Category شوبز

معروف ٹک ٹاکر جوڑی ذوالقرنین اور کنول آفتاب نے انکشاف کیا ہے کہ ان کا صرف نکاح ہوا ہے، رخصتی تاحال نہیں ہوئی۔

ذوالقرنین اور کنول نے حال ہی میں نجی ٹی وی کے ایک پروگرام میں شرکت کی جہاں ان سے میزبان فضا علی نے سوال کیا کہ سننے میں آرہا ہے کہ آپ لوگوں کی رخصتی نہیں ہوئی تو کیا یہ سچ ہے۔

سوال کا جواب دیتے ہوئے ٹک ٹاکر ذوالقرنین نے بتایا کہ جی ہاں ابھی صرف ہمارا نکاح ہوا ہے، رخصتی ہونا باقی ہے، کووڈ کی وجہ سے ہم نے گھر میں ہی چھوٹی سی تقریب میں نکاح کر لیا تھا۔

انہوں نے بتایا کہ میری اور کنول دونوں کی خواہش ہے کہ ہم اپنی شادی دھوم دھام سے کریں، کورونا کے حالات بہتر ہونے کے بعد ہم رخصتی کر لیں گے، ارادہ ہے کہ ایک سال کے اندر ہماری رخصتی ہو جائے۔

خیال رہے ٹاک ٹاکر جوڑی ذوالقرنین اور کنول آفتاب رواں برس اپریل میں رشتہ ازدواج میں منسلک ہوئے تھے۔

پاکستان کی سینئر اداکارہ صبا فیصل نے اپنی بہو کے حوالے سے کیے جانے والے تبصرے پر ایک صارف کو کھری کھری سنا دیں۔

صبا فیصل نے انسٹاگرام پر اپنے اہلِ خانہ کے ہمراہ عید کی کچھ تصاویر شیئر کیں جس میں ان کے شوہر، بیٹی اداکارہ سعدیہ فیصل اور دو بیٹے ارسلان اور سلمان فیصل موجود تھے۔

اداکارہ کی تصاویر پر صارفین نے ان کی بہو سے متعلق کئی سوالات پوچھ ڈالے، کسی نے کہا کہ آپ کی بہو آپ کے ساتھ کیوں نہیں تو کسی نے صبا فیصل کی بیٹی کو تنقید کا نشانہ بنا ڈالا۔

وہیں مہوش نامی ایک صارف نے اپنا تبصرہ پیش کرتے ہوئے لکھا کہ بہت بدنصیب ہوتی ہے وہ عورت جو بیٹی کا گھر بساتی ہے لیکن بہو کو بسنے نہیں دیتی اور ایک بہن اپنے بھائی کو خوش نہیں دیکھ سکتی۔

صبا فیصل نے جواب دیتے ہوئے کہا کہ تم اپنی فکر کرو بی بی۔

اسی صارف نے دوسرا کمنٹ کیا کہ اپنے بھائی کے چہرے کی جعلی ہنسی بھی نظر نہیں آرہی، اس کی محبت کی شادی تھی، بہن سے کیسے برداشت ہوتی۔

صبا فیصل خاتون صارف کے اس تبصرے پر خاموش نا رہ سکیں اور جواب میں لکھا ’تم جاؤ جہنم میں‘۔

خیال رہے صبا فیصل کے بیٹے سلمان فیصل کی شادی دو سال قبل نیہا ملک سے ہوئی تھی تاہم کچھ عرصہ سے سوشل میڈیا پر افواہیں گردش کر رہی تھیں کے دونوں میں علیحدگی ہو گئی ہے لیکن اس حوالے سے فریقین کی جانب سے تصدیق یا تردید نہیں کی گئی۔

بالی وڈ کے نامور ہدایتکار کرن جوہر اب معروف بھارتی رئیلٹی شو بِگ باس کے آنے والے سیزن کی میزبانی کریں گے۔

کرن جوہر بگ باس کے نئے سیزن کی ڈیجیٹل قسطوں کی میزبانی کریں گے۔

بھارتی اسٹریمنگ پلیٹ فارم ووٹ نے اپنے ٹوئٹر اکاؤنٹ سے کرن کی تصویر شیئر کرتے ہوئے مداحوں کو اطلاع دی کہ ہدایتکار کرن جوہر بطور میزبان بگ باس او ٹی ٹی کا حصہ ہوں گے۔

