیراں دے پتر اور دیگر قابل ذکر ہیں سلطان راہی کو یہ اعزاز بھی حاصل ہے کہ 12اگست 1981ء کو ان کی پانچ فلمیں’ شیر خان،ظلم دا بدلہ،اتھرا پتر،چن وریام اور سالا صاحب ایک ہی روز ریلیز ہوئی تھیں ان فلموں نے کامیابی کے ریکارڈ قائم کیے تھے۔سلطان راہی نے سات سو سے زائد فلموں میں کام کیا جو کہ ورلڈ ریکارڈ ہے سلطان راہی کا نام گینز بک آف ورلڈ ریکارڈ میں موجود ہے انہیں 150سے زائد فلمی ایوارڈز سے نوازا جا چکا ہے ۔ سلطان راہی کی مقبول ترین فلمی ہیروئن میں آسیہ،انجمن،صائمہ،گوری،نیلی،بابرہ شریف قابل ذکر ہیں۔ فن کے سلطان سلطان راہی کو 9جنوری 1996ء کو گجرانوالہ کے قریب نامعلوم ڈاکوئوں نے فائرنگ کرکے موت کے گھاٹ اتار دیا تھا۔