Category کرکٹ

اسلام آباد(سپورٹس ڈیسک/ایمرا نیوز) پاکستان کرکٹ ٹیم کے سابق کپتان مصباح الحق پاکستان سپر لیگ کے چوتھے ایڈیشن میں ایکشن میں نہیں ہوں گے، فرنچائز کے مینٹور کی حیثیت سے معاوضے پر بات چیت جاری ہے۔مصباح الحق نے اب تک ہونے والے پی ایس ایل کے تینوں ایڈیشنز میں اسلام آباد یونائیٹڈ کی نمائندگی کی ہے اور فرنچائز نے دو مرتبہ ٹائٹل اپنے نام کرنے کا اعزاز حاصل کیا ہے ۔

ذرائع کا کہنا ہے کہ مصباح الحق چوتھے ایڈیشن میں ایکشن میں دکھائی نہیں دیں گے ، فرنچائز نے مصباح الحق کو مینٹور کی حیثیت سے رکھنے کا فیصلہ کیا ہے ۔فریقین کے درمیان معاوضے کے معاملے پر بات چیت جاری ہے ، چوتھے ایڈیشن کے فرنچائز نے توصیف احمد کو بھی کوچنگ اسٹاف سے الگ کر دیا ہے اور ان کی جگہ آف اسپنر سعید اجمل کو کوچنگ اسٹاف میں شامل کیا جائے گا۔

دبئی(نیٹ نیوز/ایمرا نیوز) پاکستان کرکٹ ٹیم کے سابق کپتان شعیب ملک اور بھارتی ٹینس اسٹار ثانیہ مرزا کے ہاں گزشتہ روز بیٹے کی پیدائش ہوئی جس کے بعد سے دونوں اسٹارز کو نا صرف پاکستان اور بھارت سے مبارک بادیں وصول ہورہی ہیں بلکہ دنیا بھر سے انہیں نیک تمنائوں کے پیغامات موصول ہورہے ہیں۔

گزشتہ روز سماجی رابطے کی ویب سائٹ ٹوئٹر پرشعیب ملک نے پیغام جاری کرتے ہوئے بتایا کہ ان کے بیٹے کا نام رکھ دیا گیا ہے۔ پاکستانی آل رائونڈر نے اپنے پیغام میں کہا کہ ’وہ، ثانیہ مرزا اور ان کے اہل خانہ دل کی گہرائیوں سے اُن تمام لوگوں کے شکر گزار ہیں جنہوں نے بیٹے کی پیدائش پرنیک تمنائوں کا اظہار کیا۔ ‘
اس کے علاوہ انہوں نے کہا کہ ہمارے بیٹے کا نام ’اذہان مرزا ملک‘ ہے۔
دوسری جانب سوشل میڈیا پر ایک اورنئی بحث کا آغاز ہوگیا ہے کہ مرزا ملک کی شہریت کیا ہوگی ؟ وہ بھارتی کہلائے گا یا پاکستانی؟ اس حوالے سے سوشل میڈیا پر نوک جھونک جاری ہے۔ٹوئٹر پر ایک صارف نے لکھا کہ شعیب ملک اور ثانیہ مزرا کے ہاں بیٹے کی ولادت ہوئی ہے۔ اور چونکہ شعیب ملک چاہتے ہیں کہ اُن کا بیٹا بھارتی کہلائے اس لیے اس کی پیدائش یہیں (بھارت) میں ہوئی ہے۔
ایک اور کستوری شنکر نامی صارف نے ٹویٹ کرتے ہوئے کہا کہ ثانیہ مرزا اور شعیب ملک کے بیٹے کی پیدائش بھارت میں ہوئی ہے تو اس لیے وہ یہیں کا شہری ہوگا۔روبینہ جان نامی ایک خاتون صارف کا بھی یہی کہنا ہے کہ شعیب ملک کی خواہش تھی کہ اُن کے بچے کی شہریت بھارتی ہو اسی لیے وہ یہاں پیدا ہوا ہے۔اسی حوالے سے اور بھی ٹوئٹز سامنے آرہے ہیں جن میں یہ دعویٰ کیا گیا کہ یہ بچہ بھارت میں پیدا ہوا ہےتو اسی لیے یہ ’بھارتی‘ ہی کہلائے گا۔ واضح رہے بچے کی شہریت کے حوالے سے شعیب ملک نے ایک انٹرویو میں کہا تھا کہ ہمارے لیے یہ معنی نہیں رکھتا کہ بچے کی شہریت کہاں کی ہوگی، اس کی شہریت نہ پاکستان کی ہوگی اور نہ ہی بھارت کی ہوگی بلکہ اس کی شہریت کسی تیسرے ملک کی ہوگی۔