بھارتی میڈیا رپورٹس کے مطابق کرن جوہر صرف ووٹ پر نشر کی جانے والی چند اقساط کی میزبانی کریں گے۔

بعدازاں پروگرام کے میزبان سلمان خان ہی ٹیلی ویژن پر نئے سیزن کی میزبانی کے فرائض سرانجام دیں گے۔

دوسری جانب کرن جوہر نے اپنے جذبات کا اظہار کرتے ہوئے کہا کہ میری والدہ کا خواب سچ ہوگیا، میں اور والدہ بگ باس کے بہت بڑے مداح ہیں اور اس کی ایک قسط دیکھنا نہیں بھولتے، بگ باس مجھے ڈرامے کی صورت میں تفریح فراہم کرتا ہے۔

واضح رہے کہ بگ باس او ٹی ٹی 8 اگست سے ناظرین کے لیے بھارتی اسٹریمنگ پلیٹ فارم ووٹ پر پیش کیا جائے گا۔

ممبئی: بھارتی اداکارہ ودیا بالن نے ماضی میں خود کو بےوقوف محسوس کرنے کی وجہ بتا دی ہے۔

اداکارہ ودیا بالن کا شمار ان بالی ووڈ اداکاراؤں میں ہوتا ہے جنہیں فلم انڈسٹری میں اکثر اپنے وزن، قد اور رنگت کی وجہ سے تنقید کا نشانہ بنایا جاتا ہے۔ بہرحال ماضی میں ودیا بالن اپنے لباس کی پسند کے حوالے سے مطمئن نہیں رہیں۔ وہ بالی ووڈ کی دوسری اداکاراؤں کے لباس سے متاثر ہوا کرتی تھیں۔

اداکارہ نے اپنے حالیہ انٹرویو میں بتایا کہ جب فلم انڈسٹری میں آئی تب کپڑوں کے حوالے سے میری اپنی کوئی پسند نہ تھی، میں دوسری اداکاراؤں کے کپڑوں سے متاثر ہوکر ویسا ہی انداز اپنایا کرتی تھی مگر مجھے بہت جلد یہ احساس ہوگیا کہ میں ایک بےوقوف ہوں، دوسری اداکاراؤں کی طرح کپڑے پہن کر اطمینان نہیں ملتا تھا۔

اداکارہ نے بتایا کہ مجھے بعد میں احساس ہوا کہ میری پسند ساڑھی پہننا ہے اور میں نے تب فیصلہ کرلیا کہ اب زیادہ تر ساڑھی ہی پہنوں گی۔

اپنے فیصلے کو آزادانہ قرار دیتے ہوئے ودیا بالن کہتی ہیں کہ لوگوں کے پاس آپ کی تعریف کرنے کے سوائے کوئی چارہ نہیں ہونا چاہیے، ماضی میں میرے پاس دو ہی راستے تھے، ایک یہ کہ میں پوری زندگی دوسروں کی طرح بننے کی خواہش میں گزار دوں یا پھر خود سے ایسی بن جاؤں کہ لوگ تعریف کریں۔

ودیا بالن کو آخری مرتبہ فلم ’شیرنی‘ میں دیکھا گیا۔ یہ فلم جانوروں کے تحفظ سے متعلق ہے جس میں اداکارہ نے ایک فارسٹ آفیسر کا کردار ادا کیا ہے۔ ودیا بالن کو شیرنی کی ریلیز کے بعد سیکسزم یا جنسی تعصب کا نشانہ بنایا گیا۔

ٹوکیو اولمپکس میں خواتین بیڈمنٹن کے سنگلز ایونٹ میں پاکستان کی ٹاپ سیڈ کھلاڑی ماحور شہزاد کو ابتدائی میچ میں بدترین شکست کا سامنا کرنا پڑ گیا۔

خواتین بیڈمنٹن کے سنگلز ایونٹ میں پاکستان کی ماحور شہزاد کو جاپان کی ایکانی یاماگوچی نے اکیس تین اور اکیس آٹھ سے آؤٹ کلاس کر دیا۔

