Category شوبز

بھارت کی نامور گلوکارہ شریا گھوشال ماں بن گئیں۔

گلوکارہ کے ہاں پہلے بچے کی ولادت ہے اور انہوں نے مارچ میں حاملہ ہونے سے متعلق آگاہ کیا تھا۔

اب گلوکارہ نے خود ٹوئٹ کرکے مداحوں کو بیٹے کی ولادت کا بتایا اور کہا کہ بیٹے کی ولادت پرپورا خاندان خوش ہے۔

انہوں نے نیک تمناؤں کا اظہار کرنے پر مداحوں کا شکریہ بھی ادا کیا۔ خیال رہے کہ شریا اور شلادتیا کی شادی 2015 میں ہوئی تھی۔

شریا نے کئی سپر ہٹ گانے گئے ہیں اور اِس وقت زیادہ معاوضہ لینے والی گلوکارہ ہیں۔

بالی وڈ اداکارہ کنگا رناوت کے ذاتی محافظ پر بیوٹیشن سے زیادتی کا مقدمہ درج کرلیا گیا۔

بھارتی میڈیا رپورٹس کے مطابق کنگا کے ذاتی محافظ کمار ہیگڑے پر ممبئی کی مقامی بیوٹیشن نے زیادتی اور دھوکہ دہی کا مقدمہ درج کرایا ہے۔

خاتون کے مطابق کمار نے شادی کا جھانسہ دیکر متعدد بار زیادتی کا نشانہ بنایا اور پھر اپنے وعدے سے مکر گیا۔

خاتون نے بتایا کہ کمار نے ایک سال قبل شادی کی پیشکش کی جس کے بعد وہ زبردستی زیادتی کا نشانہ بناتا رہا تاہم گزشتہ دنوں والدہ کے انتقال کا جھوٹ بول کر غائب ہوگیا۔

ممبئی پولیس نے مقدمہ درج کرکے معاملے کی چھان بین شروع کردی ہے۔

دوسری جانب اداکارہ کنگنا رناوت کی ٹیم کا کہنا ہے کہ کمار لمبے عرصے سے چھٹی پر ہے اور اس معاملے کا انہیں علم نہیں.

بھارتی میوزک رئیلٹی شو ’انڈین آئیڈل‘ کی حقیقت کا بھانڈہ پھوٹنے کے بعد اب شو کے پہلے سیزن کے کامیاب گلوکار ابھیجیت ساونت نے بھی بڑے انکشافات کیے ہیں۔

اپنے ایک انٹرویو میں ابھیجیت ساونت کا کہنا تھاکہ ان دنوں شو کے منتظمین کو صلاحیتیوں پر نہیں بلکہ غربت اور جوتے پالش کرنے والی کہانیوں میں دلچسپی ہے۔

انہوں نے کہا کہ علاقائی سطح پر ہونے والے رئیلٹی شوز انڈین آئیڈل سے بہتر ہیں جہاں دیکھنے والوں کو گلوکاروں کے بیک گراؤنڈ کا نہیں پتا ہوتا بس ان کی توجہ اور دلچسپی گلوکاری پر ہوتی ہے۔

ابھیجیت کا کہنا تھا کہ علاقائی شوز کے برعکس ہندی شوز میں صرف امیدواروں کی دکھ بھری کہانیوں اور حالات کو دکھا کر ریٹنگ لی جاتی ہے اور اس صورتحال کیلئے انتظامیہ ہی نہیں شو دیکھنے والے ناظرین بھی ذمہ دار ہیں۔

انہوں نے ایک واقعے کا ذکر کرتے ہوئے بتایا کہ جب میں شو میں شریک تھا تو گانا بھول گیا تھا جس پر ججز نے مجھے دوبارہ گانے کا موقع دیا لیکن ابھی ایسا ہوتا تو اس منظر کو بڑے ڈرامائی انداز میں دکھایا جاتا اور اس کی وجہ بھی ناظرین ہی ہیں کیونکہ وہ ہمیشہ مصالحے کی تلاش میں رہتے ہیں۔