دبئی:(سپورٹس ڈیسک/ایمرا نیوز) پاکستانی اسٹار شعیب ملک نے ٹی ٹوئنٹی کرکٹ میں سب سے زیادہ 45 کیچز کا نیا ریکارڈ قائم کر دیا۔
شعیب ملک نے ٹی ٹوئنٹی کرکٹ میں سب سے زیادہ 45 کیچز تھام کر کا نیا ریکارڈ قائم کر دیا۔ انھوں نے یہ اعزاز105 میچز میں حاصل کیا، ان سے قبل سابق جنوبی افریقی کرکٹر اے بی ڈی ویلیئرز اور کیوی اسٹار روس ٹیلر 44 کیچز لے کر ان کے ہم پلہ تھے۔

لاہور(نیٹ نیوز/ایمرا نیوز) پاکستان کے مایہ ناز کرکٹر شعیب ملک اور بھارتی ٹینس اسٹار ثانیہ مرزا کے ہاں بیٹے کی ولادت ہوئی ہے۔
شعیب ملک کے منیجر امین الحق نے ایک پیغام میں کہا ہے کہ شعیب اور ثانیہ بہت خوش ہیں۔
منیجر نے سوشل میڈیا پر اپنے پیغام میں مزید کہا ہے کہ نام اور تصاویر بہت جلد جاری کی جائیں گی۔
شعیب ملک نے بھی اپنے پیغام میں خوشی کا اظہار کرتے ہوئے کہا ہے کہ ماں اور بچہ خیریت سے ہیں۔
انہوں نے کہا کہ نیک تمناؤں اور دعاؤں کے لیے فینز کا شکرگزار ہوں۔

لاہور: (سپورٹس ڈیسک/ایمرا نیوز) پاکستان کرکٹ بورڈ نے نیوزی لینڈ کے خلاف تین ٹی ٹونٹی سیریز کے لئے ٹیم کا اعلان کر دیا ہے، کیویز کے خلاف وہی اسکواڈ برقرار رکھا گیا جس نے کینگرز کا شکار کیا تھا۔سلیکشن کمیٹی نے فاتح سکواڈ کو نہ چھیڑنے کا فیصلہ کیا ہے، پی سی بی کے مطابق سلیکشن کمیٹی نے ٹیم منجمنٹ کی مشاورت سے وہی سکواڈ برقرار رکھا جو آسٹریلیا کے خلاف میدان میں اترا، سرفراز احمد کیویز کے خلاف بھی گرین شرٹس کی قیادت کریں گے۔محمد عامر مسلسل دوسری بار ٹیم سے ڈراپ، 15 رکنی سکواڈ میں فخر زمان، محمد حفیظ، صاحبزادہ فرحان، بابر اعظم، شعیب ملک، آصف علی، حسین طلعت، شاداب خان، شاہین شاہ آفریدی، عثمان شنواری، حسن علی، عماد وسیم، وقاص مقصود اور فہیم اشرف شامل ہیں۔

دونوں ٹیموں کے درمیان ٹی ٹونٹی سیریز کا آغاز 31 اکتوبر سے ابوظہبی سے ہوگا جب کہ دوسرا اور تیسرا میچ 2 اور 4 نومبر کو دبئی میں شیڈول ہے۔

لاہور(نیٹ نیوز) قائداعظم ٹرافی کرکٹ ٹورنامنٹ دوسرے کوارٹر فائنل میں حبیب بینک نے سوئی سدرن گیس کی ٹیم کو شکست دے دی ۔ سینئر قومی کرکٹر بھی ڈومیسٹک ٹورنامنٹ میں ایکشن میں نظر آئے ۔ قائد اعظم ٹرافی قذافی سٹیڈیم میں دوسرے کوارٹر فائنل میں حبیب بینک اور سوئی سدرن گیس کی ٹیموں میں جوڑ پڑا ۔سینئر کھلاڑی محمد عامر، عمر گل، عمر اکمل، فواد عالم اور سہیل خان بھی ٹورنامنٹ کا حصہ بنے ۔ ایک روزہ میچ میں حبیب بینک نے پہلے کھیلتے ہوئے 8 وکٹوں کے نقصان پر 320 رنز بنائے۔ جمال انور نے شاندار سنچری سکور کرکے 119 رنز بنائے جبکہ عمر اکمل نے 56 رنز کی اننگ کھیلی۔ سہیل خان نے تین اور محمد عامر نے دو کھلاڑیوں کو پویلین کی راہ دکھائی ۔سوئی سدرن گیس کی ٹیم 321رنز کے ہدف کے تعاقب میں 154 رنز بناکر آؤٹ ہوگئی ۔ عماد بٹ نے 4، عبدالرحمن نے 3 اور سلمان آغا نے2 کھلاڑیوں کو آؤٹ کیا۔ سوئی سدرن گیس کے فواد عالم نے 56 رنزسمیٹے ، حبیب بینک نے 166 رنز سے میچ جیت کر سیمی فائنل کے لیے کوالیفائی کر لیا۔ واپڈا اور حبیب بینک کی ٹیموں نے سیمی فائنل تک رسائی حاصل کرلی ہے ۔جبکہ تیسرا کوارٹر فائنل خان ریسرچ لیبارٹری اور ملتان ریجن کے درمیان کھیلا جائے گا ۔

