Category شوبز

بالی وڈ اداکارہ شلپا شیٹی کے شوہر راج کندرا کو منگل کے روز مجسٹریٹ کے سامنے پیش کیا گیا جہاں انہیں 14 دن کیلئے عدالتی تحویل میں بھیج دیا گیا ہے۔

راج کندرا کو فحش فلمیں بنانے اور پھر موبائل ایپس پر پھیلانے کے الزام میں گرفتار کیا گیا تھا۔

سماعت کے دوران کرائم برانچ نے عدالت سے راج کندرا کی 7 روزہ تحویل کی درخواست کی جسے عدالت نے مسترد کردیا۔

پولیس کے مطابق راج کندرا کے دو بینک اکاؤنٹس منجمد کردیے گئے ہیں۔

کرائم برانچ نے عدالت کو بتایا کہ راج کندرا اور ان کے بزنس پارٹنر ریان کے مابین موبائل اور میک بک پر ہاٹ شاٹ ایپ سے حاصل ہونے والی آمدن کی تفصیلات مل گئی ہیں۔

ہاٹ شاٹ ایپ کو مبینہ طور پر ٖفحش مواد کو نشر کرنے کیلئے استعمال کیا جاتا تھا۔

بھارتی رپورٹس کے مطابق راج کندرا ‘ ویان’ نامی انڈسٹری کے مالک ہیں جبکہ پرادیپ بخشی جو کہ برطانوی شہری اور راج کندرا کی بہن کے شوہر ہیں ، کینرن لمیٹڈ کمپنی کے مالک ہیں ۔

دونوں کمپنیوں نے موبائل ایپلیکیشن ہاٹ شاٹ پر مبینہ طور پر اس مواد کی فراہمی کیلئے کام کیا ۔

راج کندرا نے مبینہ طور پر فحش مواد فراہم کیا اور اپنے ویان انڈسٹریز کے دفتر سے برطانیہ کی اس کمپنی کو کنٹرول کیا۔

رپورٹس کے مطابق راج کندرا اور ان کی ٹیم اوسطاً 5 لاکھ بھارتی روپے ( 10 لاکھ سے زائد پاکستانی روپے) ایک فلم موبائل ایپلی کیشن پر نشر کرنے کے وصول کرتے تھے۔

اس کے علاوہ پولیس نے راج کندراسے منسلک مختلف بینک اکاؤنٹس میں ساڑھے سات کروڑ بھارتی روپے (15 کروڑ سے زائد پاکستانی روپے ) بھی منجمد کردیے ہیں۔

پاکستانی اداکارہ نوشین شاہ نے سوشل میڈیا پر خود کو ‘آنٹی’ کہنے والوں پر غصہ کرنے کے بجائے پیار سے جواب دیا ہے۔

نوشین شاہ نے حال ہی میں انسٹا گرام پر اپنی کچھ تصاویر اپ لوڈ کیں جس کے بعد کچھ صارفین کی جانب سے اداکارہ کو ‘بوڑھی آنٹی’ کہا گیا۔

ایک صارف نے لکھا کہ ’آنٹی ہوگئی ہو‘ جس کا جواب دیتے ہو ئے نوشین شاہ نے لکھا کہ الحمداللہ ،آپ کو کوئی مسئلہ؟

ایک اور صارف نے طنز کرتے ہوئے کمنٹ کیا کہ ‘کوئن آف پاکستان ،اولڈ ایج آنٹی’ جس کے جواب میں اداکارہ نے کہا کہ ‘کوئن ہوں اتنا ہی کافی ہے، عمر تو ایک نمبر ہے’۔

اس کے علاوہ ایک صارف نے لکھا کہ ‘نائس آنٹی جی ‘ اداکارہ نے جواب میں لکھا کہ ‘بہت بہت شکریہ ،ماں صدقے جائے ،اور کچھ؟

یاد رہے نوشین شاہ ،ضد ، تڑپ جیسے مشہور ڈراموں میں اداکاری کے جوہر دکھا چکی ہیں۔ ان دنوں وہ ڈرامہ سیریل ‘پہلی سی محبت ‘میں اداکاری کرتی نظر آرہی ہیں۔

اداکارہ سونیا حسین نے کہا ہے کہ وہ ممکنہ طور پر جنوری 2023 تک رشتہ ازدواج میں بندھ جائیں گی۔