گزشتہ دنوں بھارت کے مشہور میوزک شو ’انیڈین آئیڈل‘ کا بھانڈا پھوٹ گیا تھا اور معروف گلوکار کشور کمار کے بیٹے امیت کمار نے شو کا بھانڈا پھوڑتے ہوئے بتایا تھا کہ میں نے وہی کیا جو شو کے منتظمین نے مجھ سے کہا تھا، مجھے کہا گیا کہ شو شریک سب گانے والوں کی تعریف کرنی ہے۔

برطانوی نژاد پاکستانی اداکارہ ارمینا خان اور ان کے شوہر کی جانب سے عوامی خدمات کیے جانے پر انہیں برطانیہ کی مقامی حکومت نے ایوارڈ سے نواز دیا۔

ارمینا خان کی پیدائش اور پرورش برطانیہ میں ہی ہوئی اور انہوں نے پاکستانی شوبز انڈسٹری میں کام سے قبل برطانیہ میں ہی کام کیا تھا۔

ارمینا خان اپنی زندگی کا زیادہ وقت برطانیہ میں ہی گزارتی ہیں، تاہم شوبز منصوبوں کے سلسلے میں وہ پاکستان بھی آتی رہتی ہیں۔

برطانیہ میں رہائش کی وجہ سے وہ وہاں سماجی مسائل سمیت ہر طرح کی عوامی خدمات کے لیے متحرک دکھائی دیتی ہیں، وہ جہاں سوشل میڈیا پر برطانیہ کے اندرونی سماجی مسائل پر بات کرتی رہتی ہیں، وہیں وہ پاکستان سمیت دنیا بھر کے مسائل کو بھی اپنا موضوع بناتی ہیں۔

برطانیہ میں عوامی خدمات اور لوگوں میں شعور بیدا کرنے کے عوض ہی انہیں اور ان کے شوہر فیصل خان کو برطانوی ریاست انگلیڈ کی کاؤنٹی لنکاشائر کے ٹاؤن برنلے کے میئر نے ایوارڈ سے نوازا۔

ارمینا خان نے برنلے ٹاؤن کے پاکستانی نژاد میئر اور ہاؤس آف لارڈز کے رکن واجد خان اور ان کی اہلیہ انعم خان سے ملاقات سمیت ان کی جانب سے ایوارڈ وصولی کی تصاویر شیئر کرتے ہوئے مداحوں کو بتایا کہ انہیں ان کی عوامی خدمات کے عوض ایوارڈ سے نوازا گیا۔

ارمینا خان نے 21 مئی کو برنلے کے میئر اور ان کی اہلیہ سے شوہر کے ساتھ ملاقات کی تصاویر شیئر کیں اور بعد ازاں انہوں نے دوسری پوسٹ میں خود کو ایوارڈ دیے جانے کی تصویر بھی شیئر کی۔

عوامی خدمات کے اعتراف پر ایوارڈ دیے جانے پر ارمینا خان نے برنلے کے میئر کا شکریہ ادا کیا جب کہ متعدد شوبز شخصیات نے اداکارہ کو مبارک باد بھی پیش کی۔

میئر نے ارمینا خان کے شوہر فیصل خان کو بھی ایوارڈ سے نوازا اور انہوں نے بھی ایوارڈ وصولی کی تصویر شیئر کرتے ہوئے پاکستانی نژاد میئر کی تعریف کی اور ساتھ ہی برنلے اور لنکا شائر کاؤنٹی کے افرد سے گزارش کی کہ وہ میئر کا ساتھ دیں۔

لاہور: ٹک ٹاک اسٹار جنت مرزا نے اپنی ’بات پکی‘ ہونے کے حوالے سے پردہ اٹھا دیا ان کا کہنا ہے کہ میری ابھی منگنی نہیں ہوئی۔

