Category شوبز

لندن میں افغان مظاہرین نے پاکستان ہائی کمیشن پر حملہ کردیا۔

لندن میں افغان مظاہرین نے ہائی کمیشن کے باہر ہنگامہ آرائی کی اور ہائی کمیشن آنے والے پاکستانیوں کو زدو کوب کیا۔

افغان مظاہرین نے واقعے کی کوریج کرنے والے جیو نیوز کے رپورٹر اور کیمرا مین کو بھی تشدد کا نشانہ بنایا۔

مظاہرین نے تشدد کے دوران کیمرا اور ریکارڈنگ کا سامان توڑ دیا۔ برطانوی پولیس نے موقع پر پہنچ کر صورتحال کو کنٹرول کیا۔

اداکارہ اقرا عزیز اور ہدایتکار و میزبان یاسر حسین کے ہاں بیٹے کی پیدائش ہوئی ہے۔

انسٹاگرام پر اقرا عزیز کے شوہر یاسر حسین کی جانب سے نومولود بیٹے کے ہاتھ کی ایک تصویر شیئر کرتے ہوئے مداحوں کو ننھے مہمان کی آمد کی اطلاع دی گئی۔

یاسر حسین نے اپنی پوسٹ میں لکھا کہ اللہ کے حکم سے ہم کبیر حسین کو خوش آمدید کہتے ہیں۔

یاسر کی پوسٹ پر مداحوں سمیت شوبز شخصیات کی جانب سے بڑے پیمانے پر مبارکباد کا سلسلہ جاری ہے۔

ہالی وڈ کی ایکشن، تھرل اور خطرناک مناظر سے بھرپور فلمی سیریز ‘فاسٹ اینڈ فیوریس’ میں اداکار ڈیوائن جانسن المعروف ’دی راک‘ مزید اداکاری کے جوہر نہیں دکھائیں گے۔

معروف ہالی وڈ اداکار ڈیوائن جانسن نے ‘فاسٹ اینڈ فیوریس ‘سیریز کی مزید فلموں میں اداکاری نہ کرنے کی تصدیق کردی ہے۔

اداکار 2011 سے اس سیریز کی فملوں میں کام کررہے تھے۔

افواہیں گردش کررہی تھیں کہ وین ڈیزل نے مبینہ طور پر فاسٹ اینڈ فیوریس سیریز میں ڈیوائن جانسن کی بہترین کارکردگی کا سہرا بھی اپنے سر باندھنے کی کوشش کی جس کی وجہ سے ان دونوں کے درمیان مبینہ جھگڑا ہوا جو ڈیوائن جانسن کا اس سیریز کی مزید فلموں میں کام کرنے سے انکار کی وجہ بنا ۔

اس پر بات کرتے ہوئے ڈیوائن جانسن کا کہنا تھا کہ ‘میں اس بات پر ہنسا اور بہت ہنسا میرے خیال سے اس پر سب کو ہی ہنسنا چاہیے، میں اُن کیلئے نیک خواہشات کا اظہار کرچکا ہوں’۔

انہوں نے مزید کہا کہ اس کے علاوہ میں فاسٹ اینڈ فیوریس 9 ، 10، 11 بلکہ میرے بغیر بننے والی اس سیریز کی تمام فلموں کیلئے نیک تمناؤں کا اظہار کرتا ہوں۔

ممبئی پولیس نے راج کندرا سے متعلق کیس میں ان کی اہلیہ اداکارہ شلپا شیٹی کو طلب نہ کرنے کا فیصلہ کیا ہے۔

بھارتی میڈیا رپورٹس کے مطابق عدالت نے فحش فلمیں بنانے کے کیس میں مرکزی ملزم راج کندرا کو 23 جولائی تک پولیس کی تحویل میں دیا تھا۔

بھارتی میڈیا کے مطابق شوہر کی گرفتاری کے بعد شلپا شیٹی کے حوالے سے بھی قیاس آرائیاں کی جارہی تھیں کہ اداکارہ کو جلد ہی طلب کیا جائے گا تاہم اب ممبئی پولیس نے واضح کیا کہ شلپا کو عدالت میں طلبی کا کوئی نوٹس جاری نہیں کیا جائے گا۔