اداکارہ نے حال ہی میں انسٹاگرام پر مداحوں کے سوالوں کے جواب دیتے ہوئے نہ صرف مستقبل میں اپنی ازدواجی زندگی سے متعلق کھل کر باتیں کیں بلکہ یہ بھی بتایا کہ ان کا کرکٹر شعیب اختر کے ساتھ کیا تعلق ہے اور وہ کن ہولی وڈ اداکاروں کے ساتھ کام کرنے کی خواہش رکھتی ہیں۔

ایک مداح کے سوال پر اداکارہ نے بتایا کہ انہوں نے انتہائی کم عمری یعنی 17 سال کی عمر میں اداکاری کا آغاز کیا جب کہ دوسرے سوال پر انہوں نے بتایا کہ انہوں نے سائیکالاجی میں بیچلر کر رکھا ہے۔

سونیا حسین نے ایک مداح کو بتایا کہ وہ جلد ہی عدنان صدیقی کے ساتھ کام کرتی دکھائی دیں گی جب کہ ان کے تقریباً تمام ڈرامے سماجی مسائل پر بنے ہوئے ہیں۔

انہوں نے ایک مداح کے سوال کا جواب دیتے ہوئے بتایا کہ وہ شاہ رخ خان اور سلمان خان میں سے کسی کی بھی فلمیں پسند نہیں کرتیں، کیوں کہ وہ کمرشل فلموں کی مدآح نہیں ہیں، البتہ ان کی پسندیدہ بولی وڈ فلم تماشا ہے۔

اداکارہ نے ول اسمتھ، جونی ڈیپ اور ٹام کروز کے ساتھ کرنے کی خواہش ظاہر کی—اسکرین شاٹ
سونیا حسین نے مختلف لوگوں کے سوالوں کے جوابات دیتے ہوئے نہ صرف فہد مصطفیٰ کی تعریف کی بلکہ عاطف اسلم کی بھی تعریفیں کیں اور بتایا کہ وہ نہ صرف اچھے گلوکار ہیں بلکہ وہ اچھے انسان بھی ہیں۔

اداکارہ نے مداحوں کے سوالوں کا جواب دیتے ہوئے اداکارہ یمنیٰ زیدی، سجل علی اور منشا پاشا کی بھی تعریفیں کیں اور ساتھ ہی منیب بٹ ایمن خان کی بیٹی کی بھی تعریف کی۔

اداکارہ نے اپنی پسندیدہ اداکاراؤں کے حوالے سے بتایا کہ یمنیٰ زیدی، سجل علی، اسکارلٹ جانسن، ثانیہ سعید اور روزامنڈ پائک ان کی پسندیدہ ترین اداکارائیں ہیں جب کہ انہوں نے صبا قمر کو مضبوط خاتون قرار دیا۔

اداکارہ نے بتایا کہ وہ اپنے اہل خانہ کے ہمراہ رہتی ہیں اور ان کے والد اور والدہ کے خاندان کا تعلق الگ الگ قبائل سے ہے۔

ایک مداح کی جانب سے پوچھے گئے سوال پر سونیا حسین نے سندھی میں جملہ لکھا کہ ‘میرے پیارے مولا سائیں’۔

اداکارہ نے یمنیٰ زیدی اور سجل علی کو بھی اپنی پسندیدہ اداکارائیں بتایا—اسکرین شاٹ
اداکارہ نے ایک سوال کے جواب میں بتایا کہ وہ ہولی وڈ سپر اسٹار جونی ڈیپ، ٹام کروز اور ول اسمتھ کے ساتھ کام کرنا چاہتی ہیں۔

شعیب اختر سے رشتے داری کے حوالے سے پوچھے گئے سوال پر اداکارہ نے بتایا کہ وہ صرف بہترین دوست ہیں۔

شادی سے متعلق پوچھے گئے سوال پر سونیا حسین نے بتایا کہ وہ جنوری 2023 تک شادی کرنے کا ارادہ رکھتی ہیں جب کہ اپنے ہونے والے شوہر سے متعلق پوچھے گئے سوال پر انہوں نے کہا کہ خدا نہ کرے کہ ان کا ہونے والا ساتھی اداکار ہو.