دوسری جانب ٹوکیو اولمپکس میں پاکستانی شوٹر گلفام جوزف میڈل راؤنڈ کے لیےکوالیفائی نا کر سکے، مینز 10 میٹر ائیر پسٹل میں گلفام جوزف کی نویں پوزیشن رہی۔

فائنل راؤنڈ کے لیے آٹھ شوٹرز کو کوالیفائی کرنا تھا، کوالیفکیشن راؤنڈ میں ایک موقع پر گلفام جوزف کی ساتویں پوزیشن ہو گئی تھی تاہم گلفام جوزف ساتویں پوزیشن برقرار نا رکھ سکے۔

معروف اداکارہ ہانیہ عامر نے اداکار علی رحمان کے حوالے سے کہا کہ وہ ان سے شادی کرنا چاہیں گی کیونکہ علی ان کے بہترین دوست ہیں۔

ہانیہ عامر کے ایک انٹرویو کا چھوٹا سا کِلپ انسٹاگرام پر وائرل ہے جس میں انہیں تین اداکاروں علی رحمان خان، شہریار منور اور اذان سمیع خان کے حوالے سے آپشنز دیے گئے کہ وہ ان میں سے کسے قتل کریں گی، کس کے ہمراہ ڈیٹ پر جانا چاہیں گی اور کس سے شادی کریں گی۔

اداکارہ سوال سنتے ہی سوچ میں مبتلا ہوگئیں اور کچھ دیر میں جواب دیا کہ میں شہریار منور کو قتل کرنا چاہوں گی کیونکہ انہیں میں جانتی نہیں ہوں۔

ہانیہ نے کہا کہ اگر اذان سمیع خان مجھ سے پوچھتے ہیں تو میں ان کے ساتھ ڈیٹ پر جانا چاہوں گی کیونکہ میرے پاس دوسرا کوئی آپشن موجود نہیں ہے۔

آخر میں اداکارہ ہانیہ عامر نے علی رحمان کا نام لیتے ہوئے کہا کہ میں ان سے شادی کروں گی کیونکہ وہ میرے بیسٹ فرینڈ ہیں۔

اداکارہ مہوش حیات نے مستقبل میں سیاست میں انٹری دینے کا عندیہ دیتے ہوئے امید ظاہر کی ہے کہ وہ مستقبل میں ملک کی وزیر اعظم بنیں گی۔

’ایک دن جیو کے ساتھ‘ میں سہیل وڑائچ کے ساتھ بات کرتے ہوئے مہوش حیات نے نہ صرف اپنے مستقبل کے منصوبوں پر کھل کر بات کی بلکہ انہوں نے خواتین کے حقوق، ’می ٹو مہم‘، سماجی مسائل اور شوبز انڈسٹری پر بھی کھل کر بات کی۔

اداکارہ نے طویل پروگرام میں اپنی محبت اور شادی سے متعلق ارادوں پر بھی کھل کر گفتگو کی اور بتایا کہ انہوں نے آج تک محبت اور شادی کو اہمیت ہی نہیں دی۔

اداکارہ نے بتایا کہ چوں کہ ان کی والدہ اداکارہ رہی ہیں اور بہن و بھائی بھی موسیقی اور اسی انڈسٹری سے ہی وابستہ ہیں تو انہیں اپنے کیریئر کو آگے بڑھانے میں مدد ملتی ہے۔

انہوں نے ڈراموں میں کام کرنے کی وجہ بتاتے ہوئے کہا کہ ان کے خیال میں ڈراموں میں یکسانیت ہوگئی ہے، جس وجہ سے انہوں نے چھوٹی اسکرین پر کام کرنا بند کیا، تاہم اب وہ کچھ اسکرپٹس پڑھ رہی ہیں، جنہیں پڑھنے کے بعد وہ ممکنہ طور پر ڈراموں میں واپسی کریں گی۔

ایک سوال کے جواب میں مہوش حیات نے بتایا کہ بینظیر بھٹو کی زندگی پر بننے والی فلم ابھی ابتدائی مراحل میں ہے اور اس کی کہانی لکھنے پر کام جاری ہے، جس کے بعد اس کی پروڈکشن شروع کی جائے گی۔

خود کو ’تمغہ امتیاز‘ ملنے کے سوال پر انہوں نے بتایا کہ انہیں شاید اس لیے زیادہ تنقید کا نشانہ بنایا گیا، کیوں کہ انہیں انتہائی کم عمری میں اعلیٰ ترین ایوارڈ ملا۔