پاکستان میں سب سے زیادہ فالو کی جانے والی ٹک ٹاک اسٹار اور اداکارہ جنت مرزا نے اپنی ’بات پکی‘ ہونے کی خبروں کی تردید انسٹاگرام اسٹوری کے ذریعے کی۔ جنت نے اپنے قریبی دوست اور ٹک ٹاک اسٹار عمر بٹ کے ساتھ تصویر شیئر کی جس پر انہوں نے لکھا کہ ‘ہماری منگنی نہیں ہوئی‘۔

ان کا کہنا تھا کہ ’جب بھی میری منگنی ہوگی مداحوں کو ضرور بتاوں گی، فی الحال ایسا کچھ نہیں ہے‘۔ ٹک ٹاکر عمر بٹ نے بھی اس حوالے سے وضاحت دی اور اسٹوری کے ذریعے بتایا کہ ایسا کچھ نہیں ہے،میری جنت مرزا کے ساتھ منگنی کی خبروں میں کوئی صداقت نہیں ہے۔

واضح رہے کہ گزشتہ روز پاکستانی سوشل میڈیا پر جنت مرزا کی ٹک ٹاکر عمر بٹ کے ساتھ بات پکی ہونے کی خبر وائرل ہوئی تھی۔

سوشل میڈیا پر جہاں فنکاروں کی جانب سے فلسطینیوں کے حق میں اٹھائی جانے والی آوازوں کو سراہا گیا وہیں لوگوں کی بڑی تعداد نے صرف اس بات پر فوکس کیا کہ ماہرہ خان احتجاج میں بغیر دوپٹے کے شریک ہوئی ہیں۔ اور لوگوں نے ان پر تنقید کرنی شروع کردی۔

سوشل میڈیا پر لوگوں نے ماہرہ خان کی احتجاج میں شرکت کی تصاویر اور ویڈیوز پر تنقیدی تبصرے کرتے ہوئے کہا ’’آپ مسلمان ہیں آپ کا دوپٹہ کہاں ہے؟‘‘ جب کہ کچھ لوگوں نے کہا کہ دوپٹہ نہ لینے سے تمہاری پکڑ ہوگی۔

سوشل میڈیا پر جب تنقید حدسے بڑھ گئی تو یاسر حسین اور اداکار احمد علی بٹ نے ماہرہ خان کی حمایت میں آواز اٹھائی اور تنقید نگاروں کو جواب دیا ’’جن لوگوں کو دوپٹہ نظر نہیں آیا، ان کو عقل کہاں سے نظر آئے گی، شرم اپنی نظروں میں ڈھونڈو، عورت کے لباس میں نہیں۔‘‘

یاسر حسین نے ماہرہ خان پر تنقید کرنے والوں کو جواب دیا ’’کپڑوں سے نکل کر اصل مسئلے پر بات کرو خدا کا خوف کرو۔‘‘

شہرت یافتہ امریکی گلوکارہ، اداکارہ، پروڈیوسر، سماجی رہنما اور کاروباری خاتون لیڈی گاگا نے کہا ہے کہ کم عمری میں طاقتور شخص کی جانب سے متعدد مرتبہ ’ریپ‘ کیے جانے کی وجہ سے وہ حاملہ ہوگئی تھیں، جس کے باعث وہ تقریباً اپنا ذہنی توازن کھو بیٹھی تھیں۔

لیڈی گاگا نے شہزادہ ہیری اور اوپرا ونفرے کی جانب سے ذہنی صحت پر بنائی گئی دستاویزی سیریز ’دی می یو کانٹ سی‘ یعنی ’مجھے تم نہیں دیکھ سکتے‘ کی پہلی قسط میں اپنے ساتھ ہونے والے استحصال پر کھل کر بات کی۔

لیڈی گاگا ماضی میں بھی متعدد مرتبہ اعتراف کر چکی ہیں کہ انہیں میوزک کی دنیا میں آتے ہی جنسی استحصال کا نشانہ بنایا گیا تھا۔