ایک مداح نے ان سے پوچھا کہ کیا وہ کسی گلوکار سے شادی کرنا پسند کریں گی؟ جس پر اداکارہ نے کہا اچھا آپشن ہے۔

خیال رہے کہ سونیا حسین نے 2014 میں فٹنیس ٹرینر اور ماڈل واصف محمد سے شادی کی تھی لیکن جلد ہی ان کے درمیان طلاق ہوگئی تھی، دونوں نے تاحال طلاق کی وجوہات بیان نہیں کیں۔

سونیا حسین نے پہلی شادی کیریئر کے آغاز میں کم عمری میں کی تھی لیکن اب اداکارہ نے دو سال بعد دوسری شادی کرنے کا عندیہ دیا ہے لیکن یہ بھی کہا ہے کہ وہ کسی اداکار سے شادی نہیں کریں گی۔

سابق قومی کرکٹر اور مایہ ناز آل راؤنڈر عبدالرزاق نے تقریباً 22 سال بعد اعتراف کیا ہے کہ ماضی میں ان کے تعلقات اداکارہ و ڈانسر دیدار سے رہے ہیں۔

عبدالرزاق نے 2013 میں کرکٹ سے ریٹائرمنٹ لی تھی، انہوں نے 260 سے زائد ایک روزہ جب کہ 40 سے زائد ٹیسٹ میچ کھیلے۔

ان کا شمار اچھے بلے بازوں میں ہوتا تھا، وہیں انہیں بہترین باؤلر بھی سمجھا جاتا تھا اور ان کا کیریئر تنازعات سے بھی بچا رہا۔

تاہم 1999 میں جب ان کا کیریئر عروج پر تھا تو یہ خبریں تھیں کہ ان کے تعلقات اسٹیج ڈانسر و اداکارہ دیدار سے ہیں لیکن اس وقت ایسی خبروں کی تصدیق نہیں ہو سکی تھی لیکن اب سابق کرکٹر نے مذکورہ معاملے پر کھل کر بات کی ہے۔

عبدالرزاق نے حال ہی میں ایک پروگرام میں نہ صرف مقامی ڈانسر دیدار سے تعلقات کے معاملے پر کھل کر بات کی بلکہ انہوں نے دنیائے کرکٹ کے کئی رازوں سے بھی پردہ اٹھایا۔

عبدالرزاق نے بتایا کہ ان میں جس طرح کی صلاحیت تھی، اس طرح سے انہیں استعمال نہیں کیا گیا اور متعدد مرتبہ کرکٹ بورڈ کی اعلیٰ انتظامیہ کے فیصلوں کی وجہ سے انہیں ٹیم سے باہر نکالا گیا۔

سابق کرکٹر نے یہ انکشاف بھی کیا کہ انہیں ماضی میں میچ فکسنگ کی بھی پیش کش کی گئی اور انہوں نے پیش کش کو مسترد کرتے ہوئے فکسرز کو بتایا کہ وہ انہیں بہت ہی زیادہ پیسے دیں تو وہ پھر ہی وہ اپنا ایمان خراب کریں گے۔

عبدالرزاق نے بتایا کہ انہوں نے تقریبا ایک درجن کپتانوں کی سربراہی میں کرکٹ کھیلی اور جب یونس خان کو کپتانی کی پیش کش کی گئی تو انہیں یہ بھی احکامات دیے گئے کہ عبدالرزاق سمیت 7 کھلاڑیوں کو ٹیم سے باہر کریں مگر یونس خان نے پیش کش مسترد کردی۔

سابق کرکٹر کے مطابق یہی پیش کش بعد ازاں شعیب ملک کو کی گئی اور وہ اعلیٰ حکام کے آگے مجبور تھے، انہوں نے مجبوری کے تحت ان سمیت 5 کھلاڑیوں کو ٹیم سے باہر کیا۔

عبدالرزاق نے بتایا کہ وہ ٹیم سے نکالے جانے کے معاملے پر شعیب ملک کو قصور وار نہیں سمجھتے۔

ایک سوال کے جواب میں عبدالرزاق نے بتایا کہ ان کا کتاب لکھنے کا کوئی ارادہ نہیں ہے، کیوں کہ کتاب میں سچی باتیں لکھنی پڑتی ہیں، اس لیے وہ ایسا قدم اٹھانے سے گریز کر رہے ہیں۔

