Category شوبز

ہولی وڈ کی معروف اداکارہ سلمیٰ ہائیک نے پہلی بار کووڈ 19 سے متاثر ہونے کا انکشاف کیا ہے اور اس بیماری سے مقابلہ کرتے ہوئے وہ موت کے منہ میں پہنچ گئی تھیں۔

اداکارہ کے سوشل میڈیا اکاؤنٹس میں تو کووڈ 19 سے متاثر ہونے کا کوئی اشارہ نہیں دیا گیا تھا۔

تاہم ورائٹی کو دیئے گئے ایک انٹرویو کے دوران سلمیٰ ہائیک نے انکشاف کیا کہ کورونا وائرس کی وبا کے آغاز میں کووڈ 19 کا شکار ہوئی تھیں۔

انہوں نے بتایا کہ 2020 کا زیادہ تر حصہ انہوں نے کووڈ سے لڑتے ہوئے گزارا۔

ان کا کہنا تھا ‘میرے ڈاکٹر نے مجھ سے درخواست کی تھی کہ ہسپتال میں داخل ہوجاؤں کیونکہ حالت بہت زیادہ خراب ہوگئی تھی’۔

54 سالہ اداکارہ نے بتایا ‘میں نے کہا، نہیں شکریہ، میں ہسپتال میں داخل ہونے کی بجائے گھر پر ہی مرنا پسند کروں گی’۔

سلمیٰ ہائیک نے 5 ہفتے لندن میں واقع اپنے گھر کے ایک کمرے میں الگ تھلگ رہ کر گزارے۔

اس گھر میں اداکارہ کے ساتھ ان کے شوہر فرانسوئس ہنری پنالٹ اور 13 سالہ بیٹی ویلینٹیا بھی موجود تھے۔

کووڈ کے خلاف لڑائی کے دوران ایک موقع پر سلمیٰ ہائیک کو آکسیجن پر بھی رکھا گیا۔

انہوں نے بتایا کہ ان کی حالت اب بھی مکمل طور پر سنبھل نہیں سکی اور ان کی جسمانی توانائی بھی اب تک پہلے کی طرح بحال نہیں ہوسکی۔

اپریل 2021 میں انہوں نے نئی فلم کی شوٹنگ میں حصہ لیا تاہم بیماری کے اثرات کے نتیجے میں انہیں بہت زیادہ تھکاوٹ کا سامنا ہوا۔

خیال رہے کہ میکسین نژاد 54 سالہ سلمیٰ ہائیک کا شمار ہولی وڈ کی کامیاب ترین اداکاراؤں میں ہوتا ہے، انہوں نے اپنے فلمی کیریئر میں کئی شاندار کردار ادا کرکے خود کو لازوال اداکارہ کے طور پر منوایا۔

سلمیٰ ہائیک نے 2009 میں فرانسیسی ارب پتی تاجر سے شادی کی تھی اور ان سے ان کی ایک بیٹی بھی ہے۔

سلمیٰ ہائیک اب تک 5 درجن سے زائد فلموں میں کام کر چکی ہیں، ان کی معروف فلموں میں ’بریکنگ اپ، 54، وائلڈ وائلڈ ویسٹ، لونگ اٹ اپ، ہوٹل، ٹریفک، فریڈا، ونس اپن ٹائم ان میکسیکو، آسک دی ڈسٹ، امریکانو، سیویجس، سم کائنڈ آف بیوٹی فل، ٹیل آف دی ٹیلز، ہاؤ ٹو بی اے لیتن لور اور دی ہٹ مین باڈی گارڈ‘ شامل ہیں۔

پاکستان کی سینئر اداکارہ صبا فیصل کے بیٹے اور معروف اداکار سلمان فیصل کی اہلیہ سے علیحدگی کی افواہیں سوشل میڈیا پر وائرل ہونے کے بعد نیہا ملک کا کا رد عمل سامنے آگیا۔

سلمان فیصل اور نیہا ملک 2 سال قبل عالیشان طور پر منعقد کی گئی ایک تقریب میں رشتہ ازدواج میں منسلک ہوئے تھے اور ان کی شادی میں شوبز کی معروف شخصیات نے شرکت کی تھی۔

کچھ روز قبل سلمان اور نیہا کی علیحدگی کی خبریں انٹرنیٹ پر وائرل ہوئی تھیں تاہم اس حوالے سے فیصل سلمان یا ان کی اہلیہ کی جانب سے باقاعدہ تصدیق سامنے نہیں آسکی ہے۔

