Category شوبز

کم عمر لڑکیوں کے ریپ اور خواتین کے جنسی استحصال کے جرم میں 23 سال کی قید کاٹنے والے ہولی وڈ کے 69 سالہ پروڈیوسر ہاروی وائنسٹن نے لاس اینجلس میں 5 خواتین کے ریپ اور جنسی حملے کے الزامات کے دوسرے ٹرائل سے قبل اپنی بے گناہی ثابت کرنے کے لیے عدالت سے رجوع کرلیا۔

برطانوی خبررساں ادارے ‘رائٹرز’ کی رپورٹ کے مطابق ہاروی وائنسٹن گزشتہ روز لاس اینجلس کی اعلیٰ عدالت میں وہیل چیئر پر، براؤن رنگ کے قیدیوں کے لباس میں پہنچے۔

خیال رہے کہ مارچ 2020 میں 23 برس قید کی سزا سنائے جانے کے بعد ہاروی وائنسٹن پہلی مرتبہ عوامی منظرنامے پر نظر آئے۔

ہاروی وائنسٹن نے کسی کے ساتھ زبردستی جنسی تعلق رکھنے کے الزامات کی تردید کی ہے اور 2020 میں نیویارک میں سنائی گئی سزا اور قید کے خلاف اپیل کی ہے۔

ہاروی وائنسٹن پر لاس اینجلس میں 2004 سے 2013 تک ریپ اور جنسی حملوں کے مجموعی طور پر 11 الزامات عائد ہیں جن کے متاثرین کی تعداد 5 ہے۔

ہاروی وائنسٹن کے خلاف ترمیم شدہ شکایت میں الزام لگایا گیا ہے کہ انہوں نے ستمبر 2004 سے ستمبر 2005 کے درمیان بیورلی ہلز کے ایک ہوٹل میں ایک خاتون کا ریپ کیا اور بیورلی ہلز ہوٹل ہی میں نومبر 2009 سے نومبر 2010 کے دوران ایک اور خاتون کا دو مرتبہ ریپ کیا۔

اگر ہاروی وائنسٹن کو ان الزامات پر سزا ہوئی تو ہوسکتا ہے کہ وہ اپنی باقی زندگی جیل می گزاریں۔

ہاروی وائنسٹن کے وکیل نے کہا کہ ان الزامات کے کوئی فرانزک شواہد یا قابل اعتبار گواہان موجود نہیں ہیں۔

مارک ورکس میں نے عدالت کے باہر صحافیوں سے گفتگو کرتے ہوئے کہا کہ یہ الزامات بے بنیاد ہیں، ہمیں یقین ہے کہ اگر اس کیس میں شفاف ٹرائل ہوا تو ہاروی وائنسٹن بری ہوجائیں گے۔

گزشتہ روز اپنے اٹارنی کے ذریعے درخواست دائر کرنے کے بعد ہاروی وائنسٹن کو 29 جولائی کو ہونی والی اگلی سماعت تک جیل میں رہنے کا حکم دیا گیا ہے۔

خیال رہے کہ ہاروی وائنسٹن پر سب سے پہلے اکتوبر 2017 میں 3 درجن خواتین نے جنسی ہراسانی، استحصال، فحش حرکتیں کرنے کے مطالبات اور بلیک میلنگ جیسے الزامات لگائے تھے جس کے بعد دنیا بھر میں ‘می ٹو’ مہم کا آغاز ہوا تھا۔

بعد ازاں ہاروی وائنسٹن کے خلاف رفتہ رفتہ دیگر خواتین اور اداکارائیں بھی سامنے آئیں اور مجموعی طور پر ان پر 100 کے قریب خواتین نے ریپ اور جنسی تشدد کے الزامات لگائے تھے۔

ہاروی وائنسٹن پر الزامات لگانے والی خواتین میں معروف اداکارائیں بھی شامل تھیں جب کہ ان پر متعدد ایسی خواتین نے بھی الزامات لگائے جو نشانہ بنتے وقت نابالغ تھیں، جس کے بعد ان کے خلاف امریکا کی مختلف ریاستوں کی عدالتوں میں سول اور فوجداری مقدمات دائر کیے گئے تھے۔