پولیس کا کہنا ہےکہ راج کندرا کیس میں فی الحال شلپا شیٹی کا اب تک کوئی فعال کردار تلاش نہیں کیا جاسکا ہے البتہ اس حوالے سے مزید تحقیقات جاری ہیں۔

اس سے قبل پولیس نے ملزم راج کندرا کے گھر پر چھاپہ مار کر 70 سے زائد عریاں ویڈیوز سمیت سرور کو بھی ضبط کیا تھا۔

خیال رہے کہ 45 سالہ راج کندرا سمیت دیگر 11 لوگوں کو فحش فلمیں بنانے اور پھر موبائل ایپس پر پھیلانے کے الزام میں گرفتار کیا گیا ہے اور اس حوالے سے پولیس کا دعویٰ ہےکہ راج کندرا کم سے کم دو برس سے فحش فلموں کا کام کررہے تھے۔

کیا آپ جانتے ہیں معروف بھارتی موسیقار اور گلوکار اے آر رحمان نےکنگ آف پوپ مائیکل جیکسن سے ایک مرتبہ ملاقات کرنے سے کیوں انکار کردیا تھا ؟

بھارتی مداح 23 فروری ، 2009 کی صبح کوکبھی نہیں بھول سکتے جب موسیقار اے آر رحمان نے ڈائریکٹر ڈینی بوئل کی فلم’سلم ڈاگ ملینئر ‘کی موسیقی ترتیب دینے پر ایک نہیں بلکہ دو آسکر ایوارڈ اپنے نام کیے تھے۔

اے آر رحمان نے ایک مرتبہ آسکر ایوارڈ جیتنے کے فوراً بعد مائیکل جیکسن کے ساتھ ہونے والی یادگار ملاقات کو یاد کیا۔

اے آر رحمان کے مطابق انہوں نے اپنے ہالی وڈ ایجنٹ سیم شوارٹز سے مائیکل جیکسن سے ملاقات کی درخواست کی اور پوچھا کیا وہ مائیکل جیکسن سے ملاقات کا بندوبست کرسکتے ہیں؟

ایجنٹ نے اپنے دوست کی طرف دیکھا جس نے کہا کہ وہ مائیکل جیکسن کو اس حوالے سے ای میل بھیج سکتا ہے۔

تاہم کئی ہفتوں تک اے رحمان کو ان کے ایجنٹ سے اس کی درخواست کے بارے میں کچھ جواب نہ ملا۔

اے آر رحمان کا کہنا تھا کہ میں آسکر کی پروموشنز میں مصروف ہوگیا تھا اور یہ تسلیم کرچکا تھا کہ اب مائیکل سے کبھی ملاقات نہیں ہوسکے گی لیکن آسکر ایوارڈ کی تقریب سے 4 دن قبل مجھے بتایا گیا کہ مائیکل آپ سے ملنا چاہتے ہیں۔

میں اُس وقت آسکر ایوارڈ میں پرفارمنس کی تیاری میں مصروف تھا ، میں نے ایک لمحے کیلئے سوچا اور کہا ‘ اگر میں آسکر ایوارڈ جیت گیا تو مائیکل جیکسن سے ملاقات کرونگا ورنہ نہیں’ اور اگلے دن ایوارڈز جیتنے کے بعد ہی میں مائیکل جیکسن سے ملاقات کرنے گیا۔

اے آر رحمان کے مطابق مائیکل نے اُن کیلئے اپنے ہاتھوں سے گھر کا دروازہ کھولا اور انہوں نے تقریباً دو گھنٹوں تک آپس میں بات چیت کی۔ ’ہم دونوں نے میرے گانے ‘جے ہو ‘ پر تبادلہ خیال کیا پھر مائیکل جیکسن اچانک کھڑے ہوئے اور میرے لیے ڈانس بھی کیا۔‘