پروگرام میں عبدالرزاق نے ماضی میں ڈانسر و اداکارہ دیدار سے تعلقات کے سوال پر اعتراف کیا کہ ان کے اداکارہ سے تعلقات رہے ہیں۔

سابق کرکٹر نے بتایا کہ ان کے اور ڈانسر کے درمیان 1999 میں تعلقات استوار ہوئے اور بات شادی تک جا پہنچی مگر انہوں نے اداکارہ سے کوئی بڑے وعدے نہیں کیے تھے اور شادی کے لیے ان سے شوبز چھوڑنے کا مطالبہ کیا تھا۔

عبدالرزاق کے مطابق انہوں نے دیدار کو شادی کرنے کے لیے شوبز چھوڑنے کے فیصلے کے لیے 6 ماہ کا وقت دیا تھا مگر بعد میں اداکارہ نے انہیں بتایا کہ وہ اپنا کیریئر نہیں چھوڑ سکتیں، جس بنا پر انہوں نے ان سے شادی نہیں کی۔

سابق کرکٹر کے مطابق چوں کہ ان کا خاندان کسی شوبز شخصیت کو قبول نہیں کرتا، اس لیے انہوں نے دیدار سے شادی نہیں کی۔

اداکار و ہدایت کار عثمان مختار نے ایک ساتھی خاتون آرٹسٹ کا نام ظاہر کیے بغیر ان کی جانب سے ایک برس سے زائد عرصے سے ہراساں کرنے کا الزام عائد کیا ہے۔

عثمان مختار نے یہ انکشاف اپنے انسٹاگرام اکاؤنٹ پر شیئر کی ایک پوسٹ اور اسٹوریز میں کیا، جس کے کیپشن میں انہوں نے اسے اپنی کہانی کے طور پر بیان کیا۔

انہوں نے پوسٹ میں لکھا کہ ‘اس خاتون کی جانب سے ڈیڑھ برس سے زائد عرصے سے مجھے ہراساں، بلیک میل کیا جارہا ہے اور ڈرایا دھمکایا جارہا ہے’۔

عثمان مختار نے بتایا کہ انہوں نے ہراسانی سے متعلق وفاقی تحقیقاتی ادارے (ایف آئی اے) میں شکایت کی تھی، ایف آئی اے نے خاتون سے متعلق پتا لگانے میں ایک سال کا وقت لیا اور پھر انہیں متعدد طلب کرنے میں مزید 6 ماہ کا عرصہ لگا۔

انہوں نے کہا کہ میرے گھر والوں بالخصوص میری والدہ اور دوستوں کو ہراسانی کے ذریعے نشانہ بنایا گیا ہے اور ان سے متعلق تکلیف دہ تبصرے کیے گئے ہیں۔

اداکار عثمان مختار نے کہا کہ ‘میری ذہنی صحت متاثر ہوئی ہے، اس فرد کی وجہ سے میری بے چینی اب میری صحت کو نقصان پہنچارہی ہے، میں خاموش رہا اور حکام کو اس سے نمٹنے دیا، تاہم اب میں تھک گیا ہوں’۔

انہوں نے مزید لکھا کہ ‘میں چاہتا تھا کہ یہ مسئلہ خاموشی سے حل ہوجائے تاکہ ایک خاتون سے متعلق منفی تاثر نہ جائے لیکن اب میں مزید چپ نہیں رہ سکتا کیونکہ میرے کردار کو مسلسل نشانہ بنایا جارہا ہے’۔

عثمان مختار نے بتایا کہ انہوں نے 2016 میں ایک خاتون آرٹسٹ کے ساتھ ایک میوزک ویڈیو پر کام کیا تھا اور اس پورے شوٹ کے دوران ان کے ویڈیو سے متعلق تخلیقی بنیادوں پر اختلافات رہے اور ان کی کئی مرتبہ بحث بھی ہوئی۔

انہوں نے مزید لکھا کہ آپ کسی بھی ہدایت کار سے پوچھ لیں کہ بطور ہدایت کار اور ایڈیٹر تخلیقی آزادی نہ ہونا کتنا پریشان کن ہوسکتا ہے۔