دبئی(سپورٹس ڈیسک/ایمرا نیوز)سرفراز الیون نے تاریخ رقم کردی‘پاکستان کا آسٹریلیا کے خلاف پہلی بار کلین سوئپ،تیسرے ٹی ٹوئنٹی میں آسٹریلیا کو 33رنز سے شکست دے دی۔ شاداب خان مین آٖف دا میچ‘بابر اعظم مین آف دا سیریز قرار پائے۔تفصیلات کے مطابق،پاکستانی کرکٹ ٹیم نے ایک اور شاندار کارکردگی کا مظاہرہ کرتے ہوئے آسٹریلیا کے خلاف تیسرا ٹی ٹوئینٹی انٹر نیشنل 33رنز سے جیت لیا اور سیریز میں وائٹ واش مکمل کیا۔میزبان ٹیم نے ٹیسٹ سیریز بھی ایک صفر سے جیتی تھی۔پاکستانی ٹیم نے سرفراز احمد کی قیادت میں نئی تاریخ رقم کرتے ہوئے پہلی بارآسٹریلین ٹیم کے خلاف کلین سوئپ کیا۔آسٹریلیا کی ٹیم پانچ گیندیں پہلے117رنز بناکر آوٹ ہوگئی۔ون ڈے یا ٹی ٹوئینٹی میں پاکستان نے آسٹریلیا کے خلاف پہلی بار سیریز کے تمام میچ جیتے ہیں۔گذشتہ دو سالوں میں پاکستانی ٹیم کو ئی ٹی ٹوئینٹی سیریز نہیں ہاری ہے اور اس نے عالمی نمبر ایک پوزیشن کو برقرار رکھا ہوا ہےپاکستانی ٹیم سرفراز احمد کی کپتانی

میں پانچویں بار سیریز میں کلین سوئپ کرنے میں کامیاب ہوئی ہے۔پاکستان نے ویسٹ انڈیز اور سری لنکا کو بھی تین صفر سے شکست دی ہے۔آسٹریلیا کے خلاف پاکستان نے مسلسل پانچواں ٹی ٹوئینٹی جیتا ہے۔مہمان ٹیم کی اننگز میں مچل مارش24گیندوں پر21رنز بناکر نمایاں رہے۔ پاکستانی بولروں نے زبردست بولنگ کی اور فیلڈنگ بھی غیر معمولی رہی۔شعیب ملک نے دو مشکل کیچ لئے۔شاداب خان نے19رنز دے کر تین وکٹ حاصل کئے۔آسٹریلوی اننگز کا آغاز جارحانہ انداز میں ہوا۔ابتدائی دو میچوں کے ہیرو عماد وسیم کے پہلے اوورمیںایلکس کیری نے20رنز بناد یئے ۔لیکن پھر پاکستانی بولنگ نے اسٹرائیک کیا۔ کیری20فنچ ایک،کرس لین15بین میکڈرمٹ21اور گلین میکس ویل چار رنز بناکر آوٹ ہوئے۔بین میکڈرمٹ نے سیریز میں لگاتار تیسری مرتبہ رن آئوٹ ہوکر ہیٹ ٹرک مکمل کی۔قبل ازیں پاکستان نے پہلے بیٹنگ کرتے ہوئے پانچ وکٹ کے نقصان پر150رنز بنائےبابر اعظم نے 50رنز بنائے۔ انہوں نےایک چھکا اور پانچ چوکے مارے۔24سالہ بابر اعظم نے پہلے میچ میں68ناٹ آوٹ اور دوسرے میچ میں45رنز بنائے تھے۔

(نیٹ نیوز/میڈیا 92 نیوز) آسٹریلیا کے خلاف تیسرے اور آخری ٹی 20 انٹرنیشنل میچ میں پاکستان نے ٹاس جیت کر بیٹنگ کا فیصلہ کیا ہے ۔