سب سے پہلے لیڈی گاگا نے 2014 میں انکشاف کیا تھا کہ جب انہوں نے گلوکاری کی دنیا میں قدم رکھا اور جب ان کی عمر محض 19 برس تھی، تب انڈسٹری کے ایک شخص نے ان کا ’ریپ‘ کیا تھا۔

بعد ازاں گلوکارہ نے 2016 اور 2018 میں بھی مذکورہ معاملے پر بات کی تھی جب کہ گزشتہ سال بھی انہوں نے اسی معاملے پر کھل کر بات کرتے ہوئے کہا تھا کہ 19 برس کی عمر میں متعدد مرتبہ ان کا ’ریپ‘ کیا گیا تھا۔

لیڈی گاگا نے ماضی میں بھی ’ریپ‘ کرنے والے شخص کا نام نہیں بتایا تھا اور اب تازہ سیریز میں بھی انہوں نے مذکورہ شخص کا نام لینے سے گریز کرتے ہوئے کہا کہ اگرچہ ’می ٹو مہم‘ کے بعد بہت ساری خواتین نے بہادری دکھائی مگر وہ اب بھی اس مکروہ شخص کا نام لینے کو تیار نہیں۔

شوبز ویب سائٹ ’ولچر’ کے مطابق ایپل پلس ٹی وی پر نشر کی جانے والی سیریز کی پہلی قسط میں لیڈی گاگا اپنے ساتھ ہونے والے واقعے پر بات کرتے ہوئے آبدیدہ ہوگئیں اور کہا کہ وہ جس تکلیف سے گزریں، اس کا احساس صرف اور صرف انہیں اور ان کے جسم کو ہے۔

لیڈی گاگا نے بتایا کہ جس شخص نے ان کا ’ریپ‘ کیا، انہوں نے 19 برس کی عمر میں انہیں دھمکی دی کہ اگر وہ ان کے سامنے بے لباس نہیں ہوتیں تو وہ گلوکارہ کے تمام گانے جلا دے گا۔

گلوکارہ نے بتایا کہ ایک دن وہ شخص انہیں حاملہ حالت میں اپنے والدین کے گھر کے باہر پھینک کر چلا گیا، اس وقت انہیں الٹیاں آ رہی تھیں اور وہ سخت بیمار تھیں۔

آسکر و بافٹا ایوارڈ یافتہ اداکارہ کا کہنا تھا کہ ’ریپ‘ کی وجہ سے حاملہ ہو جانے کے بعد وہ تقریبا اپنا ذہنی توازن کھو چکی تھیں اور شدید ذہنی مسائل کا شکار ہو چکی تھیں اور انہیں ایسا لگتا تھا کہ انہیں کچھ ہوجائے گا۔

گلوکارہ نے بتایا کہ انہوں نے صدمے کی حالت میں متعدد مرتبہ میڈیکل چیک اپ کراتے ہوئے سی ٹی اسکین اور ایم آر آئی تک کروائے لیکن ان میں کسی بیماری کی تشخیص نہیں ہوئی۔

لیڈی گاگا نے جذباتی انداز میں بتایا کہ جو درد سی ٹی اسکین اور ایم آر آئی نہیں پکڑ سکے، اس درد کو ان کے جسم نے محسوس کیا اور وہ سالوں تک ذہنی اذیت میں مبتلا رہیں، یہاں تک کہ انہوں نے اپنی سرگرمیاں بھی محدود کردیں۔

اداکارہ نے بتایا کہ کم از کم تین سال بعد انہوں نے آہستہ آہستہ زندگی کی جانب لوٹنا شروع کیا تاہم اب بھی انہیں وہ واقعات یاد آتے ہیں تو انہیں تکلیف ہوتی ہے۔

لیڈی گاگا نے کہا کہ وہ اس مکروہ شخص کا دوبارہ کبھی چہرہ دیکھنا پسند نہیں کریں گی اور نہ ہی اس کا نام لینا پسند کریں گی۔