حال ہی میں نیہا ملک کی پوسٹ پر ماریہ فاروق نامی صارف نے پوچھا کہ آپ کے شوہر کہاں ہیں ؟صارف کے تبصرے کا جواب دیتے ہوئے نیہا نے شوہر سے متعلق لاعلمی کا اظہار کرتے ہوئے کہا کہ یہ تو ان سے ہی پوچھیں کہ وہ کہاں ہوتے ہیں۔

سوشل میڈیا پر نیہا کا یہ تبصرہ خاصا وائرل ہوگیا ہے اور میڈیا رپورٹس میں دعویٰ کیا جارہا ہے کہ نیہا کا جواب اس بات کی جانب ایک اشارہ ہے کہ ان کے اور ان کے شوہر سلمان فیصل کے درمیان معاملات ٹھیک نہیں چل رہے ہیں۔

فی الحال اس حوالے سے صباء فیصل یا ان کے اہلخانہ کی جانب سے اب تک کوئی وضاحت سامنے نہیں آسکی ہے۔

پاکستانی اداکار و ہدایت کار عثمان مختار نے فلسطین میں جاری اسرائیلی حملوں کے تناظر میں اپنی ایوارڈ یافتہ مختصر فلم ‘بینچ’ کی ریلیز مؤخر کرنے کا اعلان کردیا۔

عثمان مختار کی یہ فلم 20 مئی کو ریلیز ہونی تھی اور یہ اس وقت توجہ کا مرکز بنی تھی جب رواں برس کے آغاز میں انٹرنیشنل شارٹ ایوارڈز کے لیے اسے فائنلسٹ میں شامل کیا گیا تھا۔

‘بینچ’ فلم نے نیویارک میں ہونے والے ساؤتھ شارٹ فلم فیسٹیول میں بہترین مختصر فلم کا اعزاز بھی حاصل کیا تھا۔

اپنی مختصر فلم کی ریلیز مؤخر کرنے کا اعلان کرتے ہوئے عثمان مختار نے انسٹاگرام پوسٹ میں کہا کہ ‘ ہم اپنا کام آپ کو (مداحوں ) دکھانے کے لیے جتنے پُرجوش ہیں فلسطین میں ڈھائے جانے والے مظالم پر اس سے بھی زیادہ دکھی ہیں’۔

عثمان مختار نے مزید لکھا کہ ‘ موجودہ حالات کے تناظر میں ہے اور ہمارے فلسطینی بھائیوں اور بہنوں کو درپیش مشکلات کے باعث ہم نے فلم کی ریلیز مؤخر کرنے کا فیصلہ کیا ہے’۔

انہوں نے اپنی پوسٹ میں مداحوں سے فلسطینیوں کے لیے دعا کرنے کی درخواست کی اور سوشل میڈیا ایکٹوزم کی اہمیت کو بھی اجاگر کیا۔

عثمان مختار نے لکھا کہ ‘میں اس پوسٹ پڑھنے والے ہر شخص سے کہوں گا کہ وہ فلسطین کے لوگوں کے لیے دعا کریں اور اس حوالے سے سوشل میڈیا پر جو بھی شیئر کرسکتے ہیں کریں’۔

‘بینچ’ کی کہانی ایک ایسے جوڑے کے گرد گھومتی ہے جو ایک پبلک پارک میں موجود ایک خالی بینچ پر سماجی مسائل پر بات کرتے ہیں۔

‘بینچ’ پر بیٹھے جوڑے کو اپنی زندگی میں آنے والے مسائل اور رکاوٹوں پر بحث کے دوران سماجی مسائل کو مختلف انداز میں بات کرتےہوئے دکھایا گیا ہے۔

فلم میں مرکزی کردار ربیا چوہدری اور عثمان مختار نے ہی ادا کیا ہے، مذکورہ فلم کو دیگر عالمی فلم فیسٹیولز میں بھی پیش کیا جا چکا ہے۔

مختصر فلم کے حوالے سے عثمان مختار نے امیجز کو بتایا تھا کہ وہ اپنے دوست علی سے ایک فلم کی ممکنہ اسٹوری لائنز پر بات کررہے تھے تو انہیں خیال آیا کہ کیوں نا بینچ پر بیٹھے 2 لوگوں کے درمیان ایک سادہ سی گفتگو دکھائی جائے۔

انہوں نے کہا کہ کہانی اس سے زیادہ سادہ نہیں ہوسکتی تھی جس پر ہم نے تبادلہ خیال کیا تھا، علی نے اسکرپٹ لکھی اور اس پروجیکٹ کا آغاز ہوا تھا۔

بحیرہ عرب میں بننے والے سمندری طوفان تاؤتے کے پڑوسی ملک بھارت میں آنے سے جہاں 27 افراد ہلاک اور 100 سے زیادہ لاپتا ہوگئے، وہیں خطرناک طوفان میں رقص کرنے پر بھارتی اداکارہ کو تنقید کا نشانہ بنایا جا رہا ہے۔