دبئی انٹرنیشنل اسٹیڈیم پر کھیلے جارہے میچ میں پاکستان ٹیم کے کپتان سرفراز احمد اور آسٹریلوی ٹیم کے قائدایرون فنچ میدان میں اترے ۔

سرفراز الیون میں آج کے میچ کےلئے دو تبدیلی کی گئیں،اوپنر فخر زمان اور فاسٹ بولر شاہین آفریدی کی جگہ صاحبزادہ فرحان اور عثمان شنواری کو ٹیم میں شامل کیا گیا ہے۔

آسٹریلوی کپتان نے بھی ٹیم میں ایک تبدیلی کی ہے بلی اسٹین لیک کی جگہ نیتھن لائن کو فائنل الیون میں شامل کیا ہے۔

دونوں ٹیموں کے درمیان 2 میچز ہوچکے ہیں جن میں پاکستان کا پلڑا بھاری رہا ،گرین شرٹس نے پہلا میچ 66 اور دوسر میچ دلچسپ مقابلے کے بعد 11 رنز سے اپنے نام کیا اور تین میچوں کی سیریز میں برتری حاصل کرلی ۔

مسلسل فتوحات کے باعث پاکستانی ٹیم آسٹریلیا کے خلاف ٹی 20 سیریز میں کلین سوئپ فتح کے لئے پرعزم ہے ۔

نیوزی لینڈ(نیٹ نیوز)
نیوزی لینڈ ٹیم نے پاکستان کے خلاف ٹی ٹونٹی سیریز کی تیاریاں شروع کر دیں ، کیوی بیٹنگ کوچ کریگ میک ملن سیریز کو ایک چیلنج قرار دے رہے ہیں۔

پاکستان کی آسٹریلیا کے خلاف ٹی ٹونٹی سیریز کے بعد ہو گی نیوزی لینڈ سیریز جس کے لیے کیویز کا ٹی ٹونٹی اسکواڈ ابوظبی میں موجود ہے اور مقابلے کی تیاریوں میں مصروف ہے۔
پاکستان اور نیوزی لینڈ کے درمیان مقابلہ تینوں فارمیٹ میں ہوگا، پہلے مرحلے میں ٹی ٹونٹی سیریز کا آغاز ہوگا جس کے میچز 31 اکتوبر ، 2 نومبر اور 4 نومبر کو کھیلے جائیں گے۔

اس حوالے سے نیوزی لینڈ کے بیٹنگ کوچ میک ملن کا کہنا ہے کہ پاکستان ٹیم اس وقت ٹی ٹونٹی کی نمبر ون ٹیم ہے جس کا بولنگ اٹیک بہت اچھا ہے ، بولر ریورس سوئنگ بھی کرتے ہیں اور اسپن بھی ،جبکہ یو اے ای کنڈیشنز پاکستان ٹیم کو سوٹ کرتی ہیں اس لیے یہ سیریز ایک چیلنج ہے۔

میک ملن کہتے ہیں کہ انہوں نے پاکستان اور آسٹریلیا کے میچز دیکھے ہیں پاکستان ٹیم نے شاندار کھیل کا مظاہرہ کیا لیکن نیوزی لینڈ ٹیم میں بھی ٹی ٹونٹی کرکٹ کے تجربہ کار کرکٹرز شامل ہیں۔

ان کا کہنا تھا کہ ہماری ٹیم نے 2014 میں بھی اچھا کھیلا تھا اس مرتبہ بھی یہی کوشش ہوگی۔

لاہور(نیٹ نیوز)پاکستان کرکٹ بورڈ کے سابق چیئرمین نجم سیٹھی نے پی سی بی کی جانب سے ان کے اخراجات سے متعلق تفصیلات کو اپنے خلاف مہم قرار دے دیا۔

گزشتہ روز پاکستان کرکٹ بورڈ کی جانب سے سابق چیئرمین نجم سیٹھی کے چار سالہ دور کے اخراجات کی تفصیلات جاری کی گئیں جس کے مطابق نجم سیٹھی پر پی سی بی کے 7 کروڑ سے زائد خرچ ہوئے۔

پاکستان کرکٹ بورڈ کے سابق چیئرمین نجم سیٹھی نے پی سی بی کی طرف سے جاری تفصیلات پر سماجی رابطے کی سائٹ ٹوئٹر پر اپنے رد عمل کا اظہار کیا۔

انہوں نے کہا کہ میرے خلاف مہم پی سی بی میں نئی مافیا کی اختراع ہے، حقائق اور اعدادو شمار کو مسخ کرکے پیش کیا گیا ہے۔

نجم سیٹھی کا کہنا تھا کہ مجھے بدنام کرنے کی مہم زیادہ دیر جاری نہیں رہ سکے گی۔