ابھی تک ہاروی وائنسٹن کو صرف ایک ہی کیس میں امریکی ریاست نیویارک کی عدالت نے جیل بھیجا ہے، جبکہ ان کے خلاف لاس اینجلس سمیت متعدد شہروں کی عدالت میں انتہائی سنگین نوعیت کے مقدمات زیر التوا ہیں۔

علاوہ ازیں ہاروی وائنسٹن کو درجنوں سول مقدمات کا بھی سامنا ہے، جن میں خواتین نے ان کے خلاف ہرجانے کے دعوے دائر کر رکھے ہیں اور انہوں نے مذکورہ خواتین کو رواں ماہ نئے ساڑھے 3 کروڑ ڈالر کے تصفیے کی پیش کش بھی کر رکھی ہے۔

اس سے قبل ہاروی وائنسٹن نے متعدد خواتین کے ساتھ ایک کروڑ 90 لاکھ ڈالر میں تصفیہ طے کیا تھا مگر عدالت نے ایک خاتون کی شکایت پر ان کے تصفیے کو مسترد کردیا تھا، جس کے بعد انہوں نے خواتین کو اضافی رقم والے تصفیے کی پیش کش کی تھی۔

ریپ اور خواتین کے جنسی استحصال کے الزامات میں آسکر اکیڈمی نے بھی ہاروی وائنسٹن کی رکنیت ختم کر رکھی ہے، جب کہ دیگر کئی فلمی تنظیموں نے بھی ان کے خلاف کارروائی کر رکھی ہے۔

بالی ووڈ اداکارہ فاطمہ ثنا شیخ کے مداح ان سے سوال کر رہے ہیں کہ وہ کب اداکار عامر خان سے شادی کریں گی؟

رواں ماہ بھارتی اداکار عامر خان اور ان کی اہلیہ کرن راؤ میں شادی کے 15 سال بعد علیحدگی ہوگئی۔ طلاق کے بعد بھارت میں ٹویٹر پر عامر خان اور فاطمہ ثنا شیخ کا نام ٹرینڈ کرنے لگا تھا۔ صارفین طلاق کی وجہ عامر خان کے فاطمہ ثنا شیخ سے قریبی تعلقات کو قرار دے رہے تھے۔

اداکارہ فاطمہ ثنا شیخ سوشل میڈیا پر کافی متحرک ہیں۔ دو روز قبل جب اداکارہ نے انسٹاگرام اکاؤنٹ پر اپنی تصاویر شیئر کیں تو مداحوں نے یہاں بھی عامر خان کا ذکر چھیڑ دیا۔ تصاویر پوسٹ ہوتے ہی ان پر کمنٹس آنا شروع ہوگئے جس میں مداحوں نے ایک ہی سوال کیا کہ وہ عامر خان سے کب شادی کر رہی ہیں؟

ایک مداح نے تصاویر پر تبصرے میں لکھا ’سجنا ہے مجھے سجنا (عامر خان) کے لیے‘۔ دوسرے مداح نے لکھا کہ وہ عامر خان اور فاطمہ ثنا کی شادی کے انتظار میں ہیں۔

یاد رہے کہ اداکارہ نے اپنے بالی ووڈ کے سفر کا آغاز 2016ء میں عامر خان کے ساتھ فلم ’دنگل‘ سے کیا۔

بھارتی ریاست مغربی بنگال کی 17 سالہ لڑکی کو بالی وڈ سپر اسٹار شاہ رخ خان سے ملاقات کا جھانسہ دیکر ممبئی اسمگل کیا جارہا تھا جسے ممبئی پولیس نے بر وقت کارروائی کرتے ہوئے بازیاب کرا لیا۔

رپورٹس کے مطابق لڑکی شاہ رخ خان کی مداح تھی اور اپنے پسندیدہ اداکار سے ملنا چاہتی تھی۔

پولیس کی جانب سے بازیاب کرائے جانے کے بعد لڑکی کو ایک شیلٹر ہوم بھیج دیا گیا ہے جبکہ ملزم کو گرفتار کرلیا گیا ہے جس کی شناخت سبحان شیخ کے نام سے ہوئی ہے۔