مہوش حیات کے مطابق اگر انہیں سفارش کی بنیاد پر تمغہ امتیاز ملا ہے تو پھر شاید ہر کسی کو مذکورہ ایوارڈ سفارش پر ملتا آیا ہوگا۔

اداکارہ نے بتایا کہ ایوارڈ ملنے کے بعد ان کی اداکاری پر کی جانے والی تنقید پر انہیں افسوس نہیں ہوا، تاہم جب ان کی کردار کشی کی گئی تو انہیں تکلیف پہنچی۔

خواتین کے حقوق، عورت مارچ اور می ٹو مہم پر بات کرتے ہوئے اداکارہ نے بتایا کہ وہ ذاتی طور پر خواتین کے حقوق کی رہنما رہی ہیں اور وہ ایسی مہموں کو سپورٹ کرتی ہیں۔

اداکارہ کا کہنا تھا کہ مذکورہ مہموں کا مقصد برابری ہے نہ کہ خواتین یہ چاہتی ہیں کہ انہیں مردوں سے برتر سمجھا جائے۔

خواتین کے لباس سے متعلق وزیر اعظم عمران خان کے بیان کے سوال پر مہوش حیات نے کہا کہ یہ کہنا غلط ہے کہ خواتین کے نیم عریاں لباس سے مرد حضرات کے جذبات ابھرتے ہیں بلکہ سارا معاملہ ذہنیت کا ہے۔

انہوں نے اپنی فلم ’ایکٹر ان لا‘ کی مثال دی اور بتایا کہ انہوں نے مذکورہ فلم میں ایک پارسی نوجوان صحافی کا کردار ادا کیا تھا، جسے اس کے لباس کی وجہ سے تنگ کیا جاتا اور چھیڑا جاتا تھا، جس پر اس نے جب عدالت میں مقدمہ کیا تو وکیل نے ان سے پوچھا تھا کہ کبھی آپ نے سوچا ہے کہ شاید آپ میں ہی مسئلہ ہو؟ آپ کے لباس میں ہی مسئلہ ہو؟

اداکارہ نے مزید وضاحت کی کہ وہ جب مغربی ممالک میں جاتی ہیں تو انہیں ان کے لباس کی وجہ سے کوئی نہیں گھورتا مگر جب وہ اپنے ملک میں ہوتی ہیں تو ہرکوئی انہیں گھورتا ہے، جس کا مطلب یہ ہوا کہ لباس نہیں بلکہ ذہنیت کا مسئلہ ہے۔

دو حصوں پر مبنی پروگرام میں مہوش حیات نے محبت اور شادی کے معاملے پر بھی کھل کر بات کی اور بتایا کہ انہیں شروع سے ہی کسی سے محبت نہیں ہوئی، کیوں کہ انہوں نے کیریئر بنانے کے لیے اس پر دھیان ہی نہیں دیا اور انہوں نے محبت کو غیر اہم سجھا۔

اداکارہ کے مطابق کم عمری میں محبت کرنے پر کیریئر متاثر ہو سکتا ہے، اس لیے انہوں نے ایسے معاملے پر توجہ نہیں دی۔

پروگرام میں انہوں نے انکشاف کیا کہ انہیں متعدد بار بولی وڈ فلموں میں کام کرنے کی پیش کش بھی ہوئی مگر کبھی انہیں کہانی پسند نہیں آئی تو کبھی انہیں اپنا کردار مناسب نہیں لگا، جس وجہ سے انہوں نے کام کرنے سے انکار کیا۔

ساتھ ہی انہوں نے کہا کہ انہیں پاکستانی انڈسٹری میں اتنی اہمیت ملتی ہے کہ انہیں دوسری انڈسٹری میں کام کرنے کی خواہش ہی نہیں۔

اداکارہ نے شادی کے حوالے سے بتایا کہ ابھی انہیں کوئی ایسا شخص نہیں ملا، جن سے وہ شادی کریں اور فی الحال ان کا ارادہ بھی نہیں ہے، کیوں کہ ان کے مطابق شادی اور کیریئر ایک ساتھ نہیں چل سکتے۔