یاد رہے اے آر رحمان آسکر ایوارڈ جیتنے والے پہلے بھارتی موسیقار ہیں۔ فروری میں اے آر رحمان نے مائیکل سے ملاقات کی اور اسی سال 25 جون کو مائیکل جیکسن اس دنیا سے کوچ کرگئے۔

بالی وڈ اداکار شاہد کپور کی اہلیہ ‘میرا راجپوت’ سوشل میڈیا پر اپنی خوبصورت تصاویر اور اپنی ورزش کی ویڈیوز کی وجہ سے صارفین سے ہمیشہ ہی تعریفیں وصول کرتیں ہیں۔

جمعے کے روز میرا راجپوت نے اپنے انسٹاگرام اسٹوری پر ایک ویڈیو اپ لوڈ کی جس میں میرا کے ہونٹوں اور گالوں کو معمول سے زیادہ سوجا ہوا دیکھا جاسکتا ہے ، مداحوں کی جانب سے خیال کیا جارہا تھا کہ میرا نے اپنے ہونٹوں کی سرجری کروالی ہے۔

لیکن حقیقت یہ ہے کہ میرا نے اسنیپ چیٹ کا فلٹر ‘لپ فلرز ‘ کا استعمال کیا جس کی وجہ سے ان کے ہونٹوں کی ہیئت تبدیل ہوگئی۔ حقیقت سے انجان ان کے کچھ مداح اُن کی اس ویڈیو کو دیکھ کر اپنی ہنسی نہ روک پائے۔

میرا راجپوت نے اپنی ویڈیو میں ‘آپ جیسا کوئی میری زندگی میں آئے’ گانا لگایا ہوا تھا۔

بالی وڈ سپر اسٹار سلمان خان نے دبئی میں مبینہ بیوی اور 17 سالہ بیٹی کی موجودگی پر سخت ردعمل کا اظہار کیا ہے۔

سلمان خان اپنے بھائی اداکار ارباز خان کے ٹاک شو ‘پِنچ بائے ارباز خان سیزن 2’ کے مہمان بنے جس میں انہوں نے سوشل میڈیا پر ہونے والی تنقید اور افواہوں سے متعلق گفتگو کی۔

ارباز خان نے ایک مداح کا کمنٹ پڑھا جس میں سلمان خان کے حوالے سے لکھا تھا کہ کہاں چھپا بیٹھا ہے ڈرپوک، بھارت میں سب جانتے ہیں کہ تم دبئی میں اپنی بیوی نور اور 17 سالہ بیٹی کے ساتھ ہو، بھارت کے لوگوں کو کب تک بیوقوف بناؤ گے؟

اداکار خود سے متعلق اس قسم کے تبصرے کو سنتے ہی پہلے تو چونکے اور پوچھا کیا یہ میرے بارے میں بات ہورہی ہے؟ ارباز خان کے یقین دلانے پر سلمان خان نے شدید ردعمل کا اظہار کرتے ہوئے کہا کہ یہ سب بکواس ہے، مجھے نہیں معلوم یہ بات کس کے بارے میں کی جارہی ہے۔

سلمان خان نے کہا کہ میری کوئی بیوی نہیں ہے، میں 9 سال کی عمر سے گلیکسی اپارٹمنٹ میں رہ رہا ہوں، سارا بھارت جانتا ہے کہ میں کہاں رہتا ہوں، مجھے کسی قسم کی وضاحت دینے کی ضرورت نہیں ہے۔

عیدالاضحیٰ سے ایک روز قبل اسلام آباد میں سابق پاکستانی سفیر کی بیٹی کے قتل اور اس سے پہلے گزشتہ چند روز میں خواتین پر تشدد اور قتل کے واقعات سامنے آنے کے بعد شوبز شخصیات اور سوشل میڈیا صارفین کی جانب سےان ملزمان کو سخت سزائیں دینے کا مطالبہ کیا جارہا ہے۔