رپورٹس کے مطابق لڑکی 12ہویں جماعت کی طالبہ ہے، اس نے فیس بک کے ذریعےملزم سے دوستی کی جس نے لڑکی سے جھوٹ بولا اور خود کو ایک ایونٹ منیجر ظاہر کیا۔

15 جولائی کو ملزم پالشیپارہ پہنچا اور لڑکی کو اس کی کوچنگ کلاس سے لیا اور کولکتہ لے گیا،جہاں سے وہ ہوورا سے لڑکی کو ممبئی لے کر جا رہاتھا۔

ادھر لڑکی کے والدین نے پولیس اسٹیشن میں گمشدگی کی شکایت درج کروا دی تھی جس کے بعد پولیس حرکت میں آئی اور لڑکی کی تصویر ہر جگہ شیئر کردی اور تمام ریلوے اسٹیشنوں کو الرٹ کردیا گیا تاہم اتوار کے روز لڑکی کو ہوورا جنکشن سے ٹرین میں سی سی ٹی وی کیمرے کی مدد سے پہچانا گیا۔

اس کے بعد لڑکی کو پولیس نے اپنی تحویل میں لے لیا اورملزم کو گرفتار کرلیا۔

بھارتی اداکار رندیپ ہودا نے سینیئر اداکار نصیرالدین شاہ کو ان کی 71ویں سالگرہ کے موقع پر مبارکباد پیش کی ہے۔

انسٹاگرام کی ایک پوسٹ میں اداکار نے نصیرالدین کے ہمراہ ایک فلم کے دوران لی گئی تصویر پوسٹ کرتے ہوئے کہا کہ انہیں معلوم نہیں اگر وہ نصیرالدین شاہ سے نہیں ملتے تو اس وقت کہاں ہوتے۔

اداکار کا مزید کہنا تھا کہ نصیرالدین شاہ نے کئی اداکاروں کو بڑے خواب دیکھنے کی تاکید کی ہے اور وہ نصیرالدین کی مستقبل میں مزید سالگرہ دیکھنے کیلئے دعا گو بھی ہیں۔

اس کے علاوہ رندیپ ہودا فی الحال اپنی پہلی ویب سیریز کی شوٹنگ میں مصروف ہیں جس میں انہیں پولیس انسپکٹر کا کردار ادا کرتے ہوئے ایکشن میں دیکھا جائے گا۔

یاد رہے کہ گذشتہ دنوں اداکارنصیرالدین شاہ کو نمونیہ کی تشخیص ہونے پر اسپتال منتقل کردیا گیا تھا وہ جہاں طبی نگرانی میں رہنے کے بعد 7 جولائی کو ڈسچارج ہوکر واپس گھر چلے گئے تھے۔

اداکار رندیپ ہودا نے اپنے فلمی کیریئر کا آغاز 2001 میں ’مون سون ویڈنگ‘ نامی فلم سے کیا تھا جس میں سینیئر اداکار نصیرالدین شاہ نے بھی اہم کردار ادا کیا تھا۔

کراچی: معروف کامیڈین اور اداکار عمرشریف نےجائیداد تیسری بیوی کو منتقلی کے خلاف سندھ ہائیکورٹ سے رجوع کرلیا۔

خیال رہے کہ کامیڈین اداکار طویل مدت سے علیل ہیں اور انہیں ہائی کورٹ بھی وہیل چیئر کے ذریعے لایا گیا تھا۔

عمر شریف کے وکیل کے مطابق اُن کے مؤکل نے 2016 میں بینک سے قرضہ لے کر عسکری فور میں اپارٹمنٹ خریدا تھا۔

وکیل کے مطابق عمر شریف شدید علیل ہیں، انہیں بھولنے کی بیماری ہوگئی ہے، علالت کے دوران تیسری بیوی زرین غزل نے دسمبر 2020 میں خوفزدہ کرکے اپارٹمنٹ اپنے نام کرالیا۔

وکیل نے بتایا کہ عمر شریف کو خدشہ ہے کہ اب گیارہ کروڑ روپے کا اپارٹمنٹ زرین غزل فروخت کرنا چاہتی ہیں لہٰذا اہلیہ کی جانب سے بنائی گئی گفٹ ڈیڈ کو کالعدم قرار دیا جائے ۔

سماعت کے بعد عدالت نے فلیٹ کی فروخت روکنے کا حکم دیتے ہوئے فریقین کو نوٹس جاری کردیے۔