اداکارہ کے مطابق کم عمری میں محبت کرنا کیریئر کے لیے نقصان دہ ہے—فائل فوٹو: انسٹاگرام
مہوش حیات کا کہنا تھا کہ مستقبل میں اگر انہیں کوئی اچھا شخص ملا تو وہ شادی کریں گی اور اس کے لیے وہ کیریئر سے بریک بھی لیں گی۔

اداکارہ نے بتایا کہ وہ کسی ایسے شخص سے شادی کریں گی جو ان سے زیادہ کماتے ہوں اور خود مختار ہونے کے ساتھ ساتھ دل کے اچھے ہوں، ان کے آگے رنگت اور قد کی کوئی اہمیت نہیں۔

اداکارہ نے ایک سوال کے جواب میں انکشاف کیا کہ وہ بچپن سے ہی ہولی وڈ اداکار لیونارڈو ڈی کیپریو پر فدا ہیں اور تاحال ان پر فدا ہیں۔

پروگرام میں انہوں نے ٓمسکراتے ہوئے لینارڈو ڈی کیپریو کو پیش کش کی کہ وہ اگر ان کے پاس بارات لے آنا چاہتے ہیں تو لے آئیں، وہ ان سے شادی کرنے کے لیے تیار ہیں۔

مہوش حیات نے انٹرویو کے دوران انکشاف کیا کہ وہ مستقبل میں سیاست میں آنے کا ارادہ رکھتی ہیں، تاہم یہ کہنا قبل از وقت ہے کہ وہ اپنی نئی پارٹی بنائیں گی یا کسی جماعت کا حصہ ہوں گی۔

اسی حوالے سے انہوں نے مزید بتایا کہ وہ مستقبل میں وزیر اعظم بننےکی خواہش بھی رکھتی ہیں اور ساتھ ہی کہا کہ جب ایک کرکٹر وزیر اعظم بن سکتا ہے تو اداکارہ کیوں نہیں بن سکتیں؟

انہوں نے وزیر اعظم عمران خان کی سیاست اور ان کی جماعت کی تعریف بھی کی۔

بولی وڈ اداکارہ شلپا شیٹی نے اپنے شوہر کا ساتھ دیتے ہوئے ان پر فحش فلمیں بنانے کے عائد کیے گئے الزامات کو مسترد کرتے ہوئے کہا ہے کہ راج کندرا قابل اعتراض فلمیں بناتے ہیں۔

شلپا شیٹی کے شوہر راج کندرا کو ممبئی پولیس نے 19 جولائی کو گرفتار کرکے جیل منتقل کردیا تھا اور بعد ازاں 22 جولائی کو انہیں عدالت پیش کیا گیا تھا۔

عدالت نے راج کندرا کو 27 جولائی تک جسمانی ریمانڈ پر پولیس کے حوالے کردیا جب کہ پولیس نے کارروائی کرتے ہوئے ان کی رہائش گاہ سے کمپیوٹر اور ہارڈ ڈسک برآمد کرلی۔

بعد ازاں راج کندرا کی اہلیہ اداکارہ شلپا شیٹی نے 23 جولائی کو ممبئی پولیس کو اپنا بیان ریکارڈ کرواتے ہوئے شوہر پر لگے الزامات کو مسترد کردیا۔

ٹائمز آف انڈیا کے مطابق شلپا شیٹی نے اپنا بیان ریکارڈ کرواتے ہوئے شوہر پر لگے الزمات کو یکسر مسترد کرتے ہوئے کہا کہ ان کے جیون ساتھی فحش فلمیں بنانے میں ملوث نہیں ہیں۔

پولیس کو ریکارڈ کروائے گئے بیان میں اداکارہ نے کہا کہ ان کے شوہر کی ’ہاٹ شاٹ‘ نامی ایپلی کیشن پر جو مواد دستیاب ہے، اسے فحش (پورن) نہیں کہا جا سکتا۔

شلپا شیٹی نے پولیس کو فحش مواد اور قابل اعتراض مواد میں فرق بھی بتایا اور کہا کہ ان کے شوہر شہوت انگیز فلمیں بناتے ہیں، جنہیں پورن نہیں کہا جا سکتا۔