خیال رہے کہ لیڈی گاگا کا شمار دنیا کی معروف ترین اور طاقتور ترین شوبز و میوزک شخصیات میں شمار ہوتا ہے، انہوں نے کم عمری میں گلوکاری کا آغاز کیا تھا۔

لیڈی گاگا کو شوبز و میوزک کی دنیا میں آئے ہوئے دو دہائیوں سے زیادہ کا عرصہ گزر چکا ہے اور انہوں نے فلمی دنیا کے سب سے معتبر آسکر ایوارڈ سمیت میوزک کے سب سے بہترین ایوارڈ گریمی سمیت بافٹا، گلڈ اسکرین، بل بورڈ، امریکن ایوارڈز اور ایم ٹی وی ایوارڈ سمیت کئی ایوارڈز جیت رکھے ہیں۔

پاکستان کی معروف ٹک ٹاکر اور ماڈل جنت مرزا نے بھی بات پکی ہونے کا اشارہ دے دیا۔

حال ہی میں جنت مرزا نے انسٹاگرام پر اپنی مختلف تصاویر شیئر کیں جن میں سے ایک تصویر میں ان کے ہمراہ ٹک ٹاکر عمر بٹ کو بھی دیکھا جاسکتا ہے۔

جنت مرزا کی جانب سے شیئر کی گئی تصویرپر کمنٹ کرتے ہوئے ایک صارف نے ان سےسوال کیا کہ آپ کی بات پکی ہوئی ہے یا منگنی؟

صارف کے سوال کا جواب دیتے ہوئے جنت مرزا نے مختصر لکھا کہ بی پی (BP)، جنت مرزا کے مختصر جواب پر میڈیا رپورٹس میں دعویٰ کیا جارہا ہے کہ اداکارہ منال خان کے بعد جنت مرزا اور ٹک ٹاکر عمر بٹ کی بھی بات پکی ہوگئی ہے ۔

خیال رہے کہ جنت مرزا اور عمر بٹ ایک دوسرے کی مختلف ویڈیوز میں دکھائی دیتے ہیں اور ان کی منگنی اور شادی کے حوالے سے خبریں اس سے قبل بھی میڈیا کی زینت بن چکی ہیں۔

دوسری جانب جنت مرزا کے ویڈیو شیئرنگ ایپ ٹک ٹاک پر 15 ملین فالوورز ہوگئے ہیں جس کے بعد وہ ٹک ٹاک پر 15 ملین فولوور رکھنے والی پاکستان کی پہلی ٹک ٹاکر بن گئی ہیں۔

رواں برس اپریل میں پاکستان میں اپنی موسیقی سے سب کو چونکا دینے والے 20 سالہ عبداللہ صدیقی کو امریکی جریدے فوربز نے اپنی 30 انڈر 30 فہرست کا حصہ بنایا تھا۔

اسپوٹی فائی کو دیے گئے انٹرویو میں عبداللہ صدیقی نے موسیقی کی دنیا میں اپنے سفر پر بات کی۔

انہوں نے بتایا کہ موسیقی کی دنیا میں بطور فنکار ان کا سفر ایک دہائی قبل شروع ہوا۔

عبداللہ صدیقی نے بتایا کہ ‘میوزک سے ان کا تعلق اس وقت شروع ہوا جب وہ اپنے والدین کے گھر میں، ایک پرانے کمپیوٹر کے سامنے بیٹھے، ابتدائی میوزک سافٹ ویئر استعمال کرتے ہوئے بس بٹن دباتے تھے جن کی آواز انہیں موسیقی جیسی لگتی تھی’۔

ایک سوال کے جواب میں انہوں نے کہا کہ وہ الیکٹروپاپ کے بانی ایموجین ہیپ، جیمز بلیک، صوفی، آرکا اور جورک جیسے فنکاروں سے متاثر ہیں۔

انہوں نے کہا کہ یہ انفلوئنسرز ایکسپیریمنٹل میوزک کے لیے ان کی پسند کی عکاسی کرتے ہیں، جو آج کل کی ہائی ٹیک پروڈکشن اور موسیقی کے مختلف اثرات پر مبنی ہیں۔