اس حوالے سے اسٹیج اداکارہ زریں غزل کو کوئی ردعمل سامنے نہیں آیا ہے۔

ممبئی: بالی وڈ اداکار کارتک آریان خبروں میں رہنے کا فن بخوبی جانتے ہیں، کبھی یہ خود خبر بن جاتے ہیں تو کبھی خبر خود چل کر ان کے پاس آتی ہے۔

تین ماہ قبل ہی انہیں دھرما پروڈکشن کے بینر تلے بننے والی فلم ’دوستانہ 2‘ میں غیر پیشہ ورانہ رویے کی وجہ سے فلم کی کاسٹ سے باہر نکال دیا گیا تھا۔تو دوسری جانب انہوں نے گزشتہ ماہ فلم Freddy کے اسکرپٹ میں تبدیلی کا مطالبہ کردیا، لیکن ہدایت کار نے ان کی فرمائش کو پورا کرنے سے انکار کردیا۔ جس پر کارتک آریان نے معاوضے کے طور پر لیے گئے دو کروڑ روپے واپس کر دیے تھے۔

ایک ہفتے قبل ہی کارتک نے شادی کے لیے ’ دیپیکا پاڈوکون ‘ جیسی لڑکی کا مطالبہ کردیا۔ اب ان کے خبروں میں آنے کی وجہ مشہور ہدایت کار سنجے لیلا بھنسالی کی فلم’ بیجو باورا‘ ہے۔ اطلاعات کے مطابق رنبیر کپور کی مصروفیات کو دیکھتے ہوئے سنجے لیلا بھنسالی ان کی جگہ کسی دوسرے ہیرو کو مرکزی کردار کے لیے کاسٹ کرنے کے لیے پر تول رہے ہیں اور ممکنہ طور پر وہ رنبیر کی جگہ کارتک آریان کو اس کردار کے لیے کاسٹ کرنا چاہ رہے ہیں۔

فلم ’بیجو باورا‘ میں عالیہ بھٹ، دیپیکا پاڈوکون اور اجے دیوگن جیسے اے کلاس اداکار شامل ہیں اور اس میں رنبیر کپور ایک نیا اضافہ تھے تاہم رنبیر کپور کو بھنسالی اور ان کی ٹیم سے کچھ تحفظات ہیں۔ کیوں کہ 2007 میں سنجے لیلی بھنسالی کے ساتھ فلم ’ساوریا‘ سے اپنا فلمی کیرئیر شروع کرنے والے رنبیر کپور کا سنجے اور ان کی ٹیم کے ساتھ کام کرنے کا تجربہ اچھا نہیں رہا تھا اور اس کے بعد سے انہوں نے سنجے لیلا بھنسالی کے ساتھ کوئی فلم نہیں کی ہے۔

تاہم سنجے لیلا بھنسالی نے ابھی تک رنبیر کی جگہ کارتک کو کاسٹ کرنے کی خبروں کی تصدیق یا تردید نہیں کی ہے۔ حال ہی میں کارتک نے میوزیکل لو ساگا ’ ستیا نارائن کی کتھا‘ کی کاسٹ میں شامل ہونے کا اعلان کیا تھا۔ جس میں شردھا کپور ان کے مقابل ہیروئن کا کردار ادا کر رہی ہیں۔

مشہور امریکی گلوکارہ برٹنی اسپیئرز نے اوپر تلے دو انسٹاگرام پوسٹس میں اپنے والد اور بہن پر کڑی تنقید کرتے ہوئے کہا ہے کہ ان دونوں نے ’’میرے خوابوں کا خون کردیا ہے۔‘‘

واضح رہے کہ 2008 میں برٹنی اسپیئرز کے شدید ڈپریشن میں مبتلا ہونے کے بعد سے عدالتی حکم پر ان کی نجی زندگی اور مالی امور سے متعلق تمام فیصلوں کا اختیار ان کے والد کو سونپا جاچکا ہے جبکہ ان کی جائیداد کی ذمہ داری ان کی بہن کے سپرد ہے۔