اسی حوالے سے ٹائمز آف انڈیا نے اپنی ایک رپورٹ میں بتایا کہ شلپا شیٹی نے پولیس کو دیے گئے بیان میں تسلیم کیا کہ ان کے شوہر قابل اعتراض فلمیں بناتے ہیں۔

رپورٹ میں بتایا گیا کہ اگرچہ شلپا شیٹی کا مذکورہ کیس سے براہ راست کوئی تعلق نہیں، تاہم پولیس نے انہیں بھی شامل تفتیش کیا ہے اور اسی وجہ سے ہی انہیں 23 جولائی کو بیان ریکارڈ کروانے کے لیے بلایا گیا تھا۔

اداکارہ کو پولیس نے اس وقت شامل تفتیش کیا، جب پولیس کو معلوم ہوا کہ اداکارہ نے حال ہی میں شوہر کی کمپنی ’ویان انڈسٹریز‘ کے ڈائریکٹر کے عہدے سے استعفیٰ دیا تھا۔

رپورٹ میں بتایا گیا کہ اداکارہ نے اس وقت عہدے سے استعفیٰ دیا تھا جب کہ ان کے شوہر کی کمپنی نے فحش یا قابل اعتراض فلمیں بنانے پر کام شروع کیا تھا۔

پولیس اس بات کی بھی تفتیش کر رہی ہے کہ کہیں شلپا شیٹی نے تو پورن فلمیں بنانے سے کوئی فائدہ حاصل تو نہیں کیا؟

پولیس شلپا شیٹی کے بینک اکاؤنٹس کی بھی تفتیش کر رہی ہے کہ کہیں انہوں نے فحش فلموں سے ہونے والی کمائی میں سے مالی فائدہ تو نہیں اٹھایا؟

شلپا شیٹی کے شوہر راج کندرا کو متعدد ماڈلز اور خواتین کی جانب سے کیے گئے دعووں کے بعد گرفتار کیا تھا۔

اداکارہ کے شوہر کے خلاف رواں برس فروری کے آغاز میں تعزیرات ہند کے انفارمیشن ٹیکنالوجی ایکٹ اور خواتین کی تذلیل کرنے جیسے الزامات کے تحت مقدمہ دائر کیا گیا تھا۔

راج کندرا کے خلاف ملواڑی پولیس تھانے میں فحش فلمیں بنانے اور خواتین کی تذلیل کا مقدمہ دائر کیا گیا تھا، جس کے بعد کرائم برانچ پولیس نے ان کے خلاف تفتیش شروع کی تھی۔

راج کندرا کی گرفتاری ایک ایسے وقت میں ہوئی ہے جب کہ رواں برس فروری میں ساگریکا شونا سمن نامی ماڈل نے دعویٰ کیا تھا کہ ان سے شلپا شیٹی کے شوہر کی کمپنی نے فلموں میں کام دلوانے کے بہانے برہنہ اوڈیشن دینے کا مطالبہ کیا تھا۔

ماڈل نے بتایا تھا کہ انہیں 2020 میں کورونا لاک ڈاؤن کے دوران امیش کامت نامی شخص نے فون کرکے فلموں میں کام کی پیش کش کی اور مطالبہ کیا کہ وہ فون پر برہنہ اوڈیشن دیں۔

ماڈل کے مطابق امیش کامت نے انہیں بتایا کہ وہ راج کندرا کی کمپنی کے ملازم ہیں۔

شلپا شیٹی نے راج کندرا سے نومبر 2009 میں شادی کی تھی اور انہیں دو بچے بھی ہیں۔

شوہر کی طرح ماضی میں شلپا شیٹی پر بھی عریانیت پھیلانے کے الزامات لگتے رہے ہیں اور انہیں اپنی بعض تصاویر اور ویڈیوز پر قانونی کارروائیوں کا سامنا بھی کرنا پڑا۔

گلوکارہ آئمہ بیگ اور اداکار شہباز شگری نے انفرادی طور پر منگنی کرنے کے چار ماہ بعد باضابطہ طور پر اہل خانہ کی موجودگی میں منگنی کرلی۔

دونوں نے رواں برس 20 مارچ کو انسٹاگرام پوسٹس کے ذریعے منگنی کرنے کا اعلان کیا تھا اور دونوں نے انگوٹھیوں کے ہمراہ تصاویر بھی شیئر کی تھیں۔