عبداللہ صدیقی نے کہا کہ ‘جو پاپ میوزک اور کوکی-کٹر ٹین پاپ میوزک میں سن کر بڑا ہوا اس نے مجھے ایک طرح سے موسیقی سے آگاہ کیا’۔

جب ان سے اپنے میوزک کو ایک لفظ میں بیان کرنے کو کہا گیا تو انہوں نے ‘ڈیکسٹرل’ اور ‘سینمیٹک’ کے الفاظ استعمال کیے۔

سال 2021 میں عبداللہ صدیقی اور ان کے میوزک کے لیے ایک اہم سال دکھائی دے رہا ہے۔

عبداللہ صدیقی نے اپنے اگلے ایلبم کا اعلان بھی کردیا جو ممکنہ طور پر رواں برس کے اواخر میں ریلیز ہوگی۔

انہوں نے کہا کہ وہ کچھ کمرشل وینچرز کا حصہ بھی ہیں جو یقینی طور پر کافی پرجوش ہیں۔

عبداللہ صدیقی نے حال ہی میں اپنا تیسرا ایلبم ‘ڈیڈ بیٹ پوئٹس’ کے نام سے ریلیز کیا اور ‘دِس از عبداللہ صدیقی’ کے نام سے ایک پلے لسٹ بھی ریلیز کی۔

وہ اسپوٹی فائی کے کنسرٹ کا حصہ بھی تھے جہاں انہوں نے اپنا سپرہٹ گانا ‘کڈز’ گایا، ابتدائی طور پر انہوں نے یہ گانا شمعون اسمٰعیل کے ساتھ گایا تھا۔

بچپن سے میوزک کا حصہ بننے والے گلوکار و موسیقار عبداللہ صدیقی کو نیس کیفے بیسمنٹ میں اوریجنل گانے ‘ریزیسٹنس’ سے شہرت ملی۔

انہوں نے رواں برس پی ایس ایل 6 کی ٹیم پشاور زلمی کا آفیشل ترانہ ‘کنگڈم’ بھی گایا جو بہت زیادہ مقبول ہوا۔

سوشل میڈیا سے مقبول ہونے والے ارشد خان المعروف ‘چائے والا‘ نے گزشتہ برس اسلام آباد میں اپنا کیفے قائم کیا تھا جس کا نام انہوں نے کیفے چائے والا رکھا تھا۔

پاکستان میں اپنے کیفے کی 3 برانچز کھولنے کے بعد ارشد خان اب بیرون ملک کاروبار شروع کرنے کے لیے تیار ہیں۔

ارشد خان برطانیہ کے شہر لندن میں اپنا کیفے کھولنے کے لیے تیار ہیں جو رواں برس کے اواخر میں کھلے گا۔

فیس بک پر شیئر کی گئی ایک پوسٹ میں ارشد خان نے لکھا کہ ‘طاقت اور ترقی صرف مسلسل کوشش سے حاصل ہوتی ہے’۔

انہوں نے اپنی پوسٹ میں بتایا کہ انشااللہ رواں برس کے اواخر میں لندن میں ان کا پہلا کیفے کھلے گا۔

خیال رہے کہ ارشد خان نے 10 اکتوبر کو کیفے چائے والا کے نام سے پہلا آؤٹ لیٹ اسلام آباد میں کھولا تھا۔

ان کے کیفے کی دوسری برانچ جنوری 2021 میں کراؤن جیول مری میں کھولی گئی جبکہ تیسری برانچ گلبرگ گرینز میں ویلکم سینٹر میں کھولی گئی۔

اب وہ لندن میں بین الاقوامی مارکیٹ تک رسائی حاصل کررہے ہیں اور لندن میں ان کا چوتھا اور پہلا انٹرنینشل آؤٹ لیٹ ‘کیفے چائے والا ارشد خان ‘ کے نام سے کھلے گا۔