سمندری طوفان تاؤتے 17 مئی کو بھارتی ریاست گجرات کے ساحل سے ٹکرایا تھا، جس کے بعد وہاں کی مختلف ریاستوں میں شدید بارشیں اور تیز ہوائیں چلنے سے درجنوں مکانات تباہ ہوگئے۔

مذکورہ سمندری طوفان کا پاکستان سے بھی ٹکرانے کا خدشہ تھا، تاہم خوش قسمتی سے سمندری طوفان نے بھارت کا رخ کیا، جہاں تاؤتے نے تباہی مچادی۔

ایک طرف جہاں سمندری طوفان کی تباہی سے لوگوں کی زندگی چلی گئی اور درجنوں افراد لاپتا ہوگئے اور سیکڑوں مکانات تباہ ہوگئے، وہیں ایک ٹی وی اداکارہ کی جانب سے نیم عریاں لباس میں ڈانس کرنے کی ویڈیو بنانے اور تصاویر شیئر کرنے پر انہیں تنقید کا نشانہ بنایا جا رہا ہے۔

ٹی وی اداکارہ دپیکا سنگھ گویل نے تاؤتے طوفان کے بھارت سے ٹکرانے کے بعد ویڈیوز اور تصاویریں پوسٹ کیں تو انہیں شدید تنقید کا نشانہ بنایا گیا۔

دپیکا سنگھ گویل نے نیم عریاں اور بولڈ انداز میں طوفان سے گرنے والے درختوں کے ساتھ تصاویر بنوااکر سوشل میڈیا پر شیئر کیں، جب کہ طوفان کی تباہی کے بعد کے مناظر میں رقص کی ویڈیو بھی شیئر کی۔

اداکارہ نے متعدد پوسٹس میں مداحوں کے لیے لکھا کہ ’آپ طوفان کو روک نہیں سکتے، اس لیے ایسی کوششیں کرنا چھوڑ دیں‘۔

اداکارہ نے لکھا کہ طوفان آنے کی صورت میں صرف خود کو پرسکون رکھا جا سکتا ہے، اس لیے ایسی حالت میں فطرت سے پیار کریں اور اداس مت ہوں، کیوں کہ طوفان ہر حال میں گزر جائے گا۔

ساتھ ہی انہوں نے واضح کیا کہ انہوں نے بولڈ انداز میں جن درختوں کے ساتھ تصاویر بنوائی ہیں، وہ طوفان کے آنے سے تباہ ہوئے اور اب وہ درختوں سے لکڑیاں بن چکے ہیں۔

انہوں نے مزید لکھا کہ طوفان تاؤتے کو یادگار بنانے کے لیے ہی انہوں نے تصاویر اور ویڈیوز بنائیں۔

تاہم اداکارہ کو ایسی تصاویر شیئر کرنے اور ویڈیوز پر تنقید کا نشانہ بنایا گیا اور لوگوں نے ان کی پوسٹس پر کمنٹس کیے کہ کیوں کہ تاحال وہ خود محفوظ اور سلامت ہیں، اس لیے طوفان میں ایسا کر رہی ہیں۔

بھارتی اخبار انڈین ایکسپریس کے مطابق دپیکا سنگھ گویل کی بولڈ تصاویر اور ویڈیوز پر لوگوں نے انہیں سخت جوابات دیتے ہوئے کہا کہ انہیں ایسی مصیبت میں ایسے انداز نہیں کرنے چاہئیں۔

اداکارہ کو مداحوں نے یاد دلایا کہ مذکورہ طوفان سے لوگ مر گئے اور گھر تباہ ہوگئے اور انہیں طوفان میں بولڈ ڈانس یاد آ رہا ہے۔

دپیکا سنگھ گویل کی طرح بولی وڈ اداکارا اہانا کمرا نے بھی سمندری طوفان آنے پر بولڈ تصاویر شیئر کرتے ہوئے مداحوں کو موسم کا مزہ لینے کا مشورہ دیا۔

اہانا کمرا کو بھی تباہی مچانے والے طوفان میں بولڈ لباس میں تصاویر شیئر کرنے پر تنقید کا نشانہ بناتے ہوئے انہیں تاؤتے کی تباہ کاریاں یاد دلائی گئیں۔

ممبئی: سیف علی خان کا کہنا ہے کہ اپنے بڑے بیٹے کے نام پر تنازع کے بعد تیمور علی خان کا نام تبدیل کرنے کا سوچ رہا تھا اور یہ بات ابھی بھی میرے دماغ میں چل رہی ہے۔