مارچ میں انفرادی طور پر منگنی کرنے کے بعد خیال کیا جا رہا تھا کہ اب دونوں شادی کریں گے، تاہم دونوں نے رشتہ ازدواج میں بندھنے سے قبل اہل خانہ کی موجودگی میں باضابطہ طور پر منگنی کرلی۔

دونوں کی منگنی کی تقریبات کا اہتمام کرنے والی کمپنی ’ویڈنگ شیڈنگ‘ کی جانب سے شیئر کی گئیں ویڈیوز اور تصاویر کے مطابق منگنی کی تقریب دارالحکومت اسلام آباد میں ہوئی۔

منگنی کی تقریب میں دونوں کے اہل خانہ کے علاوہ معروف شوبز شخصیات کو بھی دیکھا جا سکتا ہے۔

منگنی کی تقریب میں گلوکار و موسیقار بلال سعید اور اداکارہ ہانیہ عامر کے علاوہ دیگر شوبز شخصیات اور موسیقی سے وابستہ افراد بھی شریک ہوئے جب کہ دونوں کے رشتے داروں نے بھی شرکت کی۔

دونوں کی منگنی کی تصاویر بنانے والی کمپنی ’پکٹروازاہ‘ نے بھی ان کی منگنی کی ویڈیوز اور تصاویر شیئر کیں، جن میں دونوں کو خوش دیکھا جا سکتا ہے۔

گلوکارہ آئمہ بیگ نے اپنی انسٹاگرام اسٹوریز میں مختلف شوبز شخصیات کی جانب سے منگنی کی مبارک باد دیے جانے کی پوسٹس بھی شیئر کیں۔

دوںوں کی منگنی کی تصاویر اور ویڈیوز وائرل ہوگئیں اور شوبز شخصیات سمیت ان کے مداحوں نے بھی انہیں مبارک باد پیش کی۔

دونوں کی منگنی کی تقریب کی ویڈیوز اور تصاویر 23 جولائی کو عید الاضحیٰ کے تیسرے دن شیئر کی گئیں اور اسی دن ہی آئمہ بیگ کا فرحان سعید کے ساتھ پنجابی رومانوی گانا ’نہ چھیڑ ملنگاں نوں‘ بھی ریلیز کیا گیا۔

یہ واضح نہیں ہے کہ دونوں کی منگنی کب ہوئی، تاہم تقریب کی ویڈیوز اور تصاویر 23 جولائی کو اسلام آباد سے شیئر کی گئیں۔

آئمہ بیگ نے منگنی کی تقریب سے متعلق انسٹاگرام اسٹوریز شیئر کیں—اسکرین شاٹ
دونوں کو گزشتہ دو سال سے ایک ساتھ دیکھا جا رہا ہے اور رواں برس مارچ میں دونوں کی جانب سے انفرادی طور پر منگنی کا اعلان کیے جانے کے بعد دونوں کو انتہائی قریب دیکھا گیا اور دونوں نے متعدد بار جلد شادی کا عندیہ بھی دیا۔

خیال کیا جا رہا ہے کہ اہل خانہ کی رضامندی سے باضابطہ منگنی ہوجانے کے بعد اب دونوں ممکنہ طور پر رواں برس کے اختتام یا پھر آئندہ سال کے آغاز تک رشتہ ازدواج میں بندھ جائیں گے۔

ہولی وڈ اداکار 57 سالہ براڈ پٹ اور 46 سالہ اداکارہ انجلینا جولی کے کئی سال سے جاری طلاق اور بچوں کی حوالگی کے کیس میں نئے موڑ آنے سے معاملات مزید الجھ گئے۔

دونوں کے درمیان 6 بچوں کی حوالگی اور ان کی طلاق کا کیس 2016 سے زیر سماعت ہے اور رواں برس مئی میں عدالت نے بچوں کی حوالگی سے متعلق براڈ پٹ کے حق میں فیصلہ دیا تھا۔

مئی 2021 میں عدالت نے تمام بچوں کی حوالگی اور پرورش مشترکہ طور پر کرنے کا حکم دیا تھا، اس سے قبل انجلینا جولی نے درخواست دی تھی کہ بچے صرف ان کے حوالے کیے جائیں۔