اداکار عثمان خالد بٹ نے لکھا کہ عثمان مرزا اور ان کے ساتھ جن پر بھتہ خوری، ہراسانی اور جنسی حملوں کے متعدد مقدمات درج ہیں، عمر خالد میمن، جس نے اپنی بیوی قرۃ العین پر تشدد کرکے اسے قتل کردیا، محمد رضا علی جس نے اپنی بیوی بشریٰ پر تشدد کرکے اسے قتل کیا اور بچوں کو زخمی کیا، طاہر جعفری جس نے نور مقدم کا ظالمانہ قتل کیا۔

انہوں نے مزید لکھا کہ یہ نام یاد رکھیں، ان کے احتساب اور انصاف کا مطالبہ کرتے رہیں، ان مجرموں کو اپنے جرائم کی سزا لازمی ملنی چاہیے۔

گلوکارہ میشا شفیع نے لکھا کہ ‘ایک اور دن، ایک اور عورت کو ظالمانہ طریقے سے قتل کردیا گیا ‘۔

انہوں نے مزید لکھا کہ ‘ایک اور ہیش ٹیگ، ایک اور صدمہ، ایک اور غیرحل شدہ کیا، ایک اور محرک، ایک اور خوف سے بھرپور تہوار، ایک اور عید، خواتین کے تحفظ کے بل کی مخالفت کرنے والوں کو مبارک ‘۔

ماہرہ خان نے نور کے قتل کو صنفی بنیادوں پر تشدد قرار دینے سے متعلق عائشہ فیاضی کے ٹوئٹس شیئر کیے اور لکھا کہ اسے پڑھیں۔

اداکار زاہد احمد نے لکھا کہ 3 روز میں 3 ہولناک ناانصافیاں، ہم کیا غلطی کررہے ہیں؟ ہم کہاں تبدیلیاں لارہے ہیں؟

اداکار سمیع خان نے لکھا کہ ہم سب کو کچھ کرنے کی ضرورت ہے اس سے قبل کہ بہت دیر ہوجائے۔

دوسری جانب سماجی رابطے کی ویب سائٹ ٹوئٹر پر ‘UsmanMirza’ کا ہیش ٹیگ بھی ٹرینڈ کررہا ہے اور سوشل میڈیا صارفین کی جانب سے اسلام آباد میں جوڑے کو ہراساں کرنے والے ملزم کو سخت سزا سنانے کا مطالبہ کیا جارہا ہے۔

ازما شمیم نے لکھا کہ انصاف میں تاخیر کرنا ناانصافی ہے۔

ایک اور صارف نے لکھا کہ ‘یہ ملک کیا بن رہا ہے، حملہ، ہراسانی، اغوا، تشدد، قتل، آخر کب تک’۔

ایک اور صارف نے نور مقدم کے قاتل کے خلاف مقدمے کا مطالبہ اور عثمان مرزا کیس میں پیش رفت سے متعلق دریافت کیا۔

واضح ریے کہ جولائی میں اسلام آباد پولیس نے سوشل میڈیا پر ایک خاتون اور ایک مرد کو تشدد کا نشانہ بنانے اور برہنہ کرنے کی ویڈیو وائرل ہونے کے بعد 4 ملزمان کو گرفتار کرلیا جس کے مرکزی ملزم کا نام عثمان مرزا ہے اور وہ ان دنوں جیل میں ہے۔

ممبئی: پولیس نے راج کندرا کے گھر سے سرور سمیت 70 سے زائد فحش فلمیں برآمد کرلیں۔

ٹائمز آف انڈیا میں شائع ہونے والی ایک رپورٹ کے مطابق ممبئی کرائم برانچ نے اداکارہ شلپا شیٹھی کے شوہر راج کندرا کے گھر پر چھاپہ مار کارروائی کرتے ہوئے ایک سرور اور 70 سے زائد فحش فلمیں برآمد کرنے کا دعویٰ کیا ہے۔

رپورٹ کے مطابق پولیس کا کہنا ہے کہ فحش فلمیں راج کندرا کے اسسٹنٹ امیش کمار کی جانب سے شوٹ کی گئی ہیں، سرور کو فرانزک کے عمل سے گزار کر معلوم کرنے کی کوشش کی جائے گی کہ آیا اس سرور سے فحش ویڈیوز اپلوڈ کر کے کن کن لوگوں کو بھیج گئیں۔
ممبئی کرائم برانچ نے نجی بینکوں سے رابطہ کر کے راج کندرا کے بینک کھاتوں کی تفصیلات بھی طلب کرلی ہیں۔ تاہم راج کندرا تفتیش میں پولیس سے تعاون نہیں کر رہے۔