ایک انٹریو میں بالی ووڈ کے چھوٹے نواب سیف علی خان نے انکشاف کیا ہے کہ وہ اپنے بیٹے کی پیدائش کے بعد ان کے نام کو لے کر تنازع کے بعد تیمور علی خان کا نام تبدیل کرنے کا سوچ رہے تھے تاہم ان کی اہلیہ کرینہ کپور نے انہیں ایسا کرنے سے منع کیا۔

خیال رہے اداکارہ سیف علی خان نے بالی ووڈ کی بیبو کرینہ کپور خان سے 2012 میں شادی کی تھی جس سے ان کے دو بیٹے ہیں۔ پہلے بیٹے کی پیدائش 2016 میں ہوئی تھی جس کا نام سیف علی خان نے تیمور علی خان رکھا جو ہندوانتہاپسندوں سے ہضم نہ ہوا اور سیف وکرینہ پر شدید تنقید کی گئی اور ان سے نام تبدیل کرنے کا بھی مطالبہ کیا گیا تھا۔

تیمور علی خان کے نام پر تنازع سے متعلق اداکار سیف علی خان نے انکشاف کیا کہ ایک لمحے کے لیے میں نے تیمور کا نام تبدیل کرنے کا سوچا لیکن کرینہ کپور نے مجھے کہا لوگ آپ کی عزت آپ کے فیصلے اور رائے کی وجہ سے کرتے ہیں اس لیے یہ تبدیل کرنے کی ضرورت نہیں لیکن میں نہیں چاہتا کہ وہ نام کی وجہ سے غیرمقبول ہو اور اس لیے میں اب بھی ایسا کرنے کا سوچ رہا ہوں، شاید کبھی کرلوں۔

دوسری جانب کرینہ کپور نے کہا کہ اس تنازع نے مجھے شدید خوف میں مبتلا کردیا تھا کیوں کہ بطور ماں مجھے پورا حق حاصل ہے کہ میں اپنے بچے کو کسی بھی نام سے پکاروں، اور ہمارے یا کسی کے بھی بچوں کے نام سے کسی دوسرے کو کوئی سروکار نہیں ہونا چاہیے۔

حال ہی میں سیف علی خان کو اپنی ویب سیریز ’تانڈو‘ میں راون کے کردار کے حوالے سے بیان پر ہندوانتہاپسندوں نے آڑے ہاتھوں لیا تھا اور ان سے معافی کا مطالبہ کیا تھا جس پر سیف علی خان اور فلم کے ہدایت کار سمیت پوری کاسٹ نے غیرمشروط معافی مانگی تھی۔

کراچی: روز کروڑوں کمانے والے بالی ووڈ کے دبنگ اداکار سلمان خان کی عید الفطر کے موقع پر ریلیز ہونے والی فلم ’’رادھے، یور موسٹ وانٹڈ بھائی‘‘ چار روز میں ایک لاکھ روپے بھی نہ کماسکی۔

بالی ووڈ کے دبنگ اداکار سلمان خان صرف شخصیت سے دبنگ نہیں ہیں بلکہ ان کی فلمیں بھی دبنگ کمائی کرتی ہیں اورسلو میاں کی فلم کے لیے 100 کروڑ کمانا کوئی بڑی بات نہیں۔ لیکن دنیا بھر میں پھیلی کورونا وبا نے سلمان خان کی فلموں کو بھی شدید متاثر کیا ہے اور جہاں ان کی فلمیں ایک روز میں کروڑوں کماتی تھیں اب یہ حال ہوگیا ہے کہ ان کی حال ہی میں ریلیز ہونے والی فلم ’’رادھے‘‘ چار روز گزرنے کے باوجود ایک لاکھ روپے بھی نہ کماسکی۔

فلم ’’رادھے‘‘ نے او ٹی ٹی پلیٹ فارمز پر کتنی کمائی کی
کورونا وبا کے باعث بھارتی سینما بند ہیں۔ اس صورتحال میں جہاں بھارت کے بڑے اسٹارز نے اپنی فلموں کی ریلیز روک دی ہے۔ وہیں سلو میاں نے اپنی فلم ’’رادھے‘‘ کو ریلیز کرنے کے لیے بہت بڑا رسک لیا اور اسے او ٹی ٹی اور مختلف ڈیجیٹل پلیٹ فارمز زی فائیو اور زی پلیکس پر ریلیز کیا۔

فلم کی ریلیز کے پہلے روز سلو میاں کے مداحوں نے بڑی تعداد میں فلم کو آن لائن دیکھا جس کی وجہ سے ویب سائٹ کا سرور بھی ڈاؤن ہوگیا تھا۔ ایک بھارتی ویب سائٹ کے مطابق حالانکہ فلم کو دیکھنے کے لیے لوگوں کی بڑی تعداد نے آن لائن پلیٹ فارم کو لاگ ان کیا لیکن اس کے باوجود فلم نے کتنی کمائی کی اس بارے میں پیشگوئی نہیں کی جاسکتی کیونکہ فلم تھیٹرز میں ریلیز نہیں ہوئی۔