اس ضمن میں انہوں نے برطانیہ میں 10 آؤٹ لیٹس کھولنے کے لیے ماسٹر فرنچائز ایگریمنٹ کیا ہے اور وہ برطانیہ میں مقیم 2 کاروباری شخصیات کے اشتراک سے اپنا کیفے کھولیں گے۔

یاد رہے کہ 5 برس اسلام آباد میں سوشل میڈیا پر وائرل ہونے والی تصویر نے ایک چائے والے کی قسمت بدل دی تھی۔

ارشد خان المعروف چائے والا کی تصویر اسلام آباد سے تعلق رکھنے والی فوٹوگرافر جویریہ علی نے اکتوبر 2016 میں شیئر کی تھی جس نے وائرل ہوتے ہی ان کی قسمت بدل دی تھی۔

اس وقت فوٹوگرافر نے ڈان امیجز سے بات کرتے ہوئے بتایا تھا کہ ‘میں نے اتنے وجیہ نوجوان کا خیال بھی نہیں کیا تھا، یہ واقعی سرپرائز کردینے والا تھا’۔

ان کا کہنا تھا کہ ‘میں نے اتوار بازار میں ایک فوٹو واک کے دوران تصویر لی اور اسے انسٹاگرام میں ایک عام پوسٹ کے طور پر اپ لوڈ کردیا جو اس وقت تو وائرل نہیں ہوئی تاہم چار یا پانچ دن بعد اچانک وائرل ہوگئی’۔

اس وقت ارشد خان کی عمر 18 سال تھی، جو اصل میں کوہاٹ سے تعلق رکھتے تھے اور تصویر لیے جانے کے وقت وہ اسلام آباد کے اتوار بازار میں 3 ماہ سے چائے بنانے کا کام کررہے تھے۔

اپنی پہلی تصویر کے حوالے سے ارشد کا کہنا تھا کہ وہ نہیں جانتے تھے کہ یہ کس نے لی تھی لیکن جب میڈیا ان تک پہنچا تھا تو وہ کافی گھبرا گئے تھے اور ان کے ماموں بھی یہ سب دیکھ کر کافی پریشان ہوگئے تھے کہ آخر میڈیا ان کے پیچھے کیوں پڑ گیا ہے۔

جس کے بعد وہ ماڈل بن گئے تھے اور بعد ازاں اداکاری میں بھی قسمت آزمائی کی تھی، پھر 2017 کے شروع میں یہ افواہیں پھیل گئی تھیں کہ ارشد خان اپنے اداکاری کے کیریئر کو چھوڑ کر واپس چائے کے اسٹال پر جارہے ہیں، جس کی وجہ ان کے خاندان کی جانب سے لگائی جانے والی پابندیاں ہیں، ان قیاس آرائیوں کا آغاز اُس وقت ہوا تھا جب ارشد خان کی گلوکارہ مسکان جے کے ساتھ ایک میوزک ویڈیو ریلیز ہوئی تھی۔

رپورٹس تھیں کہ ارشد خان کے گھر والوں کو گلوکارہ کے ساتھ بنائی گئی ان کی یہ ویڈیو بالکل پسند نہیں آئی اور انہوں نے ارشد کے شوبز کیریئر کو ختم کرنے کا فیصلہ کیا۔

تاہم ایک انٹرویو میں ارشد خان نے بتایاتھا کہ یہ خبریں جھوٹی اور بے بنیاد ہیں۔

بعدازاں 2019 میں انہوں نے ایک نجی ٹی وی کے پروگرام میں انکشاف کیا تھا وہ ایک بار پھر لوگوں کے لیے چائے بنانے کا کام کرنے لگے ہیں۔

انہوں نے بتایا تھا کہ وہ ماڈلنگ اور اداکاری کے کیرئیر کے باوجود چائے فروخت کرنے واپس آئے ہیں اور وہ اس کام کو کبھی نہیں چھوڑیں گے۔