عثمان مختار نے کہا کہ مذکورہ خاتون آرٹسٹ کے پروجیکٹ سے وہ علیحدہ ہوگئے تھے اور خاتون نے اس ویڈیو میں ہدایت کار کے طور پر عثمان مختار کو کریڈٹ دینے سے انکار کردیا تھا اور انہیں اس پر بھی مسئلہ نہیں تھا۔

اداکار کے مطابق کچھ سالوں بعد خاتون آرٹسٹ نے سوشل میڈیا پر ان سے متعلق جھوٹے دعوے کرنے کا فیصلہ کیا، کچھ سالوں سے وہ ان کے خلاف پوسٹس کررہی ہیں۔

انہوں نے مزید لکھا کہ ‘وہ خاتون آرٹسٹ مسلسل 3 برس سے مجھے میسجز کررہی ہے، میں نے جواب نہیں دیا کیونکہ مجھے ٹھیک نہیں لگا اور میں وہ پیغامات بھی پوسٹ کروں گا’۔

عثمان مختار کا کہنا تھا کہ وہ خواتین کی آزادی رائے اظہار کا احترام کرتے ہیں اور کوئی خاتون جو ہراسانی یا بدسلوکی سے متعلق آواز اٹھاتی ہے تو جھوٹے دعووں سے متعلق اپنے تجربے کے باوجود وہ اس کا یقین کریں گے۔

انہوں نے آخر میں خاتون آرٹسٹ کے میسج کا اسکرین شاٹ بھی شیئر کیا جو انہوں نے عثمان مختار کو بھیجا تھا۔

تاہم اپنی پوسٹ اور انسٹاگرام اسٹوریز میں عثمان مختار نے انہیں ہراساں کرنے والی خاتون کا نام یا شناخت ظاہر نہیں کی۔

اداکارہ مہوش حیات کا کہنا ہے کہ مسئلہ کپڑوں کا نہیں مردوں کی ذہنیت کا ہے۔

انسٹاگرام پر اداکارہ مہوش حیات کے ایک انٹرویو کا ایک کلپ وائرل ہورہا ہے۔

دوران انٹرویو میزبان کی جانب سے اداکارہ سے وزیراعظم عمران خان کے خواتین کے لباس سے متعلق دیے گئے بیان پر سوال کیا گیا۔

سوال کے جواب میں مہوش حیات نے اپنی ایک فلم کا حوالہ دیتے ہوئے وزیراعظم کے بیان کی مخالفت کی اور کہاکہ مسئلہ لوگوں کی ذہنیت میں ہے کپڑوں میں نہیں۔

مہوش حیات کا کہنا تھا کہ ہمیں لوگوں کی ذہنیت پر کام کرنے کی ضرورت ہے ، مغرب میں تو خواتین بہت طرح کے کپڑے پہنتی ہیں لیکن مجھے بطور خاتون کبھی ایسا محسوس نہیں ہوا کہ کوئی مجھے دیکھ رہا ہے یا کوئی مجھے گھور رہا ہے لہٰذا اگر مسئلہ یہاں ہے تو میرے خیال میں یہ مسئلہ ذہنیت کا ہے اور ذہنیت کو تبدیل کرنے کی ضرورت ہے۔

خیال رہے کہ گزشتہ دنوں وزیراعظم عمران خان نے اپنے انٹرویو میں کہا تھا کہ مرد کوئی روبوٹ نہیں، اگر عورت کپڑے کم پہنے گی تو اس کا اثر تو ہو گا۔

معروف اداکارہ کبریٰ خان نے شادی کے حوالے سے اپنے نظریات مداحوں سے شیئر کیے ہیں۔

حال ہی میں کبریٰ خان اور اداکار گوہر رشید نجی ٹی وی کے پروگرام میں جلوہ گر ہوئے اور اپنی ذاتی زندگی سے متعلق گفتگو کی۔

میزبان احسن خان نے اداکارہ سے شادی کے حوالے سے سوال پوچھا جس پر کبریٰ نے کہا کہ مجھے اب اس بات کا احساس ہوا ہے کہ جو آزادی اکیلے پن میں ہے وہ کسی اور کے ساتھ رہ کر نہیں ہے، خود کی ذات پر جو کام ہم اکیلے رہ کر کرسکتے ہیں وہ کسی کے ساتھ رہ کر نہیں کیا جاسکتا۔