دی ہندو بزنس لائن ڈاٹ کام کے مطابق ڈیجیٹل پلیٹ فارم پر ریلیز کے پہلے روز فلم ’’رادھے‘‘ کو 4.2 ملین بار دیکھا گیا۔ جس کی وجہ سے یہ بھارت میں آن لائن پلیٹ فارم پر تیسری سب سے زیادہ بار دیکھی جانے والی فلم بن گئی۔ اس سے قبل سشانت سنگھ راجپوت کی فلم ’’دل بیچارا‘‘ اور ’’لکشمی‘‘ یہ دونوں فلمیں آن لائن سب سے زیادہ دیکھی گئی تھیں۔

ویب سائٹ کے مطابق فلم ’’دل بیچارا‘‘ کو او ٹی ٹی پلیٹ فارم پر 75 ملین ویوز ملے تھے جب کہ فلم ’’لکشمی‘‘ جو کہ 2020 میں ریلیز ہوئی تھی اسے 20 سے 25 ملین بار دیکھا گیا تھا۔

فلم کی سینما میں کمائی
یہ پہلی بار ہے کہ بالی ووڈ کے سلطان سلمان خان کی فلم عید الفطر کے موقع پر ریلیز ہوئی اور بھارت میں فلم نے نہ ہونے کے برابر بزنس کیا۔ تاہم بھارت کی شمال مشرقی ریاست تری پورہ کے تین سینماؤں (ایس ایس آر روپاسی، بالاکا اور ایس ایس آر دھرمانگر سینماؤں) میں فلم کو ریلیز کیا گیا اور یہ تین سینما کورونا ایس او پیز کا خیال رکھتے ہوئے فلم کے روزانہ 11 شوز چلارہے ہیں۔

بھارتی فلموں کے تجارتی ماہرین نے فلم ’’رادھے‘‘ کی ان تین سینماؤں سے ہونے والی چار دن کی کمائی کے اعدادو شمار بتائے ہیں۔ فلم نے ریلیز کے پہلے دن 10 ہزار 432، دوسرے دن 22 ہزار 518، تیسرے روز 13 ہزار 485 اور چوتھے روز بھی 13 ہزار 485 روپے کمائے۔ اس طرح فلم ’’رادھے‘‘ نے چار روز میں ٹوٹل 59 ہزار 920 تقریباً 60 ہزار روپے کی کمائی کی۔ یہ اعدادوشمار بھارتی ریاست تری پورہ کے صرف ان تین سینماؤں کے ہیں۔ ان اعدادو شمار کو دیکھا جائے تو سلو میاں کی فلم جو کہ روزانہ کروڑوں کماتی تھی چار روز میں ایک لاکھ روپے بھی نہ کماسکی۔

فلم ’’رادھے‘‘ کی بین الاقوامی سینماؤں میں کمائی
بھارت میں کورونا کی خطرناک صورتحال اور لاک ڈاؤن کی وجہ سے فلم ’’رادھے‘‘ کو او ٹی ٹی پلیٹ فارم پر ریلیز کیا گیا۔ تاہم دیگر ممالک میں کورونا کی صورتحال بھارت سے کہیں بہتر ہے اس لیے فلم کو دنیا بھر میں تھیٹرز میں ریلیز کیا گیا۔ فلم نے آسٹریلیا میں پہلے روز 36 لاکھ بھارتی روپے کا بزنس کیا۔ نیوزی لینڈ میں پہلے روز 5 لاکھ 90 ہزار بھارتی روپے، امریکا میں پہلے روز 24 لاکھ بھارتی روپے کی کمائی کی۔ جب کہ خلیجی ممالک میں فلم ’’رادھے‘‘ نے 3 کروڑ کا بزنس کیا۔

فلم کی آئی ایم ڈی بی پر ریٹنگ
حالانکہ فلم کو آن لائن اچھے ویوز ملے ہیں لیکن فلم ’’رادھے‘‘ کو لوگوں نے زیادہ پسند نہیں کیا۔ آئی ایم ڈی بی پر سلومیاں کی فلم کو 66 ہزار ریویوز کی بنیاد پر 10 میں سے صرف 1.9 ریٹنگ ملی ہے جو کہ انتہائی کم ہے۔