والد اور بہن کے اس کنٹرول کے خلاف برٹنی اسپیئرز کے ایک مقدمے کا فیصلہ سناتے ہوئے گزشتہ بدھ کے روز امریکی عدالت نے انہیں اجازت دی کہ وہ اپنی مرضی سے وکیل مقرر کرسکتی ہیں۔

مقدمے کی سماعت میں برٹنی نے اپنے والد جیمی اسپیئرز کی سرپرستی کو ’’ظلم‘‘ قرار دیتے ہوئے کہا تھا کہ انہیں اپنی زندگی واپس چاہیے۔

برٹنی نے جون میں ایک عدالتی سماعت کے دوران ویڈیو لنک کے ذریعے بیان دیتے ہوئے کہا تھا کہ ان کے والد کو ان کی زندگی کا کنٹرول سنبھالے ہوئے 13 سال ہوچکے ہیں اور یہ ایک طویل عرصہ ہے۔

برٹنی کا کہنا تھا کہ وہ تب تک اسٹیج پر اپنے فن کا مظاہرہ نہیں کریں گی کہ جب تک ان کے والد ان کے پہننے، بولنے، کرنے اور سوچنے کے معاملات پر قابض رہیں گے۔

بدھ کے روز ہونے والے فیصلے پر برٹنی اسپیئرز کے مداحوں میں خوشی کی لہر دوڑ گئی ہے جو کچھ سال پہلے سوشل میڈیا پر ’’فری برٹنی‘‘ کے نام سے مہم بھی چلاتے رہے ہیں۔

سالانہ کروڑوں ڈالر کمانے والی 39 سالہ برٹنی اسپیئرز کے اثاثے حیرت انگیز طور پر صرف چھ کروڑ ڈالر ہیں۔

اس بارے میں بعض ذرائع کا کہنا ہے کہ ان کی آمدنی کا بڑا حصہ وکیلوں اور باڈی گارڈز کے معاوضوں کے علاوہ ان کی شاندار رہائش گاہ پر خرچ ہوتا ہے، جس کا مکمل کنٹرول ان کے والد اور بہن کے پاس ہے۔

بالی وڈ کی سینیئر اداکار ہ اور رشی کپور کی اہلیہ نیتو سنگھ حال ہی میں کیمرا مین کی آواز سن کر اس کی تعریف کیے بغیر نہ رہ سکیں۔

بھارتی میڈیا کے مطابق نیتو سنگھ اپنی مصروفیات ختم کر کے اپنی گاڑی کی طرف جارہی تھیں کہ بہت سے فوٹوگرافرز نے انہیں گھیر لیا اور تصاویر بنانے کیلئے آوازیں دینے لگے۔

اسی دوران ایک کیمرا مین کی آواز سن کر اداکارہ نے کیمرا مین سے کہا کہ ‘ شکل تو دکھا دو ،آپکی آواز بہت اچھی ہے۔‘ اور پھر اپنی کار میں داخل ہوگئیں۔

بالی وڈ اداکارہ کاجول کی بہن و اداکارہ تنیشا مکھرجی نے 43 سال عمر ہونے کے باوجود شادی نہ کرنے کی وجہ بتادی۔

بھارتی ٹی وی کے شو میں گفتگو کرتے ہوئے تنیشا کا کہنا تھا کہ میری خوش قسمتی ہے کہ مجھے اچھا خاندان ملا اور میری خوشگوار زندگی میں گھر والوں کا اہم کردار ہے۔

انہوں نے بتایا کہ گھر والوں نے مجھ پر شادی کیلئے کبھی دباؤ نہیں ڈالا جس پر خوشی محسوس ہوتی ہے۔

شادی کے حوالے سے تنیشا نے مزید بتایا کہ 43 سالہ ہونے کے باوجود فی الحال شادی کا کوئی ارادہ نہیں۔

اداکارہ کا کہنا تھا کہ والدہ اور دادی ہمیشہ تاکید کرتی ہیں کہ زندگی بہت مختصر ہوتی ہے اس لیے اپنی زندگی کا ہر لمحہ خوشی سے گزارنا چاہیے۔

خیال رہے کہ بھارتی رئیلٹی شو ’بگ باس‘ کے ساتویں سیزن میں تنیشا مکھرجی اور ارمان کوہلی نے ایک ساتھ شرکت کی تھی اور دونوں کے درمیان قربتیں بھی بڑھ گئیں تھیں تاہم یہ دوستی پروان نہیں چڑھ سکی تھی۔