ممبئی پولیس کمشنر نے فحش فلموں کے کیس میں راج کندرا کو اہم سازشی قرار دیا ہے۔ ان کا کہنا ہے کہ راج کندرا فحش فلموں کے تین واٹس ایپ گروپس کے ایڈمن ہیں۔

خیال رہے کہ 19 جولائی کو راج کندرا کو فحش فلمیں بنانے اور انہیں موبائل ایپس پر نشر کرنے کے الزام میں پہلے سے درج مقدمے میں گرفتار کرلیا گیا۔ پولیس نے گزشتہ ہفتے دو مختلف ایف آئی آرز میں 9 افراد کو حراست میں لیا تھا جو کہ مبینہ طور پر اداکاراؤں کو فحش فلموں میں برہنہ مناظر فلم بند کرانے کے لیے زبردستی کرتے تھے۔ ان فلموں کو پیڈ موبائل ایپلی کیشن پر اسٹریم کیا جاتا تھا۔

اداکارہ پونم پانڈے نے ممبئی ہائی کورٹ میں راج کندرا اور ان کے ساتھی کے خلاف کیس دائر کیا تھا جس میں اداکارہ نے مؤقف اختیار کیا کہ مذکورہ افراد نے ان کے ساتھ معاہدے کو معطل کرتے ہوئے ان کی ویڈیوز کوغیر قانونی طریقے سے استعمال کیا۔

پاکستانی فلموں اور ڈراموں کی مقبول اداکارہ صبا قمر نے مزاحیہ انداز میں اب تک شادی نہ کرنے کی وجہ بتادی۔

صبا قمر نے شادی نہ کرنے کی وجہ انسٹاگرام اسٹوری میں ایک میم شیئر کرتے ہوئے بتائی۔

اداکارہ کی جانب سے شیئر کی گئی اسٹوری میں لکھا تھا کہ ‘کوئی مجھ سے پوچھتا ہے کہ آپ اب تک سِنگل کیوں ہیں؟’۔

صبا قمر کے مطابق وہ اس سوال کا جواب دیتی ہیں کہ یہ چار دِن کی توجہ کے چکر میں روز روز کی ٹینشن مجھے نہیں چاہیے۔

اداکارہ صبا قمر کی مذکورہ انسٹاگرام اسٹوری سوشل میڈیا پر وائرل ہورہی ہے اور مداحوں کے مطابق شاید اداکارہ اسی وجہ سے اب تک غیرشادی شدہ ہیں۔

خیال رہے کہ اس سے قبل رواں برس مارچ میں اداکارہ صبا قمر کے حوالے سے خبریں گردش میں تھیں کہ وہ جلد عظیم خان نامی ایک کاروباری شخص سے شادی کرنے والی ہیں۔

اداکارہ نے خود بھی ایک انٹرویو میں تصدیق کی تھی کہ وہ عظیم خان سے شادی کرنے والی ہیں اور انہوں نے نے انسٹاگرام پر اپنی تصویر پوسٹ کی تھی، جس کے کیپشن میں انہوں نے لکھا تھا کہ ‘اگر کچھ ہونا ہوگا تو ہوجائے گا’۔

صبا قمر کی مذکورہ پوسٹ پر عظیم خان نے کمنٹ کیا تھا کہ ‘اس سال شادی کرلیتے ہیں؟ جس پر اداکارہ نے انہیں جواب دیا تھا کہ ’قبول ہے‘۔

بعدازاں اپریل میں صبا قمر نے اعلان کیا تھا کہ وہ عظیم خان سے شادی نہیں کررہی اور فوری طور پر شادی کرنے کا فیصلہ بعض ذاتی وجوہات اور مسائل کی بنا پر کیا ہے۔