واضح رہے کہ فلم ’’رادھے‘‘ میں سلمان خان کے ساتھ اداکار جیکی شروف، دیشاپٹانی اور رندیپ ہوڈا نے مرکزی کردار ادا کیا ہے۔ فلم کے ٹریلر ریلیز کے بعد لوگوں کی بڑی تعداد نے اسے سلو میاں کی بلاک بسٹر فلم ’’وانٹڈ‘‘ کی کاپی قراردیا تھا۔

ممبئی: فلمی ستاروں کے مداح دنیا بھر میں پائے جاتے ہیں، خواتین اگر مرد اداکاروں پر مرتی ہیں تو مرد اداکاراؤں کے یک طرفہ عشق میں مبتلا پائے جاتے ہیں۔ لیکن بالی وڈ اداکار ہالی وڈ اداکاروں کے عشق میں مبتلا ہیں۔

شاہ رخ خان،کترینا کیف اور دیپیکا پاڈوکون بالی وڈ کے ایسے ستارے ہیں جن کےدنیا بھر میں کروڑوں پرستار موجود ہیں، لیکن کیا آپ جانتے ہیں کہ بھارتی فلمی صنعت کے افق پر چمکتے یہ ستارے بھی کسی دوسری سیلیبریٹیز کی زلفوں کے اسیرہیں؟

جی ہاں!!! شاہ رخ سے لے کر دیپیکا تک کا کرش ہالی وڈ سیلیبریٹیز ہیں، زیر نظر مضمون میں ایسے ہی کچھ بالی وڈ کے کرش ہالی وڈ ستاروں کا ذکر کیا گیا ہے۔

بالی وڈ کے بادشاہ ’ کنگ خان‘ پر لاکھوں لڑکیاں مرتی ہیں، لیکن ان کا کرش دنیا کی پرکشش ترین خاتون‘ کا اعزاز رکھنےوالی ہالی وڈ اداکارہ انجیلینا جولی ہیں، گرچہ ’بازی گر‘ نے ابھی تک ہالی وڈ کی کسی فلم میں کام نہیں کیا ہے، لیکن وہ کھلے عام اس بات کا اعلان کرتے ہیں کہ اگر انہیں انجیلینا جولی کے مدمقابل کردار ملا تو وہ اپنے کرش کا’دیو‘ بننے کےلیے فلم سائن کرنے میں ایک لمحے کی تاخیر نہیں کریں گے۔

دیپیکا کا شمار بالی وڈ کے ان ستاروں میں ہوتا ہے جو کسی کو بھی اپنے حسن کا دیوانہ بنا سکتی ہیں۔ ملکوتی حسن کی مالک بالی وڈ اداکارہ دیپیکا پاڈوکون کی فلم ’باجی راؤ مستانی‘ کا ایک مشہور ڈائیلاگ تھا،

’’عشق۔۔۔ جو طوفانی دریا سے بغاوت کرجائے وہ عشق۔۔۔۔۔ بھرے دربار میں جو دنیا سے لڑ جائے وہ عشق۔۔۔۔۔۔۔ جو محبوب کو دیکھے تو خدا کو بھول جائے وہ عشق۔۔۔۔۔‘‘

لیکن فلم ٹائی ٹینک کے ’جیک‘ کو لے کر دیپیکا اپنے اس ڈائیلاگ کی عملی تفسیر ہیں۔ بالی وڈ کی موہنی صورت والے لیونارڈو ڈی کیپریو لاکھوں دلوں کی دھڑکن ہیں لیکن دیپیکا کے ہر دن کا اختتتام لیونارڈو کے ساتھ ہی ہوتا ہے۔

لیونارڈو سے اپنے عشق کا اقرار دیپیکا متعدد بار اپنے انٹرویوز میں کرچکی ہیں، کچھ عرصے قبل ہی دیپیکا نے ایک انٹر ویو میں اس بات کا انکشاف کیا تھا کہ انہوں نے اپنے کمرے میں ہالی وڈ اسٹار کی قدم آدم تصویر لگا رکھی ہے اور وہ ہر رات سونے سے قبل اس تصویر کو بوسہ دیتی ہیں۔

کترینا کیف اپنی جاذب نظر شخصیت کی وجہ سے لاکھوں دلوں کی دھڑکن ہیں، تاہم ان کا دل ہالی وڈ کے ہاٹ اداکار رابرٹ پیٹنسن کے نام پر دھڑکتا ہے۔ اپنے ایک حالیہ انٹرویو میں کترینا نے یہ راز ظاہر کیا کہ وہ ’ٹوئیلائٹ ‘ اداکار سے محبت کرتی ہیں اور رابرٹ ان کا ’کرش‘ ہے۔ انہوں اس بات کا بھی انکشاف کیا ٹوٗئیلائٹ اداکار کی اداکاری کا انداز اور ’پُر کشش شخصیت‘ سے وہ بہت متاثر ہیں۔