اداکارہ کا کہنا تھا کہ میری امی ہمیشہ کہتی ہیں کہ جب تک کسی چیز کی بنیاد مضبوط نا ہو اس وقت تک اس پر عمارت نہیں بن سکتی۔

کبریٰ کا کہنا تھا کہ ہر انسان ایک بنیاد ہے جب تک آپ ازخود مضبوط نا ہوں یا آپ کو یہ نا لگے کہ آپ کسی دوسرے کو ساتھ لے کر زندگی گزار سکتے ہیں، آپ کو شادی کے بارے میں نہیں سوچنا چاہیے۔

کبریٰ خان نے مزید کہا کہ ابھی میں خود پر کام کررہی ہوں، جب وقت آئے گا تو شادی بھی ہوجائے گی لیکن اس میں ابھی وقت ہے۔

شوبز انڈسٹری کے سینئر اداکار عدنان صدیقی بھی کورونا کی چوتھی لہر کا شکار ہوگئے۔

عد نان صدیقی نے ایک انسٹاگرام پوسٹ کے ذریعے کورونا کی تشخیص کے حوالے سے اپنے مداحوں کو بتایا ۔انہوں نے اپنی پوسٹ میں لکھا کہ کورونا نے مجھے بھی اپنی لپیٹ میں لے ہی لیا ہے۔ ’آج میرا کورونا ٹیسٹ مثبت آیا ہے، کورونا کی ہلکی علامات ہیں، ٹیسٹ مثبت آنے کے بعد میں نے خود کو قرنطینہ کرلیا ہے۔‘

اداکار نے کہا کہ گزشتہ ایک ہفتے کے دوران مجھ سے ملاقات کرنے والے تمام لوگ اپنا کرونا ٹیسٹ جلد از جلد کروالیں۔عدنان صدیقی کی پوسٹ پر کمنٹ کرتے ہوئے صبا قمر، فریحہ الطاف، حرا مانی، اعجاز اسلم سمیت ان کے چاہنے والوں نے اداکار کی جلد صحتیابی کے لیئے دعا کی۔

یاد رہے کہ ملک بھر میں ایس او پیز کی خلاف ورزیوں کے باعث کورونا وائرس کی چوتھی لہر کے وار جاری ہیں اور مسلسل کرونا مشبت کیسز کی شرح میں اضافہ ہو رہا ہے۔

اداکارہ شلپا شیٹی کے شوہر راج کندرا کی پورن فلمیں بنانے کے الزام میں گرفتاری کے بعد بھارتی میڈیا میں چہ مگوئیاں ہیں کہ ممکنہ طور پر اداکارہ بھی اس کام میں ملوث رہی ہیں۔

شلپا شیٹی کے شوہر راج کندرا کو ممبئی پولیس نے 19 جولائی کو گرفتار کرکے جیل منتقل کردیا تھا اور بعد ازاں 22 جولائی کو انہیں عدالت پیش کیا گیا تھا۔

عدالت نے راج کندرا کو 27 جولائی تک جسمانی ریمانڈ پر پولیس کے حوالے کردیا جب کہ پولیس نے کارروائی کرتے ہوئے ان کی رہائش گاہ سے کمپیوٹر اور ہارڈ ڈسک برآمد کرلی۔

بعد ازاں راج کندرا کی اہلیہ اداکارہ شلپا شیٹی نے 23 جولائی کو ممبئی پولیس کو اپنا بیان ریکارڈ کرواتے ہوئے شوہر پر لگے الزامات کو مسترد کردیا تھا، تاہم ساتھ ہی تسلیم کیا تھا کہ ان کے شوہر پورن نہیں بلکہ شہوت انگیز فلمیں بناتے ہیں۔

تاہم اب خبریں سامنے آئی ہیں کہ ممبئی پولیس نے فحش فلمیں بنانے کے کیس کی تفتیش کو تیز کرتے ہوئے ممکنہ طور پر دوسری مرتبہ بھی شلپا شیٹی کو بیان ریکارڈ کروانے کے لیے اقدامات اٹھائے ہیں۔

ٹائمز آف انڈیا کے مطابق ممبئی پولیس کو شلپا شیٹی کے بھی ملوث ہونے کا شک ہے، اس لیے پولیس اداکارہ کے موبائل کی جانچ کرنے سمیت انہیں دوبارہ بیان ریکارڈ کروانے کے لیے سمن بھی جاری کر سکتی ہیں۔