اگرچہ مئی میں عدالت نے ان کی بچوں کی حوالگی سے متعلق براڈ پٹ کے حق میں فیصلہ دیا تھا، تاہم تاحال دونوں کے درمیان قانونی طور پر طلاق نہیں ہوسکی، البتہ عدالت نے انہیں ’طلاق یافتہ‘ قرار دے رکھا ہے، تاکہ دونوں میں سے کوئی بھی نئی زندگی شروع کرنا چاہے تو کر سکتا ہے۔

لیکن اب ان کی طلاق اور بچوں کی حوالگی سے متعلق نیا موڑ آنے پر معاملہ مزید الجھ گیا۔

خبر رساں ادارے ’ایسوسی ایٹڈ پریس‘ (اےپی) کے مطابق ریاست کیلی فورنیا کی اپیل کورٹ نے انجلینا جولی کی درخواست پر ان کی بچوں کی حوالگی کا فیصلہ سنانے والے ایک جج کو نااہل قرار دے دیا۔

رپورٹ کے مطابق انجلینا جولی کی درخواست پر عدالت نے فیصلہ سنانے والے جج جان ڈبلیو آرڈرکک کو خود سے متعلق حقائق خفیہ رکھنے پر نااہل قرار دیا، جس کے باعث ان کی جانب سے سنائے گئے فیصلے کی اہمیت پر سوال اٹھائے جا رہے ہیں۔

رپورٹ کے مطابق عدالت نے جج کو براڈ پٹ کے وکلا سے اپنے کاروباری تعلقات کو خفیہ رکھنے کے الزامات کے تحت نااہل قرار دیا اور اپنے حکم نامے میں کہا کہ جج کی جانب سے کاروباری تعلقات کے حقائق کو سامنے نہ لانے کی وجہ سے فیصلے کی اہمیت پر اثر پڑتا ہے۔

مذکورہ جج کے خلاف انجلینا جولی نے نااہلی کی درخواست دی تھی۔

عدالت نے اگرچہ جج کو نااہل قرار دیاہے، تاہم واضح طور پر بچوں کی حوالگی سے متعلق سنائے گئے فیصلے پر کوئی حکم نہیں دیا اور یہ واضح نہیں ہو سکا کہ نااہل قرار دیے گئے جج کی جانب سے سنایا گیا فیصلہ برقرار رہے گا یا نہیں؟

تاہم بعض ماہرین کا خیال ہے کہ بچوں کی حوالگی سے متعلق کیس کی دوبارہ سماعتیں ہوگی لیکن دوسری جانب براڈ پٹ کے وکلا کا کہنا ہے کہ جج کی نااہلی سے ان کی جانب سے سنائے گئے فیصلے پر کوئی فرق نہیں پڑے گا۔

خیال رہے کہ انجلینا جولی اور براڈ پٹ کے درمیان 2016 میں علیحدگی ہوگئی تھی، دونوں نے 2014 میں شادی کی تھی اور انہوں نے 6 بچوں کو مشترکہ طور پر گود لے رکھا تھا اور اب مذکورہ بچوں کی حوالگی کا کیس بھی زیر سماعت ہے۔

دونوں کے 6 بچوں میں سے سب سے بڑے بچے میڈوکس کی عمر 19 برس، دوسرے بچے پاکس کی عمر 17 برس، زہرا کی عمر 16 برس، شلوح کی عمر 14 برس جب کہ جڑواں بچوں ناکس اور ووینے کی عمر 12 برس ہے۔

دونوں کی جانب سے گود لیے بچے غریب اور افریقی ممالک سے تعلق رکھتے ہیں۔

انجلینا جولی اور براڈ پٹ نے 10 سال تک شادی کے بغیر ایک دوسرے سے تعلقات رکھے تھے، جس کے بعد دونوں نے 2014 میں شادی کی تھی مگر دو سال بعد دونوں الگ ہوگئے تھے۔

جس کے بعد دونوں نے طلاق کے لیے بھی عدالت سے رجوع کیا تھا لیکن مکمل طور پر ان کی طلاق کے معاملات تاحال حل نہیں ہوسکے جبکہ عدالت نے دونوں کو ایک ضمنی فیصلے میں ’طلاق یافتہ‘ قرار دے رکھا ہے۔