کراچی: پاکستانی فنکار فلسطین کے حق میں صرف سوشل میڈیا پر فعال نہیں ہیں بلکہ انہوں نے سڑکوں پر نکل کر مظلوم فلسطینیوں کے ساتھ اظہار یکجہتی کیا ہے۔

پاکستانی فنکار ہمیشہ ہی پاکستان اور دنیا بھر میں رونما ہونے والے سماجی مسائل پر آواز اٹھاتے نظر آتے ہیں۔ چاہے بات تعصب پسندی کی ہو یا مسئلہ کشمیر کی۔ ہمارے فنکار ہمیشہ ہی اپنی آواز بلند کرتے ہیں۔ حال ہی میں فلسطین کے مسئلے پر بھی تقریباً تمام پاکستانی فنکاروں نے احتجاج ریکارڈ کروایا ہے۔

گزشتہ روز فواد خان اپنی اہلیہ صدف اور بیٹی کے ہمراہ لاہور میں فلسطین کے حق میں نکلنے والی ریلی میں شریک ہوئے۔ فواد خان نے اس موقع پر فلسطین کا جھنڈا ہاتھوں میں اٹھا رکھا تھا.

ممبئی: بالی ووڈ بیبو کرینہ کپور نے انکشاف کیا ہے کہ شادی سے پہلے سیف علی خان انہیں میڈیم کہہ کر پکارتے تھے۔

بالی ووڈ کے چھوٹے نواب سیف علی خان نے اداکارہ کرینہ کپور سے 2012 میں شادی کی جس سے ان کے دو بیٹے ہیں۔ تیمور علی خان کی عمر 4 سال ہے جب کہ چھوٹے بیٹے کی عمر صرف 3 ماہ ہے جس کا نام اب تک سامنے نہیں آسکا ہے۔

سیف علی خان اور کرینہ کپور کا شمار بالی ووڈ کے کامیاب ترین جوڑے میں ہوتا ہے اور وہ شادی سے قبل متعدد فلموں میں ایک ساتھ اداکاری کے جوہر بھی دکھا چکے ہیں جن میں ’ایل او سی کارگل‘، ’اومکارہ‘، ’ایجنڈ ونود‘ شامل ہیں۔ ان فلموں کی شوٹنگ کے دوران ہی دونوں فنکار ایک دوسرے کے عشق میں گرفتار ہوئے اور ان کا یہ تعلق 5 سال تک قائم رہا جس کے بعد انہوں نے شادی کی۔

حالیہ انٹریو میں اداکارہ کرینہ کپور نے انکشاف کیا ہے کہ فلم ’اومکارہ‘ کی شوٹنگ کے دوران میری اور سیف کی بات چیت بہت کم ہوتی تھی اور ہم فلم کے مرکزی کردار ہونے کے باوجود ہم صرف ہیلو ، ہائے تک ہی محدود تھے.

اداکارہ نے مزید کہا کہ شوٹنگ کے دوران وہ اپنی گرل فرینڈ اور میں اپنے بوائے فرینڈ کے ساتھ موجود ہوتی تھی جب کہ اس دوران سیف علی خان مجھے میڈیم کہہ کر پکارتے تھے تاہم اس کے بعد سب کچھ تبدیل ہوگیا۔

پاکستان الیکٹرانک میڈیا ریگولیٹری اتھارٹی (پیمرا) نے مارننگ شو میں غیراخلاقی اور نامناسب الفاظ نشر کرنے پر نجی نیوز چینل نیو ٹی وی کو اظہارِ وجوہ کا نوٹس جاری کردیا۔

پیمرا کی جانب سے آفیشل ٹوئٹر اکاؤنٹ پر جاری کردہ اعلامیے میں کہا گیا کہ پاکستان الیکٹرانک میڈیا ریگولیٹری اتھارٹی نے 17 مئی 2021 کو نشر کیے گئے مارننگ شو پر نیو ٹی وی کو اظہارِ وجوہ کا نوٹس جاری کیا ہے۔

مزید کہا گیا کہ یہ نوٹس مارننگ شو میں مہمانوں کے مابین تکرار، نامناسب اور غیر اخلاقی الفاظ نشر کرنے اور شو کی میزبان کے غیرذمہ دارانہ اور غیر پیشہ وارانہ رویے پر جاری کیا گیا۔

پیمرا نے مذکورہ معاملے پر نجی چینل سے 14 روز میں جواب طلب کیا ہے۔

گزشتہ روز نیو ٹی وی کے مارننگ شو ‘نیو پاکستان’ میں کامیڈین اور یوٹیوبر باسط علی شریک ہوئے تھے۔