تاہم یہ کہنا قبل از وقت ہے کہ پولیس دوبارہ اداکارہ کو کب بلائے گی اور یہ بھی واضح نہیں ہے کہ پولیس کو تاحال اداکارہ کے ملوث ہونے سے متعلق کتنے شواہد ملے ہیں۔

اس سے قبل رپورٹس تھیں کہ پولیس اداکارہ کے بینک اکاؤنٹس سمیت ان کے موبائل اور کمپیوٹر کے ڈیٹا کا بھی جائزہ لے رہی ہے اور اس بات کا پتہ لگایا جا رہا ہے کہ کہیں وہ بھی شوہر کے ہمراہ فحش فلمیں بنانے میں ملوث تو نہیں رہیں؟

شلپا شیٹی نے 23 جولائی کو ریکارڈ کروائے گئے بیان میں واضح کیا تھا کہ وہ شوہر کے ہمراہ فلمیں بنانے کے کام میں شریک نہیں رہیں، ساتھ ہی انہوں نے یہ بھی واضح کیا تھا کہ ان کے شوہر پورن نہیں بلکہ شہوت انگیز فلمیں بناتے ہیں۔

بھارتی میڈیا رپورٹس کے مطابق اداکارہ شوہر راج کندرا کی کمپنی ’ویان انڈسٹریز‘ میں ڈائریکٹر کے عہدے پر بھی تعینات رہی ہیں اور اسی کمپنی کے تحت ہی فحش فلمیں بنانے کا منصوبہ چلایا جا رہا تھا۔

تاہم اداکارہ نے کچھ عرصہ قبل عہدے سے استعفیٰ دیا تھا، بعض رپورٹس کے مطابق اداکارہ نے اس لیے استعفیٰ دیا تھا، کیوں کہ انہیں معلوم ہو چکا تھا کہ ان کے شوہر فحش فلمیں بنانے کے منصوبے پر کام کر رہے ہیں۔

اب پولیس اس بات کی تفتیش کر رہی ہے کہ کہیں بالواسطہ یا بلا واسطہ شلپا شیٹی بھی فحش فلمیں بنانے کے منصوبے میں ملوث تو نہیں رہیں اور کیا اداکارہ نے فحش فلمیں بنانے کے منصوبے سے کوئی مالی فائدہ حاصل کیا یا نہیں؟ تاہم تاحال پولیس کو اداکارہ کے ملوث ہونے کے واضح شواہد نہیں ملے۔

خیال رہے کہ شلپا شیٹی نے راج کندرا سے نومبر 2009 میں شادی کی تھی اور انہیں دو بچے بھی ہیں۔

شوہر کی طرح ماضی میں شلپا شیٹی پر بھی عریانیت پھیلانے کے الزامات لگتے رہے ہیں اور انہیں اپنی بعض تصاویر اور ویڈیوز پر قانونی کارروائیوں کا سامنا بھی کرنا پڑا۔

معروف اداکار و میزبان آغا علی نے انکشاف کیا ہے کہ فواد خان کو جہاز میں سفر کے دوران جہاز کے ہِلنے سے بہت ڈر لگتا ہے۔

آغا علی نے ایک انٹرویو کے دوران بتایا کہ میں نے اور فواد خان نے ایک ساتھ بہت زیادہ سفر کیا ہے، یوں تو فواد خان بے حد نڈر اور دلیر انسان ہیں، ہم کئی ایسی جگہوں پر گئے جہاں بھوت وغیرہ کی چیزوں سے ہم خوفزدہ ہو جاتے تھے لیکن فواد نہیں ڈرتا تھا۔

آغا نے بتایا کہ فواد ایک چیز سے بہت ڈرتا تھا، جہاز ہِلا نہیں اور وہ کہنا شروع ہو جاتا تھا کہ یہ زیادہ نہیں ہِل رہا، مجھے نہیں لگ رہا یہ صحیح ہے۔

اداکار نے کہا کہ میں ان سے کہتا تھا کہ نہیں خان صاحب کچھ نہیں ہے لیکن وہ پھر بھی جہاز کے اچانک ہِلنے سے ڈر جاتے تھے۔