واضح رہے کہ اداکارہ تنیشا مکھرجی نے کیریئر کا آغاز 2003 میں کیا اور وہ متعدد فلموں میں اداکاری کے جوہر دکھا چکی ہیں اور کئی ٹی وی شوز میں بھی نظر آچکی ہیں۔

بولی وڈ اداکارہ کرشمہ کپور نے انکشاف کیا ہے کہ کئی اداکاراؤں نے مادھوری ڈکشت کی وجہ سے ’دل تو پاگل ہے’ میں کام کرنے سے انکار کردیا تھا۔

کرشمہ کپور نے مزید بتایا کہ ان کی والدہ، سابق اداکارہ ببیتہ کپور نے یہ کردار ادا کرنے کے لیے ان کی حوصلہ افزائی کی تھی۔

بولی وڈ اداکارہ کرشمہ آج ریئلٹی شو انڈین آئیڈل 12 میں بطور مہمانِ خصوصی شریک ہوں گی اور اس قسط میں شو کے ٹاپ 6 اُمیدوار کرشمہ کپور کی فلموں کے گانے گائیں گے۔

ہندوستان ٹائمز کی رپورٹ میں ریئلٹی شو انڈین آئیڈل کا ایک پرومو شیئر کیا گیا ہے جس میں کرشمہ کپور فلم ’دل تو پاگل ہے’ سے متعلق گفتگو کرتی ہوئی نظر آرہی ہیں۔

کرشمہ کپور نے بتایا کہ ہر ہیروئن نے فلم ’دل تو پاگل ہے‘ میں کام کرنے سے منع کر دیا تھا کیونکہ یہ ایک ڈانس فلم تھی اور اس میں مادھوری ڈکشت کے مدمقابل ڈانس کرنا تھا تو سب نے یہی کہہ کر منع کیا کہ ’نہیں، ہم مادھوری ڈکشت جی کے ساتھ کیسے ڈانس کرسکتے ہیں‘۔

بولی وڈ اداکارہ نے بتایا کہ ’جب مجھے اس کردار کی پیشکش ہوئی تو ابتدائی طور پر میں نے بھی انکار کردیا تھا کیونکہ یہ ایک ڈانس فلم تھی اور اس میں مادھوری کے ساتھ ڈانس کمپیٹیشن تھا تو میں نے کہا تھا یہ تو نہیں ہوسکتا‘۔

انہوں نے کہا کہ ’پھر آخرکار یش چوپڑا اور ادیتیا چوپڑا نے مجھے فلم کی کہانی بتائی اور میری والدہ نے بھی بہت حوصلہ افزائی کی تو میں نے یہ رول لے لیا تھا‘۔

کرشمہ کپور نے کہا کہ ’میری والدہ نے کہا تھا کہ ’تمہیں یہ چیلنج لینا چاہیے، تم مادھوری ڈکشت کی بڑی مداح ہو، تمہیں یہ رول لازمی کرنا چاہیے، تم محنت کرو کامیابی ملے گی’۔

خیال رہے کہ فلم ’دل تو پاگل ہے’، 1997 میں ریلیز ہوئی تھی جس میں شاہ رخ خان، مادھوری ڈکشت اور کرشمہ کپور نے مرکزی کردار ادا کیے تھے۔

یہ فلم سپر ہٹ ہوئی تھی اور ’دل تو پاگل ہے’ نے بعدازاں مختلف کیٹیگریز میں کئی ایوارڈز بھی حاصل کیے تھے۔

رواں برس 21 جون کو کرشمہ کپور کو بولی وڈ فلم انڈسٹری میں 30 برس مکمل ہوئے ہیں، جب ان کی پہلی فلم ’پریم قیدی‘ ریلیز ہوئی تھی۔

رواں ماہ کے آغاز میں کرشمہ کپور نے ایک ویڈیو شیئر کی تھی جو 90 کی دہائی کی ان کی مقبول فلموں کے مجموعے پر مشتمل تھی۔

کرشمہ کپور کو گزشتہ برس ڈیبیو ویب سیریز ’مینٹل ہوڈ‘ میں دیکھا گیا تھا۔