تاہم مارننگ شو کے مہمانوں کی ڈانس پرفارمنس پر باسط علی کی جانب سے اعتراض اٹھایا گیا جس کے بعد شرکا کے مابین گرما گرم بحث ہوئی جسے چینل کی جانب سے براہ راست نشر کیا گیا۔

علاوہ ازیں مارننگ شو میں کامیڈین باسط علی اور دیگر شرکا کے درمیان ہونے والی اس بحث کا ویڈیو کلپ یوٹیوب پر بھی اپلوڈ کیا گیا تھا۔

ویڈیو میں دیکھا جاسکتا ہے کہ ڈانس پرفارمنس ختم ہونے کے بعد مارننگ شو کی میزبان نبیہا اعجاز نے باسط علی سے سوال کیا کہ سب میوزک پر اتنا انجوائے کررہے تھے تو انہوں نے کیوں نہیں کیا؟ آپ کیوں نہیں آئے؟

جس پر باسط علی نے کہا کہ ‘یہ میوزک نہیں ہے آپ لوگ سرِعام بے حیائی پھیلارہے ہیں، مجھے نہیں پتا تھا کہ آپ کے شو کا کیا اینگل ہے، اس طرح سے لڑکے اور لڑکیاں ڈانس کررہے ہیں یہ کوئی طریقہ نہیں ہے’۔

اس پر مارننگ شو کی میزبان نے کہا کہ ‘ یہ میرا شو ہے ، آپ (باسط علی) یہاں آئے ہیں، آپ کومارننگ شوک کا فارمیٹ پتا ہےآپ کو معلوم ہے کہ خواتین بھی آرہی ہیں، گلوکاری ہوگی، گیمز کھیلے جائیں گے تو آپ کیسے کہہ سکتے ہیں کہ بے حیائی ہورہی ہے؟’۔

اس پرباسط علی نے کہا کہ معاشرہ خواتین کو رقص کی اجازت نہیں دیتا، تو اینکر نے ان سے پوچھا کہ کیا معاشرہ انہیں مارننگ شومیں آنے کی اجازت دیتا ہے جس پر باسط علی نے کہا کہ آپ لوگوں نے مجھے بلایا ہے کامیڈی میں کوئی حرج نہیں ، لیکن رقص کی اجازت نہیں ہونی چاہیے۔

اس دوران اینکر کی جانب سے انہیں اپنے الفاظ واپس لینے کا کہا گیا لیکن باسط علی نے اپنے الفاظ واپس نہیں لیے جبکہ مہمان خاتون اور مردوں کی جانب سے بحث کا سلسلہ جاری رہا۔

ویڈیو میں دیکھا جاسکتا ہے کہ اینکر نے بحث طویل ہونے پر بریک لینے کا کہا لیکن ایک مہمان خاتون نے انکار کیا اور پھر باسط علی نے عورت مارچ کا نکتہ اٹھادیا۔

اس دوران شرکا کے دوران ہاتھا پائی بھی ہوئی جبکہ مہمان خاتون اور باسط علی کی جانب سے ایک دوسرے پ طنز کا سلسلہ بھی جاری رہا اور نامناسب الفاظ کا استعمال بھی کیا گیا۔

بعدازاں مارننگ شو ہی میں میزبان کی جانب سے دونوں مہمانوں کے درمیان صلح بھی کروائی گئی تھی۔

مذکورہ ویڈیو سوشل میڈیا پر وائرل ہونےکے بعد اکثر صارفین کی جانب سے باسط علی کو تنقید کا نشانہ بنایا گیا جبکہ دیگر نے اس بحث کو براہ راست نشر کرنے پر چینل کو غلط قرار دیا۔

خیال رہے کہ یہ پہلا موقع نہیں جب نیو نیوز کو لائیو پروگرام میں بحث نشر کرنے پر تنقید کا سامنا ہوا ہو۔

گزشتہ برس ’نیو نیوز‘ کے پروگرام ’آج عائشہ احتشام کے ساتھ‘ میں ’عورت مارچ‘ کے موضوع پر ہونے والی بحث کے دوران سماجی کارکن و خواتین رہنما ماروی سرمد کے خلاف انتہائی نازیبا زبان استعمال کی تھی۔

خلیل الرحمٰن قمر کی جانب سے نامناسب زبان استعمال کیے جانے پر ٹی وی میزبان عائشہ احتشام کو بھی تنقید کا نشانہ بنایا گیا تھا اور سوشل میڈیا پر کہا جا رہا تھا کہ خاتون میزبان نے ڈراما مصنف کو گالیاں دینے سے نہیں روکا بعدازاں نجی چینل کی انتظامیہ نے ماروی سرمد سے معذرت بھی کی تھی۔